ដោយៈ គង់ ជេស៊ីកា
  ភ្នំពេញៈ ក្រុមហ៊ុនផលិតដើមគ្រីស្មាស សម្ភារៈពាក់ព័ន្ឋបាននិងកំពុងបោះទុនផលិតនៅកម្ពុជា គឺមានទីតាំងនៅតំបន់សសេដ្ឋកិច្ចពិសេសមួយទំហំជាង២០០ហិកតា នាទីក្រុងបាវិត ខេត្តស្វាយរៀង។

អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា លោកជា វុទ្ឋីបានមានប្រសាសន៍ឲ្យដឹងក្នុងវេទិកាវិនិយោគ ដែលរៀបចំដោយសមាគមឧកញ៉ាកម្ពុជា និងក្រុមប្រឹក្សាអភិវឌ្ឍន៍កម្ពុជា កាលពីចុងសប្តាហ៍មុនថា ក្រុមហ៊ុនម៉ាកល្បីៗដែលផលិតសម្ភារៈតាំងលំអរបុណ្យគ្រីស្មាស់ គឺក្រុមហ៊ុនតូយ៉ូគ្រុប និងរីវើស្តារ ដែលបាននិងកំពុងផលិត នៅក្រុងបាវិត ប្រទេសកម្ពុជា។

លោកបន្តថា ក្រុមហ៊ុនតូយូគ្រុប និងរីវើស្តារចូលមកកម្ពុជាផលិតសម្ភារៈតាំងលំអរបុណ្យគ្រីស្មាស នឹងមានក្រុមហ៊ុនជាដៃគូ ដែលផលិតសម្ភារៈ និងគ្រឿងបង្គុំនានា បំរើឲ្យក្រុមហ៊ុនទាំងពីរនេះជាង៣០បានមកតាម នៅតំបន់សេដ្ឋកិច្ចពិសេសអីហ្កា រីស៊ស ដែលមានផ្ទៃដីទំហំជាង២០០ហិកតា វាជាចង្កោមឧស្សាហកម្មមួយ ហើយតំបន់សេដ្ឋកិច្ចពិសេសនេះ នឹងពេញដីនៅរយៈត្រឹម៣ឆ្នាំ។

លោកជា វុទ្ឋីក៏បានបង្ហើបឲ្យដឹងផងដែរថា នៅពេលខាងមុខ ក្រុមហ៊ុនធំៗទាំងនេះ នឹងមានការភ្ជាប់លក្ខខ័ណ្ឌ មុនពេលមានការបញ្ជាទិញ ទាក់ទងការគិតគូរដល់បរិស្ថាន សង្គម និងអភិបាលកិច្ចល្អ(EFG)។

តាមការសិក្សារបស់EFG ក្រុមហ៊ុនម៉ាកធំៗមុនបញ្ជាទិញទំនិញទំនិញណាមួយ នឹងភ្ជាប់លក្ខខ័ណ្ឌទាំងបីខាងលើ និងប្រកាន់យកអព្យាក្រិតកាបោន និងថាមពលស្អាត និងប្រើប្រាស់បច្ចេកវិទ្យាដែលកាត់បន្ថយប្រើប្រាស់ថាមពលមិនស្អាត។ លោកជា វុទ្ឋីបានបញ្ជាក់ថា “នៅពេលខាងមុខ យើងនឹងមានបញ្ហាប្រឈមទាំងអស់ហ្នឹង ហើយរាជរដ្ឋាភិបាលបានដឹង និងកំពុងដោះស្រាយបញ្ហានេះ”៕

តែម សុខុម

តូក្យូ: ក្រុមហ៊ុនអាមេរិក Blackstone កំពុងស្វែងរកទិញអចលនទ្រព្យនៅប្រទេសជប៉ុន បន្ថែមទៀត បន្ទាប់ពីខ្លួនបានលក់ចេញអចលនទ្រព្យដែលមានតម្លៃសរុបប្រមាណ៤,៥ពាន់លានដុល្លារ កាលពីឆ្នាំមុន ស្របពេលអ្នកវិនិយោគអន្តរជាតិចាប់អារម្មណ៍ខ្លាំងលើអចលនទ្រព្យក្នុងប្រទេសដែនកោះនេះ។

លោក ដាយស៊ូកិ គីតតា (Daisuke Kitta) ប្រធានផ្នែកអចលនទ្រព្យប្រចាំប្រទេសជប៉ុន នៃក្រុមហ៊ុន Blackstone បានទម្លាយឱ្យដឹងថា ក្រុមហ៊ុនគ្រប់គ្រងទ្រព្យសកម្មដ៏ធំបំផុតរបស់ពិភពលោកមួយនេះកំពុងស្វះស្វែងទិញអចលនទ្រព្យបន្ថែមទៀតដោយមានគម្រោងដេញថ្លៃជាច្រើននៅក្នុងដៃ ហើយអចលនទ្រព្យដូចជាសណ្ឋាគារ និងមជ្ឈមណ្ឌលរក្សាទិន្នន័យជាដើមកំពុងស្ថិតក្នុងគម្រោងទិញ។ នេះបើយោងតាមសារព័ត៌មាន Japan Times ចុះផ្សាយកាលពីថ្ងៃច័ន្ទ ទី១៤ សីហា។

ក្រុមហ៊ុនផ្ដល់សេវាកម្មអចលនទ្រព្យអាមេរិក Cushman & Wakefield ឱ្យដឹងថា ការស្វះស្វែងទិញអចលនទ្រព្យបន្ថែមនេះកើតមានឡើង បន្ទាប់ពីក្រុមហ៊ុននេះបានសម្រុកលក់ចេញអចលនទ្រព្យក្នុងឆ្នាំ២០២២ រួមទាំងអចលនទ្រព្យតម្លៃប្រមាណ១,៣ពាន់លានដុល្លារ ដែលលក់ឱ្យទៅអ្នកវិនិយោគដូចជា ក្រុមហ៊ុន GIC និងក្រុមហ៊ុន Gaw Capital Partners ផងដែរ។

លោក Daisuke Kitta បានលើកឡើងក្នុងបទសម្ភាសមួយនៅទីក្រុងតូក្យូ ប្រទេសជប៉ុន ថា “ផែនការរបស់យើងបានកើនឡើងចាប់តាំងពីរដូវផ្ការីក។ ទីបំផុតក្រុមការងារទិញលក់របស់យើងកំពុងចាប់ផ្តើមអាជីវកម្មវិញហើយ”។

ការវិនិយោគលើអចលនទ្រព្យនៅក្នុងប្រទេសជប៉ុន មានភាពរស់រវើកខ្លាំងបើប្រៀបធៀបទៅនឹងបណ្ដាប្រទេសដទៃទៀតដោយសារធនាគារនៅក្នុងប្រទេសនេះផ្ដល់អត្រាការប្រាក់ទាបបំផុត ដែលទាក់ទាញអ្នកវិនិយោគបរទេស៕ Japan Times៕

        ដោយៈ ជេស៊ីកា

        ភ្នំពេញៈ ខេត្តចំនួន៤ជាប់បឹងទន្លេសាប របស់កម្ពុជា រួមមាន បាត់ដំបង ពោធិ៍សាត់ សៀមរាប និងខេត្តកំពង់ធំ ត្រូវបានក្រុមហ៊ុន មានបទពិសោធន៍កសិឧស្សាហកម្ម នៅក្នុងប្រទេសចិន ដែលជាក្រុមហ៊ុនគំរូលើវិស័យកសិកម្ម សម្រេចជ្រើសរើសដើម្បីដាក់ទុនវិនិយោគ លើទំហំទឹកប្រាក់១២.៧ពាន់លានដុល្លារ លើវិស័យកសិ-ឧស្សាហកម្ម។

ការប្រកាសសម្រេចចុះបញ្ជីផ្លូវការ ដើម្បីចាប់ផ្តើមអនុវត្តគម្រោងវិនិយោគ នៅក្នុងប្រទេសកម្ពុជានេះ ត្រូវបានធ្វើឡើងដោយ លោក ចៅ សូជី (Zhao Shujie) ប្រធានក្រុមហ៊ុនតាណុង (Danong Agricultural Development Group) នៅក្នុងសន្និសីទសារព័ត៌មាន ក្រោមអធិបតី លោក ដួង តារា ជំនួយការផ្ទាល់សម្តេចតេជោ និងជារដ្ឋលេខាធិការទីស្តីការគណៈរដ្ឋមន្ត្រី នាព្រឹកថ្ងៃទី១៤ ខែសីហា ឆ្នាំ២០២៣ នៅរាជធានីភ្នំពេញ។លោកបានបញ្ជាក់ថា “គម្រោងវិនិយោគកសិកម្ម បែបទំនើបនៅកម្ពុជា ដែលហៅថា “គម្រោងឧស្សាហូបនីយកម្មកសិកម្ម” ដែលក្រុមហ៊ុនតាណុង គ្រោងនឹងបោះទុនវិនិយោគ គឺមានចំនួនទឹកប្រាក់១២.៧ពាន់លានដុល្លារ លើផ្ទៃដី៧៥ម៉ឺនហិកតា”។ លោកបន្តថា គម្រោងនេះ នឹងផ្តោតលើផ្នែកជាច្រើន រួមមានទី១ ការសាងសង់ និងគ្រប់គ្រងហេដ្ឋារចនាសម្ព័ន្ធកសិកម្ម ទី២ គ្រប់គ្រងនិងប្រតិបត្តិការងារឧស្សាហកម្មកសិកម្ម និងទី៣ បង្កើតធនាគារកសិកម្ម។

លោក ចៅ សូជី បានបន្ថែមថា គម្រោងកសិកម្មឆ្លាតវៃ ដែលនឹងចាប់ផ្តើមអនុវត្ត នាពេលឆាប់ៗខាងមុខនេះ គឺនឹងរំពឹងថា នឹងផ្តល់អត្ថប្រយោជន៍យ៉ាង​ច្រើនចំពោះរាជរដ្ឋាភិបាលកម្ពុជា​ ដែលក្នុងនោះ មានក្រសួងកសិកម្ម រុក្ខាប្រមាញ់ និងនេសាទ ក្រសួងអភិវឌ្ឍន៍ជនបទ និងថ្នាក់ដឹកនាំខេត្តកំពង់ធំ សៀមរាប បាត់ដំបង និងខេត្តពោធិ៍សាត់។

លោកដួង តារារដ្ឋលេខាធិការទីស្តីការគណៈរដ្ឋមន្រ្តី និងជាជំនួយការផ្ទាល់សម្តេចតេជោហ៊ុន សែនបានមានប្រសាសន៍ថា ក្រុមហ៊ុនតាណុង បានមកសិក្សាស្វែងយល់ ពីគម្រោងវិនិយោគនៅកម្ពុជា ចំនួន២លើករួចមកហើយ ដោយការចុះមកនេះ ស្របតាមការអំពាវនាវ របស់សម្តេចតេជោ ហ៊ុន សែន ឲ្យវិនិយោគិនចិន មកវិនិយោគនៅកម្ពុជា ជាពិសេសលើវិស័យកសិកម្ម ដែលជាវិស័យដ៏មានសក្តានុពលមួយរបស់កម្ពុជា។

លោករំពឹងថា តាមរយៈការវិនិយោគរបស់ក្រុមហ៊ុននេះ នឹងជួយជម្រុញការអភិវឌ្ឍ វិស័យកសិកម្មរបស់កម្ពុជាបានលឿន និងជួយឲ្យកម្ពុជា ក្លាយជាប្រទេសគំរូមួយ ក្នុងវិស័យកសិកម្ម នៅពេលអនាគត ហើយនឹងផ្តល់អត្ថប្រយោជន៍ ដល់ប្រជាកសិករ និងជួយទប់ស្កាត់ការចំណាកស្រុក របស់ប្រជាជនកម្ពុជាថែមទៀតផង។

គោលបំណងរបស់ក្រុមហ៊ុនតាណុង គឺចង់វិនិយោគលើការដាំដុះ និងបង្កាត់ពូជដំណាំ និងសត្វចំនួន៤ប្រភេទ នៅកម្ពុជារួមមាន ទី១ ដាំស្មៅសម្រាប់ចំណីសត្វ ទី២ បង្កាត់និងដាំពូជពោត ទី៣ ដាំ និងកែឆ្នៃដំឡូងមី និងទី៤ ចិញ្ចឹម និងបង្កាត់សត្វគោ និងជ្រូក ដោយផលិតផលទាំងនេះ ភាគច្រើនគឺសម្រាប់នាំចេញ ទៅកាន់ប្រទេសចិន៕

ដោយ: គង់ លាងហួរ
រីយ៉ាដ: អាជ្ញាធរកំពង់ផែអារ៉ាប៊ីសាអូឌីត បានបន្ថែមសេវាកម្មដឹកជញ្ជូនថ្មីចំនួន២០ នៅឆមាសទីមួយឆ្នាំ២០២៣នេះក្នុងគោលបំណងដើម្បីជំរុញខ្សែសង្វាក់ផ្គត់ផ្គង់ និងពង្រឹងជំហររបស់ខ្លួនជាមជ្ឈមណ្ឌលដឹកជញ្ជូនសកល។

ទីភ្នាក់ងារសារព័ត៌មានអារ៉ាប៊ីសាអូឌីតបានរាយការណ៍ថា អាជ្ញាធរបានបន្ថែមសេវាកម្មដឹកជញ្ជូនថ្មីទាំងនេះឆ្លងកាត់កំពង់ផែ Jeddah Islamic កំពង់ផែ King Abdulaziz និងកំពង់ផែ Jubail Commercial ដើម្បីតភ្ជាប់អារ៉ាប៊ីសាអូឌីតជាមួយកំពង់ផែពិភពលោកផ្សេងទៀត ដើម្បីជួយសម្រួលពាណិជ្ជកម្ម និងការនាំចេញ។

ការដាក់ឱ្យប្រើប្រាស់សេវាកម្មថ្មីទាំងនេះ គឺស្របតាមយុទ្ធសាស្ត្រជាតិសម្រាប់សេវាកម្មដឹកជញ្ជូន និងភស្តុភារ ដែលមានគោលដៅពង្រឹងជំហររបស់អារ៉ាប៊ីសាអូឌីតបន្ថែមទៀតក្នុងនាមជាមជ្ឈមណ្ឌលដឹកជញ្ជូនអន្តរជាតិ និងជាមជ្ឈមណ្ឌលតភ្ជាប់ទ្វីបទាំង៣។

នៅក្នុងឆមាសទី១ ចរាចរណ៍កប៉ាល់បានហក់ឡើង១០,៦ភាគរយរហូតឈានដល់៥.៩១៨នាវា បើប្រៀបធៀបទៅនឹងចរាចរណ៍នាវាចំនួន៥.៣៤៧គ្រឿង ក្នុងរយៈពេលដូចគ្នាកាលពីឆ្នាំ២០២២ ។កំពង់ផែទាំងនេះក៏បានកត់ត្រានូវការដឹកស្បៀងអាហារចំនួន១០,៨លានតោនផងដែរ ដែលឆ្លុះបញ្ចាំងឱ្យឃើញពីការកើនឡើង៩,៨២ភាគរយ បើធៀបនឹង៩,៨៦លានតោនក្នុងរយៈពេលដូចគ្នាកាលពីឆ្នាំមុន។

លើសពីនេះទៅទៀត ចំនួនរថយន្តនៅកំពង់ផែបានកើនដល់៤៩៦.៩៤៩គ្រឿង ពោលគឺកើនឡើង២៦ភាគរយ ធៀបនឹង៣៩៤.១៥១គ្រឿង ដែលបានកត់ត្រានៅក្នុងឆមាសទីមួយនៃឆ្នាំ២០២២។នៅក្នុងរយៈពេល៦ខែដំបូងដើមឆ្នាំនេះ កំពង់ផែអារ៉ាប៊ីសាអូឌីតបានទទួលអ្នកដំណើរចំនួន៥៦៨.៩៣៣នាក់ ហក់ឡើង៦០,៨ភាគរយ បើធៀបនឹង៣៥៣.៧៥៨នាក់ ដែលបានកត់ត្រាក្នុងរយៈពេលដូចគ្នាកាលពីឆ្នាំមុន៕

ដោយៈ តែម សុខុម
ប៉េកាំងៈ ក្រុមប្រឹក្សារដ្ឋនៃប្រទេសចិន កាលពីថ្ងៃអាទិត្យ ទី១៣ សីហាបានដាក់ចេញ គោលការណ៍ណែនាំនានា ដែលខ្លួននិយាយថានឹងធ្វើឱ្យកាន់តែប្រសើរបន្ថែមទៀត នូវបរិយាកាសវិនិយោគបរទេសក្នុងប្រទេសចិន និងទាក់ទាញការវិនិយោគបរទេសកាន់តែច្រើន។

ក្រុមប្រឹក្សារដ្ឋចិន បានលើកឡើងតាមរយៈឯកសារមួយ ដែលមានគោលការណ៍ណែនាំ២៤ចំណុចថា អាជ្ញាធរត្រូវតែបង្កើនការការពារសិទ្ធិ និងផលប្រយោជន៍របស់អ្នកវិនិយោគបរទេស រួមទាំងការពង្រឹងការអនុវត្តកម្មសិទ្ធិបញ្ញាផងដែរ។

ឯកសារនេះក៏បានប្រកាស ពីគោលការណ៍ណែនាំនានា ដើម្បីបង្កើនការគាំទ្រផ្នែកសារពើពន្ធ និងការលើកទឹកចិត្តផ្នែកពន្ធសម្រាប់សហគ្រាសវិនិយោគបរទេស ដូចជាការលើកលែងជាបណ្ដោះអាសន្ននូវពន្ធលើប្រាក់ចំណូល សម្រាប់អ្នកវិនិយោគបរទេស ដែលបង្វែរប្រាក់ចំណេញរបស់ពួកគេ យកមកវិនិយោគឡើងវិញ នៅក្នុងប្រទេ​សចិនជាដើម។

ក្រុមប្រឹក្សារដ្ឋចិន និយាយថា ខ្លួននឹងស្វះស្វែងរក “យន្តការគ្រប់គ្រងដ៏ងាយស្រួល និងមានសុវត្ថិភាព” សម្រាប់រំហូរទិន្នន័យឆ្លងដែន។ សំណើនេះធ្វើឡើងចំពេលមានភាពតានតឹង រវាងអាជ្ញាធរ និងសហគ្រាសអន្តរជាតិ រួមទាំងបណ្ដាក្រុមហ៊ុនគណនេយ្យ ពិភពលោកផងដែរជុំវិញសុវត្ថិភាពទិន្នន័យ។

ប្រទេសចិន បានស្វះស្វែងយ៉ាងខ្លាំង នៅក្នុងការទាក់ទាញមូលធនបរទេស ខណៈការស្ទុះងើបឡើងនៃសេដ្ឋកិច្ចរបស់ខ្លួន ពីវិបត្តិកូវីដ-៩ មានសន្ទុះយឺតដោយសារតម្រូវការនាំចេញធ្លាក់ចុះ ពីបណ្ដាដៃគូពាណិជ្ជកម្មសំខាន់ៗ និងភាពចលាចល ដែលកំពុងកើតមាននៅក្នុងទីផ្សារអចលនទ្រព្យរបស់ប្រទេសនេះ៕ Reuters៕

តែម សុខុម
បាងកក: កម្មវិធីទូរស័ព្ទ ឬ Mobile App ជប៉ុន ដែលមានឈ្មោះថា ខាន់ណា (KANNA) កំពុងទទួលបានការគាំទ្រគួរឱ្យកត់សម្គាល់នៅក្នុងទីផ្សារអចលនទ្រព្យថៃ ដោយសារឧបករណ៍គ្រប់គ្រងគម្រោងរបស់ App នេះមានប្រសិទ្ធភាពខ្ពស់នៅក្នុងការជួយកាត់បន្ថយការចំណាយលើការសាងសង់។

លោក ហ៊ីការុ ណាហ្គាយ៉ាម៉ា (Hikaru Nagayama) នាយកប្រតិបត្តិក្រុមហ៊ុនអាល់ដាហ្គ្រាម (Aldagram Inc) ជាក្រុមហ៊ុន Startup ជប៉ុន ដែលបានបង្កើត App គ្រប់គ្រងគម្រោងមួយនេះបានលើកឡើងថា ការប្រមូលទិន្នន័យមិនពេញលេញ និងការផ្ទេរទិន្នន័យគ្មានប្រសិទ្ធភាពអាចធ្វើឱ្យតម្លៃសំណង់កើនឡើងកាន់តែខ្ពស់។ នេះបើយោងតាមកាសែត The Nation ចុះផ្សាយកាលពីថ្ងៃអាទិត្យ ទី១៣ សីហា។

លោកបានគូសបញ្ជាក់ថា App នេះជួយធ្វើឱ្យការប្រមូលទិន្នន័យ និងការផ្ទេរទិន្នន័យកាន់តែប្រសើរឡើង។ នៅក្នុងប្រទេសជប៉ុន ដែលតម្លៃសំណង់ខ្ពស់បំផុតទី២ ទូទាំងពិភពលោកដោយសារកម្លាំងពលកម្មធ្លាក់ចុះ និងចំនួនប្រជាជនជប៉ុន កាន់តែមានវ័យចំណាស់ App នេះជួយធានាបាននូវការប្រគល់គម្រោងប្រកបដោយគុណភាពទាន់ពេលវេលាកំណត់ និងការចំណាយដែលបានគ្រោងទុក។Version ជាភាសាអង់គ្លេស នៃ App នេះត្រូវបានបង្កើតឡើងកាលពីឆ្នាំមុន ហើយ Version ជាភាសាថៃ និងភាសាអេស្ប៉ាញ ក៏ត្រូវបានបញ្ចូលបន្ថែមតាមក្រោយ។ បច្ចុប្បន្ន App នេះមានអ្នកប្រើប្រាស់ជាង២០.០០០នាក់នៅជាង១០ប្រទេស។

ក្រុមហ៊ុន Aldagram បានបើកការិយាល័យតំណាងនៅក្នុងប្រទេសថៃ ដើម្បីលក់ App នេះនៅទីនោះ។ App នេះអាចប្រើបានទាំងប្រព័ន្ធប្រតិបត្តិការ Android និង IOS៕ THE NATION៕

តែម សុខុម

សិង្ហបុរី: ក្រុមហ៊ុនប្រតិបត្តិករផ្កាយរណបកាណាដា Telesat បានផ្ដល់កិច្ចសន្យាតម្លៃ១,៥៦ពាន់លានដុល្លារ ឱ្យក្រុមហ៊ុនបច្ចេកវិទ្យាអវកាសកាណាដា MDA ផលិតផ្កាយរណបចំនួន១៩៨សម្រាប់កម្មវិធីគន្លងតារាវិថីទាបរបស់ខ្លួន។

កិច្ចសន្យាដែលបានប្រកាសកាលពីថ្ងៃសុក្រ សប្ដាហ៍មុននេះបានជំរុញឱ្យភាគហ៊ុនរបស់ក្រុមហ៊ុន Telesat ទាំងនៅក្នុងប្រទេសកាណាដា និងសហរដ្ឋអាមេរិក ហក់ឡើងរហូតដល់ទៅជាង៤៥% ខណៈភាគហ៊ុនរបស់ក្រុមហ៊ុន MDA ហក់ឡើងប្រមាណ២៩%។ នេះបើយោងតាមសារព័ត៌មាន CNA ចុះផ្សាយកាលពីថ្ងៃអាទិត្យ ទី១៣ សីហា។

ក្រុមហ៊ុន Telesat និយាយថា ដំបូងឡើយខ្លួនបានគ្រោងចំណាយ៣,៥ពាន់លានដុល្លារអាមេរិក សម្រាប់គម្រោងផ្កាយរណបចែកចាយសេវាអ៊ីនធឺណិត Lightspeed នេះ ហើយថា កិច្ចសន្យាជាមួយក្រុមហ៊ុន MDA បានជួយឱ្យខ្លួនចំណាយតិចជាងការគ្រោងទុក២ពាន់លានដុល្លារអាមេរិក។

ការបាញ់បង្ហោះផ្កាយរណបនេះគ្រោងនឹងចាប់ផ្តើមនៅពាក់កណ្តាលឆ្នាំ២០២៦ ហើយការផ្ដល់សេវាកម្មចែកចាយសេវាអ៊ីនធឺណិតទូទាំងពិភពលោកនឹងចាប់ផ្ដើមនៅចុងឆ្នាំ២០២៧។

ក្រុមហ៊ុនបានចេញសេចក្តីថ្លែងការណ៍ថា បណ្តាញ Lightspeed ដែលបានរចនាឡើងវិញនេះនឹងផ្ដល់ការតភ្ជាប់របស់អ្នកប្រើប្រាស់ជាសហគ្រាស និងរដ្ឋាភិបាលជាមួយសេវាអ៊ីនធឺណិតដែលមានសុវត្ថិភាពខ្ពស់ និងមានភាពធន់នៅទូទាំងពិភពលោក៕ Reuters៕