ដោយៈ គង់ សូរិយា

        ភ្នំពេញៈ អគ្គនាយក នៃនិយ័តករបរធនបាលកិច្ច លោកសុខ ដារ៉ា បានបញ្ជាក់ឲ្យដឹងថា គិតមកដល់ពេលនេះ បរធនបាលកិច្ច ដែលកំពុងធ្វើប្រតិបត្ដិការ នៅក្នុងប្រទេសកម្ពុជា មានទំហំទឹកប្រាក់ ប្រមា​ណ១.៤ពាន់លានដុល្លារសហរដ្ឋអាមេរិក។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោក សុខ ដារ៉ា អញ្ជើញចូលរួម ក្នុងពិធីចុះអនុស្សរណៈនៃការយោគយល់គ្នា (MoU) រវាងនិយ័តករបរធនបាលកិច្ច (ន.ប.ធ.) និង វិទ្យាស្ថានខេមអេដ ស្ដីពី “កិច្ចសហប្រតិបត្តិការ លើការលើកកម្ពស់ការយល់ដឹង និងផ្លាស់ប្តូរជំនួយបច្ចេកទេស ក្នុងក្របខណ្ឌវិស័យបរធនបាលកិច្ច នៅកម្ពុជាកាលពីថ្ងៃទី២១ មិថុនាកន្លងមកនេះ។ លោកបញ្ជាក់ថា “សម្រាប់បរធនបាលកិច្ច ដែលកំពុងធ្វើប្រតិបត្ដិការ នៅក្នុងប្រទេសកម្ពុជា ដែលគិតមកដល់ពេលនេះ បានចុះបញ្ជីចំនួន៥២៣ករណី ជាមួយនឹងបរធនបាល ប្រមាណ១ពាន់៤លានដុល្លារ ប៉ុន្ដែនៅខែក្រោយចំនួននេះ នឹងកើនឡើង”។

បន្ថែមពីនោះទៀត អគ្គនាយក នៃនិយ័តករបរធនបាលកិច្ច បានលើកឡើងថា យើងអាចរំពឹងថា ពាក់កណ្ដាលខែក្រោយ ឬចុងខែក្រោយ តួលេខនេះ នឹងក្លាយជាតួលេខផ្លូវការ ទំហំបរធនដែលកំពុងធ្វើការសហការ នៅក្នុងប្រទេសកម្ពុជា នឹងកើនដល់១ពាន់១៣០លានដុល្លារ ប៉ុន្ដែនេះជាទិដ្ឋន័យបណ្ដោះអាសន្ន។

លោក សុខ ដារ៉ា បានបញ្ជាក់ថា គោលដៅរបស់និយ័តករបរធនបាលកិច្ច នឹងធ្វើយ៉ាងណាឲ្យទំហំបរធន ដែលធ្វើប្រតិបត្ដិការនៅប្រទេសកម្ពុជា កើនឡើង១,៥០០លានដុល្លារ សហរដ្ឋអាមេរិកប្រ​មាណជា៥% នៃ GDP។

ការចុះអនុស្សរណៈ នៃការយោគយល់គ្នានេះ ក្នុងគោលបំណងដើម្បីលើកកម្ពស់ និងបញ្ជា្របការយល់ដឹងអំពី វិស័យបរធនបាលកិច្ច និងបទប្បញ្ញត្តិពាក់ព័ន្ធ ព្រមទាំងដើម្បីផ្ដល់ការគាំទ្រ និងផ្លាស់ប្តូរជំនួ​យបច្ចេកទេសទៅវិញទៅមក សម្រាប់ជាវិភាគទាន ដល់កិច្ចដំណើរការអភិវឌ្ឍន៍ នៃវិស័យបរធនបាលកិច្ចនៅកម្ពុជា៕

ដោយៈ ស៊ីវ ម៉េង

        ព្រះសីហនុៈ អភិបាលខេត្តព្រះសីហនុ លោកគួច ចំរើនបានបញ្ជាក់ថា សម្រាប់ខេត្តព្រះសីហនុមកដល់ពេលនេះ នៅតែជាគោលដៅចាប់អារម្មណ៍យ៉ាងសំខាន់សម្រាប់វិនិយោគ។

លោកបញ្ជាក់ក្នុងពិធីជួបសំណេះសំណាល និងពិសារអាហារសាមគ្គីជាមួយថ្នាក់ដឹកនាំ និងសមាជិកសភាពាណិជ្ជកម្មខេត្តព្រះសីហនុកាលពីថ្ងៃទី២០ មិថុនាថា ដោយសាររាជរដ្ឋាភិបាលបានរៀប​ចំផែនការមេ ប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ក្រោមការគាំទ្របច្ចេកទេសពីវិទ្យាស្ថាន ស៊ិនជិន (ប្រទេសចិន) ឈានស្ទើរទៅបញ្ចប់ការរៀបចំផែនការមេ នៅតែរង់ចាំការសម្រិ​តសម្រាំង ពិនិត្យសម្រេចចុងក្រោយ និងសុំការគាំទ្រពីរាជរដ្ឋាភិបាល ដើម្បីដាក់ឱ្យប្រើប្រាស់ផែនការមេ ជាត្រីវិស័យដ៏សំខាន់សម្រា​ប់ចង្អុ​លទិសអភិវឌ្ឍនៅខេត្តព្រះសីហនុរបស់យើង។លោកបន្តថា កិច្ចសហប្រតិបត្តិការនេះ ត្រូវបានយកចិត្តទុកដាក់ពីក្រុមប្រឹក្សាអភិវឌ្ឍន៍កម្ពុជា(CDC) បានកំពុងខិតខំជំរុញលើកទឹកចិត្ត ដើម្បីឱ្យអនុវត្តឱ្យបានពេញលេញ និងជាការគាំទ្រដោយផ្ទាល់ទទួលបានអត្ថប្រយោជន៍ ពីការគិតគូររបស់រាជរដ្ឋាភិបាល ហើយមានអ្នកវិនិយោគកំពុងចាប់យកឱកាស ធ្វើការវិនិយោគប្រមូលផ្តុំចំនួ​ន៣ នៅខេត្តនេះ។

គំរោងវិនិយោគចំនួនបីនោះមានដូចជា ក្រុមហ៊ុនមួយកំពុងបានរៀបចំកែលម្អតារាងវាយកូនហ្គោល នៅតំបន់រាម ដែលការវិនិយោគជាផ្នែកមួយ នៃការទាក់ទាញផលិតផលទេសចរណ៍មួយថ្មី សម្រាប់ខេត្តរបស់យើងផងដែរ នៅខាងមុខទីលានតេជោ កំពុងរៀបចំបើកការដ្ឋានសាងសង់រួមមានដូចជា សណ្ឋាគារ ខុនដូ ផ្សារ សួនចញ្ចឹមត្រី វាបានផ្តល់ផលិត ផលទេសចរណ៍មួយយ៉ាងធំធេង ហើយគម្រោងនេះគ្រោងបើកការដ្ឋាន នៅចុងឆ្នាំ២០២៣ខាងមុខនេះ។លោកគួច ចំរើនបានបន្តថា មានផ្សារថ្មីមួយ កំពុងធ្វើការវិនិយោគ ហើយវាជាមជ្ឈមណ្ឌលពាណិជ្ជកម្ម ទេសចរណ៍ថ្មីមួយនៅខេត្តព្រះសីហនុ ដែលពួកគាត់ចាប់យកឱកាសវិនិយោគ នៅខេត្តព្រះសីហនុ ដែលមានសក្តានុពល ហើយក៏ជាការលើកមុខមាត់ខេត្តព្រះសីហនុ។

លោកបន្តថា ដូច្នេះសភាពាណិជ្ជកម្មមានភារកិច្ច ក្នុងការធ្វើទំនាក់ទំនងជាមួយវិនិយោគ និងត្រូវដឹងអំពីចំនួន និងគោលបំណងគោលដៅវិនិយោគថ្មីប៉ុន្មាន ចាស់ប៉ុន្មានដែលកំពុងបន្តរកស៊ី នៅខេត្តព្រះសីហនុ បើសភាពាណិជ្ជកម្មរបស់យើង គ្រប់គ្រងបញ្ហាទាំងនេះបាន ធ្វើឱ្យស្ថានភាពអ្នកវិនិយោគមកកាន់ ខេត្តព្រះសីហនុកាន់តែច្រើថែមទៀត យើងមានលទ្ធភាពចែករំលែកព័ត៌មានល្អៗ ដល់អ្នកវិនិយោគ ហើយរដ្ឋបាលខេត្តលើកទឹកចិត្ត និងគាំទ្រដល់អ្នកវិនិយោគ ដែលមានបំណង មកធ្វើការវិនិយោគនៅខេត្តព្រះសីហនុ៕

ដោយៈ គង់ សូរិយា

        ព្រះសីហនុៈ លោកកែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គិសនីកម្ពុជា និងលោកគួច ចំរើន អភិបាលអភិបាលខេត្តព្រះសីហនុ បានអញ្ជើញសម្ពោធដាក់ឱ្យប្រើប្រាស់ ជាផ្លូវការសមិទ្ធផលគម្រោងសាងសង់ ខ្សែបណ្តាញតង់ស្យុងមធ្យមកប់ ក្រោមបាតសមុទ្រ និងអាកាសដែលមានវិសាលភាព គ្របដណ្តប់ខេត្តព្រះសីហនុ និងខេត្តកោះកុង។

ខ្សែតង់ស្យុងនេះ គ្របដណ្តប់តាមបណ្តាកោះជាច្រើន រួមមានពីស្រុកគិរីសាគរ ខេត្តកោះកុង ឆ្លងកាត់កោះម្នាស់ កោះតាទាម ភ្ជាប់មកកោះស្តេច កោះសាមិត កោះអំពិលមកដល់កោះស្មាច់ ឃុំកោះស្តេច ស្រុកគិរីសាគរ ខេត្តកោះកុង មកដល់សង្កាត់កោះរ៉ុង ក្រុងកោះរ៉ុង ខេត្តព្រះសីហនុ។លោកគួច ចំរើន អភិបាលខេត្តព្រះសីហនុ បានមានប្រសាសន៍ថា  ខេត្តព្រះសីហនុទទួលបានការអភិវឌ្ឍ នូវហេដ្ឋារចនាសម្ព័ន្ធជាច្រើន ទន្ទឹមនោះក៏មានហេដ្ឋារចនា តភ្ជាប់ពីភូមិមួយទៅភូមិមួយសម្រា​ប់ប្រជាពលរដ្ឋបានប្រើប្រាស់ និងមានសមិទ្ធផលជាច្រើនផ្សេងៗទៀតដែលបាន នឹងកំពុងកើតមាននាពេលបច្ចុប្បន្ន។

លោកបន្តថា “ថ្ងៃនេះយើងបានតភ្ជាប់បណ្តាញអគ្គិសនី ពីខេត្តកោះកុង មកកាន់សង្កាត់កោះរ៉ុង ក្រុងកោះរ៉ុង ហើយអ្នកកោះរ៉ុងមានសំណាងមានបណ្តាញអគ្គិសនីជាតិប្រើប្រាស់ គោលដៅអាទិភាពរបស់រាជរដ្ឋាភិបាលកម្ពុជា ដាក់ចេញនូវការអភិវឌ្ឍធនធានមនុស្ស ផ្លូវ ទឹក និងភ្លើង”។ លោកបន្តថា “បណ្តាញអគ្គិសនីនៅលើកោះនេះ និងជួយកាត់បន្ថយ ការចំណាយថវិកាកាន់តែច្រើន សម្រាប់ប្រជាពលរដ្ឋតំបន់កោះ”។

សម្តេចតេជោបានគិតគូរ ពីសុខទុកប្រជាពលរដ្ឋនៅតំបន់កោះ ពិសេសការតភ្ជាប់បណ្តាញអគ្គិសនីជាតិ យើងចង់ធ្វើឱ្យបានលឿន ឆាប់ ហើយខ្សែបណ្តាញអគ្គិសនីនេះ មានប្រវែងជាង១០០គីឡូម៉ែត្រ។

រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គិសនីកម្ពុជា លោកកែវ រត​នៈបានមានប្រសាសន៍ថា ជំនួសមុខឱ្យសម្តេចតេជោ ហ៊ុន សែន សូមអបអរសាទរសមិទ្ធផលនេះ ដែលបងប្អូនទទួលបានអគ្គិសនីបណ្តាញជាតិប្រើប្រាស់ ថ្ងៃនេះជាថ្ងៃប្រវត្តិសាស្ត្រសម្រាប់សង្កាត់កោះរ៉ុងដូចជា ទី១ ភ្លើងបណ្តាញជាតិ២៤ម៉ោង ព្រោះការផលិតភ្លើងរបស់យើងមានគ្រប់គ្រាន ទី២ អគ្គិសនីចេញពីថាមពលស្អាត ទី៣ ភ្លើងដែលមានតម្លៃថោក ជាភ្លើងអនុគ្រោះ រដ្ឋជាអ្នកចេញថ្លៃខាតជំនួសប្រជាពលរដ្ឋ។

លោកបន្តថា ការបេ្តជ្ញារបស់សម្តេចតេជោ ហ៊ុន សែន មិនឱ្យអគ្គិសនីឡើងថ្លៃ ពិសេសគឺចង់ឱ្យអ្នកកោះរ៉ុង មានទឹកស្អាត ភ្លើងរបស់រដ្ឋប្រើប្រាស់ដូចប្រជាពលរដ្ឋនៅដីគោក។ វឌ្ឍនភាព២៥ឆ្នាំ កម្ពុជាទទួ​លបានសុខសន្តិភាព និងការអភិវឌ្ឍ ទើបយើងរៀបចំប្រភពអគ្គិសនីប្រើដោយមានដូចជា ១.វារីអគ្គិសនី ២.អគ្គិសនីប្រើដោយធ្យូងថ្ម ៣.អគ្គិសនីប្រើដោយថាមពលព្រះអាទិត្យ៕

ដោយៈ គង់ សូរិយា

        ភ្នំពេញៈ តំណាង​សហគ្រាស​អាកាសចរណ៍​ចិន ​ប្រចាំ​កម្ពុជា ​ចំនួន៥ បានស្នើសុំ​ការគាំទ្រ​ពី​អគ្គនាយកដ្ឋាន​ពន្ធដារ ​(GDT) ដើម្បី​ឈ្វេងយល់​ឱ្យបាន​កាន់តែ​លម្អិត​ អំពី​អនុលោមភាព និង​កាតព្វកិច្ច​សារពើពន្ឋ របស់​សហគ្រាស​អាកាសចរណ៍​នៅ​កម្ពុជា ក៏ដូចជា​លើកឡើង​ពី​បញ្ហា​ប្រឈម​នានា​ ក្នុង​វិស័យ​ពន្ធដារ​ ដែល​សហគ្រាស​អា​កាស​ចរណ៍​កំពុង​ជួបប្រទះ​។​

ជំនួប​នេះ​ ដែលបានធ្វើ​ឡើង​កាលពី​សប្តាហ៍​មុន រវាង​លោក តែ ហ្សី​ឌី ប្រធាន​នាយកដ្ឋាន​សវនកម្ម​ស​ហ​គ្រាស ​នៃ​អគ្គនាយដ្ឋាន​ពន្ធដារ ជាមួយ​តំណាង​សហគ្រាស​អាកាស​ចរណ៍​ចិន​ទាំង​៥ ប្រចាំ​នៅ​កម្ពុជា ដែល​រួមមាន​ការិយាល័យ​តំណាង​ក្រុមហ៊ុន China Southern Airlines Company Limited សាខា​ក្រុមហ៊ុន Air China Limited ​សាខា​ក្រុមហ៊ុន China Eastern Airlines Co., LTD សាខា​ក្រុមហ៊ុន Xiamen Airlines Co., LTD និង​សាខា​ក្រុមហ៊ុន Shenzhen Airlines Co., LTD​។​លោក Liu Yangfu​ ប្រធាន​ផ្នែក​ពន្ធដារ​នៃ​ក្រុមហ៊ុន​ Air China Limited និង​ជា​ប្រធាន​ប្រតិភូ ក៏បាន​សម្ដែង​ការ​អរគុណ និង​វាយតម្លៃ​ខ្ពស់ ​ចំពោះ​កិច្ចខិតខំ​ប្រឹងប្រែង និង​ការសហ​ការ​​របស់​អគ្គ​នាយកដ្ឋាន​ពន្ធដារ​នា​ពល​កន្លងមក​។ លោក​រំពឹងថា រាល់​ក្រុមហ៊ុន​អាកាសចរណ៍​ទាំងអស់ ​នឹង​ទទួលបាន​ការយកចិត្ត​ទុកដាក់ និង​កិច្ចសហការ​នានា​ក្នុងការ​គោរព​តាម​អនុលោមភាព​នៃ​ពន្ធ ​ក្នុងប្រទេស​កម្ពុជា​បន្តទៅ​មុខ​ទៀត​។​

ចំណែកលោក តែ ហ្សី​ឌី បាន​ថ្លែងថា តាមរយៈ​ជំនួប​នេះ​អគ្គនាយកដ្ឋាន​ពន្ធដារ ​នឹង​ចាត់​តំណាង​ឱ្យទៅ​ធ្វើការ ​ជាមួយ​ក្រុមហ៊ុន​អាកាសចរណ៍​ទាំង​៥ ដើម្បី​ជំរុញ​ឱ្យ​កិច្ចសហការ​កាន់ តែ​មាន​ភាពជិតស្និទ្ធ​បន្ថែមទៀត សំដៅ​ធ្វើ​យ៉ាង​ឱ្យ​រាល់​ម្ចាស់​អាជីវកម្ម ​ក្នុង​វិស័យ​អាកា​សចរណ៍​ស៊ីវិល​នេះ ​ប្រព្រឹត្តទៅបាន​រលូន និង​ទទួលបាន​ជោគជ័យ ​ក្នុង​ដំណើការ​អាជីវកម្ម​រប​ស់​ខ្លួន ​នៅ​កម្ពុជា​។​

ជាមួយគ្នានេះ លោក​ ធៀ​ម ធឿ​ង ​ប្រធាន​សមាគម​មគ្គុទេសក៍​ទេសចរណ៍​ភាសា​ចិន​-កម្ពុជា ដែលមាន​ទីស្នាក់ការ​នៅ​ខេត្តសៀមរាប បាន​ប្រាប់​ភ្នំពេញ​ប៉ុស្តិ៍​ថា ទោះបី​ពិភពលោក​ពេលនេះ ​បាន​បើកទូលាយ​ដូច​មុន ពេល​មាន​វត្តមាន​ជំងឺ​កូ​វីដ​១៩ ក៏​ចំនួន​ជើងហោះហើរ និង​ភ្ញៀវទេសចរ​បរទេស ពិសេស​ជនជាតិ​ចិន ​ដែល​ធ្វើដំណើរ​មក​កម្ពុជា​ គឺ​នៅតែមាន​ចំនួន​តិចតួច​នៅឡើយ​ បើ​ធៀប​នឹង​មុន​ឆ្នាំ​២០២០​។ ភ្ញៀវទេសចរ​មកពី​ប្រទេស​ចិន ​បាន​ដើរតួនាទី​យ៉ាងសំខាន់​ ក្នុង​វិស័យ​ទេសចរណ៍​កម្ពុ​ជា មុន​ឆ្នាំ​២០២០​។

លោក​បន្តថា “ភាពស្ងប់ស្ងាត់​នៃ​ចំនួន​ភ្ញៀវទេសចរ​ចិន គឺអាច​បណ្តាលមកពី​សេដ្ឋកិច្ច​គ្រួសារ​របស់​ពួកគេ​ មិនទាន់​ល្អ​ដូចពេលមុន”​។

​យោងតាមទិន្នន័យ​ផ្លូវការ​របស់ ​ក្រសួងទេសចរណ៍​បានឱ្យដឹងថា នៅក្នុង​រយៈពេល៤​ខែ​ដំបូង ​ឆ្នាំ​២០២៣ កម្ពុជាទទួលបាន​ភ្ញៀវ​បរទេស​សរុប១,៧២១,៦៦៨​នាក់ កើនឡើង៦១៣ ​ភាគរយ​បើ​ធៀប​រយៈពេល​ដូចគ្នា​ឆ្នាំ​២០២២​។ ​

ដើម្បី​ជំរុញ​កំណើនសេដ្ឋកិច្ច និង​កំណើន​ភ្ញៀវទេសចរ កម្ពុជា បាននិងកំពុង​សាងសង់ និង​គ្រោង​បើក​ឱ្យ​ដំណើរការ​ព្រលានយន្តហោះ​អន្តរជាតិ​មួយចំនួន ពិសេស​ព្រលាន​អន្តរជាតិ​សៀម​រាប​ថ្មី និង​អន្តរជាតិ​តេ​ជោ​ក្រុង​តាខ្មៅ និងកំពុងពង្រីកផ្លូវរត់នៅអាកាសយានដ្ឋាន​កងកេង ខេត្តព្រះសីហនុ​៕

        ដោយៈ សហការី

        ភ្នំពេញៈ វេទិកាពិភាក្សាពីបញ្ហាប្រឈម និងដំណោះស្រាយលើវិស័យអចលនវត្ថុ ត្រូវបានរៀបចំឡើងកាលពីសប្តាហ៍មុន ដោយមានការចែករំលែកចំណេះពីអ្នកជំនាញជាច្រើន។

ក្នុងអំឡុងពេលពីរបីឆ្នាំកន្លងមកនេះ ដោយសម្លឹងឃើញបញ្ហាជាឱកាសនៅក្នុងមុខជំនួញ និងអាជីវកម្ម ដែលមានការប្រឈមខ្លាំងក្នុងការប្រតិបត្តិការទំនាក់ទំនង ខ្សែចង្វាក់ផលិតកម្ម ការផ្គត់ផ្គង់ ការគ្រប់គ្រង ការសាងសង់ ការអភិវឌ្ឍន៍លើគ្រប់វិស័យ ជាពិសេសវិស័យអចលនវត្ថុ ដែលជាវិស័យដើរតួនាទីយ៉ាងសំខាន់ ក្នុងការអភិវឌ្ឍន៍ហេស្ថារចនាសម្ព័ន្ធ លំនៅឋាន ខុនដូ អាផាតមិន បុរី សណ្ឋាគារ រីសត ដើម្បីលើកកម្ពស់ការអភិវឌ្ឍន៍សេដ្ឋកិច្ចអោយមានចរន្តស្ថេរភាព និងកម្រិតជីវភាពរស់នៅរបស់ប្រជាពលរដ្ឋ រួមទាំងឱកាសការងារជាច្រើនផងដែរ។

មិនត្រឹមតែប៉ុណ្ណោះ ក៏មានចូលរួមចំណែកពីរាជរដ្ឋាភិបាល និងវិស័យឯកជន បានធ្វើការសហការ បន្តការអភិវឌ្ឍន៍ និងធ្វើប្រតិបត្តិការអាជីវកម្មរាងៗខ្លួនអោយមានភាពប្រសើរឡើង ស្របពេលដែលពិភពលោកកំពុងតែជួបវិបត្តិជាសកល។ទោះបីជាយ៉ាងនេះក្តី ក៏នៅតែមាន ម្ចាស់អាជីវកម្ម និងសហគ្រិនមួយចំនួន នៅតែមានការជួបជុំ ពិភាក្សា ស្វែងរកកាឡានុវត្តភាព ចាប់ដៃគូសហការ បង្កើតបណ្តាញទំនាក់ទំនងអាជីវកម្មនានា ក្នុងន័យបន្តចូលរួមអភិវឌ្ឍន៍លើគ្រប់វិស័យ និងវិស័យអាទិភាពមួយចំនួនទៀតក្នុងប្រទេសកម្ពុជា ក្នុងគោលបំណងឆ្លុះបញ្ចាំងពីលំហ្នឹងនិងស្ថេរភាពសេដ្ឋកិច្ចនាពេលបច្ចុប្បន្ន​។

ទន្ទឹមនឹងនេះផងដែរ ក៏មានវិស័យ​ឯកជនប្រមាណ៨០ស្ថាប័ន មានការជួបជុំបង្កើតព្រឹត្តិការណ៍ Business Friday Night (BFN) ក្រោមវេទិកា Real Estate Forum កាលពីថ្ងៃសុក្រទី១៦ ខែមិថុនាឆ្នាំ២០២៣ នៅកាហ្វេជាតិ រាជធានីភ្នំពេញ ។កម្មវិធី BFN ដែលបង្កើតឡើងតាំងពីឆ្នាំ 2010 ផ្តួចផ្តើមដោយ លោក Jack Sao ស្ថាបនិកMaster Concept Media 724 ក្នុងគោលបំណង ប្រមូលផ្តុំនូវ ម្ចាស់អាជីវកម្ម អ្នកជំនាញ សហគ្រិន និងថ្នាក់ដឹកនាំក្រុមហ៊ុន ដោយមានការជួបជុំម្ចាស់អាជីវកម្ម សហគ្រិន អ្នកជំនាញ មកពីវិស័យផ្សេងគ្នាជាច្រើនរូបប្រមាណ៨០នាក់។ ដើម្បីជួបជុំ ចែករំលែក និងផ្លាស់ប្តូរចំណេះដឹង និងធ្វើបច្ចុប្បន្នភាព នៃអាជីវកម្ម និងទីផ្សារ ក្នុងស្រុក និងសកល។វេទិកានេះ ក៏អាចជាបណ្តាញទំនាក់ទំនងមួយដ៏ល្អ សម្រាប់ ការពិភាក្សា និងស្វែងរកគន្លឹះ អាជីវកម្ម ដើម្បីភាពល្អប្រសើរ និងជោ​គជ័យរួមគ្នាផងដែរ។

លោកJack SAO បានបង្ហាញពីគោលបំណងរបស់ BUSINESS FRIDAY NIGHTថា BFN គឺជាបណ្តាញទំនាក់ទំនងអាជីវកម្ម និងកសាងទំនាក់ទំនងសម្រាប់កំណើនអាជីវកម្មកម្ពុជា។ វាជាព្រឹត្តិការណ៍ប្រចាំខែ សម្រាប់ធ្វើបច្ចុប្បន្នភាពលើប្រធានបទ លើអាជីវកម្ម និងទីផ្សារក្នុងស្រុក និងសកល។ ។លោកបន្តថា BFNវាគឺជាការប្រមូលផ្តុំនៃម្ចាស់អាជីវកម្ម អ្នកវិនិយោគ ថ្នាក់ដឹកនាំ អ្នកជំនាញ វាគ្មិន និងសហគ្រិន។

លោកបន្តថា “វាជាវេទិកាអាជីវកម្ម បណ្តាញទំនាក់ទំនង ដើម្បីចែករំលែក ផ្លាស់ប្តូរគំនិត ពិភាក្សាអំពីអាជីវកម្ម ប្រតិបត្តិការ និងដំណោះស្រាយបញ្ហា សម្រាប់ស្វែងរកគន្លឺះជោគជ័យ”។

ទន្ទឹមនឹងនេះផងដែរ ព្រឹត្តិការណ៍នេះ ក៏ប្រមូលផ្តុំទៅដោយប្រធា​នបទទាក់ទងនឹងវិស័យអចលនវត្ថុ ដែលបានធ្វើការបកស្រាយ និងបញ្ចេញទស្សនៈល្អប្រកបដោយចក្ខុវិស័យវិជ្ជមាន ក្នុងការអភិវឌ្ឍន៍ និងធ្វើមានភាពប្រសើរឡើងវិញថែមមួយកម្រិតទៀត។

លោក ចេង វុទ្ធី អគ្គនាយក្រុមហ៊ុន (INVA ESTATE)បានលើកឡើងពីស្ថានភាព និងឱកាសវិនិយោគក្នុងវិស័យនេះ។

ជាមួយគ្នានេះ លោកបណ្ឌិតឧកញ៉ាតេង រិទ្ឋីអគ្គនាយកក្រុមហ៊ុនR – Investment Group បានចែករំលែកពីស្ថានភាពអភិវឌ្ឍន៍ដីឡូតិ៍ និងឱកាសវិនិយោគនៅកម្ពុចា។

សំរាប់លោកឧកញ៉ា ឡាង ទីលាង អគ្គនាយ (BOREY TYLEANG)បានបង្ហាញពីនិន្នាការ និងទីផ្សារបុរីនៅកម្ពុជា។

ចំណែកស្ថានភាពអភិវឌ្ឍន៍ខុនដូ លោក សុទ្ធ វីរៈ អគ្គនាយក្រុមហ៊ុន(HOMES GLOBAL CO., LTD.)។

– ស្ថានភាពនៃវិស័យសំណង់ ដោយលោក សៅ កុសល តំណាងក្រុមហ៊ុន (KHMER ANGKOR CONSTRUCTION) និងដោយមានការ សម្របសម្រួលកម្មវិធីពិធីការ និងព្រឹត្តិការណ៍ដែលតំណាងដោយ Ms. Samphors Se  អគ្គនាយិកា ក្រុមហ៊ុន Making Digital Easy។

ព្រឹត្តិការណ៍ Business Friday Night អាចដំណើរការទៅបានដោយទទួលបានគាំទ្រ សមាគមអ្នកទីផ្សារកម្ពុជា (MAC) ពីសំណាកភ្ញៀវកិត្តិយស ឧកញ៉ា លោកជំទាវ ម្ចាស់អាជីវកម្ម សហគ្រិនកម្ពុជា និងអ្នកឧបត្ថម្ភធំ បុរីទីលាង និងអ្នកសហការ កាហ្វេជាតិ ដៃគូសហការប្រព័ន្ធផ្សព្វផ្សាយProperty Area Asia ជាពិសេសវាគ្មិនកិត្តិយសដែលបានចែករំលែក នូវបទពិសោធន៍ល្អៗដ៏មានសារៈសំខាន់។

លើសពីប្រធានបទ ដែលមានសំខាន់ខាងលើនេះ លោកបណ្ឌិត ជា ដែន Vice President of Marketing Association of Cambodia​ (MAC) ចូលរួមផ្តល់ជាអនុសាសន៍ល្អៗ ក្នុងកម្មវិធីផងដែររួមមាន ទី១ មិនជាការងាយស្រួលនោះទេ ក្នុងស្ថានភាពបែបនេះ ត្រូវមានការងារច្រើនត្រូវធ្វើ និងពីការចូលរួមពី វិនិយោគជិក ជាមួយការកែប្រែមុខមាត់ តាមរយៈច្បាប់លើកទឹកចិត្ត ពីរាជរដ្ឋាភិបាល និង ការចូលរួមពីបច្ចេកវិជ្ជា ព្រមទាំង ការរីកដុះដាល ពី ធនធានមនុស្ស ផង។

លោកបន្តថា ការនិយាយតៗគ្នាអំពីស្ថានភាព កំពុងជួបការលំបាក អំពីវិស័យអចលនវត្ថុ កំពុងមានលំអោនថមថយ  គឺជាការពិតណាស់ តែមិនគួរនិយាយតៗគ្នា ព្រោះវាអាចបង្កើតជាស្រមោល ដែលដើរបន្លាច ខ្លួន និងអ្នកដទៃ ដែលគេមានកំម្លាំង ជាមួយសមត្ថភាពអាចឈរជើងនៅឡើយ ដែលអាចជះផលប៉ះពាល់ដូចជា បង្ក អោយអ្នកចង់លក់ និងចង់ទិញ កាន់តែមានគម្លាត ឆ្ងាយធ្វើអោយចរន្តសាច់ប្រាក់លើទីផ្សារ មានការខ្វះ ដែលអាចប៉ះពាល់ដល់វិស័យនានាទៅវិញ។

លោកជា ដែនបានជម្រុញ និងលើកទឹកចិត្តអោយអ្នកចង់បាន រាល់អចលនវត្ថុនានា ត្រូវគាំទ្រអោយពឹងលើអ្នកមានជំនាញ អចលនវត្ថុ ដើម្បីបញ្ជៀសនូវរាល់ហានីភ័យ ព្រោះមួយរយះនេះ មានព័ត៌មានជាច្រើន ពីការខាតបង់ នៃការប្រកបរបរលើអាជីវកម្ម វិស័យអចលន វត្ថុ គំរោងផ្សារ ដីឡូត៏ ផ្ទះល្វែងជាមដើម៕  

ដោយ: គង់ លាងហួរ

សិង្ហបុរី: ប្រទេសសិង្ហបុរី បានបង្កើនការផ្គត់ផ្គង់លំនៅដ្ឋានឯកជន នៅក្នុងបញ្ជីនៃកម្មវិធីលក់ដីរបស់រដ្ឋាភិបាល (GLS) សម្រាប់ឆមាសទីពីរនៃឆ្នាំនេះ រហូតដល់៥.១៦០យូនីត កើនឡើងពី៤.០៩០យូនីត នៅក្នុងរយៈពេលប្រាំមួយខែដំបូង។

លំនៅដ្ឋានសរុប៩.២៥០យូនីត សម្រាប់ឆ្នាំ២០២៣ទាំងមូលនេះគឺចំនួនខ្ពស់បំផុត ក្នុងរយៈពេលមួយទសវត្សរ៍កន្លងមក ហើយវាក៏ខ្ពស់ជាងការផ្គត់ផ្គង់លំនៅដ្ឋាននៅឆ្នាំ២០២២ ជិត៥០ភាគរយ និងស្មើប្រហែល២,៥ដង បើធៀបនឹងឆ្នាំ២០២១។អាជ្ញាធរអភិវឌ្ឍន៍ទីក្រុង (URA) បានបញ្ជាក់នៅក្នុងសេចក្តីប្រ​កា​សព័ត៌មាននៅថ្ងៃពុធ ទី២១ ខែមិថុនានេះ ថា កម្មវិធី GLS សម្រាប់ឆមាសទីពីរនៃឆ្នាំនេះ រួមមានទីតាំងចុះបញ្ជី ដែលបានបញ្ជាក់ចំនួន៨ និងទីតាំងបញ្ជីបម្រុងចំនួន៩ទៀត។

យោងតាមការចុះផ្សាយពីកាសែត CNA បានឱ្យដឹងថា ទីតាំងដែល​បាន​បញ្ជាក់​ទាំង​៨ គឺជា​ទីតាំង​លំនៅដ្ឋាន​ឯកជន ក្នុងនោះមានទីតាំងមួយ​សម្រាប់​ខុនដូ​ប្រភេទ Executive Condominium (EC)។ សរុបមក ទីតាំងទាំងនេះអាចផ្តល់ក្រឡា​ផ្ទៃ​ ពាណិជ្ជកម្ម​សរុបចំនួន៤.៩០០ម៉ែត្រការ៉េ។

ដីនៅក្នុងបញ្ជីបញ្ជាក់ត្រូវបានដាក់លក់ នៅកាលបរិច្ឆេទដែលបានកំណត់ទុកជាមុន ដោយក្បាលដីភាគច្រើន ត្រូវបានលក់តាមរយៈការដេញថ្លៃ។

ទន្ទឹមនឹងនេះ ដីនៅក្នុងបញ្ជីបម្រុង មិនត្រូវបានដាក់សម្រាប់ការដេញថ្លៃភ្លាមៗនោះទេ ប៉ុន្តែត្រូវបានផ្តល់ជូនសម្រាប់ការដាក់ពាក្យ។  ទីតាំងចុះបញ្ជីបម្រុង ត្រូវបានដាក់សម្រាប់ការដេញថ្លៃ នៅពេលអ្នកអភិវឌ្ឍន៍បង្ហាញពីតម្លៃអប្បបរមាមួយ ដែលត្រូវបានទទួលយកដោយរដ្ឋាភិបាល៕

ដោយៈ ស៊ីវ ម៉េង

        ភ្នំពេញៈ អគ្គនាយិកាក្រុមហ៊ុនAmatak Property Service លោកស្រីតាំង ហួរបានមានប្រសាសន៍ថា នេះជាពេលវេលាដ៏ល្អសំរាប់ការទិញដីធ្លីយកផលចំណេញបំផុត។

លោកស្រីបានមានប្រសាសន៍ឲ្យដឹង តាមបណ្តាញតេឡេក្រាមកាលពីថ្ងៃទី២០ មិថុនាថា ទីផ្សារដីធ្លីនៅតែមានឱកាសល្អ សម្រាប់វិនិយោគយកផលចំណេញ ហើយពេលនេះជាឱកាសល្អបំផុត សម្រាប់​ការវិ​និយោគ ដោយសារតម្លៃដីបានធ្លាក់ចុះ ធៀបជាមួយនឹងឆ្នាំ២០២២កន្លងមក។

លោកស្រីបន្តថា “ការវិនិយោគ គួរផ្តោតលើតំបន់ក្នុងទីក្រុង និងតំបន់ជាយក្រុង ដែលមានសក្តានុពលជាងគេ”។ លោកស្រីបន្តថា “ឱកាសនៃការកើនឡើងតម្លៃដីធ្លី ​នឹង អាចងើបសឹមៗប្រសើរឡើងវិញនៅឆ្នាំ២០២៤ខាងមុខនេះ ហើយទទួលផលចំណេញរយះពេលវែង ស្របពេលការបោះឆ្នោតក៏បាន​បញ្ចប់ផងដែរ”។

លោកស្រីតាំង ហួរបានសម្តែងសុទិដ្ឋិនិយមថា អ្វីៗនឹងមានសភាពប្រសើរឡើង នៅបណ្តាឆ្នាំខាងមុខ ដោយសេដ្ឋកិច្ចពិភពលោ​កនឹងងើបឡើងវិញ និងស្ថានភាពសេដ្ឋកិច្ចរបស់កម្ពុជាបាន និងកំពុងមានសញ្ញាល្អប្រសើរ ដោយរដ្ឋាភិបាលបានព្យាករណ៍សេដ្ឋកិច្ច​របស់យើងនឹងកើន ក្នុងរង្វង់៥,៤ភាគរយនៅក្នុងឆ្នាំនេះ និងកើនឡើងបន្ថែមទៀតនាឆ្នាំ២០២៤ខាងមុខ៕