ដោយៈ គង់ សូរិយា

        ភ្នំពេញៈ អភិបាលនៃគណៈអភិបាលខេត្តកំពង់ស្ពឺ លោកវ៉ី សំណាងបានមានប្រសាសន៍ឲ្យដឹងថា នៅខែសីហា និងកញ្ញាខាងមុខ លោកនឹងដឹកនាំប្រតិភូទៅទស្សនកិច្ច ​នៅខេត្តចំនួន៣នៅប្រ​ទេសចិន។

លោកអភិបាលបានមានប្រសាសន៍ឲ្យ ដឹងតាមបណ្តាញតេឡេក្រាមនាព្រឹកថ្ងៃទី២៤ កក្កដានេះថា ប្រសិនជាមិនមានអ្វីប្រែប្រួលទេនោះ នៅពាក់កណ្តាលខែសីហាខាងមុខនេះ លោកនឹងដឹកនាំប្រតិភូ ទៅទស្សនកិច្ច នៅខេត្តគ័ងចូវ និងខេត្តស៊ិនជិនប្រទេសចិន ដើម្បីផ្សព្វផ្សាយពីឱកាស និងសក្តានុពលនៃការវិនិយោគនៅកម្ពុជា ដើម្បីទាក់ទាញអ្នកវិនិយោគចិនកាន់តែច្រើន មកកាន់ខេត្តកំពង់ស្ពឺ ក៏ដូចជាក្របខ័ណ្ឌទូទាំងប្រទេស។

លោកប​ន្តថា ជាមួយគ្នានេះ នៅខែកញ្ញាខាងមុខផងដែរ លោកក៏គ្រោងដឹកនាំប្រតិភូ ទៅទស្សនកិច្ចនៅខេត្តហឺណាន ដែលជាខេត្តមួយនេះ មានប្រជាពលរដ្ឋរស់នៅជាង៩០លាននាក់ ស្មើនឹងប្រទេសវៀតណាមមួយ។ លោកបន្តថា គំរោងធ្វើទស្សនកិច្ចទៅកាន់ខេត្តទាំងបីរបស់ចិននេះ ធ្វើឡើងតាមការអញ្ជើញរបស់ថ្នាក់ដឹកនាំខេត្តទាំងបី​របស់ចិន ក៏ដូចជាពីសមាគមធុរកិច្ចចិនផងដែរ។

លោកបន្តថា “តាមរយៈការបោះឆ្នោត ប្រកបដោយសុខសន្តិភាពម្សិលម៉ិញនេះ បានបង្ហាញឲ្យពិភពលោកមើលឃើញថា កម្ពុជាបាន​ប្រកាន់ខ្ជាប់លទ្ឋិប្រជាធិបតេយ្យពិតប្រាកដ ដែលនឹងធ្វើឲ្យកម្ពុជាកាន់តែទាក់ទាញការចាប់អារម្មណ៍ និងទាក់ទាញវិនិយោគិនកាន់តែច្រើននាពេលអនាគត៕

ដោយៈ គង់ សូរិយា

        ភ្នំពេញៈ អ្នកជំនាញជម្រុញឲ្យរដ្ឋាភិបាលរៀបចំច្បាប់Zoning ​​ឬច្បាប់កំណត់តំបន់ អភិវឌ្ឍន៍ឲ្យ​បានច្បាស់លាស់ ដើម្បីជម្រុញការលើកកំពស់ការអភិវឌ្ឍន៍ វិស័យអចលនទ្រព្យ ប្រកបដោយនិរន្តរភាព។

អនុប្រធានសមាគមពាណិជ្ជកម្មកម្ពុជា ចិន លោកឡោ វិចិត្របានមានប្រសាសន៍ឲ្យដឹង តាមបណ្តាញតេឡេក្រាម កាលពីថ្ងៃទី២៣ កក្កដាថា នៅរាជធានីភ្នំពេញ ក៏ដូចជា បណ្តាខេត្តមានសក្តានុពលដូចជា ខេត្តសៀមរាប ព្រះសីហនុ កំពត ជាដើម រដ្ឋាភិបាលគួររៀបចំច្បាប់Zoning ដើម្បីអាចរៀបចំតំបន់ណាមួយជាតំបន់CBD តំ​បន់សាងសង់អាគារខ្ពស់ តំបន់លំនៅដ្ឋាន និងតំបន់អភិរ័ក្សជាដើម។ លោកបន្តថា “រដ្ឋាភិបាលបាន​ចេញប្លង់គោល អភិវឌ្ឍន៍រាជធានីភ្នំពេញរួចហើយ ដែលគ្រោងពង្រីករាជធានីក្នុងកាំរង្វង់៣០គីឡូម៉ែត្រការ៉េ ប៉ុន្តែយើងចាំបាច់ត្រូវរៀបចំច្បាប់Zoningមួយទៀត”។ លោក បន្តថា “បើមិនមានច្បាប់នេះទេ ការអភិវឌ្ឍអចលនទ្រព្យដូចជា អាគា​រខុនដូ អាផាតម៉ិន សណ្ឋាគារខ្ពស់ៗរប៉ាត់រប៉ាយ និងធ្វើឲ្យនគរូបនីយកម្មរបស់យើងគ្មានសណ្តាប់ធ្នាប់ និងហេដ្ឋារចនាសម្ព័ន្ឋរញ៉េរញ៉ៃផងដែរ”។

លោកឡោ វិចិត្របានបន្តថា អន្តរក្រសួងដូចជា ក្រសួងសេដ្ឋកិច្ច និងហិរញ្ញវត្ថុ ក្រសួងសាធាណៈការ និងដឹកជញ្ជូន ក្រសួងរៀបចំដែនដី នគរូបនីយកម្ម និងសំណង់ ក្រសួងមហាផ្ទៃជាដើមគួរពិចារណាលើបញ្ហានេះឡើងវិញ។លោកបន្តថា ការមានប្លង់គោលអភិវឌ្ឍន៍រាជធានី រហូតដល់ឆ្នាំ២០៣៥ ពិតជាល្អ ប៉ុន្តែវាមិនបានជួយដល់ការអភិវឌ្ឍ ប្រកបដោយចីរភាពទេ ព្រោះវាគ្រាន់តែជាផែនការ ដែលមិនទាន់បានកំណត់ជាក់លាក់ ដែលមន្រ្តីដឹងលឺ ប៉ុន្តែមិនមានច្បាប់ណាចាប់បង្ខំឲ្យអនុវត្តន៍ទេ ហេតុនេះការមានច្បាប់Zoning គឺជាការកំណត់ច្បាស់លាស់មួយ ដែលអ្នកអភិវឌ្ឍន៍ត្រូវតែគោរពច្បាប់។

លោកបន្តថា “ការគ្មានច្បាប់Zoning នឹងមិនជួយដល់ការអភិវឌ្ឈ​និងជម្រុញការងើបឡើង លើតម្លៃដីធ្លីបានប្រសើរឡើយ ស្របពេលទីផ្សារអចលនវត្ថុបច្ចុប្បន្នកំពុងមានបញ្ហា”។ជាមួយគ្នានេះ លោកបណ្ឌិតគី សេរីវឌ្ឍន៍អ្នកស្រាវជ្រាវសេដ្ឋកិច្ច នៃរាជបណ្ឌិតសភាកម្ពុជាកាលពីពេលថ្មីៗ​នេះ ក៏បានជម្រុញឲ្យរដ្ឋាភិបាលរៀបចំឲ្យមានការរៀបចំច្បាប់Zoning ឬច្បាប់កំណត់តំបន់អភិ​វឌ្ឍន៍ផងដែរ ដើម្បីផ្តល់ភាពងាយស្រួល ដល់ប្រជាពលរដ្ឋដឹងថា   រដ្ឋាភិបាល មានផែនការអភិវឌ្ឍន៍លំនៅដ្ឋាន ឬឧស្សាហកម្មនៅតំបន់ណាជាដើម៕

ដោយ: គង់ លាងហួរ
អន្តរជាតិ: បន្ទុកបំណុលគ្រួសារក្នុងប្រទេសកូរ៉េខាងត្បូងកាន់តែធ្ងន់ធ្ងរឡើង ខណៈការទូទាត់សង ដោយផ្អែកលើប្រាក់ចំណូលប្រចាំឆ្នាំរបស់មនុស្សម្នាក់ៗកំពុងហក់ឡើងក្នុងល្បឿនលឿនបំផុតទី២ នៅលើពិភពលោក។

យោងតាមទិន្នន័យពីធនាគារសម្រាប់ការទូទាត់អន្តរជាតិ (BIS) កាលពីថ្ងៃច័ន្ទ បានឱ្យដឹងថា អនុបាតបង់សងបំណុលរបស់ប្រទេសកូរ៉េ (DSR) ស្ថិតនៅត្រឹម១៣,៦ភាគរយ កាលពីឆ្នាំមុន ដែលជាកម្រិតខ្ពស់បំផុតទី២ ក្នុងចំណោមបណ្តាប្រទេសសេដ្ឋកិច្ចធំៗទាំង១៧នៅលើពិភពលោក ។

លើសពីនេះ DSR របស់ប្រទេសខាងត្បូងបានកើនឡើង០,៨ភាគរយ បើធៀបនឹងឆ្នាំ២០២១ ពោលគឺជាអត្រាដ៏លឿនបំផុតទី២ផងដែរ បន្ទាប់ពីប្រទេសអូស្ត្រាលី។

ដូច្នេះតើអ្វីទៅជា DSR? អនុបាទបង់សងបំណុល (Debt Service Ratio) ឬDSR គឺជាវិធីសាស្រ្តវាស់វែងទៅលើលទ្ធភាពនៃការបង់សងបំណុលត្រឡប់មកវិញរបស់អតិថិជន(កូនបំណុល)។

ក្រុមអ្នកឃ្លាំមើលទីផ្សារបានអះអាងថា ការរឹតបន្តឹងរូបិយវត្ថុដ៏ខ្លាំងក្លារបស់ធនាគារកណ្តាលកូរ៉េ (BOK) បានធ្វើឱ្យបន្ទុកការប្រាក់មានសភាពកាន់តែធ្ងន់ធ្ងរសម្រាប់គ្រួសារ។

ជាក់ស្តែង ក្នុងឆ្នាំ២០២២ ធនាគារកណ្តាលកូរ៉េបានដំឡើងអត្រាគោលនយោបាយចំនួន៧ដង ដោយបង្កើនអត្រាការប្រាក់ពី១,២៥ភាគរយដល់៣,២៥ភាគរយ។

ជាមួយគ្នានេះ យោងតាមទិន្នន័យដាច់ដោយឡែកពីធនាគារកូរ៉េ (BOK) ក៏បានបង្ហាញផងដែរថា សមាមាត្របំណុលគ្រួសាររបស់ប្រទេសកូរ៉េខាងត្បូងធៀបទៅនឹងផលិតផលក្នុងស្រុកសរុប (GDP) គឺជាកម្រិតខ្ពស់បំផុតទី៣នៅក្នុងពិភពលោក៕

តែម សុខុម

តៃប៉ិ: អ្នកវិនិយោគបរទេសពេលនេះកំពុងទុកបញ្ហាភាពតានតឹងផ្នែកភូមិសាស្ត្រនយោបាយមួយឡែកសិន ហើយសម្រុកទៅវិនិយោគលើភាគហ៊ុននៅតៃវ៉ាន់ ដោយទទួលបានរំហូរវិនិយោគបរទេសដ៏ធំបំផុតមិនធ្លាប់មានក្នុងរយៈពេលប៉ុន្មានឆ្នាំមកនេះដោយសារភាគហ៊ុនបញ្ញាសិប្បនិម្មិត (AI) និងភាគហ៊ុនបន្ទះឈីបហក់ឡើងស្រឺតៗ។

ការទិញដុលពីអ្នកវិនិយោគបរទេសក្នុងទំហំ១២ពាន់លានដុល្លារអាមេរិក សម្រាប់រយៈពេល៦ខែគិតមកទល់នឹងខែមិថុនា នេះគឺជាចំនួនដ៏ធំបំផុតមិនធ្លាប់មានចាប់តាំងពីឆមាសទី១ ដើមឆ្នាំ២០០៨ ហើយលទ្ធផលសន្ទស្សន៍គោលរបស់តៃវ៉ាន់ ដែលបានកើនឡើងរហូតដល់២០%ក្នុងឆ្នាំនេះគឺល្អបំផុតនៅអាស៊ី។

ហើយក្រុមអ្នកឃ្លាំមើលទីផ្សារបានព្យាករថា ភាគហ៊ុនបច្ចេកវិទ្យា AI នឹងហក់ឡើងបន្ថែមទៀត។ នេះបើយោងតាមសារព័ត៌មាន CNA ចុះផ្សាយកាលពីថ្ងៃសុក្រ ទី២១ ខែកក្កដា។

លោក Carlos Casanova អ្នកជំនាញសេដ្ឋកិច្ចជាន់ខ្ពស់ប្រចាំតំបន់អាស៊ី នៅធនាគារស្វីស Union Bancaire Privee បានលើកឡើងថា “អ្វីដែលយើងកំពុងមើលឃើញនៅពេលនេះ គឺជាពាណិជ្ជកម្មជាយុទ្ធសាស្ត្រដែលមានទំនោរផ្អែកលើការបណ្តាក់ទុករយៈពេលខ្លី មុននឹងតម្លៃនៃវិស័យបច្ចេកវិទ្យាកើនឡើងដល់កម្រិតកំពូល”។

លោកបានបន្ថែមថា “ស្ថានភាពតានតឹងដែលអាចកើតមាននៅចក្រសមុទ្រតៃវ៉ាន់ Taiwan Strait គឺមិនសូវពាក់ព័ន្ធឡើយសម្រាប់អ្នកវិនិយោគទាំងនេះ”។

ប្រទេសចិន បានអះអាងថា តៃវ៉ាន់ ដែលគ្រប់គ្រងតាមបែបប្រជាធិបតេយ្យថាជាទឹកដីរបស់ខ្លួន ហើយការអះអាងបែបនេះត្រូវបានរដ្ឋាភិបាលតៃប៉ិ ជំទាស់យ៉ាងដាច់អហង្ការរហូតមក៕ Reuters៕

តែម សុខុម

បាងកក: ចាប់ពីថ្ងៃទី២៤ ដល់ថ្ងៃទី៣០ ខែកក្កដា ខេត្តកោះកុង និងខេត្តត្រាត នៃប្រទេសថៃ គ្រោងរៀបចំព្រឹត្តិការណ៍កីឡារត់ប្រណាំង និងពិព័រណ៍ផលិតផល។ គំនិតផ្តួចផ្តើមនេះគ្រោងធ្វើនៅផ្សារព្រំដែន បាន ហាត់ ឡេក (Ban Hat Lek) ក្នុងគោលបំណងជំរុញទេសចរណ៍ និងពង្រឹងទំនាក់ទំនងរវាងតំបន់ជិតខាងទាំងនេះ។

អភិបាលខេត្តកោះកុង លោកស្រី មិថុនា ភូថង បានបញ្ជាក់តាមរយៈសេចក្តីប្រកាសព័ត៌មានកាលពីថ្ងៃទី១៨ ខែកក្កដា ថា សកម្មភាពទាំងនេះត្រូវបានរៀបចំឡើងជាពិសេសដើម្បីពង្រឹងទំនាក់ទំនងរវាងខេត្តទាំងពីរនេះ។ នេះបើយោងតាមសារព័ត៌មាន The Nation ចុះផ្សាយកាលពីថ្ងៃសុក្រ ទី២១ កក្កដា។

លោកស្រីបានបន្ថែមថា “ខ្ញុំបានស្នើឱ្យប្រជាពលរដ្ឋ ម្ចាស់សណ្ឋាគារ ផ្ទះសំណាក់ រោងចក្រ សហគ្រាស ក្រុមហ៊ុន ធនាគារឯកជន និងភោជនីយដ្ឋានដែលមានបំណងចូលរួមកម្មវិធីនេះចុះឈ្មោះនៅវត្តកាសេម ស៊ីម៉ារាម (Wat Kasem Simaram) ឬ វត្តហាត់ ឡេក (Hat Lek)”។អភិបាលរងខេត្តកោះកុង លោក សុខ សុទ្ធី មិនអាចទាក់ទងសុំការបំភ្លឺបានទេជុំវិញរឿងនេះកាលពីថ្ងៃទី១៩ ខែកក្កដា។ ទោះជាយ៉ាងណា លោក សុខ សុទ្ធី ធ្លាប់បានបញ្ជាក់ថា ទំនាក់ទំនងល្អជាមួយខេត្តត្រាត នឹងជួយជំរុញទំនាក់ទំនងព្រំដែនកាន់តែស៊ីជម្រៅ។

លោកបានស្នើបន្ថែមទៀតធ្វើយ៉ាងបង្កលក្ខណៈឱ្យខេត្តទាំងពីរអាចស្វែងរកឱកាសវិនិយោគទៅវិញទៅមកក្នុងវិស័យមានសក្តានុពលនានា។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានធ្វើការកត់សម្គាល់កាលពីថ្ងៃទី១៩ ខែកក្កដា ថា កម្មវិធី និងការតាំងពិព័រណ៍នេះបានបង្ហាញពីការរីកចម្រើនជាវិជ្ជមានក្នុងវិស័យទេសចរណ៍៕ The Nation៕

ដោយ: គង់ លាងហួរ
អន្តរជាតិ: កំណើនសេដ្ឋកិច្ចរបស់ប្រទេសកូរ៉េខាងត្បូងទំនងជាបានធ្លាក់ចុះបន្តិចជាងកាលពីត្រីមាសមុន ខណៈដែលការនាំចេញធ្លាក់ចុះ និងអត្រាការប្រាក់ខ្ពស់បានជះផលប៉ះពាល់ដល់ការប្រើប្រាស់ឯកជន ដែលគ្របដណ្តប់ប្រហែលពាក់កណ្តាលនៃសេដ្ឋកិច្ច។

ការនាំចេញពីប្រទេសសេដ្ឋកិច្ចធំជាងគេទី៤នៅតំបន់អាស៊ីមួយនេះបានធ្លាក់ចុះនៅក្នុងខែមិថុនា ចំណែក ការនាំចូលក៏ធ្លាក់ចុះផងដែរ ដែលនេះបង្ហាញពីកង្វះខាតនៃតម្រូវការក្នុងស្រុក និងតម្រូវការពីបរទេស ជាពិសេសពីប្រទេសចិន ដែលជាដៃគូពាណិជ្ជកម្មធំបំផុតរបស់ប្រទេសកូរ៉េខាងត្បូង។

យោងតាមការព្យាករជាមធ្យមរបស់អ្នកសេដ្ឋកិច្ចចំនួន២២នាក់ បានឱ្យដឹងថា ដោយផ្អែកលើមូលដ្ឋានពីមួយឆ្នាំទៅមួយឆ្នាំ ផលិតផលក្នុងស្រុកសរុប (GDP) របស់កូរ៉េខាងត្បូង ត្រូវបានគេរំពឹងថា នឹងកើនឡើង០,៨ភាគរយនៅក្នុងអំឡុងខែមេសាដល់ខែមិថុនា ដែលថយចុះបន្តិចបើធៀបទៅនឹងកំណើន០,៩ភាគរយដែលបានកែប្រែក្នុងខែមករាដល់ខែមីនា។ទោះបីជាយ៉ាងណាក្តី បើផ្អែកលើមូលដ្ឋានប្រចាំត្រីមាស សេដ្ឋកិច្ចដែលជំរុញដោយនាំចេញរបស់ប្រទេសនេះបានងើបឡើង០,៥%នៅត្រីមាសទី២ ពោលគឺខ្ពស់ជាងកំណើន០,៣% នៅក្នុងត្រីមាសទី១។

លោក Park Sang-hyun សេដ្ឋវិទូនៅក្រុមហ៊ុន HI Investment and Securities បានអះអាងថា “កំណើន GDP របស់កូរ៉េខាងត្បូង ត្រូវបានគេរំពឹងថា នឹងមានល្បឿនប្រហាក់ប្រហែលនឹងត្រីមាសទី១ ដោយសារការនាំចេញ និងវិស័យផលិតកម្មធ្លាក់ចុះ ការវិនិយោគក៏ធ្លាក់ចុះ ក៏ដូចជាការចំណាយរបស់រដ្ឋាភិបាលតិចជាងមុន”។

លោកបានបន្ថែមថា “កំណើនសេដ្ឋកិច្ចរបស់ប្រទេសកូរ៉េត្រូវបានគេរំពឹងថា នឹងស្ទុះងើបឡើងវិញនៅឆមាសទីពីរនៃឆ្នាំនេះ ប៉ុន្តែវានឹងពឹងផ្អែកលើល្បឿននៃការងើបឡើងវិញនៃសេដ្ឋកិច្ចនៅក្នុងប្រទេសចិនផងដែរ”៕