ដោយ: គង់ លាងហួរ
ភ្នំពេញ: លោក បណ្ឌិត សឿង ម៉ូរ៉ារិទ្ធ នាយកប្រតិបត្តិនៃធនាគារ Chief (Cambodia) Commercial Bank Plc និងលោកបណ្ឌិត សិត ខន សាកលវិទ្យាធិការនៃសាកលវិទ្យាល័យជាតិជាស៊ីមកំចាយមារ (NUCK) បានប្រកាសពីភាពជាដៃគូយុទ្ធសាស្ត្រ តាមរយៈអនុស្សរណៈនៃការយោគយល់គ្នា (MoU) ដែលបានចុះហត្ថលេខាកាលពីថ្ងៃទី២៥ ខែកក្កដា ឆ្នាំ២០២៣។

ចំណុចដ៏សំខាន់នៃការបង្កើតភាពជាដៃគូនេះគឺ “Chief Easy” ដែលជាកម្មវិធីប្រាក់កម្ចីខ្នាតតូចបែបឌីជីថលប្រកបដោយភាពច្នៃប្រឌិតដែលគ្រប់គ្រង និងដំណើរការដោយធនាគារ Chief Bank។ កម្មវិធីនេះជំរុញឱ្យមានរលកនៃការទទួលយកឌីជីថលយ៉ាងឆាប់រហ័សនៅក្នុងឧស្សាហកម្មធនាគារកម្ពុជា ដែលអនុញ្ញាតឱ្យអតិថិជនអាចស្នើសុំប្រាក់កម្ចីបានយ៉ាងងាយស្រួល។លក្ខណៈពិសេសតែមួយគត់របស់ផ្លាតហ្វមនេះគឺការសន្យារបស់ខ្លួនលើការឆ្លើយតបរហ័សជាមួយនឹងមតិកែលម្អឬFeedback ដែលត្រូវបានផ្តល់ឱ្យក្នុងរយៈពេល២៤ម៉ោងនៅថ្ងៃធ្វើការ។ ជួយក្នុងការបង់ថ្លៃសាលា និងបញ្ហាប្រឈមផ្នែកហិរញ្ញវត្ថុទូទៅ

ជាផ្នែកមួយនៃភាពជាដៃគូដែលបានបង្កើតឡើងថ្មីនេះ សិស្សសាកលវិទ្យាល័យជាតិជាសុីមកំចាយមារ (NUCK) និងឪពុកម្តាយ ឬអាណាព្យាបាលរបស់ពួកគេ អាចទទួលបានអត្ថប្រយោជន៍យ៉ាងច្រើនពីការផ្តល់ជូនពិសេស នៅពេលដាក់ពាក្យស្នើសុំកម្ចីខ្នាតតូចតាមរយៈកម្មវិធី Chief Easy ។ដែនកំណត់ប្រាក់កម្ចីត្រូវបានដំឡើងរហូតដល់៥.០០០ដុល្លារ ដែលជាលក្ខណៈពិសេសមួយ បង្កើតឡើងដើម្បីជួយដល់ការបង់ប្រាក់ថ្លៃសាលា និងបញ្ហាប្រឈមផ្នែកហិរញ្ញវត្ថុទូទៅដែលសិស្សជួបប្រទះ។ គំនិតផ្តួចផ្តើមនេះបង្ហាញពីគោលដៅរួមគ្នារបស់ធនាគារ Chief Bank និងសាកលវិទ្យាល័យជាតិជាសុីមកំចាយមារ (NUCK) ដើម្បីគាំទ្រដល់សិស្សនៅក្នុងដំណើរសិក្សារបស់ពួកគេ។យោងតាម MoU កិច្ចសហប្រតិបត្តិការនេះគ្រាន់តែជាការចាប់ផ្តើមនៃសម្ព័ន្ធភាពជាយុទ្ធសាស្ត្រដែលកំពុងបន្ត ក្នុងគោលបំណងពង្រីកលទ្ធភាពទទួលបានសេវាហិរញ្ញវត្ថុ។

លោកបណ្ឌិត សឿង ម៉ូរ៉ារិទ្ធ បានរៀបរាប់លម្អិតអំពីភាពងាយស្រួលនៃកម្មវិធីកម្ចីខ្នាតតូច Chief Easy ដោយលោកសង្កត់ធ្ងន់ថា វាអាចអនុញ្ញាតឱ្យអតិថិជនវាយតម្លៃសិទ្ធិទទួលបានប្រាក់កម្ចីខ្នាតតូចរបស់ពួកគេតាមរយៈប្រព័ន្ធធនាគារឌីជីថល។ចំណែក ពាក្យស្នើសុំកម្ចីខ្នាតតូចអាចត្រូវបានដាក់ជូនជាឌីជីថល ដែលធ្វើឲ្យដំណើរការកាន់តែមានភាពងាយស្រួល។

ធនាគារChief Bank៖ ការចម្រាញ់បន្ថែមលើផលិតផល និងសេវាកម្មដែលមានស្រាប់ លោកបណ្ឌិតសឿង ម៉ូរ៉ារិទ្ធ មានប្រសាសន៍ថា “នៅធនាគារ Chief Bank យើងបាននិងកំពុងធ្វើការយ៉ាងសកម្មក្នុងការកែលម្អផលិតផល និងសេវាកម្មដែលមានស្រាប់របស់យើង ហើយដាក់ចេញនូវផលិតផល និងសេវាកម្មថ្មីៗ ដើម្បីបំពេញតម្រូវការដែលកំពុងកើនឡើងរបស់អតិថិជន”។ ការអត្ថាធិប្បាយនេះគូសបញ្ជាក់ពីការប្តេជ្ញាចិត្តរបស់ធនាគារ Chief Bank ចំពោះការកែលម្អជាប្រចាំ និងការពេញចិត្តរបស់អតិថិជន។

ភាពជាដៃគូនេះគឺជាការបញ្ចូលគ្នាប្រកបដោយភាពច្នៃប្រឌិតនៃការអប់រំ និងហិរញ្ញវត្ថុ ដែលត្រូវបានរចនាឡើងដើម្បីបង្កើនបទពិសោធន៍ធនាគារតាមបែបឌីជីថល និងសម្រាលបន្ទុកហិរញ្ញវត្ថុនៃការអប់រំ។ ដើម្បីចូលប្រើសេវាកម្មទាំងនេះ អតិថិជនអាចទាញយកកម្មវិធី Chief Easy នៅលើ App Store (https://apple.co/3A1kXzD) ឬ Google Play (https://bit.ly/2WrWBkK) ។

កិច្ចសហការរវាងធនាគារ Chief Bank និងសាកលវិទ្យាល័យជាតិជាសុីមកំចាយមារ (NUCK) អាចកត់សម្គាល់ជា ការផ្លាស់ប្តូរគំរូមួយនៅក្នុងរបៀបដែលស្ថាប័នអប់រំ និងអង្គការហិរញ្ញវត្ថុធ្វើការរួមគ្នាដើម្បីជំរុញការរួមបញ្ចូលផ្នែកហិរញ្ញវត្ថុ និងការចាប់ផ្តើមប្រើប្រាស់ធនាគារឌីជីថល៕

ដោយៈ ហ្វីអូណា

        ភ្នំពេញៈ លោកជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានដឹកនាំក្រុមការងារ ជួបសម្តែងការគួរសម្យជាមួយលោក Dennis Keller នាយប្រតិបត្តិក្រុមហ៊ុន Samra Seaplane ដែលជាបុត្រសម្ព័ន្ធរបស់ក្រុមហ៊ុន Royal Group ដើម្បីពិភាក្សា លើគម្រោងសេវាដឹកជញ្ជូនផ្លូវអាកាស តាមរយៈយន្តហោះលើទឹក។

សេវាកម្មនេះ ផ្តល់ភាពងាយស្រួល និងឆាប់រហ័សសម្រាប់ការធ្វើដំណើររបស់ទេសចរណ៍ ទៅកាន់គោលដៅរមណីយដ្ឋានប្រណិតសំខាន់ៗនៅកម្ពុជា ជាពិសេសតំបន់សមុទ្រ។បច្ចុប្បន្នក្រុមហ៊ុនកំពុងធ្វើការ ជាមួយរដ្ឋលេខាធិការអាកាសចរណ៍ស៊ីវិល ដើម្បីធ្វើការចុះបញ្ជីហោះហើរជាផ្លូវការ និងសិក្សាពីលក្ខណៈបច្ចេកទេស និងបទដ្ឋានច្បាប់ពាក់ព័ន្ធ លើការហោះហើរបន្ថែម ដោយក្នុងនោះក្រុមហ៊ុន គ្រោងនាំចូលប្រភេទយន្តហោះហោះលើទឹកចំនួន២គ្រឿងនៅចុងឆ្នាំ២០២៣នេះ នឹងសាកល្បងហោះហើរសម្រា​ប់គោលដៅ ខេត្តសៀមរាប-ព្រះសីហនុ និងភ្នំពេញ-ព្រះសីហនុ ដោយចុះចត ទៅដល់គោលដៅរមណីដ្ឋានប្រណិតសំខាន់ៗ ដូចជា៖ កោះសង្សា កោះក្របី សណ្ឋាគារ Royal Sand។ល។លោកជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរ បានថ្លែងអំណរគុណ និងកោតសរសើរចំពោះក្រុមហ៊ុន Samra Seaplane ដែលបានបណ្តាក់ទុនវិនិយោគលើសេវាកម្មហោះហើរតាមរយៈយន្តហោះ លើទឹកលើកដំបូងនៅកម្ពុជា ដែលផលិតផលនេះ នឹងចូលរួមចំណែកបន្ថែមទៀត ដល់ការអភិវឌ្ឍន៍វិស័យទេសចរណ៍កម្ពុជាក្រោយវិបត្តិ ផ្តល់ភាពងាយស្រួល ផាសុកភាព កាត់បន្ថយពេលវេលា និងបទពិសោធន៍ថ្មី ដល់អ្នកទេសចរនៅកម្ពុជា។លោកបន្តថា តាមរយៈកិច្ចសហប្រតិបត្តិការនេះ លោកនឹងស្នើសុំការគាំទ្រ ជាផ្លូវពីការលោករដ្ឋមន្ត្រីក្រសួងទេសចរណ៍ ដើម្បីជំរុញផលិតផលនេះ ឲ្យកាន់តែផុលផុសបន្ថែមទៀត និងបានសំណូមពរឲ្យក្រុមហ៊ុនគិតគូរ ពីការហោះហើរទៅកាន់ ខេត្តគោលដៅផ្សេងទៀតដូចជា ខេត្តមណ្ឌលគិរី និងតំបន់មេគង្គលើ ដែលមានដៅសកម្មភាពនេះ ក្នុងផែនការមេអភិវឌ្ឍន៍ទេសចរណ៍រួចជាស្រេច”៕

ដោយ: គង់ លាងហួរ
សេអ៊ូល: យោងតាមទិន្នន័យពាណិជ្ជកម្មបានបង្ហាញនៅថ្ងៃអង្គារនេះថា ការនាំចេញរបស់ប្រទេសកូរ៉េខាងត្បូងបានដាំក្បាលចុះលើសពីការរំពឹងទុកនៅក្នុងខែកក្កដា និងក្នុងល្បឿនដ៏លឿនបំផុតមិនធ្លាប់មាន ក្នុងរយៈពេលជាង៣ឆ្នាំជាប់ៗគ្នាកន្លងមក។

បញ្ហានេះកំពុងបង្កើននូវក្តីបារម្ភថា ការដាំក្បាលចុះនៃការនាំចេញរបស់ប្រទេសកូរ៉េខាងត្បូងអាចបន្តអូសបន្លាយពេលយូរជាងការរំពឹងទុក ស្របពេលដែលតម្រូវការពីប្រទេសចិនបន្តធ្លាក់ចុះជាបន្តបន្ទាប់។

ទំហំទឹកប្រាក់នៃការនាំចេញទំនិញទៅក្រៅប្រទេសរបស់ប្រទេសនេះបានដាំក្បាលចុះ១៦,៥ភាគរយ មកត្រឹម៥០,៣៣ពាន់លានដុល្លារអាមេរិកក្នុងខែកក្កដា បើធៀបនឹងការធ្លាក់ចុះត្រឹមតែ៦ភាគរយនៅក្នុងខែមិថុនា។

ក្រសួងពាណិជ្ជកម្មកូរ៉េបានអះអាងថា ការដាំក្បាលចុះយ៉ាងខ្លាំងនៃការនាំចេញនៅក្នុងខែកក្កដា គឺបណ្តាលមកពីឧស្សាហកម្ម semiconductor ធ្លាក់ចុះ និងតម្លៃប្រេងធ្លាក់ចុះ ដោយក្រសួងបន្ថែមថា រដ្ឋាភិបាលនឹងខិតខំប្រឹងប្រែងឱ្យអស់ពីសមត្ថភាពដើម្បីជំរុញការនាំចេញឡើងវិញ។នៅខែកក្កដា ការនាំចេញសារធាតុ semiconductors បានដាំក្បាលចុះ៣៣,៦ភាគរយ ដែលជាលទ្ធផលកាន់តែអាក្រក់ បើធៀបនឹងការដាំក្បាលត្រឹមតែ២៨ភាគរយកាលពីខែមិថុនា និងជាការដាំក្បាលចុះអស់១២ខែជាប់ៗគ្នាសម្រាប់វិស័យនេះ។ ការនាំចេញផលិតផលប្រេងបានដាំក្បាលចុះ៤២,៣ភាគរយ ប៉ុន្តែការនាំចេញរថយន្តបានហក់ឡើង១៥ភាគរយ។

ជាក់ស្តែង ការនាំចេញរបស់កូរ៉េខាងត្បូងទៅកាន់ប្រទេសចិនបានដាំក្បាលចុះ២៥,១ភាគរយ ខណៈដែលការនាំចេញទៅកាន់សហរដ្ឋអាមេរិក និងសហភាពអឺរ៉ុបក៏បានធ្លាក់ចុះអស់៨,១ភាគរយ និង៨,៤ភាគរយរៀងៗគ្នាផងដែរ៕

ដោយៈ គង់ ហ្វីអូណា

        ភ្នំពេញៈ ក្រុមអ្នកធុរកិច្ចសឹង្ហបុរីមួយក្រុម បានមកសិក្សានិងស្វែងរកឱកាសវិនិយោគនៅកម្ពុជា។លោកជា វុទ្ធី អគ្គលេខាធិការរងគណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា បានអញ្ជើញចូលរួមជាវាគ្មិន ក្នុងកម្មវិធីបណ្តាញធុរកិច្ច ដែលរៀបចំឡើងដោយសហព័ន្ធធុរកិច្ចសិង្ហបុរី ។

ក្នុងវេទិកានោះ លោកជា វុទ្ឋីបានសម្តែងនូវការស្វាគមន៍ យ៉ាងកក់ក្តៅជូនចំពោះគណៈប្រតិភូដែលបាន មកកាន់ទឹកដីកម្ពុជាដោយផ្ទាល់ ដើម្បីសិក្សាស្វែងយល់អំពី បរិយាកាសវិនិយោគនៅកម្ពុជា ក៏ដូចជាបច្ចុប្បន្នភាពនៃច្បាប់ បទប្បញ្ញត្តិ និងគោលនយោបាយស្តីពីវិនិយោគ។

លោកក៏បានជម្រាបជូនវិនិយោគិន និងធុរជនអំពីលទ្ធភាពក្នុងការច្បាមយកនូវអត្ថប្រយោជន៍ ពីកាលានុវត្តភាពវិនិយោគលើវិស័យដែលមានសក្តានុពល និងតម្រូវការទីផ្សារខ្ពស់ ដែលវិស័យទាំងនេះរួមមាន (១) កសិកម្ម (២) កសិ-ឧស្សាហកម្ម (៣) ទេសចរណ៍ (៤) កម្មន្តសាល (៥) យានយន្តនិងអេឡិចត្រូនិកជាដើម។

លោកជា វុទ្ឋីក៏បានបង្ហាញនូវសុទិដ្ឋិនិយមយ៉ាងមុតមាំថា វិនិយោគិន និងធុរជនដែលមានវត្តមាន ក្នុងកម្មវិធីនាល្ងាចនេះនឹអាចស្វែងរកដៃគូធុរកិច្ខ ព្រមទាំងដាក់ទុនវិនិយោគ លើវិស័យគន្លឹះនានា នៅកម្ពុជានាពេលដ៏ខ្លីខាងមុខ។

សមាសភាពចូលរួមក្នុងកម្មវិធីខាងលើ រួមមាន លោកជំទាវឯកអគ្គរដ្ឋទូតសិង្ហបុរីប្រចាំកម្ពុជា តំណាងSBF និងវិស័យឯកជន សរុបប្រមាណ៥០នាក់៕

ដោយ: គង់ លាងហួរ
ភ្នំពេញ: យោងតាមរបាយការណ៍ប្រចាំឆ្នាំរបស់ធនាគារជាតិនៃកម្ពុជា (NBC) ចេញផ្សាយកាលពីថ្ងៃចន្ទ បានឱ្យដឹងថា ឧស្សាហកម្មធនាគារ និងហិរញ្ញវត្ថុរបស់កម្ពុជាបន្តទទួលបានកំណើនប្រកបដោយសុខភាពល្អទាំងប្រាក់កម្ចី និងប្រាក់បញ្ញើនៅក្នុងឆមាសទីមួយនៃឆ្នាំនេះ។

របាយការណ៍បានបន្តថា ប្រាក់កម្ចីឆ្នើម  (Outstanding loans) បានហក់ឡើង១៣,៨ភាគរយដល់៥៨,៦ពាន់លានដុល្លារអាមេរិក គិតត្រឹមខែមិថុនាឆ្នាំនេះ ខណៈដែលប្រាក់បញ្ញើរបស់អតិថិជនបានកើនឡើង៦,៤ភាគរយដល់៤៤,៤ពាន់លានដុល្លារ។កម្ចីទាំងនេះត្រូវបានផ្តល់ទៅឱ្យវិស័យសំខាន់ៗ ដូចជាពាណិជ្ជកម្មលំនៅដ្ឋានសំណង់ និងអចលនទ្រព្យកសិកម្មសណ្ឋាគារ ភោជនីយដ្ឋាន និងការផលិតជាដើម។ចំណែក ប្រាក់កម្ចីដែលមិនដំណើរការនៅតាមធនាគារ និងគ្រឹះស្ថានមីក្រូហិរញ្ញវត្ថុនានាស្ថិតក្នុងអត្រាដែលអាចគ្រប់គ្រងបានត្រឹម៤ភាគរយ និង៣,៣ភាគរយរៀងៗគ្នា។

របាយការណ៍បានបញ្ជាក់ទៀតថា ទ្រព្យសកម្មបច្ចុប្បន្ននៅក្នុងប្រព័ន្ធធនាគារ និងហិរញ្ញវត្ថុបានកើនឡើងដល់៨២,២ពាន់លានដុល្លារគិតត្រឹមខែមិថុនា ឆ្នាំ២០២៣ ពោលគឺកើនឡើង៩,៩ភាគរយធៀបនឹងខែមិថុនា ឆ្នាំ២០២២។

លោក ជា ចាន់តូ ទេសាភិបាលធនាគារជាតិនៃកម្ពុជា បានមានប្រសាសន៍ថា កំណើនទាំងប្រាក់កម្ចី និងប្រាក់បញ្ញើបានឆ្លុះបញ្ចាំងយ៉ាងច្បាស់ពីទំនុកចិត្តសាធារណៈចំពោះធនាគារ និងស្ថាប័នហិរញ្ញវត្ថុរបស់កម្ពុជា៕

ដោយ: គង់ លាងហួរ

ហាណូយ: វៀតណាមទាក់ទាញលំហូរFDI បានប្រមាណ១៦,២៤ពាន់លានដុល្លារ ក្នុងរយៈពេល៧ខែដំបូងនៃឆ្នាំនេះ កើនឡើង៤,៥%ធៀបនឹងរយៈពេលដូចគ្នាកាលពីឆ្នាំមុន។

នេះបើយោងតាមការឱ្យដឹង ពីទីភ្នាក់ងារវិនិយោគបរទេស ដែលស្ថិតក្រោមក្រសួងផែនការ និងវិនិយោគរបស់ប្រទេសវៀតណាម។

ក្នុងរយៈពេល៧ខែមកនេះ ប្រទេសវៀតណាមបានអនុម័តគម្រោង ដែលបានចុះបញ្ជីថ្មីចំនួន១.២៩៣គម្រោង ក្រោមដើមទុនសរុបចំនួន៧,៩៤ពាន់លានដុល្លារ ហក់ឡើង៧៥,៥% បើគិតពីចំនួនគម្រោង និងហក់ឡើង៣៨,៦% បើគិតជាទុន ធៀបនឹងរយៈពេលដូចគ្នាកាលពីឆ្នាំមុន។ទន្ទឹមគ្នានេះដែរ ទឹកប្រាក់ចំនួន២,៩៣ពាន់លានដុល្លារអាមេរិកក៏ត្រូវបានចាក់ចូលបន្ថែមទៅក្នុងគម្រោង ដែលមានស្រាប់ចំនួន៧៣៦គម្រោងផងដែរ។

វិស័យផលិត និងកែច្នៃនាំមុខគេក្នុងការទាក់ទាញលំហូរ FDI ជាមួ​យ ទឹកប្រាក់ចំនួន១០,៩៣ពាន់លានដុល្លារអាមេរិក ដែលតាមពីក្រោយដោយវិស័យអចលនទ្រព្យ ជាមួយទុនពីបរទេសចំនួន១,៦១ពាន់លានដុល្លារអាមេរិក។

ក្នុងអំឡុងខែមករា ដល់ខែកក្កដា គេបានសង្កេតឃើញមានប្រទេស និងដែនដីចំនួន៩៤ ដែលបានហូរចូលមកកាន់ប្រទេសវៀតណាម ដែលក្នុងនោះសិង្ហបុរី បានឈរនៅលំដាប់កំពូលទី១ ក្នុងបញ្ជីដែលមានទឹកប្រាក់វិនិយោគ ចំនួន៣,៦៤ពាន់លានដុល្លារ ដោយដាំក្បាលចុះ១៥,៥% ធៀបរយៈពេលដូចគ្នាកាលពីឆ្នាំមុន៕