នាព្រឹកថ្ងៃទី១៩ ខែតុលា ឆ្នាំ២០២៣, សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានជួបពិភាក្សាការងារជាមួយ ឯកឧត្តម ថងលុន ស៊ីសុលីត ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ ក្នុងឱកាសនៃការចូលរួមក្នុង “វេទិកាខ្សែក្រវាត់ និងផ្លូវ លើកទី៣” នៅរដ្ឋធានីប៉េកាំង ។

ក្នុងឱកាសនៃជំនួបនេះ ឯកឧត្តម ថងលុន ស៊ីសុលីត បានបង្ហាញនូវក្តីរីករាយចំពោះជំនួបជាមួយ សម្តេចធិបតី នៅរដ្ឋធានីប៉េកាំង នាឱកាសនេះ និងសម្តែងការអបអរសាទរជូន សម្តេចធិបតី ចំពោះការចូលកាន់មុខតំណែងជា នាយករដ្ឋមន្ត្រី នៃព្រះរាជាណាចក្រកម្ពុជា ព្រមជាមួយនឹងការជឿជាក់ថា ក្រោមការដឹកនាំរបស់ សម្តេចធិបតី ទំនាក់ទំនងរវាងកម្ពុជា-ឡាវ នឹងកាន់តែរីកចម្រើនទៅមុខ ។ ឆ្លៀតក្នុងឱកាសនោះ ឯកឧត្តមប្រធានរដ្ឋឡាវ ក៏បានផ្តាំផ្ញើសាកសួរសុខទុក្ខ ថ្វាយព្រះករុណា ព្រះបាទព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងជូន សម្តេចអគ្គមហាសេនាបតីតេជោ ហ៊ុន សែន និងបានសម្តែងនូវការអបអរសាទរផងដែរ ចំពោះជោគជ័យរបស់កម្ពុជាក្នុងការធ្វើជាម្ចាស់ផ្ទះនៃកិច្ចប្រជុំកំពូលអាស៊ានលើកទី៤០ និង៤១ ព្រមទាំងកិច្ចប្រជុំកំពូលពាក់ព័ន្ធ ក្នុងឆ្នាំ២០២២ ក៏ដូចជាព្រឹត្តិការណ៍ប្រកួតកីទ្បាអាស៊ីអាគ្នេយ៍លើកទី៣២ និងការប្រកួតកីឡាអាស៊ានប៉ារ៉ាហេ្គមលើកទី១២ នៅក្នុងឆ្នាំ២០២៣ ។ជាការឆ្លើយតប សម្តេចធិបតី បានថ្លែងអំណរគុណចំពោះឱកាសនៃជំនួបនេះ និងបានវាយតម្លៃខ្ពស់ចំពោះវឌ្ឍនភាពរីកចម្រើននៃកិច្ចសហប្រត្តិការលើគ្រប់វិស័យរវាងប្រទេសទាំងពីរ ដែលសម្រេចបានកន្លងមក ។ ចំពោះទិសដៅទៅមុខ សម្តេចធិបតី បានគាំទ្រការបន្តអនុវត្ត “លំហាត់រួមត្រីភាគី ស្តីពីការសង្គ្រោះគ្រោះមហន្តរាយ កម្ពុជា-ឡាវ-វៀតណាម ដូចដែលមានការរៀបចំឡើងកាលពីខែកញ្ញា ឆ្នាំ២០២២ កន្លងទៅ និងបានលើកឡើងនូវគំនិតផ្តួចផ្តើមមួយចំនួនពាក់ព័ន្ធនឹងការជំរុញកិច្ចសហប្រតិបត្តិការក្នុងវិស័យទេសចរណ៍ តាមរយៈការដាក់ចេញនូវកិច្ចសហប្រតិបត្តិការទេសចរណ៍ត្រីភាគី កម្ពុជា-ឡាវ-វៀតណាម “ប្រទេសបី គោលដៅតែមួយ (Three Countries One Destination)” និងការភ្ជាប់ជើងហោះហើរត្រង់ ភ្នំពេញ-វៀងច័ន្ទន៍-ភ្នំពេញ ។ជារួម ថ្នាក់ដឹកនាំទាំងពីរបានធ្វើការវាយតម្លៃខ្ពស់ចំពោះសមិទ្ធផលនៃ “ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង” ដែលត្រូវបានបង្កើតឡើងចាប់តាំងពីឆ្នាំ២០១៩ មក និងបានឯកភាពបន្តពង្រឹង និងពង្រីកកិច្ចសហប្រតិបត្តិការលើវិស័យមួយចំនួន ជាអាទិ៍៖ វិស័យការពារជាតិ, អប់រំ, ថាមពល, ការផ្លាស់ប្តូរទស្សនកិច្ចថ្នាក់ដឹកនាំជាន់ខ្ពស់ និងគំនិតផ្តួចផ្តើមរបស់ សម្តេចធិបតី ពាក់ព័ន្ធនឹងកិច្ចសហប្រតិបត្តិការទេសចរណ៍ត្រីភាគី កម្ពុជា-ឡាវ-វៀតណាម “ប្រទេសបី គោលដៅតែមួយ (Three Countries One Destination)” ។

ជាចុងក្រោយ ឯកឧត្តមប្រធានរដ្ឋឡាវ បានអញ្ជើញ សម្តេចធិបតី ហ៊ុន ម៉ាណែត ទៅបំពេញទស្សនកិច្ចផ្លូវការនៅក្នុងប្រទេសឡាវ ហើយ សម្តេចធិបតី បានទទួលយកការអញ្ជើញនេះប្រកបដោយក្តីសោមន្សរីករាយ ដោយនឹងកំណត់យកកាលបរិច្ឆេទសមស្របណាមួយ នាពេលខាងមុខ ៕

        ដោយៈ ជេស៊ីកា

        ភ្នំពេញៈ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញចូលរួមកិច្ចប្រជុំកំពូលអាស៊ាន- ក្រុមប្រឹក្សាសហប្រតិបត្តិការឈូងសមុទ្រ (ASEAN-GCC Summit) ដែលនឹងប្រព្រឹត្តទៅនៅថ្ងៃទី២០ ខែតុលា ឆ្នាំ២០២៣ នៅរាជធានីរីយ៉ាដ ព្រះរាជាណាចក្រអារ៉ាប៊ីសាអូឌីត។

ការអញ្ជើញចូលរួមកិច្ចប្រជុំនេះ គឺតបតាមការអញ្ជើញរបស់ព្រះចៅអធិរាជ គ្រប់គ្រងថែរក្សាការពារព្រះវិហារឥស្លាម ដ៏ស័ក្តិសិទ្ធ ទាំងពីរ ស្តេច សាលម៉ាន ពិន អាប់ឌុលអាហ្ស៊ីស អាល សាអ៊ូឌ (Salman bin Abdulaziz Al Saud) ព្រះមហាក្សត្រ នៃព្រះរាជាណាចក្រអារ៉ាប៊ីសាអូឌីត។

អញ្ជើញអមដំណើរ សម្ដេចធិបតី រួមមាន លោកសុខ ចិន្តាសោភា ឧបនាយករដ្ឋមន្តី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ ឯកឧត្តមទេសរដ្ឋមន្ត្រី រដ្ឋមន្ត្រីមួយចំនួន មន្ត្រីរដ្ឋាភិបាលជាន់ខ្ពស់ ព្រមទាំងថ្នាក់ដឹកនាំវិស័យឯកជន។

កិច្ចប្រជុំកំពូលនេះ គឺជាវេទិកាសម្រាប់ថ្នាក់ដឹកនាំអាស៊ាន និងក្រុមប្រឹក្សាសហប្រតិបត្តិការ ឈូងសមុទ្រ ពិភាក្សារិះរកមធ្យោបាយនានា ដើម្បីបង្កើនកិច្ចសហប្រតិបត្តិការ ក្នុងវិស័យដែលផ្តល់ ផលប្រយោជន៍ទៅវិញទៅមក រួមមានវិស័យពាណិជ្ជកម្ម និងការវិនិយោគ ទីក្រុងឆ្លាត ថាមពល ការ ប្រយុទ្ធប្រឆាំងភេរវកម្ម និងទេសចរណ៍ ជាដើម។

កិច្ចប្រជុំកំពូលនេះគ្រោងនឹងកត់សម្គាល់នូវ ឯកសារលទ្ធផលចំនួនពីរ ទី១ សេចក្ដីថ្លែងការណ៍រួមសម្រាប់កិច្ចប្រជុំកំពូល និងទី២ ឯកសារ ក្របខ័ណ្ឌនៃកិច្ចសហប្រតិបត្តិការអាស៊ាន -ក្រុមប្រឹក្សាសហប្រតិបត្តិការឈូងសមុទ្រ (សម្រាប់ឆ្នាំ ២០២៤-២០២៨)។

អំឡុងពេលនៃកិច្ចប្រជុំកំពូលនេះ សម្ដេចធិបតីនឹងមានជំនួបទ្វេរភាគីជាមួយឥស្សរជនបរទេស មួយចំនួននៅរាជធានីរីយ៉ាដ ដើម្បីជំរុញកិច្ចសហប្រតិបត្តិការទ្វេរភាគីរវាងកម្ពុជា និងប្រទេសជាសមា​ជិក នៃក្រុមប្រឹក្សាសហប្រតិបត្តិការឈូងសមុទ្រ៕

ដោយៈ តែម សុខុម
បាងកក: រដ្ឋមន្ត្រីក្រសួងថាមពលថៃ លោកPeeraphan Salirathaviphak បាន​ថ្លែងថា កិច្ចចរចាជាមួយកម្ពុជា ជុំវិញការអភិវឌ្ឍតំបន់ទាមទារត្រួតស៊ីគ្នា(OCA) នៃឈូងសមុទ្រថៃ គួរធ្វើឡើងដាច់ដោយឡែក ពីការចរចាជុំវិញការកំណត់ព្រំដែនសមុទ្រ។

នេះបើយោងតាមកាសែត The Nation ចុះផ្សាយកាលពីថ្ងៃពុធ ទី១៨ ខែតុលា។ តំបន់ត្រួតស៊ីគ្នា OCA លាតសន្ធឹងប្រវែង២៧.០០០គីឡូម៉ែត្រការ៉េ នៃឈូងសមុទ្រថៃ ដែលមានសក្តានុពល ផ្ទុករ៉ែឧស្ម័នធម្មជាតិ និងរ៉ែប្រេងយ៉ាងច្រើនមហាសាល។

លោក Peeraphan Salirathaviphak បានលើកឡើងថា ដើម្បីឱ្យកិច្ចចរចាជុំវិញការអភិវឌ្ឍរួមគ្នា ទទួលបានជោគជ័យ ក្រុមអ្នកចរចាថៃ គួរតែទុកការចរចាជុំវិញព្រំដែន សមុទ្រមួយឡែកសិន ដោយទុកជជែកចរចានៅពេលក្រោយ។លោកមិនហ៊ានរំពឹងថា ការចរចានេះនឹងទទួលបានជោគជ័យ ឬក៏អត់នោះទេ ដោយលោកគ្រាន់តែនិយាយថា ប្រទេសទាំងពីរប្រកាន់ជំហរចង់បានច្រើន ប្រសិនបើបញ្ហានេះត្រូវបានដោះស្រាយ។

កាលពីឆ្នាំ២០០១ កម្ពុជា និងប្រទេសថៃ បានចុះអនុស្សរណៈនៃការយោគយល់គ្នា (MoU) ដើម្បីរួមគ្នាអភិវឌ្ឍតំបន់ត្រួតស៊ីគ្នានេះ។ ទោះជាយ៉ាងណា ការចរចាមានវឌ្ឍនភាពតិចតួចណាស់ ហើយជម្លោះនៅតែមិនអាចដោះស្រាយបាន។ក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងរវាងប្រទេសទាំងពីរហាក់ល្អប្រសើរជាងមុន ហើយកិច្ចចរចាជុំវិញតំបន់មានជម្លោះនេះក៏ត្រូវបានបន្តឡើងវិញ។នៅខែមករា ឆ្នាំ២០២៣ រដ្ឋាភិបាលកម្ពុជា និងប្រទេសថៃ បានចុះហត្ថលេខា លើសេចក្តីថ្លែងការណ៍រួមមួយ ដោយព្រមព្រៀងជំរុញបន្តការចរចាជុំវិញការអភិវឌ្ឍតំបន់ត្រួតស៊ីគ្នានេះ៕ The Nation៕

        ដោយៈ គង់ សូរិយា

        ខេត្តកែបៈ កំពង់ផែថ្មីមួយទៀត កំពុងដំណើរការសាងសង់ គិតមកតល់ពេលនេះ សម្រេចលទ្ធផលបានប្រមាណ៥០% នៃគម្រោងសរុប។

កំពង់ផែដែលកំពុងដំណើរការសាងសង់នេះ គឺនៅកោះទន្សាយតែម្តង ដែលស្ថិតនៅក្នុងសង្កាត់កែប ក្រុងកែប ខេត្តកែប ដោយគ្រោងចំណាយថវិកាប្រមាណជាង១,៦លានដុល្លារ។

ដោយឡែកដំណើរការសាងសង់ ផ្លូវប្របមាត់សមុទ្រឯណេះវិញ បាន និងកំពុងនឹងដំណើរការដូចគ្នា ក្នុងលទ្ធផលប្រមាណ៨២%ហើយដែរ។ គម្រោងទាំងនេះក្រោមកម្ចីឥណទាន របស់ធនាគារអភិវឌ្ឍន៍អាស៊ី (ADB)។

នាថ្ងៃទី១៨ ខែតុលា ឆ្នាំ២០២៣នេះ ប្រតិភូតំណាងដោយក្រសួងសាធារណការ និងដឹកជញ្ជូន ជាមួយថ្នាក់ដឹកនាំរដ្ឋបាលខេត្តកែបទទួលបន្ទុក និងមន្ទីរពាក់ព័ន្ធ បានចូលរួមចុះត្រួតពិនិត្យការដ្ឋានអនុគម្រោងសាងសង់ផ្លូវអមតាមឆ្នេរ និងអនុគម្រោងសាងសង់កំពង់ផែទេសចរណ៍កោះទន្សាយ។ លោក ហម និមល អនុប្រធានទីប្រឹក្សាបច្ចេកទេសរបស់ ADB បានឲ្យដឹងថា កំពង់ផែទេសចរណ៍កោះទន្សាយ គិតមកទល់ពេលនេះ សម្រេចការសាងសង់បានចំនួន៤៩,៨%ហើយ កន្លងទៅក្រុមហ៊ុនចាស់ ធ្វើការហាក់មានការយឺតយ៉ាវ តែយ៉ាងណាក្រុមហ៊ុនថ្មីដែលទទួលបានសិទ្ធិសាងសង់បន្ត នឹងបញ្ចប់គម្រោងកំពង់ផែកោះទន្សាយនេះ នៅត្រឹមខែមករា ឆ្នាំ២០២៤។

លោកបន្តថា សម្រាប់គម្រោងមួយទៀត គឺផ្លូវប្របមាត់សមុទ្រ ដែលយើងកំពុងដំណើរការ ដែលគិតមកទល់ពេលនេះ សម្រេចលទ្ធផលចំនួន៨២%ហើយដែរ។ ហើយអនុគម្រោងរបស់យើងទាំង៣ មានទីលានទុកដាក់សំរាមស្តង់ដារ (បានសម្ពោធរួចរាល់) អនុគម្រោ​ងកំពង់ផែទេសចរណ៍កោះទន្សាយ និងអនុគម្រោងផ្លូវប្របមាត់សមុទ្រ ពេលនេះមានក្រុមហ៊ុនតែមួ​យ កំពុងដំណើរការសាងសង់ ដែលយើងអាចទុកចិត្តបានថា អនុគម្រោងនីមួយៗ នឹងបញ្ចប់បានទាន់ពេលវេលា។ យ៉ាងណា លោក សោម ពិសិដ្ឋ អភិបាលខេត្តកែប បានបញ្ជាក់ថា ផ្លូវប្របមាត់សមុទ្រនេះ នឹងក្លាយជាសសៃឈាមទេសចរណ៍យ៉ាងសំខាន់ តភ្ជាប់គ្នារវាង ឆ្នេរកែបនិងឆ្នេរអង្កោល នាថ្ងៃអនាគត។

លោកអភិបាលក៏ធ្លាប់លើកឡើងដែរថា ការសាងសង់កំពង់ផែទេសចរណ៍កោះទន្សាយ ជាការពង្រីកសក្តានុពល វិស័យទេសចរណ៍ និងសេដ្ឋកិច្ច របស់ខេត្តកែបតាមរយៈផ្លូវទឹកទ្វេរភាគី ជាមួយប្រទេសក្នុងតំបន់ ហើយផែនេះអាចឈាន ទៅដល់ទទួលភ្ញៀវកម្រិតថ្នាក់អន្តរជាតិផងដែរ សម្រាប់ថ្ងៃអនាគត៕

ដោយៈ តែម សុខុម

ភ្នំពេញ: មន្ត្រីជាន់ខ្ពស់មួយរូបបានអះអាង កាលពីថ្ងៃពុធ ទី១៨ ខែតុលា ថា កម្ពុជា ទទួលបានអ្នកដំណើរ តាមផ្លូវអាកាសជិត៣,៧លាននាក់ក្នុងរយៈពេល៩ខែ ដើមឆ្នាំ២០២៣ ពោលគឺកើនឡើង១៦២%។

លោក ស៊ិន ច័ន្ទសេរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល មានប្រសាសន៍ថា ក្រុមហ៊ុនអាកាសចរណ៍ជាតិ និងអន្តរជាតិបានដំណើរការ ជើងហោះហើរសរុបចំនួន៣៧,២០០ជើងមកកាន់កម្ពុជា អំឡុងពេលពីខែមករា ដល់ខែកញ្ញា ឆ្នាំនេះដែលកើនឡើង១០៣%។

លោកថ្លែងថា ផ្ទុយនឹងការកើនឡើងនូវចំនួន អ្នកដំណើរតាមផ្លូវអាកាស ការដឹកជញ្ជូនទំនិញតាមផ្លូវអាកាសរបស់កម្ពុជា បានធ្លាក់ចុះ៦%មកនៅត្រឹមជាង៤១.០០០តោន អំឡុងពេល៩ខែដើមឆ្នាំនេះ។លោកមានជំនឿយ៉ាងមុតមាំថា អាកាសយានដ្ឋានអន្តរជាតិសៀមរាប អង្គរ (SAI) វិនិយោគដោយក្រុមហ៊ុនចិន ដែលបានចាប់ផ្តើមប្រតិបត្តិការពាណិជ្ជកម្មកាលពីថ្ងៃច័ន្ទ ដើមសប្ដាហ៍នេះនឹងជួយទាក់ទាញក្រុមហ៊ុនអាកាសចរណ៍អន្តរជាតិ និងអ្នកដំណើរមកកាន់កម្ពុជា កាន់តែច្រើន។

លោកបន្តថា “ជាមួយនឹងផ្លូវរត់ប្រវែង៣.៦០០ម៉ែត្រ អាកាសយានដ្ឋានអន្តរជាតិសៀមរាប អង្គរ (SAI) គឺជាអាកាសយានដ្ឋានអន្តរជាតិកម្រិត4E ដែលអាចទទួលជើងហោះហើរ ចម្ងាយឆ្ងាយពីជុំវិញពិភពលោក”។លោកបានបន្ថែមថា “យើងសង្ឃឹមថា អាកាសយានដ្ឋាននេះ នឹងទាក់ទាញក្រុមហ៊ុន អាកាសចរណ៍អន្តរជាតិថ្មីៗ ឱ្យមកធ្វើប្រតិបត្តិការជើងហោះហើរត្រង់ ទៅកាន់ខេត្តសៀមរាប ជាទឹកដីនៃឧទ្យានបុរាណអង្គរ ដែលត្រូវបានចុះបញ្ជីជាសម្បត្តិ បេតិកភណ្ឌពិភពលោករបស់អង្គការយូណេស្កូ”៕ Xinhua៕

ដោយៈ ជេស៊ីកា
ព្រះសីហនុៈ ស្ថានភាពអាជីវកម្ម នៅខេត្តព្រះសីហនុ ចាប់ផ្តើមមានភាពល្អប្រសើរ ជាមួយស្ថេរភាពនយោបាយ និងសេដ្ឋកិច្ចកម្ពុជា។នេះបើតាមលោកឡុង ឌីម៉ង់អភិបាលរងខេត្តព្រះសីហនុ។

លោកបានមានប្រសាសន៍ឲ្យដឹង តាមបណ្តាញតេឡេក្រាមនាព្រឹកថ្ងៃទី១៨ តុលានេះថា ស្របពេលស្ថានភាពនយោបាយ និងសេដ្ឋកិច្ចកម្ពុជាមានភាពល្អប្រសើរ យើងឃើញគណៈប្រតិភូវិនិយោគពីខេត្តស៊ិន ជិនបានមកពិភាក្សាការងារជាមួយអភិបាលខេត្ត ដោយពួកគាត់មានការចាប់អារម្មណ៍យកទៅពិចារណា និងអាចរកដំណោះស្រា​យ ដើម្បីធ្វើយ៉ាងណាចូលរួមដោះស្រាយបញ្ហាជាប់គាំងផងដែរ។លោកបន្តថា “ការដោះស្រាយបញ្ហាអាគារជាប់គាំង ស្ថិតនៅលើអ្វីដែលគេនឹងជជែកគ្នា ហើយយើងក៏ត្រៀមលក្ខណៈសម្បត្តិគ្រប់គ្រាន់ដើម្បីសហការ និងជម្រុញដើម្បីឲ្យទទួលបានជោគជ័យទាំងអស់គ្នា”។

កាលពីសប្តាហ៍មុន មហាសេដ្ឋីអចលនទ្រព្យចិន លោក វ៉ាង ហ្ស៊ី (Wang Shi) និងអ្នកធុរកិច្ចចិនប្រមាណ៥០ក្រុមហ៊ុន បានមកទស្សនា និងសិក្សាស្វែងយល់ ពីឱកាសវិនិយោគនៅកម្ពុជា ពិសេសក្រុងព្រះសីហនុកាលពីសប្តាហ៍មុន។លោកបានជួបជាមួយក្រុមមន្រ្តីជាន់ខ្ពស់កម្ពុជា និងបានសិក្សាពីសក្តានុពលនៅខេត្តព្រះសីហនុ ដោយប្រតិភូរបស់លោក កំពុងចាប់អារម្មណ៍ និងចូលរួមសង្រ្គោះអាគារជាប់គាំងឡើងវិញ ប៉ុន្តែថាតើពេលណាពួកគេនឹងចាប់ផ្តើម ចាប់ផ្តើមដោយរបៀបណា និងបោះទុនយ៉ាងដូចម្តេច មិនទាន់មានព័ត៌មានលំអិតនៅឡើយទេ។

តាមរយៈសារព័ត៌មានក្នុងស្រុកមួយបានអះអាងថា វត្តមានរបស់មហាសេដ្ឋីចិនរូបនេះ អាចជាក្តីសង្ឃឹមថ្មីមួយទៀត សម្រាប់វិស័យអចលនទ្រព្យនៅកម្ពុជា បន្ទាប់ពីវិស័យនេះបានរងផលប៉ះពាល់ ដោយសារវិបត្តិជំងឺកូវីដ-១៩ និងឥទ្ធិពលសង្គ្រាមរវាងរុស្សី និងអ៊ុយក្រែន។លោកខន គង្គាអគ្គនាយកក្រុមហ៊ុនERA Cambodiaបានមានប្រសាសន៍ឲ្យដឹងកាលពីសប្តាហ៍មុនថា អាគារខុនដូក្រុងព្រះសីហនុបាននិងកំពុង ចាប់ផ្តើមមានភាពប្រសើរឡើងលើការទិញ លក់ ជួល ដែលភាពល្អប្រសើរនេះ កើតមានក្រោយការរៀបចំរដ្ឋាភិបាលថ្មី និងកំលាំងចលករជម្រុញ ពីការដាក់ដំណើរការផ្លូវល្បឿនលឿនភ្នំពេញ ព្រះសីហនុ។ លោកបន្តថា “ទីផ្សារមានភាពប្រសើរឡើង ប៉ុន្តែមិនទាន់មានសញ្ញាប្រសើរឡើងខ្លាំងនៅឡើយទេ”៕

សុខុម
បាងកកៈ ប្រភពច្បាស់ការទម្លាយឱ្យដឹងថា មហាយក្សចិន បានបញ្ជាឱ្យបណ្ដាធនាគាររដ្ឋពន្យារពេលទារបំណុលមានស្រាប់ដែលរដ្ឋបាលមូលដ្ឋានជំពាក់ ដោយត្រូវផ្ដល់កម្ចីរយៈពេលវែងជាងមុន និងអត្រាការប្រាក់ទាបជាងមុន។

ចំណាត់ការនេះគឺជាផ្នែកមួយនៃកិច្ចប្រឹងប្រែងរបស់រដ្ឋាភិបាលក្រុងប៉េកាំង ដើម្បីកាត់បន្ថយហានិភ័យបំណុលនៅក្នុងសេដ្ឋកិច្ចធំបំផុតទី២ របស់ពិភពលោកមួយនេះ។ នេះបើយោងតាមកាសែត Bangkok Post ចុះផ្សាយកាលពីថ្ងៃអង្គារ ទី១៧ ខែតុលា។

ក្រុមអ្នកជំនាញសេដ្ឋកិច្ចលើកឡើងថា បណ្ដារដ្ឋបាលក្រុងដែលកំពុងជាប់ផុងក្នុងបំណុលបានបង្កហានិភ័យយ៉ាងធំដល់សេដ្ឋកិច្ចចិន និងប្រហែលជាបង្កហានិភ័យដល់ស្ថិរភាពហិរញ្ញវត្ថុរបស់ប្រទេសនេះទៀតផង ស្របពេលវិស័យអចលនទ្រព្យចិន ធ្លាក់កាន់តែជ្រៅ ការវិនិយោគច្រើនលើសលប់ក្នុងពេលជាច្រើនឆ្នាំមកនេះលើហេដ្ឋារចនាសម្ព័ន្ធ និងថ្លៃចំណាយកើនឡើងនៅក្នុងការទប់ស្កាត់ការរីករាលដាលនៃវិបត្តិកូវីដ-១៩។
បំណុលរបស់រដ្ឋបាលមូលដ្ឋានបានឈានដល់១២,៦ទ្រីលានដុល្លារអាមេរិក ឬស្មើនឹង៧៦%នៃផលទុនជាតិសរុប (GDP) របស់ប្រទេសនេះក្នុងឆ្នាំ២០២២ ដោយកើនឡើងពី៦២,២%ក្នុងឆ្មាំ២០១៨។

មួយផ្នែកនៃបំណុលនោះគឺជាបំណុលបោះផ្សាយសញ្ញាប័ណ្ណ ដែលក្រុងនានាប្រើប្រាស់ដើម្បីកៀរគរមូលធិនិសម្រាប់ចំណាយលើគម្រោងហេដ្ឋារចនាសម្ព័ន្ធ ដែលជាញឹកញាប់ធ្វើឡើងតាមការជំរុញរបស់រដ្ឋាភិបាលថ្នាក់ជាតិ នៅពេលខ្លួនត្រូវការជំរុញកំណើនសេដ្ឋកិច្ច។

យោងតាមប្រភពឱ្យដឹងថា ធនាគារកណ្ដាលចិន (PBOC) បានចេញបញ្ជាកាលពីសប្ដាហ៍មុនឱ្យធនាគាររដ្ឋធំៗពន្យាររយៈពេលនៃកម្ចី កែសម្រួលផែនការសងត្រលប់ និងកាត់បន្ថយអត្រាការប្រាក់នៃកម្ចីមិនទាន់ទូទាត់៕ Bangkok Post៕

ដោយៈ សុខុម
វ៉ាស៊ីនតោនៈ អត្រាប្រាក់កម្ចីទិញផ្ទះ នៅសហរដ្ឋធាមេរិក បានហក់ឡើង៥សប្តាហ៍ជាប់ៗគ្នា កាលពីថ្ងៃព្រហស្បតិ៍ សប្ដាហ៍មុន។ នេះបើយោងតាមការចុះផ្សាយរបស់សារព័ត៌មាន CNN។

ការហក់ឡើងអត្រាការប្រាក់កម្ចីទិញផ្ទះ ច្រើនសប្ដាហ៍ជាប់ៗគ្នានេះកើតមានឡើង បន្ទាប់ពីការបញ្ចេញរបាយការណ៍ស្ដីពីការងារ និងអតិផរណាកាលពីពេលថ្មីៗនេះ ដែលកើនឡើងលើសការព្យាករកន្ល​ង​មក និងក្ដីរំពឹងថា អត្រាការប្រាក់ខ្ពស់រាប់ទសវត្សរ៍ អាចហក់ឡើងកាន់តែខ្ពស់ និងកាន់តែយូរ។

អត្រាការប្រាក់កម្ចីទិញផ្ទះកាន់តែខ្ពស់ កំពុងបង្កើនភាពតានតឹងបន្ថែមទៀត លើអ្នកទិញផ្ទះនាពេលបច្ចុប្បន្ន ដែលកំពុងប្រឈមមុខនឹងតម្លៃផ្ទះខ្ពស់ផងដែរ ដោយសារកង្វះស្តុកផ្ទះសម្រាប់លក់។

យោងតាមទិន្នន័យពីស្ថាប័ន Freddie Mac ឱ្យដឹងថា អត្រាការប្រាក់ថេររយៈពេល៣០ឆ្នាំ ជាមធ្យម៧,៥៧%ក្នុងសប្តាហ៍ ដែលបញ្ចប់នៅថ្ងៃទី១២ ខែតុលា ដោយកើនឡើងពី៧,៤៩%កាលពីសប្តាហ៍មុននេះ។

កាលពីមួយឆ្នាំមុន អត្រាការប្រាក់់ថេររយៈពេល៣០ឆ្នាំ គឺស្ថិតក្នុងរង្វង់៦,៩២%។ លើកចុងក្រោយ ដែលអត្រាការប្រាក់ហក់ឡើងខ្ពស់ដល់ថ្នាក់នេះគឺនៅខែធ្នូ ឆ្នាំ២០០០។

លោក Sam Khater ប្រធានសេដ្ឋវិទូនៅស្ថាប័ន Freddie Mac និយាយថា “ដំណឹងល្អគឺថា សេដ្ឋកិច្ច និងប្រាក់ចំណូលបន្តកើនឡើងក្នុងល្បឿនដ៏រឹងមាំ។ ប៉ុន្តែទីផ្សារលំនៅឋាន នៅតែមានភាពស្រពិចស្រពិល ដោយសារកង្វះលទ្ធភាពទិញផ្ទះ”។ លោកបន្តថា “ជាលទ្ធផល តម្រូវការទិញនៅតែស្ថិតក្នុងកម្រិតទាបខ្លាំង ក្នុងរយៈពេល៣ទសវត្សរ៍មកនេះ”៕ CNN៕