ដោយ: គង់ លាងហួរ

អន្តរជាតិ: នាយកដ្ឋានស្ថិតិនៃតំបន់រដ្ឋបាលពិសេស ម៉ាកាវ (SAR) បានរាយការណ៍នៅថ្ងៃពុធនេះថា ភ្ញៀវសរុបចំនួនជាង១.១លាននាក់ បានចូលស្នាក់នៅក្នុងសណ្ឋាគារ របស់ទីក្រុងម៉ាកាវក្នុងខែឧសភា កើនឡើង១៤០,៣ភាគរយពីមួយឆ្នាំទៅមួយឆ្នាំ។

យោងតាមរបាយការណ៍សេវាកម្មស្ថិតិ និងជំរឿនចុងក្រោយ បានបង្ហាញថា ភ្ញៀវមកពីចិនដីគោក និងទីក្រុងហុងកុង បានកើនឡើង១៣៣ភាគរយ និង៨១៨,៣ភាគរយ ពីមួយឆ្នាំទៅមួយឆ្នាំ រហូតដល់៧៩៣.០០០នាក់ និង១៩៩.០០០នាក់ រៀងៗគ្នា។របាយ​ការណ៍​ដដែលបាន​បង្ហាញ​ថា​ អត្រា​ស្នាក់​នៅ​ជា​មធ្យម​នៃ​បន្ទប់​ភ្ញៀវ​ ក្នុង​ខែ​ឧសភា ​បាន​កើន​ឡើង​៤៤,៦​ភាគរយ ​ពី​មួយ​ឆ្នាំ​ទៅ​មួយ​ឆ្នាំ​រហូតដល់​៧៨,៩​ភាគរយ។

ចំណែកឯ ចំនួន​ភ្ញៀវ​ដែល​បានមក​ដល់ ​ក្នុង​ដំណើរ​កម្សាន្ត​ជា​កញ្ចប់​សរុប​ មាន​ចំនួន៧៩.០០០នាក់ ក្នុង​ខែ​ឧសភា។  ទន្ទឹមគ្នានេះ អ្នកស្រុកម៉ាកាវ សរុបចំនួន៣៥.០០០នាក់ បានទិញសេវាទៅក្រៅប្រទេស តាមរយៈភ្នាក់ងារទេសចរណ៍ ដែលបង្ហាញពីការកើនឡើង៩៨៧,៩ភាគរយពីមួយឆ្នាំទៅមួយឆ្នាំ។

សណ្ឋាគារសរុបចំនួន១៣០ បានផ្តល់សេវាស្នាក់នៅដល់សាធារណៈជនក្នុងខែឧសភា។  ក្រៅ​ពី​នេះ ចំនួន​បន្ទប់​ទទួល​ភ្ញៀវ​បាន​កើន​ឡើង១០ភាគរយ​ រហូតដល់៤៣.០០០បន្ទប់៕

ដោយៈ ស៊ីវ ម៉េង

        ភ្នំពេញៈ ការរស់នៅជាមួយធម្មជាតិជុំវិញខ្លួន កាន់តែមានការពេញនិយម សម្រាប់មនុស្សជំនាន់ក្រោយ និងអ្នកយល់ពីរសនិយមនិងភាពស៊ីវិល័យរបស់ជីវិត។

ការវិនិយោគ ដែលផ្សារភ្ជាប់សំណង់ជាមួយធម្មជាតិ ដើមឈើ ទឹក បាននិងកំពុងអនុវត្តន៍កាន់តែច្រើន ឡើងពីអ្នកអភិវឌ្ឍន៍នានា ដើម្បីឲ្យមានភាពសមស្រប នឹងលក្ខខ័ណ្ឌបរិស្ថានផង និងនិន្នាការនៃការរស់នៅក្នុងសម័យថ្មីផង។

ដោយមិនផ្តោតលើផលចំណេញតែម្យ៉ាង អ្នកអភិវឌ្ឍន៍បុរីសំណា​ងបាននិងកំពុងកែច្នៃ ព្រែកធម្មជាតិប្រវែងជាង១០០០ម៉ែត្រ ធ្វើជាទីសាធារណៈ ដែលអាចដើរកំសាន្ត អង្គុយជជែកគ្នា និងស្ទូចត្រីកំ​សាន្តនៅពេលល្ងាច និងពេលព្រឹកនាថ្ងៃឈប់សំរាកពីការងារ។   លោកជំទាវឧកញ៉ាគង់ សំណាងអគ្គនាយិកាបុរីវិមានសំណាង​ដែលបាននិងកំពុងអភិវឌ្ឍន៍បុរី លំដាប់អភិជនទំហំ២៥ហិកតាបានមានប្រសាសន៍ឲ្យដឹងថា លោកជំទាវអភិវឌ្ឍន៍បុរីនេះឡើង ដោយផ្តោតលើបរិស្ថាន និងមិនគិតដល់ផលចំណេញជាអាទិភាពទេ ព្រោះយើងចង់ផ្តល់លំនៅដ្ឋានមួយ ដែលមានភាពស៊ីវិល័យ និងផ្តល់ការរស់នៅប្រកបដោយផាសុខភាព និងគិតគូរជាចម្បងដល់ការរស់នៅរបស់អតិថិជន។

លោកជំទាវបន្តថា “ដោយសារភាពជាភ្នាក់ងារ អចលនវត្ថុរយៈពេលជាង១០ឆ្នាំ ខ្ញុំបានសិក្សាចំណង់ចំណូលចិត្តអតិថិជន និងបានអភិវឌ្ឍន៍បុរីឡើង ដើម្បីឆ្លើយតបតម្រូវការ និងរសនិយមរបស់អតិថិជន”។     បុរីវិមានសំណាងផ្តោត លើការសាងសង់វីឡាទោល និងផ្ទះអាជីវកម្ម ប៉ុន្តែផ្ទះអាជីវកម្មត្រូវបានលក់អស់ហើយ។ នេះបើតាមលោកឧកញ៉ាបណ្ឌិតគីម ហ៊ាងបង្ហាញសារលើបណ្តាញទំនាក់ទំនងសង្គម។

បុរីវិមានសំណាង បាននិងកំពុងវិនិយោគដោយផ្តោតលើប្រព័ន្ឋ​ហេដ្ឋារចនាសម្ព័ន្ឋធំៗ ដែលមានផ្លូវធំទូលាយ ដើម្បីងាយស្រួលក្នុងការធ្វើចរាចរណ៍ផងដែរ៕

ដោយៈ គង់ សូរិយា

        ភ្នំពេញៈ ក្រុមហ៊ុនវិនិយោគCapital Investment នៃប្រទេសសឹង្ហបុរី បានជួបជាមួយមន្រ្តីជាន់ខ្ពស់កម្ពុជា ដោយផ្តោតកិច្ចពិភាក្សាស្ដីពីការកៀរគរវិនិយោគគិនបរទេស មកធ្វើពាណិជ្ជកម្មនៅកម្ពុជា។

ព៌តមាននេះ ត្រូវបានលើកឡើងក្នុងជំនួបរវាងព្រាប កុល រដ្ឋមន្ត្រីប្រតិភូអមនាយក រដ្ឋមន្ត្រីទទួលភារ:កិច្ច ជួយដល់កិច្ចការវិនិយោគបរទេស ទំនាក់ទំនងអន្តរជាតិ និងកំណែ​ទម្រង់អភិបាលកិច្ច។

លោកព្រាប កុល បានជួបជាមួយប្រតិភូនៃក្រុមហ៊ុនវិនិយោគ Capital Investment ដែលរួមមាន ក្រុមហ៊ុន  PIF Capital តំណាងដោយលោក Jonathan Por ក្រុមហ៊ុន Antz Capital តំណាងដោយ លោកស្រី Grace Lim និងក្រុមហ៊ុន Growth Partners Asia តំណាងដោយ លោក MoZidan ដើម្បីទទួលស្វាគមន៍ សម្ដែងការគួរសម សំណេះ​សំណាល និងចែករំលែកព័ត៌មា​ន អំពីគោលនយោបាយពាណិជ្ចកម្ម និងការវិនិយោគនៅកម្ពុជា។លោកព្រាប កុល បានបង្ហាញពីគោលជំហរ របស់រាជរដ្ឋាភិបាលកម្ពុជាក្នុងការលើកកម្ពស់ និងការការពារដល់ការវិនិយោគ ផ្ទាល់របស់បរ​ទេសនៅក្នុងប្រទេសកម្ពុជា។

លោកJonathan Por បានជម្រាបជូន អំពីគម្រោងវិនិយោគដែលនឹងជួយដល់សហគ្រាសហធុនតូច និងមធ្យមនៅកម្ពុជា ដើម្បីទទួលបាននូវមូលនិធិវិនិយោគ ពីក្រៅប្រទេស និងដើម្បីអាចចុះបញ្ជីឡើង ទីផ្សារមូលប័ត្រនៅក្នុងនិងក្រៅប្រទេស។ តាមរយៈការវិនិយោគនេះ ក៏មានភ្ជាប់ជាមួយនូវគម្រោងសប្បុរសធម៌ ដើម្បីលើកកម្ពស់វិស័យអប់រំ និងបណ្តុះបណ្តាលវិជ្ជាជីវ:ផងដែរ។

លោកព្រាប កុល សន្យាជួយគាំទ្រអោយមានយន្តការ វាយតម្លៃនិងពង្រឹងសមត្ថភាពសហគ្រាសកម្ពុជា ដើម្បីបំពេញលក្ខខណ្ឌ និងតម្រូវការរបស់ដៃគូវិនិយោគបរទេស។

លោកបានជម្រាបជូនប្រតិភូទាំងអស់ថា រាល់ការវិនិយោគ និងការធ្វើពាណិជ្ជកម្មនៅកម្ពុជា ត្រូវរៀបចំទៅតាមនីតិវិធីឲ្យបានត្រឹមត្រូវ ពោល គឺត្រូវឆ្លងកាត់ក្រុមប្រឹក្សាដើម្បីអភិវឌ្ឍន៍កម្ពុជា (CDC) ក្រសួងពាណិជ្ជកម្ម ក្រសួងសេដ្ឋកិច្ចនិងហិរញ្ញវត្ថុ និងស្ថាប័នពាក់ព័ន្ធផ្សេងៗទៀត ដើម្បីឲ្យកិច្ចការវិនិយោគ និងកិច្ចការពាណិជ្ជកម្មទាំងនោះទទួលបានការការពារស្របច្បាប់៕

ដោយ: គង់ លាងហួរ

ភ្នំពេញ: លោកទេសរដ្ឋមន្រ្តីស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានមានប្រសាសន៍ថា ប្រទេសកម្ពុជាសម្បូរទៅដោយទន្លេជាច្រើនដូចជាទន្លេមេគង្គ ទន្លេបាសាក់ ទន្លេសា​ប ទន្លេសេកុង ទន្លេសេសាន ទន្លេស្រែពក ប៉ុន្តែកម្ពុជាមិនទាន់បានប្រើប្រាស់ជាសក្តានុពលអស់នៅឡើយទេ។

លោកបានមានប្រសាសន៍ឲ្យដឹងកាលពីសប្តាហ៍មុនថា ការដឹកជញ្ជូនផ្លូវទឹក គឺមានសារៈសំខាន់ណាស់ ព្រោះជួយកាត់បន្ថយការខូចខាតផ្លូវ និងជួយកាត់បន្ថយគ្រោះថ្នាក់ចរាចរណ៍ ខណៈយើងបានពង្រីកកំពង់ផែភ្នំពេញ  ផែនៅទន្លេបិទ និងត្រៀមសាងសង់ផែបន្ថែមទៀតដើម្បីប្រមូលទំនិញដឹកតាមផ្លូវទឹក។

លោកបញ្ជាក់ថា “បច្ចុប្បន្ននេះ កំពង់ផែស្វយ័តក្រុងព្រះសីហនុគ្រប់គ្រងទំនិញចេញ ចូលបានប្រហែល៦០% ខណៈកាលពីពេលថ្មីៗនេះ សម្តេចតេជោនាយករដ្ឋមន្ត្រីនៃកម្ពុជា បានអញ្ជើញបើកការដ្ឋា​នសាងសង់ផែរាយ ទៅជាផែកុងតឺន័របណ្តោយ២៥៣ម៉ែត្រ និងការសាងសង់ផែទឹកជ្រៅមួយទៀត ក្នុងជំហានទី១ដែលមានជម្រៅ១៤,៥ម៉ែត្រ”។លោកស៊ុន ចាន់ថុលបានបញ្ជាក់ថា សព្វថ្ងៃនេះ នាវាដែលធ្វើដំណើរនាវាចរណ៍ នៅតំបន់អាស៊ីប៉ាស៊ីហ្វិកអាចចុះចត នៅកំពង់ផែរបសយើងត្រឹមតែ១៨% ដោយសារជម្រៅទឹករាក់។ ដូច្នេះ យើងត្រូវដឹកជញ្ជូនទៅផ្ទេរនៅកំពង់ផែសិង្ហបុរី កំពង់ផែម៉ាឡេស៊ី កំពង់ផែវៀតណាម ឬកំពង់ផែហុងកុង។

លោកបន្តថា “ការដឹកជញ្ជូនបែបនេះ វាធ្វើឱ្យការដឹកជញ្ជូនមានតម្លៃខ្ពស់ ដោយសារការលើកដាក់ទំនិញផ្ទេរចុះឡើង ដូច្នេះប្រសិនបើយើងមានកំពង់ផែជម្រៅ១៤,៥ម៉ែត្រ នៅក្រុងព្រះសីហនុ នាវា៩៣%អាចចុះចតនៅកំពង់ផែ ក្រុងព្រះសីហនុបាន ដែលកំពង់ផែនេះនឹងផ្តល់ផលចំណេញច្រើន”។

នៅដំណាក់កាលទី២ យើងគ្រោងសាងសង់កំពង់ផែជម្រៅ១៦,៥ម៉ែត្រ និងដំណាក់កាលទី៣ជម្រៅ១៧,៥ម៉ែត្រ។ ដូច្នេះ នាវាធំៗអាចដឹកជញ្ជូនទំនិញទៅកាន់អឺរ៉ុប ឬសហរដ្ឋអាមេរិកបានផ្ទាល់តែម្តង ដោយមិនចាំបាច់ឆ្លងកាត់កំពង់ផែ របស់ប្រទេសណាទាំងអស់ ហើយកំពង់ផែទឹកជ្រៅ មានសារៈសំខាន់ណាស់ ក្នុងការកាត់បន្ថយថ្លៃដឹកជញ្ជូន។

លោកបញ្ជាក់ថា “នៅពេលថ្លៃដឹកជញ្ជូនថោក នោះតម្លៃទំនិញចែកចាយក្នុងស្រុកក៏ចុះថោកផងដែរ និងមានលទ្ធភាពប្រកួតប្រជែងដឹកជញ្ជូនផលិតផលរបស់កម្ពុជា ទៅលក់នៅក្រៅប្រទេសផងដែរ”។

លោកបន្ថែមថា ក្រៅពីនេះ យើងក៏រៀបចំប្រព័ន្ធ EDI ដើម្បីផ្លាស់ប្តូរទិន្នន័យពីនាវាចេញចូលកម្ពុជាម្តងៗ ដោយមានជំនួយថវិកាពីប្រទេសជប៉ុន ដើម្បីកសាងប្រព័ន្ធនេះឡើង។ លើសពីនេះ លោក ស៊ុន ចាន់ថុល បានធ្វើបទបង្ហាញជូនគណរដ្ឋមន្ត្រីអំពីប្រព័ន្ធដឹកជញ្ជូនតាមផ្លូវទឹក រហូតដល់សមុទ្រ ដើម្បីកាត់បន្ថយចំងាយ តម្លៃដឹកជញ្ជូន និងនីតិវិធីផ្សេងៗ។

លោកបន្តទៀតថា ប្រព័ន្ធដឹកជញ្ជូនតាមផ្លូវទឹក ឱ្យទៅរហូតដល់សមុទ្រ ត្រូវបានសិក្សាយ៉ាងលំអិតអស់រយៈពេល២៦ខែ ដោយប្រើប្រាស់បច្ចេកវិទ្យាទំនើបដូចជា ដ្រូន ផ្កាយរណប និងម៉ូដែល ដើម្បីជៀសវាងការប៉ះពាល់ដល់បរិស្ថាន ដែលផ្លូវនាវាថ្មីនេះមានចំងាយ១៨០គីឡូម៉ែត្រ ហើយព្រែកជីកនេះ មានប្រវត្តិសាស្ត្រតាំងពីអាណាចក្រហ្វូណនមកម្ល៉េះ ដោយប្រសិទ្ធិនាមថ្មីថា ជាព្រែកជីកហ្វូណនតេជោ ដើម្បីដឹកទំនិញពីទន្លេរហូតដល់សមុទ្រតែម្តង។លោកទេសរដ្ឋមន្ត្រី ស៊ុន ចាន់ថុល ក្រើនរំលឹកថា “កាលនោះ អាណាចក្រហ្វូណន មានការរីកចម្រើនណាស់ ក្នុងការដឹកជញ្ជូនទំនិញរហូតដល់អឺរ៉ុប ចិន និងឥណ្ឌា ប៉ុន្តែព្រែកជីកនេះត្រូវបានបោះ​បង់ចោលក្នុងសតវត្សរ៍ទី៥ ឬទី៦”។

លោកបន្ថែមថា “យើងបាននិងកំពុងត្រៀមជីកព្រែកនេះ ឱ្យបានជ្រៅជាងមុន ដើម្បីអាចអនុញ្ញាតឱ្យកប៉ាល់ចំនួន២ អាចជៀសគ្នាបាន ហើយព្រែកជីកនេះ អាចជួយរំដោះទឹកជំនន់បានផងដែរ ដោយយើងធ្វើទ្វារទឹកចំនួន១៥បន្ថែមទៀត ដើម្បីអូសទាញទឹកចូលមកក្នុងព្រែកជីកនេះ”។

លោកបន្តឱ្យដឹងទៀតថា ផ្ទុយទៅវិញ នៅរដូវប្រាំង យើងអាចមានទឹករហូតដើម្បីធ្វើកសិកម្ម ហើយប្រជាពលរដ្ឋកម្ពុជាចំនួន១,៦លាននាក់ ដែលរស់នៅតាមដងព្រែកជីកហ្វូណនតេជោ ប្រវែង១៨០គីឡូមែត្រនេះ អាចមានទឹកប្រើប្រាស់គ្រប់គ្រាន់ និងអាចដាក់ចិញ្ចឹមត្រីបាន ហើយភ្ញៀវទេសចរណ៍ អាចធ្វើដំណើរតាមផ្លូវទឹកទៅលេងនៅកែប កំពត ឬខេត្តព្រះសីហនុ។

លោកបញ្ជាក់ទៀតថា “នៅតាមផ្លូវព្រែកជីកនេះ មានតំបន់ពា​ណិ​ជ្ជកម្ម មានភោជនីយដ្ឋាន មានតំបន់សេដ្ឋកិច្ចពិសេស ដូច្នេះយើងឃើញថា ការជីកព្រែកមានផលចំណេញច្រើន ដោយបច្ចេក​ទេសមិនមានបញ្ហាទេ ព្រោះយើងខ្លាចទឹកប្រៃហូរចូលទឹកសាប ប៉ុន្តែយើងមានទ្វារទឹកសម្រាប់ដោះស្រាយ”។លោកអះអាងថា ទាក់ទិននឹងផ្លូវច្បាប់ យើងមានកិច្ចព្រមព្រៀងទន្លេមេគង្គឆ្នាំ១៩៩៥ ដែលបានចែងយ៉ាងច្បាស់ថា ទន្លេមេគឺជាទន្លេដែលហូរពីប្រទេសចិន មកដល់ប្រទេសភូមា ថៃ ឡាវ កម្ពុជា និងហូរទៅដល់ប្រទេសវៀតណាម នោះដៃទន្លេធម្មជាតិ ឬព្រែកគឺជាប្រព័ន្ធរបស់ទន្លេមេ ដូច្នេះបើប្រើប្រាស់ដៃទន្លេ យើងគ្រាន់តែត្រឹមជូនដំណឹងទៅដល់ភាគី៣ទៀតដូចជាប្រទេសវៀតណាម ថៃនិងឡាវប៉ុណ្ណោះ”។ លោកស៊ុន ចាន់ថុលបានឱ្យដឹងទៀតថា “គម្រោងព្រែកជីកនេះមិនមានផលប៉ះពាល់ធំដុំ ទៅលើបរិស្ថាននោះទេ ពីព្រោះវាជាព្រែកស្រាប់ ដោយយើងគ្រាន់តែជីកឱ្យបានធំ និងជ្រៅជាងមុន តែផ្ទុយទៅវិញ យើងអាចចិញ្ចឹមត្រីបានថែមទៀត និងទទួលបានផលចំណេញមិនប៉ះពាល់បរិស្ថាន”៕