(ភ្នំពេញ)៖ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំ «ច្រកចេញ-ចូលតែមួយ» លើកទី១ នៅក្នុងឆ្នាំ២០២៦ ក្រោមអធិបតីភាពលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដែលមានការអញ្ជើញចូលរួមពីសំណាក់តំណាងក្រសួង-ស្ថាប័នពាក់ព័ន្ធ និងរដ្ឋបាលខេត្តកំពង់ស្ពឺ ដើម្បីពិនិត្យពិភាក្សាលើគម្រោងស្នើសុំបង្កើតតំបន់សេដ្ឋកិច្ចពិសេសរបស់ក្រុមហ៊ុន Cambodia Shanghai Special Economic Zone Co., Ltd។

តំបន់សេដ្ឋកិច្ចពិសេសថ្មីនេះ មានទីតាំងស្ថិតនៅស្រុកភ្នំស្រួច ខេត្តកំពង់ស្ពឺ លើផ្ទៃដីទំហំប្រមាណ ៤៥៥ហិកតា៕

ដោយៈ ម៉ាលីនណា

    ភ្នំពេញៈ ក្រុមអ្នកវិនិយោគមកពីប្រទេសចិន បានឈរលំដាប់លេខ១ ដែលបានមកដាក់ទុនវិនិយោគនៅកម្ពុជាច្រើនជាងគេ នៅក្នុងឆ្នាំ២០២៥ ក្នុងទំហំទឹកប្រាក់៥៤២៥លានដុល្លារអាមេរិក។

យោងតាមរបាយការណ៍ក្រុមប្រឹក្សាអភិវឌ្ឍន៍កម្ពុជា ដែលបានផ្សព្វផ្សាយកាលពីម្សិលម៉ិញបានឲ្យដឹងថា ក្នុងឆ្នាំ២០២៥ ការវិនិយោគមកពីប្រទេសចិន ស្ថិតនៅលំដាប់លេខទី១ ដែលបានរួមចំណែកប្រមាណ៥៤.២៥% នៃទុនវិនិយោគសរុប នៅក្នុងប្រទេសកម្ពុជាចំនួន១០ប៊ីលានដុល្លារអាមេរិក។

ចំណែកវិនិយោគិនកម្ពុជា ស្ថិតនៅលំដាប់លេខរៀងទី២ ដែលបានរួមចំណែកប្រមាណ៣១.២៧% ក្នុងទំហំទឹកប្រាក់៣១២៧លានដុល្លារ ខណៈសិង្ហបុរី ស្ថិតនៅលេខរៀងទី៣ រួមចំណែក៥.៩៩% ក្នុងទំហំទឹកប្រាក់៥៩៩លានដុល្លារ។

យោងតាមក្រុមប្រឹក្សាអភិវឌ្ឍន៍កម្ពុជាបានឲ្យដឹងទៀតថា ក្នុងឆ្នាំ២០២៥ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគសរុបចំនួន៦៣០ ក្នុងទំហំទុនវិនិយោ​គសរុបប្រមាណ១០ប៊ីលានដុល្លារ និងអាចបង្កើតការងារបានប្រមាណ ៤៣៨ពាន់កន្លែង។

ជាការកត់សម្គាល់ ការចុះបញ្ជីគម្រោងវិនិយោគ ក្នុងឆ្នាំ២០២៥ មានការកើនឡើងចំនួន២១៦ ស្មើនឹងប្រមាណ៥២% ខណៈទំហំទុនវិនិយោគ មានការកើនឡើងប្រមាណ ៣ប៊ីលានដុល្លារអាម៉េរិក ស្មើនឹងប្រមាណ៤៥% ធៀបនឹងរយៈពេលដូចគ្នា ក្នុងឆ្នាំ២០២៤។

វិស័យហេដ្ឋារចនាសម្ព័ន្ធ និងផ្សេងៗ បានទាក់ទាញការវិនិយោគចំនួន៣៨០០លានដុល្លារ វិស័យឧស្សាហកម្មចំនួន៥៦០០លានដុល្លារ វិស័យកសិកម្ម កសិ-ឧស្សាហកម្មចំនួន ៤៣៦លានដុល្លារ និងវិស័យទេសចរណ៍ចំនួន ១៧៥លានដុល្លារ៕

ដោយៈ គង់ សូរិយា

    ភ្នំពេញៈ ឯកអគ្គរដ្ខឋទូតអារ៉ាប៊ីសាអូឌីតប្រចាំកម្ពុជា លោក Mohammed Ismaeil A. Dahlwy បានថ្លែងថា នៅក្នុងឆ្នាំ២០២៦នេះ អ្នកវិនិយោគរបស់អារ៉ាប់ប៊ីសាអូឌីត នឹងមកបំពេញទស្សនកិច្ចនៅកម្ពុជា ដើម្បីស្វែងរកនូវឱកាសវិនិយោគផ្សេងៗ តាមរយៈសភាពាណិជ្ជកម្មរបស់អារ៉ាប់ប៊ីសាអូឌីត។

លោកបានលើកឡើងបែបនេះ ក្នុងឱកាសសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានអនុញ្ញាតឱ្យលោក ចូលជួបសម្ដែងការគួរសម និងជម្រាបលា នៅវិមានព្រឹទ្ធសភា នាព្រឹកថ្ងៃអង្គារ ទី៦ ខែមករា ឆ្នាំ២០២៦ បន្ទាប់ពីលោកបានបញ្ចប់បេសកកម្មការទូតនៅកម្ពុជា។

លោក ជា ធីរិទ្ធ អ្នកនាំពាក្យព្រឹទ្ធសភា បានឲ្យដឹងនៅក្រោយជំនួបថា នៅក្នុងជំនួបនោះសម្ដេចតេជោ ហ៊ុន សែនបានសម្ដែងនូវការស្វាគមន៍ និងរីករាយដែលបានជួបជាមួយលោកសាជាថ្មី ហើយសម្ដេចបានសម្ដែងនូវការពេញចិត្ត ចំពោះបេសកកម្ម ក៏ដូចជា កិច្ចការរបស់លោក ដែលបានបំពេញក្នុងព្រះរាជាណាចក្រកម្ពុជា ដែលធ្វើឲ្យទំនាក់ទំនងរវាងកម្ពុជា និងអារ៉ាប៊ីសាអូឌីតមានភាពរីកចម្រើន ជាពិសេសការសម្របសម្រួលរបស់លោកឯកអគ្គរាជទូត ក្នុងឱកាសដែលសម្ដេចតេជោ អញ្ជើញបំពេញទស្សនកិច្ចនៅអារ៉ាប៊ីសាអូឌីត កន្លងទៅនេះ ដែលទាំងអស់នេះ បង្ហាញពីទំនាក់ទំនងរវាងប្រទេសទាំងពីរ កាន់តែមានភាពរីកចម្រើន។

នៅក្នុងឱកាសនោះ លោកឯកអគ្គរាជទូតអារ៉ាប់ប៊ីសាវ៉ាឌីតបាន បញ្ជាក់ថា ក្នុងរយៈពេលបំពេញបេសកកម្មការងារនៅកម្ពុជា លោកមានអនុស្សាវរីយ៍ដ៏ច្រើន ជាមួយនឹងប្រទេសកម្ពុជា ក៏ដូចជាប្រជាពលរដ្ឋកម្ពុជាផងដែរ។

លោកក៏បានឃើញពីភាពរីកចម្រើន ជាពិសេសលើការអភិវឌ្ឍលើគ្រប់វិស័យជាបន្តបន្ទាប់របស់កម្ពុជា។ លោកសង្ឃឹមថាប្រទេសកម្ពុជានឹងក្លាយទៅជាប្រទេសមួយ មានភាពរីកចម្រើននៅក្នុងតំបន់អាស៊ាន។

លោកក៏បានរំលេច អំពីទំនាក់ទំនងរវាងប្រទេសទាំងពីរ ដែលមានភាពរីកចម្រើន ជាពិសេសតាមរយៈការផ្លាស់ប្ដូរទស្សនកិច្ចទៅវិញទៅមករបស់ថ្នាក់ដឹកនាំនៃប្រទេសទាំងពីរ។

លោកបានបញ្ជាក់ថា “នៅក្នុងឆ្នាំ២០២៦នេះ អ្នកវិនិយោគរបស់អារ៉ាប់ប៊ីសាអូឌីត នឹងមកបំពេញទស្សនកិច្ចនៅកម្ពុជា ដើម្បីស្វែងរកនូវឱកាសវិនិយោគផ្សេងៗ តាមរយៈសភាពាណិជ្ជកម្មរបស់អារ៉ាប់ប៊ីសាអូឌីត”។

សម្ដេចតេជោ ហ៊ុន សែន បានសម្ដែងនូវក្តីរីករាយចំពោះការលើកឡើងរបស់លោក ឯកអគ្គរាជទូតអារ៉ាប៊ីសាអូឌីត ដោយសម្ដេចតេជោបានបញ្ជាក់ថា នេះគឺជាស្នូលនៃទំនាក់ទំនង ដែលសម្ដេចចង់ឃើញនូវទំនាក់ទំនង ពាណិជ្ជកម្ម ក៏ដូចជាការវិនិយោគរវាងប្រទេសទាំងពីរមានភាពរីកចម្រើន។

សម្ដេចតេជោក៏បានស្វាគមន៍ ចំពោះប្រតិភូនៃសភាពាណិជ្ជកម្មអារ៉ាប៊ីសាអូឌីត ដែលគ្រោងនឹងមកបំពេញទស្សនកិច្ច និងស្វែងរកឱកាសវិនិយោគនៅកម្ពុជា។

សម្ដេចតេជោបានបន្តទៀតថា តាមរយៈដំណើរទស្សនកិច្ចផ្លាស់ប្ដូរគ្នាទៅវិញ ទៅមកនាពេលកន្លងទៅនេះ គឺជាផ្នែកធ្វើឲ្យទំនាក់ទំនងប្រទេសទាំងពីរកាន់តែមានការរីកចម្រើន ហើយសម្ដេចរំពឹងថា ទំនាក់ទំនងរវាងប្រជាជន និងប្រជាជននៃប្រទេសទាំងពីរ និងមានភាពល្អប្រសើរបន្ថែមទៀត ដែលទាំងអស់នេះ ជាការរួមចំណែកធ្វើឱ្យទំនាក់ទំនងរវាងប្រទេសទាំងពីរ កាន់តែមានភាពរីកចម្រើន៕

ដោយៈ ម៉ាលីនណា

    កោះកុងៈ គំរោងសាងសង់ស្ថានីយ៍ថាមពលអគ្គិសនី ដើរដោយឧស្ម័័ន ដែលមានអានុភាពរហូតដល់៩០០មេហ្គាវ៉ាត់ នឹងបញ្ចប់ចុងឆ្នាំ២០២៦នេះ។

ព័ត៌មាននេះត្រូវបានបង្ហាញឲ្យដឹង នៅពេលលោក កែវ រតនៈ រដ្ឋមន្ត្រីក្រសួងរ៉ែ និងថាមពល បានចុះពិនិត្យវឌ្ឍនភាពនៃការសាងសង់គម្រោងអគ្គិសនីដើរដោយឧស្ម័នLNG៩០០មេហ្កាវ៉ាត់ នៅស្រុកបុទុម​សាគរ ខេត្តកោះកុង ដែលជាគម្រោងជាប្រវត្តិសាស្ត្រ នឹងដាក់ឱ្យដំណើរការនៅចុងឆ្នាំ២០២៦ សម្រាប់ដំណាក់កាលទី១ និង២០២៧ សម្រាប់ដំណាក់កាលទី២ ដូចផែនការរបស់រាជរដ្ឋាភិបាលកាលពីម្សិលម៉ិញនេះ។

គម្រោងនេះនឹងដើរតួនាទីសំខាន់ ក្នុងការផ្តល់អគ្គិសនីបន្ថែម ពង្រឹងសន្តិសុខថាមពលជាតិ និងពង្រឹងស្ថិរភាពឱ្យបណ្តាញអគ្គិសនីកម្ពុជា។

លោកកែវ រតនៈ បានថ្លែងឱ្យដឹងថា គម្រោងអគ្គិសនីដើរដោយឧស្ម័នLNG ៩០០មេហ្កាវ៉ាត់នេះ មានទូរប៊ីនចំនួនពីរ ដែលទូរប៊ីននីមួ​យៗ មានថាមពល៤៥០មេហ្គាវ៉ាត់ ដែលជាបច្ចេកវិទ្យាក្រុមហ៊ុន Mitsubishi របស់ជប៉ុន សហការជាមួយក្រុមហ៊ុន Dongfang Electric របស់ចិន ដែលវិនិយោគដោយក្រុមហ៊ុន Royal Group របស់អ្នកឧកញ៉ា គិត ម៉េង។

លោកបញ្ជាក់ថា គម្រោងថាមពលអគ្គិសនីនេះ មិនត្រឹមតែជានិម្មិតរូបនៃការសហការគ្នាផ្នែកពាណិជ្ជកម្មបីប្រទេស គឺកម្ពុជា​ ជប៉ុន និងចិននោះទេ ប៉ុន្តែក៏បង្ហាញឱ្យឃើញពីការជឿទុកចិត្ត លើការរីកចម្រើនផ្នែកសង្គម និងសេដ្ឋកិច្ចរបស់កម្ពុជា ក្រោមការដឹកនាំរបស់សម្តេចបវរធិបតី​នាយករដ្ឋមន្ត្រី ហ៊ុន ម៉ាណែតផងដែរ ។ គម្រោងនេះនឹងដាក់ឱ្យដំណើរការដំណាក់កាលទី១ ថាមពល ៤៥០មេហ្គាវ៉ាត់ នៅចុងឆ្នាំ២០២៦នេះ ហើយ៤៥០មេហ្គាវ៉ាត់ទៀត នឹងដាក់ឱ្យដំណើរការនៅឆ្នាំ២០២៧”។

លោករដ្ឋមន្ត្រីបន្តថា នៅពេលដែលគម្រោងថាមពលអគ្គិសនីនេះ ដំណើរការទៅតាមផែនការ នឹងជួយផ្តល់អគ្គិសនីបន្ថែមឱ្យកម្ពុជា ជួយពង្រឹងឯករាជ្យភាពថាមពលជាតិ ក៏ដូចជាពង្រឹងស្ថិរភាពបណ្តាញជាតិ បើកផ្លូវឱ្យមានការ ដាក់ឱ្យប្រើប្រាស់នូវថាមពលអគ្គិសនី ដើរដោយខ្យល់ និងពន្លឺព្រះអាទិត្យបន្ថែមទៀត។

កាលពីថ្ងៃទី១៦ ខែតុលា ឆ្នាំ២០២៤ ក្រុមហ៊ុន រ៉ូយ៉ាល់ គ្រុប បានបើកការដ្ឋានសាងសង់ជាផ្លូវការ រោងចក្រថាមពលអគ្គិសនី ដើរដោយឧស្ម័នធម្មជាតិ (LNG) អានុភាព ៩០០មេហ្គាវ៉ាត់ក្នុងតម្លៃទុនវិនិយោគប្រមាណ១,៣៥ពាន់លានដុល្លារអាម៉េរិក ដែលមានទីតាំងស្ថិតនៅ ស្រុកបុទមសាគរ ខេត្តកោះកុង។

គម្រោងមួយនេះ នឹងក្លាយជារោងចក្រផលិតអគ្គិសនី ដើរដោយឧស្ម័នធម្មជាតិដំបូងគេបង្អស់ក្នុងប្រទេសកម្ពុជា៕

ដោយៈ ចំណាន

    ភ្នំពេញៈ រាជរដ្ឋាភិបាលកម្ពុជា បានអនុម័តឲ្យឱ្យកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ ខ្ចីប្រាក់ប្រហែល២៦លានដុល្លារ ដើម្បីចូលរួមសាងសង់គម្រោងព្រែកជីកហ្វូណនតេជោ ជាមួយក្រុមហ៊ុនហ្វូណនតេជោ ខូសថល អ៊ុនឡេន វីរធើវេយ ឯ.ក។

យោងតាមច្បាប់ថវិកាជាតិសម្រាប់ឆ្នាំ២០២៦ ដែលទើបបានប្រកាសដាក់ឱ្យប្រើនាពេលថ្មីៗនេះ បានបញ្ជាក់ថា “សម្រាប់ការគ្រប់​គ្រងឆ្នាំ២០២៦ អនុម័តយល់ព្រមឱ្យរាជរដ្ឋាភិបាល ឱ្យកំពង់ផែស្វយ័ត ក្រុងព្រះសីហនុ និងកំពង់ផែស្វយ័តភ្នំពេញ ខ្ចីនូវទឹកប្រាក់ចំនួន១០៧ ៣៥៧លានរៀល ក្រោមក្របខ័ណ្ឌការផ្តល់ឥណទានរបស់រដ្ឋ សម្រាប់ការចូលទុនក្នុងក្រុមហ៊ុនហ្វូណនតេជោ ខូសថល អ៊ុនឡេន វីរធើវេយ ឯ.ក”។

គម្រោងព្រែកជីកហ្វូណនតេជោ គឺជាគម្រោងដឹកជញ្ជូនផ្លូវទឹក តភ្ជាប់រវាងទន្លេ និងសមុទ្រដ៏មានសក្តានុពលមួយរបស់កម្ពុជា។ គម្រោងនេះត្រូវបានបើកការដ្ឋានសាងសង់ កាលពីថ្ងៃទី៥ ខែសីហា ឆ្នាំ២០២៤។

ព្រែកជីកហ្វូណនតេជោ តភ្ជាប់ពីទន្លេទៅសមុទ្រ មានប្រវែងជិត ១៨០គីឡូម៉ែត្រ ចាប់ផ្តើមពីព្រែកតាកែវ នៃទន្លេមេគង្គ ឆ្លងកាត់តាមព្រែកពោធិ៍ នៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ និងបន្តរហូតដល់សមុទ្រខេត្តកែប ដោយឆ្លងកាត់ភូមិសាស្រ្តខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប។

គម្រោងព្រែកជីកនេះ នឹងត្រូវសាងសង់ស្ទើរទាំងស្រុង លើតម្រា​យខ្សែផ្លូវទឹកធម្មជាតិ និងផ្លូវទឹកបុរាណដែលបានបន្សល់ទុកស្រាប់តាំងពីសម័យអាណាចក្រហ្វូណនមកម្ល៉េះ ក្នុងនោះផ្លូវទឹកធម្មជាតិដែលមានស្រាប់ មានប្រវែងប្រមាណ១៣៥គីឡូម៉ែត្រ ផ្លូវទឹកត្រូវជីកតម្រង់កុំឱ្យកោងពេក មានប្រវែងប្រមាណ៣៨គីឡូម៉ែត្រ និងផ្លូវទឹកជីកថ្មីមានប្រវែងប្រមាណ៧គីឡូម៉ែត្រ ដើម្បីកាត់បន្ថយកំណោង និងកាត់បន្ថយចម្ងាយតភ្ជាប់ទៅកាន់សមុទ្រ។

គម្រោងនេះ ប្រើប្រាស់រយៈពេលសាងសង់ប្រមាណ៤៨ខែ និងគ្រោងបញ្ចប់ នៅក្នុងអំឡុងឆ្នាំ២០២៨ខាងមុខ ដោយប្រើប្រាស់ទុនវិនិយោគ សរុបប្រមាណ១.៧ពាន់លានដុល្លារអាម៉េរិក៕

ដោយៈ ចំណាន

    អាមេរិកៈ តើទីផ្សារភាគហ៊ុនសហរដ្ឋអាមេរិក ជាទីផ្សារបែបណា ? និងមានឥទ្ធិពលដល់ពិភពលោកយ៉ាងដូចម្តេច? ហើយវាមានទំនាក់ទំនងទ្វេភាគីយ៉ាងរឹងមាំដូចម្តេចជាមួយសេដ្ឋកិច្ចពិភពលោក។

សូមសិក្សាចំណុចនិមួយៗខាងក្រោមនេះ ដែលវាជាការពន្យល់ច្បាស់លាស់មួយ។

១. តើទីផ្សារភាគហ៊ុនសហរដ្ឋអាមេរិកមួយណា ដែលសំខាន់បំផុតនៅទូទាំងពិភពលោក?

① S&P 500 (សំខាន់បំផុត)

ស្ថាប័ននេះ តំណាងឱ្យក្រុមហ៊ុនធំៗចំនួន៥០០ របស់សហរដ្ឋអាមេរិក និងគ្របដណ្តប់ប្រហែល៨០ភាគរយ នៃតម្លៃទីផ្សារសរុបរបស់សហរដ្ឋអាមេរិក។

ក្រុមហ៊ុនទាំង៥០០នេះ រួមបញ្ចូលក្រុមហ៊ុនយក្សសកល៖ Apple, Microsoft, Google, Amazon, Exxon, JPMorgan វាតំណាងឲ្យសូចនាករល្អបំផុត នៃសុខភាពសេដ្ឋកិច្ចសហរដ្ឋអាមេរិក និងពិភពលោក។

② Dow Jones Industrial Average (DJIA)

ស្ថាប័ននេះ តំណាងឲ្យក្រុមហ៊ុនពហុជាតិសំខាន់ៗចំនួន30 ជាជានិមិត្តរូបច្រើនជាង មិនសូវទូលំទូលាយជាងS&P500 ប៉ុន្តែវាមានឥទ្ធិពលលើចិត្តវិទ្យាវិនិយោគិនទូទាំងពិភពលោក។

③ NASDAQ

ស្ថាប័នកំពូលមួយនេះផងដែរ វាមានឥទ្ធិពលខ្លាំងលើបច្ចេកវិទ្យា និងនវានុវត្តន៍។

ក្រុមហ៊ុនទាំងនេះ រកប្រាក់ចំណូលទូទាំងពិភពលោក និងមានឥទ្ធិពលជះផលប៉ះពាល់យ៉ាងខ្លាំង ទៅលើវិស័យបច្ចេកវិទ្យាសកល និងទីផ្សារដែលកំពុងរីកចម្រើន។

តើទីផ្សារភាគហ៊ុនសហរដ្ឋអាមេរិក មានឥទ្ធិពលលើសេដ្ឋកិច្ចពិភពលោកយ៉ាងដូចម្តេច?។

ក. លំហូរមូលធន

អ្នកជំនាញនិយាយថា នៅពេលដែលភាគហ៊ុនអាមេរិក កើនឡើង វិនិយោគិនសកលផ្លាស់ប្តូរប្រាក់ទៅក្នុងភាគហ៊ុន ប៉ុន្តែនៅពេលដែលភាគហ៊ុនអាមេរិកធ្លាក់ចុះ  លំហូរប្រាក់ចេញពីទីផ្សារកំពុងរីកចម្រើន (អាស៊ី អាហ្វ្រិក ឡាតាំង)។

ខ. ផលប៉ះពាល់រូបិយប័ណ្ណ

• ទីផ្សារអាមេរិករឹងមាំ នឹងធ្វើឲ្យដុល្លារអាមេរិករឹងមាំ
• ដុល្លារអាមេរិករឹងមាំប៉ះពាល់ដល់៖
• ពាណិជ្ជកម្មសកល
• តម្លៃទំនិញ (ប្រេង មាស)
• ការសងបំណុលសម្រាប់ប្រទេសកំពុងអភិវឌ្ឍន៍

គ. ប្រាក់ចំណូលសាជីវកម្មទូទាំងពិភពលោក

• ក្រុមហ៊ុនអាមេរិកជាច្រើនរកបានចន្លោះពី៣០ ទៅ៦០ភាគរយនៃប្រាក់ចំណូលនៅបរទេស។
• ប្រសិនបើតម្រូវការសកលចុះខ្សោយ ប្រាក់ចំណូលអាមេរិកធ្លាក់ចុះ និងធ្វើឲ្យទីផ្សារធ្លាក់ចុះ៕