ដោយៈគង់ សូរិយា

        ព្រះសីហនុៈ អ្នកជំនាញលំដាប់អន្តរជាតិ បានកំពុងសុទិដ្ឋិនិយមពីទីផ្សារខុនដូនៅក្រុងព្រះសីហនុ ស្របពេលអ្នកវិនិយោគចិនកាន់តែច្រើនបានមកដល់ក្រុងព្រះសីហនុ។

អគ្គនាយកក្រុមហ៊ុនERA Cambodiaលោកខន គង្គាបានមានប្រសាសន៍ឲ្យដឹងនាព្រឹកថ្ងៃទី៨ មិថុនានេះថា បច្ចុប្បន្នទីផ្សារខុនដូនៅក្រុងព្រះសីហនុ កំពុងប្រែប្រួល ដោយអត្រានៃការជួលខុនដូ និងផ្ទះសំរាប់ស្នាក់នៅ ក្នុងទីក្រុងនេះកំពុងងើបឡើងវិញ។

លោកបន្តថា “កំណើននេះ ដោយសារការមកដល់របស់អ្នកវិនិយោគចិន ដែលពួកគេបាននិងកំពុងសិក្សា ពីលទ្ឋភាពវិនិយោគនៅកម្ពុជា”។លោកបន្តថា “អ្នក​វិ​និយោគចិនបាន និងកំពុងព្យាយាមទាញតម្លៃអចលនទ្រព្យ ដោយពួកគេកំពុងព្យាយាមទិញ ឲ្យបានតម្លៃទាបបំផុតនៅក្នុងទីផ្សារ”។

ខេត្តព្រះសីហនុ បានស្ថិតនៅក្នុងគំរោង នៃគំនិតផ្តួ​ចផ្តើមខ្សែក្រវ៉ាត់ និងផ្លូវរបស់ប្រទេសចិន ដែលជាលទ្ឋផលនៃគំនិតផ្តួចផ្តើមនេះ បានធ្វើឲ្យលំហូរFDI មកពីប្រទេសចិនចាក់ចូលទីក្រុងនេះ មានទំហំទឹកប្រាក់ជាង៧០០០លានដុល្លារអាមេរិក ចន្លោះឆ្នាំ២០២៦ ដល់ឆ្នាំ២០១៩។

ទីក្រុងនេះបានផ្លាស់ប្តូរមុខមាត់ ពីទីក្រុងស្ងាត់ជ្រងំ និងមានអាគារចាស់ៗ មកជាទីក្រុងដ៏ទំនើបស៊ីវិល័យមួយ ស្របពេលរដ្ឋាភិបាលបាននិងកំពុងរៀបចំទីក្រុងនេះ តាមលំនាំទីក្រុងស៊ិនជិនរបស់ប្រ​ទេសចិន និងបានដាក់ចេញគោលនយោបាយ ដើម្បីជម្រុញអគារជាប់គាំងរាប់រយនៅទីក្រុងនេះ សាងសង់និងដំណើរការឡើងវិញតាមរយៈការដាក់ចេញ នូវគោលនយោបាយលើកទឹកចិត្តជាច្រើន។

អ្នកជំនាញដដែលបានបន្តថា ការបើកដំណើរការផ្លូវល្បឿនលឿនពីរាជធានីភ្នំពេញ ទៅកាន់ទីក្រុងព្រះសីហនុបាន និងកំពុងលើកកំពស់សក្តានុពលទីផ្សារអចលន​វត្ថុ នៅក្រុងព្រះសីហនុផងដែរ៕

ដោយ: គង់ លាងហួរ
តូក្យូ: យោងតាមទិន្នន័យរដ្ឋាភិបាលបានបង្ហាញនៅថ្ងៃព្រហស្បតិ៍នេះថា សេដ្ឋកិច្ចរបស់ប្រទេសជប៉ុនបានកើនឡើងក្នុងអត្រាប្រចាំឆ្នាំ២,៧ភាគរយនៅក្នុងត្រីមាសខែមករាដល់ខែមីនា ដែលជាល្បឿនលឿនជាងការព្យាករណ៍ទុក។

សេដ្ឋកិច្ចធំបំផុតទី៣របស់ពិភពលោកមួយនេះត្រូវបានព្យាករណ៍ដំបូងថានឹងកើនឡើង១,៦ភាគរយ។ ខណៈទិន្នន័យផលិតផលក្នុងស្រុកសរុបចាប់ពីខែតុលាដល់ខែធ្នូ ឆ្នាំមុនបានប្រសើរឡើង ដែលសបញ្ជាក់ថា សេដ្ឋកិច្ចជប៉ុនបានគេចផុតវិបត្តិនៅចុងឆ្នាំ២០២២។

ចំណែកឯ GDP របស់ជប៉ុន ដែលជាតម្លៃសរុបនៃទំនិញ និងសេវាកម្មដែលផលិតនៅក្នុងប្រទេសមួយ បានកើនឡើង០,៧ភាគរយនៅក្នុងខែមករា ដល់ខែមីនា ធៀបនឹងត្រីមាសមុន។

ជាមួយនឹងសេដ្ឋកិច្ចបន្តងើបឡើងវិញចាប់តាំងពីការដកវិធានការទប់ស្កាត់កូវីដ ក្រុមហ៊ុននានាបាននិងកំពុងបង្កើនការវិនិយោគឡើងវិញ ខណៈការប្រើប្រាស់ឯកជននៅតែមានភាពធន់នឹងការហក់ឡើងថ្លៃនៃទំនិញ។

យោងតាមការិយាល័យគណរដ្ឋមន្ត្រីបានរាយការណ៍ថា ការចំណាយដើមទុនបានកើនឡើង១,៤ភាគរយ ធៀបនឹង០,៩ភាគរយនៅក្នុងទិន្នន័យបឋម ដែលឆ្លុះបញ្ចាំងពីការវិនិយោគដោយក្រុមហ៊ុននានាដើម្បីបង្កើនទិន្នផល។

ការប្រើប្រាស់ឯកជនដែលគ្របដណ្តប់ជាងពាក់កណ្តាលនៃសេដ្ឋកិច្ចជប៉ុនត្រូវបានបន្ទាបបន្តិចមកត្រឹមកំណើន០,៥ភាគរយពី០,៦ភាគរយ ខណៈមនុស្សចំណាយតិចលើការញ៉ាំអាហារក្រៅផ្ទះជាងការគិតដំបូង។

លោក Shinichiro Kobayashi សេដ្ឋវិទូជាន់ខ្ពស់ប្រចាំនៅក្រុមហ៊ុន Mitsubishi UFJ Research បានមានប្រសាសន៍ថា “ទិន្នន័យ GDP ផ្តល់ភស្តុតាងថា ការស្ទុះងើបឡើងវិញនៃសេដ្ឋកិច្ចគឺនៅដដែល ហើយសំណួរគឺថាតើសន្ទុះនឹងមាននិរន្តរភាពដែរឬទេ”៕

ដោយៈ គង់ សូរិយា

        ភ្នំពេញៈ ស្ពានបេតុងសរសៃដែកប្រវែង៧២ម៉ែត្រ ទទឹង៦,៦០ម៉ែត្រ ស្ថិតនៅភូមិទួលស្លែង ឃុំលើកដែក ស្រុកកោះធំ ខេត្តកណ្តាល ត្រូវបានបើកការដ្ឋានសាងសង់ ក្រោមវត្តមានលោកទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណៈការ និងដឹកជញ្ជូន។

លោកទេសរដ្ឋមន្ត្រី ស៊ុន ចាន់ថុល ប្រធានក្រុមការងារថ្នាក់ជាតិរបស់រាជរដ្ឋាភិបាល ចុះមូលដ្ឋានស្រុកកោះធំ បានអញ្ជើញជាអធិបតីក្នុងពិធីបើកការដ្ឋានសាងសង់ ស្ពានបេតុងសរសៃដែក ប្រវែង៧២ ម៉ែត្រ ទទឹង៦,៦០ម៉ែត្រ ស្ថិតនៅភូមិទួលស្លែង ឃុំលើកដែក ស្រុកកោះធំ ខេត្តកណ្តាល។ថ្លែងក្នុងមតិសំណេះសំណាល នាឱកាសនោះ លោកទេសរដ្ឋមន្ត្រី បានជម្រាបជូនពីសមិទ្ធផលសំខាន់ៗ ដែលរាជរដ្ឋាភិបាលកម្ពុជា ក្រោមការដឹកនាំ របស់គណបក្សប្រជាជនកម្ពុជា បានខិតខំប្រឹងប្រែងអភិវឌ្ឍលើគ្រប់វិស័យ ពិសេសផ្នែកហេដ្ឋារចនាសម្ព័ន្ធរូបវ័ន្ត នៅក្នុងស្រុកកោះធំ ដែលបានធ្វើឱ្យស្រុកនេះ បានកែប្រែមុខមាត់ប្រកបដោ​យមោទនភាព។

លោកបញ្ជាក់ថា “នេះបានបង្ហាញពីសមិទ្ធផលថ្មីមួយ ក្នុងចំណោមសមិទ្ធផលដ៏ទៃទៀត នៃកិច្ចខិតខំរបស់រាជរដ្ឋាភិបាល សម្រា​ប់ស្រុកកោះធំនោះគឺ “មន្ទីរពេទ្យតេជោសែនកោះធំ” ដែលជាមន្ទីរពេទ្យទំនើបថ្មីមួយ ដែលបច្ចុប្បន្នបានសម្រេចការ សាងសង់ប្រមាណ ៩៥% និងត្រៀមបើកឱ្យដំណើរការក្នុងពេលឆាប់ៗខាងមុខនេះ”។

លោកទេសរដ្ឋមន្ត្រី បានជម្រាបជូនពីវឌ្ឍនភាព នៃការអភិវឌ្ឍវិស័យហេដ្ឋានរចនាសម្ព័ន្ធធំៗ ក្នុងប្រទេសរួមមាន ផ្លូវល្បឿនលឿនភ្នំពេញ-ក្រុងព្រះសីហនុ ដែលជាគម្រោងផ្លូវល្បឿនលឿន ប្រវត្តិសាស្ត្រលើកដំបូងក្នុងប្រទេសកម្ពុជា គម្រោងផ្លូវល្បឿនលឿនភ្នំពេញ-បាវិត ដែលបានប្រារព្វពីធីបើកការដ្ឋានកាលពីព្រឹកថ្ងៃទី០៧ ខែមិថុនា ឆ្នាំ២០២៣កន្លងទៅ។

គម្រោងសិក្សាផ្លូវល្បឿនលឿនភ្នំពេញ -សៀមរាប- ប៉ោយប៉ែត ដែលក្រសួងសាធារណការ និងដឹកជញ្ជូនបានចុះហត្ថលេខាលើកិច្ចព្រងព្រៀងក្របខ័ណ្ឌ ជាមួយក្រុមហ៊ុនសាជីវកម្មស្ពាន និងថ្នល់ចិន (CRBC) កាលពីរសៀលថ្ងៃទី០៧ ខែមិថុនា ឆ្នាំ២០២៣ ព្រមទាំងបានជម្រាបជូនប្រជាពលរដ្ឋពីគម្រោងព្រែកជីក ហ្វូណនតេជោផងដែរ។

ប្រព័ន្ធហេដ្ឋារចនាសម្ព័ន្ធខ្វាត់ខ្វែងក្នុងស្រុកកោះធំ បានអនុញ្ញាតឱ្យស្រុកនេះ កាន់តែមានសក្តានុពលផ្នែកសេដ្ឋកិច្ច ដែលអំណោយផលដល់ការរស់នៅ និងការប្រកបមុខរបរចិញ្ចឹមជីវិតរបស់ប្រជាពលរដ្ឋ។ ផ្លូវសេដ្ឋកិច្ចសំខាន់ៗក្នុងស្រុកកោះធំមានដូចជា ផ្លូវជាតិលេខ២១ ផ្លូវលេខ១១០ ផ្លូវលេខ១២៩ និងផ្លូវជាតិលេខ២៣ (ចាប់ពីផ្លូវលេខ១១០ សង្កាត់ជ្រោយតាកែវ ទៅស្រុកលើកដែក ប្រវែង ១៩,៨៣ គ.ម) ដែលគ្រោងនឹងបើកការដ្ឋាននាពេលឆាប់ៗនេះ។

ក្រៅពីផ្លូវសេដ្ឋកិច្ចសំខាន់ៗ រាជរដ្ឋាភិបាលក៏បានបន្តយកចិត្តទុកដាក់ លើការអភិវឌ្ឍហេដ្ឋារចនាសម្ព័ន្ធ ដទៃទៀតយ៉ាងច្រើនរួមមាន៖ ស្ពានឆ្លងទន្លេបាសាក់ (ស្ពានមិត្តភាពកម្ពុជា-ចិន) កីឡដ្ឋានស្រុកកោះធំ និងអាងហែលទឹក ផ្លូវបេតុងតាមបណ្ដាឃុំនានាក្នុងស្រុក ស្ពាន ប្រឡាយទឹក មណ្ឌលសុខភាព វត្តអារាម ព្រមទាំងមានភ្លើងសូឡាបំភ្លឺសងខាងផ្លូវក្នុងឃុំ នៃស្រុកកោះធំផងដែរ៕