ដោយ: គង់ លាងហួរ

អន្តរជាតិ: ធនាគារអភិវឌ្ឍន៍អាស៊ី (ADB) អះអាងថា នៅឆ្នាំនេះ កំណើនសេដ្ឋកិច្ច របស់បណ្តាប្រទេសកំពុងអភិវឌ្ឍន៍ នៅតំបន់អាស៊ី អាចនឹងមានភាពរឹងមាំ ជាងការគិតទុកពីមុន ដោយសារការស្ទុះងើបឡើងវិញនៃសេដ្ឋកិច្ចរបស់ប្រទេសចិន។

ធនាគារ ADB បានបង្កើនការព្យាករណ៍ កំណើនសេដ្ឋកិច្ចសម្រាប់តំបន់អាស៊ី ដែលកំពុងអភិវឌ្ឍឡើងដល់៤,៩ភាគរយ ធៀបនឹង៤,៧ភាគរយ ដែលបានព្យាករក្នុងខែកញ្ញា ប៉ុន្តែADB បានរក្សាការព្យាករណ៍កំណើនសេដ្ឋកិច្ច សម្រាប់តំបន់នេះនៅត្រឹម៤,៨ភាគរយដដែលសម្រាប់ឆ្នាំក្រោយ។

តំបន់អាស៊ីដែលកំពុងអភិវឌ្ឍន៍ សំដៅទៅលើប្រទេសចំនួន៤៦ នៅតំបន់អាស៊ីប៉ាស៊ីហ្វិក ដោយមិនរាប់បញ្ចូលប្រទេសជប៉ុន អូស្ត្រាលី និងនូវែលសេឡង់។

លើសពីនេះធនាគារADB ក៏បានបង្កើនការព្យាករណ៍កំណើនសេដ្ឋកិច្ចចិនឡើងដល់៥,២ ភាគរយ បើធៀបនឹងការព្យាករណ៍ពីមុន៤,៩% ប៉ុន្តែADB បានរក្សាការព្យាករណ៍ កំណើនសេដ្ឋកិច្ចចិន ស្ថិតក្នុងរង្វង់៤,៥ភាគរយដដែលសម្រាប់ឆ្នាំក្រោយ។

ជាក់ស្តែង សេដ្ឋកិច្ចរបស់ប្រទេសចិន បានកើនឡើងក្នុងកម្រិតលឿនជាងការរំពឹងទុកចំនួន៤,៩ភាគរយ នៅក្នុងត្រីមាសទី៣ ខណៈដែលការប្រើប្រាស់ និងសកម្មភាពឧស្សាហកម្ម នៅក្នុងខែកញ្ញាក៏មានការកើនឡើងគួរឱ្យភ្ញាក់ផ្អើលផងដែរ។

ធនាគារ ADB បានបន្តថា តម្រូវការក្នុងស្រុកដ៏រឹងមាំ ការផ្ទេរទូទាត់ប្រាក់កាន់តែរឹងមាំ ការងើបឡើងវិញនៃវិស័យទេសចរណ៍កំពុងជំរុញសកម្មភាពសេដ្ឋកិច្ច នៅក្នុងតំបន់អាស៊ីដែលកំពុងអភិវឌ្ឍ។

ធនាគារអភិវឌ្ឍន៍អាស៊ី (ADB) បានបន្ថែមថា អតិផរណានៅក្នុងតំបន់អាស៊ី កំពុងអភិវឌ្ឍន៍ត្រូវបានព្យាករណ៍ថា នឹងថយចុះមកនៅត្រឹម៣,៥ភាគរយនៅឆ្នាំនេះ  មុនពេលកើនឡើងបន្តិចទៅដល់៣,៦ភាគរយនៅឆ្នាំ២០២៤ខាងមុខ៕

 ដោយៈ ស៊ីវ ម៉េង

ភ្នំពេញៈ ទិសទាំង៤នៃរាជធានីភ្នំពេញ មានសក្តានុពលខុសៗគ្នា ដែលជាកត្តាអំណោយផលដល់ការវិនិយោគ និងប្រកបអាជីវកម្មផ្សេងៗគ្នាផងដែរ។

តើទិញសទាំងបួន មានសក្តានុពលដូចម្តេច? លោកឧកញ៉ាបណ្ឌិតគីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាងបង្ហាញការយល់ឃើញរបស់ខ្លួនថា ទិសខាងកើតនៅផ្លូវជាតិលេខ១ មានទន្លេសងខាង ដែលអំណោយផលដល់វិស័យទេស​ចរណ៍ និងលំនៅដ្ឋាន។ រីឯទិសខាងលិច នៅតាមផ្លូវជាតិលេខ៣ និងលេខ៤ គឺជាតំបន់ឧស្សា​ហកម្ម និងលំនៅដ្ឋានចំណូលក្រោមមធ្យម ព្រោះទិសខាងលិចជាតំបន់សម្បូររោងចក្រ និងកម្មករច្រើន។លោកឧកញ៉ាលើកឡើងជាយោបល់ថា ប្រសិនបើចង់ឱ្យទិសខាងត្បូង នៃរាជធានីភ្នំពេញរីកចម្រើនខ្លាំង ទាល់តែកាត់បញ្ចូលទីក្រុងតាខ្មៅ និងព្រលានយន្តហោះ នៅក្នុងខេត្តកណ្តាលបច្ចុប្បន្នចូលមកក្នុងរាជធានីភ្នំពេញ ព្រោះប្រជាជនមិនសូវចង់ទិញអចលនទ្រព្យនៅតាមបណ្តាខេត្តនោះទេ។

យ៉ាងណាមិញ លោកឧកញ៉ាបណ្ឌិត គីម ហ៊ាង នៅតែមើលឃើញថា ទិសខាងជើងនៃរាជធានីភ្នំពេញ គឺជាតំបន់ពេញនិយម និងរីកចម្រើនខ្លាំង ព្រោះជាតំបន់ដីខ្ពស់រាប មានសណ្ឋានដីអំណោយផលល្អ សម្រាប់ការសាងសង់តំបន់ពាណិជ្ជកម្ម លំនៅដ្ឋានលំដាប់អភិជន និងសម្បូរទៅដោយហេដ្ឋារចនាសម្ព័ន្ធជាច្រើន ដូចជាមន្ទីរពេទ្យ បុរីធំៗ សាលារៀន ក្រសួងជាច្រើន។លោកបណ្ឌិតអះអាងថា “ប្រសិនបើយើងសាងសង់វីឡា ដែលមានតម្លៃកន្លះលានដុល្លារអាមេរិកឡើងទៅ នៅប៉ែកខាងកើតរាជធានីភ្នំពេញ នោះយើងនឹងពិបាកលក់ចេញ ព្រោះកត្តាដង់ស៊ីតេ ហើយប្រជាជនកម្ពុជាមិនចូលចិត្តឆ្លងស្ពាន។ រីឯប៉ែកខាងលិច យើងអាចសាងសង់ផ្ទះ ដែលមានតម្លៃ៥ម៉ឺនដុល្លារ ហើយប្រសិនបើចង់អភិវឌ្ឍលំនៅដ្ឋានថ្លៃៗនៅប៉ែកខាងត្បូង យើងត្រូវសង់ចូលពីទីក្រុងតាខ្មៅមករាជធានីភ្នំពេញវិញ”៕

ដោយៈ គង់ សូរិយា

ភ្នំពេញៈ ក្រុមហ៊ុនអាកាសចរណ៍វៀតណាម Vietjetនឹងធ្វើការហោះហើរត្រង់ មកកាន់ខេត្តសៀមរាប នៅថ្ងៃទី១៥ ធ្នូខាងមុខនេះ។

ការប្រកាសបើកជើងហោះហើរនេះ ធ្វើឡើងនៅក្នុងវេទិកាជំរុញពាណិជ្ជកម្ម និងវិនិយោគកម្ពុជា-វៀតណាម ឆ្នាំ២០២៣ នៅរដ្ឋធានីហាណូយ សាធារណរដ្ឋសង្គមនិយមវៀតណាម នារសៀលថ្ងៃទី១២ ខែធ្នូ ឆ្នាំ២០២៣ ក្នុងឱកាសនៃដំណើរទស្សនកិចរបស់សម្តេចធិបតីហ៊ុន ម៉ាណែតទៅកាន់ប្រទេសវៀតណាម នៅដើមសប្តាហ៍នេះ។ក្រុមហ៊ុនអាកាសចរណ៍ Vietjet របស់វៀតណាម នឹងបើកដំណើរការជើងហោះហើរត្រង់ ពីរដ្ឋធានីហាណូយ មកកាន់ខេត្តសៀមរាប ចាប់ពីថ្ងៃទី១៥ ខែធ្នូ ឆ្នាំ២០២៣ ខាងមុខនេះតទៅ។

សម្តេចនាយករដ្ឋមន្រ្តី ហ៊ុន ម៉ាណែត ស្វាគមន៍ និងគាំទ្រចំពោះការចាប់ផ្តើមដំណើរការជើងហោះហើរ ត្រង់រវាងទីក្រុង​ហាណូយ និងខេត្តសៀមរាប ដែលជាការតភ្ជាប់ដ៏សំខាន់រវាងកម្ពុជា -វៀតណាម ដើម្បីជួយទៅដល់​ការផ្លាស់ប្តូរ អ្នកទេសចរទៅវិញទៅមក រវាងប្រទេ​សទាំងពីរ។

សម្តេចធិបតី បានលើកឡើងអំពីជំហរ របស់រាជរដ្ឋាភិបាលកម្ពុជា នៅក្នុងការផ្តល់នូវកិច្ចគាំទ្រ ស​ម្របសម្រួល​ចំពោះដំណើរការអាជីវកម្មរបស់ក្រុមហ៊ុន Vietjet នៅក្នុងប្រទេសកម្ពុជា និងបានលើកទឹកចិត្តឱ្យក្រុមហ៊ុន ​ពិនិត្យលទ្ធភាពពង្រីកគោលដៅ នៃការហោះហើរត្រង់ពីទីក្រុងដាណាំង មកកាន់រាជធានីភ្នំពេញ ក៏ដូចជា ការពិភា​ក្សាអំពីលទ្ធភាព នៃកិច្ចសហការជាមួយបណ្តាក្រសួង -ស្ថាប័នពាក់ព័ន្ធ របស់កម្ពុជា ក្នុងការរៀបចំកញ្ចប់​សេវាកម្មទេសចរណ៍ ដើម្បីជំរុញការធ្វើដំណើររបស់អ្នកទេសចរវៀតណាម តាមVietjet Air មកកាន់ប្រទេសកម្ពុជាឱ្យបានកាន់តែច្រើន។

ប្រធានសមាគមមគ្គទេសក៍ទេសចរណ៍អង្គរ លោកខៀវ ធី បានសម្តែងការសាទរ ចំពោះដំណើរការហោះហើរត្រង់ រវាងរដ្ឋធានីហាណូយប្រទេសវៀតណាម មកកាន់ខេត្តសៀមរាប ប្រទេសកម្ពុជានេះ។

លោកមានក្តីសុទិដ្ឋិនិយមថា កំណើនភ្ញៀវ​ទេសចរ​វៀតណាម នឹងកើនឡើងថែមទៀត ក្រោយពីប្រទេសទាំងពីរ សម្រេចឯកភាពជាផ្លូវការដាក់ឱ្យដំណើរ​ការជើងហោះហើរត្រង់នេះ៕

ដោយៈ គង់ សូរិយា

ភ្នំពេញៈ កំណាត់ផ្លូវជាតិលេខ៧៦ ស្ថិតនៅត្រង់ចំណុចអូរងើយ ចន្លោះ PK94+080 – PK94+150 ដែលរអិលបាក់ កាលពីខែសីហា ឆ្នាំ២០២៣ កំពុងផ្តល់លទ្ធភាពការធ្វើចរាចរណ៍បណ្តោះអាសន្ន និងគ្រោងបញ្ចប់ការស្ថាបនាទាំងស្រុង នៅចុងខែធ្នូ ឆ្នាំ២០២៣។

កំណាត់ផ្លូវជាតិលេខ៧៦ ដែលបានបាក់ស្រុត ប្រមាណ១៦៦ម៉ែត្រ ត្រង់ចំណុចអូរងើយ ភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ចន្លោះ PK94+080 – PK94+150 កាលពីថ្ងៃទី១ ខែសីហា ឆ្នាំ២០២៣ ត្រូវបានដាក់ឱ្យប្រើប្រាស់បណ្តោះអាសន្នកាលពី ថ្ងៃទី០៨ ខែសីហា ឆ្នាំ២០២៣ កំពុងត្រូវបានបន្តការស្ថាបនាផ្លូវវាង ប្រមាណ ១០០០ម៉ែត្រ និងគ្រោងបញ្ចប់ការសាងសង់ទាំងស្រុងនៅចុងខែធ្នូ ឆ្នាំ២០២៣នេះហើយ។ផ្លូវជាតិលេខ៧៦ (ស្នួល – សែនមនោរម្យ) មានប្រវែង១២៧គ.ម ជាប្រភេទផ្លូវ DBST បានចាប់ផ្ដើមការស្ថាបនា នៅក្នុងខែកុម្ភៈ ឆ្នាំ២០០៧ និងបញ្ចប់ការស្ថាបនា នៅក្នុងខែមីនា ឆ្នាំ២០១១ ដែលចំណាយថវិកា សាងសង់ចំនួនជិត៥២លានដុល្លារអាមេរិក។

ផ្លូវនេះបានសម្ពោធបើកឱ្យប្រើប្រាស់ជាផ្លូវការ នៅថ្ងៃទី៣១ ខែមករា ឆ្នាំ២០១២។ គិតចាប់ពីពេលស្ថាបនារួចមក មានរយៈពេលជាង១២ឆ្នាំ ផ្លូវជាតិលេខ៧៦នេះ មិនធ្លាប់មានការខូចខាត ដែលតម្រូវឱ្យមានការជួសជុលម្តងណាទេ ហើយតែងតែទទួលបានការថែទាំជាប្រចាំរហូតមក ដោយមន្ទីរជំនាញ។កាលពីយប់ថ្ងៃទី០១ សីហា ២០២៣ កំណាត់ផ្លូវជាតិខាងលើ នៅត្រង់ចំណុចអូរងើយ ស្ថិតក្នុងភូមិអណ្ដូងក្រឡឹង ឃុំសែនមនោរម្យ ស្រុកអូររាំង នៃខេត្តមណ្ឌលគិរី ត្រូវបានផ្អាកចរាចរណ៍ជាបណ្តោះអាសន្ន ដោយសារការរអិលបាក់ដី ចន្លោះPK94+080 – PK94+150 និងបន្តមានស្នាមប្រេះបន្ថែមនៅថ្ងៃបន្ទាប់ ដែលសរុបការខូចខាតមានប្រវែង១៦៦ម៉ែត្រ (រអិលបាក់ដី ៧០ម និងស្នាមប្រេះ៩៦ម)។

កាលពីថ្ងៃទី០៨ ខែសីហា ឆ្នាំ២០២៣ លោកស៊ុន ចាន់ថុល ឧបនាយករដ្ឋមន្ត្រី ដែលជាអតីតរដ្ឋមន្ត្រីក្រសួងសាធារណការ និងដឹកជញ្ជូនអាណត្តិទី៦ បានអញ្ជើញដឹកនាំគណៈប្រតិភូក្រសួង ដោ​យ​មានការចូលរួមពីលោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អាណត្តិទី៧នេះ ចុះពិនិត្យស្ថានភាព និងត្រួតពិនិត្យការងារបច្ចេកទេសបន្ថែម លើទីតាំងបាក់ស្រុត និងការស្ថាបនាផ្លូវវាងប្រវែង១០០០ម៉ែត្រ ដោយមានការឈូសឆាយ ចាក់ថ្មម៉ិច និងកៀរកិនបង្ហាប់ ដើម្បីភ្ជាប់ចរាចរណ៍ឡើងវិញ ដោយធានាគុណភាពស្របតាមបទដ្ឋាន និងផ្តល់នូវសុវត្ថិភាព ក្នុងការធ្វើដំណើរឆ្លងកាត់ជាបណ្តោះអាសន្ន របស់បងប្អូនប្រជាពលរដ្ឋក្នុងតំបន់ ក៏ដូចជាភ្ញៀវទេស​ចរណ៍ទាំងអស់៕

ដោយៈ គង់ សូរិយា

ភ្នំពេញៈ ផ្កាកូលាបតំណាងឲ្យក្តីស្រលាញ់ និងការសង្រ្គោះរបស់សម្តេចតេជោហ៊ុន សែនអតីតនាយករដ្ឋមន្រ្តីកម្ពុជា បានបង្ហាញនូវស្នាមញញឹមរបស់អ្នកដំណើររាប់ពាន់នាក់ ដែលបានប្រឈមនឹងការបាត់បង់ជីវិតនៅលើកប៉ាល់លំដាប់យក្សនេះ ដោយសារការរើសអើង។

ទីបំផុតកប៉ាល់លំដាប់យក្សWesterdam បាននិងកំពុងត្រលប់មកកម្ពុជាជាថ្មី និងមកជាមួយនូវស្នាមញញឹម និងរំលឹកអនុស្សាវរីយ៍មិនបានបំភ្លេចបានកាលពី៤ឆ្នាំមុន។

កម្ពុជាទន្ទឹងរង់ចាំស្វាគមន៍ ការត្រឡប់មកវិញរបស់នាវាទេស​ចរណ៍ខ្នាតធំ​ Westerdam ដែលនឹងមកដល់ថ្ងៃ២៨​ ខែធ្នូ ឆ្នាំ២០២៣ ។កម្ពុជា ជាប្រទេសតូចតែមានបេះដូងធំ បើទោះជាប្រឈមនឹងការឆ្លងពីជំងឺរាតត្បាតកូវីត១៩ តែសម្តេចតេជោ អតីតនាយករដ្ឋមន្រ្តី តំណាងប្រជាជនកម្ពុជាទូទាំងប្រទេស បានបង្ហាញសណ្តានចិត្តមនុស្សធម៌ជួយដល់ភ្ញៀវទេសចរអន្តរជាតិ ដែលកំពុងជាប់គាំងនៅលើនា​វាទាំងអស់នោះ ដើម្បីឱ្យពួកគេបានវិលត្រឡប់ទៅប្រទេសកំណើតវិញ តាមមធ្យោបាយរៀងៗខ្លួន។

ព្រឹត្តិការណ៍ទាំងអស់នេះហើយ ដែលធ្វើឱ្យនាវាខ្នាតយក្ស Westerdam នៅតែចងចាំមិនភ្លេច និងចិញ្ចឹមចិត្តដឹក នាំភ្ញៀវទេសចរអន្តរជាតិចូលមកកម្សាន្តនៅកម្ពុជា ជាថ្មីម្តងទៀត។ដោយសារសណ្តានចិត្តដ៏ល្អរបស់កម្ពុជា​ អ្នកទេសចរណ៍ដែលបានចូលចត នៅកំពង់ផែខេត្តព្រះសីហនុ​ បានទទួលការសង្គ្រោះជីវិតពីភាពតែលតោលនៅសមុទ្រ​ រួមទាំងសហនាវឹក​ បូករួមនឹងអ្នកទេស​ចរណ៍​ នឹងត្រលប់មកកម្ពុជាជាថ្មី​ ដើម្បីមកទទួលយកស្នាមញញឹម​ ការរួសរាយរាក់ទាក់​ ប្រកបដោយបេះដូងកក់ក្តៅរបស់ប្រជាជនកម្ពុជា​៕

ដោយ: គង់ លាងហួរ

អន្តរជាតិ: ប្រធានាធិបតីចិនលោក ស៊ី ជីនពីង បានថ្លែងក្នុងជំនួបពិភាក្សា ជាមួយមេដឹកនាំបក្សកុម្មុយនិស្តវៀតណាម លោក Nguyen Phu Trong ថា ទីក្រុងប៉េកាំងត្រៀមខ្លួនជាស្រេច ក្នុងការធ្វើឱ្យស៊ីជម្រៅភាពជាដៃគូទ្វេរភាគី និងកសាងសហគមន៍ ដែលមានអនាគតរួមគ្នាជាមួយទីក្រុងហាណូយ។

លោកស៊ី ជីនពីង បានបញ្ជាក់ប្រាប់មេដឹកនាំវៀតណាមថា ប្រទេសចិនបានចាត់ទុកទំនាក់ទំនងរបស់ខ្លួន ជាមួយវៀតណាមជាអាទិភាព នៅក្នុងទំនាក់ទំនងការទូត ជាមួយប្រទេសជិតខាងរបស់ខ្លួន។

លោកស៊ី បានបន្ថែមថា ជាមួយនឹងកិច្ចខិតខំប្រឹងប្រែងរួមគ្នា ទំនាក់ទំនងចិន-វៀតណាម នឹងឈានចូលទៅក្នុងដំណាក់កាលថ្មីនៃការជឿទុកចិត្តគ្នាទៅវិញទៅមក ផ្នែកនយោបាយកាន់តែខ្លាំង កិច្ចសហប្រតិបត្តិការសន្តិសុខកាន់តែរឹងមាំ និងកិច្ចសហប្រតិបត្តិការផ្តល់ផលប្រយោជន៍ឱ្យគ្នាទៅវិញទៅមកកាន់តែស៊ីជម្រៅ។លោក Nguyen Phu Trong និងសមភាគីចិនលោក​ស៊ី ជីនពីង បានធ្វើជាសាក្សីកាលពីថ្ងៃអង្គារ ក្នុងការចុះហត្ថលេខាលើកិច្ចព្រមព្រៀងចំនួន៣៦ សម្រាប់កិច្ចសហប្រតិបត្តិការ លើវិស័យជាច្រើន ដូចជាសន្តិសុខ និងការអភិវឌ្ឍន៍ផ្លូវដែកឆ្លងព្រំដែន។

ប្រទេស​ជិត​ខាងទាំង​ពីរ​ បាន​ជាប់​ពាក់ព័ន្ធ​នឹង​ជម្លោះ​ទឹកដី ​នៅ​សមុទ្រ​ចិន​ខាង​ត្បូង ប៉ុន្តែ​នៅតែរក្សា​បានទំនាក់ទំនង​សេដ្ឋកិច្ច​ដ៏រឹងមាំ ដោយប្រទេសចិន​ ជា​ដៃគូ​ពាណិជ្ជកម្ម​ធំជាងគេ​របស់​វៀតណាម ខណៈ​វៀតណាម​ ជា​ដៃគូ​ពាណិជ្ជកម្ម​ធំជាងគេ​ទី​៤​របស់​ចិន។

ដំណើរទស្សនកិច្ច ទៅកាន់ប្រទេសវៀតណាមរបស់លោក ស៊ី ជីនពីងបានធ្វើឡើង បន្ទាប់ពីសហរដ្ឋអាមេរិក និងវៀតណាមបានប្រកាសលើក​កម្ពស់ ​ទំនាក់ទំនង​របស់​ពួកគេ​ ទៅ​ដល់​កម្រិតភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ ដែលស្មើនឹងកម្រិតទំនាក់ទំនងរបស់វៀតណាមជាមួយប្រទេសចិន និងរុស្ស៊ី។

ក្នុងជំនួបជាមួយ​នឹង​ប្រធានាធិបតី​វៀតណាម​ លោក Vo Van Thuong ក្នុង​ទីក្រុង​ហាណូយកាលពីខែកញ្ញាកន្លងទៅ ប្រធានាធិបតីអាមេរិក​ លោកចូ បៃដិន បាន​លើកឡើងអំពី​ការ​ពង្រឹង​កិច្ច​សហប្រតិបត្តិការ​ឱ្យ​កាន់តែ​ស៊ី​ជម្រៅ​ លើបញ្ហា​ប្រឈម​នានា​ ដែល​មានសារៈសំខាន់​ចំពោះ​ប្រជាពលរដ្ឋ​នៃប្រទេស​ទាំង​ពីរ និង​បាន​អះអាងថា​ វា​ជា​រឿង​អស្ចារ្យ ដែលប្រទេស​ទាំង​ពីរ បាន​ធ្វើ​ដំណើរ​មក​ដល់​ចំណុច​នេះ។

លោក ចូ បៃដិន ធ្លាប់​បាន​ជួប​ជាមួយ​នឹង​នាយករដ្ឋមន្ត្រី​វៀតណាម​ លោក Pham Minh Chinh ហើយ​មេដឹកនាំ​ទាំង​ពីរ​បាន​ចូលរួម​នៅ​ក្នុង​វេទិកា​ធុរកិច្ចមួយ ដែល​នៅ​ទីនោះ​លោក បៃដិន បាន​ពិភាក្សា​អំពី​ការ​ពង្រឹង​កិច្ច​សហប្រតិបត្តិការ ​ឱ្យ​កាន់តែ​ស៊ី​ជម្រៅ​ជាមួយ​នឹង​វៀតណាម​លើ​សេវា​ប្រព័ន្ធ cloud តាម​អ៊ីនធឺណេត បន្ទះ​ឈីប និង​បច្ចេកវិទ្យា​បញ្ញាសិប្បនិម្មិត (AI)។លើសពីនេះ លោកចូ បៃដិន មើល​ឃើញ​ឱកាស​មួយ​ ដើម្បី​ទាញប្រទេស​ជាច្រើន​ទៀត រួម​ទាំង​ប្រទេស​វៀតណាម និង​កម្ពុជា​ ចូលទៅក្នុង​គន្លង​របស់​អាមេរិក ស្របពេលមានការធ្លាក់ចុះ នៃសេដ្ឋកិច្ចចិន និងការពង្រឹងអំណាចនយោបាយ របស់លោកស៊ី ជីនពីង៕

ដោយ: គង់ លាងហួរ
អន្តរជាតិ: គម្រោងអភិវឌ្ឍអចលនទ្រព្យ Forest City នៅប្រទេសម៉ាឡេស៊ី បានក្លាយជាទីក្រុងដ៏ស្ងាត់ឈឹង ស្របពេលក្រុមហ៊ុនចិន Country Garden ដែលជាអ្នកអភិវឌ្ឍន៍គម្រោងមួយនេះកំពុងជួបប្រទះបញ្ហាហិរញ្ញវត្ថុធ្ងន់ធ្ងរ។

គិតមកដល់ពេលនេះ គេសង្កេតឃើញថា គម្រោង Forest City ដែលមានតម្លៃ១០០ពាន់លានដុល្លារ ទើបសម្រេចបានការស្ថាបនា១៥ភាគរយប៉ុណ្ណោះ ខណៈក្រុមហ៊ុនCountry Garden កំពុងជាប់ផុងក្នុងវិបត្តិបំណុលយ៉ាងធ្ងន់ធ្ងរ។

គម្រោង Forest City ត្រូវបានសាងសង់ នៅលើកោះសិប្បនិម្មិតចំនួន៤ ដែលលាតសន្ធឹងលើផ្ទៃដី ប្រមាណ៣.០០០ហិកតា ពោលគឺមានទំហំធំជាងកោះ Sentosa របស់ប្រទេសសិង្ហបុរីចំនួន៦ដង។គម្រោងនេះត្រូវបានស្ថាបនាឡើង ក្នុងគោលដៅសាងសង់ទីក្រុងមួយ សម្រាប់ប្រជាជនរស់នៅចំនួន៧០០ពាន់នាក់ ជាមួយនឹងបរិក្ខារប្រើប្រាស់ដ៏សំបូរបែប រាប់ចាប់តាំងពីការិយាល័យ រហូតដល់អគារផ្ទះល្វែង វីឡា សណ្ឋាគារ មជ្ឈមណ្ឌលពាណិជ្ជកម្ម និងសាលារៀន។

Forest City ជាគម្រោងអភិវឌ្ឍន៍អចលនទ្រព្យ ដ៏ធំបំផុតរបស់ក្រុមហ៊ុនអភិវឌ្ឍអចលនទ្រព្យចិន Country Garden នៅក្រៅប្រទេស។ គម្រោងនេះក៏ត្រូវបានផ្សារភ្ជាប់ ទៅនឹងគំនិតផ្តួចផ្តើមខ្សែក្រវ៉ាត់ និងផ្លូវ (BRI) ផងដែរ។

កាលពីឆ្នាំ២០១៨កន្លងទៅ គម្រោង Forest City បានជាប់គាំង នៅមុនការបោះឆ្នោតថ្នាក់ជាតិរបស់ម៉ាឡេស៊ី ខណៈនាយករដ្ឋមន្ត្រីម៉ាឡេស៊ីនៅពេលនោះ គឺលោក មហាធា មហាម៉ាត់ បានហៅគម្រោងនេះថា ជាផ្នែកមួយនៃកិច្ចខិតខំប្រឹងប្រែង ដើម្បីប្រគល់អធិបតេយ្យភាពជាតិរបស់ម៉ាឡេស៊ីទៅឱ្យទីក្រុងប៉េកាំង។នៅពេលដែលការសាងសង់បានបញ្ឈប់ គម្រោង Forest City ស្ថិតក្នុងពាក់កណ្តាលដំណាក់កាលទី២ នៃការសាងសង់ ហើយគ្រោ​ងនឹងបញ្ចប់នៅឆ្នាំ២០២៥ ស្របតាមផែនការដើម។

គិតរហូតមកទល់ពេលនេះ អាផាតម៉ិន ប្រមាណ២៨.០០០ខ្នងត្រូវបានសាងសង់។ ផ្នែកនៃអចលនទ្រព្យ ដែលបានបញ្ចប់នេះគ្របដណ្តប់ចំណែក១៥ភាគរយនៃគម្រោងសរុប ដែលអ្នកអភិវឌ្ឍបានប្តេជ្ញានាំមកនូវជីវិតបៃតង ការគាំទ្រផ្នែកបច្ចេកវិទ្យា ទីលានវាយកូនហ្គោល និងសួនទឹក។

បច្ចុប្បន្ន គេសង្កេតឃើញថា មានមនុស្សត្រឹមតែ៩.០០០នាក់ប៉ុណ្ណោះ ដែលរស់នៅ ពោលគឺតិចណាស់បើធៀបនឹងការរំពឹងទុក។ បន្ទាប់ពីចំណាយពេលសាងសង់ អស់រយៈពេលជិតមួយទស្សវត្សរ៍មក Forest City ដែលអភិវឌ្ឍដោយក្រុមហ៊ុនអចលនទ្រព្យយក្សរបស់ចិន Country Garden បានបញ្ចប់គម្រោងនេះត្រឹមតែមួយផ្នែកប៉ុណ្ណោះ។

បច្ចុប្បន្ននេះ វាស្ទើរតែជាអគារខ្មោច ដែលគ្មានមនុស្សរស់នៅ។ អាផាតម៉ិនមួយចំនួន ក្នុងគម្រោងនេះទទួលបានការចាប់អារម្មណ៍មួយចំនួនដែរ ប៉ុន្តែអ្នកចាប់អារម្មណ៍ទាំងនោះ សុទ្ធតែជាម្ចាស់បំណុលរបស់ក្រុមហ៊ុន Country Garden ។លោក John Han ដៃគូរបស់ក្រុមហ៊ុនច្បាប់ Kobre & Kim ដែលមានមូលដ្ឋាននៅទីក្រុងញូវយ៉ក បានលើកឡើងថា គម្រោង Forest City ជាទ្រព្យសម្បត្តិដ៏មានតម្លៃបំផុត របស់ក្រុមហ៊ុន Country Garden នៅបរទេស។ គម្រោងខ្នាតយក្ស ដែលមិនទាន់បញ្ចប់ការសាងសង់នេះ អាចជួយម្ចាស់បំណុលរបស់ក្រុមហ៊ុន Country Garden ប្រមូលប្រាក់បានប្រហែល១,៥ពាន់លានដុល្លារ។

ក្រុមហ៊ុនចិន Country Garden កាន់កាប់ដើមទុនប្រមាណ៦០ភាគរយនៅក្នុងគម្រោងនេះ ខណៈចំណែក ដែលនៅសេសសល់ត្រូវបានកាន់កាប់ដោយក្រុមហ៊ុនឯកជន ក្នុងស្រុករបស់ម៉ាឡេស៊ី Esplanade Danga 88។ទោះជាយ៉ាងនេះក្តី គម្រោង Forest City ត្រូវបានគេប្រៀបធៀបទៅនឹង ទីក្រុងខ្មោច ស្រដៀងទៅនឹងគម្រោងធំៗជាច្រើន ដែលបានជាប់គាំងស្ទើរនៅទូទាំងប្រទេសចិន ។  យោងតាមកាសែតអាមេរិក WSJ បានចុះផ្សាយថា អាផាតម៉ិនភាគច្រើន ក្នុងគម្រោងនេះត្រូវបានទិញទុកសម្រាប់ការវិនិយោគ និងពុំមានមនុស្សរស់នៅទេ។

ជាមួយគ្នានេះ តម្លៃអាផាតម៉ិន នៅក្នុងគម្រោងខ្នាតយក្ស Forest City បានធ្លាក់ចុះយ៉ាងគំហុក ក្នុងរយៈពេលប៉ុន្មានឆ្នាំចុងក្រោយនេះ។ ជាក់ស្តែង អាផាតម៉ិនមួយបន្ទប់ ដែលធ្លាប់ត្រូវបានដាក់លក់ ក្នុងតម្លៃ២៨០ដុល្លារក្នុងមួយហ្វីតការ៉េ ប៉ុន្តែពេលនេះបានធ្លាក់ចុះមកនៅត្រឹម១១៦ដុល្លារ ក្នុងមួយហ្វីតការ៉េ៕AFP៕

 ដោយៈ គង់ សូរិយា

ភ្នំពេញៈ ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា និងជាប្រធានគណៈកម្មការអន្តរក្រសួង លោកស៊ុន ចាន់ថុលបានអញ្ជើញដឹកនាំកិច្ចប្រជុំ គណៈកម្មការអន្តរក្រសួង នៃគម្រោងហេដ្ឋារចនាសម្ព័ន្ធផ្លូវល្បឿនលឿន តភ្ជាប់ពីរាជធានីភ្នំពេញ-ខេត្តសៀម​រាប-ក្រុងប៉ោយប៉ែត។

កិច្ចប្រជុំនេះ ក៏មានការអញ្ជើញចូលរួមពីឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន លោក លោកស្រី ជាសមាជិកគណៈកម្មការអន្តរក្រសួង និងមន្ត្រីពាក់ព័ន្ធជាច្រើនរូប។

កិច្ចប្រជុំនាឱកាសនេះ ត្រូវបានរៀបចំឡើងក្នុងគោលបំណងដើម្បីជំរុញការអនុវត្ត គម្រោងហេដ្ឋារចនាសម្ព័ន្ធផ្លូវល្បឿនលឿន តភ្ជាប់ពីរាជធានីភ្នំពេញ -ខេត្តសៀមរាប- ក្រុងប៉ោយប៉ែត បន្ទាប់ពីបានចុះកិច្ចព្រមព្រៀងក្របខ័ណ្ឌ (Framework Agreement – FA) កាលពីថ្ងៃទី០៧ ខែមិថុនា ឆ្នាំ២០២៣។

បច្ចុប្បន្ន គម្រោងនេះត្រូវបានក្រុមហ៊ុនសាជីវកម្មស្ពាន និងថ្នល់ចិន (CRBC) កំពុងអនុវត្តការសិក្សាបឋមសមិទ្ធិលទ្ធភាព (Preliminary Feasibility Study – PSF) ហើយគ្រោងនឹងបញ្ចប់ការសិក្សាកំណាត់ភ្នំពេញ- សៀមរាបក្នុងខែកុម្ភៈ និងកំណាត់សៀមរាប-ប៉ោយប៉ែត ក្នុងខែឧសភា ឆ្នាំ២០២៤ខាងមុខ។

គម្រោងហេដ្ឋារចនាសម្ព័ន្ធផ្លូវល្បឿនលឿនភ្នំពេញ -សៀមរាប-ប៉ោយប៉ែត គឺជាគម្រោងផ្លូវល្បឿនលឿនទី៣របស់កម្ពុជា បន្ទាប់ពីផ្លូវល្បឿនលឿនទី១ ភ្នំពេញ-ក្រុងព្រះសីហនុ ដែលបានបើកឱ្យដំណើរការរយៈពេលជាង១ឆ្នាំមកហើយ ខណៈដែលគម្រោងផ្លូវល្បឿនលឿនទី២ ភ្នំពេញ-ក្រុងបាវិត បានបើកការដ្ឋានសាងសង់កាលពីថ្ងៃទី៧ ខែមិថុនា ឆ្នាំ២០២៣កន្លងទៅ ហើយបច្ចុប្បន្នកំពុងស្ថិតក្នុងជំហាននៃការអនុវត្តនីតិវិធីជាបន្តបន្ទាប់ ទៅតាមផែនការដែលបានគ្រោងទុក។

ផ្លូវល្បឿនលឿនខ្សែទី៣នេះ មានប្រវែងប្រមាណ៤០០គ.ម ដោយឆ្លងកាត់រាជធានី-ខេត្តចំនួន៦ រួមមាន រាជធានីភ្នំពេញ ខេត្ដកណ្ដាល កំពង់ចាម កំពង់ធំ សៀមរាប និងខេត្តបន្ទាយមានជ័យ៕