ដោយ: គង់ លាងហួរ
សិង្ហបុរី: តាមរយៈការបោះផ្សាយលក់ប័ណ្ណបំណុលបៃតងរបស់រដ្ឋាភិបាលសិង្ហបុរី ថវិកាដែលប្រមូលបានពីការលក់ចំនួន៧០០លានដុល្លារសិង្ហបុរី (ប្រមាណ៥១១លានដុល្លារអាមេរិក) ត្រូវបានផ្តល់ជាហិរញ្ញប្បទានដល់ការសាងសង់គម្រោងខ្សែរថភ្លើងលើអាកាស Jurong Region Line (JRL) និងខ្សែរថភ្លើងក្រោមដី Cross Island Line (CRL)។

ទឹកប្រាក់ប្រមាណ៥១១លានដុល្លារអាមេរិកនេះ តំណាងឱ្យ៣០ភាគរយនៃប្រាក់ចំណូលសរុបចំនួន២,៤ពាន់លានដុល្លារសិង្ហបុរី (ប្រហែល១,៧៥ពាន់លានដុល្លារ) ដែលរដ្ឋាភិបាលប្រមូលបានពីការបោះផ្សាយលក់ប័ណ្ណបំណុលបៃតង សម្រាប់ការអភិវឌ្ឍន៍ហេដ្ឋារចនាសម្ព័ន្ធ។យោងតាមការចុះផ្សាយដោយសារពត៌មាន CNA បានបញ្ជាក់ឱ្យដឹងថា ប័ណ្ណបំណុលបៃតងនេះមានរយៈពេល៥០ឆ្នាំ ហើយវាត្រូវបានបោះផ្សាយលក់ជាលើកដំបូង កាលពីខែសីហា ឆ្នាំ២០២២កន្លងទៅ។

ជាមួយគ្នានេះ ប្រាក់ចំណូល ដែលប្រមូលបានពីការលក់ប័ណ្ណបំណុលបៃតងត្រូវតែប្រកាន់ខ្ជាប់នូវគោលការណ៍ណែនាំ និងត្រូវប្រើប្រាស់ដើម្បីអភិវឌ្ឍគម្រោងនានាដូចជា គម្រោងថាមពលកកើតឡើងវិញ ប្រសិទ្ធភាពថាមពល ការការពារការបំពុល និងការបន្សាំទៅនឹងការប្រែប្រួលអាកាសធាតុ។

គម្រោង ដែលផ្តល់ហិរញ្ញប្បទានដោយប័ណ្ណបំណុលបៃតងទាំងនេះ នឹងជួយសម្រួលដល់ការផ្លាស់ប្តូរមុខមាត់របស់ប្រទេសសិង្ហបុរី ទៅជាប្រទេសដែលមានកាបូនទាប និងធ្វើឱ្យប្រទេសនេះស្ថិតក្នុងស្ថានភាពកាន់តែល្អប្រសើរជាងមុន។

ស្របពេលដែលវិស័យដឹកជញ្ជូនតាមផ្លូវគោកនាពេលបច្ចុប្បន្នគ្របដណ្តប់ប្រហែល១៥ភាគរយនៃការបំភាយកាបូននៅក្នុងប្រទេសសិង្ហបុរី ដូច្នេះ ការពង្រីកហេដ្ឋារចនាសម្ព័ន្ធដឹកជញ្ជូនសាធារណៈ និងបណ្តាញផ្លូវដែកអគ្គិសនី គឺជាគន្លឹះក្នុងការកាត់បន្ថយការបំភាយសារធាតុកាបូននៅក្នុងប្រទេសនេះ៕

តែម សុខុម

បាងកកៈ ក្រុមហ៊ុន Airbus ប្រកាសថា វិស័យបន្ទាប់ដែលខ្លួននឹងត្រូវផ្ដោតយកចិត្តទុកដាក់គឺអាជីវកម្មឧទ្ធម្ភាគចក្រ ដោយលើកឡើងពីសក្ដានុពលកំណើន២០%ក្នុងប្រទេសថៃ។ នេះបើយោងតាមកាសែត The Nation ចុះផ្សាយកាលពីថ្ងៃសុក្រ ទី៣ ខែវិច្ឆិកា។

លោក Fabrice Rochereau នាយករងក្រុមហ៊ុន Airbus ទទួលបន្ទុកអាជីវកម្មឧទ្ធម្ភាគចក្រថ្លែងថា ភាគច្រើននៃការពង្រីកអាជីវកម្មនេះត្រូវបានជំរុញដោយកំណើនតម្រូវការសម្រាប់ការផ្ដល់ជំនួយ ការរុករក និងការជួយសង្គ្រោះអំឡុងគ្រោះមហន្តរាយ ព្រមទាំងសន្តិសុខនាវាចរណ៍ក្នុងប្រទេសថៃ និងទូទាំងអាស៊ីអាគ្នេយ៍ ផងដែរ។

បច្ចុប្បន្នក្រុមហ៊ុននេះដំណើរការឧទ្ធម្ភាគចក្រជិត១.៩០០គ្រឿងក្នុងតំបន់អាស៊ីអាគ្នេយ៍ ដោយក្នុងនោះមាន៧១គ្រឿងនៅក្នុងប្រទេសថៃ។Airbus ដែលជាក្រុមហ៊ុនអវកាសពហុជាតិសាសន៍អឺរ៉ុប ក្ដោបក្ដាប់ចំណែកទីផ្សារ៣០%ផ្នែកស៊ីវិល និងវិស័យរដ្ឋ និងឯកជន។អំឡុងបទសម្ភាសន៍មួយកាលពីថ្ងៃសុក្រ សប្តាហ៍នេះ លោក Fabrice Rochereau គូសបញ្ជាក់ថា ឧទ្ធម្ភាគចក្ររបស់ក្រុមហ៊ុន Airbus ត្រូវបានប្រើប្រាស់សម្រាប់បេសកកម្មច្រើនប្រភេទក្នុងវិស័យស៊ីវិល វិស័យរដ្ឋ និងឯកជន និងវិស័យយោធា។

ឧទ្ធម្ភាគចក្ររបស់ក្រុមហ៊ុន Airbus កំពុងជួយគាំទ្រយ៉ាងសកម្មដល់ទីភ្នាក់ងារជាច្រើនទូទាំងពិភពលោកសម្រាប់បេសកកម្មរបស់ពួកគេក្នុងវិស័យដូចជាសន្តិសុខនាវាចរណ៍ សេវាវេជ្ជសាស្ត្របន្ទាន់ ការផ្ដល់ជំនួយអំឡុងគ្រោះមហន្តរាយ ព្រមទាំងការរុករក និងការសង្គ្រោះផងដែរ។ដើម្បីពង្រឹងមូលដ្ឋានអាជីវកម្មឧទ្ធម្ភាគចក្ររបស់ខ្លួនក្នុងប្រទេសថៃ លោក Bert Porteman តំណាងក្រុមហ៊ុន Airbus ប្រចាំប្រទេសថៃ បានលើកឡើងថា ក្រុមហ៊ុនគ្រោងបង្កើតមជ្ឈមណ្ឌលសេវាកម្មដំណើរការជើងហោះហើរ (Flight Operations Services Centre) មួយនៅក្រុងបាងកក ព្រមទាំងមជ្ឈមណ្ឌលអតិថិជនឧទ្ធម្ភាគចក្រដែលផ្ដល់សេវាកម្មជួសជុល និងថែទាំឧទ្ធម្ភាគចក្រស៊ីវិល និងយោធា និងការផ្ដល់ជំនួយបច្ចេកទេសដល់អតិថិជននៅក្នុងប្រទេសឡាវ និងកម្ពុជា ផងដែរ៕ The Nation ៕

ដោយៈ តែម សុខុម

ហុងកុងៈ មហាយក្សចិន បានព្រមព្រៀងធ្វើការជាមួយសហរដ្ឋអាមេរិក និងសហភាពអឺរ៉ុប និងបណ្ដាប្រទេសផ្សេងទៀត ដើម្បីរួមគ្នាគ្រប់គ្រងហានិភ័យ បង្កឡើងពីបច្ចេកវិទ្យាបញ្ញាសិប្បនិម្មិត AI នៅឯកិច្ចប្រជុំកំពូលមួយកាលពីថ្ងៃពុធ ទី០១ ខែវិច្ឆិកា។

កិច្ចប្រជុំកំពូលនៅប្រទេសអង់គ្លេស ខាងលើនេះធ្វើឡើងក្នុងគោលបំណងស្វែងរកមធ្យោបាយ ប្រកបដោយសុវត្ថិភាពសម្រាប់គ្រប់គ្រងបច្ចេកវិទ្យាAI ដែលកំពុងមានការវិវឌ្ឍយ៉ាងឆាប់រហ័ស។ នេះបើយោងតាមសារព័ត៌មាន South China Morning Post ចុះផ្សាយនៅថ្ងៃព្រហស្បតិ៍ ទី០២ ខែវិច្ឆិកា នេះ។

បណ្ដានាយកប្រតិបត្តិក្រុមហ៊ុនបច្ចេកវិទ្យា និងថ្នាក់ដឹកនាំនយោ​បាយជាច្រើន បានធ្វើការព្រមានថា ការវិវឌ្ឍយ៉ាងឆាប់រហ័សនៃបច្ចេកវិទ្យាAI បង្កការគំរាមកំហែងដល់ពិភពលោក ប្រសិនបើមិនអាចគ្រប់គ្រងវាបាន។
ហេតុដូច្នេះហើយ ទើបបានជាបណ្ដារដ្ឋាភិបាល និងស្ថាប័នអន្តរជាតិនានា បានខំប្រឹងប្រែងបង្កើតយន្តការ និងបទប្បញ្ញត្តិដើម្បីគ្រប់​គ្រងវា។នៅក្នុងកិច្ចប្រឹងប្រែងដំបូងរបស់លោកខាងលិច ដើម្បីគ្រប់គ្រងការវិវឌ្ឍប្រកបដោយសុវត្ថិភាព លើបច្ចេកវិទ្យាAI ឧបនាយករដ្ឋមន្ត្រីចិន បានព្រមព្រៀងសហការគ្នា ជាមួយមេដឹកនាំរបស់សហរដ្ឋអាមេរិក និងសហភាពអឺរ៉ុប ព្រមទាំងមេៗក្រុមហ៊ុនបច្ចេកវិទ្យាខ្នាតយក្ស រួមមានដូចជាមេក្រុមហ៊ុន Tesla លោក Elon Musk និងមេក្រុមហ៊ុន ChatGPT លោក Sam Altman ជាដើម។

ប្រទេសចំនួនដែលមានវត្តមាន ចូលរួមក្នុងកិច្ចប្រជុំកំពូលខាងលើដែលរួមមានសហរដ្ឋអាមេរិក និងប្រទេសចិន ព្រមទាំងសហភាពអឺរ៉ុប ផងដែរនោះបានចុះហត្ថលេខា លើសេចក្ដីប្រកាស Bletchley Declaration ដែលបញ្ជាក់ថា ប្រទេសនានាចាំបាច់ត្រូវធ្វើការជាមួយគ្នា និងបង្កើតវិធីសាស្ត្ររួមមួយ ដើម្បីគ្រប់គ្រងលើបច្ចេកវិទ្យាAI៕ South China Morning Post ៕

ដោយ: គង់ លាងហួរ

សិង្ហបុរី: យោងតាមទិន្នន័យ ដែលចេញផ្សាយដោយអាជ្ញាធរអភិវឌ្ឍទីក្រុង (URA) បានបង្ហាញថា តម្លៃផ្ទះឯកជននៅប្រទេសសិង្ហបុរីបានកើនឡើង០,៨ភាគរយ ក្នុងត្រីមាសទី៣ ឆ្នាំនេះ បន្ទាប់ពីធ្លាក់ចុះ០,២ភាគរយក្នុងត្រីមាសទី២។

អាជ្ញាធរ​ខាងលើបាន​កត់​សម្គាល់ថា ការកើនឡើងនៃតម្លៃផ្ទះជាមធ្យមប្រចាំត្រីមាស ប្រហែល០,៣ភាគរយ ក្នុងរយៈពេល២ត្រីមាសកន្លងមក គឺជាកម្រិតទាបណាស់ បើធៀបនឹងការកើនឡើងប្រចាំត្រីមាសជាមធ្យម២,១ភាគរយ ក្នុងឆ្នាំ២០២២ទាំងមូល។តម្លៃ​ប្រភេទអចលនទ្រព្យ​(Landed property) បាន​ធ្លាក់​ចុះ​៣,៦​ភាគរយ ​ក្នុងត្រីមាសទី៣ បើធៀប​នឹង​ការ​កើនឡើង​១,១​ភាគរយ ​ក្នុង​ត្រីមាស​ទី២។ចំណែក តម្លៃប្រភេទអចលនទ្រព្យ (Non-landed properties) បានកើនឡើង២,២ភាគរយ ក្នុងត្រីមាសទី៣ ធៀបនឹងការធ្លាក់ចុះ០,៦ភាគរយនៅក្នុងត្រីមាសទីពីរ។

លោកស្រី Christine Sun អនុប្រធានជាន់ខ្ពស់ផ្នែកស្រាវជ្រាវ និងវិភាគរបស់ក្រុមហ៊ុនOrangeTee & Tie បានអះអាងថា ទោះបីជាតម្លៃផ្ទះឯកជន បានស្ទុះងើបឡើងវិញយ៉ាងណាក្តី ប៉ុន្តែវាបានកើនឡើងទាបជាងអត្រា១ភាគរយ ចាប់តាំងពីត្រីមាសទី២ ដល់ត្រីមាសទី៣។

លោកស្រីបន្ថែមថា “តម្លៃផ្ទះឯកជន បានកើនឡើង៣,៩ភាគរយក្នុងរយៈពេល៩ខែដំបូងនៃឆ្នាំនេះ ដែលជាកំណើនតិចតួចប៉ុណ្ណោះ បើប្រៀបធៀប ទៅនឹងរយៈពេលដូចគ្នាក្នុងឆ្នាំ២០២២ ដែលបានកើនឡើង៨,២ភាគរយ និងរយៈពេលដូចគ្នាក្នុងឆ្នាំ២០២១ ដែលបានកើនឡើង៥,៣ភាគរយ”។

យោងតាមលោក Lee Sze Teck នាយកជាន់ខ្ពស់ផ្នែកវិភាគទិន្នន័យប្រចាំនៅក្រុមហ៊ុន Huttons Asia បានឱ្យដឹងថា “គម្រោងអចលនទ្រព្យ ដែលលក់ដាច់បំផុតចំនួន៣ នៅក្នុងត្រីមាសទី៣ ឆ្នាំនេះ គឺ គម្រោងGrand Dunman គម្រោង Lentor Hills Residences និងគម្រោង The Myst”៕

ក្រសួងទេសចរណ៍មានកិត្តិយស សូមជម្រាបជូនសមាគមទេសចរណ៍ គ្រប់ប្រតិបត្តិករទេសចរណ៍ ផ្នែកឯកជនស្ថាប័នពាក់ព័ន្ធ អ្នកសារព័ត៌មាន ទេសចរជាតិ-អន្តរជាតិ និងសាធារណជន ឱ្យបានជ្រាបថា ព្រះរាជាណាចក្រកម្ពុជា ត្រូវបាន

ជ្រើសរើសជា គោលដៅវប្បធម៌ឈានមុខគេក្នុងទ្វីបអាស៊ី ឆ្នាំ២០២៣ (Cambodia: Asia’s Leading CulturalDestination 2023) និង គោលដៅទេសចរណ៍យុវជនឈានមុខគេក្នុងទ្វីបអាស៊ី ឆ្នាំ២០២៣ (Cambodia: Asia’s Leading Youth Travel Destination 2023) តាមរយៈការបោះឆ្នោតលើប្រព័ន្ធអនឡាញពីអ្នកជំនាញក្នុងវិស័យ ទេសចរណ៍ និងបដិសណ្ឋារកិច្ច ប្រព័ន្ធផ្សព្វផ្សាយនានា និងអ្នកប្រើប្រាស់បណ្តាញសង្គមជុំវិញពិភពលោក រៀបចំដោយ ក្រុមហ៊ុន World Travel Awards មានទីស្នាក់ការនៅចក្រភពអង់គ្លេស។

សូមបញ្ជាក់ថា កម្ពុជាទទួលបានពានរង្វាន់នេះចំនួន ២ឆ្នាំជាប់គ្នា ដែលកាលពីថ្ងៃទី៧ ខែកញ្ញា ឆ្នាំ២០២២ ប្រតិភូក្រសួងទេសចរណ៍កម្ពុជាធ្លាប់បានទៅទទួលពានរង្វាន់នេះដោយផ្ទាល់ក្នុងឱកាសប្រារព្ធខួបទី២៩ឆ្នាំ របស់ ក្រុមហ៊ុន World Travel Awards ក្នុងកម្មវិធី World Travel Awards’ Asia & Oceania Gala Ceremony 2022 នៅទីក្រុងហូជីមិញ ប្រទេសវៀតណាម។

ក្រសួងទេសចរណ៍ សូមអំពាវនាវដល់សមាគមទេសចរណ៍ គ្រប់ប្រតិបត្តិករទេសចរណ៍ ផ្នែកឯកជន ស្ថាប័ន ពាក់ព័ន្ធ ទេសចរជាតិ-អន្តរជាតិ សាធារណជន និងអ្នកសារព័ត៌មាន មេត្តាជ្រាប និងចូលរួមផ្សព្វផ្សាយអំពីការទទួល បានពានរង្វាន់ កម្ពុជា ជាគោលដៅទេសចរណ៍ឈានមុខគេលើពិភពលោកផ្នែកទេសចរណ៍វប្បធម៌ និងដំណើរកម្សាន្ត របស់យុវជន ឆ្នាំ២០២៣ ខាងលើនេះឱ្យបានទូលំទូលាយ តាមគ្រប់មធ្យោបាយ និងគ្រប់រូបភាព សំដៅទាក់ទាញទេសចរ និងវិនិយោគិនអន្តរជាតិឱ្យមកទស្សនា និងវិនិយោគនៅ “កម្ពុជា – ព្រះរាជាណាចក្រអច្ឆរិយៈ ផ្តល់ភាពកក់ក្តៅ” កាន់ត ច្រើនថែមទៀត៕

        ដោយៈ គង់ ហ្វីអូណា

        ភ្នំពេញៈ កាលពីដើមសប្តាហ៍នេះ មន្រ្តីជាន់ខ្ពស់កម្ពុជា កូរ៉េបានបើកកិច្ចប្រជុំគណៈកម្មការចម្រុះកម្ពុជា កូរ៉េលើកទី៤ ដោយបានផ្តោតលើកិច្ចពិភាក្សា និងសហប្រតិបត្តិការ លើវិស័យសំខាន់ៗចំនួន១១។

កិច្ចប្រជុំនេះ ដឹកនាំដោយលោកជំទាវ ទួត បញ្ញា រដ្ឋលេខាធិការនៃក្រសួងការបរទេស និងសហប្រតិបត្តិការ អន្តរជាតិនៃព្រះរាជាណាចក្រកម្ពុជា និងលោកCHANG Ho-jin) អនុរដ្ឋមន្ត្រីទី១ក្រសួងការបរទេស នៃសាធារណរដ្ឋកូរ៉េ បានធ្វើជាសហប្រធានដឹកនាំកិច្ចប្រជុំគណៈកម្មការចម្រុះ កម្ពុជា-កូរ៉េលើកទី៥ ក្នុងលក្ខណៈមិត្តភាពស្និទ្ធ​ស្នាល និងប្រកបដោយផ្លែផ្កា។

ក្នុងអំឡុងពេលកិច្ចប្រជុំនេះ ភាគីទាំងពីរបានពិនិត្យឡើងវិញនូវវឌ្ឍនភាពនៃកិច្ចសហប្រតិបត្តិ ការរវាងប្រទេសទាំងពីរ ចាប់តាំងពីកិច្ចប្រជុំគណៈកម្មការចម្រុះលើកទី៤ ក្នុងឆ្នាំ២០១៨ និង ពិភាក្សាអំពីមធ្យោបាយនានា ដើម្បីជំរុញទំនាក់ទំនងទ្វេភាគីបន្ថែមទៀត លើវិស័យជាច្រើន រួមមាន នយោបាយ ការពារជាតិ ពាណិជ្ជកម្ម និងវិនិយោគ ហេដ្ឋារចនាសម្ព័ន្ធ កសិកម្ម សុខាភិបាល វប្បធម៌ ទេសចរណ៍ ការអភិវឌ្ឍធនធានមនុស្ស ការផ្លាស់ប្តូរប្រជាជន និងប្រជាជន ក្នុងចំណោមវិស័យផ្សេងទៀត។ភាគីទាំងពីរបានយល់ស្របគ្នាថា ទំនាក់ទំនង ទ្វេរភាគីគួរត្រូវដំឡើងកម្រិតឱ្យខ្ពស់ជាងនេះ ដើម្បីឆ្លុះបញ្ចាំងនូវទំនាក់ទំនង និងកិច្ចសហប្រតិបត្តិការ ដ៏ធំធេងរវាងប្រទេសទាំងពីរ។

ភាគីទាំងពីរបានវាយតម្លៃខ្ពស់ ចំពោះការផ្លាស់ប្តូរទស្សនកិច្ច និងការប្រាស្រ័យទាក់ទងជាន់ខ្ពស់ជាញឹកញាប់ និងគូសបញ្ជាក់ពីជំនួបប្រកបដោយផ្លែផ្កា រវាងសម្ដេចមហាបវវធិបតី ហ៊ុន ម៉ាណែតមកជា នាយករដ្ឋមន្ត្រី នៃព្រះរាជាណាចក្រកម្ពុជា និលោក យូន ស៊កយ៉ល (Yoon Suk Yeol)។

ចំពោះវិស័យសេដ្ឋកិច្ច ភាគីទាំងពីរបានកត់សម្គាល់ដោយសុទិ​ដ្ឋិនិយមអំពីការងើបឡើងវិញ ជាលំដាប់នៃពាណិជ្ជកម្មរវាងប្រទេសទាំងពីរ នៅក្រោយវិបត្តិជំងឺរាតត្បាត សកលកូវីដ-១៩ និងបាន សម្ដែងនូវការទុកចិត្តថា តាមរយៈការអនុវត្តដោយពេញលេញនូវកិច្ចព្រមព្រៀងពាណិជ្ជកម្មសេរី កម្ពុជា-កូរ៉េ និងកិច្ចព្រមព្រៀងស្ដីពីការចៀសវាងការយកពន្ធត្រួតគ្នា រវាងកម្ពុជា-សាធារណរដ្ឋកូរ៉ ទំហំពា​ណិ​​ជ្ជកម្មទ្វេរភាគី នឹងបន្តកើនឡើងថែមទៀត លើសកម្រិតមុនពេលមានជំងឺរាតត្បាតសកលទៅទៀត។

ភាគីកូរ៉េបានទទួលយកទៅពិចារណា នូវសំណើរបស់កម្ពុជា ដែលចង់ឱ្យកូរ៉េបើកចំហ ទីផ្សារកាន់តែធំជាងមុន សម្រាប់ផលិតផលកសិកម្មកម្ពុជា រួមមានដូចជា ស្វាយ គ្រាប់ស្វាយចន្ទី ម្រេច ម្ទេស ស្រកានាគ ម្ចាស់ និងដំឡូងមី។

ភាគីទាំងពីរបានឯកភាពធ្វើការរួមគ្នា ដើម្បីទាក់ទាញវិនិយោគកូរ៉េមកកាន់កម្ពុជាបន្ថែមទៀត និងបានសម្តែងការពេញចិត្ត ចំពោះកិច្ចសហប្រតិបត្តិការលើវិស័យហិរញ្ញវត្ថុ ដែលត្រូវបានបង្ហាញឱ្យ ឃើញតាមរយៈវិនិយោគរបស់កូរ៉េ លើធនាគារ និងស្ថាប័នមីក្រូហិរញ្ញវត្ថុចំនួន១៦។ ភាគីទាំងពីរបាន ឯកភាពគ្នាស្វែងរកឱកាសកិច្ចសហប្រតិបត្តិការផ្នែកហិរញ្ញវត្ថុបន្ថែមទៀត។

ចំពោះកិច្ចសហប្រតិបត្តិការ លើវិស័យហេដ្ឋារចនាសម្ព័ន្ធ ភាគីកម្ពុជាបានធ្វើការវាយតម្ល ខ្ពស់ចំពោះជំនួយរបស់កូរ៉េ ដើម្បីគាំទ្រគម្រោងនានានៅកម្ពុជា។ភាគីទាំងពីរបានទទួលស្គាល់ពីកិច្ច សហប្រតិបត្តិការអភិវឌ្ឍដ៏សកម្មក្នុងវិស័យដឹកជញ្ជូន និងបានឯកភាពគ្នាពន្លឿនការអនុវត្តគម្រោង “ស្ពានមិត្តភាពកម្ពុជា-កូរ៉េ»។ភាគីទាំងពីរបានកត់សម្គាល់ ជាមួយនឹងការពេញចិត្តចំពោះកំណើនកិច្ចសហប្រតិបត្តិការលើ វិស័យការពារជាតិ និងបានឯកភាពគ្នាបង្កើនកិច្ចសហប្រតិបត្តិការ រវាងប្រទេសទាំងពីរលើវិស័យនេះ ក្រោមក្របខណ្ឌទ្វេភាគី និងបេសកកម្មថែរក្សាសន្តិភាពរបស់អង្គការសហប្រជាជាតិ ដើម្បីបុព្វហេតុ សន្តិភាពអន្តរជាតិ។

ភាគីកូរ៉េឯកភាពបន្តផ្តល់ជំនួយ ដល់កងយោធពលខេមរភូមិន្ទ ដូចជាការបណ្តុះ បណ្តាល អាហារូបករណ៍ ជំនួយជាសម្ភារ និងបច្ចេកទេស ព្រមទាំងលើការដោះមីន។ភាគីកម្ពុជាបានសម្ដែងអំណរគុណ យ៉ាងក្រៃលែងចំពោះរដ្ឋាភិបាលសាធារណរដ្ឋកូរ៉េ សម្រាប់ ការផ្តល់ជំនួយអភិវឌ្ឍន៍ដល់កម្ពុជា ដែលបានរួមចំណែកយ៉ាងសំខាន់ ដល់ការអភិវឌ្ឍសង្គម-សេដ្ឋកិច្ច កម្ពុជា។

ភាគីទាំងពីរបានឯកភាពនឹងរៀបចំ កិច្ចប្រជុំគណៈកម្មការចម្រុះកម្ពុជា-កូរ៉េលើកទី៦ នៅសាធារណរដ្ឋកូរ៉េ តាមកាលបរិច្ឆេទដែលសមស្របសម្រាប់ភាគីទាំងពីរ។

លោកចាង ហូជីន បានសម្តែងនូវអំណរគុណយ៉ាងជ្រាល ជ្រៅចំពោះកម្ពុជា ដែលជាម្ចាស់ផ្ទះសម្រាប់ការស្វាគមន៍ដ៏កក់ក្តៅ និងការរៀបចំយ៉ាងល្អប្រសើរនូវ កិច្ចប្រជុំដ៏មានអត្ថន័យ និងសារសំខាន់ សម្រាប់ការអភិវឌ្ឍ ឱ្យកាន់តែស៊ីជម្រៅនូវទំនាក់ទំនងទ្វេភាគី៕

ដោយៈ តែម សុខុម

ម៉ាកាវៈ រដ្ឋបាលក្រុងម៉ាកាវ ប៉ាន់ប្រមាណថា ក្រុងម៉ាកាវ នឹងទទួលបានប្រាក់ចំណូលសរុប ពីបនល្បែងកាស៊ីណូ២៦,៨០ពាន់លានដុល្លារអាមេរិក ក្នុងឆ្នាំ២០២៣។ នេះបើយោងតាមសារព័ត៌មាន GGRAsia ចុះផ្សាយនៅថ្ងៃព្រហស្បតិ៍ ទី០២ ខែវិច្ឆិកា។

តាមរយៈសំណើថវិកាសម្រាប់ឆ្នាំ សារពើពន្ធ២០២៤ ដែលបានចេញផ្សាយកាលពីថ្ងៃពុធ ទី១ ខែវិច្ឆិកា រដ្ឋបាលក្រុងម៉ាកាវ លើកឡើងថា “ដោយសារក្រុងម៉ាកាវ បានដាក់ចេញវិធានការថ្មីៗបន្ថែមទៀតដើម្បីជំរុញវិស័យទេសចរណ៍ និងកំពុងស្វែងរកទីផ្សារទេសច​រណ៍បន្ថែមទៀត នៅចិនដីគោក និងនៅបរទេស មានការរំពឹងទុកថា ចំនួនភ្ញៀវទេសចរមកកាន់ក្រុងម៉ាកាវ នឹងបន្តកើនឡើង”។

រដ្ឋបាលក្រុងម៉ាកាវ បន្ថែមថា “ដោយផ្អែកលើវិធានការទាំងនោះ ប្រាក់ចំណូលសរុប បានពីបនល្បែងកាស៊ីណូ សម្រាប់ឆ្នាំសារពើពន្ធ២០២៤ ត្រូវបានប៉ាន់ប្រមាណថា នឹងឈានដល់២៦,៩៦ពាន់លានដុល្លារអាមេរិក”។

រដ្ឋបាលក្រុងម៉ាកាវបានព្យាករណ៍ថា ប្រាក់ចំណូលពីពន្ធល្បែងស៊ីសងសម្រាប់ឆ្នាំ២០២៤ ទាំងមូលនឹងឈានដល់ជាង៩,៤៣ពាន់លានដុល្លារអាមេរិក។

រដ្ឋបាលក្រុងនេះ ក៏ប៉ាន់ប្រមាណដែរថា ក្នុងឆ្នាំ២០២៤ ខ្លួននឹងប្រមូលពន្ធលើកម្រៃជើងសារ បង់ដោយកាស៊ីណូបានចំនួន៣,៧៤លានដុល្លារអាមេរិកផងដែរ។

នៅក្នុងកញ្ចប់ថវិការបស់ខ្លួន សម្រាប់ឆ្នាំ២០២៣ រដ្ឋបាលក្រុងម៉ាកាវ រំពឹងទទួលបានប្រាក់ចំណូលសរុប ពីបនល្បែងកាស៊ីណូជាង១៦,២២ពាន់លានដុល្លារអាមេរិក ហើយបានប៉ាន់ប្រមាណថា ប្រាក់ចំណូលបានពីពន្ធល្បែងស៊ីសង នឹងឈានដល់ជាង៦,៣៤ពាន់លានដុល្លារអាមេរិក៕ GGRAsia៕