ដោយ: គង់ លាងហួរ

តូក្យូ: ក្រោយពីឆ្លងកាត់វិបត្តិជំងឺរាតត្បាត អស់រយៈពេល៣ឆ្នាំរួចមក ឧស្សាហកម្មទេសចរណ៍នៅក្នុងប្រទេសជប៉ុន បានស្ទុះងើបឡើងវិញកាលពីឆ្នាំ២០២៣ ដោយសាររដ្ឋាភិបាលទីក្រុងតូក្យូ បានពន្លឿនសកម្មភាពអាជីវកម្ម និងសង្គម។

ការបើកព្រំដែនឡើងវិញ គឺជាកត្តាជំរុញដ៏សំខាន់មួយ សម្រាប់ឧស្សាហកម្មទេសចរណ៍របស់ជប៉ុន ដែលបានជំរុញឱ្យមានលំហូរនៃភ្ញៀវទេសចរអន្តរជាតិជាថ្មីឡើងវិញ។

ដោយផ្អែកតាមនិន្នាការខាងលើនេះ លំហូរនៃការផ្គត់ផ្គង់សណ្ឋា​គារនៅប្រទេសជប៉ុនត្រូវបានគេរំពឹងថា នឹងកើនឡើង ក្នុងរយៈពេលប៉ុន្មានឆ្នាំខាងមុខ ខណៈដែលអ្នកវិនិយោគទាំងក្នុងស្រុក និងបរទេសកំពុងបង្កើនការវិនិយោគ។ជាក់ស្តែង ក្រុមហ៊ុនខ្សែសង្វាក់សណ្ឋាគារ លំដាប់អន្តរជាតិ Accor ដែលមានមូលដ្ឋាននៅប្រទេសបារាំង បានអះអាងថា ការងើបឡើងវិញនៃចំនួនភ្ញៀវទេសចរ ក្នុងប្រទេសជប៉ុនត្រូវបានជំរុញជាចម្បង ដោយការត្រឡប់មកវិញនៃអ្នកដំណើរបរទេស ខណៈកម្រិតអាជីវកម្ម នៅតាមសណ្ឋាគារទាំងអស់របស់ខ្លួន បានកើនលើសកម្រិតឆ្នាំ២០១៩ ចាប់តាំងពីខែមិថុនា ឆ្នាំ២០២៣មកម្ល៉េះ។

ថ្នាក់ដឹកនាំក្រុមហ៊ុនAccor ជឿជាក់ថា ប្រទេសជប៉ុននឹងបន្តទាក់ទាញភ្ញៀវទេសចរបានកាន់តែច្រើន ដោយរដ្ឋាភិបាលបានកំណ​ត់គោលដៅ ទាក់ទាញភ្ញៀវទេសចរបរទេស ឱ្យបានចំនួន៦០លាននាក់ជារៀងរាល់ឆ្នាំ នៅត្រឹមឆ្នាំ២០៣០ខាងមុខ។

ជាមួយគ្នានេះ ក្រុមហ៊ុនបារាំងAccor ទើបតែបានបើកសណ្ឋា​គារថ្មីមួយ ក្រោមម៉ាកយីហោ Mercure នៅសង្កាត់ Hibiya នៃទីក្រុងតូក្យូកាលពីខែធ្នូ ឆ្នាំមុន ខណៈក្រុមហ៊ុននេះមានបំណងពង្រីកអាជីវកម្មរបស់ខ្លួនបន្ថែមទៀតនៅក្នុងប្រទេសជប៉ុន។

កាលពីខែកក្កដា ឆ្នាំមុន ក្រុមហ៊ុន Accor និងក្រុមហ៊ុន Daiwa Resort បានប្រកាសថា ក្រុមហ៊ុនAccor គ្រោងប្តូរឈ្មោះ និងគ្រ​ប់គ្រងប្រតិបត្តិការសណ្ឋាគារទាំង២៣ របស់ក្រុមហ៊ុនDaiwa Resort នៅប្រទេសជប៉ុន។

ចំណាត់ការនេះ នឹងបង្កើនទ្វេរដងនូវចំនួនសណ្ឋាគារ ដែលគ្រប់គ្រងដោយក្រុមហ៊ុន Accor នៅក្នុងប្រទេសជប៉ុន។

លើសពីនេះទៀត ក្រុមហ៊ុន Accor ក៏គ្រោងនឹងដាក់ឱ្យដំណើរការសណ្ឋាគារប្រណីតដំបូងរបស់ខ្លួន ស្ថិតក្រោមម៉ាកយីហោ Fairmont នៅប្រទេសជប៉ុន ក្នុងឆ្នាំសារពើពន្ធ២០២៥ផងដែរ។

ចំណែក ក្រុមហ៊ុន Hyatt ដែលជាខ្សែសង្វាក់សណ្ឋាគារលំដាប់ពិភពលោកមួយផ្សេងទៀត ក៏មើលឃើញពីឱកាសនៅក្នុងប្រទេសជប៉ុនផងដែរ។

ស្របពេលមានការរំពឹងទុកថា ចំណាប់អារម្មណ៍របស់អ្នកធ្វើដំណើរនៅក្នុងប្រទេសជប៉ុន នឹងបន្តកើនឡើង។ ដូច្នេះក្រុមហ៊ុន Hyatt គ្រោងនឹងបើកសណ្ឋាគារជាច្រើនទៀត នៅក្នុងប្រទេសជប៉ុន នារយៈពេលប៉ុន្មានឆ្នាំខាងមុខនេះផងដែរ។

ខ្សែសង្វាក់សណ្ឋាគារ ដែលមានមូលដ្ឋាននៅសហរដ្ឋអាមេរិក បានបើកសណ្ឋាគារ Toranomon Hills ក្នុងទីក្រុងតូក្យូកាលពីខែមុន ហើយសណ្ឋាគារចំនួនពីរទៀត គ្រោងនឹងបង្ហាញខ្លួនជាលើកដំបូងនៅទីក្រុងតូក្យូ និងអូសាកានៅឆ្នាំ២០២៤នេះ។

លើសពីនេះ ក្រុមហ៊ុន Hyatt ក៏គ្រោងនឹងបើកដំណើរការម៉ាកយីហោថ្មី ដែលមានឈ្មោះថា Atona សម្រាប់ការស្នាក់នៅបែបប្រពៃណី ryokan ចាប់ពីឆ្នាំ២០២៦តទៅ៕ប្រភព៖ Japan Times៕

ដោយៈ ស៊ីវ ម៉េង

        ព្រះសីហនុៈ ប្រមុខរាជរដ្ឋាភិបាលកម្ពុជា សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា បានប្រកាសដាក់ចេញគោលនយោ​បាយថ្មី ដើម្បីដោះស្រាយបញ្ហាអាគារជាប់គាំង នៅក្រុងព្រះសីហនុ នាថ្ងៃទី២៥ ​មករាខាងមុខនេះ។សម្តេ​ចធិបតីហ៊ុន ម៉ាណែតបានថ្លែងឲ្យដឹងក្នុងពិធីសម្ភោធស្ពានកោះយ៉ នៅខេត្តកោះកុងកាលពីថ្ងៃទី៨ មករាថា កម្មវិធីគោលនយោ​បាយថ្មីនេះ គឺផ្តោតសំខាន់លើការជម្រុញសកម្មភាពធុរកិច្ច និងពាណិ​ជ្ជកម្មនៅក្រុងព្រះសីហនុ ឲ្យមានភាពរសរវើកឡើងវិញ។

សម្តេចបន្តថា “ឆ្នាំ២០២៤ជាឆ្នាំ សម្រាប់ជម្រុញការវិនិយោគនៅខេត្តព្រះសីហនុ ពិសេសការដោះស្រាយបញ្ហា អាគារជាប់គាំងនៅក្នុងទីក្រុងនេះ”។រដ្ឋាភិបាលដាក់ចេញនូវគោលការណ៍ចំនួន២ ទាក់ទងអាគារជាប់គាំងនៅក្រុងព្រះសីហនុ ដែលគោលការណ៍ទី១ គឺជម្រុញការសាងសង់អាគារដែលមិនទាន់​ចប់ នឹងសាងសង់បញ្ចប់ និងទី២ អាគា​រសាងសង់ចប់រួចអាចនឹងធ្វើឲ្យមានសកម្មភាពវិនិយោគ ឬធុរកិច្ច។

នៅខេត្តព្រះសីហនុ នាពេលប​ច្ចុប្ប​ន្ននេះ មានអាគារ៣៦៤អាគារបានផ្អាកការសាងសង់ អាគារចំនួន១៧៧សាងសង់រួចតែមិនដំណើរការ អាគារ៥៣កន្លែងកំពុងដំណើរការសាងសង់ និងអគារចំនួន៤៧៥កន្លែងបានសាងសង់រួច និងកំពុងដំណើរការ។

នៅចន្លោះឆ្នាំ២០១៦ ដល់២០១៩ ខេត្តព្រះសីហនុបានទាក់ទាញលំហូរទុនវិនិយោគពីបរទេស ប្រមាណ៨០០០លានដុល្លារអាមេរិក ដែលភាគច្រើនជាគំរោងវិនិយោគរបស់ចិន។

រាជរដ្ឋាភិបាលកម្ពុជាបាន និងកំពុងរៀបចំផែនការមេ ដើម្បីប្រែក្លាយក្រុងព្រះសីហនុ ជាទីក្រុងពហុបំណង ខណៈទីក្រុងនេះបាននិងកំពុងទាក់ទាញ ភ្ញៀវទេសចរណ៍ក្នុងស្រុកកាន់តែច្រើន ជាក់ស្តែងកាលពីរាត្រីឆ្លងឆ្នាំសកលកន្លងមកថ្មីៗនេះ ខេត្តព្រះសីហនុបានទាក់ទាញភ្ញៀវទេសចរណ៍ជាតិ អន្តរជាតិជាង៤០ម៉ឺននាក់៕

        ដោយៈ ស៊ីវ ម៉េង

        ភ្នំពេញៈ ឧបនាយករដ្ឋមន្រ្តី សាយ សំអាល់រដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់បានថ្លែងថា រាជរដ្ឋាភិបាលចាត់ទុកខេត្តកែប ព្រះសីហនុ កំពត និងកោះកុង ជារបៀងសេដ្ឋកិច្ចដ៏ធំសម្រាប់កម្ពុជា។

លោកបានថ្លែងបែបនេះ ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តកែប។លោកសាយ សំអាល់បានបន្តថា ដូច្នេះអាជ្ញាធរខេត្ត និងប្រជាពលរដ្ឋត្រូវសហការគ្នាខិតខំអភិវឌ្ឍខ្លួន និងមានគំនិតច្នៃប្រឌិត ក្នុងការកែច្នៃនូវអ្វីដែលថ្មីប្លែក សម្រាប់ទាក់ទាញទេសចរ ឱ្យចូលមកទស្សនាក្នុងខេត្តរបស់ខ្លួន ដើម្បីជំរុញលំហូរចរន្តសេដ្ឋកិច្ចក្នុងខេត្ត ក៏ដូចជាទទួលបានប្រាក់ចំណូល ផ្គត់ផ្គង់ជីវភាពគ្រួសារ ឱ្យកាន់តែប្រសើរឡើង។

លោកសាយ សំអាល់បានបញ្ជាក់ពីទិសដៅ យុទ្ធសាស្ត្ររបស់រាជរដ្ឋាភិបាល ក្នុងការលុបបំបាត់បញ្ហាទំនាស់ដីធ្លី និងការរៀបចំទីក្រុងឱ្យបានល្អ ដើម្បីប្រជាពលរដ្ឋមានសុខភាពល្អ មានស្នាមញញឹម មានលំនៅឋានរស់នៅសមរម្យ មានអាហារហូបចុកគ្រប់គ្រាន់ មានការងារធ្វើ មានប្រាក់ចំណូល សម្រាប់ផ្គត់ផ្គង់ជីវភាពគ្រួសារ និងកូនចៅប្រជាពលរដ្ឋបានទៅសិក្សារៀនសូត្រ និងបន្តការសិក្សាថ្នាក់ឧត្តមសិក្សាព្រមទាំងមានអនាគតល្អគ្រប់ៗគ្នា៕

 ដោយៈ គង់ សូរិយា

ភ្នំពេញៈ ក្នុងវិបត្តិ តែងតែមានឱកាស ប៉ុន្តែតើអ្នកណាជាអ្នកអាចចាប់ឱកាសបាន សម្រាប់កាលៈទេសៈដ៏លំបាកមួយនេះ។ អ្នកជំនាញអចលនទ្រព្យអន្តរជាតិលោក Alan Neo នាយកប្រតិបត្តិក្រុមហ៊ុន PropNex Cambodia បានមានប្រសាសន៍ឲ្យដឹងកាលពីចុងសប្តាហ៍មុនថា ក្នុងកាលៈទេសៈ ដែលក្រុមហ៊ុនភ្នាក់ងារអចលនទ្រព្យនៅក្នុងស្រុកជួបការលំបាក វាជាឱកាសរបស់ក្រុមហ៊ុនអន្តរជាតិ ដែលអាចជួយទីផ្សារកម្ពុជាឲ្យងើបឡើងវិញ។

លោកបន្តថា “នៅពេលមានការផ្សព្វផ្សាយព័ត៌មាន សូវមិនល្អពីកម្ពុជា អ្នកធុរកិច្ចអន្តរជាតិបានស្វែងរកឱកាសវិនិយោគ តាមរយៈក្រុមហ៊ុនអន្តរជាតិ ដែលពួកគេទុកចិត្ត”។ លោកបន្តថា “អ្នកវិនិយោគ​មកពីម៉ាឡេស៊ី សឹង្ហបុរី ចិន តៃវ៉ាន់ កូរ៉េបានស្វែងរកក្រុមហ៊ុនអន្តរជាតិ​ដើម្បីប្រឹក្សាពីការវិនិយោគរបស់ពួកគេ”។
លោក Alan Neo បានបន្តថា ជាក់ស្តែងកាលពីពេលថ្មីៗនេះ យើងលក់ខុនដូបានប្រមាណ៥០យូនីត និងលក់ដីបានមួយចំនួន តា​មរយៈក្រុមហ៊ុន និងភាពជាដៃគូសហការរបស់យើង ហើយអ្វីដែល​យើងត្រូវធ្វើពេលនេះ គឺទាក់ទាញអ្នកវិនិយោគ និងក្រុមហ៊ុនអន្តរជាតិមកកម្ពុជាឲ្យបានច្រើន ដើម្បីរុញទីផ្សារនេះឲ្យងើបឡើងវិញ។

លោកបន្តថា “នៅពេលទីផ្សារបានធ្លាក់ចុះ ដល់កម្រិតទាបបំផុត វានឹងងើបឡើងវិញ វាជាទីផ្សារដែលកំពុងលេចឡើង ដែលអ្នកវិនិយោគអាចរកឱកាសចំណេញបានពីទីនេះ”។ លោកបន្តថា “បញ្ហានៅកម្ពុជា គឺការផ្សព្វផ្សាយអាក្រក់ពីទីនេះ ដែលព័ត៌មាននេះនឹងសាបរលាបបន្តិចម្តងៗ នៅពេលយើងអាចទាក់ទាញអ្នកវិនិយោគអន្តរជាតិ​មកកាន់ទីនេះកាន់តែច្រើន”។លោក Alan Neo បានបន្តថា អ្នកវិនិយោគអន្តរជាតិមកកាន់រាជធានីភ្នំពេញ ជាលើកដំបូងពួកគេមានអារម្មណ៍ភ័យខ្លាច ហេតុនេះយើងត្រូវតែមើលថែរពួកគេឲ្យបានដិតដល់ និងធ្វើឲ្យពួកគេមានអារម្មណ៍កក់ក្តៅ បន្ទាប់មកពួកគេនឹងមកកាន់កម្ពុជាម្តងទៀត ហើយយើងត្រូវធ្វើឲ្យប្រាកដថា ពួកគេមានអារម្មណ៍សុវត្ថិភាព៕

        ដោយៈ ស៊ីវ ម៉េង

        ភ្នំពេញៈ លោកឧកញ៉ាបណ្ឌិតគីម ហ៊ាងប្រធាន KH Group និងជាអ្នកអភិវឌ្ឍន៍បុរីវិមានសំណាង បានចែកអំណោយដល់កម្មករ កម្មការិនីជាង២០០នាក់ ព្រមទាំងជប់លៀង ដើម្បីអបអរទិវាជ័យជម្នះ៧ មករា កាលពីរាត្រីថ្ងៃម្សិលម៉ិញនេះ។ លោកឧកញ៉ាបានសរសរ លើបណ្តាញទំនាក់ទំនងសង្គមថា  ទើបចែកអំណោយដល់បងប្អូន ដែលជាកម្មករ កម្មការនីជាង២០០នាក់ ដែលធ្វើការនៅបុរី វិមានសំណាង ក្នុងថ្ងៃខួបកំណើតរបស់ខ្ញុំបាទ ហើយសូមអរគុណបងប្អូនទាំងអស់ ដែលជាផ្នែកសំខាន់មួយ ក្នុងការធ្វើអោយបុរី វិមានសំណាង មានការរីកចំរើនជានិច្ច។ បុរីវិមានសំណាង បានអភិវឌ្ឍន៍លើផ្ទៃដីទំហំ២៥ហិកតា ស្ថិតនៅលើមហាវិថីឈ្នះ ឈ្នះ ដែលជាតំបន់កំពុងមានការរីកចម្រើនលឿន ដោយសារតំបន់នេះ ព័ទ្ឋជុំវិញដោយមជ្ឈមណ្ឌលពាណិជ្ជកម្មជាច្រើន រួមមានផ្សារទំនើប AEON Mall2 , Makro, Global House តំបន់កម្សាន្ត ស្ថិតនៅទីក្រុងរំនតេជោមរតក ដែលមានពហុកីឡដ្ឋានមរតកតេជោ សួនទឹកកម្សាន្ត និងសួនសត្វដ៏ធំមួយ និងធំជាងគេនៅកម្ពុជា៕

        ដោយៈ គង់ ម៉ាលីនណា

        ភ្នំពេញៈ គម្រោងផ្គត់ផ្គង់អគ្គិសនីធំៗចំនួន២៦គម្រោង ត្រូវបានអភិវឌ្ឍន៍ និងមានកម្លាំងផលិតសរុប៣៤៥១មេហ្គាវ៉ាត់។​ នេះបើតាមកម្រងវីដេអូ អំពីសមិទ្ធផលធំៗ នៃការអភិវឌ្ឍវិស័យថាមពល រ៉ែ និងប្រេងកាតនៅកម្ពុជា ដែលផ្សព្វផ្សាយដោយក្រសួងរ៉ែ និងថាមពល។

ក្រសួងរ៉ែ និងថាមពលបានបញ្ជាក់ថា “គម្រោងផ្គត់ផ្គង់អគ្គិសនីធំៗចំនួន២៦គម្រោង ត្រូវបានអភិវឌ្ឍន៍ និងមានកម្លាំងផលិតសរុប ៣៤៥១មេហ្គាវ៉ាត់ ដែលក្នុងនោះប្រភពថាមពលកកើតឡើងវិញ មានចំនួនប្រមាណ៦២% និងមានគោលដៅបង្កើនឲ្យបាន៧០% នៅក្នុងឆ្នាំ២០៣០”។

បន្ថែមពីនេះ តាមរយៈខ្សែបណ្ដាញជាតិ បញ្ជូនអគ្គិសនីឲ្យដល់២៥រាជធានី-ខេត្ដ បច្ចុប្បន្ន កម្ពុជាបានផ្ដល់ការផ្គត់ផ្គង់អគ្គិសនីដល់ភូមិចំនួនជាង៩៨% និងលំនៅដ្ឋាន ចំនួនជាង៨៨% ហើយភូមិទាំងអស់នៅក្នុងប្រទេសកម្ពុជា និងទទួលបានការផ្គត់ផ្គង់អគ្គិសនី១០០% នៅក្នុងឆ្នាំ២០៣០៕

ដោយៈ ជេស៊ីកា

        កោះកុងៈ សម្តេចធិបតី ហ៊ុន ម៉ាណែតបានថ្លែងថា រាជរដ្ឋាភិបាលប្តេជ្ញាចិត្តប្រឹងប្រែងធ្វើឱ្យជាតិ និងជីវភាពប្រជាពលរដ្ឋកាន់តែល្អប្រសើរពីមួយឆ្នាំទៅមួយឆ្នាំ តបនឹងការទុកចិត្ត និងគាំទ្ររបស់ប្រជាពលរដ្ឋ។

សម្តេចធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជា បានថ្លែងបែបនេះ ក្នុងពេលអញ្ជើញសម្ភោធ សមិទ្ឋផលស្ពានកោះយ៉ និងជួបសំណេះសំណាលជាមួយកម្មករ និយោជិតជាង១០,០០០នាក់នៅ​ខេត្តកោះកុងនាព្រឹកថ្ងៃទី៨ មករានេះ។សម្តេចបានបន្តថា “សកម្មភាព និងគោលនយោបាយទាំងឡាយដែលបានដាក់ចេញ គឺដើម្បីការរស់នៅ និងជីវភាពរបស់ប្រជាពលរដ្ឋឱ្យកាន់តែល្អប្រសើរ”។សម្តេចបន្ថែមថា “កោះកុងពីអតីតកាលឆ្ងាយណាស់ ព្រោះគ្មានផ្លូវធ្វើដំណើរ មិនមែនមានស្ថានភាពដូចពេលបច្ចុប្បន្ននោះឡើយ”។

សម្តេចធិបតី ហ៊ុន ម៉ាណែត បានថ្លែងថា “កោះកុងនឹងកាន់តែរស់រវើកនាពេលអនាគត”។ សម្តេចធិបតី ហ៊ុន ម៉ាណែត បានថ្លែងថា សមិទ្ធផលកើតមានលើទឹកដីខេត្តកោះកុង គឺកើតចេញពីការប្រឹងប្រែង និងការដាក់ចេញគោលនយោបាយត្រឹមត្រូវ។សម្តេចធិបតី ហ៊ុន ម៉ាណែត បានថ្លែងថា គោលនយោបាយសន្តិភាព គឺជាគោលនយោបាយដ៏ចាំបាច់ នាំមកនូវការបញ្ចប់សង្គ្រាម និងការឯកភាពជាតិ ហើយនាំឱ្យមានការអភិវឌ្ឍន៍ខេត្តកោះកុង។

សម្តេចធិបតីបញ្ជាក់ថា “បើគ្មានសន្តិភាព ហើយនៅដាច់ដោយដុំ ច្បាស់ណាស់កោះកុងគ្មានវត្តមានរោងចក្រ សហគ្រាសនោះឡើយ”។សម្តេចបន្តថា “ដើម្បីមានសន្តិភាព គឺផ្តើមចេញពីនយោបាយឈ្នះ-ឈ្នះ បង្កើតដោយសម្តេចតេជោ ហ៊ុន សែន”។

រាជរដ្ឋាភិបាលបាននិងកំពុងសាងសង់ និងលើកកំពស់កម្រិតផ្លូវជាតិលេខ៨ កសាងផ្លូវជាតិលេខ១០ ដែលតភ្ជាប់ពីខេត្តភូមិភាគពាយ័ព្យប្រទេស ទៅកាន់តំបន់ឆ្នេរជាលើកដំបូង កសាងកំពង់ផែទឹកជ្រៅ និងការត្រៀមដាក់ដំណើរការ ព្រលានយន្តហោះអន្តរជាតិតារាសាគរ ខេត្តកោះកុងនាពេលខាងមុខ ដែលធ្វើឲ្យខេត្តនេះកាន់តែមានភាពទាក់ទាញមួយកម្រិតទៀត៕