ដោយ: គង់ លាងហួរ
ភ្នំពេញ: ក្នុងរយៈពេល៤ឆ្នាំចុងក្រោយនេះ អ្វីៗជាច្រើននៅក្នុងឧស្សាហកម្មអចលនទ្រព្យបានផ្លាស់ប្តូរ ខណៈវិនិយោគិន និងអ្នកអភិវឌ្ឍន៍ កំពុងសម្លឹងមើលទៅកាន់ទីផ្សារ ដោយភាពតានតឹង ថែមទាំងពន្យឺតគម្រោង និងការវិនិយោគរបស់ពួកគេ ដោយផ្តោតជាសំខា​ន់តែនៅរាជធានីភ្នំពេញ។

លោកបណ្ឌិត Alexander Evengroen ដែលជាដៃគូ និងជានាយកអភិវឌ្ឍន៍គម្រោងនៃក្រុមហ៊ុន Strategic Realty Investment Co., Ltd បានបង្ហាញក្តីកង្វល់ ប៉ុន្តែក្នុងពេលដំណាលគ្នានេះ លោកថា យើងនៅតែមានឱកាសជាច្រើន នៅក្នុងឧស្សាហកម្មនេះ ប្រសិន​បើមានឆន្ទៈបង្វែរពីភាពធម្មតា ឬផ្តល់នូវគំនិតថ្មីៗទាំងស្រុង ឬប្លែកៗទៅកាន់ទីផ្សារ ហើយយើង​ក៏​សង្កេតឃើញ​ដែរ​ថា ការ​ស្រាវជ្រាវ​ជា​ច្រើន​ត្រូវ​បាន​ធ្វើ​ឡើង ដោយ​ផ្តោត​លើ​រាជធានី​ភ្នំពេញ។

លោក Alexander បានបញ្ជាក់ថា “ក្នុងអំឡុងវិបត្តិសេដ្ឋកិច្ចនេះ ឱកាសសក្តានុពលនៅតែមានជានិច្ច ប៉ុន្តែចាំបាច់យើងត្រូវវាយតម្លៃឡើងវិញ បង្កើតឡើងវិញ និងអភិវឌ្ឍឡើងវិញ ដើម្បីធានានូវឱកាសជោគជ័យខ្ពស់បំផុត”។

លោកបានជំរុញឱ្យអ្នកអភិវឌ្ឍន៍ និងអ្នកវិនិយោគ ក៏ដូចជាឧស្សា​ហកម្មអចលនទ្រព្យទូទៅ គួរតែចេះច្នៃប្រឌិត កែសម្រួល និងសិក្សាពីតម្រូវការទីផ្សារនៅកម្ពុជាទាំងមូល ហើយហ៊ានងាកចេញពីគម្រោងមុនៗ ដោយសារទីផ្សារកំពុងមានការផ្លាស់ប្តូរ យ៉ាងឆាប់រហ័ស។

ក្រុមហ៊ុន Strategic Realty Investment Co., Ltd កំពុងសម្លឹងមើលទៅកាន់ទីផ្សារពីគ្រប់ជ្រុងជ្រោយ ដើម្បីបង្កើនប្រសិទ្ធភាពតម្រូវការទីផ្សារ។  ពួកគេរួមបញ្ចូលគ្នា នូវឧស្សាហកម្មផ្សេងៗគ្នាដូចជា អចលនទ្រព្យ សហគ្រាសធុនតូច និងមធ្យម កសិកម្ម និងបច្ចេកវិទ្យា ដើម្បីបើកទ្វារសម្រាប់វិនិយោគិន អ្នកអភិវឌ្ឍន៍ និងសាធារណជនទូទៅសម្រាប់ឱកាសវិនិយោគដ៏ឆ្លាតវៃ និងគួរឱ្យទុកចិត្ត។

ជាក់ស្តែង Banteay Srei Eco City ដែលជាគម្រោងខ្នាតធំ ស្ថិតលើផ្ទៃដីជាង ៣០០ហិកតា កំពុងដំណើរការ ហើយគម្រោងនេះនឹងផ្តល់ជូននូវអ្វីៗគ្រប់យ៉ាងនៅក្នុងទីតាំងតែមួយ។លោក Alexander រៀបរាប់ថា គម្រោង Banteay Srei Eco City ផ្តល់ជូននូវកញ្ចប់សរុបទៅកាន់ទីផ្សារ ដូចជា វីឡា ផ្ទះលក់ទំនិញ ផ្លូវ30ម៉ែត្រ សហគ្រាសធុនតូច និងមធ្យម ធនាគារ សាលារៀន សាកលវិទ្យាល័យ ភោជនីយដ្ឋាន មជ្ឈមណ្ឌលអាពាហ៍ពិពាហ៍/សន្និបាត កីឡដ្ឋានបាល់ទាត់ កន្លែងកីឡា ផ្សារទំនើប មន្ទីពេទ្យ តំបន់កសិកម្ម  សួនអេកូ ផ្ទះប្រពៃណីខ្មែរ ផ្ទះវិស្សមកាល កន្លែងញាំអាហារ កន្លែងលេងកីឡាទឹក និងជាច្រើនទៀត។

ក្រុមហ៊ុន Strategic Realty Investment Co., Ltd កំពុងចាប់ដៃជាមួយដៃគូដែលមានទីផ្សារខ្ពស់ ដើម្បីធានាបាននូវការបោះជំហា​នទៅមុខដោយរលូន និងឆ្លាតវៃលើគម្រោងខ្នាតធំនេះ។នៅឆ្នាំ២០២៣នេះ យើងមើលឃើញកំណើន នៃការអភិវឌ្ឍន៍ប្រកបដោយនិរន្តរភាព និងមិនប៉ះពាល់ដល់បរិស្ថាន ដោយសារការព្រួយបារម្ភ អំពីបរិស្ថានកំពុងកើនឡើងជាសកល។

ឧស្សាហកម្មអចលនទ្រព្យរំពឹងថា និន្នាការនេះនឹងបង្កើនល្បឿនឆ្ពោះទៅមុខ ដោយអ្នកអភិវឌ្ឍន៍ វិនិយោគិន និងអ្នកទិញផ្ទះ កាន់តែច្រើន ផ្តល់អាទិភាពដល់ប្រភេទអចលនទ្រព្យ ដែលសន្សំសំចៃថាមពល និងមិនប៉ះពាល់ដល់បរិស្ថាន ដូចដែលក្រុមហ៊ុន Strategic Realty Investment Co., Ltd កំពុងធ្វើជាមួយគម្រោង Banteay Srei Eco City។

លោក Alexander Evengroen បានមានប្រសាសន៍ថា លោកកំពុងទន្ទឹងរង់ចាំស្វាគមន៍អ្នកវិនិយោគ អ្នកអភិវឌ្ឍន៍ ក៏ដូចជាសាធា​រណជនទូទៅ មកកាន់គម្រោង Banteay Srei Eco City។ លោក​បន្ថែមថា ទីផ្សារ​មាន​ការ​ប្រែប្រួល​ឥត​ឈប់ឈរ ហើយមិនត្រឹមតែការឡើងថ្លៃប៉ុណ្ណោះទេ ប៉ុន្តែក៏មានការធ្លាក់ចុះផងដែរ ដែលយើងត្រូវតែពិនិត្យមើល ជាមួយនឹងការសិក្សាលទ្ធភាព ប្រកប​ដោយគុណភាពខ្ពស់ និងការស៊ើបអង្កេតលើទីផ្សារ៕

ដោយៈ តែម សុខុម

ប្រទេសចិន: ប្រទេសចិន បានក្លាយជាក្បាលម៉ាស៊ីន នៃកំណើនសេដ្ឋកិច្ចពិភពលោកជាយូរមកហើយ។

ទោះជាយ៉ាងណា ក្នុងពេលប៉ុន្មានសប្តាហ៍ចុងក្រោយនេះ ការដាំក្បាលចុះនៃសេដ្ឋកិច្ច របស់មហាអំណាចសេដ្ឋកិច្ចធំបំផុតទី២ របស់ពិភពលោកមួយនេះ ជាសញ្ញាព្រមានដល់ក្រុមមេដឹកនាំ ទូទាំងពិភពលោក ហើយបណ្ដាវិនិយោគិន ក៏លែងពឹងផ្អែកលើសេដ្ឋកិច្ចចិន។

ជាការពិតណាស់ នេះគឺជាលើកដំបូងហើយ ក្នុងរយៈពេលជាច្រើនទសវត្សរ៍មកនេះ ដែលសេដ្ឋកិច្ចរបស់មហាយក្សចិន ជួបវិបត្តិបែបនេះ។ នេះបើយោងតាមសារព័ត៌មាន CNN ចុះផ្សាយកាលពីថ្ងៃពុធ ទី២៣ ខែសីហា។

សន្ទស្សន៍ផ្សារហ៊ុនក្រុងហុងកុង Hang Seng បានធ្លាក់ចុះកាលពីថ្ងៃសុក្រ សប្ដាហ៍មុន ដោយបានធ្លាក់ចុះជាង២០% ពីកម្រិតខ្ពស់បំផុតរបស់ខ្លួនក្នុងខែមករា។ កាលពីសប្តាហ៍មុន ប្រាក់យ័ន របស់ចិន បានធ្លាក់ថ្លៃដល់កម្រិតទាបបំផុត មិនធ្លាប់មានក្នុងរយៈពេល១៦ឆ្នាំមកនេះ ដោយជំរុញឱ្យធនាគារកណ្តាលចិន ចាត់វិធានការធំបំផុតរបស់ខ្លួន នៅក្នុងការការពារប្រាក់យ័ន តាមរយៈការកំណត់អត្រាខ្ពស់ជាងតម្លៃទីផ្សារធម្មតាឆ្ងាយទល់នឹងប្រាក់ដុល្លារ។

បញ្ហាគឺស្ថិតនៅត្រង់ថា បន្ទាប់ពីសកម្មភាពសេដ្ឋកិច្ចចាប់ផ្ដើមកម្រើកឡើងវិញយ៉ាងឆាប់រហ័ស នៅដើមឆ្នាំ២០២៣ ក្រោយប្រទេសចិន បញ្ចប់ការបិទខ្ទប់កូវីដ-១៩ កំណើនកំពុងបាត់បង់សន្ទុះ។

តម្លៃទំនិញប្រើប្រាស់កំពុងធ្លាក់ចុះ វិបត្តិអចលនទ្រព្យកាន់តែធ្ងន់ធ្ងរទៅៗ ហើយការនាំចេញក៏កំពុងដាំក្បាលចុះ។ ភាពគ្មានការងារធ្វើក្នុងចំណោមយុវជនចិន គឺមានចំនួនច្រើនខ្លាំងរហូតដល់រដ្ឋាភិបាលចិន ឈប់បញ្ចេញទិន្នន័យពិតជាក់ស្ដែង។

ស្ថានភាពកាន់តែធ្ងន់ធ្ងរទៅៗ នៅពេលក្រុមហ៊ុនសាងសង់ផ្ទះមួយ និងក្រុមហ៊ុនវិនិយោគដ៏លេចធ្លោមួយទៀត បានខកខានទូទាត់ជូនវិនិយោគិនរបស់ពួកគេ ក្នុងរយៈពេលប៉ុន្មានសប្តាហ៍ចុងក្រោយនេះ ដោយធ្វើឱ្យមានការភ័យខ្លាចជាថ្មីថា ការធ្លាក់ចុះកាន់ដុនដាបទៅៗ នៃទីផ្សារលំនៅឋានដែលកំពុងបន្តកើតមាន បានបង្កហានិភ័យខ្ពស់ដល់ស្ថិរភាពហិរញ្ញវត្ថុ។

កង្វះវិធានការដោះស្រាយ ដើម្បីជំរុញតម្រូវការក្នុងស្រុក និងការភ័យខ្លាច ចំពោះការរាលដាលនៃវិបត្តិ បានបណ្ដាឱ្យធ្លាក់ចុះនូវកំណើនជុំថ្មី ដោយធនាគារវិនិយោគធំៗ មួយចំនួនបានបន្ទាបការព្យាកររបស់ខ្លួន អំពីកំណើនសេដ្ឋកិច្ចរបស់ប្រទេសចិន មកនៅខាងក្រោម៥%។

*តើកត្តាចម្បងអ្វីខ្លះដែលធ្វើឱ្យសេដ្ឋកិច្ចរបស់មហាយក្សចិន ដាំក្បាលចុះខ្លាំងបែបនេះ?

យោងតាមសារព័ត៌មាន CNN ចុះផ្សាយកាលពីថ្ងៃពុធ ទី២៣ ខែសីហា ឱ្យដឹងថា មានកត្តាចម្បងចំនួន៣ ដែលបានរុញច្រានឱ្យសេដ្ឋកិច្ចរបស់មហាយក្សចិន ធ្លាក់ចូលក្នុងវិបត្តិ ហើយកត្តាទាំងនោះរួមមានដូខាងក្រោម៖

ទី១ វិបត្តិអចលនទ្រព្យ
សេដ្ឋកិច្ចរបស់ប្រទេសចិន បានធ្លាក់ក្នុងស្ថានភាពលំបាកចាប់តាំងពីខែមេសា នៅពេលកំណើនខ្លាំងកាលពីដើមឆ្នាំ បានបាត់បង់សន្ទុះ។ ប៉ុន្តែក្តីកង្វល់នានាបានផ្ទុះ កាន់តែខ្លាំងឡើងក្នុងខែនេះ បន្ទាប់ពីការខកខានទូទាត់បំណុល ពីសំណាក់ក្រុមហ៊ុន Country Garden ដែលធ្លាប់ជាក្រុមហ៊ុនអភិវឌ្ឍន៍ ដ៏ធំបំផុតរបស់ប្រទេសចិន បើគិតទំហំលក់អចលនទ្រព្យ និងក្រុមហ៊ុនZhongrong Trust ដែលជាក្រុមហ៊ុនបរធនបាល (Trust Company) ដ៏កំពូលរបស់ប្រទេសចិន។

សេចក្ដីរាយការណ៍ដែលលើកឡើងថា ក្រុមហ៊ុន Country Garden បានខកខានទូទាត់ការប្រាក់ លើមូលបត្របំណុលជាដុល្លារអាមេរិកចំនួនពីររបស់ខ្លួន បានធ្វើឱ្យវិនិយោគិនភ្ញាក់ផ្អើល និងនឹកឃើញដល់វិបត្តិក្រុមហ៊ុនEvergrande ដែលបានខកខានទូទាត់បំណុលក្នុងឆ្នាំ២០២១ ដែលជាការចាប់ផ្ដើម នៃវិបត្តិអចលនទ្រព្យក្នុងប្រទេសចិន។

ខណៈ China Evergrande ដែលជាក្រុមហ៊ុនអភិវឌ្ឍន៍អចលនទ្រព្យធំបំផុតទី២ របស់ចិន និងជាក្រុមហ៊ុនជំពាក់បំណុលច្រើនបំផុតរបស់ពិភពលោក ជាមួយនឹងបំណុល៣៥០ពាន់លានដុល្លារអាមេរិក កំពុងស្ថិតក្រោមដំណើរការរៀបចំ បំណុលឡើងវិញនៅឡើយ បញ្ហានៅក្រុមហ៊ុនCountry Garden បានបង្កការព្រួយបារម្ភថ្មីៗចំពោះសេដ្ឋកិច្ចចិន។

រដ្ឋាភិបាលក្រុងប៉េកាំង បានដាក់ចេញនូវវិធានការគាំទ្រជាច្រើនដើម្បីស្តារទីផ្សារអចលនទ្រព្យឡើងវិញ។ ប៉ុន្តែពេលនេះ សូម្បីក្រុមហ៊ុនធំៗ ក៏កំពុងឈានទៅរកការខកខានទូទាត់ បំណុលជាបណ្ដើរៗដែរ ហើយនេះឆ្លុះបញ្ចាំងពីបញ្ហាប្រឈមនានា ដែលរដ្ឋាភិបាលក្រុងប៉េកាំង ប្រឈមមុខដើម្បីទប់ទល់នឹងវិបត្តិនេះ។

ក្នុងពេលជាមួយគ្នានេះ ការខកខានទូទាត់បំណុលពីសំណាក់បណ្ដាក្រុមហ៊ុនអភិវឌ្ឍន៍អចលនទ្រព្យ ហាក់បានរីករាលដាលដល់ឧស្សាហកម្មទំនុកបរធនបាលវិនិយោគ (Investment Trust) របស់ប្រទេសចិន ដែលមានទំហំរហូតដល់ទៅ២,៩ទ្រីលានដុល្លារអាមេរិក។

ក្រុមហ៊ុន Zhongrong Trust ដែលគ្រប់គ្រងមូលនិធិចំនួន៨៧ពាន់លានដុល្លារអាមេរិក សម្រាប់អតិថិជនជាសាជីវកម្ម និងបុគ្គលអ្នកមានស្តុកស្ដម្ភ បានខកខានទូទាត់ថ្លៃ ផលិតផលវិនិយោគទៅឱ្យក្រុមហ៊ុនយ៉ាងតិចចំនួន៤ ដែលមានតម្លៃប្រមាណ១៩លានដុល្លារអាមេរិក។ នេះបើយោងតាមសេចក្តីថ្លែងការណ៍ របស់ក្រុមហ៊ុនកាលពីដើមខែនេះ។

ទី២ បំណុលរបស់រដ្ឋបាលមូលដ្ឋាន

កង្វល់ដ៏ធំមួយទៀតគឺ បំណុលរបស់រដ្ឋបាលមូលដ្ឋាន ដែលបានកើនឡើងយ៉ាងខ្លាំង ដោយសារតែការធ្លាក់ចុះយ៉ាងខ្លាំង នូវប្រាក់ចំណូលពីការលក់ដីធ្លី ដោយសារអចលនទ្រព្យដាំក្បាលចុះ ក៏ដូចជាផលប៉ះពាល់យូរអង្វែងនៃការបិទខ្ទប់កូវីដ-១៩។

មូលនិធិរូបិយវត្ថុអន្តរជាតិ (IMF) និយាយថា បំណុលរបស់រដ្ឋបាលមូលដ្ឋាន (LGFV) សរុបនៃប្រទេសចិន បានហក់ឡើងខ្ពស់រហូតដល់៩ទ្រីលានដុល្លារអាមេរិកក្នុងឆ្នាំនេះ។ នេះបើយោងតាមសារព័ត៌មាន South China Morning Post ចុះផ្សាយកាលពីថ្ងៃព្រហស្បតិ៍ ទី២៤ ខែសីហា។

ទី៣ ការធ្លាក់ចុះចំនួនប្រជាជន

លើសពីនេះ ប្រទេសចិន ប្រឈមមុខនឹងបញ្ហាប្រឈមរយៈពេលវែងមួយចំនួនទៀត ដូចជា វិបត្តិចំនួនប្រជាជន និងទំនាក់ទំនងកាន់តែតានតឹង ជាមួយដៃគូពាណិជ្ជកម្មសំខាន់ៗ ដូចជា សហរដ្ឋអាមេរិក និងអឺរ៉ុប ជាដើម។

អត្រានៃការមានកូនសរុបក្នុងប្រទេសចិន ជាចំនួនមធ្យមនៃកូនដែលស្ត្រីម្នាក់ មាននៅក្នុងមួយជីវិតរបស់នាង បានធ្លាក់ចុះដល់កម្រិតទាបបំផុតគឺ១,០៩កំណើតទារកកាលពីឆ្នាំមុន បើធៀបនឹង១,៣០កំណើតទារកកាលពីពីរឆ្នាំមុន។ នេះបើយោងតាមគេហទំព័រដែលគ្រប់គ្រងដោយរដ្ឋចិន Jiemian.com បានចុះផ្សាយកាលពីពេលថ្មីៗនេះ។

ទិន្នន័យនេះមានន័យថា អត្រានៃការមានកូនរបស់ប្រទេសចិន ពេលនេះ គឺទាបជាងអត្រាមានកូននៅប្រទេសជប៉ុនទៅទៀត ខណៈជប៉ុន ល្បីល្បាញជាយូរមកហើយថា ជាសង្គមដែលសម្បូរដោយមនុ​ស្សចាស់។

កាលពីដើមឆ្នាំនេះ ប្រទេសចិន បានចេញផ្សាយទិន្នន័យដែលបង្ហាញថា ចំនួនប្រជាជនរបស់ខ្លួន បានចាប់ផ្តើមធ្លាក់ចុះកាលពីឆ្នាំមុនជាលើកដំបូង ក្នុងរយៈពេល៦ទសវត្សរ៍មកនេះ៕ CNN/South China Morning Post៕

ដោយ: គង់ លាងហួរ

អន្តរជាតិ: ក្រុមហ៊ុន Narai Hospitality Group គ្រោងនឹងបើកដំណើរការសណ្ឋាគារក្រោមយីហោ Lub d នៅក្នុងប្រទេសជប៉ុន និងប្រទេសថៃ ដើម្បីផ្តល់ជូននូវបទពិសោធន៍ នៃការរស់នៅជាមួយនឹងការរចនាទាន់សម័យ និងតំបន់ទីតាំងសំខាន់ៗ។

ម៉ាកយីហោសណ្ឋាគារ Lub d បានប្រកាសពីគម្រោងគ្រោងបើកដំណើរការសណ្ឋាគារថ្មី នៅក្នុងគោលដៅសំខាន់ៗចំនួន៣ ដូចជា នៅទីក្រុងអូសាកាប្រទេសជប៉ុន កោះតាវ និងទីក្រុង Chinatown Samyot ក្នុងប្រទេសថៃ ខណៈសណ្ឋាគារនេះកំពុងបន្តពង្រីកខ្លួននៅក្នុងតំបន់អាស៊ី។

ក្រុមហ៊ុន Narai Hospitality Group ដែលជាអ្នកអភិវឌ្ឍ និងប្រតិបត្តិករអចលនទ្រព្យ Lub d និង Marasca Hotels & Resorts គ្រោង នឹងបើកដំណើរការសណ្ឋាគារចំនួន៣បន្ថែមទៀត ក្រោមយីហោ “Lub d” ដែលនឹងដំណើរការនៅឆ្នាំ២០២៣នេះ និងឆ្នាំ២០២៤ខាងមុខ។

ឈ្មោះសណ្ឋាគារថ្មីចំនួន៣នោះ រួមមានដូចជា សណ្ឋាគារ Lub d Osaka Honmachi សណ្ឋាគារ Lub d Koh Tao និងសណ្ឋាគារ Lub d Chinatown Samyot ។

សណ្ឋាគារទាំង៣ ​ត្រូវបានបង្កើតឡើង ដើម្បីផ្តល់នូវបទពិសោ​ធន៍ផ្នែកបដិសណ្ឋារកិច្ចក្រោមយីហោ Lub d  ដើម្បីឆ្លើយតបទៅនឹងការរស់នៅរបស់អ្នកធ្វើដំណើរវ័យក្មេង តាមរយៈការផ្តល់ជូននូវការរចនាបែបទំនើប។

លោក Nathee Nithivasin នាយកប្រតិបត្តិក្រុមហ៊ុន Narai Hospitality Group បានមានប្រសាសន៍ថា “ផែនការបើកដំណើរការសណ្ឋាគារ Lub d ថ្មីចំនួន៣នេះ គឺជាផ្នែកមួយនៃផែនការពង្រីកអាជីវកម្មជាយុទ្ធសាស្រ្តរបស់ក្រុមហ៊ុន Narai Hospitality Group” ។

លោកបន្តថា សណ្ឋាគារថ្មីទាំងនេះ នឹងពង្រឹងភាពរឹងមាំនៃកិច្ចខិតខំប្រឹងប្រែងរបស់ក្រុមហ៊ុន ក្នុងការពង្រីកវត្តមានរបស់ខ្លួនក្នុងឧស្សាហកម្ម បដិសណ្ឋារកិច្ចនៅតំបន់អាស៊ី ដោយផ្អែកលើបទពិសោធន៍របស់យើង ក្នុងការដំណើរការអាជីវកម្មសណ្ឋាគារ និងបម្រើសេវាកម្មនៅក្នុងប្រទេសថៃ អស់រយៈពេលជាងកន្លះសតវត្សរ៍។

លោក​បាន​បន្ថែមថា​ “បច្ចុប្បន្ន​ យើង​បានគ្រប់គ្រង​សណ្ឋាគារចំនួន​៥ទីតាំង ក្រោម​យីហោ Lub d ដែល​មាន​ទីតាំង​ទាំង​ក្នុង​ និង​ក្រៅប្រទេស​។​ ជាក់ស្តែង យើងមានសណ្ឋាគារចំនួន៣ នៅ​ក្នុងប្រទេស​ថៃ សណ្ឋាគារមួយ​នៅ​ខេត្តសៀមរាប​ ប្រទេស​កម្ពុជា និង​សណ្ឋាគារមួយទៀត​នៅ​ទីក្រុង Makati  ប្រទេស​ហ្វីលីពីន​”៕

ដោយៈ តែម សុខុម

វ៉ាស៊ីនតោន: អត្រាការប្រាក់កម្ចីទិញផ្ទះ នៅសហរដ្ឋអាមេរិក បានបន្តហក់ឡើងខ្ពស់ ក្នុងសប្តាហ៍នេះ ដោយបានកើនឡើងដល់កម្រិតខ្ពស់បំផុតមិនធ្លាប់មាន ចាប់តាំងពីឆ្នាំ២០០១ ពោលគឺ២២ឆ្នាំមុន។

យោងតាមទិន្នន័យ ពីក្រុមហ៊ុនផ្ដល់កម្ចីទិញផ្ទះ Freddie Mac ចេញផ្សាយកាលពីថ្ងៃព្រហស្បតិ៍ ទី២៤ ខែសីហា បង្ហាញថា កម្ចីទិញផ្ទះ ដែលមានអត្រាការប្រាក់ថេររយៈពេល៣០ឆ្នាំ គឺគិតការប្រាក់ជាមធ្យម៧,២៣% ក្នុងសប្ដាហ៍ដែលបញ្ចប់ត្រឹមថ្ងៃទី២៤ សីហា ដោយកើនឡើងពី៧,០៩%ក្នុងសប្ដាហ៍មុននេះ។ កាលពីមួយឆ្នាំមុន អត្រាការប្រាក់ថេររយៈពេល៣០ឆ្នាំ គឺ៥,៥៥%។

លោក Sam Khater ប្រធានអ្នកជំនាញសេដ្ឋកិច្ចនៅក្រុមហ៊ុន Freddie Mac លើកឡើងថា សូចនាករនៃកម្លាំងសេដ្ឋកិច្ចបច្ចុប្បន្នបង្ហាញថា អត្រាការប្រាក់កម្ចីទិញផ្ទះ ទំនងជានឹងហក់ឡើងកាន់តែខ្ពស់ក្នុងពេលដ៏ខ្លីខាងមុខនេះ។

អត្រាការប្រាក់បានហក់ឡើង លើសពី៦,៥%ចាប់តាំងពីចុងខែឧសភា ហើយបានកើនឡើងកាន់តែខ្ពស់ ចាប់តាំងពីពាក់កណ្តាលខែកក្កដា។ មុនពេលអត្រាការប្រាក់កើនឡើង កាលពីសប្តាហ៍មុន អត្រាការប្រាក់គឺជាង៧% ក្នុងខែវិច្ឆិកា ឆ្នាំមុន ជាពេលដែលវាហក់ឡើងដល់៧,០៨%។

អត្រាការប្រាក់ជាមធ្យម សម្រាប់កម្ចីទិញផ្ទះរយៈពេល៣០ឆ្នាំក្នុងសប្តាហ៍នេះ គឺខ្ពស់បំផុតមិនធ្លាប់មាន ចាប់តាំងពីខែមិថុនា ឆ្នាំ២០០១ ជាពេលដែលវាបានហក់ឡើងដល់៧,២៤%។

អត្រាការប្រាក់កម្ចីទិញផ្ទះបានកើនឡើងខ្លាំង អំឡុងយុទ្ធនាការទប់អតិផរណាជាប្រវត្តិសាស្ត្រ របស់ធនាគារកណ្ដាលអាមេរិក (Federal Reserve) ដោយធ្វើឱ្យលទ្ធភាពទិញផ្ទះ ធ្លាក់ចុះដល់កម្រិ​តទាបបំផុតមិនធ្លាប់មាន ក្នុងរយៈពេលជាច្រើនទសវត្សរ៍មកនេះ។

ការទិញផ្ទះមានតម្លៃថ្លៃជាងមុន ដោយសារតែការចំណាយបន្ថែ​មលើការផ្តល់ហិរញ្ញប្បទានកម្ចីទិញផ្ទះ និងតម្លៃផ្ទះកើនឡើង៕ CNN៕

ដោយ: គង់ លាងហួរ
អន្តរជាតិ: បណ្តាក្រុមហ៊ុនសណ្ឋាគារថៃនឹងបន្តផែនការពង្រីកខ្លួនឆ្ពោះទៅមុខ ខណៈពួកគេមិនមានការភ្ញាក់ផ្អើល ឬព្រួយបារម្ភចំពោះការដាំក្បាលចុះក្នុងវិស័យអចលនទ្រព្យចិននោះទេ។ នេះបើយោងតាមក្រុមហ៊ុនបដិសណ្ឋារកិច្ច Dusit International ។

លោកស្រី Suphajee Suthumpun នាយកប្រតិបត្តិក្រុមហ៊ុន Dusit group បានលើកឡើងថា ក្រុមហ៊ុននៅតែផ្តោតលើការអភិវឌ្ឍសណ្ឋាគារជាជាងអចលនទ្រព្យ ពោលគឺមិនដូចក្រុមហ៊ុន Evergrande និង Country Garden ដែលបច្ចុប្បន្នកំពុងប្រឈមមុខនឹងវិបត្តិហិរញ្ញវត្ថុនោះទេ។

លោកស្រី Suphajee បានមានប្រសាសន៍ថា វិស័យអចលនទ្រព្យមិនអាចប៉ះពាល់ដល់ការវិនិយោគរបស់ក្រុមហ៊ុន Dusit នៅក្នុងសណ្ឋាគារថ្មីចំនួន២នៅក្នុងប្រទេសចិនក្នុងឆ្នាំនេះនោះទេ។

ទោះជាយ៉ាងណាក្តី ក្រុមហ៊ុននឹងបន្តតាមដានស្ថានភាពនេះ ទាក់ទងនឹងផលប៉ះពាល់ដែលអាចកើតមានទៅលើការចំណាយលើវិស័យទេសចរណ៍ជាទូទៅ ដោយសារការដាំក្បាលចុះនៃវិស័យអចលនទ្រព្យនឹងជះផលវិបាកលើការប្រើប្រាស់នៅក្នុងប្រទេសចិន។

នាពេលបច្ចុប្បន្ននេះ ក្រុមហ៊ុននៅតែមានអត្រាស្នាក់នៅ(occupancy rate) ដែលមានសុខភាពល្អក្នុងរង្វង់ប្រហែល៦០% ទៅ៧០% នៅប្រទេសចិន ពោលគឺប្រហាក់ប្រហែលគ្នាទៅនឹងកម្រិតមុនជំងឺរាតត្បាត ដោយសារមានការយកចិត្តទុកដាក់របស់ទីក្រុងប៉េកាំងលើវិស័យទេសចរណ៍ក្នុងស្រុក។រួមជាមួយនឹងសណ្ឋាគារចំនួនពីរ ដែលក្រុមហ៊ុន Dusit បានបោះទុនវិនិយោគក្នុងឆ្នាំនេះ ក្រុមហ៊ុននឹងមានសណ្ឋាគារចំនួន១៣ទីតាំងនៅក្នុងប្រទេសចិនក្នុងឆ្នាំ២០២៣នេះ។

ខណៈលោក Srettha Thavisin មកពីគណបក្សភឿថៃ ត្រូវបានអនុម័តឱ្យក្លាយជានាយករដ្ឋមន្ត្រីថ្មីរបស់ប្រទេសថៃក្នុងសប្តាហ៍នេះ លោកស្រី Suphajee បានបញ្ជាក់ថា ការបង្កើនប្រាក់ឈ្នួលអប្បបរមាប្រចាំថ្ងៃដល់៦០០បាតគឺជាគោលនយោបាយដ៏ល្អមួយ។ទោះជាយ៉ាងណាក្តី សណ្ឋាគារសង្ឃឹមថារដ្ឋាភិបាលថ្មីនឹងដំឡើងប្រាក់ឈ្នួលអប្បបរមាប្រចាំថ្ងៃជាបណ្តើរៗ ឬផ្តល់ការគាំទ្រដល់ប្រតិបត្តិករតាមរយៈទម្រង់នៃការលើកទឹកចិត្តផ្សេងទៀត៕

តែម សុខុម

ហូជីមិញ: គម្រោងស្ថានីយអ្នកដំណើរថ្មីនៅអាកាសយានដ្ឋានតាន់សឺនញើក (Tan Son Nhat) ក្នុងក្រុងហូជីមិញ និងអាកាសយានដ្ឋានឡុងថាញ់ (Long Thanh) ក្នុងខេត្តដុងណៃ (Dong Nai) ជាមួយការចំណាយសរុបជាង១,៨៩ពាន់លានដុល្លារអាមេរិក នឹងចាប់ផ្តើមការសាងសង់នៅថ្ងៃទី៣១ ខែសីហា។

ក្រុមហ៊ុនសាជីវកម្មអាកាសយានដ្ឋានវៀតណាម (Airports Corporation of Vietnam) បាននិយាយកាលពីថ្ងៃពុធ ទី២៣ ខែសីហា ថា ស្ថានីយអ្នកដំណើរកម្ពស់៥នៃអាកាសយានដ្ឋាន Long Thanh គ្រោងចំណាយ១,៤៦ពាន់លានដុល្លារអាមេរិក និងលាតសន្ធឹងលើផ្ទៃដី១៥០ហិកតា។

តាមការរំពឹងទុក ស្ថានីយអាកាសយានដ្ឋានអ្នកដំណើរនៃអាកាសយានដ្ឋាន Long Thanh នឹងបញ្ចប់ការសាងសង់ជាស្ថាពរ និងបើកដំណើរការនៅឆ្នាំ២០២៦។ ស្ថានីយនេះត្រូវបានចរនាឡើងដោយមានរាងផ្កាឈូក លម្អដោយទឹកធ្លាក់សិប្បនិម្មិត និងសួនច្បារ។

ការពង្រីកាអាកាសយានដ្ឋាន Long Thanh នេះគឺដើម្បីបង្កើនសមត្ថភាពដឹកជញ្ជូនអ្នកដំណើរឱ្យបានចំនួន១០០លាននាក់ និងទំនិញចំនួន៥លានតោនក្នុងមួយឆ្នាំៗ ដោយវ៉ាឈ្នះអាកាសយានដ្ឋាន Tan Son Nhat ក្លាយជាអាកាសយានដ្ឋានធំបំផុតរបស់ប្រទេសវៀតណាម។

ទន្ទឹមនេះ ស្ថានីយអ្នកដំណើរនៃអាកាសយានដ្ឋាន Tan Son Nhat នឹងដំណើរការសាងសង់នៅថ្ងៃសៅរ៍ ទី២៦ ខែសីហា ចុងសប្ដាហ៍នេះ។ គម្រោងស្ថានីយនេះគ្រោងចំណាយអស់៤៥៨លានដុល្លារអាមេរិក ដោយការសាងសង់នឹងប្រើពេលជាង២០ខែ មុននឹងឈានដល់ការដាក់ឱ្យដំណើរការនៅក្នុងត្រីមាសទី២ ឆ្នាំ២០២៥៕ VN Express៕

យោងតាមសេចក្តីប្រកាសរបស់ក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី២៥ខែសីហាឆ្នាំ២០២៣

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនដូចខាងក្រោម៖
១-“CONCH KT CEMENT (PHNOM PENH) COMPANY LIMITED” គម្រោងបង្កើតរោងចក្រផលិតស៊ីម៉ង់តិ៍ ដែលមានទីតាំងវិនិយោគស្ថិតនៅភូមិមនោរម្យ ឃុំហោមសំណង់ ស្រុកឱរ៉ាល់ ខេត្តកំពង់ស្ពឺ ក្នុងទុនវិនិយោគប្រមាណ ២៥៨លានដុល្លារអាម៉េរិក និងអាចបង្កើតការងារបានចំនួន ៤៦៨កន្លែង។

ដោយៈ ម៉ាលីនណា

        អន្តរជាតិៈ វាជាដំណឹងដ៏គួរឲ្យក្រៀមក្រំមួយ បន្ទាប់ពីធនាគារអភិវឌ្ឍន៍អាស៊ីបានបញ្ចេញរបាយការណ៍មួយ ដោយបង្ហាញថា មនុ​ស្សជិត៧០លាននាក់ បានធ្លាក់ខ្លួនក្នុងភាពក្រីក្រខ្លាំង ដោយសារជំងឺរាតត្បាតកូវីដ១៩ និងការកើនឡើងថ្លៃរស់នៅ។

វិបត្តិនេះ បានកើតមានឡើង នៅក្នុងបណ្តាប្រទេសអាស៊ីកំពុងអភិវឌ្ឍន៍កាលពីឆ្នាំមុន ដោយធ្វើឱ្យប៉ះពាល់ ដល់កិច្ចខិតខំប្រឹងប្រែងដើម្បីលុបបំបាត់ភាពក្រីក្រ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃព្រហស្បតិ៍​ ទី២៤ ខែសីហា ឆ្នាំ២០២៣។

ធនាគារអភិវឌ្ឍន៍អាស៊ី (ADB) បាននិយាយនៅក្នុងរបាយការ​​ថ្មីមួយ ដែលចេញផ្សាយនៅថ្ងៃព្រហស្បតិ៍នេះថា ប្រជាជនប្រមាណ ១៥៥.២លាននាក់ នៅក្នុងប្រទេសអាស៊ីកំពុងអភិវឌ្ឍន៍ ឬស្មើនឹង ៣.៩ ភាគរយ នៃចំនួនប្រជាជនសរុបក្នុងតំបន់ បានរស់នៅក្នុងភាពក្រីក្រខ្លាំងកាលពីឆ្នាំ២០២២ ដោយបានកើនឡើងចំនួន៦៧.៨លាននាក់។

ប្រទេសអាស៊ីកំពុងអភិវឌ្ឍន៍មានចំនួន៤៦ ប្រទេសនៅក្នុងតំបន់អាស៊ីប៉ាស៊ីហ្វិក ដោយមិនរាប់បញ្ចូលប្រទេសជប៉ុន អូស្ត្រាលី និងនូវែលសេឡង់ទេ។

លោក Albert Parker ប្រធានសេដ្ឋវិទូរបស់ ADB បាននិយាយថា តំបន់អាស៊ីប៉ាស៊ីហ្វិក កំពុងងើបឡើងវិញពីជំងឺរាតត្បាតកូវីដ-១៩ ប៉ុន្តែការកើនឡើងថ្លៃ រស់នៅធ្វើឱ្យខូចដល់វឌ្ឍនភាព ក្នុងការលុបបំបាត់ភាពក្រីក្រ។

ភាពក្រីក្រខ្លាំងត្រូវបានកំណត់ថា ជាការរស់នៅដែលមានប្រាក់ចំណូលតិចជាង២.១៥ដុល្លារអាមេរិកក្នុងមួយថ្ងៃ ដោយផ្អែកលើទិន្នន័យឆ្នាំ២០១៧។

ការកើនឡើងថ្លៃរស់នៅ បានប៉ះពាល់ដល់មនុស្សគ្រប់រូប ប៉ុន្តែអ្នកក្ររងគ្រោះខ្លាំងជាងគេ ដោយសារពួកគេត្រូវចំណាយលើអាហារ និងប្រេងឥន្ធនៈកាន់តែច្រើន ដែលធ្វើឱ្យវាកាន់តែពិបាក សម្រាប់ពួកគេ ក្នុងការសន្សំ និងចំណាយសម្រាប់សម្ភារៈសំខាន់ៗ ដូចជា ការថែរទាំសុខភាព និងការអប់រំជាដើម៕