ដោយ: គង់ លាងហួរ

ប៉េកាំង: លោក Wang Yi ប្រធានការិយាល័យគណៈកម្មាធិការកិច្ចការបរទេស នៃគណៈកម្មាធិការមជ្ឈិមបក្សកុម្មុយនិស្តចិន (CPC) បានជួបពិភាក្សា ជាមួយអគ្គលេខាធិការអាស៊ាន លោក កៅ គឹមហួន កាលពីពេលថ្មីៗនេះ។

លោក Wang បានសម្តែងការអបអរសាទរចំពោះលោក កៅ គឹមហួន ដែលបានចូលកាន់តំណែង ជាអគ្គលេខាធិការអាស៊ាន និងបានសម្តែងការអរគុណចំពោះលោក ដែលបានធ្វើឱ្យប្រទេសចិនក្លាយជាការឈប់លើកដំបូង នៃដំណើរទស្សនកិច្ចរបស់លោកផ្ទាល់ទៅកាន់ប្រទេសមិនមែនសមាជិកអាស៊ាន។

ក្នុងនាមជាប្រទេសជិតខាងដ៏ធំបំផុតរបស់អាស៊ាន ប្រទេសចិនតែងតែគាំទ្រអាស៊ានដោយស្មោះស្ម័គ្រ និងមិនគិតតែពីខ្លួនឯងនោះទេ។

លោក Wang បានបន្តថា ក្រោមកាលៈទេសៈថ្មី ប្រទេសចិននឹងបន្តគាំទ្រយ៉ាងរឹងមាំ សមាហរណកម្មអាស៊ាន និងការកសាងសហគមន៍ គាំទ្រឯករាជ្យភាពជាយុទ្ធសាស្ត្រ សាមគ្គីភាពសម្រាប់ការអភិវឌ្ឍន៍ និងគាំទ្រការរក្សាស្ថាបត្យកម្ម កិច្ចសហប្រតិបត្តិការក្នុងតំបន់ដែលផ្តោតលើអាស៊ាន។

លោកបានបន្ថែមថា “ភាគីទាំងពីរគួរតែរួមដៃគ្នា ដើម្បីជំរុញបុព្វហេតុដ៏ថ្លៃថ្នូរ នៃទំនើបកម្មសម្រាប់ប្រជាជនជាង២ពាន់លាននាក់ នៅក្នុងប្រទេសចិន និងអាស៊ាន”។

លោក Wang Yi បានបញ្ជាក់ថា “ភាគីទាំងពីរគួរតែជំរុញឱ្យមានកិច្ចសហប្រតិបត្តិការ រវាងគំនិតផ្តួចផ្តើមខ្សែក្រវ៉ាត់ និងផ្លូវ និងទស្សនវិស័យអាស៊ានស្តីពីតំបន់ឥណ្ឌូ -ប៉ាស៊ីហ្វិក កសាងមាតុភូមិរួមមួយដែលមានសន្តិភាព ភាពស្ងប់ស្ងាត់ ភាពរុងរឿង បរិយាកាសដ៏ស្រស់ស្អាត និងមិត្តភាព និងជំរុញសហគមន៍ចិន-អាស៊ាន ឱ្យកាន់តែជិតស្និទ្ធជាមួយនឹងអនាគតរួមគ្នា”។

លោក Wang ក៏បានអំពាវនាវឱ្យរក្សាបរិស្ថាន សម្រាប់ការអភិវឌ្ឍដោយសន្តិវិធី ដែលបានបង្កើតឡើង ក្នុងរយៈពេលជាច្រើនទសវត្សរ៍កន្លងមក ដោយបដិសេធយ៉ាងម៉ឺងម៉ាត់ នូវចិត្តគំនិតនៃសង្រ្គាមត្រជាក់ និងប្រឆាំងនឹងការប៉ុនប៉ងណាមួយ ដើម្បីបង្កជម្លោះរវាងប្រទេសធំៗ ឬការប្រឈមមុខដាក់គ្នា។

លោក កៅ គឹមហួន បានមានប្រសាសន៍ថា ប្រទេសចិនគឺជាអ្នកជិតខាងដ៏ល្អ និងជាមិត្តរបស់អាស៊ាន ក៏ដូចជាដៃគូសហប្រតិបត្តិការយូរអង្វែងដែលអាចជឿទុកចិត្តបាន ដោយលោកបន្ថែមថា កិច្ចសហប្រតិបត្តិការទ្វេរភាគី ទទួលបានមូលដ្ឋានគ្រឹះយ៉ាងជ្រាលជ្រៅ វិស័យទូលំទូលាយ និងលទ្ធផលប្រកបដោយផ្លែផ្កា។

លោកបានអះអាងថា “អាស៊ានត្រៀមខ្លួនជាស្រេច ក្នុងការធ្វើឱ្យស៊ីជម្រៅភាពជាដៃគូយុទ្ធសាស្ត្រ គ្រប់ជ្រុងជ្រោយជាមួយប្រទេសចិន រួមគ្នារក្សាសន្តិភាព និងស្ថិរភាពក្នុងតំបន់ និងពង្រឹងកិច្ចសហប្រតិបត្តិការលើវិស័យពាណិជ្ជកម្ម ការវិនិយោគ សេដ្ឋកិច្ចឌីជីថល និងការអភិវឌ្ឍន៍បៃតង ការតភ្ជាប់ និងការផ្លាស់ប្តូរប្រជាជន ព្រមទាំងបញ្ចេញសក្តានុពលកិច្ចសហប្រតិបត្តិការ ដើម្បីជំរុញទំនាក់ទំនងទ្វេរភាគីឱ្យកាន់តែរីកចម្រើន”៕

   ដោយៈ ច្រាយ ចំណាន

       ភ្នំពេញៈ មន្រ្តីជាន់ខ្ពស់កម្ពុជា និងអូស្ត្រាលីបានប្ដេជ្ញាជំរុញកិច្ចសហប្រតិបត្តិការ លើវិស័យទេសចរណ៍ ឱ្យបានល្អប្រសើរឡើងវិញ ព្រមទាំងជំរុញ ឱ្យមានការហោះហើរត្រង់ជាមួយគ្នា ខណៈស្ថានភាពភ្ញៀវទេសចរអូស្ត្រាលីមកកាន់កម្ពុជា ក៏បង្ហាញនូវសញ្ញាល្អប្រសើរឡើងវិញផងដែរ បន្ទាប់ពីវិបត្តិជំងឺកូវីដ១៩។

ការឯកភាពនេះ ត្រូវបានធ្វើឡើងក្នុងជំនួបពិភាក្សាការងារ រវាងលោក ថោង ខុន រដ្ឋមន្ត្រីក្រសួងទេសចរណ៍ និងលោក Justin Kevin Whyatt ឯកអគ្គរដ្ឋទូតអូស្ត្រាលីថ្មីប្រចាំកម្ពុជា នៅទីស្ដីក្រសួងទេស​ច​រណ៍ នារសៀលថ្ងៃទី២៩ ខែមីនា ឆ្នាំ២០២៣។

លោករដ្ឋមន្ត្រី ថោង ខុន បានរំលឹកដល់ភាគីអូស្ត្រាលីពីគម្រោងកាត់បន្ថយភាពក្រីក្រ តាមរយៈការអភិវឌ្ឍសហគមន៍ ក្នុងនោះសាក​លវិទ្យាល័យ Sunshine Coast បានជួយឱ្យកម្ពុជា ជាប្រទេសមួយនាំមុខ ក្នុងការអភិវឌ្ឍគម្រោងរៀបចំស្ដង់ដា សហគមន៍ទេសចរណ៍អាស៊ាន ដោយបានផ្ដល់ជាជំនួយបច្ចេកទេស។

លោករដ្ឋមន្ត្រី ក៏បានជម្រាបជូនភាគីអូស្ត្រាលីថា កាលពីឆ្នាំ២០០៧-២០១១ អង្គការទេសចរណ៍ពិភពលោក ធ្លាប់បានជួយដល់គម្រោងអភិរក្ស និងអភិវឌ្ឍន៍សត្វផ្សោតទន្លេមេគង្គ តាមរយៈការបង្កើតសហគមន៍ទេសចរណ៍ នៅតំបន់នោះ ក្នុងគោលដៅផ្លាស់ប្តូរមុខរបរអ្នកនេសាទ ឱ្យងាកមករកការផ្តល់សេវាទេសចរណ៍ ជំនួសមុខរបរនេសាទនៅតំបន់សត្វផ្សោត។

ដូច្នេះលោករដ្ឋមន្ត្រីបានស្នើភាគី អូស្ត្រាលីជួយពិចារណាផ្តល់គម្រោងដូចនេះ នៅតំបន់សត្វផ្សោតទន្លេមេគង្គផងដែរ ព្រោះសត្វផ្សោត គឺជាផលិតផលទេសចរណ៍ដ៏ទាក់ទាញ មួយយ៉ាងសំខាន់នៅតំបន់នោះ “គ្មានសត្វផ្សោត គឺគ្មានទេសចរ”។

ព្រមជាមួយនោះ លោករដ្ឋមន្ត្រីក៏បានស្នើភាគីអូស្ត្រាលីអូស្ត្រាលីជួយសិក្សា ក្នុងការផ្ដល់នូវជំនួយនានា សម្រាប់អភិវឌ្ឍន៍សហគមន៍ទេសចរណ៍ និងតំបន់អេកូទេសចរណ៍ ដែលមានសក្តានុពលនៅកម្ពុជា ព្រោះរាជរដ្ឋភិបាលកម្ពុជា ក៏បានបង្កើតឱ្យមានគណៈកម្មាធិការជាតិមួយ ដើម្បីអភិវឌ្ឍន៍សហគមន៍ទេសចរណ៍ និងអេកូទេសចរណ៍ផងដែរ។

ទាក់ទងការងារផ្សព្វផ្សាយ លោករដ្ឋមន្ត្រីបានបន្តស្នើអូស្ត្រាលីជួយផ្សព្វផ្សាយពីព្រឹត្តិការណ៍អង្គរសង្ក្រាន និងស៊ីហ្គេម អាស៊ានប៉ារ៉ាហ្គេម ដែលនឹងធ្វើឡើងនៅកម្ពុជា នាពេលខាងមុខក្នុងឆ្នាំនេះ ដែលជាឆ្នាំទស្សនាកម្ពុជា ពិសេសគឺនៅក្នុងឱកាសបុណ្យចូលឆ្នាំថ្មី ប្រពៃ​ណីខ្មែរខាងមុខ នឹងមានការប្រកួតកីឡាប្រពៃណី រួមចំណែកដល់ការផ្សព្វផ្សាយស៉ីហ្គេមផងដែរ។

លោកក៏បានស្នើភាគីអូស្ត្រាលី បន្តពង្រឹងធនធានមនុស្សក្នុងវិស័យទេសចរណ៍ ដើម្បីពង្រឹងការគ្រប់គ្រង ដឹកនាំ និងអនុវត្តគម្រោងដែលពាក់ព័ន្ធនឹងវិស័យទេសចរណ៍។ កន្លងមក អូស្ត្រាលីបានទទួលឧត្តមមន្ត្រីកម្ពុជា ទៅចូលរួមការបណ្ដុះបណ្ដាលរយៈពេល៣ខែ និងរយៈពេលវែងឬខ្លីផ្សេងទៀត ក្នុងនោះក៏មានអភិបាលរងខេត្តនៅតាមតំបន់ឆ្នេរសមុទ្រផងដែរ។

ក្រៅពីនេះ លោកថោង ខុន បានស្នើបន្ថែមទៅកាន់អូស្ត្រាលីតាមរយៈលោក Justin Kevin Whyatt ជួយពង្រឹងបច្ចេកទេសនៃការបណ្ដុះបណ្ដាល សម្រាប់វិទ្យាស្ថានជាតិទេសចរណ៍ និងគ្រឹះស្ថានអប់រំទេសចរណ៍នានាដែលកំពុង និងត្រៀមបណ្ដុះបណ្ដាលជំនាញវិជ្ជាជីវៈទេសចរណ៍។

លោក Justin Kevin Whyatt បានប្ដេជ្ញាថា នឹងបន្តពង្រីកកិច្ចសហប្រតិបត្តិការបន្ថែម លើគ្រប់វិស័យជាមួយភាគីកម្ពុជា ពិសេសវិស័យទេសចរណ៍។

លោករដ្ឋមន្ត្រី ថោង ខុន ក៏បានស្នើឱ្យលោកឯកអគ្គរដ្ឋទូតជួយជំរុញឱ្យមានជើងហោះហើរត្រង់កម្ពុជា-អូស្ត្រាលី ដើម្បីសម្រួលការធ្វើដំណើររបស់ភ្ញៀវទេសចរ វិនិយោគិន ក៏ដូចជា ប្រជាពលរដ្ឋខ្មែររស់នៅអូស្ត្រាលី និងនិស្សិតកម្ពុជាដែលកំពុងស្នាក់នៅ និងសិក្សាយ៉ាងច្រើននៅអូស្ត្រលី។

ឆ្លើយតបបនឹងសំណើនេះ លោក Justin Kevin Whyatt បានទទួលឯកភាពយល់ព្រម និងខិតខំជំរុញឱ្យបាន ក្នុងអាណត្តិបេសក​នកម្មរបស់លោកនៅកម្ពុជានេះ ហើយលោកនឹងជំរុញឱ្យមានហោះហើរត្រង់រវាងកម្ពុជា-អូស្ត្រាលី។

កន្លងទៅ និងពេលបច្ចុប្បន្ន អ្នកដំណើរដែលចង់ធ្វើដំណើរទៅមកកម្ពុជា-អូស្ត្រាលី គឺត្រូវប្ដូរជើងហោះហើរជាមួយសិង្ហបុរី ឬឥណ្ឌូណេស៉ី ឬក៏ទៅដល់ហុងកុងក៏មាន។

តាមរយៈសំណើ និងកិច្ចសហប្រតិបត្តិការទាំងនេះ ភាគីកម្ពុជានិងអូស្ត្រាលីរំពឹងទុកថា នឹងជំរុញការអភិវឌ្ឍវិស័យទេសចរណ៍បានមួយកម្រិតទៀត ព្រមទាំងទាក់ទាញកំណើនភ្ញៀវទេសចរ អូស្ត្រាលីឱ្យមកទស្សនាកម្ពុជាបន្ថែមទៀតដែរ ខណៈកាលពីមុនពេលវិបត្តិកូវីដ១៩ កម្ពុជាធ្លាប់ទទួលបានភ្ញៀវទេសចរអូស្ត្រាលី ប្រមាណជាង១០ម៉ឺននាក់៕

  ដោយៈ គង់ សូរិយា

       កំពង់ធំៈ នៅថ្ងៃទី២៩ ខែមីនា ឆ្នាំ២០២៣ក្រសួងទេសចរណ៍​ សហការជាមួយ​ ស.ស.យ.ក.ខេត្តកំពង់ធំ​ និងស.ស.យ.ក. វិស័យទេសចរណ៍ បានរៀបចំយុទ្ធនាការ “កម្ពុជាស្អាត ទីក្រុងស្អាត កម្ពុជាបៃតងឆ្ពោះទៅស្វាគមន៍ ព្រឹត្តិការណ៍កីឡាស៊ីហ្គេម អាស៊ានប៉ារ៉ាហ្គេម ២០២៣ និងការផ្សព្វផ្សាយយុទ្ធនាការ​ #Beyond the games” ។

កម្មវិធីនេះធ្វើឡើងក្រោមអធបតីភាព លោកតុប សុភ័ក រដ្ឋលេ​ខា​ធិការក្រសួងទេសចរណ៍ និងជាប្រធានគណៈកម្មការវប្បធម៌ បរិស្ថាន និងអប់រំកីឡានៃគណៈកម្មាធិការជាតិ រៀបចំការប្រកួតកីឡាអាស៊ីអាគ្នេយ៍លើកទី៣២​ និងអាស៊ានប៉ារ៉ាហ្គេមលើកទី១២​ តំណាងដ៏ខ្ពង់ខ្ពស់លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍​ និងឯកឧត្តម​ ជា​ វ៉ាន់ចាន់​ អភិបាលរងនៃគណៈ​អភិបាលខេត្តកំពង់ធំ​ និងជាប្រធានស.ស.យ.ក.ខេត្តកំពង់ធំ។

យុទ្ធនាការផ្សព្វផ្សាយនេះបានរៀបចំឡើងនៅ – វិទ្យាល័យ​ ហ៊ុន​ សែន​ ប៊ុន​ រ៉ានី​ ​ទ្រៀល – វិទ្យាល័យ ហ៊ុន​ សែន​ តាំងគោក  – វិទ្យាល័យ ហ៊ុន សែន ស្រះបន្ទាយ – វិទ្យាល័យ​ តេជោ​ ហ៊ុន​ សែន​ បារាយណ៍

– វិទ្យាល័យ ហ៊ុន​ សែន ក្រវ៉ា- វិទ្យាល័យ ជា​ ស៊ីម​ កំពង់ថ្ម។

កម្មវិធីនេះមានអ្នកចូលរួមពីសមាជិក​ សមាជិកា​ស.ស.យ.ក.វិស័យទេសចរណ៍​ ស.ស.យ.ក.ខេត្តកំពង់ធំ​ លោកនាយក​ នាយករង នាយិការង​ លោកគ្រូ​ អ្នកគ្រូ យុវជនកាយរិទ្ធ​ យុវជនកាកបាទក្រហម​ សិស្សានុសិស្ស និងអាជ្ញាធរពាក់ព័ន្ធសរុបប្រមាណ1,000នាក់ ក្នុងមួយវិទ្យាល័យ​។

យុទ្ធនាការផ្សព្វផ្សាយនេះ រៀបចំឡើងក្នុងគោលបំណងជំរុញការចូលរួមពីសិស្សានុសិស្ស និងអាជ្ញាធរពាក់ព័ន្ធ​ ឱ្យចូលរួមបត់បេះដូង ដើម្បីបង្ហាញពីទឹកចិត្តគាំទ្រយុទ្ធនាការ Beyond The Games ​ និងព្រឹត្តិការណ៍កីឡាស៊ីហ្គេម​ អាស៊ានប៉ារ៉ាហ្គេម២០២៣ ក៏ដូចជា ដើម្បីលើកកម្ពស់ភាពស្អាត និងបៃតង ការផ្តល់សេវា និងបដិសណ្ឋារកិច្ចល្អ ក្នុងនាមជាម្ចាស់ផ្ទះទទួលស្វាគមន៍កីឡាករ -កីឡាការិនី និងភ្ញៀវទេសចរជាតិ និងអន្តរជាតិប្រកបដោយភាពកក់ក្តៅ៕

ដោយៈ សុខុម

វៀងចន្ទន៍: ផ្លូវដែកល្បឿនលឿនតភ្ជាប់រវាងប្រទេសឡាវ -ចិន (Laos-China Railway) គ្រោងនឹងដំណើរការសេវាដឹកជញ្ជូនឆ្លងដែន រវាងប្រទេសទាំងពីរនៅថ្ងៃទី១៣ ខែមេសា ពោលគឺមុនបុណ្យចូលឆ្នាំខ្មែរ-ឡាវ មួយថ្ងៃ។ នេះបើយោងតាមអភិបាលខេត្តហ្លួងណាំថា (Luang Namtha) នៃប្រទេសឡាវ។

ការប្រកាសនេះ បានធ្វើឡើងអំឡុងដំណើរទស្សនកិច្ចរបស់ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសឡាវ លោក សាឡុំសាយ កុំម៉ាស៊ីត (Saleumxay Kommasith) និងមន្ត្រីផ្សេងទៀតដើម្បីត្រួតពិនិត្យការត្រៀមរៀបចំ សម្រាប់ការបើកដំណើរការសេវាដឹកជញ្ជូនឆ្លងដែននៃផ្លូវដែកនេះ។

តាមការរំពឹងទុក រថភ្លើងដឹកអ្នកដំណើរឆ្លងដែនដំបូង រវាងប្រទេ​សឡាវ និងប្រទេសចិន នឹងត្រូវដំណើរការមួយថ្ងៃ មុនបុណ្យចូលឆ្នាំខ្មែរ-ឡាវ ពោលគឺនៅថ្ងៃព្រហស្បតិ៍ ទី១៣ ខែមេសា ខណៈចូលឆ្នាំនៅប្រទេសថៃ ចាប់ផ្ដើមពីថ្ងៃទី១៣ មេសា។

លោក សាឡុំសាយ កុំម៉ាស៊ីត បានណែនាំគ្រប់ភាគីពាក់ព័ន្ធរួមទាំងក្រុមហ៊ុន Laos-China Railway Company និងតំបន់សេដ្ឋកិច្ចពិសេស (SEZ) នៅក្នុងមូលដ្ឋានឱ្យធ្វើការរួមគ្នា និងធានាត្រៀមខ្លួនឱ្យរួចរាល់សម្រាប់ពិធី បើកដំណើរការជាផ្លូវការ នូវសេវាដឹកជញ្ជូនឆ្លងដែនអន្តរជាតិ នៃផ្លូវដែកល្បឿនលឿនឡាវ-ចិន។

នាយករដ្ឋមន្ត្រីឡាវ លោក សុនិស្ស័យ ស៊ីផាដន (Sonexay Siphandone) កាលពីដើមខែនេះបានបញ្ជា ឱ្យបង្កើតស្តង់អន្តោប្រវេសន៍ នៅតាមស្ថានីយរថភ្លើង តាមបណ្តោយផ្លូវដែកឡាវ-ចិន ដើម្បីគ្រប់គ្រងកំណើនតម្រូវការធ្វើដំណើរតាមផ្លូវដែក។

ស្តង់ទាំងនេះ នឹងបម្រើដល់អ្នកធ្វើដំណើរទាំងចូលក្នុង និងចេញក្រៅប្រទេស ហើយនឹងត្រូវបង្កើតឡើង ដោយក្រសួងសាធារណការ និងដឹកជញ្ជូនឡាវ៕ Laotian Times៕

ដោយៈ សុខុម

ប៉េកាំង: វាជារឿងដ៏កម្រ និងគួរឱ្យភ្ញាក់ផ្អើលណាស់ ដែលប្រទេ​សចិន បានធ្វើការសន្យាជាសាធារណៈថា ខ្លួននឹងគោរពប្រព័ន្ធសង្គមរបស់កោះតៃវ៉ាន់ និងរក្សាទុកអ្វីគ្រប់យ៉ាង ដែលកោះនេះមានឱ្យនៅដដែល ឱ្យតែកោះនេះព្រមព្រៀង បង្រួបបង្រួមជាតិក្លាយជាមហាយក្សចិន តែមួយដែលកាន់តែខ្លាំងអស្ចារ្យ។

អ្នកនាំពាក្យចិនដីគោក (ចិនប៉េកាំង) កាលពីថ្ងៃពុធ ទី២៩ ខែមីនា បានប្រកាសបញ្ជាក់ជំហរយ៉ាងច្បាស់ៗថា ជនរួមជាតិតៃវ៉ាន់ នឹងទទួលបានផលប្រយោជន៍ យ៉ាងច្រើនសន្ធឹកសន្ធាប់ យ៉ាងពិតប្រាកដ បន្ទាប់ពីការបង្រួបបង្រួមគ្នាជាប្រទេសចិន ដោយជោគជ័យ។

លោកស្រីជូ ហ្វឹងលាន (Zhu Fenglian) អ្នកនាំពាក្យការិយា​ល័យកិច្ចការកោះតៃវ៉ាន់ នៃក្រុមប្រឹក្សារដ្ឋចិនបានបញ្ជាក់ថា បន្ទាប់ពីការបង្រួបបង្រួមជាមួយចិនដីគោក កោះតៃវ៉ាន់ អាចជ្រើសរើសប្រព័ន្ធសង្គមដាច់ដោយឡែកមួយ ដែលខុសពីប្រព័ន្ធសង្គមរបស់ចិន។

អ្នកនាំពាក្យរូបនេះបានបន្ថែមទៀតថា ប្រសិនបើអធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ប្រទេសចិន ត្រូវបានធានាតាមរយៈការបង្រួបបង្រួមនេះ ប្រព័ន្ធសង្គម និងរបៀបរស់នៅរបស់ពលរដ្ឋនៅកោះតៃវ៉ាន់ នឹងត្រូវបានគោរពយ៉ាងពេញលេញ ហើយទ្រព្យសម្បត្តិឯកជន ជំនឿសាសនា សិទ្ធិ និងផលប្រយោជន៍ស្របច្បាប់របស់ជនរួមជាតិតៃវ៉ាន់ នឹងត្រូវបានការពារយ៉ាងពេញលេញផងដែរ។

លោកស្រីក៏បានគូសបញ្ជាក់ដែរថា បន្ទាប់ពីការបង្រួបបង្រួមជាតិ ប្រព័ន្ធ និងស្ថាប័នសម្រាប់កិច្ចសហប្រតិបត្តិការ សេដ្ឋកិច្ចឆ្លងច្រកសមុទ្រ នឹងត្រូវបានធ្វើឱ្យប្រសើរឡើងបន្ថែមទៀត ហើយប្រជាជនតៃវ៉ាន់ នឹងមានឱកាសកាន់តែច្រើន សម្រាប់ការអភិវឌ្ឍន៍ជាអន្តរជាតិ៕ Xinhua៕

 ដោយៈ គង់ សូរិយា

       ភ្នំពេញៈ តើលោកអ្នកកំពុងពិចារណា ទិញផ្ទះលើកដំបូងមែនទេ? យើងខ្ញុំដឹងច្បាស់ថាការទិញផ្ទះលើកទី1 អាចជារឿងដ៏គួរឱ្យរំភើប និងគួ​រឱ្យ​ខ្វាយខ្វល់ស្មើរគ្នា។

ដូចនេះហើយទើបយើងដកស្រង់ នូវគន្លឹះខ្លីៗតែខ្លឹមចំនួន3ខាងក្រោម ដើម្បីជួយលោកអ្នកក្នុងការសម្រេចចិត្តទិញផ្ទះ។

១ កំណត់កញ្ចប់ថវិការបស់អ្នក

លោកអ្នកមិនត្រឹមតែគួរគិតគូរ ពីតម្លៃផ្ទះប៉ុណ្ណោះទេ ប៉ុន្តែក៏គួរបូកសរុបចំណាយផ្សេងៗទៀតផងដែរ ដូចជាចំណាយលើភ្នាក់ងារសម្របសម្រួលនានា ពន្ធ និងសេវាកម្មថែទាំជាដើម។ ចំណុចនេះនឹងជួយឱ្យលោកអ្នកអាចជៀសវាង ពីការចំណាយលើសពីសមត្ថភាព។

២ ស្រាវជ្រាវ និងស្វែងយល់ពីទីតាំង

សូមចំណាយពេលសិក្សាពីទីកន្លែង និងស្វែងរកទីតាំងដែលមានសាលារៀន ឬការផ្តល់ជូនផ្សេងៗ ដែលឆ្លើយតបទៅនឹងតម្រូវការ និងរបៀបរស់នៅរបស់អ្នក។ ប្រសិនបើលោកអ្នកអាចរកបាននូវផ្ទះ ដែលត្រូវបានបំពាក់នឹងគ្រឿងបរិក្ខារគ្រប់គ្រាន់ សម្រាប់ជួយឱ្យការរស់នៅរបស់អ្នកមានផាសុកភាព និងភាពងាយស្រួលនោះគឺកាន់តែប្រសើរ។

៣សម្រេចចិត្តតាមសម្រួល

សូមកុំប្រញាប់ធ្វើការសម្រេចចិត្ត។ លោកអ្នកគួរចំណាយពេលពិនិត្យមើលគម្រោងផ្សេងៗ ដែលមាននៅលើទីផ្សារឱ្យបានច្រើន ប្រៀបធៀបលក្ខណៈពិសេសរបស់ផ្ទះនីមួយៗ ដូចជាគ្រឿងបរិក្ខារខាងក្នុង ម៉ូតផ្ទះ និងតម្លៃ ហើយថ្លឹងថ្លែងពីគុណសម្បត្តិ និងគុណវិបត្តិឱ្យបានគ្រប់ជ្រុងជ្រោយមុននឹងធ្វើការសម្រេចចិត្ត៕

  ដោយៈ ជេស៊ីកា

       ភ្នំពេញៈ លោក ឡុង ឌីម៉ង់ អភិបាលរងខេត្តព្រះសីហនុ បានអញ្ជើញជាវាគ្មិន ក្នុងវេទិកា “កិច្ចសហប្រតិបត្តិការសេដ្ឋកិច្ច ពាណិជ្ជកម្ម និង​វិនិយោគសហគ្រិនកម្ពុជា-ចិន” ដែលបានរៀបចំឡើងដោយ ក្រសួងពាណិជ្ជកម្ម នៃព្រះរាជាណាចក្រកម្ពុជា។

វេទិកានេះ មានកិច្ចសហការពីសមាគម ហឺហឺហួយ (Hehehui) នៃសាធារណរដ្ឋប្រជាមានិតចិន​ នៅសណ្ឋាគារ អោកវូដ ព្រីមៀរ ភ្នំពេញ។

នៅក្នុងបាឋកថា អំពីកាលានុវត្តភាព នៃការធ្វើជំនួញ និងវិនិយោគនៅក្នុងខេត្តព្រះសីហនុ លោកអភិបាលរងបានជម្រាបជូនអង្គពិធីទាំងមូល អំពីស្ថានភាពភូមិសាស្ត្រ និងហេដ្ឋារចនាសម្ព័ន្ធនានាដែលអំណោយផលយ៉ាងខ្លាំង ដល់វិស័យសេដ្ឋកិច្ចរបស់ខេត្ត។

ជាមួយគ្នានេះ លោកបានពន្យល់យ៉ាងលំអិត អំពីសក្តានុពល និងការអភិវឌ្ឍខេត្ត​ ជាពិសេស អំពីផែនការមេ ដើម្បីអភិវឌ្ឍខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង។

ឆ្លៀតក្នុងឱកាសដ៏ប្រពៃនេះ លោកអភិបាលរង​ បានទាញចំណា​ប់អារម្មណ៍វិនិយោគិនកម្ពុជា និងចិន ឱ្យពិចារណាលើការបណ្តាក់ទុននៅក្នុងវិស័យសំណង់ នៅខេត្តព្រះសីហនុ ដែលពោរពេញទៅដោយសក្តានុពល និងលទ្ធភាពក្នុងការទទួលបានការលើកទឹកចិត្ត ពិសេសនានាពីរាជរដ្ឋាភិបាលកម្ពុជា។

តាមរយៈបាឋកថានេះ វិនិយោគិនជាច្រើន បានបង្ហាញការចាប់អារម្មណ៍យ៉ាងខ្លាំង ហើយបានចាត់ទុកខេត្តព្រះសីហនុ ជាគោលដៅវិនិយោគមួយនៅកម្ពុជា ដែលនេះជាសញ្ញាយ៉ាងវិជ្ជមាន ចំពោះសេដ្ឋកិច្ចកម្ពុជា និងខេត្តព្រះសីហនុ និយាយជារួម និងដោយឡែក៕

 ដោយៈ គង់ សូរិយា

       ព្រះសីហនុៈ លោក អ៊ិន លីវពីង ប្រធានសមាគមហឺហឺហ៊ួយ នៃសាធារណរដ្ឋប្រជាមានិតចិន បានដឹកនាំសហគ្រិន៥១ សហគ្រាសទូទាំងប្រទេសចិន មកធ្វើទស្សនកិច្ចនៅខេត្តព្រះសីហនុរយៈពេលមួយថ្ងៃ។

ដំណើរសិក្សាស្វែងយល់នេះ ធ្វើឡើងក្នុងគោលបំណងអង្កេតទីផ្សារពាក់ព័ន្ធ និងកំពង់ផែតំបន់សេដ្ឋកិច្ចពិសេសមណ្ឌលកម្សាន្ត និងទេសចរណ៍ ក៏ដូចជា វិស័យសណ្ឋាគារ។

ក្រោយពីទស្សនាស្ពតស្ដីអំពីសក្តានុពល របស់ខេត្តព្រះសីហនុលោកលោកអ៊ិន លីវពីង បានលើកឡើងថា ខេត្តព្រះសីហនុ គឺមានការអភិវឌ្ឍរីកចម្រើន និងជាកន្លែងដែលអ្នកវិនិយោគចិន មានការចាប់អារម្មណ៍ និងចូលមកបណ្ដាក់ទុនវិនិយោគ ក្នុងនោះក៏មានអ្នកវិនិយោគក្នុងសមាគមរបស់លោកមួយចំនួន បានចូលមកវិនិយោគរួចមកហើយដែរនាពេលកន្លងមក។

លោកក៏បានបន្ថែមថា ខេត្តព្រះសីហនុ ក្នុងគោលការណ៍អនុវត្តផ្លូវមួយខ្សែក្រវ៉ាត់មួយរបស់ប្រទេសចិន ជាក់ស្ដែងផ្លូវល្បឿនលឿនពីភ្នំពេញ មកខេត្តព្រះសីហនុបាន និងកំពុងឲ្យដំណើរការ ដែលជាការអភិវឌ្ឍន៍របស់ប្រទេសចិនទាំងនេះ គឺជាការដកពិសោធន៍ដោយផ្ទាល់អំពីអត្ថប្រយោជន៍ ដែលយើងបានលើកឡើងថា ជោគវាសនារួមតែមួយរវាងប្រទេសចិន កម្ពុជា ក្នុងការរឹតចំណងមិត្តភាពដែកថែប។

លោកសង្ឃឹមថា រដ្ឋបាលខេត្តជួយជ្រោមជ្រែង លើកទឹកចិត្តដល់សហគ្រិន នៃគណៈប្រតិភូ ដែលមានជំនឿលើរាជរដ្ឋាភិបាលក៏ដូចជាថ្នាក់ដឹកនាំខេត្តដូចនេះសហគមន៍ និងចូលរួមភិវឌ្ឍន៍ជាមួយរដ្ឋបាលខេត្ត ធ្វើយ៉ាងណាឲ្យខេត្តព្រះសីហនុ កាន់តែមានការអភិវឌ្ឍធ្វើឱ្យខេត្តក្លាយទៅជាទីក្រុងទំនើបឆ្លាត ដូចចក្ខុវិស័យរបស់រដ្ឋបាលខេត្តដែលបានអភិវឌ្ឍន៍នាពេលបច្ចុ​ប្បន្ននេះ។

លោកអ៊ិន លីវពីង និងប្រតិភូសហគ្រិនចិន បានជួបពិភាក្សាការងារជាមួយលោក ជាវ វិជ្ជាក់ អភិបាលរងខេត្តព្រះសីហនុកាលពីថ្ងៃទៅ២៩ មិនាកន្លងមកនេះ។

ក្នុងជំនួ​បនោះ លោក ជាវ វិជ្ជាក់ អភិបាលរងខេត្តព្រះសីហនុ បានលើកឡើងថាខេត្តព្រះសីហនុជាខេត្តតំបន់ឆ្នេរ មានធនធានធម្មជាតិ សក្តានុពលជាច្រើនរួមមានវិស័យសេដ្ឋកិច្ច វិស័យឧស្សាហកម្មពាណិជ្ជកម្ម ទេសចរណ៍ និងកសិកម្ម ដែលជាវិស័យអាទិភាពសម្រាប់ការអភិវឌ្ឍខឿន សេដ្ឋកិច្ចជាតិរបស់រាជរដ្ឋាភិបាល។

បច្ចុប្បន្នខេត្តព្រះសីហនុ កំពុងមានការអភិវឌ្ឍប្រែក្លាយទៅជាតំបន់សេដ្ឋកិច្ចពិសេសគំរូពហុបំណង ដោយសិក្សាបែងចែកជាតំបន់លំនៅដ្ឋាន ពាណិជ្ជកម្មឧស្សាហកម្ម រដ្ឋបាល ទេសចរណ៍ តំបន់សាសនា និងវប្បធម៌ ជាដើម។

ស្របជាមួយគ្នានេះ តាមរយៈការអភិវឌ្ឍ តំបន់សេដ្ឋកិច្ចពិសេសគំរូពហុបំណងមជ្ឈមណ្ឌលហិរញ្ញវត្ថុ និងមជ្ឈមណ្ឌលកំណើនសេដ្ឋកិច្ចជាតិ ឆ្នេរសមុទ្រ និងកោះដ៏ស្រស់ស្អាតបំផុតនៅលើសកលលោក សម្រាប់ការសំរាកលំហែកំសាន្ត មជ្ឍមណ្ឌលគាំទ្រផលិតកម្មបរិច្ចេកវិទ្យា និងការឆ្នៃប្រឌិត ច្រកទ្វារអន្តរជាតិ និងភស្តុភារជាតិ សម្រាប់តភ្ជាប់ទៅកាន់ទីផ្សារអាស៊ាន និងពិភពលោក ទីក្រុងគំរូក្នុងការគ្រប់​គ្រ​ង និងអភិបាលកិច្ចល្អ ជាមួយសេវាកម្ម ហេដ្ឋារចនាសម្ព័ន្ធសម្ភារៈប្រើប្រាស់ និងឱកាសការងារ។

សម្រាប់កិច្ចសហប្រតិបត្តិការ និងទំនាក់ទំនងមិត្តភាពអន្តរជាតិខេត្តព្រះសីហនុ បានបង្កើតសម្ព័ន្ធភាពខេត្ត-ក្រុងបងប្អូនជាមួយបណ្តាខេត្ត-ក្រុង នៅប្រទេសចិន បានចំនួន១៧ផងដែរ៕