ដោយ: គង់ លាងហួរ
អន្តរជាតិ: ប្រធានាធិបតីឥណ្ឌូនេស៊ី លោក Joko Widodo បានចូលរួមកាលពីពេលថ្មីៗនេះ ក្នុងពិធីបើកការដ្ឋានសាងសង់ព្រលានយន្តហោះខ្នាតធំមួយនៅក្នុងទីក្រុង Nusantara ដែលជារដ្ឋធានីថ្មីរបស់ប្រទេសនេះ។

លោកប្រធានាធិបតី Joko Widodo បានថ្លែងនៅក្នុងពិធីបើកការដ្ឋានសាងសង់ព្រលានយន្តហោះថា រដ្ឋាភិបាលបានកំណត់គោលដៅ ដើម្បីបើកប្រតិបត្តិការអាកាសយានដ្ឋាននេះឱ្យបានពេញលេញនៅខែធ្នូ ឆ្នាំ២០២៤ខាងមុខ។

លោកបន្តថាគម្រោង ព្រលាន យន្តហោះ លាតសន្ធឹងលើផ្ទៃដី សរុប ទំហំ៣៤៧ហិកតា ហើយព្រលាន យន្តហោះនេះមាន សារៈ សំខាន់ណាស់ ខណៈ សកម្មភាព បច្ចុប្បន្ន នៅ តំបន់ នេះ កំពុង កើន ឡើង។

យោងតាមការចុះផ្សាយដោយសារពត៌មាន Reuters បានឱ្យដឹងថា គម្រោង ព្រលាន យន្តហោះខ្នាតធំនេះគ្រោងនឹងចំណាយថវិកាសម្រាប់ការសាងសង់ចំនួន៤,២ពាន់ពាន់លានរូពី(ប្រហែល២៦៣លានដុល្លារអាមេរិក)។

លោក Joko Widodo បានអះអាងថា “មធ្យោបាយក្នុងការដឹកជញ្ជូនគឺត្រូវការជាចាំបាច់ ដើម្បីគាំទ្រគម្រោងសម្រាប់ទីក្រុងរដ្ឋធានីថ្មី និងការតភ្ជាប់របស់គម្រោងជាមួយតំបន់ផ្សេងទៀត”។

លោក Jokowi បានថ្លែងនៅក្នុងព្រឹត្តិការណ៍បើកការដ្ឋានសាងសង់នេះថា “ខ្ញុំជឿជាក់ថា ការសាងសង់ព្រលានយន្តហោះនេះនឹងជំរុញការប្រកួតប្រជែង និងកំណើនសេដ្ឋកិច្ច ក៏ដូចជាពន្លឿនការអភិវឌ្ឍន៍នៃរដ្ឋធានីថ្មីផងដែរ”។

មិនត្រឹមតែប៉ុណ្ណោះ ប្រធានាធិបតីឥណ្ឌូនេសុីរូបនេះ ក៏បានចូលរួមបើកការដ្ឋានសាងសង់គម្រោងជាច្រើនទៀត ដូចជា ផ្លូវបង់ថ្លៃ(Toll-road) មន្ទីរពេទ្យ និងសណ្ឋាគារមួយ ក្នុងទីក្រុង Nusantara ផងដែរ។

ប្រទេសឥណ្ឌូនេស៊ីបានស្វាគមន៍អ្នកធុរកិច្ចក្នុងស្រុក និងបរទេសក្នុងការបោះទុនវិនិយោគលើការសាងសង់រដ្ឋធានី Nusantara ដែលជាគម្រោងខ្នាតយក្សស្ថិតក្រោមទុនវិនិយោគប្រមាណ៣២ពាន់លានដុល្លារអាមេរិក៕

ដោយៈ គង់ ម៉ាលីនណា

        ខេត្តកែបៈ ក្រសួងទេសចរណ៍មានកិត្តិយស សហការជាមួយនឹង សាលាខេត្តកែប សហភាពសហព័ន្ធយុវជនកម្ពុជា ក្រសួង-ស្ថាប័នពាក់ព័ន្ធ ព្រមទាំងផ្នែកឯកជន នឹងរៀបចំ ពិធីបុណ្យសមុទ្រលើកទី១០ ក្រោមប្រធានបទ “ទាំងអស់គ្នាដើម្បីទេសចរណ៍” ដែលនឹងប្រព្រឹ​ត្តទៅនៅថ្ងៃសុក្រ សៅរ៍ អាទិត្យ ត្រូវនឹងថ្ងៃទី០១-០២-០៣ ខែធ្នូ ឆ្នាំ២០២៣ នៅខេត្តកែប។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នឹងអញ្ជើញជាអធិបតីដ៏ខ្ពង់ខ្ពស់ក្នុងពិធីបើក ជាផ្លូវការពិធីបុណ្យសមុទ្រលើកទី១០ នៅខេត្តកែប នាថ្ងៃសៅរ៍ ទី២ ខែធ្នូ ឆ្នាំ២០២៣ ។

នៅក្នុងព្រឹត្តិការណ៍ជាតិ ដ៏មានមោទនភាព និងសោមនស្សរីករាយនេះ មានសកម្មភាពសំខាន់ៗសម្រាប់ការទស្សនា និង កម្សាន្ត ដូចជា ទី១. ការសម្ដែងសិល្បៈ ការប្រគុំតន្ត្រី ចូលរួមពី ក្រុមសិល្បករ សិល្បការិនី តារាចំរៀងជាតិ និងអន្តរជាតិល្បីៗ ព្រមទាំងមានការបាញ់កាំជ្រួចអបអរសាទរពិធីបុណ្យសមុទ្រលើកទី១០ ឆ្នាំ២០២៣។

ទី២ មហោស្រពម្ហូបអាហារ និងភេសជ្ជៈ ការតាំងផលិតផលទេសចរណ៍ និងគម្រោងអភិវឌ្ឍន៍ទេសចរណ៍ តំបន់ឆ្នេរ ផលិតផលទូទៅ ព្រមទាំងសកម្មភាពកីឡានានាផងដែរ។

អាស្រ័យហេតុនេះ សូមអញ្ជើញ ភ្ញៀវជាតិ-អន្តរជាតិ និងសាធា​រណជនចូលរួមទស្សនា និងកម្សាន្តដោយមេត្រី៕

ដោយៈ គង់ សូរិយា

        ភ្នំពេញៈ តំបន់ជុំវិញអាកាស​យានដ្ឋានអន្តរជាតិថ្មីចំនួន២ ​របស់​កម្ពុជា​ គឺអាកាស​យានដ្ឋានអន្តរជាតិ​តេជោ និង​អា​កាស​យានដ្ឋាន​ សៀមរាប អង្គរ​ ត្រូវ​បានរំពឹងថា​នឹង​មានសក្ដា​​នុពល​ កាន់តែខ្ពស់​នៅពេលអនាគត​ឆាប់ៗនេះ។

​លោក ​កែវ សុធារ៉ា​ អ្នកជំនាញ​អចលនទ្រព្យមួយរូបប្រចាំខេត្តសៀមរាប និងជាប្រធានក្រុមហ៊ុន​អចល​ន​ទ្រព្យKW ប្រចាំខេត្ត​សៀមរាប​បាន​ឱ្យ​ដឹង​ផង​ដែរ​ថា តំបន់ជុំវិញ​ព្រលានយន្តហោះអ​ន្ត​រ​ជា​​តិ​សៀមរាប​ អង្គរ​ ​រំពឹងថា​នឹង​មានសក្ដានុពល​ខ្ពស់ ខណៈបច្ចុប្បន្ន​នេះ​មានគម្រោង​មួយចំនួន ក៏បានគ្រោងនឹងអភិវឌ្ឍន៍ ​នៅ​ជុំ​វិ​ញ​​តំបន់នោះរួចជាស្រេច ដោយរង់ចាំតែពេលវេលា​ និង​ស្ថានភាពសេដ្ឋកិច្ច​ប្រសើរ នឹង​ត្រូវអភិវឌ្ឍន៍ហើយ។​

លោកបន្តថា មិនត្រឹមតែ​តំបន់ជុំវិញ ព្រលានយន្តហោះសៀម​រាប​អង្គរ​នោះទេ​ ដែលមានសក្ដានុពល​ ពោលគឺ​តំបន់​នៅក្រុង​សៀម​រាប​ទាំង​មូលក៏នឹង​មាន​សក្ដា​​នុ​ពល និងទាក់ទាញ​បាននូវ​វិនិយោគិន​បន្ថែម​ផងដែរ ​ក្រោយ​​​ពី​អាកាស​យានដ្ឋានអន្តរជាតិ សៀមរាប អង្គរ​បានបើក​ដំណើរការ ។ដោយឡែក​ក្រលេកទៅមើល​តំបន់ជុំវិញ អាកាស​យានដ្ឋានអន្តរជាតិ​តេជោ ដែលស្ថិតនៅ​ស្រុកកណ្ដាលស្ទឹង​ ខេត្តកណ្ដាលវិញ​ក៏ឃើញថា​ ហេដ្ឋារចនាសម្ព័ន្ធ​ផ្លូវ​ ថ្នល់ ភ្លើង​ បានតភ្ជាប់ទៅកាន់តំបន់​ជា​បណ្ដើរៗហើយ ដោយរំពឹងថា នៅពេលអនាគត​ឆាប់ៗនេះ តំបន់​ជុំវិញអាកាស​យានដ្ឋានមួយ​នេះ នឹងទាក់ទាញបាននូវ​ការ​វិនិយោគ​ជា​បន្តបន្ទាប់ ។

លោកស្រី​ តាំង ហួរ អ្នកជំនាញអចលនទ្រព្យមួយរូបនិងជាអគ្គនាយិកាក្រុមហ៊ុនAmatak Property Service បានមានប្រសាសន៍ឲ្យដឹងផងដែរថា វិនិយោគិនបរទេស​ ជាពិសេស​វិនិយោគិន​ចិន​បាន និងកំពុង​សម្លឹង​ និង​ចាប់អារម្មណ៍លើ​តំបន់ជុំវិញ ព្រលានយន្តហោះ​អន្តរជាតិតេជោ លើ​ការ​វិនិយោគ​របស់ខ្លួន ដោយ​តំបន់នេះនឹងអាច​ក្លាយជា​តំបន់ឧស្សាហកម្ម ដូចជា​ឃ្លាំង រោងចក្រ សហ​គ្រាស​​ជាដើម ។លោកស្រីបន្តថា​ “អ្នក​វិនិយោគដីធ្លី អាច​ចាប់ឱកាស​ក្នុងកា​រវិនិ​យោគលើដីធ្លី​នៅតំបន់​​ជុំវិញនោះ ប៉ុន្តែ​យ៉ាង​ណា​ក្ដី តម្លៃដីធ្លីនៅតំបន់ជុំវិញ​អាកាស​យានដ្ឋាន ក៏នឹង​មិនឡើង​ខ្ពស់​ដូច​តំបន់​លំនៅឋាន ​និង​ពាណិជ្ជកម្ម​ឡើ​យ ពី​ព្រោះថា​វាជា​តំបន់​ឧស្សាហកម្ម”។

លោកស្រីបន្ថែមថា ទោះជាយ៉ាងណាក្ដី​នៅប៉ែកខាងត្បូង​ភ្នំពេញ ដែលសំដៅលើ​តំបន់ ដែល​នៅឆ្ងាយពីព្រលានយន្តហោះតេជោ​បន្តិច​ ឃើញ​មានការអភិវឌ្ឍ​ច្រើនទៅលើ​ ផ្សារទំនើប លំនៅឋានប្រណិត​ៗ​ជាច្រើន និងជាពិសេស​ផ្លូវ​ក្រវាត់ក្រុង​ទី​៣ ដែលជា​កត្តា​ទាក់ទាញ​អ្នកវិនិយោគ​ទៅកាន់តំបន់​នោះកា​ន់​តែច្រើ​ន។

ក្រុមហ៊ុនចិនបានសិក្សាបញ្ចប់ គំរោងផ្លូវក្រវ៉ាត់ក្រុងទី៣ ភាគខាងកើតដែលមានប្រវែងប្រមាណ៣៣គីឡូម៉ែត្រ និងគ្រោងចំណាយប្រាក់ជាង២០០លានដុល្លាររួចហើយ និងបានបញ្ចប់ការសិក្សាផ្លូវក្រវ៉ាត់ក្រុងទី៤ផងចដែរ ប៉ុន្តែការចាប់ផ្តើមសាងសង់នាពេលណា មិនទាន់មានព័ត៌មានជាក់លាក់នៅឡើយទេ៕

ដោយៈ គង់ សូរិយា

        ប៉េកាំងៈ លោកស្រី ហ៊ឹម សុធារ័ត្ន អនុរដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈ ​បានបញ្ជាក់ថា កម្ពុជាត្រៀមទទួលអ្នកវិនិយោគថ្មីៗបន្ថែមទៀត ជាពិសេសអ្នកវិនិយោគចិន តាមរយៈការបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជន ១,៥លាននាក់។

លោកស្រី បានគូសបញ្ជាក់បែបនេះ ពេលអញ្ជើញចូលរួម និងថ្លែងសុន្ទរកថាគន្លឹះ ក្នុងវេទិកាកម្រិតខ្ពស់ នៃធនាគារខួរក្បាលកម្ពុជា-ចិនលើកទី៣ រួមគ្នាពង្រឹងការកសាងសហគមន៍ ជោគវាសនារួមកម្ពុជា-ចិន» ដែលរៀបចំឡើងដោយ រាជបណ្ឌិត្យសភាកម្ពុជា (RAC) និងបណ្ឌិត្យសភាវិទ្យាសាស្ត្រសង្គមចិន (CASS) នៅរដ្ឋធានីប៉េកាំង ប្រ​ទេ​សចិន កាលពីចុងសប្តាហ៍មុន​។

វេទិកានេះ ត្រូវបានរៀបចំឡើងក្នុងគោលបំណង ប្រមូលផ្តុំអ្នកស្រាវជ្រាវ មន្ត្រីរដ្ឋាភិបាល មន្ត្រីជាន់ខ្ពស់ អ្នកបង្កើតគោលនយោបាយ ព្រមទាំងភាគីពាក់ព័ន្ធនានា ដើម្បីពង្រឹងបន្ថែមនូវទំនាក់ទំនងវប្បធម៌ ការទូត ទេសចរណ៍ សេដ្ឋកិច្ច-សង្គម និងកិច្ចសហប្រតិបត្តិការរវាងប្រទេសកម្ពុជា និងប្រទេសចិន លើវិស័យពាក់ព័ន្ធនានា រួមទាំងវិស័យបណ្តុះបណ្តាលវិជ្ជាជីវៈ និងបច្ចេកទេស (TVET) ក្នុងឱកាសខួបលើកទី៦៥​ នៃការបង្កើតទំនាក់ទំនងការទូត រវាងប្រទេសកម្ពុជា និងចិន និងខួបលើកទី១០ នៃគំនិតផ្តួចផ្តើមខ្សែក្រវ៉ាត់ និងផ្លូវ (BRI)។​

លោកស្រី ហ៊ឹម សុធារ័ត្ន បានថ្លែងពីចំណង “មិត្តភាពដែកថែប”រវាងកម្ពុជា និងចិន ដែលស្តែងចេញ ពីកិច្ចសហប្រតិបត្តិការថ្នាក់តំបន់នានា រួមមាន កិច្ចសហប្រតិបត្តិការខ្សែក្រវ៉ាត់ និងផ្លូវ កិច្ចសហប្រតិបត្តិការមេគង្គ-ឡាងឆាង និងកិច្ចសហប្រតិបត្តិការអាស៊ាន-ចិន ដែលបាននាំមកនូវការអភិវឌ្ឍ និងកំណើនសេដ្ឋកិច្ចសង្គមជាបន្តបន្ទាប់នៅកម្ពុជា។លោកស្រី ក៏បានលើកឡើងពីចក្ខុវិស័យ និងទិសដៅរបស់រាជរដ្ឋាភិបាលកម្ពុជាអាណត្តិទី៧នេះ ដោយផ្អែកលើ “យុទ្ធសាស្ត្របញ្ចកោណដំណាក់កាលទី១” ពិសេសភារកិច្ចរបស់ក្រសួងការងារកម្ពុជា ដែលជាអនុសាសន៍របស់ សម្តេចមហាបវរធិបតីហ៊ុន ម៉ាណែត នាយ​ករដ្ឋមន្ត្រីនៃកម្ពុជា ណែនាំឱ្យក្រសួងសម្រេចឱ្យបាននូវការងារអាទិភាពចំនួន៦ ក្នុងឆ្នាំ២០២៣ និងការងារអាទិភាពចំនួន ៤ទៀត ក្នុងរយៈពេល២ឆ្នាំទៅមុខ។​

ក្នុងចំណោមការងារទាំង១០ចំណុចខាងលើ ក្រសួងកំពុងប្រតិ​បត្តិការយ៉ាងសកម្មទៅលើ (១) វគ្គបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជន ១,៥លាននាក់ ដែលមកពីគ្រួសារក្រីក្រ និងងាយរងហានិភ័យ និង (២) ការបង្កើតទារកដ្ឋាន​ និងមត្តេយ្យសហគមន៍ នៅតាមតំបន់ក្បែររោងចក្រ សហគ្រាស។

លោកស្រីបានលើកឡើងថា ដើម្បីសម្រេចឱ្យបាននូវការអភិវឌ្ឍសេដ្ឋកិច្ចសង្គមក្រោយវិបត្តិកូវីដ-១៩ និងគោលដៅក្នុងការប្រែក្លាយកម្ពុជាជាប្រទេស ដែលមានប្រាក់ចំណូលមធ្យម កម្រិតខ្ពស់នៅឆ្នាំ២០៣០ និងប្រទេសដែលមានប្រាក់ចំណូល កម្រិតខ្ពស់នៅឆ្នាំ២០៥០ ការផ្តល់វគ្គបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជន១,៥លាននាក់ ដែលមកពីគ្រួសារក្រីក្រ និងងាយរងហានិភ័យ ពិតជាមានសារៈសំខាន់ណាស់។

វគ្គបណ្តុះបណ្តាលវិជ្ជាជីវៈនេះ អាចផ្តល់នូវមូលដ្ឋានចំណេះដឹងជាច្រើន ដូចជា (១) អាចបង្រៀនយុវជនទាំងនោះចេះរកត្រី ដោយខ្លួនឯង តាមរយៈការផ្តល់ជំនាញមួយច្បាស់លាស់ ដែលអាចឱ្យពួកគាត់អាចប្រកួតប្រជែង ក្នុងតម្រូវការទីផ្សារការងារបច្ចុប្បន្ន (២) ប្រសិនបើយុវជន គ្រួសារទាំងនោះមានការងារធ្វើ គឺអាចជួយឱ្យគ្រួសារទាំងមូលចាកចេញ ពីបន្ទាត់ក្រីក្រក្នុងរយៈពេលខ្លី និង(៣) ផ្តល់នូវធនធានមនុស្ស ដែលជំនាញគ្រប់គ្រាន់ ដើម្បីឆ្លើយតបទៅនឹងតម្រូវការរបស់រោងចក្រ /សហគ្រាសក្នុងស្រុក ក៏ដូចជាវិនិយោគបរទេសថ្មីៗ ដែលគ្រោងនឹងមកវិនិយោគនៅកម្ពុជា។

តាមរយៈវគ្គបណ្តុះបណ្ដាលនេះ អាចសបញ្ជាក់ឱ្យឃើញថា កម្ពុជាបានត្រៀមខ្លួនរួចជាស្រេច ក្នុងការផ្តល់ការផ្តត់ផ្គង់ធនធានមនុស្ស ស្របទៅតាមតម្រូវការទីផ្សារជាក់ស្តែង និងសង្ឃឹមថាអាចទាក់ទាញវិនិយោគធំៗពីបរទេសមកកម្ពុជាបាន។

ទន្ទឹមនឹងនេះ លោកស្រី សង្ឃឹមថា វិនិយោគធំៗរបស់ចិន អាចនឹងពិចារណា ដាក់វិនិយោគបន្ថែមនៅកម្ពុជា និងស្នើឱ្យម្ចាស់រោងចក្រ/ សហគ្រាសដែលកំពុងមានវត្តមាននៅកម្ពុជា ផ្តល់ឱកាស internship ទៅដល់យុវជនទាំងនោះ អំឡុងពេលកំពុងសិក្សា ឬក្រោយបញ្ចប់វគ្គសិក្សា ដើម្បីអាចឱ្យយុវជនទាំងនោះបានអនុវត្តផ្ទាល់នូវទ្រឹស្តីដែលខ្លួនរៀន និងដើម្បីពង្រឹងចំណេះជំនាញ និងបង្កើនផលិតភាពការងាររបស់រោងចក្រ/សហគ្រាសផ្ទាល់៕

ដោយ: គង់ លាងហួរ
អន្តរជាតិ: រដ្ឋមន្ត្រីក្រសួងរតនាគារអាមេរិក លោកស្រី Janet Yellen កាលពីថ្ងៃព្រហស្បតិ៍បានអះអាងថា រដ្ឋបាលលោកចូ បៃដិន ប្តេជ្ញាពង្រីកពាណិជ្ជកម្ម និងការវិនិយោគជាមួយបណ្តាប្រទេសនៅតំបន់ឥណ្ឌូប៉ាស៊ីហ្វិក ដោយសង្កត់ធ្ងន់លើសារៈសំខាន់ជាយុទ្ធសាស្រ្តរបស់តំបន់នេះ។

លោកស្រី Yellen បានបន្តថា “ទំនាក់ទំនងសេដ្ឋកិច្ចកាន់តែស៊ីជម្រៅ ជាមួយបណ្តាប្រទេស នៅតំបន់ឥណ្ឌូប៉ាស៊ីហ្វិក នឹងជួយធ្វើឱ្យខ្សែសង្វាក់ផ្គត់ផ្គង់របស់អាមេរិកកាន់តែមានភាពធន់ ហើយ អាមេរិកអាចទាញយកសក្តានុពលពីទីផ្សារថាមវន្ត និងរីកចម្រើនរបស់តំបន់នេះសម្រាប់ជំរុញការនាំចេញរបស់ខ្លួន”។ទន្ទឹមគ្នានេះ រដ្ឋបាលរបស់លោកចូ បៃដិន កំពុងត្រៀមរៀបចំទទួលក្រុមមេដឹកនាំ និងមន្ត្រីកំពូលផ្សេងទៀតមកពីបណ្តាប្រទេសនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងសាន់ហ្វ្រាន់ស៊ីស្កូចាប់ពីថ្ងៃទី ១១ ដល់ថ្ងៃទី ១៧ ខែវិច្ឆិកាខាងមុខនេះ។

លោកស្រី Yellen បញ្ជាក់ថា “ស្របពេលដែលយើងសម្លឹងឆ្ពោះទៅរកកិច្ចប្រជុំ APEC នៅខែវិច្ឆិកានេះ ខ្ញុំសូមបញ្ជាក់យ៉ាងច្បាស់ថា ការអះអាងដែលថា អាមេរិកកំពុងងាកចេញពីតំបន់ឥណ្ឌូប៉ាស៊ីហ្វិក គឺគ្មានមូលដ្ឋានទាំងស្រុងសោះឡើយ”។

រដ្ឋមន្ត្រីរូបនេះអះអាងថា “យើងកំពុងពង្រឹងទំនាក់ទំនងសេដ្ឋកិច្ចរបស់យើងនៅទូទាំងតំបន់នេះ ដែលមានអត្ថប្រយោជន៍សម្រាប់សេដ្ឋកិច្ចអាមេរិក និងសម្រាប់តំបន់ឥណ្ឌូប៉ាស៊ីហ្វិកផងដែរ”។

លោកស្រីបានកត់សម្គាល់ថា “ទំហំពាណិជ្ជកម្មរវាងអាមេរិក ជាមួយតំបន់ឥណ្ឌូប៉ាស៊ីហ្វិក សម្រេចបានទំហំទឹកប្រាក់២,២៨ទ្រីលានដុល្លារ ក្នុងឆ្នាំ២០២២ កើនឡើង២៥% ចាប់តាំងពីឆ្នាំ២០១៩ ”។

លោកស្រីបានបន្ថែមថា “ឥណ្ឌូ-ប៉ាស៊ីហ្វិក គឺជាតំបន់ដែលមានថាមពល និងរីកចម្រើនយ៉ាងឆាប់រហ័ស។ នៅពេលដែលតំបន់នេះរីកចម្រើន នោះយើងទទួលបានមូលដ្ឋានអតិថិជនដែលពង្រីកធំយ៉ាងឆាប់រហ័សសម្រាប់ក្រុមហ៊ុន និងកម្មករអាមេរិក”៕

ដោយ: គង់ លាងហួរ
ភ្នំពេញ: សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានជំរុញឱ្យភ្ញៀវទេសចរចិន ត្រឡប់មកទស្សនាកម្ពុជាវិញ ដោយធានាថា ប្រទេសកម្ពុជាមានកម្រិតសន្តិសុខ និងសុវត្ថិភាពល្អ។

សម្តេចធិបតី ហ៊ុន ម៉ាណែត បានមានប្រសាសន៍ថា “ខ្ញុំសូមផ្ញើសារទៅកាន់ប្រជាជនចិន ឱ្យអញ្ជើញមកទស្សនាកម្ពុជា ដោយយើងនឹងផ្តល់ឱ្យអ្នកនូវរាល់គ្រប់ឱកាស”។

សម្តេចបានបន្តថា “ប្រទេសកម្ពុជាគឺជាទឹកដីអច្ឆរិយៈ ភ្ញៀវទេសចរដែលមកកំសាន្តនៅកម្ពុជាបានសរសើរថា ប្រជាជនកម្ពុជាមានចិត្តល្អ និងមានភាពរួសរាយរាក់ទាក់ ហើយកម្ពុជាសម្បូរទៅដោយប្រាសាទបុរាណជាច្រើន”។

សម្តេចបានបន្ថែមថា “ខ្ញុំសូមអំពាវនាវឲ្យប្រជាជនចិនមកលេងប្រទេសកម្ពុជា ដើម្បីស្វែងយល់ថា តើប្រទេសរបស់យើងអាចផ្តល់អ្វីខ្លះ ព្រមទាំងស្វែងយល់អំពីប្រជាជនរបស់យើង និងវប្បធម៌របស់យើង”។

ការថ្លែងបែបនេះរបស់សម្តេចធិបតី ហ៊ុន ម៉ាណែត បានធ្វើឡើងបន្ទាប់ពីមានរបាយការណ៍ថ្មីៗនៅលើប្រព័ន្ធផ្សព្វផ្សាយសង្គមបានអះអាងថាប្រទេសកម្ពុជាពុំមែនជាគោលដៅសុវត្ថិភាព ដែលបង្កឱ្យមានការព្រួយបារម្ភក្នុងចំណោមភ្ញៀវទេសចរចិន។

ប្រទេសចិន គឺជា ប្រភព ភ្ញៀវទេសចរ អន្តរជាតិ ដ៏ធំ បំផុត ដែលបានចូលមក ទស្សនាកម្ពុជា មុន ផ្ទុះជំងឺរាតត្បាតកូវីដ-១៩។ ជាក់ស្តែង កម្ពុជាទទួលបានភ្ញៀវទេសចរចិនចំនួន២,៣៦លាននាក់ក្នុងឆ្នាំ២០១៩ ដែលស្មើនឹង៣៥,៧% នៃការមកដល់នៃភ្ញៀវទេសចរអន្តរជាតិសរុប និងបង្កើតចំណូលបានប្រមាណ១,៨ពាន់លានដុល្លារអាមេរិក៕

(ភ្នំពេញ)៖ គម្រោងលំនៅឋានដ៏ធំបំផុតដែលបង្កើតឡើងដោយក្រុមហ៊ុនអភិវឌ្ឍន៍អចលនទ្រព្យមួយឈ្មោះ ហនុមាន អ៊ីស្ទេត ដែលមានទីតាំងស្តិតនៅតំបន់ព្រែកព្នៅបានប្រកាសបើកលក់កាលពីថ្មីៗនេះនូវប្រភេទផ្ទះវីឡាកូនកាត់ថ្មី ដែលផ្តល់ជម្រើសកាន់តែច្រើនជាងមុនដល់អ្នកទិញមនុស្សគ្រប់វ័យ។

ប្រភេទផ្ទះនេះដែលត្រូវបានរចនាយ៉ាងយកចិត្តទុកដាក់ ជាមួយនឹងភាពច្នៃប្រឌិតសំរាប់អ្នកដែលស្រលាញ់ធម្មតាជាតិ និង រុក្ខជាតិបៃតងជាមួយសួនច្បារនៅចំកណ្តាលផ្ទះទំហំ 8m ដែលអាចផ្សារភ្ជាប់ជីវិតប្រចាំថ្ងៃជាមួយនឹងធម្មជាតិ។ ជាពិសេស វីឡាកូនកាត់ ហ្កាឌិនលីងវីឡានេះមានភាព​ស័ក្តិសមជាមួយគ្រួសារគ្រប់ជំនាន់ ដែលមានបំនងប្រាថ្នាចង់បានផ្ទះដែលមានភាពឯកជនភាព​ និងមានផាកសុខភាព ដែលមានតម្លៃចាប់ពី ៧ម៉ឺនដុល្លារជាងតែប៉ុណ្ណោះ ។ហ្កាឌិនលីងវីឡានេះ មានទំហំសាច់ដី ២០ម៉ែត្រ និងមាន​ទីធ្លាមុខផ្ទះសល់​ ៥ម៉ែត្រ សម្រាប់ចតយានជំនិះ និងជាពិសេសនៅខាងមុខផ្ទះមានរៀបជាបន្ទាត់ខណ្ឌសួនតួចៗដើម្បីលំអព្រំដីផ្ទះនីមួយៗផងដែរ។ ក្រៅពីនេះប្រភេទផ្ទះហ្កាឌិនលីងវីឡានេះបានរចនាអោយមានពន្លឺថ្ងៃគ្រប់គ្រាន់ និងខ្យល់ចេញចូល ផ្តល់នូវបរិយាកាសរស់នៅប្រកបដោយផាសុកភាពមិនតែប៉ុណ្ណោះវាជាផ្នែកមួយជួយក្នុងការសន្សំសំចៃអគ្គីសនី។​ ក្រៅពីនេះយើងមានព្រែកធម្មជាតិ ដែលផ្តល់ខ្យល់អាកាសបរិសុទ្ធ និងបរិយាកាសរស់នៅស្រស់ស្រាយដល់អ្នករស់នៅ រួមជាមួយនឹងបរិក្ខារទំនើបផ្សេងៗដូចជា សួនសាធារណៈ កន្លែងហាត់ប្រាណ និងទីធ្លាបៃតងជាដើម។

ចំណែកបន្ទប់នីមួយៗមានទំហំធំទូលាយ អមជាមួយការដេគ័នៅខាងក្នុងផ្ទះ និង បំពាក់ដោយសម្ភារះទំនើបៗ។ ចំណែកចង្រ្កានបាយវិញគឺគឺមានភាពស្តង់ដារដែរមានបំពង់បឺតផ្សែង​ ហើយកន្លែងបោកគក់វិញគឺនៅដាច់ដោយឡែកពីគេដោយមិនបង្ករអោយមានភាពសើមដល់មុខងារផ្សេងៗ។សម្រាប់ទីតាំងនៃគម្រោង ដឹ អាណាចក្រ នេះគឺស្ថិតនៅលើផ្លូវជាតិលេខ 5 ដែលធ្វើដំណើរត្រឹម 15 នាទីពី ផ្សារទំនើប Aeon 2 ឬ Makro។
ចឹងនេះគឺជាឧកាសមួយសម្រាប់អ្នកដែលចង់បានផ្ទះមួយដែលមានកម្រិតស្តង់ដារ ទាំងគុណភាពសំណង់ និងការរចនា ។ ហើយតម្លៃនោះក៏អ្នកទាំងអស់គ្នាមិនចាំបាច់បារម្ភដែរ ព្រោះអាចបង់រំលោះបាន ដោយមិនចាំបាច់មានការប្រាក់ ។
សាកសួរព័តមានឥឡូវនេះ ដើម្បីទទួលបានឳកាសចំណេញមហាសាល។សម្រាប់ព័ត៌មានលម្អិត សូមទាក់ទងទៅកាន់លេខ 098 339 339 / 095 339 339
ឬតាម Telegram: https://t.me/The_anajak_by_HE
📥 Telegram: https://t.me/hanumanestate
#ឧត្តមភាពនៃការរស់នៅ #The_ANAJAK_by_Hanumanestate

តែម សុខុម

ហុងកុងៈ វិស័យអចលនទ្រព្យធ្លាប់បានរីកចម្រើនយ៉ាងឆាប់រហ័សស្ទើរមិនគួរឱ្យជឿ និងបានរួមចំណែកមួយភាគធំដល់ផលទុនជាតិសរុប (GDP) របស់មហាយក្សចិន ក្នុងរយៈពេលប៉ុន្មានឆ្នាំចុងក្រោយនេះ។

ប៉ុន្តែ ខណៈវិស័យអចលនទ្រព្យរបស់ប្រទេសចិន កាន់តែចុះខ្សោយក្នុងការជំរុញកំណើនសេដ្ឋកិច្ចដោយសារការជាប់ផុងក្នុងបំណុល និងការប្ដេជ្ញាចិត្តតែមាត់នោះ រដ្ឋាភិបាលចិន បានចាប់ផ្ដើមស្វែងរកឧស្សាហកម្មលេចធ្លោថ្មីៗដើម្បីជំនួសទីផ្សារអចលនទ្រព្យក្នុងគោលដៅធានាស្ថិរភាពសេដ្ឋកិច្ច និងកំណើន។ នេះបើយើងតាមសារព័ត៌មាន South China Morning Post ចុះផ្សាយការពីថ្ងៃសុក្រ ទី៣ ខែវិច្ឆិកា។

ទោះជាយ៉ាងនេះក្ដី ក្រុមអ្នកវិភាគព្រមានថា មហាយក្សចិន ដែលជាសេដ្ឋកិច្ចធំបំផុតទី២ របស់ពិភពលោកទំនងជាមិនអាចស្វែងរកឧស្សាហកម្មផ្សេងណាមួយមកជំនួសវិស័យអចលនទ្រព្យទាំងមូលក្នុងរយៈពេលខ្លីបានឡើយ ថ្វីបើរដ្ឋាភិបាលបានខិតខំប្រឹងប្រែងជំរុញឧស្សាហកម្មមួយចំនួនដើម្បីជំនួសវិស័យនេះក្ដី។ឧស្សាហកម្មលេចធ្លោថ្មីៗមួយចំនួនដូចជាបច្ចេកវិទ្យា ថាមពលថ្មី វិស្វកម្មផលិតកម្ម និងជីវសាស្ត្រជឿនលឿនជាដើមមានសក្ដានុពលក្លាយជាសសរស្ដម្ភសេដ្ឋកិច្ចថ្មីៗ ប៉ុន្តែទាល់តែឧស្សាហកម្មលេចធ្លោថ្មីៗទាំងរួមបញ្ចូលគ្នា មិនមែនតែមួយអាចជំនួសបាននោះទេ។

លោក Chan Haizhong នាយកប្រតិបត្តិក្រុមហ៊ុន Fitch Bohua ដែលជាបុត្រសម្ព័ន្ធចិន នៃក្រុមហ៊ុនវាយតម្លៃគុណភាពឥណទានអាមេរិក Fitch Ratings បាននិយាយកាលពីថ្ងៃអង្គារ ដើមសប្តាហ៍នេះថា “យើងចាំបាច់ត្រូវធ្វើពិពិធកម្មឧស្សាហកម្មជំនួសឱ្យការពឹងផ្អែកលើវិស័យមួយខ្លាំងពេក”៕ South China Morning Post ៕

ដោយ: គង់ លាងហួរ
សិង្ហបុរី: តាមរយៈការបោះផ្សាយលក់ប័ណ្ណបំណុលបៃតងរបស់រដ្ឋាភិបាលសិង្ហបុរី ថវិកាដែលប្រមូលបានពីការលក់ចំនួន៧០០លានដុល្លារសិង្ហបុរី (ប្រមាណ៥១១លានដុល្លារអាមេរិក) ត្រូវបានផ្តល់ជាហិរញ្ញប្បទានដល់ការសាងសង់គម្រោងខ្សែរថភ្លើងលើអាកាស Jurong Region Line (JRL) និងខ្សែរថភ្លើងក្រោមដី Cross Island Line (CRL)។

ទឹកប្រាក់ប្រមាណ៥១១លានដុល្លារអាមេរិកនេះ តំណាងឱ្យ៣០ភាគរយនៃប្រាក់ចំណូលសរុបចំនួន២,៤ពាន់លានដុល្លារសិង្ហបុរី (ប្រហែល១,៧៥ពាន់លានដុល្លារ) ដែលរដ្ឋាភិបាលប្រមូលបានពីការបោះផ្សាយលក់ប័ណ្ណបំណុលបៃតង សម្រាប់ការអភិវឌ្ឍន៍ហេដ្ឋារចនាសម្ព័ន្ធ។យោងតាមការចុះផ្សាយដោយសារពត៌មាន CNA បានបញ្ជាក់ឱ្យដឹងថា ប័ណ្ណបំណុលបៃតងនេះមានរយៈពេល៥០ឆ្នាំ ហើយវាត្រូវបានបោះផ្សាយលក់ជាលើកដំបូង កាលពីខែសីហា ឆ្នាំ២០២២កន្លងទៅ។

ជាមួយគ្នានេះ ប្រាក់ចំណូល ដែលប្រមូលបានពីការលក់ប័ណ្ណបំណុលបៃតងត្រូវតែប្រកាន់ខ្ជាប់នូវគោលការណ៍ណែនាំ និងត្រូវប្រើប្រាស់ដើម្បីអភិវឌ្ឍគម្រោងនានាដូចជា គម្រោងថាមពលកកើតឡើងវិញ ប្រសិទ្ធភាពថាមពល ការការពារការបំពុល និងការបន្សាំទៅនឹងការប្រែប្រួលអាកាសធាតុ។

គម្រោង ដែលផ្តល់ហិរញ្ញប្បទានដោយប័ណ្ណបំណុលបៃតងទាំងនេះ នឹងជួយសម្រួលដល់ការផ្លាស់ប្តូរមុខមាត់របស់ប្រទេសសិង្ហបុរី ទៅជាប្រទេសដែលមានកាបូនទាប និងធ្វើឱ្យប្រទេសនេះស្ថិតក្នុងស្ថានភាពកាន់តែល្អប្រសើរជាងមុន។

ស្របពេលដែលវិស័យដឹកជញ្ជូនតាមផ្លូវគោកនាពេលបច្ចុប្បន្នគ្របដណ្តប់ប្រហែល១៥ភាគរយនៃការបំភាយកាបូននៅក្នុងប្រទេសសិង្ហបុរី ដូច្នេះ ការពង្រីកហេដ្ឋារចនាសម្ព័ន្ធដឹកជញ្ជូនសាធារណៈ និងបណ្តាញផ្លូវដែកអគ្គិសនី គឺជាគន្លឹះក្នុងការកាត់បន្ថយការបំភាយសារធាតុកាបូននៅក្នុងប្រទេសនេះ៕