ក្រុមហ៊ុន ប៉េង ហួត គ្រុប នឹងរៀបចំកម្មវិធីសន្និសីទចែករំលែកចំណេះដឹងអំពីសុខភាពបញ្ញាស្មារតីរបស់កុមារ ក្រោមប្រធានបទ “ការរួមចំណែកជាវិជ្ជមានរបស់ឪពុកម្តាយចំពោះការលូតលាស់ផ្នែកបញ្ញាស្មារតីរបស់កូន” ក្នុងគោលបំណងដើម្បីចូលរួមលើកកម្ពស់ការយល់ដឹងអំពីបញ្ហាប្រឈមទៅលើការលូតលាស់ផ្នែកបញ្ញាស្មារតីរបស់កុមារ។

សន្និសីទដ៏មានសារៈសំខាន់នេះនឹងប្រព្រឹត្តឡើង នារសៀលថ្ងៃទី០២ ខែធ្នូ ឆ្នាំ២០២៣ ស្ថិតនៅទីតាំងអគារសាលសន្និបាត និងប្រារព្ធពិធីមង្គលការ ភីអេច ហ្រេ្គនហល (PH Grand Hall) ក្នុងគម្រោងបុរី ប៉េង ហួត ហ្គ្រេនស្តាផ្លាទីនីម (បឹងស្នោ) ខណ្ឌច្បារអំពៅ រាជធានីភ្នំពេញ ដែលមានវត្តមានចូលរួមពីវាគ្មិនជំនាញមានបទពិសោធន៍ជាច្រើនឆ្នាំ ជាមួយឯកទេសខាងផ្នែកចិត្តសាស្រ្តនិងការលូតលាស់ផ្នែកបញ្ញាសា្មរតីរបស់កុមារ រួមទាំងបញ្ហាប្រឈមមួយចំនួនទៀតដូចជាអូទីហ្សឹម (Autism) ជាដើម។ ​

រួសរាន់ឡើងកន្លែងមានកំណត់! សូមធ្វើការចុះឈ្មោះលើតំណលីង៖ https://bit.ly/PHCon23 ចាប់ពីថ្ងៃនេះ រហូតដល់ថ្ងៃច័ន្ទ ទី២៧ ខែវិច្ឆិកា ឆ្នាំ២០២៣ និងសូមរក្សា QR កូដ ដើម្បីបង្ហាញនៅថ្ងៃចូលរួមកម្មវិធី។

ក្រុមហ៊ុន ប៉េង ហួត គ្រុប តែងតែរៀបចំកម្មវិធីសន្និសីទប្រចាំឆ្នាំ ដើម្បីចែករំលែកចំណេះដឹង និងបទពិសោធន៍ផ្សេងៗ​ទៅកាន់សាធារណជន ដែលនេះជាចំណែកមួយនៃកិច្ចការសង្គម ស្របតាមបង្គោលទាំង៣ របស់ខ្លួនពោលគឺ៖ ការអប់រំ បរិស្ថាន និងកិច្ចការសង្គម៕

        ដោយៈ ហ្វីអូណា

        សៀមរាបៈ សមាគមជំរុញឧស្សាហកម្មវប្បធម៌ និងទេសចរណ៍កម្ពុជា-ចិន និងសមាគមទីភ្នាក់ងារទេសចរណ៍ Changsha ប្រទេសចិន បានចុះហត្ថលេខាលើកិច្ចព្រមព្រៀង សហប្រតិបត្តិការក្របខណ្ឌមួយនៅខេត្តសៀមរាប ប្រទេសកម្ពុជា។

លោកស្រី Wu Guiying លេខាធិការគណៈកម្មាធិការបក្សក្រុង Changsha បានដឹកនាំគណៈប្រតិភូ ទៅទស្សនាខេត្តសៀមរាប និងផ្សព្វផ្សាយទេសចរណ៍ Changsha នៅក្នុងពិធីចុះហត្ថលេខាលើកិច្ចព្រមព្រៀងនៅសណ្ឋាគារSofitel សៀមរាប ដែលជាការចាប់ផ្តើមដំបូងបង្អស់ ក្នុងការពង្រីកទីផ្សារទេសចរណ៍ ក្រៅប្រទេសរបស់ Changsha ក្រោយការរីករាលដាលនៃជំងឺកូវីដ១៩។

ពិធីនេះបានធ្វើឡើងកាលពីចុងសប្តាហ៍មុន ដោយមានការចូលរួមពីលោក ប្រាក់ ផាន់ណារ៉ា រដ្ឋលេខាធិការក្រសួងទេសចរណ៍កម្ពុជា, លោកយុន លីនណេ អភិបាលរងខេត្តសៀមរាប លោក Liu Zhijie ប្រធានការិយាល័យកុងស៊ុលខេត្តសៀមរាប នៃស្ថានទូតចិនប្រចាំកម្ពុជា លោក Wu Guanghua ប្រធានសមាគមពាណិជ្ជកម្មខេត្ត Hunan នៅកម្ពុជា លោក Wu Changda អនុប្រធានសាខាខេត្តព្រះសីហនុនៃសមាគមសហគ្រិនវ័យក្មេងកម្ពុជា និងលោក Cui Hanyu នាយកប្រតិបត្តិនៃក្រុមហ៊ុនទេសចរណ៍អន្តរជាតិ Zhiyuan នៅកម្ពុជា និងថ្នាក់ដឹកនាំវិស័យទេសចរណ៍ផ្សេងទៀត បានអញ្ជើញចូលរួមក្នុងពិធីចុះហត្ថលេខានេះ។

តាមរយៈការចុះហត្ថលេខានេះ វានឹងជំរុញឱ្យមានការផ្លាស់ប្តូរ និងកិច្ចសហប្រតិបត្តិការ ក្នុងវិស័យទេសចរណ៍ទ្វេរភាគី ប្រកបដោយប្រសិទ្ធភាព ព្រមទាំងបង្កើតលក្ខខណ្ឌដ៏ល្អ សម្រាប់ជំរុញភ្ញៀវទេសចរខេត្ត Hunan កាន់តែច្រើនឱ្យធ្វើដំណើរមកកម្ពុជា ទន្ទឹមនឹងនោះ វាក៏នឹងបង្កើតឱកាសថ្មីសន្លាង សម្រាប់កិច្ចសហប្រតិបត្តិការពហុចំណុចក្នុងឧស្សាហកម្មទេសចរណ៍រវាងកម្ពុជា និងចិន។

លោក ប្រាក់ ផាន់ណារ៉ា បានសម្តែងនូវក្តីរំពឹងទុកចំពោះទស្សនវិស័យនៃកិច្ចសហប្រតិបត្តិការរវាងកម្ពុជា និងចិនលើវិស័យទេស​ចរណ៍ និងបានផ្តល់នូវការរំពឹងទុក និងការវាយតម្លៃវិជ្ជមានចំពោះលទ្ធផលជាផ្លែផ្កា ដ៏ធំធេងដែលប្រសូត្រចេញ ពីកិច្ចសហប្រតិបត្តិការទ្វេរភាគីនាពេលអនាគត។

លោកបានថ្លែងថា “ប្រទេសចិនគឺជាប្រភពទេសចរណ៍ដ៏ធំបំផុតរបស់កម្ពុជា អស់រយៈពេលជាច្រើនឆ្នាំមកហើយ ការពង្រឹងកិច្ចសហប្រតិបត្តិការជាក់ស្តែង ក្នុងវិស័យទេសចរណ៍ជាមួយតំបន់ផ្សេងៗ នៃប្រទេសចិន គឺជាកិច្ចការដែលក្រសួងទេសចរណ៍កម្ពុជា យកចិត្តទុកដាក់យ៉ាងខ្លាំង”។

ចំណែកលោកស្រី Wu Guiying បានគូសបញ្ជាក់នៅក្នុងវេទិកាផ្សព្វផ្សាយថា វេទិកាផ្សព្វផ្សាយនេះ គឺជាព្រឹត្តិការណ៍ដ៏សំខាន់មួយក្នុងកិច្ចសហប្រតិបត្តិការ ក្រៅស្រុកនៃឧស្សាហកម្មទេសចរណ៍ Changsha តាមរយៈការផ្សព្វផ្សាយ និងផ្លាស់ប្តូរនេះ វានឹងជំរុញទំនាក់ទំនងឧស្សាហកម្ម ទស្សនកិច្ចទៅវិញទៅមក និងកិច្ចសហប្រតិបត្តិការរវាងទីក្រុង Changsha និងប្រទេសកម្ពុជា ហើយជំរុញនិងលើកទឹកចិត្តដល់ភ្ញៀវទេសចរ Changsha កាន់តែច្រើនមកកាន់ប្រទេសកម្ពុជា ដើម្បីស្វែងយល់ពីភាពទាក់ទាញ នៃវប្បធម៌ល្អឯករបស់ប្រទេសកម្ពុជា។

យោងតាមកិច្ចព្រមព្រៀងសហប្រតិបត្តិការ ក្របខណ្ឌដែលបានចុះហត្ថលេខា រវាងសមាគមជំរុញឧស្សាហកម្មវប្បធម៌ និងទេស​ចរណ៍កម្ពុជា-ចិន ជាមួយសមាគមទីភ្នាក់ងារទេសចរណ៍ Changsha ភាគីទាំងពីរនឹងរួមគ្នាជំរុញ កិច្ចសហប្រតិបត្តិការលើការចែករំលែកធនធានទេសចរណ៍ ការច្នៃប្រឌិតផលិតផលទេសចរណ៍ ការលើកកម្ពស់ភ្ញៀវទេសចរទៅវិញទៅមក ការបណ្តុះបណ្តាលធនធានមនុស្ស និងប្រតិបត្តិការទីផ្សារ។

កិច្ចព្រមព្រៀងនេះគឺមានសារសំខាន់ យ៉ាងទូលំទូលាយសម្រាប់ការជំរុញការផ្លាស់ប្តូរ និងកិច្ចសហប្រតិបត្តិការក្នុងវិស័យទេសចរណ៍រវាងទីក្រុង Changsha និងកម្ពុជា។ វាមិនត្រឹមតែបង្ហាញពីការធ្វើឱ្យស៊ីជម្រៅបន្ថែមទៀត នៃកិច្ចសហប្រតិបត្តិការរវាងភាគីទាំងពីរ នៅក្នុងឧស្សាហកម្មទេសចរណ៍ប៉ុណ្ណោះទេ ប៉ុន្តែថែមទាំងផ្តល់នូវវេទិកាទំនាក់ទំនង និងបណ្តាញកិច្ចសហប្រតិបត្តិការ សម្រាប់អ្នកប្រកបរបរទេសចរណ៍នៃតំបន់ទាំងពីរផងដែរ៕

ដោយ: គង់ លាងហួរ
ភ្នំពេញ: សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងនៅថ្ងៃច័ន្ទនេះថា ផ្លូវល្បឿនលឿនភ្នំពេញ-ក្រុងព្រះសីហនុ បានក្លាយជាសរសៃឈាមសេដ្ឋកិច្ចថ្មីមួយ ដែលជួយជំរុញវិស័យទេសចរណ៍ និងកំណើនសេដ្ឋកិច្ចនៅកម្ពុជា។

ក្នុងសារអបអរសាទរខួបលើកទី១នៃការដាក់ឱ្យប្រើប្រាស់ផ្លូវល្បឿនលឿនភ្នំពេញ-ព្រះសីហនុ ដែលជាផ្លូវល្បឿនលឿនដំបូងគេបង្អស់នៅកម្ពុជា សម្តេចធិបតី ហ៊ុន ម៉ាណែត បានគូសបញ្ជាក់ថា “ផ្លូវល្បឿនលឿននេះទទួលបានការកោតសរសើរពីអ្នកដំណើរចំពោះការសន្សំសំចៃពេលវេលា ភាពងាយស្រួល និងសុវត្ថិភាព”។សម្តេចបានមានប្រសាសន៍ឱ្យដឹងថា “ផ្លូវល្បឿនលឿននេះបាននឹងកំពុងដើរតួនាទីយ៉ាងសំខាន់ក្នុងការលើកកម្ពស់ប្រសិទ្ធភាពនៃការធ្វើដំណើររបស់ប្រជាពលរដ្ឋ ដោយជួយបញ្ចៀសការកកស្ទះចរាចរណ៍ និងកាត់បន្ថយរយៈពេលធ្វើដំណើរមកនៅត្រឹមតែប្រហែល២ម៉ោងប៉ុណ្ណោះ”។

សម្តេចបានបន្តថា ជាមួយនឹងផ្លូវល្បឿនលឿននេះ ប្រជាពលរដ្ឋរីករាយនឹងការធ្វើដំណើរពីភ្នំពេញទៅកាន់កំពង់ផែក្រុងព្រះសីហនុនៅពេលព្រឹក ហើយត្រឡប់មករាជធានីភ្នំពេញវិញនៅពេលល្ងាច។

សម្តេចធិបតី ហ៊ុន ម៉ាណែត បានមានប្រសាសន៍ទៀតថា “លើសពីនេះ ផ្លូវល្បឿនលឿនមិនត្រឹមតែផ្តល់ភាពងាយស្រួល និងកាត់បន្ថយពេលវេលាធ្វើដំណើរប៉ុណ្ណោះទេ ប៉ុន្តែថែមទាំងក្លាយជាសរសៃឈាមសេដ្ឋកិច្ចថ្មីមួយ ដើម្បីបម្រើដល់ការដឹកជញ្ជូន និងការតភ្ជាប់ផងដែរ”។សម្តេចបានលើកឡើងថា ផ្លូវល្បឿនលឿននេះបានតភ្ជាប់ប៉ូលសេដ្ឋកិច្ចទី១ នៃរាជធានីភ្នំពេញ ទៅនឹងប៉ូលសេដ្ឋកិច្ចទី២ នៃក្រុងព្រះសីហនុ ដែលកំពុងត្រូវបានអភិវឌ្ឍទៅជា “តំបន់សេដ្ឋកិច្ចពិសេសពហុបំណងគំរូ”។

សម្តេចបានមានប្រសាសន៍បន្តថា ផ្លូវល្បឿនលឿនភ្នំពេញ-ក្រុងព្រះសីហនុ គឺជាគម្រោងដ៏សំខាន់មួយ ដែលស្ថិតក្រោមគំនិតផ្តួចផ្តើមខ្សែក្រវ៉ាត់ និងផ្លូវ (BRI) របស់ប្រទេសចិន។សម្តេចអះអាងថា “ការវិនិយោគរបស់ក្រុមហ៊ុនចិន ក្នុងការអភិវឌ្ឍន៍ផ្លូវល្បឿនលឿន បានបង្ហាញពីអត្ថប្រយោជន៍ជាក់ស្តែង ដែលកម្ពុជាទទួលបានពី BRI និងកិច្ចសហប្រតិបត្តិការមិត្តភាពដែកថែបដែលមានតម្លៃមិនអាចកាត់ថ្លៃបានរវាងកម្ពុជា និងចិន”។

សម្តេចបានបន្ថែមថា ផ្លូវល្បឿនលឿននេះបានជួយកែលម្អប្រព័ន្ធហេដ្ឋារចនាសម្ព័ន្ធដឹកជញ្ជូន ជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្រនៅកម្ពុជា៕

ដោយៈ តែម សុខុម

ម៉ាកាវៈ ទីក្រុងម៉ាកាវ ទទួលបានភ្ញៀវទេសចរជាង២២,៧២លាននាក់ ក្នុងរយៈពេល១០ខែដើមឆ្នាំ២០២៣ ឬជាមធ្យមទទួលបានភ្ញៀវទេសចរចំនួន៧៥.០០០នាក់ក្នុងមួយថ្ងៃ។

យោងតាមសារព័ត៌មាន GGRAsia ចុះផ្សាយកាលពីថ្ងៃសុក្រសប្ដាហ៍មុន ឱ្យដឹងថា ចំនួនសរុបនៃភ្ញៀវទេសចរ ដែលទីក្រុងម៉ាកាវ ទទួលបាន ក្នុងរយៈពេល១០ខែនេះ បង្ហាញពី “ការងើបឡើងវិញ៦៨%” បើធៀបនឹងរយៈពេលដូចគ្នា ក្មុងឆ្នាំ២០១៩ ដែលមិនទាន់ផ្ទុះវិបត្តិកូវីដ-១៩។លោកស្រី Maria Helena de Senna Fernandes នាយការិយាល័យទេសចរណ៍ នៃរដ្ឋបាលក្រុងម៉ាកាវ (MGTO) បានចាត់ទុកការងើបឡើងវិញនេះ “គួរឱ្យពេញចិត្ត”។

ទោះជាយ៉ាងណា ស្ថិតិផ្លូវការសម្រាប់ខែតុលា មិនទាន់ត្រូវបានចេញផ្សាយនៅឡើយទេ។ទិន្នន័យបណ្ដោះអាសន្ន ដែលលោកស្រី Maria Helena de Senna Fernandes បានបង្ហាញថា ចំនួនភ្ញៀវទេសចរសរុបអាចស្ថិតក្នុងរង្វង់២៧លាននាក់។

ទីក្រុងម៉ាកាវ ទើបតែបានកត់ត្រាចំនួនភ្ញៀវទេសចរណ៍អន្តរជាតិ១៩,៩៣លាននាក់ ដែលខ្លួនទទួលបានក្នុងរយៈពេល៩ខែ ដើមឆ្នាំ២០២៣៕ GGRAsia៕

ដោយៈ គង់ ហ្វីអួណា

        ភ្នំពេញៈ សម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានស្នើឲ្យក្រសួងស្ថាប័នពាក់ព័ន្ឋ ណែនាំ និងចលនាប្រជាជនឲ្យចេះចិញ្ចឹមសត្វ និងដាំដុះបន្លែបង្ការ ដើម្បីលើកកំពស់ជីវភាពរបស់ពួកគាត់។

សម្តេចបានថ្លែងបែបនេះ នៅក្នុងឱកាសដ៏ប្រពៃនៃការប្រារព្ធ ទិវាជាតិអាហារូបត្ថម្ភលើកទី១០ ក្រោមប្រធានបទ “ការពង្រឹង ប្រព័ន្ធស្បៀងក្នុងបរិបទនៃការប្រែប្រួលអាកាសធាតុ” សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំដល់ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ត្រូវបន្តសម្របសម្រួលជាមួយក្រសួង ស្ថាប័ន ពាក់ព័ន្ធ រដ្ឋបាលថ្នាក់ក្រោមជាតិ ដៃគូអភិវឌ្ឍ អង្គការសង្គមស៊ីវិល វិស័យឯកជន និងតួអង្គពាក់ព័ន្ធដទៃទៀត អនុវត្ត ផែនទីបង្ហាញផ្លូវស្តីពីប្រព័ន្ធស្បៀង សម្រាប់ការអភិវឌ្ឍប្រកបដោយចីរភាពនៅកម្ពុជា ឆ្នាំ២០៣០ និងរៀបចំ យុទ្ធសាស្ត្រជាតិស្តីពីសន្តិសុខស្បៀងនិងអាហារូបត្ថម្ភលើកទី៣ ឆ្នាំ២០២៤-២០២៨ ដើម្បីចូលរួមចំណែកអនុវត្ត យុទ្ធសាស្ត្របញ្ចកោណ ដំណាក់កាលទី១ ឱ្យទទួលបានជោគជ័យ ពិសេសបញ្ចកោណទី១ មុំទី៤ ការពង្រឹង ប្រព័ន្ធគាំពារសង្គម និងប្រព័ន្ធស្បៀង។

ជាមួយគ្នានេះ សម្តេចមហាបវរធិបតី ហ៊ុន ម៉ាណែត ជំរុញឲ្យក្រសួងព័ត៌មាន ត្រូវណែនាំដល់ប្រព័ន្ធផ្សព្វផ្សាយជាតិ និងឯកជន អ្នកប្រើប្រាស់បណ្ដាញសង្គម ចូលរួមជួយផលិតកម្មវិធី រឿងអប់រំខ្លីៗ និងចម្រៀងដែលទាក់ទងនឹងប្រធានបទ ប្រព័ន្ធស្បៀង អាហារូបត្ថម្ភ និងការប្រែប្រួលអាកាសធាតុ ដើម្បីផ្សព្វផ្សាយឱ្យបានទូលំទូលាយដល់សាធារណជន។

ចំណែកក្រសួងកសិកម្ម រុក្ខាប្រមាញ់ និងនេសាទ ត្រូវបន្តពង្រឹង និងពង្រីកការស្រាវជ្រាវ និងផ្សព្វផ្សាយ ការប្រើប្រាស់បច្ចេកវិទ្យាថ្មីៗ គ្រាប់ពូជដំណាំ និងពូជសត្វដែលមានភាពធន់ ទៅនឹងការប្រែប្រួលអាកាសធាតុ និង ផ្តោតលើការធ្វើពិពិធកម្មកសិកម្ម ផលិតកម្មស្បៀងអាហារដែលសម្បូរសារជាតិចិញ្ចឹម និងការពារផលិតផល ស្បៀងអាហារដែលកើតចេញពីធម្មជាតិ ដើម្បីលើកកម្ពស់សន្តិសុខស្បៀងនិងអាហារូបត្ថម្ភរបស់ប្រជាជន។

ទន្ទឹមនឹងនេះ ក្រសួងបរិស្ថាន ត្រូវបន្តអនុវត្តន៍ និងសម្របសម្រួ​ល​ជាមួយក្រសួងស្ថាប័នពាក់ព័ន្ធ ក្នុងការលើកកម្ពស់ជីវភាព និងបង្កើនអាហារូបត្ថម្ភ ប្រជាសហគមន៍មូលដ្ឋាន តាមរយៈ”អភិរក្ស និងគ្រប់គ្រងតំបន់ការពារធម្មជាតិ ប្រកបដោយចីរភាព និងអភិវឌ្ឍគាំទ្រសហគមន៍អេកូទេសចរណ៍” ដោយរៀបចំឱ្យមានសហគមន៍អេកូទេស​​ចរណ៍ ផ្តល់សេវាល្អ ចងក្រងរបៀងសហគមន៍អេកូទេសចរណ៍ តាមរយៈការលើកកម្ពស់ ការកសាងហេដ្ឋារចនាសម្ព័ន្ធនានា និងបង្កើនការងារបៃតងផ្សេងៗទៀត តាមសហគមន៍មូលដ្ឋាន និងបន្តជំរុញយុទ្ធនាការដាំដើមឈើមួយលានដើម ក្នុងមួយឆ្នាំ ដើម្បីបង្កើនគម្របព្រៃឈើ និងសម្រេចគោលដៅអព្យាក្រឹតកាបូន នៅឆ្នាំ២០៥០ ព្រមទាំងជំរុញ ការចូលរួមចំណែករបស់ជាតិ ក្នុងការអនុវត្តអនុសញ្ញាក្របខ័ណ្ឌសហប្រជាជាតិស្តីពី ការប្រែប្រួលអាកាសធាតុ និងជំរុញឱ្យមានកំណើនបៃតង ធានាឱ្យមានការការពារបរិស្ថាន និងសេវាប្រព័ន្ធបរិស្ថាននិងប្រព័ន្ធស្បៀង។

រីឯគណៈកម្មាធិការគ្រប់គ្រង ប្រព័ន្ធស្បៀងបម្រុងកម្ពុជា ត្រូវបន្តកែលម្អប្រព័ន្ធស្បៀងបម្រុងកម្ពុជា ឱ្យមានលទ្ធភាពកាន់តែច្រើន និងអនុវត្តបានរហ័សទាន់សភាពការណ៍ ប្រកបដោយប្រសិទ្ធភាពខ្ពស់ ដើម្បីធ្វើអន្តរាគមន៍ ជួយប្រជាពលរដ្ឋ តាមរយៈការផ្ដល់ស្បៀង ការផ្តល់គ្រាប់ពូជស្រូវ និងពូជដំណាំបន្លែសម្រាប់ស្តារ ការដាំដុះឡើងវិញ ក្រោយរងការខូចខាត ដោយសារគ្រោះមហន្តរាយធម្មជាតិ ឬគ្រោះអាសន្ននានា និងជំរុញការដាំដុះបន្លែមានសុវត្ថិភាព សម្រាប់ផ្គត់ផ្គង់គ្រួសារ ចូលរួមលើកកម្ពស់អាហារូបត្ថម្ភ បង្កើនប្រាក់ចំណូល និងប្រាក់សន្សំ។

ចំណែកឯគ្រប់ក្រសួង ស្ថាប័នពាក់ព័ន្ធនឹងប្រព័ន្ធស្បៀង សុវត្ថិភាពម្ហូបអាហារ “ចាប់ពីកសិដ្ឋានទៅដល់កន្លែង បរិភោគ” ត្រូវសហការនិងផ្ដល់ព័ត៌មានដល់គ្នា ដើម្បីកាត់បន្ថយការបាត់បង់ស្បៀងអាហា​រ និងការខ្ជះខ្ជាយ ម្ហូបអាហារ និងដើម្បីគ្រប់គ្រងហានិភ័យដែលអាចកើតមានតាមខ្សែចង្វាក់ផលិតកម្មកែច្នៃ និងវេចខ្ចប់ម្ហូបអាហារ និងធានាថា រាល់គោលការណ៍ណែនាំស្តីពី សុវត្ថិភាពម្ហូបអាហារត្រូវបានគោរពតាម និងផ្សព្វផ្សាយជាសាធារណៈ ដោយមានការចូលរួមពីភាគីពាក់ព័ន្ធ និងអ្នកប្រើប្រាស់។

ចំពោះក្រសួងផែនការ ត្រូវសហការ និងសម្របសម្រួលជាមួយក្រសួង ស្ថាប័ន ដៃគូអភិវឌ្ឍ អង្គការសង្គមស៊ីវិល និងវិស័យឯកជន ដើម្បីរៀបចំគោលនយោបាយ អាហារបញ្ចូលមីក្រូសារជាតិ និងបន្តផ្សព្វផ្សាយពីសារៈសំខាន់ន ការប្រើប្រាស់អាហារបញ្ចូលមីក្រូសារជាតិឱ្យបានទូលំទូលាយ និងពង្រីកការបញ្ចូលមីក្រូសារជាតិ ទៅក្នុង

ចំណីអាហារមូលដ្ឋាន ដើម្បីឆ្លើយតបទៅនឹងតម្រូវការអាហារូបត្ថម្ភរបស់ប្រជាពលរដ្ឋ។ ចំណែក អាជ្ញាធរមូលដ្ឋានគ្រប់លំដាប់ថ្នាក់ ត្រូវចលនាប្រជាពលរដ្ឋឱ្យដាំដុះ និងចិញ្ចឹមសត្វជាលក្ខណៈគ្រួសារ ជាសហគមន៍ និងតាមសាលារៀន ដើម្បីបង្កើនភាពមានស្បៀងគ្រប់គ្រាន់ទាំងបរិមាណ គុណភាព សុវត្ថិភាព និងធានាឱ្យមានប្រភពស្បៀងអាហារ ចម្រុះមុខច្រើនជាងមុន៕

ដោយៈ តែម សុខុម

បាងកកៈ កម្ពុជា ទន្ទឹងរង់ចាំយ៉ាងអន្ទះសារ នូវឱកាសចរចាជាមួយប្រទេសថៃ ឡើងវិញជុំវិញតំបន់អភិវឌ្ឍន៍រួមគ្នា (JDA) ដោយផ្ដោតលើការរុករករ៉ែប្រេង និងឧស្ម័ន ក្នុងតំបន់ទាមទារត្រួតស៊ីគ្នា (OCA) ដែលលាតសន្ធឹង២៦.០០០គីឡូម៉ែត្រការ៉េ។

តំបន់ទាមទារត្រួតស៊ីគ្នានេះ ត្រូវបានប៉ាន់ប្រមាណថា មានផ្ទុករ៉ែប្រេង និងឧស្ម័នយ៉ាងច្រើនសន្ធឹកសន្ធាប់ នៅក្រោមបាតសមុទ្រ ដែលអាចផ្ទុករ៉ែប្រេងដល់ទៅ៥០០លានបារ៉ែល។ នេះបើយោងតាមកាសែតថៃ The Nation ចុះផ្សាយកាលពីថ្ងៃសៅរ៍ ទី៤ ខែវិច្ឆិកា។

ខណៈវិបត្តិថាមពលអាចនឹងកើតឡើង ក្នុងពេលដ៏ខ្លីខាងមុខ ប្រទេសទាំងពីរ ពិតជាចង់ធានាឱ្យបាននូវអនាគត ថាមពលរបស់ខ្លួនប្រកបដោយនិរន្តរភាព។

រដ្ឋមន្ត្រីថាមពលថៃ លោក Pirapan Salirathavibhaga បានលើកឡើងកាលពីថ្ងៃទី៣០ ខែតុលា ថា រដ្ឋាភិបាលរបស់លោកមានបំណងបង្វែរការផ្ដោតយកចិត្តទុកដាក់ លើការចរចាជាមួយកម្ពុជា ឆ្ពោះទៅរកតំបន់ទាមទារត្រួតស៊ីគ្នា (OCA)។យោងតាមប្រព័ន្ធផ្សព្វផ្សាយរបស់ថៃបានឱ្យដឹងថា វិធីសាស្ត្រផ្ដោតយកចិត្តទុកដាក់ឡើងវិញនេះ ផ្ដល់អាទិភាពលើការអភិវឌ្ឍរួមគ្នាជាជាងការកំណត់ព្រំដែនសមុទ្រ។

រដ្ឋមន្ត្រីថាមពលថៃ លោក Pirapan Salirathavibhaga បានលើកឡើងថា “យើងត្រូវការថាមពលពីតំបន់ទាមទារត្រួតស៊ីគ្នា (OCA) គឺមិនមែនការកំណត់ព្រំដែនសមុទ្រនោះទេ”។លោកបន្ថែមថា “ ការដោះស្រាយជម្លោះទឹកដី គឺជាដំណើរការដ៏ស្មុគស្មាញ និងត្រូវការពេលវេលា ព្រោះគ្មានប្រទេសណា សុខចិត្តទទួលយកការកែប្រែព្រំដែនរបស់ខ្លួនឡើយ”។

ជាមួយគ្នានេះ លោក កែវ រតនៈ រដ្ឋមន្ត្រីរ៉ែ និងថាមពលកម្ពុជា បានលើកឡើងកាលពីថ្ងៃទី០២  ខែវិច្ឆិកា ថា កម្ពុជា បើកចំហរង់ចាំការសហការជាមួយសមភាគីថៃ លើតំបន់អភិវឌ្ឍន៍រួមគ្នា (JDA) ដោ​យ​ផ្ដោតលើការផ្ដល់ផលប្រយោជន៍គ្នា ទៅវិញទៅមកសម្រាប់ប្រ​ទេ​សជិតខាងទាំងពីរ។

លោកថ្លែងថា “យើងកំពុងទន្ទឹងរង់ចាំ ធ្វើការជាមួយសមភាគីថៃ”។ទោះជាយ៉ាងណា លោកគូសបញ្ជាក់ថា រដ្ឋាភិបាលកម្ពុជា មិនទាន់ទទួលបានការអញ្ជើញណាមួយពីអាជ្ញាធរថៃ នៅឡើយទេ៕ The Nation ៕

ដោយ: គង់ លាងហួរ
អន្តរជាតិ: ប្រធានាធិបតីឥណ្ឌូនេស៊ី លោក Joko Widodo បានចូលរួមកាលពីពេលថ្មីៗនេះ ក្នុងពិធីបើកការដ្ឋានសាងសង់ព្រលានយន្តហោះខ្នាតធំមួយនៅក្នុងទីក្រុង Nusantara ដែលជារដ្ឋធានីថ្មីរបស់ប្រទេសនេះ។

លោកប្រធានាធិបតី Joko Widodo បានថ្លែងនៅក្នុងពិធីបើកការដ្ឋានសាងសង់ព្រលានយន្តហោះថា រដ្ឋាភិបាលបានកំណត់គោលដៅ ដើម្បីបើកប្រតិបត្តិការអាកាសយានដ្ឋាននេះឱ្យបានពេញលេញនៅខែធ្នូ ឆ្នាំ២០២៤ខាងមុខ។

លោកបន្តថាគម្រោង ព្រលាន យន្តហោះ លាតសន្ធឹងលើផ្ទៃដី សរុប ទំហំ៣៤៧ហិកតា ហើយព្រលាន យន្តហោះនេះមាន សារៈ សំខាន់ណាស់ ខណៈ សកម្មភាព បច្ចុប្បន្ន នៅ តំបន់ នេះ កំពុង កើន ឡើង។

យោងតាមការចុះផ្សាយដោយសារពត៌មាន Reuters បានឱ្យដឹងថា គម្រោង ព្រលាន យន្តហោះខ្នាតធំនេះគ្រោងនឹងចំណាយថវិកាសម្រាប់ការសាងសង់ចំនួន៤,២ពាន់ពាន់លានរូពី(ប្រហែល២៦៣លានដុល្លារអាមេរិក)។

លោក Joko Widodo បានអះអាងថា “មធ្យោបាយក្នុងការដឹកជញ្ជូនគឺត្រូវការជាចាំបាច់ ដើម្បីគាំទ្រគម្រោងសម្រាប់ទីក្រុងរដ្ឋធានីថ្មី និងការតភ្ជាប់របស់គម្រោងជាមួយតំបន់ផ្សេងទៀត”។

លោក Jokowi បានថ្លែងនៅក្នុងព្រឹត្តិការណ៍បើកការដ្ឋានសាងសង់នេះថា “ខ្ញុំជឿជាក់ថា ការសាងសង់ព្រលានយន្តហោះនេះនឹងជំរុញការប្រកួតប្រជែង និងកំណើនសេដ្ឋកិច្ច ក៏ដូចជាពន្លឿនការអភិវឌ្ឍន៍នៃរដ្ឋធានីថ្មីផងដែរ”។

មិនត្រឹមតែប៉ុណ្ណោះ ប្រធានាធិបតីឥណ្ឌូនេសុីរូបនេះ ក៏បានចូលរួមបើកការដ្ឋានសាងសង់គម្រោងជាច្រើនទៀត ដូចជា ផ្លូវបង់ថ្លៃ(Toll-road) មន្ទីរពេទ្យ និងសណ្ឋាគារមួយ ក្នុងទីក្រុង Nusantara ផងដែរ។

ប្រទេសឥណ្ឌូនេស៊ីបានស្វាគមន៍អ្នកធុរកិច្ចក្នុងស្រុក និងបរទេសក្នុងការបោះទុនវិនិយោគលើការសាងសង់រដ្ឋធានី Nusantara ដែលជាគម្រោងខ្នាតយក្សស្ថិតក្រោមទុនវិនិយោគប្រមាណ៣២ពាន់លានដុល្លារអាមេរិក៕

ដោយៈ គង់ ម៉ាលីនណា

        ខេត្តកែបៈ ក្រសួងទេសចរណ៍មានកិត្តិយស សហការជាមួយនឹង សាលាខេត្តកែប សហភាពសហព័ន្ធយុវជនកម្ពុជា ក្រសួង-ស្ថាប័នពាក់ព័ន្ធ ព្រមទាំងផ្នែកឯកជន នឹងរៀបចំ ពិធីបុណ្យសមុទ្រលើកទី១០ ក្រោមប្រធានបទ “ទាំងអស់គ្នាដើម្បីទេសចរណ៍” ដែលនឹងប្រព្រឹ​ត្តទៅនៅថ្ងៃសុក្រ សៅរ៍ អាទិត្យ ត្រូវនឹងថ្ងៃទី០១-០២-០៣ ខែធ្នូ ឆ្នាំ២០២៣ នៅខេត្តកែប។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នឹងអញ្ជើញជាអធិបតីដ៏ខ្ពង់ខ្ពស់ក្នុងពិធីបើក ជាផ្លូវការពិធីបុណ្យសមុទ្រលើកទី១០ នៅខេត្តកែប នាថ្ងៃសៅរ៍ ទី២ ខែធ្នូ ឆ្នាំ២០២៣ ។

នៅក្នុងព្រឹត្តិការណ៍ជាតិ ដ៏មានមោទនភាព និងសោមនស្សរីករាយនេះ មានសកម្មភាពសំខាន់ៗសម្រាប់ការទស្សនា និង កម្សាន្ត ដូចជា ទី១. ការសម្ដែងសិល្បៈ ការប្រគុំតន្ត្រី ចូលរួមពី ក្រុមសិល្បករ សិល្បការិនី តារាចំរៀងជាតិ និងអន្តរជាតិល្បីៗ ព្រមទាំងមានការបាញ់កាំជ្រួចអបអរសាទរពិធីបុណ្យសមុទ្រលើកទី១០ ឆ្នាំ២០២៣។

ទី២ មហោស្រពម្ហូបអាហារ និងភេសជ្ជៈ ការតាំងផលិតផលទេសចរណ៍ និងគម្រោងអភិវឌ្ឍន៍ទេសចរណ៍ តំបន់ឆ្នេរ ផលិតផលទូទៅ ព្រមទាំងសកម្មភាពកីឡានានាផងដែរ។

អាស្រ័យហេតុនេះ សូមអញ្ជើញ ភ្ញៀវជាតិ-អន្តរជាតិ និងសាធា​រណជនចូលរួមទស្សនា និងកម្សាន្តដោយមេត្រី៕