ដោយ: គង់ លាងហួរ

អន្តរជាតិ: នាយកដ្ឋានសមុទ្រថៃ គ្រោងនឹងស្នើឱ្យគណៈរដ្ឋមន្ត្រីថ្មីអនុម័តផែនការរបស់ខ្លួន ក្នុងការសាងសង់កំពង់ផែតម្លៃ៧,៤ពាន់លានបាត (ប្រហែល២០៧,៥៥លានដុល្លារ) នៅទីក្រុងប៉ាតាយ៉ា ដើម្បីអាចផ្ទុកនាវាទេសចរណ៍ខ្នាតធំចំនួនពីរ។

លោក Wanchai Butthongdi ប្រធានផ្នែកវិស្វកម្មនៃនាយកដ្ឋានបានមានប្រសាសន៍ថា ប្រសិនបើផែនការនេះ ត្រូវបានអនុម័ត ការសាងសង់នៅទីតាំង ដែលបានស្នើឡើងនៅជិតកំពង់ផែ Bali Hai នឹងចាប់ផ្តើមនៅឆ្នាំ២០២៦ និងបញ្ចប់នៅឆ្នាំ២០២៩។លោកបន្តឱ្យដឹងទៀតថា នៅពេលការសាងសង់ ត្រូវបានបញ្ចប់ កំពង់ផែនេះ នឹងក្លាយជាកំពង់ផែដំបូងគេ នៅក្នុងប្រទេសថៃ ដែលត្រូវបានរចនាឡើង ជាពិសេសសម្រាប់បម្រើ ដល់កប៉ាល់ទេសចរណ៍ធំៗ។

លោក​បាន​បញ្ជាក់ថា​ បច្ចុប្បន្ន​ កប៉ាល់​ទេសចរណ៍​ចូល​ចត​នៅ​កំពង់ផែ​បាងកក និង​កំពង់ផែ Laem Chabang ដែល​តាម​ពិត​ជា​ចំណត​កុងតឺន័រ ដូច្នេះ​វាខ្វះ​ភាពងាយស្រួល ​នៃ​ចំណត​នាវា​កម្សាន្ត​ត្រឹមត្រូវ។

លោក​បាន​បន្ត​ទៀតថា ដោយសារ​តម្រូវការ​ទេសចរណ៍​តាម​នាវា​កំពុង​កើនឡើង ​នៅ​ទូទាំង​ពិភពលោក។ ដូច្នេះតំបន់អាស៊ី និង​ប្រទេសថៃ​ បាន​ក្លាយ​ជា​ទិសដៅ​កំពូល​នៃ​អ្នក​ធ្វើ​ដំណើរ​តាម​នាវា។លោកបានមានប្រសាសន៍ថា “កំពង់ផែនេះ នឹងត្រូវសាងសង់ក្រោមគំរូភាពជាដៃគូសាធារណៈ និងឯកជន ដែលរដ្ឋាភិបាលនឹងទទួលខុសត្រូវ លើការសាងសង់កំពង់ផែ ក៏ដូចជាផែតូចមួយប្រវែង១គីឡូម៉ែត្រដែលកប៉ាល់ អាចចតបាន(one-kilometre jetty) ដើម្បីបម្រើនាវាទេសចរណ៍ចំនួនពីរក្នុងពេលតែមួយ។

វិស័យសាធារណៈនឹងវិនិយោគ លើហេដ្ឋារចនាសម្ព័ន្ធនៅឆ្នេរសមុទ្រ និងលើគោក រួមមានកំពង់ផែ និងស្ថានីយ ស្ពានតភ្ជាប់ទៅកាន់កំពង់ផែ និងចំណតរថយន្ត ដែលមានតម្លៃសរុប៥,៥ពាន់លានបាត ហើយវិស័យឯកជន នឹងទទួលខុសត្រូវលើប្រតិបត្តិការ និងការថែរទាំ៕

ដោយៈ តែម សុខុម

ហូជីមិញ: ប្រទេសវៀតណាម គ្រោងសាងសង់ “កំពង់ផែទំនើប” ខ្នាតយក្សមួយ នៅក្រុងតំបន់ឆ្នេរកឹនយើ (Can Gio) ដែលគ្រោងចំណាយរហូតដល់ទៅ៦ពាន់លានដុល្លារអាមេរិក។ នេះបើយោងតាមសារព័ត៌មាន VN Express ចុះផ្សាយក្នុងខែមិថុនា នេះ។

ផ្អែកតាមសំណើ នៅពេលការសាងសង់បញ្ចប់ជាស្ថាពរ កំពង់ផែកឹនយើ (Can Gio Port) ដែលនឹងត្រូវសាងសង់ នៅលើកោះដាច់ស្រយាល Phu Loi នេះនឹងមានសមត្ថភាពទទួលទំនិញ បានចន្លោះពី១០លាន ទៅ១៥លានធីអ៊ីយូ (TEU) ក្នុងមួយឆ្នាំ ហើយក្លាយជាកំពង់ផែទំនើបខ្នាតយក្សទី៤ នៅអាស៊ីអាគ្នេយ៍។កំពង់ផែទំនើបខ្នាតយក្ស ដែលជាប់ចំណាត់ថ្នាត់កំពូលទាំង៣ក្នុងតំបន់អាស៊ីអាគ្នេយ៍ រួមមាន កំពង់ផែនៅប្រទេសសិង្ហបុរី ដែលសមត្ថភាពទទួលទំនិញចន្លោះពី៣៧លាន ទៅ៤៧លានធីអ៊ីយូ (TEU) ក្នុងមួយឆ្នាំ និងកំពង់ផែ២ទៀតនៅក្នុងប្រទេសម៉ាឡេស៊ី គឺកំពង់ផែ Port Klang ដែលសមត្ថភាពទទួលទំនិញ១៣,៧២លានធីអ៊ីយូ (TEU) និងកំពង់ផែ Tanjung Pelepas ដែលមានសមត្ថភាពទទួលទំនិញ១១,២០លានធីអ៊ីយូ (TEU)។

យោងតាមទិន្នន័យ ពីប្រតិបត្តិករកំពង់ផែមួយឱ្យដឹងថា ជាមួយនឹងប្រាក់ចំណូលជាមធ្យម២០០ដុល្លារ ក្នុងទំនិញ១ធីអ៊ីយូ (TEU) កំពង់ផែកឹនយើ (Can Gio Port) អាចរកចំណូលបានចន្លោះពី២ទៅ៣ពាន់លានដុល្លារអាមេរិក ក្នុងមួយឆ្នាំៗដែលនេះ មិនទាន់ទាំងរាប់បញ្ចូលប្រាក់ចំណូលពីសកម្មភាពបន្ថែមផងនោះទេ។

ទោះជាយ៉ាងណា គ្មានការបញ្ជាក់ថា គម្រោងនេះនឹងចាប់ផ្ដើមដំណើរការសាងសង់នៅពេល ហើយការសងសង់គ្រោងបញ្ចប់នៅពេលណានទេ៕ VN Express៕

ដោយៈ ជេស៊ីកា

        ភ្នំពេញៈ ប្រជាពលរដ្ឋខ្មែរកាន់តែច្រើន បាននិងកំពុងមានការចាប់អារម្មណ៍ខ្លាំងលើការវិនិយោគ ពិសេសលើវិស័យអចលនទ្រព្យ និងការវិនិយោគលើផ្សារហ៊ុនកំពុងមានសន្ទុះផងដែរ។

ប្រធានក្រុមប្រឹក្សាភិបាលក្រុមហ៊ុន Homes Global Realty លោកសុត វីរៈបានលើកឡើងក្នុងកម្មវិធី Estate Xchange Talk កាលពីពេលថ្មីៗនេះថា ការទិញអចលនទ្រព្យ ចំណុចល្អមួយដែលអ្នកទាំងអស់គ្នាត្រូវដឹង គឺយើងមិនចាំចាច់ចំណាយដើម១០០%នៃតម្លៃអចលនទ្រព្យហ្នឹងទេ។ ជាក់ស្តែងនៅក្រៅប្រទេស គេអាចកម្ចីពីធនាគារបានរហូតដល់៩០% មានន័យថាលុយដែលយើងដាក់ទៅហ្នឹងគឺត្រឹមតែ១០%ប៉ុណ្ណោះ។ ដូច្នេះហានិភ័យទៅលើ ១០% ធៀបទៅនឹងយើងវិនិយោគ១០០%គឺវាខុសគ្នា”។

លោកបន្ថែមថា “ចំណែកReturn on investment (ចំណូលពីការវិនិយោគ) ក៏យើងយកមកគណនាទៅលើថ្លៃដើម ដែលយើងបានវិនិយោគហ្នឹងដែរ”។ លោកបន្តថា “អីចឹងចំណូលពីការវិនិយោគគឺខ្ពស់ គ្រាន់តែថាចំណុចមួយ ដែលអចលនទ្រព្យជួបជាឧបសគ្គសម្រា​ប់អ្នកវិនិយោគ គឺមិនងាយបម្លែងជាសាច់ប្រាក់ក្នុងរយៈពេលខ្លី”។ចំណុចទាំងពីរនេះហើយ ដែលបងប្អូនត្រូវពិចារណាថា គួរវិនិយោគលើផ្សារភាគហ៊ុន ឬអចលនទ្រព្យ?”

ចំណែកលោក ស៊ាន ធធិន អគ្គនាយក CEO Master Club Investment Plc បានបន្ថែមថា “រវាងអចលនទ្រព្យ និងផ្សារភាគហ៊ុនមិនអាចនិយាយថា មួយណាល្អជាងមួយណាទេ ព្រោះវាជាជម្រើសនៃការវិនិយោគ។ បងប្អូនដែលចាប់អារម្មណ៍ សុទ្ធតែសម្រេចចិត្តក្នុងការវិនិយោគហើយ មិនមែនថាមួយណាល្អផ្ដាច់ជាងមួយណាទេ វាអាស្រ័យទៅលើខ្លួនយើង ដែលជាអ្នកវិនិយោគនេះហ៊ានទទួលយកហានិភ័យកម្រិតណា ហើយវាទទួលបានភាពស័ក្តិសម នៃលំហូរសាច់ប្រាក់របស់យើងកម្រិតណាដែរ អ៊ីចឹងត្រូវគិតថ្លឹងទាំងពីរ។

អ្នកជំនាញរូបនេះបន្តថា “ជួនកាលខ្ញុំចង់ទៅវិនិយោគលើអចល​នទ្រព្យដែរ ប៉ុន្តែខ្ញុំអត់មានចំណេះដឹងខាងហ្នឹង ឬសាច់ប្រាក់របស់ខ្ញុំអត់ដល់ ហើយខ្ញុំអត់អាចរង់ចាំរយៈពេលវែង អ៊ីចឹងខ្ញុំរៀងពិបាកបន្តិចដែរ ដូច្នេះខ្ញុំអាចវិនិយោគក្រោមរូបភាពផ្សេង”។

ក៏ប៉ុន្តែអ្នកខ្លះគាត់ថារឿងស្តុក(ហ៊ុន) រឿងអីហ្នឹងគាត់អត់ដែលយល់ តែហាងឆេងវាប្រែប្រួលរាល់ថ្ងៃតើ អ៊ីចឹងបើយើងតាមដានផ្សារហ៊ុន យើងចង់លក់ចង់ដូរបាន ប៉ុន្តែតើយើងយល់កម្រិតណា? ហើយយើងហ៊ានទទួលយកហានិភ័យហ្នឹង ប៉ុន្មាននៅក្នុងការខាតបង់ និងការចំណេញលើអាហ្នឹងដែរ។ ហេតុនេះវាអាស្រ័យទៅលើជម្រើសរបស់អ្នកវិនិយោគខ្លួនឯង”។

លោកបន្តថា “ជាការពិតមួយត្រង់ថា បើយើងច្បាស់ យើងមានបណ្ដាញ យើងមានអ្នកប្រឹក្សាច្បាស់លាស់ លើវិស័យអចលនទ្រព្យ ហើយយើងគិតទៅលើស្ថានភាពបច្ចុប្បន្ន និងបណ្ដាប្រទេសផ្សេងៗ “។​លោកបន្តថា “ដូចដែលខ្ញុំធ្លាប់ពិសោធន៍ និងធ្វើដំណើរទៅស្រុកគេដែរ វិស័យអចលនទ្រព្យបើយើងរំពឹង ចង់វិនិយោគរយៈពេលមធ្យម និងរយៈពេលវែង គ្មានអ្វីល្អជាងការវិនិយោគ លើវិស័យអចលនទ្រព្យទេ”។

ការវិនិយោគលើវិស័យអចលនទ្រព្យ និងការវិនិយោគលើផ្សារភាគហ៊ុនសុទ្ធតែល្អដូចគ្នា គ្រាន់តែត្រូវគិតលើមូលដ្ឋានគ្រឹះ និងចំនេះដឹងនៅក្នុងវិស័យ ដែលអ្នកកំពុងតែវិនិយោគ៕

ដោយ: គង់ លាងហួរ

ភ្នំពេញ: បង្កើតសកម្មភាពចម្រុះ រាប់ទាំងការសំរាកលំហែរ ការចូលរួមជិះរទេះគោ ស្តាប់តន្រ្តីបុរាណ និងការសម្តែងសិល្បៈ រួមទាំងផ្សារសហគមន៍ នៅតំបន់ជាយក្រុង បាននិងកំពុងក្លាយជាទស្សនទាននៃការកសាងភាពសម្បូរបែប និងរសរវើកនៅតំបន់ជាយក្រុងភ្នំពេញ។

គំរោងនេះ បាននិងកំពុងត្រៀមរៀបចំឡើង ដោយអ្នកអភិវឌ្ឈន៍រមណីយដ្ឋានលំហែរកាយ Green Zone របស់ឧកញ៉ាម៉ន សុខាអគ្គនាយកក្រុមហ៊ុន Green Zone សហការជាមួយលោកបណ្ឌិតតេង រិទ្ឋីអគ្គនាយកក្រុមហ៊ុន R- Investment Group ។ គំរោងនេះរៀបចំនៅភូមិក្រាំងទំនប់ ឃុំចាន់សែន ស្រុកសាមគ្គីមុន្នីជ័យ ខេត្តកំពង់ស្ពឺ មានចម្ងាយប្រមាណ២០គីឡូម៉ែត្រពីរាជធានីភ្នំពេញ។

លោកបណ្ឌិតតេង រិទ្ឋី ដែលបានសហការ និងផ្តួចផ្តើមបង្កើត”ភូមិទេសចរណ៍”បានមានប្រសាសន៍ឲ្យដឹងកាលពីសប្តាហ៍មុនថា អ្នកអភិវឌ្ឍមួយរូបលើកឡើងថា សព្វថ្ងៃនេះ នៅជុំវិញរាជធានីភ្នំពេញ មិនទាន់ មានកន្លែងសំដែងរបាំវប្បធម៌ទេ ហើយបើយើងចង់ទៅទស្សនាការសំដែង របាំក្ងោក យីកេ ឬអាយ៉ៃក៏មិនមានដែរ ដូច្នេះយើងចង់បង្កើតពីឥឡូវនេះ ដើម្បីជួយឱ្យមានសកម្មភាពនេះឡើង។

លោកបន្តថា “នៅពេលយើងបង្កើតសកម្មភាពបាន នោះយើងអាចចិញ្ចឹមបុគ្គលិក និងកម្មករបានរាប់សិបនាក់”។ លោកបន្ថែមថា “បន្ថែមពីនេះ យើងបង្កើតទាំងសួនសិប្បកម្ម ដើម្បីអាចឱ្យកម្មករមានការងារធ្វើ និងកន្លែងទេសចរណ៍ ដែលអាចផ្តល់ការងារធ្វើដល់មនុស្សរាប់ពាន់នាក់ និងទទួលបានចំណូលខ្ពស់”។

ឧទាហរណ៍ កម្មករអាចដាំបន្លែលក់ ដល់ភ្ញៀវទេសចរក្នុងតម្លៃប្រហែល៥ដុល្លារ ក្នុងមួយគីឡូក្រាម គឺខ្ពស់ជាងលក់ឱ្យឈ្មួញ ក្នុងត្រឹមតម្លៃ១ដុល្លារក្នុងមួយគីឡូ។

លោកបណ្ឌិតតេង រិទ្ឋី បានបន្តថា ទោះបីជាយ៉ាងនេះក្តី យើងនឹងបង្រៀនពួកគាត់អំពីរបៀបវេចខ្ចប់ អនាម័យ និងភាពរួសរាយរាក់ទាក់ចំពោះអតិថិជន ជាពិសេសគឺស្នាមញញឹមជារឿងធំបំផុតមួយ ជាឧទា ហរណ៍ ហាងមួយដែលល្អ និងមានម្ហូបអាហារឆ្ងាញ់ ប៉ុន្តែបើអ្នកសេវាកម្មមិនបង្ហាញស្នាមញញឹម រួសរាយក៏មិនកើតនោះដែរ។ ដូច្នេះយើងត្រូវតែពន្យល់ និងបង្រៀនដល់ពួកគាត់។

លោកបន្តថា យើងបានស្នើសុំកិច្ចសហការ ពីអភិបាលស្រុក និងមេឃុំ និងប្រធានមន្ទីរទេសចរណ៍ខេត្ត ហើយរដ្ឋមន្ត្រីក្រសួងទេសចរ ណ៍លោក ថោង ខុន ក៏នឹងចូលរួមគ្រប់សកម្មភាពផងដែរ។ លើសពីនេះ យើងមិនត្រូវការថវិការដ្ឋមកធ្វើនោះទេ ហើយយើងមានតែជួយឧបត្ថម្ភដល់រដ្ឋវិញ ប៉ុន្តែយើងត្រូវការការគាំទ្រ។

លោកបន្តទៀតថា យើងគ្រោងបង្កើតទាំងផ្សារណាត់ ឬផ្សារចុងសប្តាហ៍ ហើយបើថ្ងៃក្រោយទៅមុខ ក្លាយទៅជាផ្សារជាប្រចាំ ប៉ុន្តែពេលនេះមិនទាន់អាចទៅរួច ដូច្នេះយើងបង្កើតជាផ្សារណាត់ជាមុនសិនសម្រាប់មកដើរលេងថ្ងៃចុងសប្តាហ៍សៅរ៍អាទិត្យ។

លោកលើកឡើងថា “ប្រសិនបើអ្នកទាំងអស់គ្នា មិនមែនជាអ្នកអចលនទ្រព្យ ប្រហែលជាអាចយល់ខុសពីលោក ពេលដែលឃើញក្រលុកសំរាមអត់ស្អាត ហើយខ្ញុំជាអ្នកអភិវឌ្ឍន៍កន្លែងដែលមិនស្អាតទៅជាកន្លែងស្អាត។ ដើមឈើមិនស្អាតយើងធ្វើឱ្យស្អាត ស្រះទឹកយើងដាក់ចិញ្ចឹមត្រី ហើយតំបន់នេះបច្ចុប្បន្នមិនទាន់ស្អាតនោះទេ និងគ្មានភាពទាក់ទាញ ប៉ុន្តែរយៈពេល១ឆ្នាំ ២ឆ្នាំ ឬរហូតដល់៥ឆ្នាំខាងមុខ យើងនឹងឃើញមនុស្សរាប់ម៉ឺននាក់ មកកម្សាន្តលេងនៅតីនេះតាមរយៈផែនការរបស់យើង។

លើសពីនេះ យើងធ្លាប់មានបទពិសោធធ្វើ និងប្រែក្លាយទីកន្លែងដែលអត់មានអ្វីសោះមកក្លាយជាទីក្រុង និងប្រែក្លាយដីទំនេរទុកចោលមកក្លាយជាដីធ្វើឧស្សាហកម្ម ដោយសារជំហានដំបូងគេគឺយើងបានបង្កើតផែនការគោលដៅ ហើយលោកចង់ឱ្យអ្នកទាំងអស់គ្នាដែលមកដល់ទីនេះចូលរួមចាប់យកឱកាស។

ឧទាហរណ៍ ប្រសិនបើអ្នកទាំងអស់គ្នា ចង់បង្កើតភោជនីយដ្ឋានមួយ ប៉ុន្តែមិនហ៊ានធ្វើព្រោះខ្លាចខ្វះមនុស្ស ដូច្នេះយើងត្រូវពិភាក្សាគ្នាថា បើបង្កើតភោជនីយដ្ឋាននៅកន្លែងណាផ្សេង ត្រូវចាយប្រាក់អស់១០ម៉ឺនដុល្លារបានទំហំតែ១ល្វែង តែបើបង្កើតភោជនីយដ្ឋាននៅទីនេះគឺយើងបានទំហំធំណាស់។

លោកបណ្ឌិតតេង រិទ្ឋីបានបន្តថា “បើយើងខ្វះមនុស្ស យើងត្រូវរៀបចំផែនការ ដើម្បីទាញយកមនុស្សមក ពោលគឺទាញយកទាំងភ្ញៀវ និងអ្នកផ្សេងៗទៀត តែជាពិសេសគឺត្រូវទាញយកភ្ញៀវនេះតែម្តង”។

ម្យ៉ាងវិញទៀត ភ្ញៀវទី១របស់យើងដែលបានរំពឹងទុក ពួកគាត់អាចប្រើប្រាស់មធ្យោបាយធ្វើដំណើរជាឡាន ប៉ុន្តែអ្វីដែលពួកគាត់ចង់បានគឺជាសេវាកម្ម ម្ហូបធូរថ្លៃ មានរសជាតិឆ្ងាញ់ អនាម័យល្អ និងទទួលបានសេវាកម្មរួសរាយរាក់ទាក់ល្អ ហើយនេះជារឿងមួយ ដែលយើងអាចឈ្នះគេ។

ជាមួយគ្នានេះ លោកឧកញ៉ាម៉ន សុខាអគ្គនាយកក្រុមហ៊ុនGreen Zone បានមានប្រសាសន៍ថា យើងសូមលើកឡើងខ្លីៗថា ទីតាំងនេះគឺនៅជិតរាជធានីភ្នំពេញ បើគិតពីក្រសួងដែនដី មកដល់ទីតាំងនេះមានប្រវែងជាង៣០គីឡូម៉ែត្រប៉ុណ្ណោះ ហើយនិងត្រូវការធ្វើដំណើរ ត្រឹមតែជាង៣០នាទី ឬ១ម៉ោង ដែលយើងអាចបើកបរវិលល្ងាចបាន ហើយភ្ញៀវទេសចរណ៍ អាចមកសម្រាកគេងបាននៅផ្ទះលំហែរ។

លោកបន្តថា លើសពីនេះ ទីតាំងនេះគឺជាទីតាំងរបស់ខ្លួនឯងស្រាប់ ដែលយើងអាចចង់ធ្វើអ្វីក៏បាន ចង់រកស៊ីអ្វី ចង់ចាប់ឱកាសអ្វីក៏បាន ហើយយើងអាចពិភាក្សា និងជជែកគ្នាបានក្នុងន័យសហការ ដើម្បីរកវិធីសាស្ត្រ ហើយមើលឃើញឱកាសថាមកទីនេះ មានដីជាង១០០ហិកតា និងសួនរីសតជាង៨ហិកតា ដើម្បីសហការគ្នារកស៊ីផ្សេងៗនៅទីនេះ ដូចជាដាំផ្កា ឬបើកភោជនីយដ្ឋាន ចិញ្ចឹមត្រី ធ្វើកសិកម្មដាំដុះជាដើម…៕

        ដោយៈ គង់ សូរិយា

        ភ្នំពេញៈ ក្រុមអ្នកជំនាញមកពីវិស័យ​ឯកជន​អះអាងថា អនុក្រឹត្យ​ស្តីពី​ការអនុវត្ត​ច្បាប់​ស្តីពី​ វិនិយោគ​នៃ​ព្រះរាជា​ណា​ចក្រ​កម្ពុជា នឹង​ដើរតួនាទី​សំខាន់ ​ក្នុង​ការបង្កើន​សក្តានុពល​ ទាក់​ទាញ​អ្នកវិនិយោគ​ឱ្យមក​បណ្តាក់ទុន​នៅ​កម្ពុជា​កាន់តែច្រើន។

វា​ជា​ផ្នែក​សំខាន់​មួយ ​ក្នុងការ​​គាំទ្រ​ដល់​ផែនការ​យុទ្ធសាស្ត្រ​រាជរដ្ឋាភិបាល​ក្នុងការ​ប្រែក្លាយ​កម្ពុជា ​ទៅជា​ប្រទេស​មាន​ប្រាក់ចំណូល​មធ្យម​កម្រិត​ខ្ពស់​ក្នុង​ឆ្នាំ​ ២០៣០ និង​កម្រិត​ខ្ពស់​ក្នុង​ឆ្នាំ​ ២០៥០​។​

យោងតាម​សេចក្តីប្រកាស​ របស់​ក្រុមប្រឹក្សា​អភិវឌ្ឍន៍​កម្ពុជា​កា​លពី​ថ្ងៃទី​២៧ ខែមិថុនា​បានឱ្យដឹងថា សម្តេចនាយក​​រដ្ឋមន្ត្រី ហ៊ុន សែន កាលពី​ថ្ងៃទី ​២៦ ខែមិថុនា បាន​ចុះហត្ថលេខា​លើ​អនុក្រឹត្យ​លេខ ១៣៩ អនក្រ​.​បក ស្តីពី​ការអនុវត្ត​ច្បាប់​ស្តីពី​វិនិយោគ ​នៃ​ព្រះរាជាណាចក្រ​កម្ពុជា ដែល​ច្បាប់​នេះ​ត្រូវ​បានប្រកាស​ឱ្យប្រើ​ ដោយ​ព្រះរាជក្រម​លេខ នស​/​រកម​/១០២១/០១៤ ចុះ​ថ្ងៃទី​ ១៥ ខែតុលា ឆ្នាំ​ ២០២១​។​

លោកបណ្ឌិតតាន់ មុនី​វណ្ណ អគ្គនាយករង​ក្រុមហ៊ុន ម៉ុង ឫទ្ធី គ្រុប បាន​មានប្រសាសន៍ឲ្យដឹងកាលពីថ្ងៃទី២៨ ខែមិថុនា​ថា ច្បាប់​ស្តីពី​វិនិយោគ ​នៃ​ព្រះរាជាណាចក្រ​កម្ពុជា ​(​ថ្មី​) គឺ​ពិត​ជាមាន​សារៈសំខាន់​ណាស់​ក្នុងការ​ទាក់ទាញ និង​លើកទឹកចិត្ត​អ្នកវិនិយោគ​ឱ្យមក​បណ្តាក់ទុន​នៅ​កម្ពុជា​កាន់តែច្រើន​។លោកបញ្ជាក់ថា “ច្បាប់​ថ្មី​នេះ​ត្រូវបាន​រៀបចំឡើង ​ដោយ​ផ្ចិតផ្ចង់ និង​ឆ្លងកាត់​ការពិគ្រោះ​យោបល់ និង​ផ្តល់​ធាតុ​ចូល​ពី​គ្រប់ផ្នែក​ពាក់ព័ន្ធ ពិសេស​វា​បាន​ដើរ​ស្រប ​នឹង​ការ​​វិ​វ​ឌ្ឍ​នៃ​សេដ្ឋកិច្ច​​សង្គម ​ក្នុង​បរិបទ​នៃ​បដិវត្ត​ឧស្សាហកម្ម ៤.០ ខណៈ​ច្បាប់​ចាស់​ត្រូវបាន​បង្កើតឡើង ​តាំងពី​ក្នុងអំឡុង​ទសវត្សរ៍​ឆ្នាំ​១៩៩០”​។លោក​ថ្លែងថា​ “​ច្បាប់​ថ្មី​នេះ​នឹង​ជួយ​ទាក់ទាញ​អ្នកវិនិយោគ ​ឱ្យ​ចូលមក​បណ្តាក់ទុន​នៅ​កម្ពុជា​កាន់តែច្រើន ព្រោះ​ច្បាប់​នេះ​ គឺមាន​លក្ខណពិសេស​មួយ​ចំនួន”។

ចំណុចពិសេសនៃច្បាប់នេះមាន​ដូចជា ការលើកទឹកចិត្ត ការសម្រួល​នីតិវិធី​ចុះបញ្ជី ការប្រើប្រាស់​ប្រព័ន្ធ​បច្ចេកវិទ្យា និង​សមត្ថភាព​នៃ​ធនធានមនុស្ស​នៅ​កម្ពុជា​ផងដែរ​។​ ​

ចំណែកលោកលោកតែ តាំង​ប៉ ប្រធាន​សម្ព័ន្ធ​សមាគម​សហគ្រាស​ធុន​តូច និង​មធ្យម​កម្ពុជា បានមានប្រសាសន៍ឲ្យដឹងផងដែរថា ច្បាប់​វិនិយោគ​ថ្មី​នឹងចូលរួម​ចំណែក​យ៉ាងច្រើន​ ក្នុងការ​លើកទឹកចិត្ត​ឱ្យមាន​ការបណ្តាក់ទុន​ក្នុង​ផលិតកម្ម​ធុន​តូច និង​មធ្យម ព្រោះ​អ្វីៗ​ត្រូវបាន​សម្រួល​ឱ្យ​កាន់តែ​ងាយស្រួល​។​លោក​ប្រាប់ថា​ “យើង​ពិតជា​រីករាយ និង​ស្វាគមន៍​ចំពោះ​ច្បាប់​ថ្មី​នេះ ព្រោះ​វា​បាន​លើកទឹកចិត្ត​ច្រើន​ដល់ SME ហើយ​ក៏មាន​ភាពបត់បែន​ទៅតាម​បរិ​បទ​សេដ្ឋកិច្ច​នាពេលនេះ​ផងដែរ​”។​ លោកបន្តថា ប្រសិនបើ​អគ្គិសនី​នៅ​កម្ពុជា ​អាចមាន​តម្លៃ​កាន់តែ​ទាប​បន្ថែមទៀត​នោះ ឱកាស​ក្នុងការ​ទាក់ទាញ​អ្នកវិនិយោគ ឱ្យមក​បណ្តាក់ទុន​នៅ​កម្ពុជា​នឹងមាន​កាន់តែច្រើន​។​

ជាមួយគ្នានេះ អនុប្រធាន​សភាពាណិជ្ជកម្ម​កម្ពុជា លោកឧកញ៉ា លឹម ហេង បាន​និយាយថា អនុក្រឹត្យ​នេះ​គឺជា​ការបញ្ជាក់​បន្ថែម​ទៅលើ​ច្បាប់​ ដែល​បាន​ដាក់ឱ្យអនុវត្ត​កន្លងមក ដោយមាន​និយាយ​ពី​ការសម្រួល​ផ្នែក​ពន្ធ និង​នីតិវិធី​ក្នុងការ​នាំចេញ​នាំចូល​ទំនិញ​។ ផ្នែក​ឯកជន​រង់ចាំ​អនុក្រឹត្យ​នេះ​ជា​យូរ​មកហើយ​។លោក​បញ្ជាក់ថា “លក្ខណៈពិសេស​នៃ​ច្បាប់​វិនិយោគ​នេះ គឺមាន​ការលើកទឹកចិត្ត និង​មាន​ភាព​បត់បែន​ស្រប តាម​ការវិវត្ត​សេដ្ឋកិច្ច​សកល​”៕

ដោយ: គង់ លាងហួរ

ភ្នំពេញ: អ្នកស្រាវជ្រាវកម្ពុជាមួយរូប បានលើកឡើងកាលពីថ្ងៃពុធម្សិលមិញនេះថា ក្របខ័ណ្ឌកិច្ចសហប្រតិបត្តិការត្បូងពេជ្រ ទ្វេរភាគី Diamond Hexagon នឹងចាក់បញ្ចូលកម្លាំងជំរុញថ្មី ចូលទៅក្នុងការកសាងសហគមន៍កម្ពុជា -ចិនជាមួយនឹងអនាគតរួមគ្នា ក្នុងយុគសម័យថ្មី។

ត្រូវបានបង្កើតឡើង ដោយប្រទេសទាំងពីរក្នុងខែកុម្ភៈ ក្របខណ្ឌកិច្ចសហប្រតិបត្តិការ Diamond Hexagon បានផ្តោតលើវិស័យអាទិភាពចំនួនប្រាំមួយ រួមមានកិច្ចសហប្រតិបត្តិការ នយោបាយ សមត្ថភាព និងគុណភាពនៃផលិតកម្ម  កសិកម្ម ថាមពល សន្តិសុខ និងការផ្លាស់ប្តូររវាងប្រជាជន និងប្រជាជន។លោក ថោង ម៉េងដាវីដ អ្នកស្រាវជ្រាវនៅវិទ្យាស្ថានទស្សនវិស័យអាស៊ី ដែលមានមូលដ្ឋាននៅទីក្រុងភ្នំពេញ បានអះអាងថា ខណៈដែលឆ្នាំ២០២៣ គឺជាខួបលើកទី៦៥ នៃទំនាក់ទំនងការទូតរវាងកម្ពុជា និងចិន ក្របខ័ណ្ឌកិច្ចសហប្រតិបត្តិការ Diamond Hexagon នឹងផ្តល់សន្ទុះថ្មីដល់ការអភិវឌ្ឍទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។

លោកបានប្រាប់សារពត៌មាន Xinhua ថា “ជាមួយនឹងក្របខណ្ឌកិច្ចសហប្រតិបត្តិការត្បូងពេជ្រ Diamond Hexagon ដែលបានបង្កើតឡើងថ្មីនេះ ប្រទេសទាំងពីរនឹងអាចសម្រេច បាននូវកិច្ចសហប្រតិបត្តិការផ្នែកនយោបាយ សេដ្ឋកិច្ច និងសន្តិសុខបន្ថែមទៀតឆ្ពោះទៅរកសហគមន៍ ដែលមានអនាគតរួមគ្នាក្នុងយុគសម័យថ្មី”។

លោកបានបន្តថា “ការគាំទ្ររបស់ប្រទេសចិន ចំពោះភាពជោគ ជ័យរបស់កម្ពុជា ក្នុងការប្រយុទ្ធប្រឆាំង នឹងជំងឺរាតត្បាតកូវីដ-១៩ ក្នុងរយៈពេលប៉ុន្មានឆ្នាំចុងក្រោយនេះ បានកសាងចំណងមិត្តភាពជាបងប្អូនកាន់តែរឹងមាំ រវាងប្រទេសទាំងពីរ ហើយប្រទេសចិនក៏ជាកត្តាជំរុញសេដ្ឋកិច្ចដ៏សំខាន់មួយ និងអ្នកផ្តល់ជំនួយមនុស្សធម៌ ដល់កម្ពុជាផងដែរ”។

លោកបានបន្តថា “ក្រោមកិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលបានចូលជាធរមានក្នុងឆ្នាំ ២០២២ ទំហំពាណិជ្ជកម្ម និងការវិនិយោគរវាងកម្ពុជា -ចិនបានកើនឡើងយ៉ាងខ្លាំង”។

លោកបានបន្ថែមថា កិច្ចព្រមព្រៀងពាណិជ្ជកម្មសេរីទាំងពីរ បានជួយសម្រួល ដល់សេរីភាវូបនីយកម្មពាណិជ្ជកម្ម និងការវិនិយោគរវាងប្រទេសទាំងពីរ។

ខណៈដែលឆ្នាំ២០២៣នេះ គឺជាខួបលើកទី១០នៃគំនិតផ្តួចផ្តើមខ្សែក្រវាត់ និងផ្លូវ (BRI) អ្នកស្រាវជ្រាវរូបនេះបានលើកឡើងថា កម្ពុជាស្ថិតក្នុងចំណោមប្រទេស ដែលបានគាំទ្រទីមួយដំបូងគេលើគម្រោ​ងBRI ដែលត្រូវបានស្នើឡើង ដោយប្រទេសចិនកាលពីឆ្នាំ២០១៣។

លោក ថោង ម៉េងដាវីដ បានបញ្ជាក់ថា “ស្ថិតក្រោមគម្រោង BRI កម្ពុជា និងចិនបានជំរុញយ៉ាងសកម្ម នូវកិច្ចសហប្រតិបត្តិការជាក់ស្តែង ក្នុងវិស័យលើកកម្ពស់ជីវភាពរស់នៅរបស់ប្រជាជន កសិកម្ម ពាណិ​ជ្ជកម្ម ការវិនិយោគ ទេសចរណ៍ ហេដ្ឋារចនាសម្ព័ន្ធ និងការផ្លាស់ប្តូររវាងប្រជាជន និងប្រជាជន ក្នុងចំណោមប្រទេសដទៃទៀត”។

លោកបានបន្ថែមថា “គម្រោងធំៗជាច្រើន ដែលស្ថិតក្រោមគំនិតផ្តួចផ្តើម BRI មានដូចជា រោងចក្រវារីអគ្គិសនី តំបន់សេដ្ឋកិច្ចពិសេសក្រុងព្រះសីហនុ ផ្លូវល្បឿនលឿនភ្នំពេញ-ព្រះសីហនុ ពហុកីឡដ្ឋានជាតិមរតកតេជោ និងអាកាសយានដ្ឋានអន្តរជាតិសៀមរាប-អង្គរ ដែលបានចូលរួមចំណែកយ៉ាងធំធេង ក្នុងការលើកកម្ពស់កិច្ចសហប្រតិបត្តិការឈ្នះ-ឈ្នះ ក៏ដូចជា ការអភិវឌ្ឍសេដ្ឋកិច្ចសង្គមប្រ​កបដោយបរិយាប័ន្ន និងនិរន្តរភាព”៕