ដោយ: គង់ លាងហួរ
អន្តរជាតិ: ទីក្រុងប៉េកាំង និងសៀងហៃបានបន្ធូរបន្ថយការរឹតបន្តឹងការទិញផ្ទះកាលពីថ្ងៃព្រហស្បតិ៍ ទី១៤ ខែធ្នូ តាមរយៈការបន្ថយសមាមាត្រប្រាក់បញ្ញើអប្បបរមាសម្រាប់អ្នកទិញផ្ទះទីមួយ និងទីពីរ ខណៈអាជ្ញាធរចិនស្នើឱ្យមានការខិតខំប្រឹងប្រែងជាថ្មីដើម្បីស្តារទីផ្សារលំនៅដ្ឋាន។

សេដ្ឋកិច្ចចិនបានជួបការលំបាក ក្នុងការស្ទុះងើបឡើងវិញនៅឆ្នាំនេះ ដោយសារតែវិស័យអចលនទ្រព្យដ៏ធំរបស់ចិនបានធ្លាក់ចូលពីវិបត្តិមួយទៅវិបត្តិមួយទៀត ដែលការណ៍នេះជះផលប៉ះពាល់យ៉ាងធ្ងន់ធ្ងរដល់ទំនុកចិត្តអ្នកប្រើប្រាស់ និងវិនិយោគិន។

ទោះបីជាមានវិធានការគាំទ្រជាច្រើនសម្រាប់អ្នកទិញផ្ទះក្នុងរយៈពេលប៉ុន្មានខែថ្មីៗនេះយ៉ាងណាក្តី ក៏ទីផ្សារអចលនទ្រព្យរបស់ប្រទេសចិនពុំបានស្ទុះងើបឡើងវិញឡើយ ស្របពេលដែលការលក់អចលនទ្រព្យ ការវិនិយោគ និងតម្លៃផ្ទះបន្តធ្លាក់ចុះ។

អាជ្ញាធរក្រុងប៉េកាំងបានគូសបញ្ជាក់ឱ្យដឹងនៅក្នុងសេចក្តីថ្លែងការណ៍មួយថា ពួកគេនឹងកាត់បន្ថយសមាមាត្រប្រាក់បញ្ញើអប្បបរមាសម្រាប់អ្នកទិញផ្ទះដំបូង មកនៅត្រឹម៣០ភាគរយ បើធៀបនឹងអត្រាពីមុនចាប់ពី៣៥ ទៅ៤០ភាគរយ។

សេចក្តីថ្លែងការណ៍បានបន្តថា សមាមាត្រប្រាក់បញ្ញើអប្បបរមាសម្រាប់អ្នកទិញផ្ទះទី២ នៅតាមសង្កាត់ទាំង៦ ក្នុងទីក្រុងប៉េកាំង នឹងត្រូវបានបន្ទាបមកនៅត្រឹម៥០ភាគរយ និង៤០ភាគរយសម្រាប់សង្កាត់ខាងក្រៅទីក្រុងប៉េកាំង បើធៀបនឹងអត្រាពីមុនចាប់ពី៦០ទៅ៨០ភាគរយ។

ទន្ទឹមគ្នានេះ ទីក្រុងសៀងហៃបានប្រកាសថា ខ្លួននឹងកាត់បន្ថយសមាមាត្រប្រាក់បញ្ញើអប្បបរមាសម្រាប់អ្នកទិញផ្ទះដំបូងពី៣៥ភាគរយ ចុះមកនៅត្រឹម៣០ភាគរយ ដែលត្រូវអនុវត្តចាប់ពីថ្ងៃទី១៥ ខែធ្នូនេះតទៅ។

ប្រព័ន្ធផ្សព្វផ្សាយរដ្ឋចិនបានរាយការណ៍ថា សមាមាត្រប្រាក់បញ្ញើអប្បបរមាសម្រាប់អ្នកទិញផ្ទះទីពីរនៅក្នុងទីក្រុងសៀងហៃនឹងធ្លាក់ចុះមកនៅត្រឹម៤០ទៅ៥០ភាគរយ បើធៀបនឹងអត្រាពីមុនចាប់ពី៥០ ទៅដល់៧០ភាគរយ។

បន្ថែមពីលើនេះ ក្រុមមេដឹកនាំកំពូលរបស់ប្រទេសចិនបានប្តេជ្ញានៅក្នុងកិច្ចប្រជុំកំណត់របៀបវារៈមួយនៅសប្តាហ៍នេះ ដើម្បីពន្លឿនការបង្កើតគំរូថ្មីនៃការអភិវឌ្ឍន៍អចលនទ្រព្យ និងពន្លឿនការសាងសង់លំនៅដ្ឋានតម្លៃសមរម្យ៕

ដោយ: គង់ លាងហួរ
អន្តរជាតិ: សារព័ត៌មាន The Korea Herald បានរាយការណ៍ថា ក្រុមហ៊ុន Daewoo Engineering and Construction ដែលជាក្រុមហ៊ុនសំណង់ឈានមុខគេមួយរបស់កូរ៉េខាងត្បូងកំពុងស្វែងរកឱកាសអាជីវកម្មនៅកម្ពុជា។

របាយការណ៍នេះបានលើកឡើងពីជំនួបរវាងប្រធានក្រុមហ៊ុន លោក Jung Won-ju និងលោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានពិភាក្សាគ្នាអំពីឱកាសអាជីវកម្មនៅកម្ពុជា។លោក Jung បានថ្លែងក្នុងពេលជួបជាមួយលោករដ្ឋមន្ត្រី ថា“ក្រុមហ៊ុន Daewoo E&C ចង់នាំមុខក្នុងការរួមចំណែកដល់ភាពប្រសើរឡើងរបស់ប្រជាជនកម្ពុជា តាមរយៈការណែនាំចំណេះដឹងផ្នែកសំណង់ដែលក្រុមហ៊ុនបានប្រមូលផ្តុំនៅក្នុងប្រទេសកូរ៉េ និងគម្រោងទីក្រុងថ្មីនានា”។

លោកបន្តថា“ក្រុមហ៊ុន Daewoo E&C ក៏មានឆន្ទៈចូលរួមនៅក្នុងគម្រោងហេដ្ឋារចនាសម្ព័ន្ធខ្នាតធំក្នុងប្រទេសកម្ពុជាផងដែរ”។

លោកឧបនាយករដ្ឋមន្ត្រី សាយ សំអាល់ លើកឡើងថា “ឥឡូវនេះគឺជាពេលវេលាដ៏ត្រឹមត្រូវសម្រាប់ក្រុមហ៊ុន Daewoo E&C) ដើម្បីឈានជើងចូលប្រទេសកម្ពុជា ដោយសារទីផ្សារអចលនទ្រព្យរបស់ប្រទេសកម្ពុជាបាននិងកំពុងងើបឡើងវិញ”។

លោក សាយ សំអាល់ បានបន្ថែមទៀតថា ខ្ញុំសង្ឃឹមថា ក្រុមហ៊ុននានា ដូចជា Daewoo E&C នឹងដឹកនាំទីផ្សារស្របតាមផែនការជំរុញសេដ្ឋកិច្ចរបស់រដ្ឋាភិបាលកម្ពុជា។

នៅកម្ពុជា លោក Jung ក៏បានជួបជាមួយអ្នកឧកញ៉ា ពុង ឃាវសែ ប្រធានធនាគារកាណាឌីយ៉ា ប្រធានក្រុមហ៊ុន WorldBridge International Group លោក សៀ ឫទ្ធី នាយកប្រតិបត្តិក្រុមហ៊ុន Shukaku លោក Lau Yao Zhong និងមន្ត្រីជាន់ខ្ពស់ផ្សេងទៀតមកពីក្រុមហ៊ុនកម្ពុជា ដើម្បីពិភាក្សាអំពីភាពជាដៃគូដែលមានសក្តានុពលរបស់ពួកគេនាពេលអនាគត។

មន្ត្រីមួយរូបមកពីក្រុមហ៊ុន Daewoo E&C បានអះអាងថា “ដំណើរទស្សនកិច្ចអាជីវកម្មថ្មីចុងក្រោយបង្អស់របស់លោក Jung ទៅកាន់បណ្តាប្រទេសនៅតំបន់អាស៊ីអាគ្នេយ៍បានអនុញ្ញាតឱ្យក្រុមហ៊ុនអាចផ្សព្វផ្សាយ និងបង្កើតបណ្តាញថ្មីនៅក្នុងតំបន់”៕

ដោយៈហ្វីអូណា

 ភ្នំពេញៈ រដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា(CDC) សម្រេ​ចអនុម័ត គម្រោងវិនិយោគចំនួន២១គម្រោង ដែលមានទុនវិនិយោគប្រមាណ៦០០លានដុល្លារអាមេរិក ជាមួយឱកាសការងារប្រមាណ២២ពាន់កន្លែង។

កាលពីខែវិច្ឆិកា ឆ្នាំ២០២៣ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មីចំនួន២១គម្រោង ដែលមានទុនវិនិយោគសរុបប្រមា​ណជិត៦១៩លានដុល្លារអាមេរិក និងអាចបង្កើតការងារបានប្រមា​ណជិត២២ពាន់កន្លែង។ជាការកត់សម្គាល់ គម្រោងវិនិយោគដែលមានភាពលេចធ្លោជាងគេប្រចាំខែរួមមាន (១) គម្រោងសាង សង់វារីអគ្គិសនីស្ទឹងឫស្សីជ្រុំកណ្តាល អានុភាព៧០មេហ្គាវ៉ាត់ នៅស្រុកមណ្ឌលសីមា ខេត្តកោះកុង និងគម្រោង សាងសង់វារីអគ្គិសនីវាលថ្មកំបុត អានុភាព ១០០មេហ្គាវ៉ាត់ នៅស្រុកថ្មបាំង ខេត្តកោះកុង (២) គម្រោង វិនិយោគអភិវឌ្ឍន៍ស្ថានីយ៍ផលិតអគ្គិសនី ដើរដោយថាមពលពន្លឺព្រះអាទិត្យ អានុភាព៦០មេហ្គាវ៉ាត់ នៅស្រុក រំដួល ខេត្តស្វាយរៀង និង (៣) គម្រោងបង្កើតរោងចក្រផលិតស្បែកជើង និងគ្រឿងបន្សំស្បែកជើង នៅខណ្ឌ ពោធិ៍សែនជ័យ រាជធានីភ្នំពេញ៕

ដោយៈ ហ្វីអូណា

ភ្នំពេញៈ មន្រ្តីជាន់ខ្ពស់ទីក្រុងប៉េកាំង បានសន្យានឹងអំពាវនាវឲ្យក្រុមហ៊ុនវិនិយោគរបស់ចិន ស្វែងរកឱកាសវិនិយោគនៅកម្ពុជា ពិសេសខេត្តកំពង់ស្ពឺ កាន់តែច្រើនឡើង។

ព័ត៌មាននេះ ត្រូវបានលើកឡើងដោយលោកលូ យៀន អនុប្រ​ធានសភាពិគ្រោះយោបល់នយោបាយទី ក្រុងប៉េកាំង នៃសាធារណរដ្ឋប្រជាមានិតចិន ក្នុងឱកាសជួបជាមួយលោកវ៉ី សំណាងអភិបាលខេត្តកំពង់ស្ពឺ បន្ទាប់ពីលោកបានអញ្ជើញមកទស្សនកិច្ច សិក្សាស្វែងយល់អំពីសក្តានុពលរបស់ខេត្តកំពង់ស្ពឺ។

ក្នុងកិច្ចជំនួបកាលពីថ្ងៃទី១៣ ធ្នូ ឆ្នាំ២០២៣ លោក វ៉ី សំណាង បានលើកអំពីសក្តានុពលរបស់ខេត្តថា “ខេត្តកំពង់ស្ពឺយើងគឺជាតំបន់ដែលសក្ដានុពលលើវិស័យកសិកម្ម កសិឧស្សាកម្មទេសចរណ៍ និងវារីវប្បកម្ម ជាពិសេសមានផ្នែកកាត់ដេរសម្លៀកបំពាក់ កាបូប ស្បែក​ជើងសម្រាប់នាំចេញដែរ”។អភិបាលខេត្តបានបន្តថា បច្ចុប្បន្ននេះខេត្តកំពង់ស្ពឺ យើងចង់បានការវិនិយោគ ពីសាធារណៈរដ្ឋប្រជាមានិតចិន លើវិស័យកសិកម្ម កសិឧស្សាកម្មទេសចរណ៍ ហើយនិងវារីវប្បកម្ម ដែលជាតម្រូវការចាំបាច់របស់បងប្អូន ប្រជាពលរដ្ឋរស់នៅផ្ទាល់ក្នុងខេត្ត។

លោក លូ យៀន អនុប្រធានសភាពិគ្រោះយោបល់នយោបាយទីក្រុងប៉េកាំង នៃសាធារណរដ្ឋប្រជាមានិតចិន បានថ្លែងថា លោកនឹងខិតខំជំរុញអ្នកវិនិយោគប្រទេស នៃសាធារណៈរដ្ឋប្រជាមានិតចិន គេមកសិក្សាអំពីសក្ដានុពល ទាក់ទងនឹងវិស័យមួយចំនួនខាងលើ។លោក យៀន បានបញ្ជាក់ថា ក្រោយវិលត្រឡប់ទៅវិញ និងអំពាវនាវឲ្យក្រុមហ៊ុនវិនិយោគរបស់ចិន ត្រូវខិតខំស្វែងរកឱកាសវិនិយោគទៅលើវិស័យ កសិកម្ម កសិឧស្សាហកម្ម ឧស្សាហកម្ម វារីវប្បកម្ម និងវិស័យទេសចរណ៍នៅក្នុងខេត្តកំពង់ស្ពឺ ឱ្យបានច្រើនតាមដែលអាចធ្វើទៅបាន៕

ដោយៈ គង់ ម៉ាលីនណា

 ភ្នំពេញៈ រាជរដ្ឋាភិបាលកម្ពុជា នៅថ្ងៃទី១៣ ខែធ្នូ ឆ្នាំ២០២៣កន្លងមកនេះ បានចេញសេចក្តីជូនដំណឹងស្តីពី ការដាក់ឲ្យប្រើប្រាស់ ប្រព័ន្ធអេឡិចត្រូនិកសលាកបត្រចូលកម្ពុជា។

សេចក្ដីជូនដំណឹង បានឲ្យដឹងថា រាជរដ្ឋាភិបាលកម្ពុជា បានឯកភាពជាគោលការណ៍ ឲ្យអនុវត្តសាកល្បង ប្រព័ន្ធអេឡិចត្រូនិកសលា​កបត្រ ចូលមកកម្ពុជាមុនពេលមកដល់ ដើម្បីបង្កលក្ខណៈងាយស្រួល ដល់អ្នកដំណើរជាជនបរទេស និងពលរដ្ឋខ្មែរ ក្នុងការបំពេញបែបបទអន្តោប្រវេសន៍បែបបទគយ និងបែបបទសុខភាព ក្នុងទម្រង់តែមួយ។អនុវត្តតាមគោលការណ៍ របស់រាជរដ្ឋាភិបាលខាងលើនេះ ក្រ​សួងមហាផ្ទៃ នឹងដាក់ឲ្យប្រើប្រាស់ប្រព័ន្ធ អេឡិចត្រូនិកសលាកបត្រចូលព្រះរាជាណាចក្រកម្ពុជា មុនពេលមកដល់ ហៅជាភាសាអង់​គ្លេស Cambodiae-Arrival Card នៅតាមអាកាសយានដ្ឋានអន្តរជាតិនៃព្រះរាជាណាចក្រកម្ពុជា ដោយកំណត់តំណភ្ជាប់ចូល ទៅកាន់គេហទំព័រ www.arrival.gov.kh ឬ កម្មវិធី Cambodia e-Arrival (CeA) ដែលមាននៅក្នុង App Store និង Play Store នៅលើទូរសព្ទដៃ ឬឧបករណ៍អេឡិចត្រូនិកផ្សេងទៀត ដោយចាប់ផ្តើមអនុវត្តសាកល្បងចាប់ពី ថ្ងៃទី១ ខែមករា ដល់ថ្ងៃទី៣០ ខែមិថុនា ឆ្នាំ២០២៤។

ក្នុងដំណាក់កាលអនុវត្តសាកល្បងនេះ អ្នកដំណើរអាចមានជម្រើសក្នុងការបំពេញព័ត៌មាន តាមទម្រង់ជាអេឡិចត្រូនិក ឬ បំពេញព័ត៌មាន ក្នុងសលាកបត្រអន្តោប្រវេសន៍ ប្រកាសព័ត៌មានគយ និងសុខាភិបាល តាមទម្រង់ជាក្រដាសក៏បាន។

ការអនុវត្តជាផ្លូវការ នឹងចាប់ផ្តើមពីថ្ងៃទី១ ខែកក្កដា ឆ្នាំ២០២៤ តទៅ ដោយតម្រូវឲ្យអ្នកដំណើរទាំងអស់ ត្រូវតែបំពេញព័ត៌មាននៅក្នុងទម្រង់អេឡិចត្រូនិក ដូចបានកំណត់ខាងលើ៕

ដោយ: គង់ លាងហួរ
ប៉េកាំង: ទីភ្នាក់ងារសារពត៌មាន Xinhua រាយការណ៍ថា ប្រទេ​សចិនត្រូវបានគេព្យាករណ៍ថា នឹងបើកសម្ពោធផ្សារទំនើបថ្មីប្រហែល៤០០ នៅក្នុងឆ្នាំ២០២៣នេះ។ នេះបើយោងតាមរបាយការណ៍ចេញផ្សាយកាលពីពេលថ្មីៗនេះ។

ក្នុងអំឡុងឆមាសទីមួយនៃឆ្នាំនេះ បរិមាណអតិថិជនជាមធ្យមប្រចាំថ្ងៃ នៅក្នុងផ្សារទំនើបទូទាំងប្រទេស បានកើនឡើងដល់១៨.៥០០នាក់ ពោលគឺកើនឡើងជាង៣០ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍ដែលចេញផ្សាយដោយសមាគម China Chain Store & Franchise Association ។

របាយការណ៍ខាងលើបានបន្តថា គិតត្រឹមដំណាច់ឆ្នាំ២០២២ ប្រទេសចិន មានផ្សារទំនើបប្រមាណ៦.៧០០ ដែលផ្សារទំនើបនីមួយៗ មានផ្ទៃក្រឡលើសពី៣០.០០០ម៉ែត្រការ៉េ។

របាយការណ៍ដដែលបានកត់សម្គាល់ថា ទីផ្សារអ្នកប្រើប្រាស់ក្នុងប្រទេសចិន បានបង្ហាញពីភាពចម្រុះកាន់តែច្រើនឡើង ដោយទម្លាប់របស់អ្នកប្រើប្រាស់ បានវិវត្តទៅជាលំនាំចម្រុះកាន់តែច្រើន និងលំនាំ ដែលត្រូវបានប្តូរទៅតាមតម្រូវការរបស់អតិថិជន។

ក្រុមអ្នកជំនាញបានអះអាងថា ការបើកផ្សារទំនើបថ្មីនៅទីក្រុងសៀងហៃ នឹងមានការរីកដុះដាលយ៉ាងខ្លាំងនៅឆ្នាំនេះ ដែលបង្ហាញពីការងើបឡើងវិញនៃទីផ្សារដ៏រឹងមាំ និងទំនុកចិត្តក្នុងការប្រើប្រាស់។

យោងតាមរបាយការណ៍ ដែលចេញដោយក្រុមប្រឹក្សា Shanghai Council of Shopping Centers បានឱ្យដឹងថា ផ្សារទំនើបចំនួន៤៥ ដែលមានផ្ទៃក្រឡាជាង៣លានម៉ែត្រការ៉េ នឹងត្រូវបានបើកដំណើរការ នៅក្នុងទីក្រុងសៀងហៃ ពេញមួយឆ្នាំ២០២៣នេះ។

លោក Huang Zhen ប្រធានផ្នែកលក់រាយសម្រាប់ក្រុមហ៊ុនផ្តល់សេវាអចលនវត្ថុ JLL East China បានអះអាងថា ដោយសារជីវិតប្រចាំថ្ងៃ និងអាជីវកម្ម កំពុងវិលទៅរកភាពប្រក្រតី នោះការជួលតូបនៅតាមផ្សារទំនើប ទំនងជានឹងអាចកើនឡើងនៅឆ្នាំនេះ៕

ដោយៈ គង់ សូរិយា

        បាត់ដំបងៈ អភិបាលនៃគណៈអភិបាលខេត្តបាត់ដំបង លោកសុខ លូ អញ្ជើញដឹកនាំកិច្ចប្រជុំជាមួយក្រុមការងារ ត្រៀមរៀបចំពិពរណ៍ម្ហូបអាហារ និងកម្មវិធីឆ្លងឆ្នាំសកលឆ្នាំ២០២៤ នាពេលខាងមុខនេះ។

កិច្ចប្រជុំដែលបានប្រារពធ្វើកាលពីថ្ងៃទី១២ ខែធ្នូ ឆ្នាំ២០២៣ បានលើកឡើងពីការត្រៀមរៀបចំពិពរណ៍ម្ហូបអាហារ និងកម្មវិធីឆ្លងឆ្នាំសកលឆ្នាំ២០២៤ នាពេលខាងមុខនេះ នៅឯសាលប្រជុំអគារE សាលាខេត្តបាត់ដំបង ។លោកសុខ លូ បានមានប្រសាសន៍លើកឡើងថា ពិធីបុណ្យម្ហូបអាហារប្រពៃណីនេះ គឺត្រូវធ្វើយ៉ាងណារៀបចំឲ្យបានល្អ ព្រោះវាជាចំណុចទាក់ទាញមួយ ដែលអាចទាក់ទាញភ្ញៀវជាតិ និងអន្តរជាតិឲ្យចូលមកទស្សនា បានភ្លក់នូវរសជាតិរបស់ម្ហូបអាហារ ក្រោមស្នាដៃរបស់អ្នកខេត្តបាត់ដំបង ព្រមទាំងផ្ដល់ឱកាសដល់អាជីវករលក់នូវម្ហូបអាហារប្រចាំខ្លួន ដល់ភ្ញៀវជាតិ និងអន្តរជាតិបានស្គាល់ កាន់តែទូលំទូលាយបន្ថែមទៀត។លោកបន្តមានប្រសាសន៍ថា ចំពោះការរៀបចំស្តង់ម្ហូបអាហារនេះ គឺត្រូវរៀបចំចាប់ចេញពីមុខសាលា ខេត្តបាត់ដំបង ឆ្ពោះទៅកាន់វិមានឯករាជ្យ ហើយការរៀបចំនេះ ធ្វើយ៉ាងណាឲ្យមានលក្ខណៈ ស្រស់ស្អាត មានរបៀបរៀបរយ ដើម្បីងាយស្រួលឱ្យភ្ញៀវទេសចរណ ងាយស្រួលក្នុងការដើរទស្សនា និងជាវម្ហូបអាហារនោះយកទៅពិសាផងដែរ។លោកសុខ លូបានបន្តទៀតថា នៅក្នុងពិធីបុណ្យម្ហូបអាហារនេះមិនមែនមានតែតាំង លក់នូវមុខម្ហូបអាហារតែប៉ុណ្ណោះនោះទេ ក៏មានការដាក់តាំងនូវផលិតផលរបស់ខ្មែរផងដែរ ក្រោមប្រធានបទភូមិមួយផលិតផលមួយ ហើយអនុញ្ញាតឲ្យប្រជាជននៅតាមភូមិ ឃុំ ស្រុក អាចយកស្នាដៃផលិតផលរបស់ខ្លួន មកដាក់តាំងបង្ហាញ ដើម្បីលើកតម្កើងខេត្តបាត់ដំបងយើង ឲ្យមានមុខមាត់ បង្ហាញនូវសក្ដានុពលរបស់ខេត្តបាត់ដំបង។លោកបានលើកទឹកចិត្ត ដល់បងប្អូន ដែលរស់នៅក្នុងភូមិ ស្រុក ឃុំសង្កាត់ ក្រុង នៃខេត្តបាត់ដំបង អញ្ជើញចូលរួមឲ្យបានច្រើនកុះករក្នុងការបង្ហាញនូវមុខម្ហូប ប្រចាំតំបន់ភូមិសាស្ត្ររបស់ខ្លួន ដើម្បីបង្ហា​ញឲ្យបងប្អូនប្រជាពលរដ្ឋ នៅតាមតំបន់ផ្សេងៗនៅក្នុងខេត្តបាត់ដំបងក៏ដូចជាភ្ញៀវទេសចរ ដែលបានមកលេងកម្សាន្ត នៅក្នុងខេត្តបាត់ដំបងបានស្គាល់រសជាតិ៕