ដោយៈ គង់ សូរិយា

កំពង់ឆ្នាំងៈគម្រោងសាងសង់ស្ពានឆ្លងកាត់ទន្លេសាបប្រវែងជាង៣គីឡូម៉ែត្រ និងផ្លូវតភ្ជាប់ពីខេត្តកំពង់ឆ្នាំង ទៅកាន់ខេត្តកំពង់ធំប្រវែងជាង៥៨គីឡូម៉ែត្រ ​បានសិក្សាចប់សព្វគ្រប់ ​និងរង់ចាំថវិកាពីប្រទេស​ចិន។​

អ្នកនាំពាក្យក្រសួង សាធារណការ ​និងដឹកជញ្ជូន​លោក ផន រឹម ​ បានមានប្រសាសន៍ឲដឹង​កាលពីថ្ងៃទី៩ ខែឧសភា ឆ្នាំ ២០២៤​ថា ​ក្រុមមហ៊ុនសាជីវកម្មស្ពាន-ថ្នល់ចិន (CRBC) បានចេញរបាយការ​ណ៍​សិក្សាសមិទ្ធិលទ្ធភាព ​គម្រោងស្ថាបនាផ្លូវជាតិលេខ៥០C រួចហើយ និងរង់ចាំការពិនិត្យសម្រេច​អំពីឥណ​ទាន សម្បទានពីសាធា​រណរដ្ឋប្រជាមានិតចិន។

ប្រមុខរាជរដ្ឋាភិបាលកម្ពុជា ​សម្ដេចធិបតី ហ៊ុន ម៉ាណែត ​ក៏ធ្លាប់ប្រកាសថា ​គម្រោងផ្លូវ ​និងស្ពាន​ពីខេត្តកំពង់ឆ្នាំង ​ទៅខេត្តកំពង់ធំជាគម្រោងអាទិភាពនៅក្នុងឆ្នាំ ២០២៤ ដែល​រាជរដ្ឋាភិបាល​ប្ដេជ្ញា​ចរចារពន្លឿនការបើកការដ្ឋានឱ្យបាននៅក្នុងឆ្នាំនេះ។​

គម្រោងសាងសង់ស្ពានខេត្តកំពង់ឆ្នាំង -កំពង់ធំ និងផ្លូវតភ្ជាប់ពីខេត្តកំពង់ឆ្នាំង ទៅកាន់ខេត្តកំពង់​ធំប្រវែងជាង ៥៨គីឡូម៉ែត្រ គ្រោងចំណាយថវិកាជិត២៥០លានដុល្លារ។

គម្រោងស្ថាបនាហេដ្ឋារចនាសម្ព័ន្ធដ៏សំខាន់នេះ ចែកចេញជាពីរផ្នែក ក្នុងនោះគម្រោងសាងសង់ស្ពានឆ្លងកាត់ទន្លេសាប ប្រវែង ៣.២៤០ម៉ែត្រ ទទឹង១៣,៥ម៉ែត្រ និងគម្រោងសាងសង់ផ្លូវ៥០C ប្រវែងផ្លូវសរុប៥៨,២០៨គីឡូម៉ែត្រ ក្រាលកៅស៊ូបេតុង (AC) ទទឹង ១០ម៉ែត្រ លើទទឹងតួផ្លូវ ១១ម៉ែត្រ។

លោកផន រឹម បានបញ្ជាក់ថា នៅពេលសាងសង់រួច ផ្លូវ និងស្ពាននេះ នឹងជួយសម្រួលដល់ការធ្វើចរាចរាចរណ៍ ឆាប់រហ័សពីផ្លូវជាតិលេខ៥ ទៅលេខ៦ និងការតភ្ជាប់ទៅផ្លូវសំខាន់ផ្សេងៗទៀត ក៏ដូចជា ជួយពង្រឹងដល់ទំនាក់ទំនងសេដ្ឋកិច្ច សង្គម ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់ ព្រមទាំងជួយពន្លឿន ការអភិវឌ្ឍតំបន់នោះឲ្យកាន់តែរីកចម្រើន៕

        ដោយៈ គង់ សូរិយា

     ភ្នំពេញ ៖ មន្រ្តីជាន់ខ្ពស់នៃក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា បច្ចុប្បន្ននេះក្រសួង កំពុងធ្វើច្បាប់ភូមិបាលថ្មី ដែលមានវ័យ ២៣ឆ្នាំមកហើយ ហើយក៏ត្រូវធ្វើបច្ចុប្បន្នភាពផ្សេងៗទៀត ដើម្បីលើកកម្ពស់បន្ថែមទៀតទៅដល់វិស័យសំណង់ ក៏ដូចជាប្រយោជន៍ដល់វិស័យឯកជន ជាពិសេសសមាជិកសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (C.V.E.A) ។

ឯកឧត្តម ថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅក្នុងពិធីប្រគល់ពានរង្វាន់ឆ្នើម ដល់ប្រតិបត្តិករអចលនទ្រព្យឆ្នាំ២០២៤ កាលពីរាត្រីថ្ងៃទី៨ ខែឧសភាឆ្នាំកន្លងទៅ បានមានប្រសាសន៍បញ្ជាក់ថា ច្បាប់មួយចំនួនដែលក្រសួងកំពុងគិតគូរនេះ មានដូចជា ច្បាប់រៀបចំដែនដី និងនគរូបនីយកម្ម, ច្បាប់ស្តីពីលំនៅឋាន ធ្វើយ៉ាងណា ដើម្បីអាចដឹងអំពីតម្រូវការនៃលំនៅឋានទូទាំងប្រទេស និងប្រភេទលំនៅឋានដែលឆ្លើយតបទៅនឹងចំណូលរបស់ប្រជាពលរដ្ឋជាដើម។

នាឱកាសនោះដែរ ឯកឧត្តម បានសំដែងនូវការគាំទ្រនឹងអបអរសាទរចំពោះម្ចាស់ជ័យលាភីអចលនទ្រព្យប្រចាំឆ្នាំនេះ ដែលអាចញ៉ាំងឲ្យវិស័យអចលនទ្រព្យ មានភាពរស់រានជាបន្តបន្ទាប់ តាមរយៈកិច្ចខិតខំប្រឹងប្រែងប្រកបដោយសមត្ថភាព និងការទទួលខុសត្រូវដោយខ្លួនឯង ក្រោមក្រសែរភ្នែកឃ្លាំមើលយ៉ាងយកចិត្តទុកដាក់ពីរាជរដ្ឋាភិបាលក្នុងកម្រិតសម្របសម្រួលតាមផ្លូវច្បាប់ ខណៈកន្លងមកនេះ មានប្រតិបត្តិករអចលនវត្ថុមួយចំនួនតូចដែលអត់ច្បាប់ បានទាញទម្លាក់វិស័យមួយនេះ ឲ្យជួបបញ្ហានា ហើយក៏បានទម្លាក់បន្ទុកនេះមករាជរដ្ឋាភិបាល ជាអ្នកជួយដោះស្រាយទៅវិញ។

ក្នុងកម្មវិធីនេះ លោក Tom O’Sullivan នាយកប្រតិបត្តិការ នៃ Realestate.com.kh បានលើកឡើងពីតួនាទីដ៏សំខាន់នៃវិជ្ជាជីវៈ ភាពថ្លៃថ្នូរ និងការពង្រឹងទំនុកចិត្តរបស់ភ្នាក់ងារ និងអ្នកអភិវឌ្ឍអចលនទ្រព្យ ដើម្បីធានាឲ្យបាននូវសុវត្ថិភាព នៃការវិនិយោគ ពីភ្ញៀវជាតិ និងអន្តរជាតិ។ លោកក៏បានណែនាំវេទិកាថ្មីរបស់ខ្លួនមួយ ឈ្មោះថា Connect ដែលជាវេទិកាមួយអនុញ្ញាតឱ្យភាគីពាក់ព័ន្ធក្នុងវិស័យអចលនទ្រព្យ បានទាញយកទៅប្រើប្រាស់ដើម្បីរក្សាទិន្នន័យ ស្វែងរកអតិថិជន សហការគ្នាជាមួយដៃគូរ ក្នុងការធ្វើប្រតិបត្តិការទិញ លក់ ឬជួល មានប្រសិទ្ធិភាព និងតម្លាភាព។

សូមបញ្ជាក់ថា កម្មវិធីប្រគល់ពានរង្វាន់អចលនទ្រព្យកម្ពុជា ត្រូវបានប្រារព្ធធ្វើជារៀងរាល់ឆ្នាំ ដោយមានអ្នកចូលរួមមកពីគ្រប់ផ្នែក នៃវិស័យអចលនទ្រព្យរបស់ប្រទេសកម្ពុជា។ ចំពោះអ្នកទទួលពានរង្វាន់ត្រូវបានវាយតម្លៃខ្ពស់ពីគណៈកម្មការដោយផ្អែកលើភាពជាអ្នកដឹកនាំក្នុងវិស័យអចលនទ្រព្យ ការច្នៃប្រឌិត កំណើនអាជីវកម្ម ផលប៉ះពាល់ និងឧត្តមភាពរួម។ អ្នកឈ្នះរង្វាន់ជាង៣០នាក់ មកពីក្រុមហ៊ុនអភិវឌ្ឍន៍អចលនទ្រព្យ និងភ្នាក់ងារដែលឈានមុខគេក្នុងប្រទេសកម្ពុជា ដោយអ្នកឈ្នះទទួលបានរង្វាន់ជាពានរង្វាន់ចំនួន១, ត្រា CREA ដ៏មានកិត្យានុភាព និងវិញ្ញាបណ្ណបត្រ ដើម្បីបញ្ជាក់ពីភាពជោគជ័យរបស់ក្រុមហ៊ុនពួកគេ៕

ដោយៈ គង់ សូរិយា

        ភ្នំពេញៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាលនឹងបន្តប្រឹងប្រែង ធ្វើឱ្យបរិយាកាសវិនិយោគនៅកម្ពុជាកាត់តែល្អប្រសើរ តាមរយៈការកាត់បន្ថយកត្តាអវិជ្ជមាន និងបង្កើនកត្តាវិជ្ជមាន។

ការថ្លែងបែបនេះ បានធ្វើឡើងក្នុងពិធីប្រកាសបើកដំណើរការសមាគមសហព័ន្ធអ្នកវិនិយោគកម្ពុជាជាផ្លូវការ នៅមជ្ឈមណ្ឌលសន្និបាតនិងពិព័រណ៍កោះពេជ្រ នាល្ងាចថ្ងៃទី៩ ខែឧសភា ឆ្នាំ២០២៤កន្លងមកនេះ។

សម្ដេចធិបតីបានថ្លែងថា “រាជរដ្ឋាភិបាលនឹងបន្តប្រឹងប្រែងធ្វើឱ្យបរិយាកាសវិនិយោគនៅកម្ពុជា កាន់តែល្អប្រសើរ តាមរយៈការកាត់បន្ថយកត្តាអវិជ្ជមាន និងបង្កើនកត្តាវិជ្ជមាន”។

សម្ដេចថ្លែងយ៉ាងដូច្នេះថា យើងនឹងបង្កើនកត្តាវិជ្ជមាន តាមរយៈការដាក់ចេញ គោលនយោបាយលើកទឹកចិត្ត អនុគ្រោះ ការដាក់ចេញនូវកញ្ចប់ថវិកា សម្រាប់ជួយដល់វិស័យសំខាន់ៗ ដែលបានធ្វើហើយ តាមរយៈការដាក់ចេញនូវ គោលនយោបាយអន្តរាគមន៍មួយចំនួនរបស់រាជរដ្ឋាភិបាលក្នុងអាណត្តិនេះ យើងបានធ្វើកំណែទម្រង់លើកម្មវិធីផ្សេងៗ កាត់បន្ថយនូវវិធីស្មុគស្មាញ កាត់បន្ថយការិយាធិបតេយ្យ និងបង្កើនការប្រើប្រាស់បច្ចេកវិទ្យា។

សម្ដេចធិបតីបានរំឭកថា កាលពីថ្ងៃទី៦ ខែឧសភា សម្ដេចបានប្រកាសដាក់ឱ្យប្រើប្រាស់កម្ម “វិធីបញ្ជរតែមួយជាតិ” ដើម្បីជំរុញការអនុគ្រោះឱ្យក្រុមហ៊ុនអាចចុះឈ្មោះ ចុះបញ្ជី និងធ្វើកិច្ចការផ្សេងៗតាមប្រព័ន្ធអនឡាញដោយរហ័ស កាត់បន្ថយពេលវេលានិងតម្លៃ។

សម្ដេចធិបតីបានបន្តថា ការកាត់បន្ថយកត្តាអវិជ្ជមាន ការដោះស្រាយបញ្ហាប្រឈម ចំពោះវិស័យឯកជនដែលមាន និងទាន់ពេលវេលា តាមរយៈយន្តការជួបវិស័យឯកជន តាមរយៈក្រុមការងារគ្រប់វិស័យដែលបានប្រទាក់ក្រឡាគ្នា តាមដានត្រួតពិនិត្យក្នុងការដោះស្រាយបញ្ហា នឹងជួយដល់វិស័យឯកជនបានច្រើន។

សម្ដេចបន្តទៀតថា “បញ្ហាណាដែលមិនអាចដោះស្រាយបានលឿន រាជរដ្ឋាភិបាលនឹងបង្កើតយន្តការមួយកម្រិតទៀត ដើម្បីធានាបានប្រសិទ្ធភាព និងប្រសិទ្ធផលក្នុងការដោះស្រាយជូនវិស័យឯកជនឱ្យបានជោគជ័យ”។

 សម្តេចមហាបវរធិបតីបាន ប្តេជ្ញាចិត្តធ្វើយ៉ាងណាខិតខំឱ្យអស់លទ្ធភាព ដើម្បីបង្ករលក្ខណៈឱ្យវិនិយោគិននៅកម្ពុជា កាន់តែមានភាពប្រកួតប្រជែង និងកាន់តែជោគជ័យ បន្តទៅទៀត តាមរយៈការជួយអ្នកវិនិយោគនៅកម្ពុជា ឱ្យទទួលបានការរីកចម្រើន និងរក្សាបានឧត្តមភាពនៃការប្រកួតប្រជែង។

សមាគមសហព័ន្ធអ្នកវិនិយោគកម្ពុជា ត្រូវបានបង្កើតឡើងក្នុងគោលបំណងប្រមូលផ្តុំនូវ សមាសភាពសមាគមនីមួយៗ រួមគ្នាជាថ្នាលធំមួយពង្រឹង និងពង្រីកសកម្មភាពទាក់ទាញវិនិយោគិន បរទេ​សមកពីគ្រប់ប្រទេស បណ្តាក់ទុនក្នុងប្រទេសកម្ពុជា រួមចំណែកដល់ ការអភិវឌ្ឍសេដ្ឋកិច្ចជាតិ ស្របតាមគោលនយោបាយរបស់រាជរដ្ឋាភិបាលកម្ពុជា។

សម្តេចធិបតី ហ៊ុន ម៉ាណែត បានបញ្ជាក់ថា “ខ្ញុំក្នុងនាមជាប្រមុខរាជរដ្ឋាភិបាល បានដាក់ចេញនូវគោលការណ៍ ហើយនឹងប្តេជ្ញាចិត្តដើម្បីធ្វើយ៉ាងណាខិតខំឱ្យអស់លទ្ធភាព ដើម្បីបង្ករលក្ខណៈឱ្យវិនិយោគិននៅក្នុងប្រទេសកម្ពុជា កាន់តែមានភាពប្រកួតប្រជែងនិងកាន់​​តែជោគជ័យបន្តទៅទៀត”៕

ឧកញ៉ាបណ្ឌិត គីម ហ៊ាង ស្ថាបនិក បុរី វិមានសំណាង និងជាប្រធាន KW Cambodia ទូទាំងប្រទេសកម្ពុជា កាលពីថ្ងៃទី០៩ ខែឧសភា ឆ្នាំ២០២៤ បានចុះហត្ថលេខាលើកិច្ចព្រមព្រៀងភ្នាក់ងារលក់ រវាងគម្រោង បុរី វិមានសំណាង ជាមួយក្រុមហ៊ុន អាសូរ៉ា ហូលឌីង អិលអិលស៊ី ដើម្បីជំរុញនិងផ្លាស់ប្តូរការទិញលក់ បុរី វិមានសំណាង នៅក្នុងប្រទេសកម្ពុជានិងអ្នកវិនិយោគនៅអាមេរិក និងទីផ្សារបរទេស។

លោកឧកញ៉ាបណ្ឌិត គីម ហ៊ាង បានលើកឡើថា៖ “ពួកយើងកំពុងបន្តបោះជំហ៊ានមួយទៀត ក្នុងការនាំកម្ពុជាទៅកាន់ពិភពលោក និងនាំពិភពលោកមកកាន់កម្ពុជាវិញ! ពួកយើងតែងតែទាក់ទាញឲ្យបរទេសកាន់តែច្រើន យកលុយមកវិនិយោគនៅកម្ពុជា។ ហើយកិច្ចព្រមព្រៀងនេះក៏ជាដំណាក់កាលថ្មី ជាមួយ អាសូរ៉ា ហូលឌីង ដែលនឹងជួយផ្សព្វផ្សាយការលក់ បុរី វិមានសំណាង ទៅកាន់អតិថិជនដែលកំពុងរស់នៅទឹកដីអាមេរិក ហើយមានប្រភពដើមជាជនជាតិអាស៊ី។”

ស្ថាបនិក បុរី វិមានសំណាង បន្ថែមទៀតថា នៅពេលតំណាលគ្នា ប្រសិនបើនៅកម្ពុជាយើងមានអ្នកដែលគាតចាប់អារម្មណ៍ចង់ទិញផ្ទះនៅអាមេរិកក្រុមហ៊ុន អាសូរ៉ា ហូលឌីង ក៏អាចប្រឹក្សាលក្ខខណ្ឌ និងរៀបចំឯកសារជូនពួកគាត់ អាចទិញផ្ទះនៅអាមេរិកបានក្រោមទំហំផ្តល់ប្រាក់កម្ចីពីធនាគាររហូតដល់ទៅ៧០% សម្រាប់រយៈ ៣០ឆ្នាំ ឯណោះ។

លោក Joe Lam ប្រធានក្រុមហ៊ុន អាសូរ៉ា ហូលឌីង អិលអិលស៊ី បានលើកឡើងថា ការចុះហត្ថលេខាលើកិច្ចព្រមព្រៀងនេះ គឺមានគោលបំណងដើម្បីអភិវឌ្ឍន៍ទីផ្សារដ៏អស្ចារ្យទៅកាន់អតិថិជន ដែលជាជនជាតិអាមេរិក និងអតិថិជនសក្តានុពលនៅទូទាំងពិភពលោក។ លោក Joe Lam បន្ថែមថា៖ “ពួកយើងទទួលស្គាល់ថា បុរីរបស់លោកឧកញ៉ាបណ្ឌិត គីម ហ៊ាង ជាបុរីលំដាប់ឈានមុខមួយនៅកម្ពុជា ហើយប្រាកដណាស់អតិថិជននៅអាមេរិកនឹងពេញចិត្តលើឱកាសទិញលក់សម្រាប់វិនិយោគជាមួយ បុរី វិមានសំណាងរបស់គាត់ជាក់ជាមិនខាន។

បុរី វិមានសំណាង របស់ឧកញ៉ាបណ្ឌិត គីម ហ៊ាង និងលោកជំទាវ ឧកញ៉ា គង់ សំណាង គឺជាគម្រោងបុរី លំដាប់មួយ នៅក្នុងប្រទេសកម្ពុជា។ បុរី វិមានសំណាង ជាគម្រោងអភិវឌ្ឍលំនៅឋាន បែបអភិជន ដោយមានការសាងសង់ជាប្រភេទផ្ទះអាជីវកម្ម (Shophouse) រួមទាំងប្រភេទផ្ទះវីឡាប្រណិតៗចំនួន៤ប្រភេទទៀត ដូចជាវីឡាព្រីន (Prince Villa) វីឡាឃ្វីន (Queen Villa) វីឡាឃីង (King Villa) និងវីឡារ៉ូយាល់ (Royal Villa)។

បុរី វិមានសំណាង មានទីតាំងស្ថិតនៅខាងជើងក្រសួងដែនដី២៥០០ម៉ែត្រ សាងសង់លើដី២៥ហិកតា និងកំពុងអភិវឌ្ឍន៍ក្លាយជាសហគមន៍លំនៅឋាន ប្រកបដោយផាកសុខភាព ឯកជនភាព និងសុវត្ថិភាព ស័ក្តិសមសម្រាប់គ្រួសារអភិជនកម្ពុជាក្នុងការរស់នៅ។ បុរី វិមានសំណាង យកចិត្តទុកដាក់ខ្ពស់បំផុតទៅលើផ្ទៃបៃតង និងសុខដុមនៃការរស់នៅរបស់អតិថិជន ។ ក្នុងបុរី មានសួនច្បារ កន្លែងហាត់ប្រាណ កន្លែងលេង កីឡា ផ្លូវធំ ដើមឈើច្រើន និងព្រែកធម្មជាតិស្មើជិត៤០% នៃផ្ទៃដីសរុប ៕

        ដោយៈ គង់ ហ្វីអូណា

        ភ្នំពេញៈ គម្រោង​អភិវឌ្ឍ​ព្រលាន​យន្តហោះ​តេជោ​ ក្រុងតាខ្មៅ​ ​ដែលគ្រោងចំណាយប្រាក់ ​វិនិយោគ​អស់​ប្រមាណ​១៥០០​លាន​ដុល្លារ ពេលនេះសម្រេច​បានជាង៧២ភាគរយហើយ។

ការ​ចំណាយទឹកប្រាក់ដ៏មហាសាល វិនិយោគ​ហេដ្ឋារចនាសម្ព័ន្ធ​ដ៏ធំនេះ​ ក៏មាន​​ចំណែក​ទុន​វិនិយោគ​ពី​គ្រឹះស្ថាន​ធនាគារ និង​ហិរញ្ញវត្ថុ​ដែលបាន​ចូលរួម​គាំទ្រ​ តាម​រយៈ​ការទិញ​សញ្ញាបណ្ណ (មូលបត្របំណុល) ពីក្រុមហ៊ុនអភិវឌ្ឍព្រលាន ក្នុង​ទំហំ​ទឹកប្រាក់៣៤០លាន ​ដុល្លារផងដែរ។

លោកស្រី លឹម លីណា អនុប្រធាន​ក្រុមហ៊ុន​កាណាឌីយ៉ា​គ្រុប​បាន​បញ្ជាក់​ថា គម្រោង​អភិវឌ្ឍ​ព្រលាន​យន្តហោះ​តេជោ ក្រុង​តាខ្មៅ​​បច្ចុប្បន្ន​​សម្រេច​បាន​៧២.៣% ជាមួយនឹងការវិនិយោគសរុប​រហូត​ដល់ ១,០៥២ លានដុល្លារ។

លោកស្រី​អះអាង​ថា ខ្ទង់​ចំណាយ​នេះ​ ក៏​មានការ​ចូលរួមគាំទ្រ​ហិរញ្ញវត្ថុ​ពី​គ្រឹះស្ថាន​ធនាគារ និង​ហិរញ្ញវត្ថុប្រមាណ ៣៤០ លាន​ដុល្លារ ​តាម​រយៈ​ការ​ទិញ​សញ្ញាបណ្ណ (មូលបត្រ​បំណុល) ពីក្រុមហ៊ុនអភិវឌ្ឍព្រលាន។

ការអភិវឌ្ឍហេដ្ឋារចនាសម្ព័ន្ធ ដែល​ចាយទុនរហូត​ខ្ទង់ពាន់លាន​ដុល្លារ​នេះ បើ​តាមលោក​ស្រី លឹម លីណា បានគូស​បញ្ជាក់ថា ក្រុមហ៊ុន​មាន​មហិច្ឆិតា ក្នុងការ​​ប្រែក្លាយ​ព្រលានយន្តហោះតេជោ ក្រុង​តាខ្មៅ​​ ឲ្យក្លាយ​ទៅ​ជាព្រលាន​យន្តហោះ ​ដែល​ធំនិង​ទំនើប​ជាង​គេ​​នៅ​តំបន់​អាស៊ី។

ទាក់ទង​គម្រោង​ព្រលាន​យន្តហោះ​តេជោ​ ក្រុង​​តាខ្មៅ​ អតីត​នាយករដ្ឋមន្ត្រី​កម្ពុជា សម្តេច​តេជោ ហ៊ុន សែន ក៏​ធ្លាប់​បាន​អំពាវនាវ​ដល់​គ្រឹះ​ស្ថាន​ហិរញ្ញវត្ថុ​ទាំង​ក្នុង ​និង​ក្រៅ​ប្រទេស​ ជួយ​ទិញ​មូលបត្រ​បំណុល​របស់​ក្រុមហ៊ុន ដើម្បី​កាត់បន្ថយ​នូវ​ការ​ប្រើប្រាស់​ទុន​ពី​ក្រៅ​ប្រទេស។

សម្តេច​តេជោ ហ៊ុន សែន បាន​គូស​បញ្ជាក់​ថា ការ​ទិញ​សញ្ញាបណ្ណ ​ពីក្រុមហ៊ុន​អភិវឌ្ឍ​ព្រលាន​យន្តហោះ​ថ្មី​នេះ គ្រឹះស្ថាន​ហិរញ្ញវត្ថុ​នឹង​ទទួល​បាន​ផល​ចំណេញ​ពី​អត្រា​ការប្រាក់ ដោយ​ទទួល​បាន​ការធានា​ផ្នែក​ហានិភ័យ​ស្មើ​សូន្យ​ពី​រាជរដ្ឋាភិបាល​។

ធនាគារ​ ABA ជា​គ្រឹះស្ថាន​ធនាគារ​ដ៏​ធំ​មួយ ដែល​បាន​វិនិយោគ​ទឹកប្រាក់​ចំនួន៣០លាន​ដុល្លារ​អាមេរិក ​លើ​ការ​ទិញ​សញ្ញា​បណ្ណ​សាជីវកម្ម​ ដើម្បី​​គាំទ្រ​ហិរញ្ញវត្ថុ​ការអភិវឌ្ឍ ​ព្រលាន​យន្តហោះ​អន្តរជាតិ​តេ​ជោ​តាខ្មៅ។

លោក Zhiger Atchabarov នាយកប្រតិបត្តិការ​នៃ​ធនាគារ ABA បាន​ឲ្យ​កម្ពុជា​ថ្មី​ដឹង​ថា លោក​មាន​ទំនុក​ចិត្ត​ការ​រួម​ចំណែក​របស់ ABA ក្នុង​ការ​គាំទ្រ​គម្រោង​អភិវឌ្ឍន៍ ​ព្រលាន​យន្តហោះ​តេជោ​តាខ្មៅ នឹង​មាន​ឥទ្ធិពល​វិជ្ជមាន​ តាម​រយៈ​ការ​បង្កើត​ការងារ​ថ្មី និង​បង្កើន​ភាព​ទាក់ទាញ​របស់​ប្រទេស​កម្ពុជា។

លោកបញ្ជាក់​ថា ស្របតាម​គោលនយោបាយ​វិនិយោគ​របស់ ABA ការ​ចូលរួម​គាំទ្រ​ដំណាក់កាល​អភិវឌ្ឍ​នេះ ​នឹង​ប្រែក្លាយ​ព្រលាន​យន្តហោះ​តេជោតាខ្មៅ​ថ្មី មិន​ត្រឹម​តែ​ជា​គោលដៅ​ទេសចរណ៍​ប៉ុណ្ណោះ​​ទេ ប៉ុន្តែ​ជា​មជ្ឈមណ្ឌល​ដឹកជញ្ជូន​សម្រាប់​តំបន់ ដែល​នឹង​រួម​ចំណែក​ដល់​កំណើន​សេដ្ឋកិច្ច និង​ការអភិវឌ្ឍ​របស់​ប្រទេស​កម្ពុជា។

ព្រលានយន្តហោះ​អន្តរជាតិ​តេជោ​តាខ្មៅ ​ត្រូវបាន​អភិវឌ្ឍ​សាងសង់​​ឡើង​នៅ​លើ​ផ្ទៃដី​ទំហំ២៦០០ ហិកតា ដែលមានទីតាំងស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងមួយផ្នែកក្នុងស្រុកបាទី ខេត្តតាកែវ។

ព្រលានយន្តហោះថ្មីនេះ វិនិយោគ​ដោយ​ក្រុមហ៊ុន OCIC របស់អ្នកឧកញ៉ា ពុង ឃាវសែ ដែល​កាន់កាប់ភាគហ៊ុន៩០ភាគរយ និង​រាជរដ្ឋាភិបាលកាន់កាប់ភាគហ៊ុន១០ភាគរយ ដោយវិនិយោគ​ទឹកប្រាក់ចំនួន១,៥០០លានដុល្លារអាមេរិក។

អាកាសយានដ្ឋានអន្ដរជាតិភ្នំពេញថ្មី នឹង​ក្លាយ​ជាអាកាសយានដ្ឋានលំដាក់ថ្នាក់ទី៩ ក្នុងពិភពលោក ដែល​គ្រោង​បញ្ចប់​ដំណាក់កាលទី១ និង​ដាក់​ឲ្យ​ដំណើរការ​នៅ​ឆមាស​ទី១ ឆ្នាំ ២០២៥៕

ដោយៈ គង់ សូរិយា

        ភ្នំពេញៈ លោកបណ្ឌិត សរ សិនិរ៉ា អគ្គលេខាធិការរងគណៈកម្មាធិការវិនិយោគកម្ពុជា បានទទួលជួបជាមួយ ក្រុមគណៈប្រតិភូ អង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក៣ ហៅកាត់ជាភាសាអង់គ្លេ​សថា AMRO ដឹកនាំដោយ លោកបណ្ឌិត JINHO CHOI ប្រធានក្រុមសេដ្ឋវិទូ ដែលធ្វើបេសកកម្មស្វែងយល់អំពី ស្ថានភាពនៃការវិនិ​យោគផ្ទាល់ពីបរទេសនៅក្នុងប្រទេសកម្ពុជា នាឆ្នាំ២០២៣និងដើមឆ្នាំ២០២៤នេះ។

ប្រតិភូនេះ ក៏ស្វែងយល់អំពីគោលនយោបាយរបស់រាជរដ្ឋាភិបាលកម្ពុជា ក្នុងការទាក់ទាញវិនិយោគផ្ទាល់ពីបរទេស នាពេលបច្ចុប្បន្ននិងទៅអនាគត បន្ថែមទៀត។

លោកបណ្ឌិត សរ សិនិរ៉ា មានមតិស្វាគមន៍យ៉ាងកក់ក្ដៅចំពោះគណៈប្រតិភូ AMRO ដែលបានចាប់អារម្មណ៍ពីប្រទេសកម្ពុជា ហើយមកស្វែងយល់ ដោយផ្ទាល់អំពីស្ថានភាពជាក់ស្តែង ដោយឯកឧត្តមបានជម្រាបជូនគណៈប្រតិភូយ៉ាងពិស្តារ អំពីស្ថានភាពនៃកំណើនរំហូរទុនវិនិយោគមកកម្ពុជា នៅក្រោយវិបត្តិកូវីដ១៩ ជាពិសេសរំហូរទុនដ៏គួរឱ្យកត់សម្គាល់ក្នុងឆ្នាំ២០២៣ ដែលមានគម្រោងសរុបចំនួន២៤៧គម្រោង និងគម្រោងពង្រីកផលិតកម្មចំនួន២១គម្រោង ហើយក្នុងនោះគម្រោងវិនិយោគចំនួន៧១ ត្រូវបានបណ្តាក់ទុនវិនិយោគនៅក្នុងតំបន់សេដ្ឋកិច្ចពិសេស ដែលទុនវិនិយោគសរុបនៃគម្រោងទាំងនេះមានចំនួន៤,៩ ពាន់លានដុល្លារអាមេរិក ដែលមានការកើនឡើងប្រមាណ២២%ធៀបនឹងឆ្នាំ២០២២។

ដោយឡែកក្នុងត្រីមាសទី១នៃឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មី និងគម្រោងពង្រីកផលិតកម្មសរុបចំនួន១០៦គម្រោង ដែលមានទុនវិនិយោគសរុបប្រមាណ២,២ ពាន់លានដុល្លារអាម៉េរិក បង្កើតការងារជាង១០ម៉ឺនកន្លែង។ កំណើននេះបើគិតជាភាគរយធៀបនឹងត្រីមាសទី១ ឆ្នាំ២០២៣គឺស្មើនឹង៦៤៩%។

លោកបន្តថា “កំណើនយ៉ាងគំហុកនេះ ដោយសារការវិនិយោគក្នុងគម្រោងវិស័យហេដ្ឋារចនាសម្ព័ន្ធ វិស័យឧស្សាហកម្ម វិស័យទេស​ចរណ៍ និងគម្រោងពង្រីកផលិតកម្ម នៃវិស័យឧស្សាហកម្មក្នុងតំបន់សេដ្ឋកិច្ចពិសេស”។

លោកបណ្ឌិតបានបញ្ជាក់បន្ថែមផងដែរថា កត្តាចម្បងដែលធ្វើអោយកម្ពុជា ទទួលបានទំនុកចិត្តពីវិនិយោគិនបរទេស មកបណ្តាក់ទុនវិនិយោគនៅកម្ពុជានាពេលកន្លងមក គឺស្ថេរភាពនយោបាយ,ស្ថេរភាពម៉ាក្រូសេដ្ឋកិច្ច ក្របខណ្ឌគតិយុត្តស្តីពីវិនិយោគមានលក្ខណៈបើកចំហរខ្លាំង និងរបបនៃការលើកទឹកចិត្តវិនិយោគមានលក្ខណៈអំណោយផល ខណៈដែលកម្ពុជាបន្តអភិវន៍ឌ្ឍហេដ្ឋារចនាសម្ព័ន្ធរូបវ័ន្តឥតឈប់ឈរ ដើម្បីប្រសិទ្ធភាពនៃការតភ្ជាប់និងការសម្រួលដល់ប្រព័ន្ធដឹកជញ្ជូន ព្រមទាំងកិច្ចខិតខំប្រឹងប្រែងរបស់រាជរដ្ឋាភិបាលក្នុងការបើកច្រកទីផ្សារថ្មីៗសម្រាប់ទំនិញកម្ពុជា តាមរយៈការចូលរួមក្នុងកិច្ចព្រមព្រៀងពាណិជ្ជកម្មសេរីតំបន់និងទ្វេភាគី ក៏ដូចជាកត្តាដែលកម្ពុជាមានប្រជាជនវ័យក្មេងភាគច្រើន។ល។

ក៏ប៉ុន្តែអ្វីដែលគួរឱ្យចាប់អារម្មណ៍ជាពិសេសនោះ គឺប្រមុខរាជរដ្ឋាភិបាលនីតិកាលទី៧ នៃរដ្ឋសភាបានអនុវត្តសកម្មភាពដើរគោះទ្វារទាក់ទាញវិនិយោគដោយផ្ទាល់ និងជាបន្តបន្ទាប់ នៅបណ្តាប្រទេសជាគោលដៅយុទ្ធសាស្ត្រជាច្រើន នាពេលកន្លងមកដែលការណ៍នេះ ផ្តល់នូវភាពកក់ក្តៅយ៉ាងពិសេសដល់វិនិយោគិន។

ចំពោះគោលនយោបាយទាក់ទាញវិនិយោគ សម្រាប់ពេលអនា​គត លោកអគ្គលេខាធិការរង ក៏បានជម្រាបជូនគណៈប្រតិភូអំពីខ្លឹមសារជាសារវ័ន្ត នៃឯកសារគោលនយោបាយ របស់រាជរដ្ឋាភិបាលជាពិសេស យុទ្ធសាស្ត្របញ្ចកោណដំណាក់កាលទី១ (២០២៣) និង ផែនការមេគ្រប់ជ្រុងជ្រោយស្ដីពី ប្រព័ន្ធដឹកជញ្ជូនអន្តរមធ្យោបាយនិងភស្តុភារកម្ម (២០២៣-២០៣៣)។

លោកបណ្ឌិត JINHO CHOI បានសំដែងការសាទរ ជូនចំពោះរាជរដ្ឋាភិបាលកម្ពុជា ចំពោះការសម្រេចបាននូវការស្តារសេដ្ឋកិច្ចឡើងវិញយ៉ាងឆាប់រហ័ស នៅក្រោយវិបត្តិកូវីដ១៩ និងក្នុងបរិបទដែលពិភពលោកកំពុងជួបប្រទះ នូវភាពតានតឹងផ្នែកភូមិសាស្ត្រនយោ​បាយនិងសង្គ្រាម តាមរយៈការដាក់ចេញនូវវិធានការមុតស្រួច ដើម្បីទាក់ទាញ និងថែទាំវិនិយោគ ដើម្បីកំណើនសេដ្ឋកិច្ចជាតិ និងវិបុលភាពរបស់ប្រជាពលរដ្ឋកម្ពុជា។

ជាក់ស្តែងខ្លឹមសារនៃកំណើនសេដ្ឋកិច្ច របស់ប្រទេសកម្ពុជាក៏ត្រូវបានរំលេចនៅក្នុងរបាយការណ៍ស្ដីពី ស្ថានភាពម៉ាក្រូសេដ្ឋកិច្ច និងហិរញ្ញវត្ថុ របស់កម្ពុជាជារៀងរាល់ឆ្នាំ ជាពិសេសឆ្នាំ២០២៣ កន្លងទៅផងដែរ៕

ដោយ: គង់ លាងហួរ

អន្តរជាតិ: ការ​លក់​ផ្ទះ​ប្រណីត​ នៅក្នុង​ប្រទេស​សិង្ហបុរី​បាន​ដាំក្បាលចុះ៥០ភាគរយ​ ក្នុង​ត្រីមាស​ទីមួយ​ បើធៀបនឹងរយៈពេលដូចគ្នាកាលពីមុន ខណៈផ្ទះភាគច្រើនគឺជាប្រភេទអាផាតម៉ឹន ដែលមានតម្លៃយ៉ាងតិច៥លានដុល្លារសិង្ហបុរី (៣,៧លានដុល្លារអាមេរិក)។

ក្នុងរយៈពេល៣ខែដំបូងដើមឆ្នាំនេះ អាផាតម៉ិនប្រណីតចំនួន៦៦យូនីត ត្រូវបានលក់ចេញ ដោយធ្លាក់ចុះពី១២៨យូនីត ក្នុងរយៈពេលដូចគ្នាកាលពីឆ្នាំមុន។ ចំណែកចំនួនជនបរទេស​ ដែល​ទិញ​អចលនទ្រព្យ​ទាំងនេះ ​បាន​ធ្លាក់ចុះប្រមាណ៩៨ភាគរយ។

ផ្ទុយទៅវិញ នៅក្នុងត្រីមាសទី១ ឆ្នាំ២០២៣ ជនបរទេសបានទិញអាផាតម៉ិនប្រណីតចំនួន៥២យូនីត។ ប៉ុន្តែចាប់​តាំង​ពី​រដ្ឋាភិបាលសិង្ហបុរីដំឡើងពន្ធប្រថាប់ត្រារបស់អ្នកទិញបន្ថែម (ABSD) ក្នុងខែមេសា ឆ្នាំមុន ចំនួន​ជនបរទេស ដែលទិញផ្ទះ​ប្រណីត​បាន​ធ្លាក់​ចុះ​ជា​លំដាប់។ជុំវិញបញ្ហានៃការធ្លាក់ចុះនេះ ក្រុមអ្នកសង្កេតការណ៍បានលើកឡើងថា “ការដំឡើងពន្ធប្រថាប់ត្រាទ្វេរដង លើអចលនទ្រព្យ បានបង្អាក់ចំណាប់អារម្មណ៍ របស់អ្នកវិនិយោគបរទេសក្នុងការទិញអច​លនទ្រព្យលំនៅដ្ឋាននៅក្នុងប្រទេសសិង្ហបុរី”។

កាលពីខែមេសាឆ្នាំមុន ពន្ធប្រថាប់ត្រា (ABSD) ដែលអតិថិជនបរទេសត្រូវបង់នៅពេលទិញលំនៅដ្ឋាន ត្រូវបានដំឡើងពី៣០ភាគរយទៅដល់៦០ភាគរយ ដែលជាផ្នែកមួយនៃវិធានការរបស់រដ្ឋាភិបាលសិង្ហបុរី ដើម្បីរក្សាស្ថិរភាពទីផ្សារ។

ការដំឡើងពន្ធនេះ បណ្តាលឱ្យអ្នកទិញត្រូវបង់ពន្ធខ្ពស់កប់ពពក ក្នុងទំហំទឹកប្រាក់ ប្រមាណ៣លានដុល្លារសិង្ហបុរី ប្រសិនបើពួកគេទិញផ្ទះ ដែលមានតម្លៃ៥លានដុល្លារសិង្ហបុរី ។

លោក Sing Tien Foo សាស្ត្រាចារ្យ​នៃ​អគ្គនាយកដ្ឋាន​អចលនទ្រព្យ​នៃ​សាកល​វិទ្យាល័យ​ជាតិ​សិង្ហ​បុរី(NUS) បានលើកឡើងថា “ជាធម្មតា អតិថិជនបរទេសនិយមចូលចិត្តទិញ អចលនទ្រព្យប្រណីត។ប៉ុន្តែ ចាប់តាំងពីសិង្ហបុរីដាក់ឱ្យអនុវត្តន៍ ពន្ធប្រថាប់ត្រាថ្មីកាលពីឆ្នាំមុន យើងសង្កេតឃើញថា ចំនួនអតិថិជនបរទេសបានធ្លាក់ចុះយ៉ាងគំហុក”៕ប្រភព: CNA៕