ដោយៈ តែម សុខុម

គូឡាឡាំពួ: ទិន្នន័យផ្លូវការបង្ហាញថា សកម្មភាពសាងសង់នៅម៉ាឡេស៊ី ក្នុងត្រីមាសទី២ ដើមឆ្នាំ២០២៣ បានកើនឡើង៥ត្រីមាសជាប់ៗគ្នាចាប់តាំងពីត្រមាសទី២ ដើមឆ្នាំ២០២២ ដោយតម្លៃនៃការងារសាងសង់ ដែលសម្រេចបានកើនឡើង៨,១% ឈានដល់៧,០៩ពាន់លានដុល្លារអាមេរិក។

ទោះជាយ៉ាងណា សន្ទុះកើនឡើងនេះបានបង្អង់ល្បឿន ក្នុងត្រីមាសទី២ ដើមឆ្នាំ២០២៣ បើធៀបនឹងអត្រាកំណើន៩,៤%ក្នុងត្រីមាសទី១ ដើមឆ្នាំ២០២៣ និងកំណើន១៥,៧%ក្នុងត្រីមាសទី៤ ចុងឆ្នាំ២០២២។ នេះបើយោងតាមទិន្នន័យថ្មី ពីនាយកដ្ឋានស្ថិតិម៉ាឡេស៊ី (DOSM)។

ប្រធាននាយកដ្ឋានស្ថិតិម៉ាឡេស៊ី (DOSM) បានធ្វើការកត់សម្គាល់ថា អនុវិស័យវិស្វកម្មសំណង់ស៊ីវិល បានគ្របដណ្ដប់២,៦៥ពាន់លានដុល្លារអាមេរិក ឬស្មើនឹង៣៧,៤% នៃតម្លៃសាងសង់សរុបសម្រាប់ឆមាសទី២ ដើមឆ្នាំ២០២៣ ដែលរួមចំណែកជាចម្បងដោយការស្ថាបនាផ្លូវថ្នល់ និងផ្លូវដែកដែលមានតម្លៃ១,៤២ពាន់លានដុល្លារ។ក្នុងពេលជាមួយគ្នានេះ តម្លៃនៃការសាងសង់ ដែលសម្រេចបានសម្រាប់អគារ មិនមែនលំនៅឋាន ស្ថិតក្នុងរង្វង់២,១៦ពាន់លានដុល្លារ ឬស្មើ៣០,៧%សម្រាប់ត្រីមាសទី២ ដើមឆ្នាំ២០២៣ ខណៈតម្លៃនៃការសាងសង់អគារលំនៅឋាន សម្រេចបានស្ថិតក្នុងរង្វង់១,៦ពាន់លានដុល្លារ ឬស្មើ២២,៧%។

ទន្ទឹមនឹងនេះ សកម្មភាពពាណិជ្ជកម្មពិសេស បានគ្របដណ្ដប់៦៥៦លានដុល្លារ ឬស្មើនឹង៩,២% ដែលភាគច្រើនចំណាយលើការដំឡើងប្រព័ន្ធទឹក ការដំឡើងប្រព័ន្ធរក្សាកម្ដៅសីតុណ្ហភាព និងម៉ាស៊ី​នត្រជាក់១៩៧លានដុល្លារ និងការដំឡើងអគ្គិសនី១៧៥លានដុល្លារ៕ The Edge Markets៕

ដោយ: គង់ លាងហួរ
វ៉ាសុីនតោន: ប្រធានាធិបតីអាមេរិកលោក Joe Biden បានមានប្រសាសន៍ថា លោកនឹងធ្វើដំណើរទៅប្រទេសវៀតណាមក្នុងពេលដ៏ខ្លីខាងមុខ ដែលនេះជាផ្នែកមួយនៃកិច្ចខិតខំប្រឹងប្រែងដើម្បីធ្វើឱ្យប្រសើរឡើងនូវទំនាក់ទំនងជាមួយទីក្រុងហាណូយ។

លោក Biden បានលើកឡើងបែបនេះ ខណៈលោកកំពុងថ្លែងក្នុងកម្មវិធីរៃអង្គាសប្រាក់សម្រាប់ធ្វើយុទ្ធនាការឃោសនាបោះឆ្នោតនៅក្នុង រដ្ឋ New Mexico។

លោកBiden បានថ្លែងថា “ខ្ញុំនឹងបំពេញដំណើរទស្សនកិច្ចទៅកាន់ប្រទេសវៀតណាមក្នុងពេលឆាប់ៗនេះ ព្រោះវៀតណាមចង់ផ្លាស់ប្តូរទំនាក់ទំនងរបស់យើងនិងចង់ក្លាយជាដៃគូមួយរបស់យើង”។

នៅក្នុងកិច្ចប្រជុំមួយកាលពីខែមេសាកន្លងទៅ នាយករដ្ឋមន្ត្រីវៀតណាមលោក Pham Minh Chinh និងរដ្ឋមន្ត្រីការបរទេសអាមេរិក លោក Antony Blinken បានសម្តែងនូវបំណង ក្នុងការធ្វើឱ្យទំនាក់ទំនងរវាងប្រទេសទាំង២កាន់តែស៊ីជម្រៅ ខណៈដែលទីក្រុងវ៉ាស៊ីនតោនព្យាយាមពង្រឹងទំនាក់ទំនងជាមួយដៃគូនានាក្នុងតំបន់អាស៊ី ដើម្បីទប់ទល់នឹងឥទ្ធិពលនៃប្រទេសចិន។

លោក Biden បានថ្លែងក្នុងកម្មវិធីរៃអង្គាសប្រាក់មួយនៅទីក្រុង Maine កាលពីថ្ងៃទី២៨ ខែកក្កដាកន្លងទៅថា “ខ្ញុំបានទទួលការហៅទូរស័ព្ទពីប្រមុខនៃប្រទេសវៀតណាម ដែលចង់ជួបជាមួយខ្ញុំ នៅពេលខ្ញុំទៅចូលរួមកិច្ចប្រជុំ G20 នៅប្រទេសឥណ្ឌាក្នុងខែកញ្ញាខាងមុខ”៕

តែម សុខុម

វៀងចន្ទន៍: រូបិយប័ណ្ណគីប (Kip) របស់ឡាវ ត្រូវបាន Business News Asia ដែលជាគេហទំព័រអន្តរជាតិផ្តល់ព័ត៌មានធុរកិច្ច និងហិរញ្ញវត្ថុព្រមទាំងផ្ដល់ការវិភាគលើស្ថានភាពក្រុមហ៊ុន ឧស្សាហកម្ម និងសេដ្ឋកិច្ចក្នុងតំបន់អាស៊ី ចាត់ទុកជារូបិយប័ណ្ណដែលមានតម្លៃថោកបំផុតមួយនៅទូទាំងពិភពលោក។

ការធ្លាក់ថ្លៃយ៉ាងខ្លាំងនៃរូបិយប័ណ្ណគីប ជាចម្បងគឺដោយសារសេដ្ឋកិច្ចឡាវ ដាំក្បាលចុះខ្លាំង និងការពឹងផ្អែកខ្លាំងរបស់ប្រទេសនេះលើទំនិញនាំចូលជាជាងការបង្កើនសមត្ថភាពផលិតក្នុងស្រុក ដែលជាលទ្ធផលធ្វើឱ្យប្រទេសនេះយកទុនបម្រុងអន្តរជាតិរបស់ខ្លួនមកប្រស្ទើរតែអស់។

រួមជាមួយរូបិយប័ណ្ណផ្សេងៗទៀតដូចជាលុយដុង (Dong) របស់វៀតណាម លុយសូម (Som) របស់ប្រទេសអ៊ូសបេគីស្ថាន ជាដើម លុយគីប (Kip) របស់ឡាវ ត្រូវបានដាក់ចំណាត់ថ្នាក់ជារូបិយប័ណ្ណដែលបច្ចុប្បន្នមានតម្លៃថោកខ្លាំងនៅទូទាំងពិភពលោកដោយសារហេតុផលផ្សេងៗដូចខាងក្រោម៖

នៅក្នុងអត្ថបទដែលបានចេញផ្សាយកាលពីដើមខែនេះគូសបញ្ជាក់ថា ឡាវ ក្នុងនាមជាប្រទេសតូចមួយមានពិពិធកម្មសេដ្ឋកិច្ចតិចតួចណាស់ ហើយចំណុចនេះដើរតួយ៉ាងសំខាន់នៅក្នុងការធ្វើឱ្យរូបិយប័ណ្ណជាតិធ្លាក់ថ្លៃ ព្រោះវាប៉ះពាល់យ៉ាងខ្លាំងដល់ទំនុកចិត្តរបស់វិនិយោគិនអន្តរជាតិ។

ទន្ទឹមនេះប្រទេសឡាវ ក៏ពឹងផ្អែកខ្លាំងលើការនាំចេញទំនិញកសិកម្ម និងពីជនជាតិឡាវ ដែលធ្វើការនៅក្រៅប្រទេសផងដែរ។ ប្រសិនបើតម្លៃទំនិញធ្លាក់ចុះ ប្រទេសឡាវ នឹងរកចំណូលបានតិចជាងមុនពីការនាំចេញ។ ដូចគ្នានេះដែរ ប្រសិនបើពលរដ្ឋឡាវ ដែលធ្វើការនៅក្រៅប្រទេសផ្ញើប្រាក់មកស្រុកតិចជាងមុន លុយគីប នឹងធ្លាក់ថ្លៃទៅតាមនោះដែរ។

ការធ្លាក់ថ្លៃនៃលុយគីប ក៏អាចបណ្ដាលមកពីឱនភាពពាណិជ្ជកម្មយូរអង្វែង និងអតុល្យភាពគណនីចរន្តផងដែរ។បន្ថែមពីនេះ សារព័ត៌មាន Business News Asia បានលើកឡើងថា ប្រសិនបើគ្មានចំណាត់ការធ្វើឱ្យលុបគីប ឡើងថ្លៃវិញទេនោះ វាអាចគំរាមកំហែងដល់ស្ថិរភាពសេដ្ឋកិច្ចរបស់ប្រទេសឡាវ ហើយទីបំផុតប៉ះពាល់ដល់ការវិនិយោគបរទេស និងសក្ដានុពលពាណិជ្ជកម្ម។

ដើម្បីបង្កើនការផ្គត់ផ្គង់រូបិយប័ណ្ណបរទេស និងតម្រូវការលុយគីប របស់ឡាវ នាយករដ្ឋមន្ត្រីឡាវ បានចេញសារាចរណ៍ណែនាំឱ្យធនាគារកណ្ដាលឡាវ និងក្រសួងឧស្សាហកម្ម និងពាណិជ្ជកម្មឡាវ ធ្វើយ៉ាងណាធានាបាននូវអត្រាប្តូរប្រាក់បរទេសដែលទទួលបានតាមរយៈការនាំចេញ និងការវិនិយោគបរទេសចូលមកក្នុងប្រទេសឡាវ តាមរយៈប្រព័ន្ធធនាគាររបស់ខ្លួនក្នុងចំណោមកិច្ចខិតខំប្រឹងប្រែងផ្សេងៗទៀតដើម្បីពង្រឹងរូបិយប័ណ្ណជាតិ៕ Laotian Times៕

ដោយៈ តែម សុខុម

វៀងចន្ទន៍: នៅពេលមេឃបន្តធ្លាក់ភ្លៀងខ្លាំង នៅទូទាំងប្រទេសឡាវ ទំនប់វារីអគ្គិសនីធំៗចំនួន៤ នៅក្នុងប្រទេសនេះ ត្រូវបើកទ្វារបញ្ចេញទឹកដើម្បីធានាថា ទំនប់ទាំងនោះមិនទទួលរងការខូចខាតដោយសារទឹកហៀរចេញពីអាងស្តុកទឹក។

ដោយសារតែប្រទេសឡាវ ស្ថិតនៅខ្សែទឹកខាងលើនៃអាងទន្លេមង្គ ខណៈកម្ពុជាស្ថិតនៅខ្សែទឹកខាងក្រោមនោះ ការបើកទ្វារទំនប់វារីអគ្គិសនីទាំងនេះ គឺជាហានិភ័យសម្រាប់កម្ពុជា ព្រោះវាអាចនឹងធ្វើឱ្យកម្រិតទឹកទន្លេហក់ឡើងខ្លាំង។

សារព័ត៌មានឡាវ Laotian Times បានចុះផ្សាយកាលពីថ្ងៃពុធ ទី៩ សីហា ថា ដោយសារភ្លៀងមូសុង កំពុងតែបន្តធ្លាក់ជាប់ៗគ្នា ខេត្តចំនួន៨ក្នុងប្រទេសឡាវ ត្រូវបានជន់លិចធ្ងន់ធ្ងរ ព្រមទាំងមានបំណា​ក់​ដីក្នុងឆ្នាំនេះ ហើយទំនប់វារីអគ្គិសនី នៅក្នុងខេត្តសាយ៉ាប៊ូរី ហ្លួងព្រះ​បាង និងខេត្តខាំមួន បានបើកទ្វារបញ្ចេញទឹកចូលទៅក្នុងទន្លេ។

ទំនប់វារីអគ្គិសនីទាំង៤ ដែលបានបើកទ្វារបញ្ចេញទឹកនោះរួមមានទំនប់ណាមហុង ១ (Nam Houng 1 Hydropower) ទំនប់ណាមខាន់ ២ (Nam Khan 2 Hydropower) ទំនប់ណាមខាន់ ៣ (Nam Khan 3 Hydropower) និងទំនប់ណាម ហ៊ីនប៊ូន (Nam Hinboun Downstream Hydropower)។

គណៈកម្មការទន្លេមេគង្គ (MRC) បានធ្វើការព្យាករថា រហូតមកដល់ថ្ងៃទី១២ ខែសីហា កម្ពស់ទឹកក្នុងអាងទន្លេមេគង្គក្រោម ចាប់ពីហ្លួងព្រះបាង ក្នុងប្រទេសឡាង មកដល់កម្ពុជា ត្រូវបានរំពឹងថានឹងហក់ឡើងយ៉ាងខ្លាំង ចាប់ពីកំពស់០,៥ម៉ែត្ររហូតដល់៣,០ម៉ែត្រ។

យោងតាមទិន្នន័យរបស់អគ្គិសនីឡាវ (EDL) បង្ហាញថា រោងចក្រវារីអគ្គិសនីសេសេត ១ (Xeset 1) ទំនប់សេសេត ២ (Xeset 2) ទំនប់ណាម ម៉ាង ៣ (Nam Mang 3) និងទំនប់ណាម សង (Nam Song) ក៏ស្តុកទឹកពេញសមត្ថភាពដែរនៅពេលនេះ ហើយប្រហែលជាត្រូវបញ្ចេញទឹកក្នុងពេលឆាប់ៗនេះ៕ Laotian Times៕

ដោយៈ គង់ សូរិយា

        កំពង់ស្ពឺៈ  អគ្គ​នាយក​ក្រុមហ៊ុន​ ម៉ុង ឫទ្ធី​គ្រុប អ្នកឧកញ៉ាម៉ុង រិទ្ឋី បានបង្ហើបឲ្យដឹងថា ​វិ​និ​យោ​គិ​ន​ជប៉ុន​បាន​ចំណាយពេល​៣​ឆ្នាំ ក្នុងការ​សិក្សា​ ពី​ទីតាំងនៅ​តំបន់​អភិវឌ្ឍន៍​ក​សិ​ទេសចរណ៍​ ម៉ុង ឫទ្ធី​ សែន​ជ័យ របស់លោក ដើម្បី​រៀបចំ​ជា​ភូមិ​លម្ហែ​សម្រាប់​ប្រជាជន​ជប៉ុន ​រកក​ន្លែ​ង​ចូលនិវត្តន៍​ ប្រកបដោយ​ផាសុកភាព​នាពេល​អនាគត​។​

អ្នកឧកញ៉ាបានបន្តឲ្យដឹងកាលពីដើមសប្តាហ៍នេះថា កាលពីដើម​ខែសីហា​កន្ល​ង​ទៅ ខាង​វិនិយោគិន​ជប៉ុន បាន​ជួបប្រជុំ​ជាមួយ​លោក​ផ្ទាល់ និង​ក្រុម​ការងារ​អស់​រយៈពេល​៣​ថ្ងៃ ​ដើម្បី​ពិភាក្សាគ្នា និង​ចុះទៅ​ទស្សនកិច្ច​ នៅ​តំបន់​អភិវឌ្ឍ​ន៍ក​សិ​ទេសច​​រណ៍​ម៉ុង ឫទ្ធី​សែន​ជ័យ ដើម្បី​ពិនិត្យមើល​ទីតាំង​ជាក់ស្តែង ដើម្បី​រៀបចំ​គម្រោង​សង់​ភូមិ​បុរា​ណ​​ជប៉ុន នៅ​តំបន់​នេះ​។​

អ្នកឧកញ៉ា​បានបញ្ជាក់ថា “​ភូមិ​លម្ហែ​ជនជាតិ​ជប៉ុន​នេះ នឹង​រៀប​ចំ​ឱ្យមាន​សួន​ទឹក សួន​លម្ហែ​របស់​ជប៉ុន នៅជាប់​ជើងភ្នំ​នៃ​តំបន់​អភិ​វឌ្ឍ​ន៍ក​សិ​ទេសចរណ៍ ​ម៉ុង ឫទ្ធី​ សែន​ជ័យ” ។ អ្នកឧកញ៉ាបន្តថា “គោលដៅ​ដែល​សំខាន់​គឺ​ភូមិ​នេះ ​រៀបចំឡើង​ដើម្បី​មនុស្ស​ចាស់ ដែល​ចូលនិវត្តន៍ នៅពេលដែល​ជប៉ុន ​មាន​អាកាសធាតុ​ត្រជាក់​ខ្លាំង ក្រុមមនុស្ស​ចាស់​នៅ​ជប៉ុន អាចមក​សម្រាកលម្ហែ​នៅទីនេះ​បាន”។​អ្នកឧកញ៉ា​​បន្ថែមថា ចំពោះ​ការ​រៀបចំ​ភូមិ​ សម្រាប់​ជនជាតិ​ជប៉ុន នៅ​តំបន់​អភិវឌ្ឍន៍​ក​សិ​ទេសចរណ៍​ ម៉ុង ឫទ្ធី​ សែន​ជ័យនេះ ក៏​នឹងមាន​សេវា​ថែទាំ​សុខភាព សេវា​ហូប​ចុក ស្នាក់នៅ​គ្រប់បែបយ៉ាង ការ​រៀបចំ​ជាទី​លាន​វាយ​កូន​ហ្គោល ការរៀបចំ​ឱ្យមាន​មន្ទីរពេទ្យ​ទំនើប មាននៅ​ភូមិ​ជប៉ុន​នេះ​។​

អ្នកឧកញ៉ាម៉ុង ឫទ្ធីបាន​ថ្លែងថា ​“យើង​បានរៀបចំ​ចម្ការ​ដូងក្រអូប ដោយ​ខ្ញុំ​បាន​ដាំ​ត្រៀម​ប្រមាណ៦០ហិកតា ក្នុង​គោលដៅ​ចង់ឱ្យ​ភ្ញៀវ​ដែល​មក​កម្សាន្ត​នៅទីនេះ គឺ​ពិសា​ដូងក្រអូប​ជំនួស​គ្រឿង​កំប៉ុង​វិញ ដើម្បី​ថែរក្សា​សុខភាព​របស់​ភ្ញៀវ​ ដែល​មក​កម្សាន្ត​នៅ​ភូមិ​​ក​សិ​ទេសចរ​ណ៍​ម៉ុង ឫទ្ធី​សែន​ជ័យ​នេះ​”។​អ្នកឧកញ៉ាបានបន្តថា គម្រោង​នេះ ​កំពុងមាន​ដំណើរ​ការជាប​ន្ត​បន្ទាប់ ​ដោយ​តាម​ការគ្រោងទុក ​វា​អាច​នឹង​លេចចេញ​ជា​រូបរាង​ក្នុងពេល​ឆាប់ៗ​នេះ ដោយ​លោក​បានបង្ហាញ​ ពី​ភាពជឿជាក់​លើ​វិ​និ​យោ​គិន​ជប៉ុនលើ​ការរៀបចំ​គម្រោង​នេះ​។លោក​បញ្ជាក់ថា វិនិយោគិន​ជប៉ុន ភាគច្រើន​នឹងធ្វើ​នូវ​អ្វីដែល​បានដាក់​ចេញ ជាពិសេស​ក្រោយ​សិក្សា​ អស់​រយៈពេល​យូរ​បែបនេះ ច្បាស់​ណាស់ ភូមិ​សម្រាប់​ជនជាតិ​ជប៉ុន ​នឹង​លេចចេញ​ជា​រូបរាង​ជាក់​ជាមិនខាន​។​

ប្រធាន​សមាគម​ទីភ្នាក់ងារ​ទេសចរណ៍​កម្ពុជា លោកស្រីឆាយ ស៊ីវលីនបានមានប្រសាសន៍ថា ការកែច្នៃ​ភូមិ​លម្ហែ​ធម្មជាតិ ទៅជា​ភូ​មិកសិ​ទេសច​រណ៍ ជាពិសេស​សម្រាប់​ទទួល​ភ្ញៀវ​ជប៉ុន​បែបនេះ​ទៀត គឺជា​ភាព​ច្នៃប្រឌិត​ថ្មី​មួយ ដែលជា​ផលិតផល​ទេសចរណ៍ ​ដ៏​គួរ​ទាក់​ទា​ញ​សម្រាប់អ្នកទេសចរ​អន្ត​រ​ជាតិ​។

លោកស្រីបានបញ្ជាក់ថា “​បច្ចុប្បន្ននេះ ​ទេសចរណ៍ធម្មជាតិទទួ​លបាន ​ការចាប់​​អារម្មណ៍​ច្រើន​ពី​ភ្ញៀវ​ជាតិ និង​អន្តរជាតិ​។ យើង​រីក​រាយ នៅពេលដែល​វិស័យ​ឯកជន មានការ​ចូលរួម​យ៉ាង​សកម្ម​ក្នុងការ​បង្កើតឱ្យមាន​ផលិតផល​ទេស​ចរណ៍​ថ្មីៗ ជាពិសេស​ការរៀបចំ​បែប​ជា​សួ​នក​សិ​ទេសចរណ៍ ​ធម្ម​ជាតិ​ជាដើម​នេះ ​វា​នឹង​រួមចំណែក​ដល់​ការទាក់ទាញ​អ្នកទេសចរ​មួយកម្រិត​ទៀត​”​៕

ដោយ: គង់ លាងហួរ
ប៉េកាំង: លោកស្រី Mao Ning អ្នកនាំពាក្យក្រសួងការបរទេសចិន បានប្រកាសនៅថ្ងៃពុធនេះថា លោករដ្ឋមន្ត្រីការបរទេស វ៉ាង យី  នឹងបំពេញទស្សនកិច្ច នៅប្រទេសសិង្ហបុរី ម៉ាឡេស៊ី និងកម្ពុជា ចាប់ពីថ្ងៃទី១០ ដល់ថ្ងៃទី១៣ ខែសីហា។

អ្នកនាំពាក្យរូបនេះបានបញ្ជាក់ថា ដំណើរទស្សនកិច្ចនេះ ធ្វើឡើង តបតាមការអញ្ជើញរបស់រដ្ឋមន្ត្រី ក្រសួងការបរទេសសិង្ហបុរី លោក Vivian Balakrishnan រដ្ឋមន្ត្រីក្រសួងការបរទេសម៉ាឡេស៊ី លោក Zambry Abd Kadir និងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។

អ្នកនាំពាក្យក្រសួងការបរទេសរូបនេះ បានមានប្រសាសន៍នៅថ្ងៃដដែលនោះថា ឆ្នាំនេះ គឺជាខួបលើកទី១០ ហើយនៃចក្ខុវិស័យនៃការកសាងសហគមន៍ ជាមួយនឹងអនាគតរួមគ្នា សម្រាប់មនុស្សជាតិ និងគំនិតផ្តួចផ្តើមខ្សែក្រវ៉ាត់ និងផ្លូវ។

លោកស្រី Mao Ning  លើកឡើងថា បណ្តាប្រទេសនៅតំបន់អាស៊ីអាគ្នេយ៍ បានឈានមុខគេ ក្នុងការជំរុញចក្ខុវិស័យនៃការកសាងសហគមន៍មួយ ដែលមានអនាគតរួមគ្នាសម្រាប់មនុស្សជាតិ ហើយពួកគេ គឺជាដៃគូដ៏សំខាន់ សម្រាប់កិច្ចសហប្រតិបត្តិការខ្សែក្រវ៉ាត់ និងផ្លូវ។

ទំនាក់ទំនងរបស់ប្រទេសចិន ជាមួយប្រទេសសិង្ហបុរី ម៉ាឡេស៊ី និងកម្ពុជា រក្សាបាននូវសន្ទុះ នៃភាពរីកចម្រើនដ៏ល្អប្រសើរ។ ជាក់ស្តែង ប្រទេសចិន និងសិង្ហបុរី បានបង្កើតភាពជាដៃគូតម្រង់ទិសអនាគត ប្រកបដោយគុណភាពខ្ពស់គ្រប់ជ្រុងជ្រោយ។ រីឯ ប្រទេសចិន និងម៉ាឡេស៊ី បានឈានដល់ការយោគយល់គ្នា លើការរួមគ្នាកសាងសហគមន៍មួយដែលមានអនាគតរួមគ្នា។

ចំណែក ប្រទេសចិន និងកម្ពុជាបាននិងកំពុងធ្វើការ ដើម្បីឈានទៅរកយុគសម័យថ្មី នៃការកសាងសហគមន៍ចិន-កម្ពុជា ដែលមានគុណភាពខ្ពស់ កម្រិតខ្ពស់ និងស្តង់ដារខ្ពស់ ជាមួយនឹងអនាគតរួមគ្នា។

អ្នកនាំពាក្យរូបនេះបានមានប្រសាសន៍ទៀតថា ប្រទេសចិនសង្ឃឹមថា ដំណើរទស្សនកិច្ចនេះ នឹងជំរុញទំនាក់ទំនងជាយុទ្ធសាស្ត្រជាមួយប្រទេសទាំង៣ ព្រមទាំងពង្រឹងកិច្ចសហប្រតិបត្តិការ ខ្សែក្រ​វាត់ និងផ្លូវប្រកបដោយគុណភាពខ្ពស់ និងនាំទំនាក់ទំនងទ្វេរភាគីឱ្យឈានឡើងដល់កម្ពស់ថ្មី។

លោកស្រី Mao Ning បានបន្ថែមថា ប្រទេសចិនបានត្រៀមខ្លួនរួចជាស្រេច ក្នុងការធ្វើការជាមួយប្រទេសទាំងបី ដើម្បីអនុវត្តគំនិតផ្តួចផ្តើមអភិវឌ្ឍន៍សកល គំនិតផ្តួចផ្តើមសន្តិសុខសកល និងគំនិតផ្តួចផ្តើមអរិយធម៌សកល ជំរុញការស្តារសេដ្ឋកិច្ច ការពារសន្តិភាព ធ្វើឱ្យការផ្លាស់ប្តូរ និងការរៀនសូត្រពីគ្នាទៅវិញទៅមក កាន់តែស៊ីជម្រៅ និងរួមចំណែកកាន់តែច្រើនដល់សន្តិភាព ស្ថេរភាព រួមទាំងការអភិ​វឌ្ឍ​ក្នុងតំបន់ និងក្រៅតំបន់ផងដែរ៕

        ដោយៈ គង់ ហ្វីអូណា

        ភ្នំពេញៈ បណ្រាក្រុមហ៊ុនធំៗចំនួន១១ នឹងផ្តល់ឱកាសការងារសរុបចំនួន៧៤១កន្លែង សម្រាប់និស្សិត  និងអ្នកកំពុងស្វែងរកការងារធ្វើក្នុងវេទិកាការងារ ដែលរៀបចំដោយទីភ្នាក់ងារជាតិមុខរបរ និងការងារ(NEA) នៅក្រុងភ្នំពេញ។

យោងតាមទីភ្នាក់ងារជាតិមុខរបរ និងការងារ នៅថ្ងៃទី៩ ខែសីហានេះ បានលើកឡើងក្នុងបណ្តាញសង្គមថា ចំពោះនិស្សិត និងអ្នកកំពុងតែស្វែងរកការងារធ្វើ ឬចង់ផ្លាស់ប្តូរការងារអាចយកប្រវត្តិរូបសង្ខេប (CV) ដើម្បីចូលរួមដាក់ពាក្យ និងសម្ភាសផ្ទាល់ជាមួយ អ្នកតំណាងក្រុមហ៊ុនទាំងនោះបាន ចាប់ពីម៉ោង៨ព្រឹក ដល់ម៉ោង ៥ល្ងាច នៅក្នុងបរិវេណក្រសួងការងារ និងបណ្តុះបណ្តាលវិជ្ជាជីវៈនាព្រឹកថ្ងៃទី១០ សីហានេះ។

ភ្នាក់ងារជាតិមុខរបរ និងការងារបានបញ្ជាក់ថា ចំពោះក្រុមហ៊ុនធំៗទាំង១១ ដែលជ្រើសរើសបុគ្គលិកចូលបំរើការងារ រួមមាន  ក្រុមហ៊ុន Makro (Cambodia) Co., Ltd., ក្រុមហ៊ុនAeon cambodia, ក្រុមហ៊ុនCambodia Airports, ក្រុមហ៊ុនANGKOR DATA COMMUNICATION GROUP CO.,LTD ,Hattha bank ,Cambodia Asia Bank (CAB Bank) ,ក្រុមហ៊ុន Onion Mobility Co,. Ltd, ក្រុមហ៊ុន គីម ម៉ិច ខនស្រ្តាក់សិន និង អ៊ិនវេសមេន,ក្រុមហ៊ុន អិនវេស អិម ថេកណឡជី ឯ.ក ,ក្រុមហ៊ុន Easyhome, ក្រុមហ៊ុន GFG ៕

ដោយៈ ជេស៊ីកា
ភ្នំពេញៈ សមាសភាពគណៈរដ្ឋមន្រ្តី និតិកាលទី៧ ដែលដឹកនាំដោយលោកបណ្ឌិតហ៊ុន ម៉ាណែតនាយករដ្ឋមន្រ្តីនៃកម្ពុជា បានបង្ហាញបណ្តើរៗហើយ។
រចនាសម្ព័ន្ឋរាជរដ្ឋាភិបាលថ្មីនេះ ត្រូវបានបង្ហាញ និងចែកចាយតាមរយៈបណ្តាញទំនាក់ទំនងសង្គម យ៉ាងផុសផុសនៅថ្ងៃទី៩ សីហានេះ។
គណៈរដ្ឋមន្រ្តីថ្មីនឹងប្រកាស និងចេញដំណើរនៅថ្ងៃទី២២ សីហាខាងមុខនេះ ស្របពេលអ្នកវិភាគ និងអ្នកជំនាញជាច្រើនបានសម្តែងសុទិដ្ឋិនិយមថា គណៈរដ្ឋមន្រ្តី ដែលភាគច្រើនជាបុគ្គលវ័យក្មេង និងធ្លាប់សិក្សានៅបរទេស នឹងដឹកនាំកម្ពុជាឲ្យកាន់តែរីកចម្រើន ថ្កុំថ្កើងថែមមួយកម្រិតទៀត៕