ដោយ: គង់ លាងហួរ

ប៉ារីស: កម្មវិធី Threads ដែលជាគូប្រជែងនឹង Twitter បានចុះឈ្មោះអ្នកប្រើប្រាស់ជាង១០០លាននាក់ ក្នុងរយៈពេលតិចជាង៥ថ្ងៃ  និងបំបែកកំណត់ត្រាជាកម្មវិធី ដែលមានអ្នកប្រើប្រាស់យ៉ាងលឿនបំផុត។

ខណៈពេលដែល ChatGPT ចំណាយពេល២ខែ ដើម្បីឈានដល់អ្នកប្រើប្រាស់១០០លាននាក់ ហើយកម្មវិធីចែករំលែកវីដេអូ TikTok ចំណាយពេល៩ខែ។ ចំណែកកម្មវិធី Instagram ចំណាយពេល២ឆ្នាំកន្លះ ដើម្បីឈានដល់កម្រិតនេះ បន្ទាប់ពីបានបើកដំណើរការក្នុងឆ្នាំ២០១០ ។
Twitter ត្រូវបានគេគិតថាមានអ្នកប្រើប្រាស់ធម្មតា ប្រហែល២០០លាននាក់ ប៉ុន្តែកម្មវិធីនេះបានរងការបរាជ័យ ផ្នែកបច្ចេកទេសម្តងហើយម្តងទៀត ចាប់តាំងពីលោក Elon Musk បានទិញយកវេទិកានេះកាលពីឆ្នាំមុន និងបានបណ្តេញបុគ្គលិកចេញរាប់ពាន់នាក់។លោក Elon Musk ដែលបម្រើការជាថៅកែក្រុមហ៊ុន Tesla និង SpaceX ក៏បានធ្វើឱ្យអ្នកប្រើប្រាស់ជាច្រើន មានការមិនសប្បាយចិត្តផងដែរ ដោយលោកដាក់ចេញនូវការគិតថ្លៃ សម្រាប់សេវា ដែលឥតគិតថ្លៃពីមុន និងអនុញ្ញាតឱ្យគណនីស្តាំនិយម ដែលធ្លាប់ត្រូវបានហាមឃាត់អាចត្រឡប់មកប្រើប្រាស់វេទិកា Twitter វិញបាន។កម្មវិធីគូប្រជែងជាច្រើន បានលេចចេញជារូបរាង ប៉ុន្តែភាគច្រើនគឺជាវេទិកា ដែលមិនមានសមត្ថភាពរីកចម្រើន ក្នុងកម្រិតលឿនចាំបាច់ ដើម្បីទម្លាក់តំណែងរបស់ កម្មវិធី Twitter នោះទេ ។

ទោះជាយ៉ាងនេះក្តី បណ្តាញទំនាក់ទំនងThreads មានភាពកាន់តែងាយស្រួល ដោយសារតែវាត្រូវបានភ្ជាប់ទៅនឹង Instagram ដែលមានអ្នកប្រើប្រាស់ធម្មតា ច្រើនជាង១ពាន់លាននាក់ស្រាប់ទៅហើយ៕

ដោយៈគង់ ហ្វីអូណា

        កោះកុងៈ ខេត្តកោះកុងបាន និងកំពុងបន្តទាក់ទាញសក្តានុពល ទេសចរណ៍ ដោយសារសក្តានុពលនៃធនធានធម្មជាតិរបស់ខ្លួន ជាក់ស្តែងក្នុងរយៈពេលមាន៦ខែឆ្នាំនេះ ខេត្តកោះកុងទទួលបានភ្ញៀវទេសចរណ៍សរុបចំនួនជាង២៥ម៉ឺននាក់។

ប្រធានមន្ទីរទេសចរណ៍ ខេត្តកោះកុង លោកសុខ ច័ន្ទគ្រឹស្នា បានមានប្រសាសន៍ឲ្យដឹងថា ខេត្តកោះកុង ទទួលបានភ្ញៀវទេសច​រណ៍សរុបចំនួន២៥៩,៨៥៨នាក់ ថយចុះចំនួន៧៦៧នាក់ស្មើ នឹង០,២ ភាគរយ បើធៀបទៅនឹងរយៈពេលដូចគ្នាក្នុងឆ្នាំ២០២២ ក្នុងនោះមានភ្ញៀវទេសចរណ៍ជាតិសរុបចំនួន២៥៤,៣២៥នាក់ និងភ្ញៀវបរទេសចំនួន៥៥៣៣នាក់។លោកបន្តថា ដើម្បីធ្វើយ៉ាងណាទាក់ទាញភ្ញៀវទេសចរណ៍ឲ្យមកសម្រាកកំសាន្ត នៅក្នុងខេត្តកោះកុង ឲ្យបានកាន់តែច្រើនបន្ថែមទៀត មន្ទីរបានរៀបចំ និងអនុវត្តnសកម្មភាពមួយចំនួនដូចជាការរៀបចំព្រឹតិការផ្សេងៗ ដោយសហការជា១រដ្ឋបាលខេត្ត មន្ទីរអង្គភាពពាក់ព័ន្ធ ពិពណ៌ទេសចរផ្លែឈើ និងផលិតផលភូមិមួយផលិតផលមួយ សហការជាអាជ្ញាធរមូលដ្ឋាន ចុះពង្រឹងគុណភាពសេវាកម្មនិងផលិតផលទេសចរ តាមគោលដៅធំៗដែលជាគោលដៅមានភាពទាក់ទាញខ្លាំង និងបើកវគ្គបណ្តុះបណ្តាលស្តីពី ទេសចរ ការធ្វើបដិសណ្ធារកិច្ចភ្ញៀវ តាមគោលដៅទេសចរណ៍ចុះសិក្សាស្រាវជ្រាវគោលដៅទេសចរណ៍ថ្មីៗ ដើម្បីរៀបចំជាសៀវភៅផ្នត់ សៀវភៅមក្គុទេស ក៏ដូចជា វីដេអូដើម្បីផ្សព្វផ្សាយដល់ភ្ញៀវទេសចរ តាមរយៈផ្ទាល់និងតាមបណ្តាញសង្គមផងដែរ។

លោកប្រធានមន្ទីរទេសចរបានអោយដឹងថា បច្ចុបន្បន្ននេះ តំបន់ដែលមានសក្តានុពល និងទាក់ទាញសំខាន់ៗរបស់ខេត្តកោះ​កុងរួមមាន ក្រុងខេមរភូមិន្ទ ចេតិយខុនឆាង រមណីដ្ឋានព្រៃកោងកាង ពាមក្រសោប ទឹកធ្លាក់តាតៃ ឆ្នេរបាក់ឆ្លង ឆ្នេរចាំយាម សហគមន៍អេកូទេសចរជីផាត អារែង ឧទ្យានជាតិបទមសាគរ ស្រុកថ្មបាំង កោះស្តេច និងប្រជុំកោះជុំវិញ កោះកុងក្រៅ តំបន់វិស្សមកាលតារាសាគរ និងឆ្នេរតាមកោះ ឆ្នេរនេសាទ ស្ទឹងពពក ទឹកធ្លាក់ស្ទឹងពង្រួល និងសហគមន៍ការពារភ្នំទ័ពជាដើម។
ខេត្តកោះកុងគឺជាខេត្តដែលសំបូរ ដោយធនធានធម្មជាតិ មានសក្តានុពលខាងផ្នែកទេសចរណ៍ ដូចជា តំបន់អេកូទេសចរធម្មជាតិព្រៃកោងកាង ទឹកធ្លាក់ តំបន់ឆ្នេរ តំបន់ផ្កាថ្ម និងតំបន់កោះ១ចំនួន បច្ចុបន្បន្នខេត្តកោះកុង បាននឹងកំពុងយកចិត្តទុកដាក់ អភិវឌ្ឍន៍លើវិស័យទេសចរ៕

ដោយ: គង់ លាងហួរ

អន្តរជាតិ: ទីផ្សារផ្ទះប្រណិតនៅទីក្រុងសៀងហៃ បានស្ថិតនៅក្រោមសម្ពាធ ស្របពេលមានការព្រួយបារម្ភ អំពីសេដ្ឋកិច្ចរបស់ប្រទេសចិន ដោយគ្រួសារអ្នកមានមួយចំនួន បានកាត់បន្ថយតម្លៃផ្ទះចំនួន៥លានយន់ (៦៩១.១៤០ដុល្លារអាមេរិក) ដើម្បីទាក់ទាញអតិថិជន។

ទោះជាយ៉ាងនេះក្តី អ្នកទិញផ្ទះនៅតែបន្តមានការប្រុងប្រយ័ត្ន ដោយពួកគេភាគច្រើន សម្លឹងចង់បានការបញ្ចុះថ្លៃផ្ទះ បន្ថែមទៀត ស្របពេលដែលបរិយាកាសទីផ្សារចុះទន់ខ្សោយ។

លោក Ding Haifeng ដែលធ្វើការឱ្យក្រុមហ៊ុនប្រឹក្សាផ្នែកហិរញ្ញវត្ថុ Integrity បានលើកឡើងថា “ផ្ទះល្វែង(Flat) និងផ្ទះដែលមានតម្លៃថ្លៃខ្ពស់នៅទីក្រុងសៀងហៃ ត្រូវបានគេចាត់ទុកថា ជាការវិនិយោគប្រកបដោយសុវត្ថិភាព ក្នុងរយៈពេលពីរទសវត្សរ៍ ចុងក្រោយនេះ ដោយសារតែការផ្គត់ផ្គង់មានកម្រិត”។

លោកបន្តឱ្យដឹងទៀតថា “ទីផ្សារផ្ទះប្រណីតបានរារាំងដល់និន្នាការធ្លាក់ចុះ នៅក្នុងទីផ្សារអចលនទ្រព្យ ក្នុងស្រុកកាលពីដើមឆ្នាំនេះ ប៉ុន្តែនៅទីបំផុត វាបានធ្លាក់ខ្លួនទៅជាជនរងគ្រោះទៅវិញ ដោយ​សារកត្តាសេដ្ឋកិច្ចទន់ខ្សោយ”។

លើសពីនេះ ការធ្លាក់ចុះនៃទីផ្សារលំនៅដ្ឋានប្រណីតៗ នៅក្នុងទីក្រុងសៀងហៃ ដែលជាមជ្ឈមណ្ឌលពាណិជ្ជកម្ម និងហិរញ្ញវត្ថុដ៏ធំរបស់ប្រទេសចិន ក៏បានជះផលប៉ះពាល់ ទៅក្នុងទីផ្សារអចលនទ្រព្យទាំងមូលរបស់ប្រទេសនេះផងដែរ។

ទន្ទឹមគ្នានេះ ផ្ទះប្រណីតៗនៅក្នុងទីក្រុងសៀងហៃ ត្រូវបានកំណត់ថា ជាយូនីតលំនៅដ្ឋាន ដែលមានតម្លៃលើសពី៥០លានយ័ន ដែលរួមមានផ្ទះប្រភេទPenthouse ផ្ទះវីឡា និងផ្ទះល្វែងធំៗមួយចំនួនដែលមានទីតាំងនៅកណ្តាលទីក្រុង។

យោងតាមរបាយការណ៍ របស់វិបផតថលព័ត៌មានSohu បានឱ្យដឹងទៀតថា ប្រតិបត្តិការផ្ទះសម្រាប់ស្នាក់នៅរយៈពេលយូរ (Lived-in homes) ចំនួន៥៣ ដែលមានតម្លៃជាង៥០លានយ័ន ត្រូវបានបញ្ចប់ នៅក្នុងឆមាសទីមួយ ឆ្នាំ២០២៣នេះ។ ចំនួននេះបានធ្លាក់ចុះយ៉ាងខ្លាំងពីការរំពឹងទុករបស់ទីផ្សារ៕

តែម សុខុម

ហាណូយ: វៀតណាម បានក្លាយជាដៃគូពាណិជ្ជកម្មដ៏ធំបំផុតរបស់កម្ពុជា ក្នុងចំណោមបណ្ដាប្រទេសជាសមាជិកអាស៊ាន ខណៈពាណិជ្ជកម្មទ្វេភាគីបានគ្របដណ្ដប់ជិត៥០%នៃពាណិជ្ជកម្មសរុបរវាងកម្ពុជា និងបណ្ដាប្រទេសសមាជិកអាស៊ាន ក្នុងរយៈពេល៥ខែដើមឆ្នាំ២០២៣។

អំឡុងរយៈពេល៥ខែនេះ ពាណិជ្ជកម្មរវាងវៀតណាម និងកម្ពុជា បានកើនឡើងលើស២,៨ពាន់លានដុល្លារ ដោយកើនឡើងជិត៣%ធៀបនឹងឆ្នាំមុន។ នេះបើយោងតាមសារព័ត៌មាន VN Express ចុះផ្សាយកាលពីថ្ងៃច័ន្ទ ទី១០ ខែកក្កដា។

ក្រសួងពាណិជ្ជកម្មកម្ពុជា ឱ្យដឹងថា កម្ពុជា បាននាំចេញទំនិញក្នុងទំហំប្រមាណ១,៣ពាន់លានដុល្លារ ទៅកាន់ប្រទេសវៀតណាម និងបាននាំចូលទំនិញសរុបជាង១,៥ពាន់លានដុល្លារ ពីប្រទេសវៀតណាម។

ជាមួយនឹងកំណើនពាណិជ្ជកម្មជាវិជ្ជមានបែបនេះ វៀតណាម មិនត្រឹមតែជាដៃគូពាណិជ្ជកម្មធំជាងគេនៅក្នុងអាស៊ាន ប៉ុណ្ណោះទេ ថែមទាំងជាប់ចំណាត់ថ្នាក់លេខ៣ ក្នុងចំណោមដៃគូពាណិជ្ជកម្មទាំងអស់របស់កម្ពុជា ផងដែរ បន្ទាប់ពីប្រទេសចិន និងសហរដ្ឋអាមេរិក អំឡុងពេលនេះ។

កំណើននៃការនាំចេញរបស់កម្ពុជា ទៅកាន់ប្រទេសវៀតណាម ត្រូវបានជំរុញជាចម្បងដោយការនាំចេញកសិផលដោយសារការប្រមូលផលកើនឡើង។ ការនាំចេញសំខាន់ៗរបស់កម្ពុជា រួមមានស្រូវអង្ករ កៅស៊ូ ស្វាយចន្ទី ដំឡូងមី ពោត ចេក ស្វាយ ថ្នាំជក់ និងធនធានធម្មជាតិ។

ទន្ទឹមនឹងនោះ ការនាំចូលសំខាន់ៗពីប្រទេសវៀតណាម រួមមានសម្ភារៈសំណង់ គ្រឿងចក្រ ប្រេងឥន្ធនៈ ឧបករណ៍អគ្គិសនី និងអេឡិចត្រូនិច ជីកសិកម្ម គ្រឿងទេស បន្លែ និងផ្លែឈើជាដើម៕ VN Express៕

តែម សុខុម

ប៉េកាំងៈ ធនាគារកណ្តាលនៃប្រទេសចិន កាលពីថ្ងៃច័ន្ទ ទី១០ ខែកក្កដា បានសម្រេចបន្តគោលនយោបាយមួយចំនួនក្នុងកញ្ចប់សង្គ្រោះខែវិច្ឆិកា ឆ្នាំ២០២២ រហូតដល់ចុងឆ្នាំ២០២៤ ដើម្បីពង្រឹងវិស័យអចលនទ្រព្យក្នុងប្រទេសចិន ឡើងវិញ។

ចំណាត់ការនេះធ្វើឡើង ខណៈការជួយគាំទ្រនាពេលបច្ចុប្បន្នសម្រាប់វិស័យនេះមិនទទួលបានជោគជ័យ ហើយទីផ្សារនានាសង្ឃឹមថានឹងមានការដាក់ចេញវិធានការស្តារបន្ថែមទៀតក្នុងពេលឆាប់ៗនេះ។

កាលពីខែវិច្ឆិកា ឆ្នាំមុន ធនាគារកណ្ដាលចិន បានចេញសេចក្តីជូនដំណឹងមួយដែលបង្ហាញពីវិធានការចំនួន១៦ដើម្បីគាំទ្រដល់វិស័យអចលនទ្រព្យដែលកំពុងជួបវិបត្តិសាច់ប្រាក់ រួមទាំងការពន្យារពេលការសងប្រាក់កម្ចីផងដែរ ដើម្បីជួយបន្ធូរបន្ថយវិបត្តិសាច់ប្រាក់ដែលបានញាំញីវិស័យនេះចាប់តាំងពីពាក់កណ្តាលឆ្នាំ២០២០។

ធនាគារកណ្ដាលចិន បានចេញសេចក្តីថ្លែងការណ៍មួយថា គោលនយោបាយដែលត្រូវបានពង្រីកបន្ថែមនេះលើកទឹកចិត្តឱ្យស្ថាប័នហិរញ្ញវត្ថុ និងក្រុមហ៊ុនអចលនទ្រព្យធ្វើការចរចាគ្នាដោយឯករាជ្យ និងជួយគាំទ្រយ៉ាងសកម្មដល់បណ្ដាក្រុមហ៊ុនអភិវឌ្ឍន៍អចលនទ្រព្យតាមរយៈការរំកិលប្រាក់កម្ចី ដែលមានស្រាប់ និងការកែសម្រួលលក្ខខណ្ឌទូទាត់សងវិញ។

ធនាគារដដែលបានបន្ថែមថា ការពន្យាររយៈពេល១ឆ្នាំបន្ថែមទៀតចំពោះប្រាក់កម្ចីមានស្រាប់ប្រភេទនេះដែលនឹងត្រូវសងមុនដំណាច់ឆ្នាំ២០២៤ ត្រូវបានអនុញ្ញាត។

វិធានការ និងគោលនយោបាយដែលគ្មានកាលកំណត់ច្បាស់លាស់នានានៅតែមានប្រសិទ្ធភាពអនុវត្តន៍នៅឡើយ។ បណ្ដាក្រុមហ៊ុនអភិវឌ្ឍន៍ដែលជំពាក់បំណុលជុំទិសរបស់ប្រទេសចិន កំពុងជួបការរំបាកយ៉ាងខ្លាំងក្នុងការរៃអង្គាសថវិកា និងការលក់ផ្ទះ ដែលជំរុញឱ្យអ្នកទិញផ្ទះនាំគ្នាធ្វើពហិកាមិនសងបំណុលរំលស់ផ្ទះដែលពួកគេបានទិញ៕ Reuters៕

ដោយ: គង់ លាងហួរ

ប៉េកាំង: យោងតាមទិន្នន័យឧស្សាហកម្មបានបង្ហាញថា ការវិនិ​យោគទ្រព្យសកម្មថេរ ទៅលើផ្លូវដែករបស់ប្រទេសចិន បានហក់ឡើងរហូតដល់ទៅ៦,៩ភាគរយ ក្នុងរយៈពេលប្រាំមួយខែដំបូងនៃឆ្នាំនេះ ខណៈដែលប្រទេសនេះ បានបង្កើនការសាងសង់ផ្លូវដែកបានជឿនលឿនជាលំដាប់។

នេះបើយោងតាមការចុះផ្សាយ ដោយសារពត៌មានចិន Xinhua កាលពេលថ្មីៗកន្លងទៅនេះ។យោងតាមទិន្នន័យពីក្រុមហ៊ុន China State Railway Group Co., Ltd. បានបង្ហាញថា ការវិនិយោគផ្លូវដែកទ្រព្យសកម្មថេរសរុបមានទំហំទឹកប្រាក់ចំនួន៣០៤,៩ពាន់លានយ័ន (ប្រហែល៤២,៣ពាន់លានដុល្លារអាមេរិក)។

យោងតាមក្រុមហ៊ុនខាងលើនេះ បានបន្តឱ្យដឹងទៀតថា ខ្លួនបានបង្កើនកិច្ចខិតខំប្រឹងប្រែង ដើម្បីកសាងប្រព័ន្ធហេដ្ឋារចនាសម្ព័ន្ធផ្លូវដែកទំនើប ហើយវឌ្ឍនភាពនានា ត្រូវបានសម្រេចឡើងលើគម្រោងសំខាន់ៗជាច្រើន ក្នុងអំឡុងពេលរាយការណ៍។

ក្រុមហ៊ុន China State Railway Group បានបេជ្ញាចិត្តថា ខ្លួននឹងបន្តគាំទ្រ ដល់ការអនុវត្តយុទ្ធសាស្ត្រសំខាន់ៗរបស់ប្រទេស និងការងារដើម្បីចាក់បញ្ចូលភាពរឹងមាំ ទៅក្នុងការអភិវឌ្ឍន៍ប្រកបដោយគុណភាពខ្ពស់នៃសេដ្ឋកិច្ច និងសង្គម៕

ដោយ: គង់ លាងហួរ

ភូកេត: កិច្ចខិតខំប្រឹងប្រែងមួយកំពុងដំណើរការឡើង ដើម្បីធ្វើឱ្យកោះភូកេតក្លាយជាទីក្រុង ដែលមានសុវត្ថិភាពបំផុតនៅក្នុងតំបន់អាស៊ីអាគ្នេយ៍ បន្ទាប់ពីកើតមានឧប្បត្តិហេតុមួយចំនួន ទាក់ទងនឹងភ្ញៀវទេសចរអន្តរជាតិ។

លោក Danai Sunantarod អភិបាលរងខេត្តទេសចរណ៍ ភូកេត បានបង្ហាញពីគោលបំណងនេះឡើង នៅក្នុងកិច្ចប្រជុំមួយកាលពីថ្ងៃសុក្រសប្តាហ៍មុន ជាមួយក្រុមអ្នកតំណាងនៃដំណើរកម្សាន្ត និងទីភ្នាក់ងារទេសចរណ៍នានា។កិច្ចពិភាក្សាស្តីអំពីសន្តិសុខនេះ បានគូសបញ្ជាក់ពីឧប្បត្តិហេតុថ្មីៗជាច្រើន ដែលបានកើតឡើងនៅលើកោះភូកេត និងបានក្លាយជាមូលហេតុនៃការព្រួយបារម្ភ។

កាល​ពី​ខែ​ឧសភា ទូក​ល្បឿន​លឿន​មួយ​បាន​បុក​បង្គោល​ថ្មនៅឆ្នេរ Chalong បណ្ដាល​ឲ្យ​មនុស្សចំនួន៣៥​នាក់​បានរង​របួស ដែល​ភាគ​ច្រើន​ជា​ភ្ញៀវ​ទេសចរ​រុស្ស៊ី ខណៈអ្នកបើកទូកត្រូវបានគេជឿថា កំពុងងងុយដេក។

កាលពីខែកុម្ភៈ លោក Danai បាននិយាយថា ភ្ញៀវទេសចរចិនម្នាក់បានរងរបួស ក្នុងការវាយប្រហារដោយកាំបិត ពីសំណាក់ភ្នាក់​ងារទេសចរណ៍ម្នាក់ បន្ទាប់ពីមានការខ្វែងគំនិតគ្នា លើការសងប្រាក់វិញសម្រាប់ការធ្វើដំណើរមួយថ្ងៃ ដែលភ្ញៀវទេសចរបានខកខាន។ លោក​បាន​បន្ត​ថា ភ្ញៀវទេសចរ​ដែល​លង់​ទឹក ​នៅ​កោះភូកេត​ក៏ក្លាយជា​សំណួរ​អំពី​សុវត្ថិភាព​ផងដែរ។លោក Danai បានបញ្ជាក់ថា “យើងត្រូវរៀនសូត្រអំពីឧប្បត្តិហេតុទាំងនេះ។ យើងចង់ធ្វើឱ្យផ្ទះរបស់យើង មានសុវត្ថិភាពសម្រាប់ភ្ញៀវទេសចររបស់យើង ហើយយើងចង់ប្រែក្លាយកោះនេះ ទៅជាទីក្រុង ដែលមានសុវត្ថិភាពបំផុតនៅក្នុងតំបន់”។លោក​បានបន្ថែមថា វិស័យ​ឯកជន និង​សាធារណៈ​ត្រូវ​សហការ​គ្នា​ ដើម្បីធានា​សុវត្ថិភាព​របស់ភ្ញៀវ​ទេសចរ ចំណែក​មន្ត្រី​នគរបាល​ត្រូវ​អនុវត្ត​ច្បាប់។

លោក​បាន​អះអាងទៀតថា​ យើង​នឹង​រឹត​បន្តឹង​វិធានការ​សុវត្ថិភាព​នានា ព្រោះ​យើង​មិន​ចង់​ឱ្យមាន​ពួកអ្នក​ឆបោក ​នៅ​ភូកេត​នោះទេ ដោយលោកសំដៅទៅ​លើ​ករណី​ពាក់ព័ន្ធ ​នឹង​ភ្ញៀវ​ទេសចរ​ជនជាតិចិន​។លោកបានមានប្រសាសន៍ថា “យើងក៏ចង់ឱ្យប្រតិបត្តិករទេស​ចរណ៍លុបបំបាត់ប្រព័ន្ធកំណត់តម្លៃផងដែរ ព្រោះវាធ្វើឱ្យភ្ញៀវរបស់យើងមានអារម្មណ៍មិនល្អ ដោយលោកសំដៅលើប្រព័ន្ធ ដែលភ្ញៀវបរទេស រួមទាំងជនបរទេស ត្រូវបានគិតប្រាក់ច្រើនជាងជនជាតិថៃ សម្រាប់សេវាកម្មនានា”៕

ដោយៈ គង់ ម៉ាលីនណា

        ភ្នំពេញៈ កម្ពុជាសម្រេចការនាំចេញរបស់ខ្លួន ទៅកាន់ទីផ្សារប្រទេសនានា ក្នុងពិភពលោកបានក្នុងទំហំទឹកប្រាក់ ប្រមាណ៩ ១៨៣លានដុល្លារ នារយៈពេល៥ខែមកនេះ​នៃឆ្នាំ២០២៣។​ ក្នុងនោះ​ សហរដ្ឋអាមេរិក គឺជាទីផ្សារឈរនៅលំដាប់ទី១របស់កម្ពុជា ខណៈស្ថិតប្រទេសចិន គឺស្ថិតនៅលំដាប់ទី៣។

​យោងតាមស្ថិតិជញ្ជីងពាណិជ្ជកម្មទំនិញ ជាមួយប្រទេសសំខាន់ៗរបស់អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុបានបង្ហាញថា គិតចាប់ពីខែមករា ដល់ ខែឧសភា ឆ្នាំ២០២៣​ កម្ពុជានាំទំនិញទៅកាន់ផ្សារសហរដ្ឋអាមេរិក មានទំហំជិត ៣ ១៩៨លាន​ដុល្លារ។ នេះទីផ្សារធំបំផុតរបស់កម្ពុជា ស្ថិតក្នុងលំដាប់ទី១។

លំដាប់ពី២នោះ ជាទីផ្សារប្រទេសវៀតណាម ​មានទំហំនាំចេញជាង១៣២៣​លានដុល្លារ និងលំដាប់លេខ៣ គឺជាប្រទេសចិនដែលមានទំហំនាំចេញជិត៥៨៩លានដុល្លារ។

ផ្អែកលើស្ថិតិដដែល សហរដ្ឋអាមេរិក ជាទីផ្សារនាំចេញធំបំផុតរបស់កម្ពុជា​។ ទំនិញដែលត្រូវនាំចេញទៅប្រទេសនេះ មានសម្លៀកបំពាក់ កាបូបដៃ និងស្បែកជើង​ ជាដើម។​

កាលពីថ្ងៃទី៥កក្កដា ក្នុង​ជំនួប​ពិភាក្សា​ការងារ​រវាង​​លោក អ៊ិត សំហេង រដ្ឋមន្ត្រី​ក្រសួង​ការងារ និងបណ្ដុះបណ្ដាល​វិជ្ជាជីវៈ ជាមួយ​លោក W.Patrick Murphy ឯកអគ្គ​រដ្ឋទូត​សហរដ្ឋអាមេរិក ​ប្រចាំ​កម្ពុជា បានប្តេជ្ញា​ពង្រីក​កិច្ចសហប្រតិ​បត្តិការ សំដៅ​បង្កើន​ទំហំ​ពាណិជ្ជកម្ម វិនិយោគទុន និងបង្កើត​ឱកាស​ការងារ​បន្ថែមទៀត ​រវាង​ប្រទេស​ទាំងពីរ។

នាជំនួបនោះ លោកឯកអគ្គ​រដ្ឋទូត​សហរដ្ឋអាមេរិក​ បានសម្តែងនូវការពេញចិត្តនូវគម្រោង ដែលមានកាន់តែប្រសើរនៅកម្ពុជា ក្នុងការជំរុញឱ្យការបញ្ជទិញ ពីទីផ្សារអាមេរិកកាន់តែច្រើន។ លោកបានបញ្ជាក់ថា  កំណើនេះ គឺកើនទាំងបរិមាណផលិតផលវាយនភណ្ឌ សម្លៀកបំពាក់​ ស្បែកជើង។

កាលពីឆ្នាំ២០២២ ពាណិជ្ជកម្មទ្វេភាគីកម្ពុជា -សហអាមេរិកសម្រេចបានទំហំ៩២៨១លានដុល្លារ ដែលក្នុងនោះមានការនាំចេញមាន៨៩៦៨លានដុល្លារ។​ ទំនិញប្រភេទសម្លៀកបំពាក់ និងគ្រឿងបន្ទាប់បន្សំដែលមានកម្ពុជា នាំចេញទីផ្សារអាមេរិកមាន២២០០លានដុល្លារ, គ្រឿងប្រដាប់ប្រដា សម្រាប់ធ្វើដំណើរ​កាបូបដៃមានទំហំទឹកប្រាក់១៤៤១លានដុល្លារ ម៉ាស៊ីន និងឧបករណ៍អគ្គិសនីមាន១ ២៩៦លានដុល្លារ សម្លៀកបំពាក់ និងគ្រឿងបន្ទាប់បន្សំគឺមាន៩៦២លានដុល្លារ ​និងសម្លៀកបំពាក់ និងគ្រឿងបន្ទាប់បន្សំមានទំហំ៥៧០លានដុល្លារ។

ចំណែកទំហំដែលកម្ពុជា​នាំចូលពីអាមេរិក ក្នុងឆ្នាំ២០២២វិញ គឺមានយានយន្ត​ក្រៅអយស្ន័យយាន ឬអយរអគ្គិសនីក្នុងទំហំទឹកប្រាក់ ១១៣លានដុល្លារ កាកសំណល់ពីឧស្សាហកម្មម្ហូបអាហារមាន៣៦លានដុល្លារ ម៉ាស៊ីន និងបរិធានមេកានិក សម្ភារៈអគ្គិសនីមាន២៣លានដុល្លារ, ឧបករណ៍ និងបរិធានអុកទិកសម្រាប់វេជ្ជ ឬការវះកាត់មាន១៤ដុល្លារ និងផលិតឱសថ មាន៧លានដុល្លារ។​ នេះបើយោងតាមស្ថិតិរបស់ក្រសួងពាណិជ្ជកម្ម៕