ដោយៈ ហ្វីអូណា

ភ្នំពេញៈ ក្រុមហ៊ុន NOA Land Co., Ltd. (Hinoya Curry Chain) បានស្វែងរកដៃគូសហការ ដើម្បីពង្រីកអាជីវកម្មនៅកម្ពុជា។

ក្រុមហ៊ុននេះបានបង្កើតឡើងនៅខែសីហា ឆ្នាំ២០០៤ ដែលមកដល់ឆ្នាំ២០១៩ មានហាងចំនួន៦០នៅប្រទេសជប៉ុន និងសាខាចំនួនសរុប១០១ ដែលមានក្នុងប្រទេសថៃ អាមេរិក និងបណ្តាលប្រទេសដទៃទៀត។ក្រុមហ៊ុនខាងលើនេះ មានគោលបំណងស្វែងរកដៃគូសហការ ដើម្បីបើកហាងសាខា Hinoya Curry នៅប្រទេសកម្ពុជា។

ព័ត៌មាននេះ ត្រូវបានលើកឡើងក្នុងជំនួបសម្តែងការគួរសម និងពិភាក្សាការងារ រវាងគណៈប្រតិភូសភាពាណិជ្ជកម្មកម្ពុជា និងក្រុមហ៊ុន NOA Land Co., Ltd. (Hinoya Curry Chain) និងលោកបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា។ កិច្ចពិភាក្សានេះធ្វើឡើងក្នុងពេលលោកតាន់ មុនីវណ្ណ អញ្ជើញអមដំណើរ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ដែលបានទស្សនកិច្ចនិងគោះទ្វារអ្នកវិនិយោគនៅប្រទេសជប៉ុន។

លោកតាន់ មុនីវណ្ណ បានសម្តែងសេចក្តីសោមន្សរីករាយ ដែលបានជួបជាមួយនឹងក្រុមហ៊ុនជប៉ុន ដែលជាឱកាសដើម្បីការបង្ហាញនូវចុក្ខវិស័យរបស់វិស័យឯកជន នៃសភាពាណិជ្ជកម្មកម្ពុជា ព្រមទាំងសក្តានុពលសេដ្ឋកិច្ចរបស់ប្រទេសកម្ពុជា ជូនដល់ធុរជនជប៉ុននេះពេលនេះ៕

        ដោយៈ គង់ ហ្វីអួណា

        ភ្នំពេញៈ ក្រសួងការងារ និងបណ្ដុះបណ្ដាលវិជ្ជាជីវៈ អង្គការអន្តរជាតិខាងការងារ (ILO) តំណាងអង្គការវិជ្ជាជីវៈរបស់កម្មករ និយោជិត បានចុះអនុស្សរណៈនៃការយោគយល់គ្នា លើគម្រោងកម្មវិធីការងារសមរម្យនៅកម្ពុជា ដំណាក់កាលទី៦ ឆ្នាំ២០២៤-២០២៨។

កម្មវិធីដែលប្រារព្ឋនៅទីស្តីការក្រសួងការងារ និងបណ្តុះបណ្តាលវិជ្ជាជីវៈនេះ ធ្វើឡើងក្រោមអធិបតីភាពរបស់លោកហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោកស្រី Chihoko Asada-Miyakawa ឧបការរីអគ្គនាយកអង្គការអន្តរជាតិខាងការងារ និងជានាយិកាប្រចាំតំបន់អាស៊ី និងប៉ាស៊ីហ្វិក នៃអង្គការ ILO រួមទាំងតំណាងកម្មករនិយោជិត និងតំណាងសមាគមនិយោជកផងដែរ។

លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា ការអនុវត្តកម្មវិធីការងារសមរម្យជាច្រើនដំណាក់កាល កន្លងមកនេះ ពិតជាបានចូលរួមចំណែកយ៉ាងសំខាន់ ក្នុងការអភិវឌ្ឍវិស័យការងារនៅកម្ពុជា ជាពិសេស ការលើកកម្ពស់លក្ខខណ្ឌការងារ ការពង្រីករបបសន្តិសុខសង្គម និងការលើកកម្ពស់ផលិតភាពការងារ តាមរយៈកិច្ចសន្ទនាសង្គម និងយន្តការត្រីភាគី។

លោកជំទាវបន្ថែមថា ក្នុងនាមជាសេនាធិការ របស់រាជរដ្ឋាភិបាលកម្ពុជាក្រសួងការងារ តែងតែពង្រឹងកិច្ចសហប្រតិបត្តិការយ៉ាងល្អជាមួយដៃគូសង្គម និងដៃគូអភិវឌ្ឍនានា ជាពិសេសអង្គការអន្តរជាតិខាងការងារ ក្នុងការអភិវឌ្ឍវិស័យការងារនៅកម្ពុជា។ តាមរយៈកិច្ចខិតខំប្រឹងប្រែងទាំងនេះ កម្ពុជាអាចបន្តរក្សាបាននូវស្ថិរភាពទីផ្សារការងារ ការលើកកម្ពស់ជំនាញនិងផលិតភាពការងារ លក្ខខណ្ឌការ​ងារល្អប្រសើរ កំណើនប្រាក់ឈ្នួលអប្បបរមា ការពង្រីករបបសន្តិសុខសង្គម, ការពង្រឹងយន្តការដោះស្រាយវិវាទ ការងារក្រៅប្រព័ន្ធតុលា​ការ ការលើកកម្ពស់សេរីភាពអង្គការវិជ្ជាជីវៈ និងការធានាបាននូវភាពសុខដុមនីយកម្មក្នុងទំនាក់ទំនងវិជ្ជាជីវៈ ដែលសុទ្ធសឹងជាកត្តាគន្លឹះក្នុងការចូលរួមសម្រេចឱ្យបាន នូវការងារសមរម្យស្របតាមតម្រូវការរបស់ប្រជាជនកម្ពុជា។

លើសពីនេះ រាជរដ្ឋាភិបាលកម្ពុជាតែងតែចាត់ទុក វិស័យឯកជន(ដែលជានិយោជក) និងកម្មករ និយោជិត(ដែលជាប្រភពកម្លាំងពលកម្ម) គឺជាដៃគូសង្គម ដែលមិនអាចខ្វះបាន ក្នុងការចូលរួមជំរុញកំណើនសេដ្ឋកិច្ចជាតិ។

ទន្ទឹមនឹងនេះ ឧកញ៉ា សុខ ពិសិដ្ឋ ប្រធានសហព័ន្ធនិយោជក និងសមាគមពាណិជ្ជកម្មកម្ពុជា បានគូសបញ្ជាក់ថា គម្រោងកម្មវិធីការងារសមរម្យសម្រាប់កម្ពុជា បានដើរតួរនាទីជាក្របខណ្ឌកិច្ចសហប្រតិបត្តិការ និងផែនការសកម្មភាព ដើម្បីជួយឱ្យកម្ពុជាសម្រេចបាននូវកំណើនការងារ និងការអភិវឌ្ឍន៍ប្រកបដោយចីរភាព និងបរិយាប័ន្ន។

លើសពីនេះ គម្រោងកម្មវិធីនេះក៏បានឆ្លុះ បញ្ចាំងពីការប្តេជ្ញាចិត្តរបស់រដ្ឋាភិបាល និងដៃគូសង្គមក្នុងការដោះស្រាយបញ្ហា ប្រឈមលើផ្នែកទីផ្សារការងារ ទំនាក់ទំនងវិជ្ជាជីវៈ នៅក្នុងប្រទេសកម្ពុជា និងជំរុ​ញឲ្យប្រជាជនកម្ពុជាទាំងអស់ ទទួលបាននូវការងារសមរម្យកាន់​តែច្រើន។

ដោយឡែកតំណាងអង្គការវិជ្ជាជីវៈរបស់កម្មករនិយោជិត លោក សំ សឿន ប្រធានសហភាពពលកម្មកជាតិកម្ពុជា (NLC)វិញ បានវាយតម្លៃខ្ពស់ចំពោះវឌ្ឍនភាព និងជឿជាក់ថា កម្មវិធីការងារសមរម្យប្រចាំប្រទេសកម្ពុជា ឆ្នាំ២០២៤-២០២៨ នឹងទទួលបានលទ្ធផលល្អប្រសើរ ហើយភាគីសហជីព នឹងបន្តចូលរួមសហការកាន់តែជិតស្និតជាមួយក្រសួងការងារ អង្គការILO និងគ្រប់ភាគីពាក់ព័ន្ឋបន្តទៀត ដើម្បីផ្ដល់ឱ្យវិស័យការងារនៅកម្ពុជា កាន់តែមានភាពរីកចម្រើន ជាពិសេសផ្តល់នូវវឌ្ឍនភាព លើការងារសមរម្យ សម្រាប់កម្មករនិយោ​ជិតលើគ្រប់វិស័យនិងប្រជាពលរដ្ឋកម្ពុជា។

កម្ពុជា គឺជាប្រទេសឈានមុខគេមួយ ក្នុងនាមជាសមាជិករបស់អង្គការអន្តរជាតិខាងការងារ ដែលបានអនុវត្តប្រកបដោយជោគជ័យនូវកម្មវិធីការងារសមរម្យសម្រាប់ប្រទេសកម្ពុជា ចំនួន៥ដំណាក់កាលរួចមកហើយតាំងពីឆ្នាំ២០០៥មក៕

        ដោយៈ គង់ សូរិយា

        កំពតៈ  ប្រសិនជាគ្មានការប្រែប្រួលទេនោះ កំពង់ផែទឹកជ្រៅធំនិងថ្លៃបំផុតនៅខេត្តកំពត និងជាផែទឹកជ្រៅដំបូងបង្អស់របស់កម្ពុជា នឹងបើកដំណើរការជាផ្លូវការនៅថ្ងៃទី៦ ខែមិថុនា ឆ្នាំ២០២៤នេះ។

អ្នកនាំពាក្យក្រសួងសាធារណការ និងដឹកជញ្ជូន លោកផន រឹមបានមានប្រសាសន៍ឲ្យដឹងកាលពីចុងសប្តាហ៍មុនថា កំពង់ផែនេះ ត្រូវបានគេឲ្យឈ្មោះថា “មជ្ឈមណ្ឌលភស្តុភារកម្ម និង កំពង់ផែពហុបំណងកំពត”។លោកបន្តថា ពហុបំណងដោយសារតែផែនេះ មានទីលានកុងតឺន័រ តំបន់សេដ្ឋកិច្ចពិសេស តំបន់ពាណិជ្ជកម្មសេរី មជ្ឍមណ្ឌលភស្តុភារកម្ម ឃ្លាំងស្តុកទំនិញគ្រប់ប្រភេទ ឃ្លាំងភណ្ឌាគារគយ រោងចក្រចម្រាញ់ប្រេងឥន្ធនៈ ចំណតនាវាដឹកទំនិញ និងអ្នកដំណើរ និងមានតំបន់លំនៅដ្ឋានផងដែរ៕

ដោយ: គង់ លាងហួរ
អន្តរជាតិ: សេដ្ឋកិច្ចរបស់ប្រទេសឥណ្ឌូនេស៊ី បានកើនឡើងក្នុងអត្រាប្រចាំឆ្នាំចំនួន៥,១១ភាគរយ នៅត្រីមាសទី១ ឆ្នាំនេះ ដែលលើសពីការព្យាករណ៍ក្នុងរង្វង់៥% ដែលជំរុញដោយកំណើននៃការប្រើប្រាស់របស់ប្រជាជនឥណ្ឌូនេសុី។

ទីផ្សារលំនៅដ្ឋានជាប់ដី(landed housing) បានបង្ហាញនិន្នាការវិជ្ជមាននៅត្រីមាសទី១ ខណៈដែលតម្រូវការផ្ទះថ្មីបន្តកើនឡើង។ ទន្ទឹមនឹងនេះ គម្រោងលំនៅដ្ឋាន ដែលមានតម្លៃសមរម្យ និងមានមធ្យោបាយធ្វើដំណើរដ៏ល្អទៅកាន់ស្ថានីយ៍រថភ្លើង ផ្លូវបង់ប្រាក់ និងការដឹកជញ្ជូនសាធារណៈ ក៏មានតម្រូវការខ្ពស់ផងដែរ។

ជាក់ស្តែង គេសង្កេតឃើញថា គម្រោងលំនៅដ្ឋាន ដែលមានតម្លៃក្រោម៦០០លានរូពៀ(៣៧.៣០៨ដុល្លារ)ក្នុងមួយយូនីត នៅតែមានតម្រូវការខ្ពស់ខ្លាំងក្នុងចំណោមអតិថិជន។ នេះបើយោងតាមក្រុមហ៊ុនប្រឹក្សាអចលនទ្រព្យ Savills។ចំណែក ទីផ្សារអាផាតមុិននៅតែបន្តស្ថិតក្រោមសម្ពាធ ខណៈតម្រូវការនៅមានកម្រិត និងកម្រិតតម្លៃស្ថិតក្នុងសភាពទ្រឹង។ លើសពីនេះ គេពុំសង្កេតឃើញមានគម្រោង ដែលទើបបើកដំណើរការថ្មីនោះទេ ដោយសារអ្នកអភិវឌ្ឍន៍កំពុងផ្តោតលើការលក់អាផាតមុិន ដែលមានស្រាប់។

តម្រូវការអាផាតមុិនភាគច្រើន ត្រូវជំរុញដោយអតិថិជនធម្មតា ដែលទិញសម្រាប់រស់នៅ ខណៈអ្នកវិនិយោគភាគច្រើននៅតែបន្តមានភាពស្ទាក់ស្ទើរក្នុងការទិញអាផាតមុិន។

ការបញ្ចប់ការសាងសង់អគារការិយាល័យថ្មីៗ បានបណ្តាលឱ្យអត្រាការិយាល័យទំនេរ នៅក្នុងតំបន់អភិវឌ្ឍន៍ពាណិជ្ជកម្មកណ្តាល(CBD) នៅទីក្រុងហ្សាកាតា មានការកើនឡើងនៅក្នុងកំឡុងត្រីមាសទី១។ ប៉ុន្តែ ការស៊ើបសួរ និងសកម្មភាពជួលបានកើនឡើង ដែលជំរុញដោយវិស័យបច្ចេកវិទ្យា ថាមពល និងហិរញ្ញវត្ថុ។។

ចំណែកឯ អត្រាស្នាក់នៅក្នុងសណ្ឋាគារបានធ្លាក់ចុះនៅដើមឆ្នាំនេះ ដោយសារសកម្មភាព MICE ទាំងផ្នែករដ្ឋាភិបាល និងវិស័យឯកជនបានផ្អាក ដោយសារការបោះឆ្នោត។ អត្រាស្នាក់នៅសណ្ឋាគារជាមធ្យមស្ថិតនៅចន្លោះពី៥០% ទៅ៦០% ក្នុងអំឡុងត្រីមាសទី១៕ប្រភព: Savill៕

ដោយ: គង់ លាងហួរ
អន្តរជាតិ: យោងតាមរបាយការណ៍សិក្សាថ្មីពីក្រុមហ៊ុនស្រាវជ្រាវទីផ្សារ និងប្រឹក្សាយោបល់ Quilty Space បានឱ្យដឹងថា បណ្តាញផ្កាយរណប Starlink របស់ក្រុមហ៊ុនអាមេរិក SpaceX កំពុងសម្រេចបានមហិច្ឆិតារបស់ខ្លួន នៅក្នុងល្បឿនដ៏ខ្លាំងក្លាបំផុត។

ក្រុមអ្នកវិភាគនៅក្រុមហ៊ុន Quilty Space ព្យាករណ៍ថា ផ្កាយរណប Starlink នឹងបង្កើតប្រាក់ចំណូលបាន៦,៦ពាន់លានដុល្លារនៅឆ្នាំ២០២៤នេះ ដែលការណ៍នេះហាក់ខុសផ្ទុយស្រឡះទៅនឹងការរំពឹងទុករបស់អ្នកវិភាគក្នុងឧស្សាហកម្មអវកាសដូចគ្នា។

លោក Chris Quilty ស្ថាបនិកក្រុមហ៊ុន Quilty Space បានលើកឡើងថា “បើក្រឡេកទៅកាន់ឆ្នាំ២០១៥ នៅពេលដែលក្រុមហ៊ុន SpaceX និងក្រុមហ៊ុន OneWeb បានប្រកាសពីមហិច្ឆិតាបាញ់បង្ហោះផ្កាយរណបធំៗទាំងនេះ អតីតអ្នកធ្លាប់ប្រឡូកជាច្រើន នៅក្នុងឧស្សាហកម្មបានសើចចំអក”។

លោកបន្តថា “អ្នកធ្លាប់ចូលប្រឡូកទាំងនោះ បានចងចាំពីអតីតកាលដ៏បរាជ័យ កាលពីទសវត្សរ៍ឆ្នាំ១៩៩០។ ចំណែក ក្រុមអ្នកឃ្លាំមើលក្នុងឧស្សាហកម្មរំពឹងថា បណ្តាញផ្កាយរណប Starlink នឹងទទួលបានជោគជ័យ ប៉ុន្តែពួកគេមិននឹកស្មានដល់ថា ភាពជោគជ័យនោះអាចឈានដល់កម្រិតដូចសព្វថ្ងៃនេះទេ”។

កាលពីខែឧសភា ឆ្នាំ២០១៩កន្លងទៅ ក្រុមហ៊ុន SpaceX របស់កំពូលមហាសេដ្ឋីអាមេរិក លោក Elon Musk  បានបាញ់បង្ហោះផ្កាយរណបដំបូងបង្អស់ឈ្មោះ Starlink 60 នៅលើរ៉ុក្កែត Falcon 9 របស់ក្រុមហ៊ុនខ្លួន។

គិតមកទល់ពេលនេះ ក្រុមហ៊ុន Space X មានផ្កាយរណប Starlink ជិត៦.០០០គ្រាប់ ដែលក្នុងនោះ ផ្កាយរណបជាង៥.២០០គ្រាប់ កំពុងដំណើរការស្រាប់ និងផ្តល់សេវាអុីនធឺណេតដល់អតិថិជនជាវចំនួន២,៧លាននាក់នៅទូទាំងប្រទេសចំនួន៧៥។

លោក Chris Quilty បានបញ្ជាក់បន្ថែមថា “សមិទ្ធិផលរបស់ផ្កាយរណប Starlink ក្នុងរយៈពេល៣ឆ្នាំចុងក្រោយនេះ ពិតជាគួរឱ្យភ្ញាក់ផ្អើលណាស់។ យើងព្យាករណ៍ថា ប្រាក់ចំណូលពីផ្កាយរណបទាំងនេះ នឹងកើនឡើងពី១,៤ពាន់លានដុល្លារក្នុងឆ្នាំ២០២២ ដល់៦,៦ពាន់លានដុល្លារក្នុងឆ្នាំ២០២៤នេះ”៕ប្រភព: Space News៕

ដោយ: គង់ លាងហួរ
អន្តរជាតិ: លោក Gautam Sen ដែលជាសេដ្ឋវិទូនយោបាយមួយរូប បានលើកឡើងថា មហាសេដ្ឋីឥណ្ឌាធំៗនឹងបង្ខំចិត្តផ្លាស់ទីលំនៅទៅកាន់ទីក្រុងនៅក្នុងប្រទេសផ្សេង ដូចជាទីក្រុងឌូបៃ ប្រសិនបើរដ្ឋាភិបាលឥណ្ឌាប្រមូលពន្ធលើការផ្ទេរទ្រព្យសម្បត្តិ។

លោកបានពន្យល់ថា បុគ្គលដែលមានទ្រព្យសម្បត្តិច្រើនបំផុតនៅក្នុងប្រទេសឥណ្ឌា ដូចជាលោក Mukesh Ambani លោក Gautam Adani និងលោក Ratan Tata អាចនឹងធ្វើចំណាកស្រុកទៅកាន់ប្រទេសផ្សេង ដែលនឹងបណ្តាលឱ្យបាត់បង់ទ្រព្យសម្បត្តិយ៉ាងច្រើនសម្រាប់ប្រទេសឥណ្ឌា។

លោក Gautam Sen ដែលបានចូលនិវត្តន៍ពីសាលាសេដ្ឋកិច្ចទីក្រុងឡុងដ៍ និងធ្លាប់ជាសមាជិកតុមូលឥណ្ឌូ-អង់គ្លេស និងជាទីប្រឹក្សាជាន់ខ្ពស់នៅអង្គការ UNDP បានផ្តល់មតិចំពោះសំណើអនុវត្តន៍ពន្ធលើការផ្ទេរមរតកនៅក្នុងប្រទេសឥណ្ឌា ដោយលោកប្រៀបធៀបជាមួយសហរដ្ឋអាមេរិក និងពិភាក្សាពីផលប៉ះពាល់ដល់សេដ្ឋកិច្ច និងសន្តិសុខឥណ្ឌា។

លោកបន្តថា “មហាសេដ្ឋីជាច្រើនរូបនឹងធ្វើចំណាកស្រុកពីប្រទេសឥណ្ឌាទៅកាន់ទីក្រុងឌូបៃ ប្រទេសអារ៉ាប់រួម។ តួយ៉ាង ចំនួន៧០ភាគរយនៃសេដ្ឋី ឥណ្ឌា ដែល បាន ចាកចេញ ពី ឥណ្ឌា បាន សម្រេចចិត្តទៅ រស់នៅទីក្រុង ឌូ បៃ ដោយសារតែ ទីក្រុង នេះមិនអនុវត្តន៍ពន្ធ លើ ប្រាក់ចំណូល ”។លោកបញ្ជាក់ថា “មហាសេដ្ឋីទាំងនោះនឹងចុះបញ្ជីអាជីវកម្មរបស់ពួកគេឡើងវិញនៅក្នុងប្រទេសអារ៉ាប់រួម ដែលមានន័យថា រដ្ឋាភិបាលឥណ្ឌានឹងអាចប្រមូលបានត្រឹមតែពន្ធសាជីវកម្មប៉ុណ្ណោះ ពីព្រោះអាជីវកម្មរបស់ពួកគេនឹងបន្តស្ថិតនៅក្នុងប្រទេសឥណ្ឌាដដែល”។

លោកអះអាងថា “ដូច្នេះ ប្រទេសឥណ្ឌានឹងខាតបង់ទ្រព្យសម្បត្តិអស់យ៉ាងច្រើន។ ជាឧទាហរណ៍ ប្រទេសស៊ុយអែតគឺជាប្រទេសមួយក្នុងចំណោមប្រទេស ដែលតម្រូវឱ្យប្រជាជនបង់ពន្ធខ្ពស់បំផុតនៅលើពិភពលោក។ ប៉ុន្តែ ស៊ុយអែតបានលុបចោលពន្ធលើការផ្ទេរមរតក ដោយសារអ្នកមានជាច្រើនបានភៀសខ្លួនទៅកាន់ប្រទេសផ្សេង”។

សេដ្ឋវិទូរូបនេះបន្តថា ក្រុមអ្នកមានជាច្រើនបានត្រឡប់មកវិញ កំណើនសេដ្ឋកិច្ចមានភាពប្រសើរឡើង ហើយការប្រមូលពន្ធក៏ប្រសើរឡើងផងដែរ បន្ទាប់ពីស៊ុយអែតបានសម្រេចលុបចោលពន្ធលើការផ្ទេរមរតក។ លោកបន្ថែមថា “ឥឡូវនេះ ប្រសិនបើអ្នកបង្កភាពច្របូកច្របល់បែបនេះនៅក្នុងប្រទេសឥណ្ឌា អ្នកត្រូវតែចងចាំក្នុងចិត្តថា អ្នកមិនអាចប្រមូលពន្ធដល់ថ្នាក់សូម្បីតែដីកសិកម្មបានទេ”៕ប្រភព: Rediff.com៕

ដោយ: គង់ លាងហួរ
អន្តរជាតិ: អគារខ្ពស់ៗកប់ពពកជិត៦០០អគារទៀត គ្រោងនឹងសាងសង់នៅទូទាំងទីក្រុងឡុងដ៍ ដែលធ្វើឱ្យរាជធានីរបស់ប្រទេសអង់គ្លេសមួយនេះមានសោភ័ណភាពដូចជាសង្កាត់ Manhattan នៅទីក្រុងញ៉ូវយ៉ក សហរដ្ឋអាមេរិក។

ជាក់ស្តែង ក្រុមហ៊ុន New London Architecture (NLA) បានអះអាងថា អគារចំនួន៥៨៣អគារ ដែលមានកម្ពស់ជាង២០ជាន់ នឹងលេចរូបរាងឡើងជាបន្តបន្ទាប់គ្នា ក្នុងទីក្រុងឡុងដ៍ នារយៈពេលមួយទសវត្សរ៍ខាងមុខ។កំណើននៃការសាងសង់អគារខ្ពស់ៗត្រូវបានជំរុញដោយតម្រូវការការិយាល័យ និងលំនៅដ្ឋាន ព្រមទាំងការវិនិយោគនៅក្រៅប្រទេស។តួលេខខាងលើនេះបានកើនឡើងទ្វេរដង បើប្រៀបធៀបទៅនឹងការសាងសង់អគារខ្ពស់កប់ពពក បានត្រឹមតែ២៧០អគារប៉ុណ្ណោះ ក្នុងរយៈពេល១០ឆ្នាំចុងក្រោយនេះ។ ផែនការនេះត្រូវបានលើកឡើង បន្ទាប់ពីក្រុមប្រឹក្សា Southwark បានសម្រេចអនុម័តឱ្យសាងសង់ប៉មចំនួន៣ ដែលនឹងបង្កើតបានជាបណ្តុំអគារខ្ពស់កប់ពពកថ្មីមួយទៀតនៅទីក្រុងឡុងដិ៍។

លោក Peter Murray សហស្ថាបនិកក្រុមហ៊ុន New London Architecture (NLA) បានលើកឡើងថា “សំណង់អគារខ្ពស់ៗបានផ្លាស់ប្តូរមុខមាត់ទីក្រុងឡុងដ៍យ៉ាងខ្លាំងក្នុងរយៈពេល២០ឆ្នាំចុងក្រោយនេះ ហើយសំណង់អគារនឹងបន្តរីកស្គុះស្គាយក្នុងរយៈពេល១០ខាងមុខ”។

លោកបានមានប្រសាសន៍ឱ្យដឹងបន្តថា “ចំនួនប្រជាជននៅទីក្រុងឡុងដ៍នឹងបន្តកើនឡើងដល់កម្រិតលើស១០លាននាក់នៅចុងទសវត្សរ៍នេះ។ យើងនៅតែត្រូវការអគារខ្ពស់ៗ ហើយក្រុមហ៊ុន NLA នឹងបន្តតាមដានយ៉ាងដិតដល់ចំពោះអ្វីដែលកំពុងកើតឡើង”។

ក្នុងចំណោមអគារខ្ពស់ៗជាច្រើន គេសង្កេតឃើញថា ក្នុងនោះ អគារ Shard គឺជាអគារដ៏ពេញនិយមសម្រាប់ប្រជាជនរស់នៅទីក្រុងឡុងដ៍។ នេះបើយោងតាមរបាយការណ៍ ដែលមានចំណងជើងថា “London’s Growing Up: A Decade of Building Tall” ។

បច្ចុប្បន្ន អគារ The Shard មានកំពស់៣១០ម៉ែត្រ គឺជាអគារដែលខ្ពស់ជាងគេបំផុតនៅក្នុងចក្រភពអង់គ្លេស ហើយក៏ជាអគារខ្ពស់បំផុតនៅក្នុងសហភាពអឺរ៉ុប រហូតដល់ប្រទេសអង់គ្លេសដកខ្លួនចេញពីសមាជិកភាពរបស់ EU កាលពីខែមករា ឆ្នាំ២០២០៕ប្រភព:metro.co.uk៕