កម្ពុជាគ្រោងនឹងសាងសង់ផ្លូវល្បឿនលឿនមួយខ្សែតភ្ជាប់ រាជធានីភ្នំពេញទៅស្រុកអារញ្ញខេត្តស្រះកែវ ប្រទេសថៃ ។

កាសែតខ្មែរថាមស៍ បានអោយដឹងកាលពីថ្ងៃចន្ទថាមន្ត្រីកម្ពុជាបានចុះមូលដ្ឋាន កាលពីសប្តាហ៍មុន ដើម្បីពិនិត្យទីតាំងមួយចំនួន ដែលត្រូវប្រើប្រាស់សម្រាប់គម្រោងនេះ ។ ពួកគេនឹងដាក់សំណើពង្រាងរួមទាំងការសិក្សាសមិទ្ធិលទ្ធផល ទៅរដ្ឋាភិបាលក្នុងខែមិថុនា ។គម្រោងផ្លូវល្បឿនលឿន នឹងមាន ប្រវែង៤២០ គីឡូម៉ែត្រ ដែលនឹងជួយសម្រួលដល់ការធ្វើពាណិជ្ជកម្ម តាមផ្លូវគោករវាងប្រទេសទាំងពីរ ។

ការសាងសង់ នឹងមានពីរដំណាក់កាល ។ ដំណាក់កាលទី១ គឺភ្នំពេញទៅសៀមរាប និង ដំណាក់កាលទី២ ពីសៀមរាបទៅប៉ោយប៉ែតទល់នឹងស្រុកអារញ្ញខេត្តស្រះកែវ ។ច្រកព្រំដែនស្រុកអារញ្ញជាច្រកពាណិជ្ជកម្មនិងទេសចរណ៍សំខាន់សម្រាប់កម្ពុជា និង ថៃ ។ khmer times

ដោយៈ គង់ ហ្វីអូណា

ភ្នំពេញៈ ក្រុមប្រឹក្សាបរធនបាលនៃសហគ្រិនខ្មែរ បានសម្រេចអនុម័តផែនការម្រាប់ឆ្នាំ២០២៤ ដើម្បីជំរុញនវានុវត្តន៍ដល់សហគ្រាសក្នុងស្រុក ជាពិសេសក្នុងវិស័យសំខាន់ៗ ដូចជា វិស័យកាត់ដេរនិងវាយនភ័ណ្ឌ វិស័យសេដ្ឋកិច្ចក្រៅប្រព័ន្ធ ក្នុងការលើកកម្ពស់កម្មវិធីអភិវឌ្ឍប្រកបដោយចីរភាព។

ការអនុម័តនេះ បានធ្វើឡើងក្នុងកិច្ចប្រជុំក្រុមប្រឹក្សាបរធនបាលនៃសហគ្រិនខ្មែរលើកទី១៥ ដែលដឹកនាំលោក ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាល នៃសហគ្រិនខ្មែរ កាលពីថ្ងៃទី២៥ ខែមករា ឆ្នាំ២០២៤ ដែលកិច្ចប្រជុំកិច្ចនេះ បានផ្តោតលើការកំណត់ទិសដៅយុទ្ធសាស្រ្តរបស់សហគ្រិនខ្មែរសម្រាប់ឆ្នាំ២០២៤។
លោក ហែម វណ្ណឌី បានលើកឡើងថា រាជរដ្ឋាភិបាលនីតិកាលទី៧នៃរដ្ឋសភា កំពុងយកចិត្តទុកដាក់ជាពិសេស លើការអភិវឌ្ឍវិស័យឯកជន ដូចបានកំណត់ក្នុងយុទ្ធសាស្ត្របញ្ចកោណ ដំណាក់កាលទី១។ សហគ្រិនខ្មែរ ដែលជាបរធនបាលកិច្ចរបស់រាជរដ្ឋាភិបាល បានទទួលភាពជោគជ័យ គួរឱ្យកត់សម្គាល់ចាប់តាំងពីការចាប់ផ្តើមប្រតិបត្តិការ ហើយត្រូវបន្តកសាងប្រព័ន្ធអេកូឡូស៊ី សហគ្រិនភាព ដោយដើរតួនាទីយ៉ាងសំខាន់ ក្នុងការជំរុញកំណើនធុរកិច្ចថ្មី និងសហគ្រាសធុនតូច និងមធ្យម តាមរយៈភាពជាដៃគូជាមួយស្ថាប័នដៃគូក្នុងស្រុក និងអន្តរជាតិ។

លោកបានបន្ថែមថា “កិច្ចការនេះនឹងត្រូវសម្រេចបាន តាមរយៈការគាំទ្រផ្នែកបច្ចេកទេស និងហិរញ្ញវត្ថុ ដែលមានភាពប្រទាក់ក្រឡា ដើម្បីធានាបាននូវលទ្ធភាពជោគជ័យ និងវិសាលភាពរបស់អាជីវកម្ម”។

ជាមួយគ្នានោះដែរ លោក ឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរបានលើកឡើងថា សហគ្រិនខ្មែរ បាននិងកំពុងរៀបចំគម្រោងដែលមានសក្តានុពលជាច្រើន មានទាំងគំនិតផ្តួចផ្តើមថ្មីៗ និងការពង្រីកកម្មវិធី ដែលកំពុងដំណើរការស្រាប់ ដើម្បីឱ្យកាន់តែមានភាពប្រទាក់ក្រឡា និងប្រសិទ្ធភាពដល់សហគ្រិនក្នុងស្រុក នៅក្នុងវិស័យពាក់ព័ន្ធ។

លោកបានបញ្ជាក់ទៀតថា “សហគ្រិនខ្មែរ មានការប្តេជ្ញាចិត្ត ក្នុងការរៀបចំ និងអនុវត្តកម្មវិធីឱ្យស្របតាមអាទិភាព ជាយុទ្ធសាស្ត្ររបស់រាជរដ្ឋាភិបាលឱ្យបានពេញលេញ ក្នុងគោលបំណងពង្រីកសក្តានុពលរបស់សហគ្រិន”។

កិច្ចប្រជុំក្រុមប្រឹក្សាបរធនបាលនៃសហគ្រិនខ្មែរ ដែលមានសមា​សភាពមកពីរាជរដ្ឋាភិបាល និងវិស័យឯកជននេះបានសម្រេចជាផ្លែផ្កាក្នុងការប្តេជ្ញាជំរុញ និងអភិវឌ្ឍសហគ្រាស ធុនតូចនិង មធ្យម និងធុរកិច្ចបង្កើតថ្មី លើវិស័យស្នូលទាំង៤ របស់សហគ្រិនខ្មែរគឺ កសិកម្ម សេវាកម្ម បច្ចេកវិទ្យា និងផលិតកម្ម៕

ដោយ: គង់ លាងហួរ

អន្តរជាតិ: តុលាការទីក្រុងហុងកុង បានបញ្ជាឱ្យរំលាយចោលក្រុមហ៊ុនអចលនទ្រព្យខ្នាតយក្សរបស់ចិន Evergrande បន្ទាប់ពីក្រុមហ៊ុនមួយនេះ អស់លទ្ធភាពសងបំណុល ប្រមាណ៣០០ពាន់លានដុល្លាររបស់ខ្លួន។

ក្រុមហ៊ុន Evergrande Group ត្រូវបានគេមើលឃើញថា ជាក្រុមហ៊ុនអចលនទ្រព្យខ្នាតយក្ស របស់ប្រទេសចិនដែលបានខកខានទូទាត់សងបំណុលរបស់ខ្លួន គិតចាប់តាំងពីឆ្នាំ២០២១មកម្ល៉េះ។

លោកចៅក្រម Linda Chan បានមានប្រសាសន៍ថា “វាល្មមបញ្ឈប់បានហើយ ព្រោះក្រុមហ៊ុនអភិវឌ្ឍន៍ Evergrande បានជួបប្រទះបញ្ហាម្តងហើយម្តងទៀត និងបានបរាជ័យក្នុងការបង្កើតផែនការដើម្បីរៀបចំរចនាសម្ព័ន្ធបំណុលរបស់ខ្លួនឡើងវិញ”។លោក Shawn Siu នាយកប្រតិបត្តិរបស់ក្រុមហ៊ុន Evergrande បានចាត់ទុកការសម្រេចចិត្តនេះថាជា រឿងគួរឱ្យសោកស្តាយ ប៉ុន្តែលោកបានបញ្ជាក់ថា ក្រុមហ៊ុននឹងបន្តធ្វើប្រតិបត្តិការនៅក្នុងតំបន់ចិនដីគោក។

លោកបានឱ្យដឹងបន្ថែម នៅក្នុងសេចក្តីថ្លែងការណ៍មួយថា សាខានៅក្នុងទីក្រុងហុងកុង របស់ក្រុមហ៊ុន Evergrande គឺមានភាពឯករាជ្យ ពីអាជីវកម្មនៅតំបន់ចិនដីគោករបស់ខ្លួន។

លោក Shiu Shawn បានឱ្យដឹងទៀតថា ការបញ្ជាឱ្យរំលាយក្រុមហ៊ុននឹងមិនជះផលប៉ះពាល់ ទៅលើគម្រោងសាងសង់ផ្ទះឡើយ ពោលគឺគម្រោងនៅតែដំណើរការធម្មតាដដែល បើទោះបីជាមានការបញ្ជាឱ្យរំលាយក្រុមហ៊ុនយ៉ាងណាក្តី។

សេចក្តីសម្រេចខាងលើ របស់តុលាការទីក្រុងហុងកុង ក៏អាចនឹងបង្កភាពច្របូកច្របល់បន្ថែមទៀត សម្រាប់ទីផ្សារហិរញ្ញវត្ថុរបស់ប្រទេសចិន ស្របពេលដែលអាជ្ញាធរចិន កំពុងព្យាយាមទប់ស្កាត់ការសម្រុកលក់ភាគហ៊ុនចេញ។

ជាក់ស្តែង ភាគហ៊ុនរបស់ក្រុមហ៊ុន Evergrande នៅលើផ្សារហ៊ុនក្រុងហុងកុង បានដាំក្បាលចុះ២០% កាលពីថ្ងៃច័ន្ទ ហើយនៅពេលនេះ ភាគហ៊ុនក៏ត្រូវបានគេផ្អាក មិនឱ្យធ្វើការជួញដូរជាបណ្ដោះ អាសន្នថែមទៀតផង៕ប្រភព៖BBC៕

ដោយ: គង់ លាងហួរ

ហ្សាការតា: រដ្ឋមន្ត្រីមួយរូបបានមានប្រសាសន៍ឱ្យដឹងថា រដ្ឋាភិបាលឥណ្ឌូនេស៊ី កំពុងបង្កើតមូលនិធិទេសចរណ៍មួយ ដើម្បីគាំទ្រដល់ការអភិវឌ្ឍវិស័យទេសចរណ៍ ប្រកបដោយនិរន្តរភាព និងទាក់ទាញភ្ញៀវទេសចរឱ្យបានកាន់តែច្រើន។

លោក Sandiaga Uno រដ្ឋមន្ត្រីទេសចរណ៍ និងសេដ្ឋកិច្ចច្នៃប្រឌិតរបស់ឥណ្ឌូនេស៊ី បានលើកឡើងថា មូលនិធិទេសចរណ៍ ដែលគ្រោងនឹងដាក់ឱ្យដំណើរការ នៅដើមឆ្នាំ២០២៤ នឹងគ្រប់គ្រងមូលនិធិដំបូងចំនួន២ពាន់ពាន់លានរូពៀ (ប្រហែល១២៩,៣លានដុល្លារអាមេរិក)។លោករដ្ឋមន្រ្តីឥណ្ឌូនេស៊ីរូបនេះបានគូសបញ្ជាក់ថា ការបង្កើតមូលនិធិខាងលើ មានគោលដៅគាំទ្រ ដល់ការផ្សព្វផ្សាយព្រឹត្តិការណ៍ទេសចរណ៍ និងកែលម្អម៉ាកយីហោទេសចរណ៍ របស់ប្រទេសឥណ្ឌូនេស៊ីនៅក្នុងទីផ្សារពិភពលោក។

លោកបានថា“ យើងនឹងប្រើប្រាស់មូលនិធិនេះ ដើម្បីគាំទ្រដល់ការរៀបចំព្រឹត្តិការណ៍ជាតិ និងអន្តរជាតិ ដូចជាកីឡា តន្ត្រី និងសិល្បៈវប្បធម៌ ដែលនឹងប្រារព្ធឡើងនៅក្នុងប្រទេសឥណ្ឌូនេស៊ី”។ប្រទេសឥណ្ឌូនេស៊ីនឹងធ្វើជាម្ចាស់ផ្ទះ ក្នុងព្រឹត្តិការណ៍ខ្នាតអន្តរជាតិចំនួន៣ ក្នុងឆ្នាំ២០២៤នេះ រួមមាន ព្រឹត្តិការណ៍ BWF Badminton World Tour-Indonesia Masters វេទិកាទឹកពិភពលោកលើកទី១០ និងព្រឹត្តិការណ៍Indonesia MotoGP នៅទីក្រុង Mandalika។

លោក Uno បានអះអាងថា របៀបវារៈទាំងនោះត្រូវបានគេរំពឹងថា នឹងជួយដល់ការស្តារឡើងវិញ នៃវិស័យទេសចរណ៍របស់ប្រទេសឥណ្ឌូនេស៊ី ក្រោយការបញ្ចប់ទៅនៃជំងឺរាតត្បាតកូវីដ-១៩។

យោងតាមស្ថិតិឥណ្ឌូនេស៊ី (BPS) បានឱ្យដឹងថា គិតចាប់ពីខែមករាដល់ខែតុលា ឆ្នាំ២០២៣ ប្រទេសឥណ្ឌូនេស៊ីបានកត់ត្រាការមកដល់របស់ភ្ញៀវទេសចរចំនួន៩,៤៩លាននាក់ គឺខ្ពស់ជាងគោលដៅ ដែលរដ្ឋាភិបាល បានដាក់ចេញចំនួន៧,៤លាននាក់ កាលពីដើមឆ្នាំមុន៕Xinhua៕

ដោយៈ គង់ សូរិយា

        ភ្នំពេញៈ Korean Senior Citizens Association of Cambodia (KSCAC)​ រួម​នឹង​ក្រុមហ៊ុន​ដៃគូ​សហការ​កូរ៉េ ចង់​វិនិយោ​គ​ផលិតផល​កសិកម្ម ដែលមាន​សក្តានុពល​ចំនួន៧​មុខ​របស់​កម្ពុជា​សម្រាប់​នាំ​ចេញទៅ​កូរ៉េ ​និងប្រទេស​ចិន។

​ដំណាំ​ទាំង​៧​មុខ ដែល​ខាង​សមាគម KSCAC រួម​នឹង​ក្រុម​ហ៊ុន​ដៃគូ​សហការ​កូរ៉េ​ចង់​បោះ​ទុនវិនិយោគ​នោះ​រួមមាន ម្រេច ស្វាយស​ម្ងួ​ត ចេកឆាប ប្រេងល្ង ផលិតផល​វារីវប្បកម្ម ដើម​គ​សម្រាប់​កែច្នៃ និង​ដើម​កៅស៊ូ​កែច្នៃ​ជាដើម​។​

ក្នុង​កិច្ចពិភាក្សា​ការងារ​រវាង​លោក​ប្រាក់ ដា​វីដ រដ្ឋលេខា​​ធិ​ការ​ក្រសួងកសិកម្ម រុក្ខាប្រមាញ់ និងនេសាទ ​និង​លោក Kim Moon Baik អនុប្រធាន​សមាគម Korean Senior Citizens Association of Cambodia(KSCAC)​ និង​ក្រុមហ៊ុន​កូរ៉េ​មួយចំនួនទៀត ភាគី​ទាំង​ ២ ​បាន​ពិភាក្សាគ្នា​យ៉ា​ស៊ីជម្រៅ​ លើ​វិនិយោគ​លើ​ដំណាំ​សក្តានុពល​ទាំង ៧ ​មុខ​នេះ ជាពិសេស​លើ​ប្រភេទ​ដំណាំង​ល្ង​។ នេះ​បើ​យោងតាម​ការផ្សព្វផ្សាយរ​បស់​ក្រសួងកសិកម្ម​នៅ​ថ្ងៃទី​ ២៨ ខែមករា ឆ្នាំ​ ២០២៤​។​ក្នុងជំនួប​នោះ លោក Kim Moon Baik បាន​លើកឡើងថា ខាង​ភាគី​ក្រុមហ៊ុន​ បាន​ចាប់​អា​រ​ម្មណ៍​លើ​ផលិតផល ​សក្តានុពលរ​បស់​កម្ពុជា មានដូចជា  ​ម្រេច  ​ស្វាយស​ម្ងួ​ត ចេកឆាប ល្ង​ (​ប្រេង​​ល្ង​) វារីវប្បកម្ម ដើម​គ​កែច្នៃ និង​ដើម​កៅស៊ូ​កែច្នៃ​ជាដើម​។​

ជាមួយគ្នានេះ​ លោក​ក៏បាន​កោតសរសើរ ​ពី​ផលិតផល​ក​សិ​​កម្ម​កម្ពុជា​ផងដែរ​ថា​ ​ផលិត​ផល​កសិកម្ម​កម្ពុជា ជា​ផលិតផល​ដែលមាន​គុណភាព​ខ្ពស់​រសជាតិ​ឆ្ងាញ់ ធ្វើឱ្យ​ប្រជាជន​កូរ៉េ​ចូលចិត្ត​បរិភោគ​។

ដោយ​មើលឃើញ​ពី​សក្តានុពល ​វិ​និ​យោគ​ទាំងនេះហើយ​ទើប​ក្រុម​ហ៊ុន​មានបំណង ​មិន​ត្រឹមតែ​ចង់​នាំចូល​ទៅកាន់​ទីផ្សារ​កូរ៉េ​ប៉ុណ្ណោះ​ទេ ​ថែមទាំង​ចង់​ពង្រីក​ការនាំ​ចូល ​ផលិតផល​កសិកម្ម​កម្ពុ​ជា​ទៅកាន់​ទីផ្សារ​ជប៉ុន និង​ទីផ្សារ​ចិន​ផងដែរ​។​

លោក ប្រាក់ ដា​វីដ ក៏បាន​ស្វាគមន៍​និង​រីករាយ ​ដែល​ក្រុមហ៊ុន​កូរ៉េ​ ចង់​ស្វែងយល់​ពី​សក្តានុពល​ ផលិតផល​កសិកម្ម​កម្ពុ​ជា​ដោយ​ទទួល​នូវ​អនុសាសន៍​ណែនាំ ​ពី​ក្រសួងកសិកម្ម​ធ្វើយ៉ាងណា​ឱ្យ​ការវិនិយោគ​នេះ ​ស្របតាម​គោលនយោបាយ​របស់​រាជ​រដ្ឋាភិបាល ​និង​ក្រសួង​ក​សិ​កម្ម រុក្ខាប្រមាញ់ និង​នេសាទ​។​

លោក​បាន​បន្ថែមថា ​ក្រសួងកសិកម្ម​ពិតជា​អរគុណ​ដល់​ក្រុមហ៊ុន​កូរ៉េ​ ដែល​បាន​មើលឃើញ​ពី​សក្តានុពល​នៃ​ដំណាំ​កសិកម្ម របស់​កម្ពុជា​ សម្រាប់​កែច្នៃ​និង​នាំចេញ ​ដែល​អាច​ទទួលបាន​នូវ​អត្ថប្រយោជន៍​ជាច្រើន ​ក្រោម​ក្របខ័ណ្ឌ​កិច្ច​ព្រម​ព្រៀង​ពាណិជ្ជកម្ម​សេរី​កម្ពុជា​-​កូរ៉េ កម្ពុជា​-​ចិន និង​ពិសេស​កិច្ចព្រមព្រៀង​ RCEP។ចំណែកអ្នកឧកញ៉ា​ហ៊ុន ឡាក់ អគ្គនាយក​ក្រុមហ៊ុន​ឡុង​ម៉េ​ត​និង​ត្រូ​ពិ​ក​ខេ​ម ដែល​ដាំ​ដុះ និង​នាំចេញ​ផលិតផល​កសិកម្ម​កម្ពុ​ជា​បាន​ប្រាប់​នៅ​ថ្ងៃទី​ ២៨ ខែមករា ឆ្នាំ​ ២០២៤ ដោយ​លោក​បានបង្ហាញ​ពី​ការយល់ឃើញថា កម្ពុជា ពិតជា​ត្រូវការ​ការវិនិយោគ​ច្រើន​ ពី​សំណាក់​វិស័យ​ឯកជន ទាំង​ក្រុមហ៊ុន​ក្នុងស្រុក និង​ក្រុមហ៊ុន​បរទេស​លើ​វិស័យ​កសិកម្ម​ដែលជា​វិស័យ​ស្នូល​មួយ​របស់​កម្ពុជា​។​

លោក​បាន​បន្តថា “បញ្ហា​ប្រែ​ប្រួល​អាកាសធាតុ​ នឹងធ្វើ​ឱ្យមាន​បញ្ហា​សន្តិសុខ​ស្បៀង ​ជាហេតុ​ធ្វើឱ្យ​ផលិតផល​កសិកម្ម ​កាន់​តែមាន​តម្លៃនៅលើទីផ្សារ”។ លោកបន្តថា “ដូច្នេះ​ការវិនិយោគ​វិស័យ​កសិកម្ម​ពិតជា​មា​នស​ក្តា​នុព​ល​នាពេល​អនាគត​។ ប៉ុន្តែ​វិស័យ​កសិកម្ម​នេះ​ក៏​ប្រឈម​ណាស់ដែរ ចំពោះ​ការប្រែប្រួល​អាកាសធាតុ​ ដែល​ធ្វើឱ្យ​ការចំណាយ​លើ​វត្ថុ​ធាតុ​ដើម​កសិកម្ម​កាន់តែច្រើន​”៕

ដោយ: គង់ លាងហួរ

ភ្នំពេញ: សម្ដេចធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា បានជួបពិភាក្សាជាមួយលោកស្រី Mariam J. Sherman នាយិកាគ្រប់គ្រងធនាគារពិភពលោកប្រចាំកម្ពុជា មីយ៉ាន់ម៉ា និងឡាវ ក្នុងឱកាស នៃដំណើរបំពេញបេសកកម្មរបស់លោកស្រីនៅកម្ពុជា។

ក្នុងជំនួបនោះ លោកស្រីនាយិកា បានថ្លែងអំណរគុណយ៉ាងជ្រាលជ្រៅចំពោះ សម្តេចធិបតី ដែលបានចំណាយពេលដ៏មមាញឹកអនុញ្ញាតឱ្យលោកស្រី និងសហការី ចូលជួបសម្តែងការគួរសម និងពិភាក្សាការងារ។

ជាមួយគ្នានេះ លោកស្រីក៏បានវាយតម្លៃខ្ពស់ផងដែរ ចំពោះវឌ្ឍ នភាព និងភាពល្អប្រសើរនៃកិច្ចសហប្រតិបត្តិការ រវាងធនាគារពិភពលោក និងរដ្ឋាភិបាលកម្ពុជា ដែលមានភាពមាំមួន និងយូរអង្វែង ។លោកស្រីបានបង្ហាញជំនឿយ៉ាងមុតមាំថា ជំនួបជាមួយសម្ដេចធិបតី នាឱកាសនេះនឹងបន្ដជំរុញនូវកិច្ច សហប្រតិបត្តិការជាមួយរដ្ឋាភិបាលកម្ពុជាបន្ថែមទៀត។

លើសពីនេះ លោកស្រីនាយិកា ក៏បានលើកឡើងពីភាពប្រទាក់ក្រឡា និងស្របគ្នានៃឯកសារគោលនយោបាយអភិវឌ្ឍ ជាពិសេសយុទ្ធសាស្ត្របញ្ចកោណ-ដំណាក់កាលទី១ របស់រដ្ឋាភិបាលកម្ពុជា ជាមួយនឹងទិសដៅគោលនយោបាយ និងការងារសំខាន់ៗ របស់ធនាគារពិភពលោក ក្នុងកម្រិតសកល និងក្នុងកម្រិតប្រទេសកម្ពុជាផងដែរ។

ជាការឆ្លើយតប សម្តេចធិបតី បានស្វាគមន៍ចំពោះ លោកស្រីMariam J. Sherman ដែលបានអញ្ជើញមកបំពេញបេសកកម្ម នៅកម្ពុជា និងបានសម្តែងសេចក្តីសោមនស្សរីករាយ និងថ្លែងអំណរគុណដល់ធនាគារពិភពលោក ចំពោះការចូលរួមការអភិវឌ្ឍសង្គម-សេដ្ឋកិច្ចកម្ពុជា នាពេលកន្លងមក។សម្ដេចធិបតី បានកោតសរសើរ និងអរគុណចំពោះការប្តេជ្ញាចិត្ត នៃការបន្តកិច្ចសហប្រតិបត្តិការ របស់ធនាគារពិភពលោកជាមួយរដ្ឋាភិបាលកម្ពុជា ជាពិសេសការបន្តកម្មវិធី ភាពជាដៃគូរវាងរាជរដ្ឋាភិបាលជាមួយធនាគារពិភពលោកសម្រាប់ ឆ្នាំ២០២៥-២០២៩។

សម្តេចធិបតី ក៏បានគូសបញ្ជាក់ផងដែរអំពី ការដាក់ចេញកម្មវិធីគោលនយោបាយអាទិភាពទាំង៦ សម្រាប់ចាប់ផ្តើមអនុវត្តភ្លាមៗក្នុងឆ្នាំ២០២៣ និងវិធានការចំនួន៥ សម្រាប់ដោះស្រាយ ក្នុងនីតិកាលទី៧ នៃរដ្ឋសភា សំដៅលើកកម្ពស់ជីវភាពរស់នៅ របស់ប្រជាពលរដ្ឋ តាមរយៈការកសាងភាពធន់ ការធានាកំណើនប្រកបដោយចីរភាព ដើម្បីឈានទៅសម្រេចបាន នូវចក្ខុវិស័យរបស់កម្ពុជា នាឆ្នាំ២០៥០ ក្នុងការប្រែក្លាយទៅជាប្រទេស ដែលមានប្រាក់ចំណូលខ្ពស់។

លើសពីនេះ ភាគីទាំង២ ក៏បានបង្ហាញការប្តេជ្ញាចិត្ត ក្នុងការបន្តកិច្ចសហប្រតិបត្តិការ លើការអភិវឌ្ឍមូលធនមនុស្សនៅកម្ពុជា និងនៅក្នុងវិស័យអាទិភាពមួយចំនួន រួមមានដូចជា វិស័យអប់រំ វិស័យសុខាភិបាល វិស័យកសិកម្ម វិស័យឌីជីថល វិស័យបរិស្ថាន និងការប្រែប្រួលអាកាសធាតុ៕

ដោយ: គង់ លាងហួរ

អន្តរជាតិ: យោងតាម​ការ​ព្យាករណ៍របស់​ទីភ្នាក់ងារ​អង្គការសហប្រជាជាតិ បានបង្ហាញឱ្យដឹងថា វិស័យទេសចរណ៍សកល នឹងសម្រេ ចបាននូវដំណើរការ ស្ទុះងើបឡើងវិញយ៉ាងពេញលេញ និងដល់កម្រិតមុនផ្ទុះជំងឺរាតត្បាត នៅក្នុងឆ្នាំ២០២៤នេះ។

កាលពីឆ្នាំមុន គេសង្កេតឃើញមានភ្ញៀវទេសចរអន្តរជាតិ ប្រមា ណ១,២៩ពាន់លាននាក់ នៅទូទាំងពិភពលោក ដែលស្មើនឹង៨៨ភាគរយនៃចំនួនសរុបនៅឆ្នាំ២០១៩។ វិស័យទេសចរណ៍នៅមជ្ឈិមបូព៌ាបានងើបឡើងវិញខ្លាំងជាងគេ ដែលបានរាយការណ៍ថា ចំនួនភ្ញៀវទេសចរអន្តរជាតិ បានកើនឡើង២២ភាគរយ បើធៀបនឹង៤ឆ្នាំមុន។

បើប្រៀបធៀបនឹងកម្រិតឆ្នាំ២០១៩ ការមកដល់របស់ភ្ញៀវទេសចរបរទេស កាលពីឆ្នាំមុនបានងើបឡើងវិញ ដល់៩៤ភាគរយនៅតំបន់អឺរ៉ុប។ កើនដល់៩៦ភាគរយនៅតំបន់អាហ្វ្រិក និង៩០ភាគរយនៅសហរដ្ឋអាមេរិក។ នេះបើយោងតាមអង្គការទេសចរណ៍ពិភពលោករបស់អង្គការសហប្រជាជាតិ(UNWTO)។ប៉ុន្តែបើធៀបនឹងកម្រិតឆ្នាំ២០១៩ដូចគ្នា ការមកដល់របស់ភ្ញៀវទេសចរបរទេសកាលពីឆ្នាំមុន បានងើបឡើងវិញដល់៦៥ភាគរយប៉ុណ្ណោះ សម្រាប់តំបន់អាស៊ីប៉ាស៊ីហ្វិក ដោយប្រទេសដែនកោះម៉ាល់ឌីវ និងហ្វីជី ស្ថិតក្នុងចំណោមគោលដៅ ទេសចរណ៍ដ៏ពេញនិយមជាងគេ។

ការស្ទុះងើបឡើងវិញមាន ដំណើរការយឺតយ៉ាវនៅក្នុងតំបន់អាស៊ីឦសាន ដែលរួមមានប្រទេសជប៉ុន និងចិន ខណៈវិស័យទេសចរណ៍របស់តំបន់នេះ បានងើបឡើងវិញដល់ប្រហែល៥៥ភាគរយប៉ុណ្ណោះ បើធៀបនឹងកម្រិតកាលពីឆ្នាំ២០១៩។

អង្គការ UNWTO បានអះអាងថា “វិស័យទេសចរណ៍នៅទូទាំងតំបន់អាស៊ី នៅតែមានឱកាសស្ទុះងើបឡើងវិញ។ បន្ថែមពីលើនេះ កំណើនតម្រូវការ និងការបង្កើនការតភ្ជាប់ផ្លូវអាកាស នឹងជួយឱ្យវិស័យទេសចរណ៍លើពិភពលោក សម្រេចបាននូវការស្ទុះងើបឡើងវិញទាំងស្រុងនៅដំណាច់ឆ្នាំនេះ”។

ថ្វីត្បិតតែអង្គការទេសចរណ៍ពិភពលោក បានលើកឡើងទស្សនវិស័យវិជ្ជមានបែបនេះយ៉ាងណាក្តី ប៉ុន្តែទីភ្នាក់ងារនេះបានព្រមានថា ហានិភ័យភូមិសាស្ត្រនយោបាយ នៅតែអាចបង្កបញ្ហាប្រឈមចំពោះការងើបឡើងវិញ នៃវិស័យទេសចរណ៍ប្រកបដោយចីរភាព។

តួយ៉ាង ជម្លោះរវាងប្រទេសអ៊ីស្រាអែល និងក្រុមសកម្មប្រយុទ្ធហាម៉ាស់ ដែលបានចាប់ផ្តើមឡើងនៅក្នុងខែតុលា ឆ្នាំ២០២៣ បានបង្កើនហានិភ័យ និងការព្រួយបារម្ភថា ជម្លោះនេះនឹងរាលដាលដល់តំបន់មជ្ឈិមបូព៌ាទាំងមូល៕ប្រភព៖Kyodo៕

        ដោយៈ គង់ សូរិយា

        ភ្នំពេញៈ ធនាគារជាតិនៃកម្ពុជា(NBC)បានព្យាករណ៍ថា វិស័យសំណង់ និងអចលនទ្រព្យ នឹងបន្តមានកំណើនទាប បើទោះជាមានតម្រូវការលំនៅដ្ឋានតម្លៃសមរម្យក្នុងស្រុក ប៉ុន្តែសម្រាប់លំនៅដ្ឋានប្រណីតនឹងបន្តមានភាពទន់ខ្សោយ។

នេះបើយោងតាមរបាយការណ៍ វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ ២០២៣ និងទស្សនវិស័យឆ្នាំ២០២៤ របស់ធនាគារជាតិនៃកម្ពុជា។ធនាគារជាតិនៃកម្ពុជាបានបញ្ជាក់ថា ការកើនឡើងនៃឥណទានមិនដំណើរការ អាចបន្ថយកំណើនឥណទាន សម្រាប់ការប្រើប្រាស់ និងការវិនិយោគ និងកំណើននៃវិស័យសំណង់ និងអចលនទ្រព្យអាចបន្តមានកម្រិតទាប និងអាចមានឥទ្ធិពល បន្តលើវិស័យផ្សេងទៀត ដូចជាវិស័យធនាគារជាដើម។

អ្នកជំនាញមើលឃើញថា នៅក្នុងឆ្នាំ ២០២៤នេះ វិស័យអចលទ្រព្យ និងសំណង់ នឹងបន្តងើបឡើងយឺត ជាពិសេសវិស័យសំណង់ដែលបម្រើឲ្យវិស័យផ្សេងៗ ដោយសារការំពឹងទុកកំណើនសេដ្ឋកិច្ចក្នុងស្រុក និងលំហូរទុនវិនិយោគពីរទេស។ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក សន សៀបបានមានប្រសាសន៍ឲ្យ​ដឹងផងដែរថា វិស័យអចលនទ្រព្យ និងសំណង់ក្នុងឆ្នាំ ២០២៤នេះ អាចនៅមានភាពស្រពិចស្រពិល ប៉ុន្តែទោះយ៉ាងណាវិស័យនេះ នឹងបន្តងើបឡើងយឺត ដោយសារការំពឹងទុកកំណើនសេដ្ឋកិច្ចក្នុងស្រុក និងការហូរទុនវិនិយោគពីរទេស។

លោកបន្តថា ទោះជាយ៉ាងណា រាជរដ្ឋាភិបាលក្នុងអាណត្តិទី៧នេះ បានខិតខំប្រឹងប្រែងយ៉ាងខ្លាំង នៃការបង្កើតនូវកិច្ចសហប្រតិបត្តិការជាមួយបណ្តាប្រទេសជាមិត្ត ឲ្យកាន់តែស្អិតរមួត ក្នុងគោលដៅទាក់ទាញវិនិយោគិនឲ្យមកវិនិយោគទុនកាន់តែច្រើន ជាពិសេសការអភិវឌ្ឍន៍វិស័យអចនទ្រព្យនេះជាដើម។លោកបានបន្ថែមថា វិស័យអចលនទ្រព្យនេះ គឺជាវិស័យមួយពឹងផ្អែកលើសេដ្ឋកិច្ចខាងក្រៅ និងសេដ្ឋកិច្ចខាងក្នុង ហើយអចលនទ្រព្យគឺវារត់តាមក្រោយនៃសេដ្ឋកិច្ចទាំងអស់ ក្នុងនោះប្រសិនសេដ្ឋកិច្ចខាងក្រៅល្អ លំហូរបរទេសនឹងអាចហូរចូលមកកម្ពុជាបន្ថែម។ ចំណែកសេដ្ឋកិច្ចខាងក្នុង ក៏ជាការរួមចំណែកយ៉ាងខ្លាំងផងដែរ ដើម្បីធ្វើឲ្យចន្តរសាច់ប្រាក់នៅក្នុងសេដ្ឋកិច្ចយើងកាន់តែល្អ។

យោងតាមរបាយការណ៍របស់សាលារាជធានីភ្នំពេញ បានឲ្យដឹងថា គិតត្រឹមឆ្នាំ ២០២៣ នៅរាជធានីភ្នំពេញ មានសំណង់បុរីចំនួន ៣១០កន្លែង អគារខ្ពស់ៗចាប់ពីប្រាំជាន់ឡើងទៅ មានចំនួន ១.៧៧៧អគារ។ កាលពីឆ្នាំមុន រដ្ឋបាលរាជធានី បានពិនិត្យលើឯកសារ ស្នើសុំលិខិតអនុញ្ញាតសាងសង់ ក្នុងគម្រោងថ្មីចំនួន៥៣៦គម្រោង លើផ្ទៃក្រឡាសំណង់សរុបជាង២៦ម៉ឺនម៉ែត្រការ៉េ ដែលមានទំហំទុនវិនិយោគប៉ាន់ស្មានប្រមាណ ១៣២លានដុល្លាអាមេរិកបន្ថែមទៀត៕