ដោយ: គង់ លាងហួរ

ប៉េកាំង: ប្រទេសចិនចូលចិត្តសាងសង់ផ្លូវ និងស្ពានចាប់ពីសម័យកាលជាច្រើន ដែលកន្លងផុតទៅ ដោយសារការតភ្ជាប់ទាំងនោះ បានជួយសម្រួលដល់លំហូរនៃមនុស្ស ទំនិញ និងទ្រព្យសម្បត្តិផងដែរ។

ប៉ុន្តែមានតែប្រទេសមួយចំនួនប៉ុណ្ណោះ ដែលអាចមានលទ្ធភាពសាងសង់ប្រឡាយ ដែលត្រូវការកម្លាំងពលកម្មយ៉ាងច្រើន និងទាម​ទារជំនាញបច្ចេកវិទ្យាខ្ពស់។

កាលពីជាង២.២០០ឆ្នាំមុន ក្នុងកំឡុងសម័យរាជវង្ស Qin អធិរាជទី១ ក្នុងប្រវត្តិសាស្ត្រចិន លោកQin Shi Huang បានសាងសង់ប្រឡាយ ឬព្រែកជីក Lingqu ប្រវែង៣៦,៤គីឡូម៉ែត្រ ដើម្បីដឹកជញ្ជូនទាហានទៅវាយដណ្តើម និងពង្រីកទឹកដី។គម្រោងជីកប្រឡាយនេះ បានតភ្ជាប់ទន្លេ Xiang ក្នុងខេត្ត Hunan ដែលជាដៃនៃទន្លេរYangtze ដែលមានប្រវែង៦.៣០០គីឡូម៉ែត្រ ជាមួយនឹងទន្លេLi ក្នុងតំបន់ស្វយ័ត Guangxi Zhuang ភាគខាងត្បូងប្រទេសចិន។

ប៉ុន្តែរហូតមកដល់ខែសីហា ឆ្នាំ២០២២ នៅពេលដែលការសាងសង់ប្រឡាយ Pinglu បានចាប់ផ្តើម គេមិនបានឃើញមានប្រឡាយថ្មីផ្សេងទៀតត្រូវបានសាងសង់ឡើងនោះទេ។

គម្រោងព្រែកជីក Pinglu ត្រូវបានគេមើលឃើញថា មិនត្រឹមតែជាឱកាស ក្នុងការអភិវឌ្ឍតំបន់ព្រំដែន នាភាគនិរតីនៃខេត្ត Guangxi ប៉ុណ្ណោះទេ ប៉ុន្តែថែមទាំងបង្ហាញពីបច្ចេកទេសសំណង់ ទំនើបបំផុតនិងការគិតគូរ ជាយុទ្ធសាស្ត្ររបស់ប្រទេសចិន ស្របពេលមានការប្រែប្រួលភូមិសាស្ត្រនយោបាយយ៉ាងឆាប់រហ័ស។

គម្រោងនេះមានប្រវែង១៣៥គីឡូម៉ែត្រ និងទំហំទឹកប្រាក់ចំនួន៧២,៧ពាន់លានយ័ន(ប្រហែល១០,១ពាន់លានដុល្លារអាមេរិក)។

លោក Gao Zhendong ទីប្រឹក្សា​ជើងចាស់​ដែល​ជួយ​ក្រុមហ៊ុន​ចិន​ជាច្រើន ដើម្បីស្វែងរក​ឱកាស​វិនិយោគ ​ក្នុង​បណ្តាប្រទេស​អាស៊ីអាគ្នេយ៍បានលើកឡើងថា គម្រោងព្រែកជីកនេះ គឺប្រៀបស្មើទៅនឹងសរសៃឈាមបន្ថែមទៀត ដើម្បីតភ្ជាប់ប្រទេសចិន ជាមួយនឹងទីផ្សារសមាគមប្រជាជាតិអាស៊ីអាគ្នេយ៍ ដោយលោកសំដៅដល់ប្លុកអាស៊ានដែលមានសមាជិក១០ប្រទេស។ព្រែកជីក Pinglu គឺជាគម្រោងនៅក្នុងច្រករបៀងពាណិជ្ជកម្មដីគោក- និងសមុទ្រភាគខាងលិចរបស់ប្រទេសចិន ដែលនឹងជីកទៅដល់ឈូងសមុទ្រ Beibu  និងសមុទ្រចិនខាងត្បូង។

យោងតាមរបាយការណ៍ វាយតម្លៃផលប៉ះពាល់លើបរិស្ថានបានបង្ហាញឱ្យដឹងថា ព្រែកជីកនេះត្រូវបានគេរំពឹងថា នឹងអាចផ្ទុកទំនិញបាន១០៨លានតោននៅឆ្នាំ២០៣៥ និង១៣០លានតោននៅឆ្នាំ២០៥០។

ព្រែកជីក Pinglu នឹងអាចឱ្យកប៉ាល់កុងតឺន័រ ឬក្រុមហ៊ុនដឹកជញ្ជូនភាគច្រើន ធ្វើដំណើរពីទីក្រុងណាននីង ទៅកាន់ប្រទេសវៀតណាម ម៉ាឡេស៊ី សិង្ហបុរី ឥណ្ឌូនេស៊ី និងបណ្តាប្រទេសអាស៊ីអាគ្នេយ៍ផ្សេងទៀត ក្នុងរយៈពេលត្រឹមតែប៉ុន្មានសប្តាហ៍ប៉ុណ្ណោះ។

គម្រោងខ្នាតយក្សនេះ ក៏ភ្ជាប់ជាមួយក្តីសង្ឃឹមរបស់ទីក្រុងប៉េកាំង ក្នុងការធ្វើឱ្យប្លុកអាស៊ាន ដែលមានប្រជាជនចំនួនជាង៦០០លាននាក់ និងជាដៃគូពាណិជ្ជកម្ម ដ៏ធំបំផុតរបស់ប្រទេសចិន ក្លាយជាគន្លឹះមួយ ក្នុងការទប់ទល់ឥទ្ធិពលរបស់សហរដ្ឋអាមេរិកផងដែរ៕

ដោយៈ គង់ សូរិយា

        ភ្នំពេញៈ អនុប្រធានសភាពាណិជ្ជកម្មកម្ពុជា អ្នកឧកញ៉ាលឹម ហេងបានថ្លែងថា រដ្ឋាភិបាលថ្មីនឹងយកចិត្តទុកដាក់ លើកទឹកចិត្តដល់អាជីវកករនានា ដើម្បីជម្រុញកំណើនសេដ្ឋកិច្ចជាតិ។

អ្នកឧកញ៉ាលឹម ហេងបានមានប្រសាសន៍ឲ្យដឹង តាមបណ្តាញតេឡេក្រាមកាលពីម្សិលម៉ិញនេះថា ការបោះឆ្នោតនាអាណត្តិទី៧នេះ ជាការបោះឆ្នោតដោយរីករាយ និងអបអរសាទរ និងបង្ហាពីលទ្ឋិប្រជាធិបតេយ្យ សេរីពហុបក្ស ដែលមិនមានអំពើហឹង្សា អសន្តិសុខ និងមិនមានបញ្ហាអ្វីកើតឡើងឡើយ ដែលឆ្លុះបង្ហាញពីសុខសន្តិភាព ស្ថេរភាពនយោបាយ មិនមានអ្វីគួរឲ្យព្រួយបារម្ភឡើយ។ អ្នកឧកញ៉ាលឹម ហេងបានបន្តថា “នេះជាអ្វីដែលអ្នកវិនិយោគចង់បាន ហើយអ្នកវិនិយោគបរទេសផ្សេងៗ នឹងមានចំណាប់អារម្មណ៍មកកាន់កម្ពុជាច្រើន”។ លោកបន្តថា “ដូចយើងបានដឹងស្រាប់ហើយ នៅក្នុងតំបន់អាស៊ាន ដែលមានអស្ថេរភាពនយោបាយ បានធ្វើឲ្យអ្នកវិនិយោ​គផ្សេងៗចាកចេញ និងបានរើមកកាន់កម្ពុជា”។

អ្នកឧកញ៉ាបានបន្តដោយសុទិដ្ឋិនិយមថា “ខ្ញុំជឿថាក្រោយការបោះឆ្នោត ដែលប្រកបដោយស្ថេរភាពនយោបាយនេះ នឹងធ្វើឲ្យអ្នកវិនិយោគ ពីបណ្តាប្រទេសផ្សេងៗ នឹងមើលឃើញកម្ពុជាច្បាស់”។ អ្នកឧកញ៉ាបន្តថា “ពួកគេនឹងមកកាន់កម្ពុជា ស្របពេលដែលយើងបានដាក់ឲ្យប្រើប្រាស់ច្បាប់វិនិយោគថ្មី ដែលមានការលើកទឹកចិត្តច្រើន”។

អ្នកឧកញ៉ាបានបញ្ជាក់ថា អ្វីកាន់តែពិសេស គឺការអនុវត្តន៍កិច្ចព្រមព្រៀងពាណិជ្ជកម្មសេរីកម្ពុជា ចិន កិច្ចព្រមព្រៀងពាណិជ្ជកម្មសេរីកម្ពុជា កូរ៉េ និងកិច្ចព្រមព្រៀងភាពជាដៃគូ គ្រប់ជ្រុងជ្រោយតំបន់(RCEP) ជាមួយនឹងកិច្ចព្រមព្រៀងជាមួយអារ៉ាប់រួម ការលើកលែងពន្ឋពីអង់គ្លេស ការទទួលបានEBAពីសហគមន៍អឺរ៉ុប និងGSPពីអាមេរិក នឹងធ្វើឲ្យមានកំណើនវិនិយោគច្រើនថែមទៀតមកកាន់កម្ពុជា៕

ដោយៈ គង់ សូរិយា

        ភ្នំពេញៈ លោកឧកញ៉ាបណ្ឌិតគីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាងបានថ្លែងថា អ្នកវិនិយោគអន្តរជាតិ នឹងចូលមកវិនិយោគច្រើន ពិសេសផ្នែកដីធ្លី សំណង់នានាច្រើន​ក្រោយការរៀបចំរដ្ឋាភិបាលថ្មី។

លោកឧកញ៉ាបានមានប្រសាសន៍ឲ្យដឹង កាលពីល្ងាចថ្ងៃទី២៤ កក្កដាថា ពេលណារដ្ឋាភិបាលថ្មីមកកាន់តែលឿន យើងមានអ្វីថ្មីៗ អ្នកវិនិយោគបរទេស នឹងចូលមកវិនិយោគលើវិស័យ ឧស្សាហកម្ម កសិកម្ម សណ្ឋាគារច្រើន។

លោកបន្តថា “បើនិយាយពីវិស័យអចលនទ្រព្យវិញ គឺមិនត្រឹមតែដីធ្លីទេ ប៉ុន្តែពួកគេនឹងវិនិយោគលើវិស័យសំណង់ច្រើន ព្រោះពួកគេរង់ចាំតែតែរដ្ឋាភិបាលថ្មី”។ លោកបន្តថា “ការបោះឆ្នោតដែលបានសុខសន្តិភាព និងមានលទ្ឋផលដូចមនុស្សមួយប្រទេសរំពឹងទុក ហើយដៃគូរបស់ខ្ញុំ ពួកគេបានប្រាប់ខ្ញុំថា ពួកគេនឹងត្រលប់មកវិញនៅរយៈពេល១សប្តាហ៍ ឬ១០ថ្ងៃក្រោយ”។

លោកឧកញ៉ាបណ្ឌិតគីម ហ៊ាងបានបន្តថា អ្វីពួកគេចង់បានគឺ សន្តិភាព ដីធ្លី ព្រោះបើគ្មានសន្តិភាពតម្លៃដីធ្លី ក៏មិនកើនឡើងដែរ ហេតុនេះអ្វីដែលពួកគេរង់ចាំ គឺលទ្ឋផលនៃការបោះឆ្នោត ហើយលទ្ឋផលបានចេញមកហើយ អញ្ចឹងអ្នកវិនិយោគបរទេស នឹងមកកាន់កម្ពុជាកាន់តែច្រើន៕

(ភ្នំពេញ)៖ លោកយិន លាងគង់ ស្ថាបនិក និងអគ្គនាយកនៃគេហទំព័រProperty Area និង Cambodia Financial Time រួមទាំងបុគ្គលិកទាំងអស់ សូមចូលរួមអបអរសាទរ ជូនចំពោះឧកញ៉ា ថៃ ជាហួត ដែលទើបតែត្រូវបានព្រះមហាក្សត្រសព្វព្រះរាជហឫទ័យ ត្រាស់បង្គាប់ផ្ដល់គោរមងារជា «អ្នកឧកញ៉ា»។
ព្រះរាជទានត្រាស់បង្គាប់ផ្តល់គោរមងារ «អ្នកឧកញ៉ា» ជាសក្ខីភាពឆ្លុះបង្ហាញអំពីកិច្ចខិតខំប្រឹងប្រែង ទាំងកម្លាំងកាយនិងចិត្ត ដោយមិនខ្លាចនឿយហត់របស់ អ្នកឧកញ៉ា ថៃ ជាហួតក្នុងបុព្វហេតុដើម្បីជួយសង្គមជាតិ និងចូលរួមចំណែកដល់ការអភិវឌ្ឍសេដ្ឋកិច្ចប្រទេសជាតិឱ្យកាន់តែរីកចម្រើន។ ការប្រទាននេះពិតជាស័ក្តិសមនិងផ្ដល់កិត្តិយសដ៏ឧត្តុង្គឧត្តមសម្រាប់ អ្នកឧកញ៉ា និងក្រុមគ្រួសារ។
យើងខ្ញុំសូមបួងសួងដល់វត្ថុស័ក្ដិសិទ្ធិទាំងអស់ ក្នុងលោកតាមជួយប្រោះព្រំប្រសិទ្ធពរជ័យជូន អ្នកឧកញ៉ា និងក្រុមគ្រួសារ សូមជួបប្រទះតែសេចក្ដីសុខ សុភមង្គល និងប្រកបដោយពុទ្ធពរទាំង ៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ: គង់ លាងហួរ
ហាណូយ: លោកស្រី Janet Yellen រដ្ឋមន្ត្រីក្រសួងរតនាគារអាមេរិក បានមានប្រសាសន៍ថា សហរដ្ឋអាមេរិកមានឆន្ទៈជួយដល់ប្រទេសវៀតណាមក្នុងការផលិតឧបករណ៍ semiconductors និងជួយកែលម្អសមត្ថភាពថាមពលកកើតឡើងវិញរបស់ប្រទេសនេះឡើងវិញ។

លោកស្រីបានបញ្ជាក់ប្រាប់នាយករដ្ឋមន្ត្រីវៀតណាម លោក Pham Minh Chinh ថា “សហរដ្ឋអាមេរិកចាត់ទុកវៀតណាមជាដៃគូសំខាន់ក្នុងការជំរុញតំបន់ឥណ្ឌូប៉ាស៊ីហ្វិកប្រកបដោយភាពសេរី និងបើកចំហ”។

លោកស្រីJanet Yellen បានបន្តថា សហរដ្ឋអាមេរិកចង់ជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មជាមួយវៀតណាម ព្រមទាំងផែនការពង្រឹងកិច្ចសហប្រតិបត្តិការលើខ្សែសង្វាក់ផ្គត់ផ្គង់ដោយឈរលើមូលដ្ឋាននៃភាពជាដៃគូដ៏ទូលំទូលាយ និងគួរឱ្យទុកចិត្តបាន។មន្ត្រីជាន់ខ្ពស់អាមេរិករូបនេះក៏បានផ្តល់នូវកិច្ចសហប្រតិបត្តិការបន្ថែមទៀតពីរតនាគារសហរដ្ឋអាមេរិកសម្រាប់ធនាគាររដ្ឋវៀតណាម និងក្រសួងហិរញ្ញវត្ថុ ដើម្បីធ្វើទំនើបកម្មលើការបង្កើតគោលនយោបាយរូបិយវត្ថុ យន្តការអត្រាប្តូរប្រាក់ និងការទទួលបានធនធានហិរញ្ញវត្ថុអន្តរជាតិ។

ជាការឆ្លើយតប លោក Pham Minh Chinh បានបញ្ជាក់ថា ការពង្រីកខ្សែសង្វាក់ផ្គត់ផ្គង់ និងការផលិតឧបករណ៍ semiconductors ក៏ជាអាទិភាពសម្រាប់វៀតណាមផងដែរ។លោកបានមានប្រសាសន៍បន្តថា វៀតណាមកំពុងផ្តោតទៅលើការកែលម្អស្ថាប័ន គោលនយោបាយ ហេដ្ឋារចនាសម្ព័ន្ធបច្ចេកទេស និងការធ្វើទំនើបកម្មលើអភិបាលកិច្ច និងការបណ្តុះបណ្តាលធនធានមនុស្ស។

នាយករដ្ឋមន្ត្រីរូបនេះបានអះអាងថា ប្រទេសវៀតណាមក៏ផ្តល់អាទិភាពដល់ពហុភាគីភាវូបនីយកម្ម និងការធ្វើសមាហរណកម្មអន្តរជាតិយ៉ាងសកម្ម ហើយមានឆន្ទៈធ្វើជាដៃគូដែលអាចទុកចិត្តបាន និងជាសមាជិកដែលមានការទទួលខុសត្រូវរបស់សហគមន៍អន្តរជាតិផងដែរ។

លោកបានបន្ថែមថា ធនាគាររដ្ឋវៀតណាម និងរតនាគារសហរដ្ឋអាមេរិកគួរតែមានយន្តការមួយដើម្បីដោះស្រាយបញ្ហាណាមួយដែលកើតឡើង ស្របពេលមានភាពមិនច្បាស់លាស់នៃសេដ្ឋកិច្ចពិភពលោកតាមរយៈការសន្ទនាគ្នា។

លោកសង្ឃឹមថា សហរដ្ឋអាមេរិកក៏នឹងជួយដល់វៀតណាមក្នុងការអភិវឌ្ឍឧស្សាហកម្មថាមពលកកើតឡើងវិញរបស់ខ្លួន និងបង្កើតទីផ្សារកាបូនមួយផងដែរ៕

ដោយ: គង់ លាងហួរ
បាងកក: ប្រធានការិយាល័យច្រករបៀងសេដ្ឋកិច្ចភាគខាងកើតបានបញ្ជាក់ឱ្យដឹងនៅថ្ងៃព្រហស្បតិ៍នេះថា ការសាងសង់ផ្លូវរថភ្លើងល្បឿនលឿនតភ្ជាប់ព្រលានយន្តហោះចំនួន៣ នឹងត្រូវពន្យារពេល១ឆ្នាំក្រោយកាលវិភាគ។

លោក Jula Sukmanop ប្រធាន EEC បានលើកឡើងថា Asia Era One Co Ltd ដែលជាម្ចាស់សម្បទាននៃផ្លូវរថភ្លើងល្បឿនលឿន Don Muang-Suvarnabhumi-U-Tapao មិនអាចចាប់ផ្តើមសាងសង់នៅឆ្នាំនេះបានទេ ដោយសារខ្លួនកំពុងរង់ចាំការអនុម័តសិទ្ធិវិនិយោគពីសំណាក់ក្រុមប្រឹក្សាវិនិយោគថៃ(BoI)។

លោក Jula បានអះអាងថាការសាងសង់នឹងត្រូវចំណាយរយៈពេលពេល៤ឆ្នាំ ហើយប្រសិនបើវាចាប់ផ្តើមនៅឆ្នាំក្រោយ ផ្លូវរថភ្លើងល្បឿនលឿននេះនឹងចាប់ផ្តើមដំណើរការនៅឆ្នាំ២០២៨ ពោលគឺយឺតមួយឆ្នាំក្រោយកាលវិភាគ។

លោកបានបន្តទៀតថា ក្រុមហ៊ុន Asia Era One បានដាក់ការស្តីបន្ទោសការពន្យារពេលនេះ ទៅលើភ្នាក់ងាររដ្ឋាភិបាលចំពោះការខកខានក្នុងការសម្របសម្រួលការសាងសង់។ ក្រុមហ៊ុនបានអំពាវនាវឱ្យរដ្ឋាភិបាលធ្វើវិសោធនកម្មកិច្ចសន្យាភាពជាដៃគូសាធារណៈ និងឯកជនរយៈពេល៥០ឆ្នាំ ដើម្បីកាត់បន្ថយការពន្យារពេល។

សំណើនេះបានជួបការជំទាស់យ៉ាងខ្លាំងពីសំណាក់គណបក្សភឿថៃ ដែលបក្សនេះបានអះអាងថា ការធ្វើវិសោធនកម្មកិច្ចសន្យាបែបនេះត្រូវតែរង់ចាំការអនុម័តដោយរដ្ឋាភិបាលជាប់ឆ្នោតបន្ទាប់។

លោក Jula បានលើកឡើងថា កិច្ចសន្យាមិនចាំបាច់ធ្វើវិសោធនកម្មឥឡូវនេះទេ ប៉ុន្តែកិច្ចសន្យានេះអាចបន្ថែមមូលហេតុនៃការពន្យារពេល ដូចជាជំងឺរាតត្បាតកូវីដ-១៩ ក្នុងចំណោមព្រឹត្តិការណ៍ធំៗផ្សេងៗទៀត។

លោកបានបន្ថែមថា បន្ទាប់ពីនោះ EEC នឹងបញ្ជូនសេចក្តីព្រាងស្តីពីការបន្ថែមមូលហេតុទៅក្រុមប្រឹក្សារដ្ឋដើម្បីពិនិត្យ មុនពេលបញ្ជូនទៅក្រុមប្រឹក្សាភិបាល EEC សម្រាប់ការយល់ព្រម ហើយបន្ទាប់មកត្រូវអនុម័តដោយគណៈរដ្ឋមន្ត្រី៕