ដោយ: គង់ លាងហួរ

អន្តរជាតិ: មន្ត្រីជាន់ខ្ពស់ថៃ បានអះអាងថា ផ្លូវរថភ្លើងល្បឿនលឿនថៃ-ចិន ដែលតភ្ជាប់ពីទីក្រុងបាងកក ទៅកាន់ខេត្ត Nong Khai រួចបន្តភ្ជាប់ទៅកាន់ផ្លូវដែកឡាវ-ចិន កំពុងសម្រេចបានវឌ្ឍនភាពឆ្ពោះទៅបើកដាក់ឱ្យប្រើប្រាស់ ជាសាធារណៈនៅឆ្នាំ២០៣០ខាងមុខ។

ដើមឡើយ ខ្សែរថភ្លើងទាំងមូលគ្រោង នឹងបើកដំណើរការឆាប់ៗនៅឆ្នាំ២០២៨។ ទោះជាយ៉ាងនេះក្តី គម្រោងដ៏ធំ ដែលត្រូវបានគេប៉ាន់ស្មានថា មានតម្លៃទុនវិនិយោគជាង៩,២ពាន់លានដុល្លារនេះ ត្រូវបានញាំញី ដោយសារការពន្យារពេល ដែលបណ្តាលមកពីការខ្វែងគំនិតផ្នែកហិរញ្ញវត្ថុរវាងប្រទេសទាំង២។

លោក Suriya Juangroongruangkit រដ្ឋមន្ត្រីក្រសួងដឹកជញ្ជូនថៃ បានជួបជាមួយលោក Wu Hao ប្រធានគណៈកម្មការកំណែទម្រង់ និងអភិវឌ្ឍន៍ជាតិរបស់ប្រទេសចិន នៅទីក្រុងប៉េកាំង ក្នុងអំឡុងកិច្ចប្រជុំលើកទី៣១ នៃគណៈកម្មាធិការរួមគ្នាលើគម្រោងផ្លូវរថភ្លើងល្បឿនលឿនថៃ-ចិន ចាប់តាំងពីគម្រោងបានចាប់ផ្តើមបើកការដ្ឋានសាងសង់នៅឆ្នាំ២០២០។

ចំណែកកិច្ចប្រជុំលើកទី៣២ នៃគណៈកម្មាធិការរួមគ្នាលើគម្រោងនេះ នឹងរៀបចំឡើងនៅក្នុងប្រទេសថៃ ដោយកាលបរិច្ឆេទមិនទាន់ត្រូវបានប្រកាសនៅឡើយ។

កិច្ចពិភាក្សានេះបានធ្វើឡើង បន្ទាប់ពីភាគីចិន បានអំពាវនាវឱ្យប្រទេសទាំងពីរ ពន្លឿនការសាងសង់ គម្រោងផ្លូវរថភ្លើងល្បឿនលឿនប្រវែង៨៧៣គីឡូម៉ែត្រនេះក្នុងខែមករា បន្ទាប់ពីមានការពន្យារពេលអស់ជាច្រើនឆ្នាំ។

ផ្លូវរថភ្លើងល្បឿនលឿននេះ នឹងតភ្ជាប់ប្រទេសចិន និងប្រទេសថៃ ដោយឆ្លងកាត់តាមប្រទេសឡាវ ដែលជាផ្នែកមួយនៃគំនិតផ្តួចផ្តើមខ្សែក្រវ៉ាត់ និងផ្លូវសកល(BRI)របស់ប្រទេសចិន។

លោក Suriya បានមានប្រសាសន៍ឱ្យដឹងថា គណៈកម្មាធិការរួម បានទទួលស្គាល់វឌ្ឍនភាព នៃការសាងសង់ក្រោមការទទួលខុសត្រូវរបស់ប្រទេសថៃក្នុងដំណាក់កាលទី១ ដោយគ្របដណ្តប់លើខ្សែរថភ្លើងពីទីក្រុងបាងកក ទៅកាន់ខេត្តនគររាជសីមា។ ដំណាក់កាលទី១នេះ ត្រូវបានគេរំពឹងថា នឹងបើកដាក់ឱ្យប្រើប្រាស់នៅឆ្នាំ២០២៨។

លោក​បន្ត​ថា កំណាត់ខ្សែរថភ្លើងក្នុងដំណាក់​កាល​ទី​២ ដែលតភ្ជាប់ពី​ខេត្តនគររាជសីមា ទៅ​កាន់ខេត្ត​ណងខៃ បាន​ឆ្លង​កាត់​ការ​វាយ​តម្លៃ​ផល​ប៉ះ​ពាល់​បរិស្ថាន ខណៈការ​សាង​សង់​គ្រោង​នឹង​ចាប់​ផ្តើម​នៅ​ឆ្នាំ​ក្រោយ។

លោកបានបញ្ជាក់ទៀតថា កំណាត់ផ្លូវរថភ្លើងដំណាក់កាលទី២នេះ នឹងតភ្ជាប់បន្តជាមួយផ្លូវដែកឡាវ-ចិន ហើយនឹងបើកដំណើរការនៅឆ្នាំ២០៣០ ដែលមានន័យថា គម្រោងទាំងមូលនឹងត្រូវបានបញ្ចប់រួចរាល់តែម្តង។

លោក Suriya បានបន្ថែមថា ស្ពានរថភ្លើងល្បឿនលឿនមេគង្គថ្មីមួយ ដែលតភ្ជាប់ខេត្ត Nong Khai ទៅកាន់រដ្ឋធានីវៀងច័ន្ទ ប្រទេសឡាវ នឹងត្រូវបានសាងសង់ ដោយប្រើប្រាស់ថវិកាសារពើពន្ធឆ្នាំ២០២៤របស់រដ្ឋាភិបាលថៃ៕ប្រភព: The Nation៕

        ដោយៈ គង់ សូរិយា

        ភ្នំពេញៈ ក្រុមមន្រ្តី និងផ្នែកឯកជនពាក់ព័ន្ឋបានបើកកិច្ចប្រជុំពិនិត្យការងារសិក្សាគម្រោងផ្លូវតភ្ជាប់ ផ្នែកខាងកើតគម្រោងសាងសង់ស្ពានឆ្លងកាត់ទន្លេបាសាក់ មកកាន់ផ្លូវជាតិលេខ១។

លោកសួង ហេង រដ្ឋលេខាធិការ និងជានាយកគម្រោង បានអញ្ជើញដឹកនាំកិច្ចប្រជុំពិនិត្យការងារ សិក្សាគម្រោងផ្លូវតភ្ជាប់ ផ្នែកខាងកើតគម្រោងសាងសង់ ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ដោយមានការចូលរួមពី ឯកឧត្តមប្រធាន អនុប្រធាន សមាជិកគម្រោង តំណាងសាលារាជធានីភ្នំពេញ តំណាងអ្នកឧកញ៉ា ប៉េង ហួត ម្ចាស់បុរីប៉េង ហួត បឹងស្នោ ក្រុមហ៊ុនសំណង់សៀងហៃ ព្រមទាំងមន្ត្រីបច្ចេកទេស និងភាគីពាក់ព័ន្ធជាច្រើនរូប។

អង្គប្រជុំបានពិភាក្សា ដោយផ្តោតជាសំខាន់ទៅលើការជ្រើសរើសគន្លងខ្សែផ្លូវ តភ្ជាប់ផ្នែកខាងកើតគម្រោងសាងសង់ ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) មកទល់នឹងផ្លូវជាតិលេខ១ ធ្វើយ៉ាងណាឱ្យខ្សែផ្លូវថ្មីនេះ មានផលប៉ពាល់តិច ស្របតាមលក្ខណៈបច្ចេកទេស តែមានផលចំណេញខ្ពស់។

ជាលទ្ធផល កិច្ចប្រជុំសម្រេចដាក់ចេញកាលវិភាគ ការងារប្រជុំលើកក្រោយបន្តទៀត និងចុះពិនិត្យដល់ទីតាំងជាក់ស្តែង ដើម្បីសម្រេចកំណត់ទីតាំងខ្សែផ្លូវជាក់លាក់មួយ ដែលជាជម្រើសដ៏ល្អប្រសើរដាក់ជូនថ្នាក់ដឹកនាំពិនិត្យសម្រេច៕

ដោយ: គង់ លាងហួរ
អន្តរជាតិ: ប្រទេសអេស្ប៉ាញ និងប្រទេសម៉ារ៉ុក គ្រោងសាងសង់ផ្លូវរថភ្លើងក្រោមទឹករវាងប្រទេសទាំង២ ដើម្បីកាត់បន្ថយពេលវេលាធ្វើដំណើររវាងទ្វីបអឺរ៉ុប និងអាហ្វ្រិកមកនៅត្រឹមតិចជាង៦ម៉ោង។

ការតភ្ជាប់ផ្លូវដែកលើកដំបូងមិនធ្លាប់មានរវាងទ្វីបទាំងពីរអាចក្លាយជាការពិតនៅក្នុងរយៈពេលត្រឹមតែប៉ុន្មានឆ្នាំទៀតប៉ុណ្ណោះ ខណៈបច្ចុប្បន្ន គម្រោងនេះកំពុងត្រូវបានពិចារណាយ៉ាងល្អិតល្អន់ដោយក្រសួងដឹកជញ្ជូននៃប្រទេសទាំងពីរ។

គម្រោងនេះត្រូវបានពិភាក្សាយ៉ាងបន្ទាន់ និងគ្រោងបញ្ចប់ការសាងសង់នៅឆ្នាំ២០៣០ ដើម្បីអបអរការប្រកួតបាល់ទាត់ពិភពលោក(2030 World Cup) ដែលគ្រោងនឹងរៀបចំឡើងនៅទូទាំងប្រទេសព័រទុយហ្គាល់ អេស្ប៉ាញ និងម៉ារ៉ុក។

ជាក់ស្តែង ក្រុមហ៊ុនជាតិម៉ារ៉ុកសម្រាប់ការសិក្សាតាមច្រកសមុទ្រ (SNED) បានប្រកាសកាលពីសប្តាហ៍មុនថា ខ្លួនកំពុងចាប់ផ្តើមបើកការស្រាវជ្រាវដំបូងលើលទ្ធភាពនៃការស្ថាបនាគម្រោងនេះ រួមទាំងតម្លៃសំណង់ និងថ្លៃឡូជីស្ទីក។ នេះបើយោងតាមរបាយការណ៍ពីសារពត៌មាន The Telegraph។

ផ្លូវរូងក្រោមទឹកនេះនឹងជួយសម្រួលការដឹកជញ្ជូនរវាងប្រទេសអេស្ប៉ាញ និងម៉ារ៉ុក ដោយអ្នកដំណើរអាចឡើងជិះរថភ្លើងក្នុងទីក្រុងម៉ាឌ្រីត ហើយមកដល់ទីក្រុង Casablanca ដោយចំណាយរយៈពេលប្រហែល៥ម៉ោងកន្លះ។

បច្ចុប្បន្ន អ្នកដំណើរត្រូវ ចំណាយ ពេល ជាង១២ម៉ោង ក្នុង ការ ធ្វើ ដំណើរ រវាង ទីក្រុង ទាំង២ តាមរយៈមធ្យោបាយរថយន្ត និង សាឡាង ខណៈ ការធ្វើដំណើរតាមជើងហោះហើរ មាន រយៈពេល ប្រហែល២ម៉ោង។

រថភ្លើងនេះនឹងតភ្ជាប់ទីក្រុង Punta Paloma ក្នុងប្រទេសអេស្ប៉ាញទៅកាន់ ទីក្រុង Malabata ក្នុងប្រទេសម៉ារ៉ុក។ខ្សែរថភ្លើងសរុបរវាងស្ថានីយទាំង២ នឹងមានប្រវែង៤២គីឡូម៉ែត្រ ដោយក្នុងនោះ កំណាត់ផ្លូវប្រវែង២៧,៣៦គីឡូម៉ែត្រ ត្រូវរត់កាត់ផ្លូវរូងក្រោមទឹក។

ប្រសិនបើត្រូវបានសាងសង់មែននោះ ខ្សែរថភ្លើងនេះនឹងក្លាយជាផ្លូវរថភ្លើងផ្ទាល់ដំបូងគេ ដែលតភ្ជាប់រវាងទ្វីបអាហ្រ្វិក និងទ្វីបអឺរ៉ុប ហើយអាចដឹកអ្នកដំណើរបាន១២,៨លាននាក់រវាងទ្វីបទាំង២នេះជារៀងរាល់ឆ្នាំ។

យ៉ាងណាមិញ ដើមទុនវិនិយោគសរុបសម្រាប់គម្រោងនេះនៅមិនទាន់ត្រូវបានគេដឹងច្បាស់នៅឡើយនោះទេ។ ប៉ុន្តែ បើយោងតាមការប៉ាន់ប្រមាណបានបង្ហាញថា គម្រោងនេះអាចមានតម្លៃប្រហែល៧,៥ពាន់លានដុល្លារអាមេរិក៕ប្រភព: Condé Nast Traveler៕

ដោយ: គង់ លាងហួរ

ប៉េកាំង: រដ្ឋាភិបាលចិន គ្រោងដាក់ចេញវិធានការជំរុញអចលនទ្រព្យថ្មីបន្ថែមទៀត ខណៈក្រុមមន្ត្រី ដែលមានសិទ្ធិសម្រេចចិត្តកំពូលរបស់ប្រទេសនេះ បានប្តេជ្ញាដោះស្រាយបញ្ហាលំនៅដ្ឋាន ដែលមានស្រាប់នៅក្នុងស្តុក។ នេះបើយោងតាមក្រុមអ្នកវិភាគ។

នៅក្នុងកិច្ចប្រជុំការិយាល័យ នយោបាយមួយកាលពីពេលថ្មីៗនេះ ក្រុមមន្ត្រីកំពូលចិនបានមានប្រសាសន៍ឱ្យដឹងថា ពួកគេកំពុងវាយតម្លៃវិធានការ ឱ្យបានគ្រប់ជ្រុងជ្រោយ ដើម្បីកាត់បន្ថយចំនួនលំនៅដ្ឋានដែលមានស្រាប់ និងជំរុញការលក់។

លោក Raymond Cheng នាយកគ្រប់គ្រងក្រុមហ៊ុន CGS International Securities Hong Kong បានលើកឡើងថា “នេះគឺជាការផ្លាស់ប្តូរគោលនយោបាយដ៏រហ័ស និងមានភាពវិជ្ជមាន។ តាមទស្សនៈរបស់យើងគិតថា បណ្តាធនាគារគោលនយោបាយនានា គួរតែផ្តល់មូលនិធិដល់រដ្ឋបាលក្នុងតំបន់ ដើម្បីសម្រេចបាននូវគោលដៅកាត់បន្ថយ ចំនួនលំនៅដ្ឋានដែលមានស្រាប់ ដូចដែលបានធ្វើដោយជោគជ័យ នៅក្នុងប្រទេសចិនក្នុងឆ្នាំ២០១៤ ដល់ឆ្នាំ២០១៩”។

យុទ្ធសាស្ត្រ ដែលលោក Raymond Cheng បានលើកឡើង គឺជាយុទ្ធសាស្ត្ត្រផ្តល់មូលនិធិសម្រាប់រដ្ឋបាលក្នុងតំបន់ ក្នុងការទិញលំនៅដ្ឋាន ដែលជាប់គាំងលក់មិនចេញ ពីអ្នកអភិវឌ្ឍន៍ ដើម្បីប្រែក្លាយទៅជាលំនៅដ្ឋានសង្គម។

លោក​បាន​បន្ថែម​ថា “វា​នឹង​ក្លាយ​ជាយុទ្ធសាស្ត្រឈ្នះ -ឈ្នះសម្រាប់​ទាំង​រដ្ឋាភិបាល និង​អ្នក​អភិវឌ្ឍន៍។ ប្រសិនបើចំណាត់ការនេះត្រូវបានអនុវត្តន៍ នោះវាមិនត្រឹមតែកាត់បន្ថយចំនួនលំនៅដ្ឋាន ដែលមានស្រាប់យ៉ាងឆាប់រហ័សប៉ុណ្ណោះទេ ប៉ុន្តែថែមទាំងជំរុញលំហូរសាច់ប្រាក់របស់អ្នកអភិវឌ្ឍន៍ផងដែរ”។

ជាមួយគ្នានេះ ធនាគារវិនិយោគជប៉ុន Nomura បានបង្ហាញសុទិដ្ឋិនិយម ចំពោះសារគាំទ្ររបស់រដ្ឋាភិបាលចិន។ នាពេលថ្មីៗនេះ ទីក្រុងប៉េកាំង និងទីក្រុង Zhengzhou បានបន្ធូរបន្ថយការរឹតបន្តឹងលើការទិញផ្ទះ នៅក្នុងតំបន់មួយចំនួនរបស់ខ្លួន។

ធនាគារ Nomura បានបញ្ជាក់នៅក្នុងរបាយការណ៍របស់ខ្លួនថា ទីក្រុងជាច្រើនទៀត ជាពិសេសទីក្រុងលំដាប់ទី១ ដូចជា ទីក្រុង Shanghai និងទីក្រុង Shenzhen ត្រូវបានគេរំពឹងថា នឹងបន្ធូរបន្ថយគោលនយោបាយបន្ថែមទៀត ក្នុងរយៈពេលប៉ុន្មានសប្តាហ៍ខាងមុខនេះ។

ទោះជាយ៉ាងណាក្តី ស្ថាប័នមួយនេះបានបង្ហាញការព្រួយបារម្ភថា ទំហំ និងពេលវេលា នៃការដាក់ចេញវិធានការទាំងនេះ អាចមានកម្រិតខ្សោយ ឬអាចមានសភាពយឺតជាងការរំពឹងទុក។

ចំណែក លោក Raymond Yeung ប្រធានសេដ្ឋវិទូប្រចាំតំបន់ Greater China របស់ក្រុមហ៊ុន ANZ Research បានអះអាងថា “ការអំពាវនាវឱ្យកាត់បន្ថយចំនួនផ្ទះ ដែលជាប់គាំងលក់មិនចេញ គឺជាសារវិជ្ជមាន។ ប៉ុន្តែវាត្រូវការពេលវេលា និងសកម្មភាពតាមដាន ដើម្បីធានាថា វាមានប្រសិទ្ធភាព”៕ប្រភព: SCMP៕

ដោយ: គង់ លាងហួរ

អន្តរជាតិ: ក្រុមហ៊ុនថាមពលខ្នាតយក្ស Shell របស់ប្រទេសអង់គ្លេសកំពុងពិភាក្សា ដើម្បីលក់ស្ថានីយប្រេងឥន្ធនៈរបស់ខ្លួន នៅក្នុងប្រទេសម៉ាឡេស៊ី ទៅឱ្យក្រុមហ៊ុនចម្រាញ់ប្រេង Saudi Aramco របស់អារ៉ាប៊ីសាអូឌីត។

យោងតាមប្រភពឧស្សាហកម្មចំនួន៤ ដែលដឹងអំពីបញ្ហានេះថា បានអះអាងថា កិច្ចព្រមព្រៀងខាងលើនេះ អាចមានទំហំទឹកប្រាក់ចំនួន១ពាន់លានដុល្លារអាមេរិក។ យ៉ាងណាមិញ ក្រុមហ៊ុន Shell បានបដិសេធមិនធ្វើអត្ថាធិប្បាយអ្វីឡើយ ជុំវិញកិច្ចពិភាក្សានេះ។ ចំណែក ក្រុមហ៊ុនSaudi Aramco ក៏បដិសេធមិនផ្តល់ការអត្ថាធិប្បា យជុំវិញពត៌មាននេះផងដែរ។

យោងតាមគេហទំព័ររបស់ក្រុមហ៊ុន Shell បានឱ្យដឹងថា ក្រុមហ៊ុន ដែលមានមូលដ្ឋាននៅទីក្រុងឡុងដ៍មួយនេះ មានស្ថានីយប្រេងឥន្ធនៈប្រមាណ៩៥០ទីតាំង នៅទូទាំងប្រទេសម៉ាឡេស៊ី និងជាបណ្ដា​ញស្ថានីយប្រេងដ៏ធំបំផុតទី២ បន្ទាប់ពីក្រុមហ៊ុន Petronas ដែលគ្រប់គ្រងដោយរដ្ឋាភិបាលម៉ាឡេស៊ី។

យោងតាមប្រភពមួយ ក្នុងចំណោមប្រភពទាំង៤នោះបានទម្លា​យឱ្យដឹងថា ការពិភាក្សានេះបានចាប់ផ្តើម នៅដំណាច់ឆ្នាំ២០២៣ ហើយកិច្ចព្រមព្រៀង អាចនឹងត្រូវបានសម្រេច ក្នុងរយៈពេលប៉ុន្មានខែខាងមុខ។

ក្រុមហ៊ុនយក្ស Saudi Aramco ពុំមានស្ថានីយ៍ប្រេងឥន្ធនៈក្នុងប្រទេសម៉ាឡេស៊ីនោះទេ។ ប៉ុន្តែក្រុមហ៊ុននេះ បានកាន់កាប់ចំណែកភាគហ៊ុន៥០ភាគរយ នៅរោងចក្រចម្រាញ់ប្រេង Pengerang ស្ថិតក្នុងរដ្ឋ Johor ដែលកើតចេញពីការបណ្តាក់ទុនរួមគ្នា ជាមួយក្រុមហ៊ុន Petronas របស់រដ្ឋាភិបាលម៉ាឡេស៊ី។

បច្ចុប្បន្ននេះ ក្រុមហ៊ុន Saudi Aramco បានបើកស្ថានីយ៍ប្រេងឥន្ធនៈត្រឹមតែនៅក្នុងប្រទេសរបស់ខ្លួនប៉ុណ្ណោះ ប៉ុន្តែក្រុមហ៊ុននេះ បានកាន់កាប់ចំណែកភាគហ៊ុន របស់ស្ថានីយ៍ប្រេងឥន្ធនៈនៅក្នុងប្រទេសផ្សេងទៀត តាមរយៈការបណ្តាក់ទុនរួមគ្នា ជាមួយក្រុមហ៊ុនបារាំង Total Energies និងក្រុមហ៊ុនកូរ៉េខាងត្បូង S-Oil Corpជាដើម ៕ប្រភព:Reuters៕

ដោយ: គង់ លាងហួរ

អន្តរជាតិ: យោងតាមអ្នកជំនាញមួយរូប បានលើកឡើងថា មហន្តរាយដ៏ធំ សម្រាប់សេដ្ឋកិច្ចអាមេរិក បានចាប់ផ្តើមកើតឡើងហើយ ស្របពេលសម្ព័ន្ធភាពក្រុមប្រទេស BRICS  កំពុងបង្កើនកិច្ចខិតខំប្រឹងប្រែងធ្វើបដិ​ដុល្លារ​នីយកម្ម នៅក្នុងវិស័យហិរញ្ញវត្ថុសកល (de-dollarization)។

លោក Robert Kiyosaki អ្នកជំនួញជនជាតិអាមេរិក និងជាអ្នកនិពន្ធសៀវភៅ Rich Dad, Poor Dad បានលើកឡើងថា “មហន្តរាយ សម្រាប់អាមេរិកបានចាប់ផ្តើមហើយ។ វានឹងក្លាយទៅជារឿងដ៏អាក្រក់មួយ”។

ជាងនេះទៅទៀត ទស្សនៈរបស់លោក Robert គឺជាទស្សនៈមួយ ដែលត្រូវបានយល់ឃើញដូចៗគ្នា ដោយមនុស្សជាច្រើន ខណៈដែលក្រុមអ្នកជំនាញ បានបង្ហាញក្តីព្រួយបារម្ភយ៉ាងខ្លាំង ចំពោះអនា គតរបស់សេដ្ឋកិច្ចអាមេរិក។
ធនាគារកណ្តាលអាមេរិក (Fed) បានដាក់ចេញនូវវិធីសាស្រ្តរង់ចាំ និងមើល(wait-and-see approach) ចំពោះការកាត់បន្ថយអត្រាការប្រាក់។ ទន្ទឹមនឹងនេះ វិបត្តិ​បំណុល​អាមេរិក​ កំពុង​កើន​ឡើង​ឥតឈប់ឈរ។

ក្រុមអ្នកជំនាញជាច្រើន បានសម្តែងការព្រួយបារម្ភរបស់ពួកគេថា បញ្ហាបំណុលនេះអាចអូសទាញ សហរដ្ឋអាមេរិកចូលទៅក្នុងគ្រោះមហន្តរាយ ច្រើនជាងសម្ពាធអតិផរណា នាពេលបច្ចុប្បន្នទៅទៀត។

ជាមួយគ្នានោះ លោក Robert Kiyosaki ក៏បានពិភាក្សាអំពី វិធីសាស្ត្រ ដែលបុគ្គលម្នាក់ៗអាចការពារខ្លួនរបស់ពួកគេ ពីផលប៉ះពាល់ ដែលនឹងមកដល់ផងដែរ។

តាមរយៈបណ្តាញសង្គម X លោក Kiyosaki បានផ្តល់អនុសាសន៍ឱ្យវិនិយោគ លើទ្រព្យសកម្មផ្សេងៗគ្នា។  ជាពិសេស លោក​ដាស់តឿន​ ​កុំ​ឱ្យវិនិយោគ​លើ​រូបិយប័ណ្ណ ព្រោះរូបិយប័ណ្ណ​នឹង​ធ្លាក់​ថ្លៃចុះ​។ ម៉្យាងទៀត លោកបានជំរុញឱ្យទិញទ្រព្យសម្បត្តិ ដូចជា មាស Bitcoin និងទ្រព្យសម្បត្តិផ្សេងទៀត ដែលហក់ឡើងថ្លៃជាពិសេស នៅពេលមានវិបត្តិទីផ្សារកើតឡើង។

ចំណែក លោក Jamie Dimon នាយកប្រតិបត្តិធនាគារ JPMorgan Chase ក៏បានធ្វើការព្រមានស្រដៀងគ្នានេះផងដែរ។ ជាពិសេស លោក Dimon បានសម្តែងការព្រួយបារម្ភថា បំណុ លរបស់សហរដ្ឋអាមេរិក ដែលចេះតែបន្តកើនឡើងជាលំដាប់ នឹងនាំមកនូវវិបត្តិ ដែលគួរឱ្យព្រួយបារម្ភខ្លាំងជាងនេះទៅទៀត៕ ប្រភព: Watcher Guru៕

ដោយៈគង់ សូរិយា

        ភ្នំពេញៈ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានជំរុញឱ្យប្រទេស​កាតាបើកស្ថានទូតនៅកម្ពុជា ដើម្បីលើកកម្ពស់កិច្ចសហប្រតិបត្តិការរវាងកម្ពុជា និងកាតាឱ្យកាន់តែល្អប្រសើរថែមទៀត។

ក្រៅតែពីការស្នើឱ្យបើកស្ថានទូត សម្តេចតេជោ ក៏បានស្នើឱ្យបើកឡើងវិញនូវការហោះហើរត្រង់រវាងកាតា និងកម្ពុជា ហើយក៏បានស្នើពិនិត្យលទ្ធភាព ជំរុញការវិនិយោគលើការកែច្នៃគ្រាប់ស្វាយចន្ទី ឬបង្កើតរោងម៉ាស៊ីនកិនស្រូវ ផលិតជាអង្ករនាំទៅប្រទេសកាតាផងដែរ។

សម្តេចតេជោហ៊ុន សែន បានលើកឡើងបែបនេះ ក្នុងពេលអនុញ្ញាតឱ្យលោក ខាលីត អាលី អាប់ឌុលឡា អាបែល (Khalid Ali Abdullah Abel) ឯកអគ្គរាជទូត​ប្រទេសកាតា ប្រចាំនៅកម្ពុជា ចូលជួបសម្តែងការគួរសម និងពិភាក្សាការងារ នៅ​វិមាន​ព្រឹទ្ធសភា នាព្រឹកថ្ងៃពុធ ទី៨ ខែឧសភា ឆ្នាំ២០២៤កន្លងមកនេះ។

បន្ទាប់ពីកិច្ចស្វាគមន៍សម្តេចតេជោ ហ៊ុន សែន បានជម្រាបទៅលោកឯកអគ្គរាជទូត​ថា ប្រទេសកាតា មានថវិកាច្រើនគួរតែបើកស្ថានទូតផ្ទាល់នៅកម្ពុជា ប្រសើរជាងមាន​និវេស​ដ្ឋាននៅប្រទេសផ្សេង។ សម្តេចតេជោក៏បានរំលឹកដែរថា នៅពេល​សម្ដេច​នៅ​ជា​នាយករដ្ឋមន្ត្រី សម្តេច ពុំមានពេលគ្រប់គ្រាន់ ទទួលទូតមាននិវេសដ្ឋាននៅក្រៅ​ប្រទេស​នោះទេ តែសម្រាប់កាតាជាករណីពិសេស។

សម្ដេចតេជោ បានរំឭកថា កម្ពុជា និងកាតា បានចាប់ផ្តើមទំនាក់ទំនងការទូតជាមួយគ្នានៅឆ្នាំ២០០៨ ពេលព្រះអង្គម្ចាស់នាយករដ្ឋមន្ត្រីរបស់កាតា យាងមកបំពេញព្រះរាជទស្សនកិច្ចនៅកម្ពុជា។

ជាការឆ្លើយតបលោកឯកអគ្គរាជទូតកាតា បានធ្វើគារវកិច្ច និងពាំនាំការផ្ដាំផ្ញើសួរសុខ​ទុក្ខ ពីនាយករដ្ឋមន្ត្រី រដ្ឋមន្ត្រីការបរទេស និង ប្រធានសភាកាតា ជូនសម្តេចតេជោ និង​ប្រជាជនកម្ពុជា និងសម្តែងការអបអរសាទរសម្តេចចំពោះ ដែលទទួលបាន​តួនាទីថ្មី ជាប្រធានព្រឹទ្ធសភានៃកម្ពុជា។

លោកឯកអគ្គរាជទូត បានថ្លែងអំណរគុណសម្តេចតេជោ និងបានលើកឡើងថា ជា​កិត្តិ​យស​ណាស់​ដែលលោក បានចូលជួបសម្តែងការគួរសម ជាមួយសម្តេចនៅថ្ងៃនេះ ហើយសង្ឃឹមថា កាតានឹងមាននិវេសដ្ឋាន នៅកម្ពុជានៅពេលខាងមុខ ហើយក៏បានប្ដេជ្ញាថានឹងខិតខំបង្កើនទំនាក់ទំនងការទូត ឱ្យបានមានកម្រិតខ្ពស់ជាងមុន ពង្រី​ក​​ទំនាក់ទំនង ជាមួយនឹងកម្ពុជា ពិសេសនៅលើវិស័យសន្តិសុខស្បៀ​ង​ ដោយសារថាកម្ពុជាគឺជាប្រទេសដែលផលិតស្បៀង។

សម្ដេចតេជោ បានសម្តែងការអរគុណចំពោះការពាំនាំ ការផ្ដាំផ្ញើសួរសុខទុក្ខពី នាយក​រដ្ឋ​មន្ត្រីរដ្ឋមន្ត្រីការបរទេស និងព្រឹទ្ធសភារបស់កាតាជូនសម្ដេច ហើយសម្ដេចបានសម្ដែងការសោកស្ដាយ ចំពោះព្រឹត្តិការណ៍World Cup ចុងក្រោយនៅកាតា ដោយសម្ដេចមានបំណងចូលរួមដែរ ប៉ុន្តែបែរជាខកខានវិញ ដូច្នេះហើយទើបនៅជំនួបនេះ ឯកអគ្គរាជទូតកាតាបានយកបាល់ ដែលទាត់នៅក្នុងព្រឹត្តិការណ៍ World Cup ជូន សម្ដេចទុកជាអនុស្សាវរីយ៍។

សម្ដេចតេជោបានរំឭកថា សម្តេច បានជួបរដ្ឋមន្ត្រីការបរទេសកាតា នៅពេលកម្ពុជា​ជាម្ចាស់​ផ្ទះ នៃប្រធានអាស៊ានឆ្នាំ២០២២ នៅភ្នំពេញ ហើយពេលនោះកាតាបាន​ចុះហត្ថ​លេខា លើកិច្ចព្រមព្រៀង TAC (Treaty of Amity and Cooperation) ជាមួយនឹងអាស៊ាន ហើយ សម្ដចតេជោ បានលើកឡើងថា កម្ពុជា និងកាតា មានកិច្ចការធ្វើច្រើន ដោយសារកាតាជាប្រទេសមានសន្តិសុខថាមពល ហើយ កម្ពុជាជាប្រទេសធានាបានសន្តិសុខស្បៀង ហើយមានផលិតផលកសិកម្មច្រើន ជាពិសេសគឺស្រូវ និងគ្រាប់ស្វាយចន្ទីដែលកម្ពុជាជាប្រទេសផលិតគ្រាប់ស្វាយ​ចន្ទី​ច្រើន​ជាងគេ ហើយកម្ពុជាមានគោលការណ៍ពិសេសអនុញ្ញាត ឱ្យក្រុមហ៊ុនបរទេស​ បើករោងចក្រកិនស្រូវ ឬក៏កែច្នៃ វេចខ្ចប់ ឃ្លាំងស្តុកទុក ហើយក៏អនុញ្ញាតឱ្យនាំ​ចេញ​ទៅក្រៅប្រទេស ជាពិសេសការអនុគ្រោះដល់វិនិយោគិនពីបរទេស៕