ក្នុងករណីដែលកម្ដៅកើនឡើងខ្លាំងលើសពី៤០អង្សារសេ សម្ដេចធិបតី ហ៊ុន ម៉ាណែត បានណែនាំឱ្យគណៈគ្រប់គ្រងសាលាផ្អាកការសិក្សាជាបន្ទាន់ ដើម្បីការពារចំពោះសុខភាពកុមារ។ សម្ដេចធិបតី បានថ្លែងបែបនេះ ក្នុងពេលជួបសំណេះជាមួយកម្មករ និយោជិត មន្ត្រីរាជការដែលបម្រើការងារនៅកំពង់ផែស្វយ័តខេត្តព្រះសីហនុ នាព្រឹកថ្ងៃទី០១​ ខែឧសភា ឆ្នាំ២០២៤។

សម្ដេចធិបតី ថ្លែងដូច្នេះ « ជាពិសេសនៅតាមសាលាក្មេងតូចៗ ថ្ងៃណាពាក់ព័ន្ធនឹងសីតុណ្ហភាពឡើងលើស ៤០ដឺក្រ(អង្សារសេ) សូមឱ្យពិនិត្យមើល ទីមួយម៉ោងពេលវេលារៀន ព្រោះក្ដៅខ្លាំងជាពិសេសម៉ោង១០ ម៉ោង២ហ្នឹង ចឹងកែម៉ោងទៅ កុំឱ្យចូល គិតគូររឿងទឹកការប្រើប្រាស់ហូប ហើយបើចាំបាច់ គឺប្រគល់សិទ្ធិឱ្យគណៈគ្រប់គ្រងបើសិនជាក្ដៅខ្លាំងលើស៤០ដឺក្រ ហើយសាលាមិនអំណោយផលអាចមានសិទ្ធិផ្អាកការសិក្សាថ្ងៃនោះ កុំឱ្យ(សិស្ស)អង្គុយយូរ»។ជាការកត់សម្គាល់ លោកគ្រូ អ្នកគ្រូ បានផ្សព្វផ្សាយពីរូបភាពមួយចំនួនលើទំព័រហ្វេសប៊ុក ស្ដីពីសកម្មភាពយកកន្សែងជ្រលក់ជាមួយទឹក រួចដាក់លើក្បាលរបស់កុមារតូចៗ ដើម្បីកាត់បន្ថយកម្ដៅដែលក្ដៅខ្លាំងជះមកលើកុមារ។

សកម្មភាពនេះ សម្ដេចនាយករដ្ឋមន្ត្រី បានចាត់ទុកថាមិនមែនជារឿងល្អទេ ដែលដាក់កន្សែងត្រជាក់លើក្បាល ហើយអង្គុយក្រោយកម្ដៅរាប់សិបម៉ោង។ សម្ដេចបានចាត់ថា ការរៀនក្រោមកម្ដៅជាង៤០ អង្សារសេ មិនមែនជារឿងចំណេញឡើយ។

ពាក់ព័ន្ធនឹងបញ្ហាអាកាសធាតុក្ដៅខ្លាំងនេះ សម្ដេចបានណែនាំឱ្យអគ្គស្នងការដ្ឋាននគរបាលជាតិ អាជ្ញាធរនៅតាមមូលដ្ឋាន ត្រូវត្រៀមខ្លួនជួយប្រជាពលរដ្ឋ លើបញ្ហាទឹកប្រើប្រាស់ និងត្រៀមដោះស្រាយបញ្ហាអគ្គិភ័យ៕

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់សាជាថ្មីថា គម្រោងព្រែកជីកហ្វូណន-តេជោត្រូវតែធ្វើឱ្យបាន ហើយរាជរដ្ឋាភិបាលអត់មានគម្រោងកៀរគរលុយប្រជាពលរដ្ឋ ដើម្បីសាងសង់នោះទេ ទោះបីក្រុមហ៊ុនវិនិយោគរកលុយធ្វើមិនគ្រប់ ក៏កម្ពុជាត្រូវតែធ្វើឱ្យបាននូវគម្រោងព្រែកជីកនេះ។

ការបញ្ជាក់នេះធ្វើឡើងឱកាសសម្តេចធិបតី ហ៊ុន ម៉ាណែត អញ្ជើញសំណេះសំណាលជាមួយមន្ត្រីរាជការ បុគ្គលិក កម្មករនិយោជិត បម្រើការងារនៅកំពង់ផែស្វយ័តក្រុងព្រះសីហនុ នាព្រឹកថ្ងៃទី១ ខែឧសភា ឆ្នាំ២០២៤។

សម្ដេចធិបតីបានថ្លែងយ៉ាងដូច្នេះថា «ចំពោះព្រែកជីកហ្វូណន-តេជោ ដាច់ខាតត្រូវតែធ្វើឱ្យបាន ខ្ញុំសូមបញ្ជាក់ម្ដងទៀត ទី១រាជរដ្ឋាភិបាលអត់មានគម្រោងដើម្បីរៃអង្គាសពីបងប្អូនទេ មានបងប្អូនខ្លះចង់បង្កើតកុងដើម្បីទទួលយកថវិកាពីប្រជាពលរដ្ឋ អ្នកខ្លះគាត់ចង់បរិច្ចាគ»។សម្ដេចធិបតីបានបន្តថា មិនសំខាន់រឿងលុយចូលបរិច្ចាគប៉ុន្មាននោះទេ សំខាន់រឿងទឹកចិត្តរបស់ប្រជាពលរដ្ឋ ហើយសម្ដេចឃើញសន្ទុះទឹកចិត្តប្រជាពលរដ្ឋធំធេងណាស់ក្នុងការគាំទ្រចំពោះគម្រោងព្រែកជីកនេះ។

ម្សិលមិញ សម្ដេចធិបតីបានជួបអ្នកវិភាគម្នាក់ អ្នកវិភាគនោះថាមិនដែនឃើញគម្រោងណាមួយមានចលនាជាតិនិយមនៅពីក្រោយខ្លាំងជាងគម្រោងព្រែកជីកហ្វូណន-តេជោនេះនោះទេ។ ម្យ៉ាងទៀត អ្នកដែលមាននិន្នាការផ្សេងពីរាជរដ្ឋាភិបាល ក៏គេចេញមកគាំទ្រ ព្រោះយល់ពីផលប្រយោជន៍ជាតិ។

សម្ដេចធិបតី ហ៊ុន ម៉ាណែត បានបន្តទៀតថា ក្រុមមួយនៅអាមេរិកដែលបដិសេធគម្រោងព្រែកជីកនេះ គឺដើរក្រឡាខុសហើយ ខណៈប្រជាពលរដ្ឋទូទាំងប្រទេសរាប់លាននាក់បានយល់ពីតម្លៃមួយនេះ ហើយបានផ្ដល់ការគាំទ្រយ៉ាងផុសផុល។

សម្ដេចតេជោ ហ៊ុន សែន អតីតនាយករដ្ឋមន្ត្រីអាណត្តិទី៦ បានផ្ដួចផ្ដើមឱ្យមានគម្រោងនេះ ដូច្នេះរាជរដ្ឋាភិបាលអាណត្តិទី៧នេះត្រូវតែអនុវត្តគម្រោងនេះឱ្យបាន។សម្ដេចបានគូសបញ្ជាក់ថា នេះជាគម្រោង BOT រវាងរាជរដ្ឋាភិបាល និងវិស័យឯកជន គឺដូចទៅនឹងគម្រោងផ្លូវល្បឿនលឿនដែរ ពោលគឺក្រុមហ៊ុនឯកជនមានថវិកាធ្វើគម្រោងទាំងនេះ ហើយរាជរដ្ឋាភិបាលអនុញ្ញាតសិទ្ធិឱ្យកាន់កាប់ប៉ុន្មានឆ្នាំ ដល់ឆ្នាំកំណត់គឺនឹងផ្ទេរមកឱ្យរាជរដ្ឋាភិបាលវិញ។ ប៉ុន្តែទោះបីក្រុមហ៊ុនវិនិយោគរកលុយធ្វើមិនបានគ្រប់ ក៏កម្ពុជាត្រូវតែធ្វើឱ្យបាននូវព្រែកជីកនេះ។

សម្ដេច ហ៊ុន ម៉ាណែត បានជំរុញទៅកាន់លោកទេសរដ្ឋមន្ត្រី ស៊ុន ចាន់ថុល ធ្វើយ៉ាងណាចាប់អនុវត្តគម្រោងនេះនៅឆ្នាំ២០២៤នេះ ឬឆ្នាំ២០២៥យ៉ាងយូរ ខណៈនៅក្នុងខែកក្កដា ឬខែសីហា ឆ្នាំ២០២៤ កម្ពុជានឹងចុះកិច្ចព្រមព្រៀងសម្បទានមួយជាមួយក្រុមហ៊ុនឯកជន។លើសពីនេះ សម្ដេចនាយករដ្ឋមន្ត្រីបានផ្ដាំទៅក្រុមប្រឆាំងក្រៅស្រុកថា អ្នកដែលចង់បង្កើតចលនាប្រឆាំង គឺធ្វើមិនជោគជ័យទេ ព្រោះនេះជាការប្រឆាំងនឹងប្រជាជនខ្មែរ ប្រឆាំងផលប្រយោជន៍ជាតិ។

គួរជម្រាបថា គម្រោងព្រែកជីកហ្វ៊ូណន-តេជោ ដែលតភ្ជាប់ពីទន្លេមេគង្គទៅសមុទ្រ គឺជាគម្រោងប្រវត្តិសាស្ត្រថ្មីមួយដែលនឹងផ្តល់អត្ថប្រយោជន៍យ៉ាងធំធេង​ជូនជាតិមាតុភូមិ និងប្រជារាស្ត្រខ្មែរ។ ពោលព្រែកជីកនេះជាចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គមជាតិ តាមរយៈការដឹកជញ្ជូនតាមផ្លូវទឹក និងនាវាចរណ៍ឱ្យកាន់តែមានភាពល្អប្រសើរឡើង ក៏ដូចជាការតភ្ជាប់សេដ្ឋកិច្ចកម្ពុជាទៅថ្នាក់តំបន់និងពិភពលោក ព្រមទាំង​អាចជួយរំដោះទឹកជំនន់នៅតាមខេត្តភាគនិរតី ជាប្រភពផ្គត់ផ្គង់ទឹកសម្រាប់ប្រជាពលរដ្ឋកម្ពុជា​ប្រកបរបរកសិកម្ម វារីវប្បកម្ម និងជួយសម្រួលការដឹកជញ្ជូនក សិផលនានាពីតាមបណ្តា​ខេត្តឱ្យកាន់តែមានភាពងាយស្រួល កាត់បន្ថយការចំណាយពេលវេលាជាដើម។គម្រោងព្រែកជីកនេះដែរគឺជាគម្រោងតភ្ជាប់ផ្លូវទឹករវាងទន្លេទៅកាន់សមុទ្រ​របស់កម្ពុជា ដោយឆ្លងកាត់ខេត្តកណ្តាល តាកែវ កំពត និងកែប ប្រវែង​សរុបប្រមាណ១៨០គីឡូម៉ែត្រ។ គម្រោងនេះគ្រោងចំណាយទុន​ប្រមាណ១,៧០០លានដុល្លារអាមេរិក ហើយត្រូវបានសិក្សាគម្រោងល្អិតល្អន់ដោយប្រើពេលវេលា២៦ខែ។ គម្រោងនេះត្រូវបានអនុម័តដោយរាជរដ្ឋាភិបាលកម្ពុជានីតិកាលទី៦ ក្នុងឆ្នាំ២០២៣ ដឹកនាំដោយសម្តេចតេជោ ហ៊ុន សែន ហើយក៏ត្រូវបានគាំទ្រដោយរាជរដ្ឋាភិបាលនីតិកាលថ្មីដឹកនាំដោយសម្តេចធិបតី ហ៊ុន ម៉ាណែត។ ទាំងសម្តេចតេជោ ហ៊ុន សែន ដែលបច្ចុប្បន្នជាប្រធានព្រឹទ្ធសភា និងសម្តេចធិបតី ហ៊ុន ម៉ាណែត បានប្រកាសប្តេជ្ញាចិត្តយ៉ាងមុតមាំក្នុងការជីកព្រែកជីកហ្វ៊ូណន-តេជោ ដើម្បី​បម្រើប្រយោជន៍ផ្នែកសេដ្ឋកិច្ច ជាពិសេសការតភ្ជាប់បណ្តាញដឹកជញ្ជូនតាមផ្លូវទឹក​រវាងទន្លេ និងសមុទ្ររបស់កម្ពុជា៕

ដោយ: គង់ លាងហួរ
អន្តរជាតិ: ជាមធ្យម ប្រជាពលរដ្ឋអាមេរិកជឿជាក់ថា ពួកគេគួរតែសន្សំប្រាក់បានប្រហែល១,៤៦លានដុល្លារ មុនពេលចូលនិវត្តន៍។ នេះបើយោងទៅតាមការសិក្សា ដែលមានឈ្មោះថា Northwestern Mutual Planning and Progress ឆ្នាំ២០២៤។

ប៉ុន្តែ នៅក្នុងរដ្ឋមួយចំនួន ដូចជារដ្ឋហាវ៉ៃជាដើម ពលរដ្ឋអាមេរិកពិតជាត្រូវការប្រាក់ច្រើនជាងនេះ មុនពេលចូលនិវត្តន៍។ នេះបើយោងតាមការសិក្សារបស់គេហទំព័រ GOBankingRates។

ដើម្បីកំណត់តម្រូវការប្រាក់សោធននិវត្តន៍អប្បបរមានៅក្នុងរដ្ឋនីមួយៗ គេហទំព័រ GOBankingRates បានពិនិត្យមើលថា តើពលរដ្ឋអាមេរិកដែលមានអាយុចាប់ពី៦៥ឆ្នាំឡើងទៅ ចំណាយប្រាក់អស់ប៉ុន្មានជារៀងរាល់ឆ្នាំលើការទិញគ្រឿងទេស ការដឹកជញ្ជូន លំនៅដ្ឋាន ឧបករណ៍ប្រើប្រាស់ និងការថែទាំសុខភាព ដោយប្រើទិន្នន័យការស្ទង់មតិការចំណាយអ្នកប្រើប្រាស់ឆ្នាំ២០២២ ពីការិយាល័យស្ថិតិការងារ។

ខាងក្រោមនេះគឺជារដ្ឋចំនួន៥ ដែលអ្នកត្រូវការប្រាក់ច្រើនបំផុតដើម្បីចូលនិវត្តន៍ប្រកបដោយផាសុកភាព:
ទី១: រដ្ឋHawaii ចំនួនប្រាក់សន្សំអប្បបរមា ដែលអ្នកត្រូវការដើម្បីចូលនិវត្តន៍នៅក្នុងរដ្ឋ Hawaii គឺ២.០៥១.០៧៧ដុល្លារអាមេរិក។

ទី២: រដ្ឋ Massachusetts ចំនួនប្រាក់សន្សំអប្បបរមា ដែលអ្នកត្រូវការដើម្បីចូលនិវត្តន៍នៅក្នុងរដ្ឋ Massachusetts គឺ១.៦០០.០៩៧ដុល្លារ។

ទី៣: រដ្ឋ California ចំនួនប្រាក់សន្សំអប្បបរមា ដែលអ្នកត្រូវការដើម្បីចូលនិវត្តន៍នៅក្នុងរដ្ឋ California គឺ១.៤៣២.៤២៥ដុល្លារ។

ទី៤: រដ្ឋ New York ចំនួនប្រាក់សន្សំអប្បបរមា ដែលអ្នកត្រូវការដើម្បីចូលនិវត្តន៍នៅក្នុងរដ្ឋ New York គឺ១.២៨៩.៣២៥ដុល្លារ។

និងទី៥: រដ្ឋ Alaska ចំនួនប្រាក់សន្សំអប្បបរមា ដែលអ្នកត្រូវការដើម្បីចូលនិវត្តន៍នៅក្នុងរដ្ឋ Alaska គឺ១.២៨៧.៨៨០ដុល្លារ៕ប្រភព:CNBC៕

ឧកញ៉ាបណ្ឌិត គីម ហ៊ាង ប្រធាន KW Cambodia ព្រមទាំងថ្នាក់ដឹកនាំ និងបុគ្គលិកគ្រប់លំដាប់ថ្នាក់នៃ KW Cambodia ទូទាំងប្រទេស នៅថ្ងៃទី០១ ខែឧសភា ឆ្នាំ២០២៤នេះ បាន​ចេញ​ញត្តិគាំទ្រ​​​យ៉ាង​ពេញទំហឹង ព្រមទាំង​មាន​ក្តី​មោទនៈ​យ៉ាងក្រៃលែង ចំពោះការ​អនុវត្ត​គម្រោង​ព្រែកជីក​ហ្វូណនតេជោ ដែលជាព្រែកជីកប្រវត្តិសាស្ត្រ​លើកទី១ នៅកម្ពុជា ជា​គំនិតផ្តួចផ្តើម​របស់​សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងជា​ប្រធាន​ព្រឹទ្ធសភា ​​ហើយ​បច្ចុប្បន្ន សម្តេចធិបតី ហ៊ុន ម៉ាណែត នាយករដ្ឋមន្ត្រី​កម្ពុជា កំពុងបន្តជំរុញ​យ៉ាង​ក្លៀវក្លា និងមោះមុត​អនុវត្តឱ្យបានសម្រេច នាពេល​ខាង​មុខ។ក្នុងនាមជាវិស័យឯកជន ដែលមានប្រភពមកពីអាមេរិក ហើយកំពុងធ្វើអាជីវកម្មនៅកម្ពុជា ​​យើង​ខ្ញុំ​បាន​យល់ឃើញថា គម្រោងព្រែកជីកហ្វូណនតេជោ ពិតជាមានសារៈសំខាន់​មិនអាច​កាត់ថ្លៃបាន ដែលមានវិសាលភាពធំធេង និងផ្តល់អត្ថប្រយោជន៍​ដ៏មហាសាល​ដល់ប្រទេសជាតិរបស់យើង ជាពិសេសក្នុងវិស័យដឹកជញ្ជូន ដូចជាកាត់បន្ថយ​ពេលវេលា និង​តម្លៃ​ដឹកជញ្ជូន​នាពេលបច្ចុប្បន្ន ក៏ដូចជា​បង្កើតតំបន់ពាណិជ្ជកម្ម និងមជ្ឈមណ្ឌលភស្តុភារកម្ម ការអភិវឌ្ឍផែ​រណបថ្មីៗជាច្រើន ការពង្រីក​តំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ និងជួយគាំទ្រដល់ការអភិវឌ្ឍ​ប៉ូល​សេដ្ឋកិច្ចទី៤ របស់ប្រទេសកម្ពុជា និងការវិនិយោគផ្សេងៗ ដែលនឹងជំរុញ​ឱ្យសេដ្ឋកិច្ច​មានការរីកចម្រើន សម្រាប់​ជា​ប្រយោជន៍​ដល់ប្រជាពលរដ្ឋ​រាប់លាននាក់ នៅទូទាំងប្រទេស។

ឆ្លៀតក្នុងឱកាសដ៏វិសេសវិសាលនេះ យើងខ្ញុំសូមបួងសួង​ដល់គុណ​បុណ្យ​ព្រះរតនៈត្រ័យ វត្ថុស័ក្តិសិទ្ធិទាំងឡាយក្នុងលោក សូមជួយប្រសិទ្ធិពរជ័យ សិរីមង្គល វិបុលសុខ មហាប្រសើរ​ជូន សម្តេចតេជោ ហ៊ុន សែន ប្រធានព្រឹទ្ធសភា និង​សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំង​សម្តេចធិបតី ហ៊ុន ម៉ាណែត នាយករដ្ឋមន្ត្រី និង​លោកជំទាវ​បណ្ឌិត ពេជ ចន្ទមុន្នី ហ៊ុនម៉ាណែត ព្រមទាំង​ក្រុមគ្រួសារ​ជាទីស្រលាញ់ទាំងអស់ សូមបាន​សមប្រកប​នូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាត​ឡើយ។

ដោយ: គង់ លាងហួរ
ម៉ានីល: ស្ថានភាពទីផ្សារអចលនទ្រព្យនៅក្នុងប្រទេសហ្វីលីពីននៅតែបន្តប្រែប្រួល ខណៈពេលដែលការស្ទុះងើបឡើងវិញមានល្បឿនយឺតជាងការរំពឹងទុក ដែលការណ៍នេះអាចបណ្តាលមកពីកត្តាសំខាន់ៗចំនួន៣។

កត្តាសំខាន់ទាំង៣នោះ រួមមានដូចជា កត្តាទី១: ផលប៉ះពាល់នៃជំងឺរាតត្បាតមកលើការិយាល័យពាណិជ្ជកម្ម ទីផ្សារលក់រាយ និងលំនៅដ្ឋាន។ កត្តាទី២: អត្រាអតិផរណា និងអត្រាការប្រាក់ និងកត្តាទី៣: ជម្លោះភូមិសាស្ត្រនយោបាយនៅប្រទេសអ៊ុយក្រែន និងតំបន់មជ្ឈិមបូព៌ា ដែលបានបង្កភាពមិនប្រាកដប្រជាជាសកល និងជះឥទ្ធិពលដល់ការស្ទុះងើបឡើងវិញនៃសេដ្ឋកិច្ចពិភពលោក។

អត្រាការិយាល័យទំនេរនៅទីក្រុងម៉ានីលបានកើនឡើងដល់២០ភាគរយនៅក្នុងត្រីមាសទី១ ឆ្នាំ២០២៤។ ការកើនឡើងនេះអាចបណ្តាលមកពីការផ្គត់ផ្គង់ថ្មីជាបន្តបន្ទាប់នៅក្នុងទីផ្សារ ដែលជំរុញឱ្យការផ្គត់ផ្គង់សរុបកើនដល់៦៦មុឺនម៉ែត្រការ៉េ បើធៀបនឹង៣៦មុឺនម៉ែត្រការ៉េ ក្នុងរយៈពេលដូចគ្នាកាលពីឆ្នាំមុន។

ទោះជាយ៉ាងណាក្តី ថ្លៃជួលការិយាល័យជាមធ្យមនៅតែស្ថិតក្នុងកម្រិត១.១០០ប៉េសូ (១៩,០៩ដុល្លារអាមេរិក) ក្នុងមួយម៉ែត្រការ៉េ ដែលការណ៍នេះបញ្ជាក់ពីភាពធន់នៃទីផ្សារ នៅចំពោះមុខការធ្លាក់ចុះនៃតម្រូវការ។

ចំណែក ទីផ្សារការិយាល័យនៅតាមខេត្តមានអត្រាទុកទំនេរចោលចំនួន២៨ភាគរយ ជាមួយនឹងការផ្គត់ផ្គង់សរុប២៣មុឺនម៉ែត្រការ៉េ ខណៈដែលថ្លៃជួលជាមធ្យមត្រូវបានកំណត់នៅត្រឹម៦០០ប៉េសូ(១០,៤១ដុល្លារអាមេរិក) ក្នុងមួយម៉ែត្រការ៉េ។

ជាមួយគ្នានេះ អត្រាទុកទំនេរចោលដ៏ខ្ពស់ក៏បានជះឥទ្ធិពលដល់វិស័យលក់រាយ និងលំនៅដ្ឋាន ជាពិសេសតម្លៃខុនដូ បានថយចុះ១៤,៥% លើមូលដ្ឋានប្រចាំត្រីមាស និងថយចុះ០,៣%លើមូលដ្ឋានប្រចាំឆ្នាំ ដោយផ្អែកលើសន្ទស្សន៍តម្លៃអចលនទ្រព្យលំនៅដ្ឋាន Bangko Sentral ng Pilipinas (BSP)។

យ៉ាងណាមិញ ចំណុចវិជ្ជមានមួយនៅក្នុងឧស្សាហកម្មអចលនទ្រព្យរបស់ប្រទេសហ្វីលីពីន គឺការបន្តកើនឡើងនៃការអភិវឌ្ឍន៍ផ្ទះ Townhouse ឬអគារប្រើប្រាស់ចម្រុះ ដែលចំនួន៤០ភាគរយនៃការអភិវឌ្ឍន៍ទាំងនេះស្ថិតនៅក្នុងទីក្រុងម៉ានីល (Metro Manila) និងចំនួន៦០ភាគរយស្ថិតនៅក្នុងបណ្តាខេត្ត។

លើសពីនេះ ការបង្កើតតំបន់ទីប្រជុំជន(Townships) ត្រូវបានគេរំពឹងថា នឹងរក្សានិរន្តរភាពតម្រូវការលក់រាយ និងលំនៅដ្ឋាន ដោយសារការរៀបចំរចនាសម្ព័ន្ធនៃសហគមន៍ ដែលរួមបញ្ចូលគ្នានូវការិយាល័យ ការលំហែ ការលក់រាយ និងកន្លែងសិក្សា៕ប្រភព: INQUIRER.NET៕

ដោយ: គង់ លាងហួរ
អន្តរជាតិ: សម្ព័ន្ធភាពមួយ ដែលដឹកនាំដោយ ក្រុមហ៊ុនម៉ៅការ El Seif Engineering របស់អារ៉ាប៊ីសាអូឌីត និងក្រុមហ៊ុនចិន China State Construction Engineering បានក្លាយជាសម្ព័ន្ធក្រុមហ៊ុននាំមុខគេ ដែលរំពឹងថា នឹងយកឈ្នះកិច្ចសន្យាសាងសង់អគារខ្ពស់ជាងគេនៅលើពិភពលោក។

អគារនោះមានឈ្មោះថា Jeddah Tower ដែលមានកម្ពស់១.០០០ម៉ែត្រ ស្ថិតនៅក្នុងទីក្រុង Jeddah ប្រទេសអារ៉ាប៊ីសាអូឌីត។ នៅពេលសាងសង់រួចរាល់ អគារ Jeddah Tower នឹងមានកម្ពស់ខ្ពស់ជាងអគារ Burj Khalifa របស់ទីក្រុងឌូបៃ ចំនួនជាង១៧២ម៉ែត្រ។

អគារនេះគឺជាចំណុចកណ្តាលនៃការអភិវឌ្ឍន៍ទីក្រុងសេដ្ឋកិច្ច Jeddah ។ដំបូងឡើយ គម្រោងនេះត្រូវបានចាប់ផ្តើមសាងសង់នៅឆ្នាំ២០១៣ និងបានផ្អាកទៅវិញនៅឆ្នាំ២០១៨។ ក្រោយមក គឺនៅឆ្នាំ២០២៣ គម្រោងតម្លៃរាប់ពាន់លានដុល្លារមួយនេះបានដំណើរការឡើងវិញ។ក្រៅពីសម្ព័ន្ធក្រុមហ៊ុនទាំង២ខាងលើ ក្រុមហ៊ុន ដែលកំពុងប្រកួតប្រជែងផ្សេងទៀត រួមមាន ក្រុមហ៊ុន Consolidated Contractors (CCC) របស់ប្រទេសលីបង់ និងក្រុមហ៊ុន Mohammed Abdulmohsin Al Kharafi & Sons របស់ប្រទេសគុយវ៉ែត ដោយមានការគាំទ្រពីដៃគូអន្តរជាតិ។

លោក Talal Ibrahim Almaiman នាយកប្រតិបត្តិក្រុមហ៊ុន Kingdom Holding Company បានបញ្ជាក់ប្រាប់ទៅកាន់សារពត៌មាន Meed ថា ការដេញថ្លៃត្រូវបានដាក់ជូនហើយ ហើយអ្នកឈ្នះកិច្ចសន្យា នឹងត្រូវបានប្រកាសឱ្យដឹងក្នុងពេលឆាប់ៗនេះ។ក្រុមហ៊ុន El Seif ដែលជាក្រុមហ៊ុនចុះកិច្ចសន្យាដ៏សកម្មបំផុតមួយរបស់ប្រទេសអារ៉ាប៊ីសាអូឌីត ធ្លាប់ជាអ្នកម៉ៅការសាងសង់អគារកប់ពពក Kingdom Centre នៅក្នុងទីក្រុងរីយ៉ាដ។ កាលពីឆ្នាំមុន មូលនិធិវិនិយោគសាធារណៈ (PIF) បានទិញភាគហ៊ុនចំនួន២៥% នៅក្នុងក្រុមហ៊ុននេះដើម្បីគាំទ្រដល់កំណើនរបស់ខ្លួន។

ក្រុមហ៊ុនម៉ៅការ ដែលមានមូលដ្ឋាននៅទីក្រុងរីយ៉ាដ (Riyadh) មួយនេះ មានទំនាក់ទំនងការងារជាមួយក្រុមហ៊ុនចិន China State Construction Engineering ដោយក្រុមហ៊ុនទាំង២ បានសហការគ្នាលើគម្រោងជាច្រើននៅក្នុងប្រទេសអារ៉ាប៊ីសាអូឌីត រួមទាំងការអភិវឌ្ឍន៍សហគមន៍ Diriyah ក្នុងទីក្រុង Riyadh ជាដើម៕ប្រភព: MEED៕

ដោយ: គង់ លាងហួរ
អន្តរជាតិ: ក្រុមហ៊ុនបច្ចេកវិទ្យាខ្នាតយក្ស Microsoft គ្រោះបោះទុនវិនិយោគ១,៧ពាន់លានដុល្លារនៅក្នុងប្រទេសឥណ្ឌូនេស៊ី ដើម្បីអភិវឌ្ឍន៍សេវាកម្ម Cloud និងបច្ចេកវិទ្យាបញ្ញាសិប្បនិម្មិត(AI) ព្រមទាំងសាងសង់មជ្ឈមណ្ឌលទិន្នន័យផងដែរ។

គម្រោងវិនិយោគក្នុងទំហំទឹកប្រាក់រាប់ពាន់លានដុល្លារនេះត្រូវបានប្រកាសឱ្យដឹងនៅថ្ងៃអង្គារ ទី៣០ ខែមេសា ក្នុងឱកាសដែលលោក Satya Nadella នាយកប្រតិបត្តិក្រុមហ៊ុនMicrosoft បានបំពេញទស្សនកិច្ចទៅកាន់ប្រទេសឥណ្ឌូនេសុី។រដ្ឋធានីហ្សាការតាគឺជាគោលដៅទស្សនកិច្ចទី១របស់លោក Nadella ក្នុងដំណើររបស់លោកឆ្ពោះមកកាន់បណ្តាប្រទេសក្នុងតំបន់អាស៊ាន។ បន្ទាប់ពីបញ្ចប់ទស្សនកិច្ចនោះ លោក នឹង អញ្ជើញទៅ បំពេញ ទស្សនកិច្ច នៅ ប្រទេស ម៉ាឡេស៊ី និង ថៃ នៅ ចុង សប្តាហ៍ នេះ។

លោក Nadella បានលើកឡើងថា ក្រុមហ៊ុន Microsoft នឹងពង្រីកការវិនិយោគរបស់ខ្លួននៅក្នុងមជ្ឈមណ្ឌលទិន្នន័យ និងវិទ្យាសាស្ត្រកុំព្យូទ័រ Cloud ក្នុងទំហំទឹកប្រាក់ចំនួន១,៧ពាន់លានដុល្លារ ដើម្បីនាំយកហេដ្ឋារចនាសម្ព័ន្ធ AI ថ្មីចុងក្រោយបំផុត និងអស្ចារ្យបំផុតទៅកាន់ប្រទេសឥណ្ឌូនេស៊ី។ក្នុងដំណើរទស្សនកិច្ចនៅថ្ងៃអង្គារនេះ លោក Nadella បានជួបជាមួយប្រធានាធិបតីចាំផ្ទះរបស់ប្រទេសឥណ្ឌូនេស៊ី គឺលោក Joko Widodo ដើម្បីពិភាក្សាអំពីការស្រាវជ្រាវរួមគ្នាលើបញ្ញាសិប្បនិម្មិត AI និងការអភិវឌ្ឍន៍ទេពកោសល្យ។ នេះបើយោងតាមការបញ្ជាក់ឱ្យដឹងពីមន្ត្រីជាន់ខ្ពស់ឥណ្ឌូនេសុី។

ជាមួយគ្នានេះ លោក Nadella បានអះអាងថា ក្រុមហ៊ុន Microsoft នឹងបណ្តុះបណ្តាលមនុស្សចំនួន២,៥លាននាក់នៅតំបន់អាស៊ានឱ្យចេះប្រើប្រាស់បច្ចេកវិទ្យាបញ្ញាសិប្បនិម្មិត (AI) នៅត្រឹមឆ្នាំ២០២៥ខាងមុខ។

ក្រុមហ៊ុន Microsoft កំពុងព្យាយាមពង្រីកការគាំទ្ររបស់ខ្លួនសម្រាប់ការអភិវឌ្ឍន៍បច្ចេកវិទ្យា AI នៅទូទាំងពិភពលោក ដោយក្នុងនោះ ក្រុមហ៊ុនបានបោះទុនចំនួន២,៩ពាន់លានដុល្លារលើហេដ្ឋារចនាសម្ព័ន្ធ cloud និង AI នៅក្នុងប្រទេសជប៉ុន និងបោះទុនចំនួន១,៥ពាន់លានដុល្លារនៅក្នុងក្រុមហ៊ុន AI G42 ដែលមានមូលដ្ឋាននៅប្រទេសអារ៉ាប់រួម៕ប្រភព: Reuters៕

ដោយ: គង់ លាងហួរ

បាងកក: ការិយាល័យច្រករបៀងសេដ្ឋកិច្ចបូព៌ា (EEC) កំពុងឈានទៅបញ្ចប់ផែនការ អភិវឌ្ឍន៍ពាណិជ្ជកម្មសម្រាប់តំបន់នានា ក្នុងខេត្តឈុនបូរី និងខេត្តឆាឈឿងសៅ ដែលជាផ្នែកមួយនៃគម្រោងរថភ្លើងល្បឿនលឿន តភ្ជាប់អាកាសយានដ្ឋានដុនមឿង សុវណ្ណភូមិ និងអ៊ូតាប៉ាវ។

លោកស្រី Sirima Hiruncharoenvate ប្រធានការិយាល័យ EEC បានលើកឡើងថា “បន្ទាប់ពីបញ្ចប់សវនាការនៅទីក្រុងប៉ាតាយ៉ាកាលពីថ្ងៃសុក្រ សប្តាហ៍មុន យើងកំពុងចងក្រងយោបល់ទៅជាសំណើសម្រាប់ការអភិវឌ្ឍន៍ ពាណិជ្ជកម្មនៅក្នុងតំបន់នេះ”។

លោកស្រី​បន្ត​ថា សំណើ​នេះ​នឹង​ត្រូវ​បញ្ជូន​បន្ត ​ទៅ​គណៈកម្មាធិការ​គោលនយោបាយ EEC ដើម្បី​អនុម័ត មុន​នឹង​បញ្ជូន​បន្ត​ទៅ​កាន់គណៈរដ្ឋមន្ត្រី​នៅ​ឆ្នាំ​ក្រោយ ។គម្រោង​នេះ​ រួមមាន ការសាងសង់ស្ថានីយ​សម្រាប់​ប្រព័ន្ធ​រថភ្លើង​ល្បឿន​លឿនចំនួនមួយ​កន្លែង នៅ​ទីក្រុងប៉ាតាយ៉ា (Pattaya) និង​ស្ថានីយ៍មួយកន្លែងទៀត​នៅខេត្តឆាឈឿងសៅ(Chachoengsao)។

លោកស្រី Sirima បានមានប្រសាសន៍ឱ្យដឹងបន្តទៀតថា គម្រោងនេះ មានគោលបំណងអភិវឌ្ឍន៍តំបន់ ជុំវិញស្ថានីយរថភ្លើង ដោយមិនតម្រូវឱ្យមានការដកហូតដី របស់ប្រជាពលរដ្ឋនោះទេ។

ទន្ទឹមនឹងនោះ ដីទំហំ២៨០រ៉ៃ(៤៤,៨ហិកតា) ស្ថិតនៅក្នុងឃុំ Na Kleau និងឃុំ tambon Nong Prue នៃស្រុក Bang Lamung ខេត្តឈុនបូរី ដែលត្រូវបានស្នើឱ្យដាក់បញ្ចូលក្នុងគម្រោងនេះ នឹងត្រូវបានបែងចែកទៅជា៣តំបន់ សម្រាប់គោលបំណងផ្សេងៗគ្នា។

លោក​ស្រី​បាន​បន្ត​ថា តំបន់​ទី១ ដែល​មាន​ផ្ទៃ​ដី៩៧រ៉ៃ(១៥,៥២ហិកតា) នឹង​ត្រូវបានសាងសង់ជា​មជ្ឈមណ្ឌល​ប្រតិបត្តិការ ​សម្រាប់​សេវា​ផ្លូវ​ដែក និង​អាជីវកម្ម​ទាក់ទង​នឹង​ប្រតិបត្តិការ​របស់​ផ្លូវដែក។

តំបន់ទី២ ដែលគ្របដណ្តប់លើផ្ទៃដី៨៣រ៉ៃ(១៣,២៨ហិកតា) នឹងត្រូវបានសាងសង់ទៅជាមជ្ឈមណ្ឌល ដែលអ្នកដំណើរអាចមកទទួលបានសេវា ដឹកជញ្ជូនសាធារណៈផ្សេងៗ បន្ទាប់ពីចុះពីរថភ្លើង។ ទីតាំង​នេះ​ក៏​នឹង​មានអគារប្រើ​ប្រាស់ចម្រុះ ​សម្រាប់​អាជីវកម្ម​អន្តរជាតិ ពាណិជ្ជកម្ម ទេសចរណ៍ និង​សេវាកម្មផងដែរ។

លោកស្រីបញ្ជាក់បន្ថែមថា តំបន់​ទី​៣ ដែល​មាន​ផ្ទៃដី​១០០​រ៉ៃ(១៦ហិកតា) នឹង​ត្រូវ​បានអភិវឌ្ឍ​ន៍ទៅជា​គម្រោង​លំនៅដ្ឋាន៕ប្រភព: Bangkok Post៕