ដោយៈ គង់ សូរិយា

       ព្រះសីហនុៈ លោក អ៊ិន លីវពីង ប្រធានសមាគមហឺហឺហ៊ួយ នៃសាធារណរដ្ឋប្រជាមានិតចិន បានដឹកនាំសហគ្រិន៥១ សហគ្រាសទូទាំងប្រទេសចិន មកធ្វើទស្សនកិច្ចនៅខេត្តព្រះសីហនុរយៈពេលមួយថ្ងៃ។

ដំណើរសិក្សាស្វែងយល់នេះ ធ្វើឡើងក្នុងគោលបំណងអង្កេតទីផ្សារពាក់ព័ន្ធ និងកំពង់ផែតំបន់សេដ្ឋកិច្ចពិសេសមណ្ឌលកម្សាន្ត និងទេសចរណ៍ ក៏ដូចជា វិស័យសណ្ឋាគារ។

ក្រោយពីទស្សនាស្ពតស្ដីអំពីសក្តានុពល របស់ខេត្តព្រះសីហនុលោកលោកអ៊ិន លីវពីង បានលើកឡើងថា ខេត្តព្រះសីហនុ គឺមានការអភិវឌ្ឍរីកចម្រើន និងជាកន្លែងដែលអ្នកវិនិយោគចិន មានការចាប់អារម្មណ៍ និងចូលមកបណ្ដាក់ទុនវិនិយោគ ក្នុងនោះក៏មានអ្នកវិនិយោគក្នុងសមាគមរបស់លោកមួយចំនួន បានចូលមកវិនិយោគរួចមកហើយដែរនាពេលកន្លងមក។

លោកក៏បានបន្ថែមថា ខេត្តព្រះសីហនុ ក្នុងគោលការណ៍អនុវត្តផ្លូវមួយខ្សែក្រវ៉ាត់មួយរបស់ប្រទេសចិន ជាក់ស្ដែងផ្លូវល្បឿនលឿនពីភ្នំពេញ មកខេត្តព្រះសីហនុបាន និងកំពុងឲ្យដំណើរការ ដែលជាការអភិវឌ្ឍន៍របស់ប្រទេសចិនទាំងនេះ គឺជាការដកពិសោធន៍ដោយផ្ទាល់អំពីអត្ថប្រយោជន៍ ដែលយើងបានលើកឡើងថា ជោគវាសនារួមតែមួយរវាងប្រទេសចិន កម្ពុជា ក្នុងការរឹតចំណងមិត្តភាពដែកថែប។

លោកសង្ឃឹមថា រដ្ឋបាលខេត្តជួយជ្រោមជ្រែង លើកទឹកចិត្តដល់សហគ្រិន នៃគណៈប្រតិភូ ដែលមានជំនឿលើរាជរដ្ឋាភិបាលក៏ដូចជាថ្នាក់ដឹកនាំខេត្តដូចនេះសហគមន៍ និងចូលរួមភិវឌ្ឍន៍ជាមួយរដ្ឋបាលខេត្ត ធ្វើយ៉ាងណាឲ្យខេត្តព្រះសីហនុ កាន់តែមានការអភិវឌ្ឍធ្វើឱ្យខេត្តក្លាយទៅជាទីក្រុងទំនើបឆ្លាត ដូចចក្ខុវិស័យរបស់រដ្ឋបាលខេត្តដែលបានអភិវឌ្ឍន៍នាពេលបច្ចុ​ប្បន្ននេះ។

លោកអ៊ិន លីវពីង និងប្រតិភូសហគ្រិនចិន បានជួបពិភាក្សាការងារជាមួយលោក ជាវ វិជ្ជាក់ អភិបាលរងខេត្តព្រះសីហនុកាលពីថ្ងៃទៅ២៩ មិនាកន្លងមកនេះ។

ក្នុងជំនួ​បនោះ លោក ជាវ វិជ្ជាក់ អភិបាលរងខេត្តព្រះសីហនុ បានលើកឡើងថាខេត្តព្រះសីហនុជាខេត្តតំបន់ឆ្នេរ មានធនធានធម្មជាតិ សក្តានុពលជាច្រើនរួមមានវិស័យសេដ្ឋកិច្ច វិស័យឧស្សាហកម្មពាណិជ្ជកម្ម ទេសចរណ៍ និងកសិកម្ម ដែលជាវិស័យអាទិភាពសម្រាប់ការអភិវឌ្ឍខឿន សេដ្ឋកិច្ចជាតិរបស់រាជរដ្ឋាភិបាល។

បច្ចុប្បន្នខេត្តព្រះសីហនុ កំពុងមានការអភិវឌ្ឍប្រែក្លាយទៅជាតំបន់សេដ្ឋកិច្ចពិសេសគំរូពហុបំណង ដោយសិក្សាបែងចែកជាតំបន់លំនៅដ្ឋាន ពាណិជ្ជកម្មឧស្សាហកម្ម រដ្ឋបាល ទេសចរណ៍ តំបន់សាសនា និងវប្បធម៌ ជាដើម។

ស្របជាមួយគ្នានេះ តាមរយៈការអភិវឌ្ឍ តំបន់សេដ្ឋកិច្ចពិសេសគំរូពហុបំណងមជ្ឈមណ្ឌលហិរញ្ញវត្ថុ និងមជ្ឈមណ្ឌលកំណើនសេដ្ឋកិច្ចជាតិ ឆ្នេរសមុទ្រ និងកោះដ៏ស្រស់ស្អាតបំផុតនៅលើសកលលោក សម្រាប់ការសំរាកលំហែកំសាន្ត មជ្ឍមណ្ឌលគាំទ្រផលិតកម្មបរិច្ចេកវិទ្យា និងការឆ្នៃប្រឌិត ច្រកទ្វារអន្តរជាតិ និងភស្តុភារជាតិ សម្រាប់តភ្ជាប់ទៅកាន់ទីផ្សារអាស៊ាន និងពិភពលោក ទីក្រុងគំរូក្នុងការគ្រប់​គ្រ​ង និងអភិបាលកិច្ចល្អ ជាមួយសេវាកម្ម ហេដ្ឋារចនាសម្ព័ន្ធសម្ភារៈប្រើប្រាស់ និងឱកាសការងារ។

សម្រាប់កិច្ចសហប្រតិបត្តិការ និងទំនាក់ទំនងមិត្តភាពអន្តរជាតិខេត្តព្រះសីហនុ បានបង្កើតសម្ព័ន្ធភាពខេត្ត-ក្រុងបងប្អូនជាមួយបណ្តាខេត្ត-ក្រុង នៅប្រទេសចិន បានចំនួន១៧ផងដែរ៕

ដោយៈ ចំណាន

       ភ្នំពេញៈ ក្រុមហ៊ុនផ្សារមូលបត្រកម្ពុជា (CSX) បានចេញសេចក្តីជូនដំណឹង ស្តីពីការលើពាក្យស្នើសុំពិនិត្យលទ្ធភាព អាចចុះបញ្ជីលក់មូលបត្រកម្មសិទ្ធិ (ភាគហ៊ុន) របស់ក្រុមហ៊ុន CamGSM PLC ដែលគេស្គាល់ថា ជាក្រុមហ៊ុនទូរគមនាគមន៍Cellcard របស់អ្នកឧកញ៉ា គិត ម៉េង ដែលជាក្រុមហ៊ុនរបស់ខ្មែរ។

ការប្រកាសនេះ បានធ្វើឡើងកាលពីថ្ងៃទី២៩ មិនា ឆ្នាំ២០២៣កន្លងមកនេះ។

ផ្សារមូលបត្រកម្ពុជាបញ្ជាក់ថា ខ្លួនបានសម្រេច ឯកភាពជាគោលការណ៍ លើពាក្យស្នើសុំពិនិត្យលទ្ធភាព អាចចុះបញ្ជីលក់មូលបត្រកម្មសិទ្ធិ នៅទីផ្សារគោលរបស់ក្រុមហ៊ុន ខេម ជ្ជីអេសអេម ម.ក នៅថ្ងៃទី២៩ ខែមីនា ឆ្នាំ២០២៣។

ដើម្បីអាចចុះបញ្ជី និងជួញដូរជាផ្លូវការនៅ ផ្សារមូលបត្រកម្ពុជាបាន ក្រុមហ៊ុនCellcard ត្រូវតែទទួលបានការអនុញ្ញាតឲ្យបោះផ្សាយលក់មូលបត្រកម្មសិទ្ធិ ជាសាធារណៈនិយ័តករមូលបត្រកម្ពុជា និងត្រូវបំពេញនូវលក្ខខណ្ឌផ្សេងៗមួយចំនួនទៀត ពាក់ព័ន្ធនឹងការចុះបញ្ជីនៅ ផ្សារមូលបត្រកម្ពុជា។

ក្រុមហ៊ុន Cellcard ជាក្រុមហ៊ុនទីពីរ ដែលទទួលបានការឯកភាពជាគោលការណ៍ លើពាក្យស្នើសុំពិនិត្យលទ្ធភាព អាចចុះបញ្ជីលក់មូលបត្រកម្មសិទ្ធិនៅផ្សារមូលបត្រកម្ពុជា ក្នុងឆ្នាំ២០២៣នេះ ហើយក៏ជាក្រុមហ៊ុនទីប្រាំបួន ដែលគ្រោងនឹងចុះបញ្ជីនៅទីផ្សារគោលរបស់ ផ្សារមូលបត្រកម្ពុជាផងដែរ។

ក្រុមហ៊ុននេះ ត្រូវបានបង្កើតឡើងតាំងពីឆ្នាំ១៩៩៦ ដែលផ្តល់សេវា ទូរគមនាគមន៍ឈានមុខមួយ ក្នុងប្រទេសកម្ពុជា រួមមានផ្នែកដំឡើង និងដំណើរការឧបករណ៍ និងគ្រឿងចក្រទាំងអស់ ដែលប្រើប្រាស់ពាក់ព័ន្ធនឹងប្រតិបត្តិការ នៃបណ្ដាញទូរស័ព្ទចល័ត GSM ។

បច្ចុប្បន្នក្រុមហ៊ុន មានហាងលក់រាយចំនួន៥២ទីតាំង បណ្ដាញចែកចាយចំនួន ២៩,០០ទីតាំង និងមានទីតាំងCell Site គ្របដណ្តប់ទូទាំងប្រទេសចំនួនប្រមាណ៣០០០កន្លែង៕

ដោយ៖ វឌ្ឍនៈ

ភ្នំពេញ ៖ វិស័យទេសចរណ៍ក្នុងខេត្តសៀមរាប បានរងផលប៉ះពាល់ធ្ងន់ធ្ងរជាងគេ ក្នុងចំណោមតំបន់សក្ដានុពលលើវិស័យទេសចរណ៍ក្នុងប្រទេសកម្ពុជាអំឡុងពេលវិបត្តិកូវីដ១៩ ហើយសណ្ឋាគារភាគច្រើននៅក្នុងខេត្តនេះបានបិទទ្វារ និងផ្អាកដំណើរ តែវិស័យនេះបានចាប់ផ្ដើមរើបឡើងវិញចាប់ពីកម្ពុជាបានប្រកាសបើកប្រទេសបើកសេដ្ឋកិច្ចឡើងវិញកាលពីចុងឆ្នាំ ២០២១ ។

មកដល់ដើមឆ្នាំ ២០២៣នេះ សណ្ឋាគារតែជាងពាក់កណ្ដាលប៉ុណ្ណោះ បានបើកដំណើរការឡើងវិញនិងនៅសល់ ពាក់កណ្ដាលទៀតបន្តផ្អាកដំណើរការ ។

លោកទៀ សីហា អភិបាលខេត្តសៀមរាប ថ្លែងនៅក្នុងសន្និសីទសារព័ត៌មានកាលពីព្រឹកថ្ងៃទី២៩ មីនា ២០២៣ នាទីស្ដីការគណៈរដ្ឋមន្ត្រីបានមានប្រសាសន៍ថា ក្នុងវិបត្តិកូវីដ១៩ សណ្ឋាគារមួយចំនួនធំបានបិទនិងផ្អាកដំណើរការ ហើយក្រោយមក ពោលគឺនៅពេលរាជរដ្ឋាភិបាលបានបើកប្រទេស បើកសេដ្ឋកិច្ចឡើងវិញ មានភ្ញៀវទេសចរក្នុងស្រុកជាច្រើនបានចាប់ផ្ដើម ធ្វើដំណើរកម្សាន្តជាពិសេសទៅកាន់ខេត្តសៀមរាប ធ្វើឱ្យសណ្ឋាគារមួយចំនួន ក៏បានបើកដំណើរការឡើងវិញផងដែរ ។

លោកបន្តថា រហូតមកដល់ពេលនេះ មានសណ្ឋាគារប្រមាណតែ៤០ទៅ៥០ភាគរយប៉ុណ្ណោះ បានបើកដំណើរការឡើងវិញ ហើយនៅជាងពាក់កណ្ដាលទៀបន្តផ្អាកដំណើរការ ។ លោកថា”នៅក្នុងពិធីបុណ្យចូលឆ្នាំប្រពៃណីខ្មែរខាងមុខនេះ សៀមរាបនឹងរៀបចំនូវព្រឹត្តិការណ៍អង្គរសង្ក្រាន ហើយយើងសង្ឃឹមថា តាមរយៈព្រឹត្តិការណ៍នេះ នឹងធ្វើឱ្យវិស័យទេសចរណ៍ ដូចជា សណ្ឋាគារ ផ្ទះសំណាក់ដែលបានផ្អាកកាលពីពេលកន្លងមកនោះ ចាប់ផ្ដើមដំណើរការប្រតិបត្តិការរបស់ខ្លួនឡើងវិញ ”។

លោកង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានមានប្រសាសន៍ថា នៅមុនវិបត្តិកូវីដ១៩ នៅក្នុងខេត្តសៀមរាបមានបន្ទប់សណ្ឋាគារចំនួន ៧៦.០០០បន្ទប់ និងផ្ទះសំណាក់ជិត៧.០០០បន្ទប់ ប៉ុន្តែមកដល់ពេលនេះ បន្ទប់សណ្ឋាគារដែលបានបើកបម្រើអតិថិជនមានប្រមាណ ១២.០០០បន្ទប់ ហើយសម្រាប់ព្រឹត្តិការណ៍អង្គរសង្ក្រាន មានភ្ញៀវកក់បន្ទប់សម្រាប់ស្នាក់នៅមានចន្លោះពី៨០ទៅ៩០ភាគរយនៃបន្ទប់ដែលមានរួចទៅហើយ ។

លោកបន្តថា នៅក្នុងឱកាសបុណ្យចូលឆ្នាំខាងមុខនេះ ក្រុមការងារមន្ទីរទេសចរណ៍បានទប់ស្កាត់ការឡើងថ្លៃហួសហេតុ ប៉ុន្តែនៅរៀងរាល់បុណ្យទាន ភ្ញៀវទេសចរតែងតែចូលចិត្តស្នាក់នៅក្នុងបន្ទប់លើសចំណុះ ដូចជាបន្ទប់ដែលផ្ទុកមនុស្សត្រឹមតែ២នាក់ទៅ៤នាក់ តែពេលចូលឆ្នាំពួកគាត់ស្នាក់នៅរហូតដល់ជិត១០នាក់ដែលធ្វើឱ្យម្ចាស់ផ្ទះសំណាក់ត្រូវឡើងថ្លៃតិចតួចសម្រាប់ការប្រើប្រាស់ថ្លៃទឹក ការប្រើប្រាស់ភ្លើងនិងមានសណ្ឋាគារខ្លះផ្ដល់អាហារត្រូវឡើងថ្លៃសម្រាប់អាហារជាដើម ៕

សុខុម

ក្រុងឡុងដ៍: ទន្ទឹមនឹងការអបអរសាទរចំពោះភាពជឿនលឿន នៃបច្ចេកវិទ្យាដែលអ្នកវិទ្យាសាស្ត្រខំប្រឹងបង្កើតឡើងដើម្បីសម្រួលដល់ការរស់នៅរបស់មនុស្សសម័យថ្មីឱ្យកាន់តែប្រសើរឡើង វាក៏ជាហានិភ័យខ្ពស់មួយដែរ ដែលបច្ចេកវិទ្យាអាចដណ្ដើមការងារពីមនុស្សកាន់តែច្រើនឡើងៗគួរឱ្យព្រួយបារម្ភ។

តួយ៉ាងរបាយការណ៍របស់ធនាគារវិនិយោគខ្នាតយក្សរបស់សហរដ្ឋអាមេរិក Goldman Sachs បង្ហាញថា បច្ចេកវិទ្យាបញ្ញាសិប្បនិម្មិត (AI) អាចនឹងដណ្ដើមការងារពេញម៉ោងពីមនុស្សរហូតដល់ទៅ៣០០លានកន្លែង។

របាយការណ៍ដដែលបង្ហាញថា AI អាចនឹងជំនួសការងាររបស់មនុស្សរហូតដល់ទៅ១ភាគ៤នៅក្នុងសហរដ្ឋអាមេរិក និងអឺរ៉ុប ប៉ុន្តែក៏អាចមានន័យថា វាជាការងារថ្មីៗ ហើយក៏ជួយបង្កើនផលិតភាពការងារផងដែរ។

ហើយនៅទីបំផុតវាអាចបង្កើនតម្លៃសរុបប្រចាំឆ្នាំនៃទំនិញ និងសេវាកម្មដែលផលិតទូទាំងពិភពលោកបាន៧%។

របាយការណ៍នេះលើកឡើងថា បច្ចេកវិទ្យា Generative AI (GenAI) ជាបញ្ញាសិប្បនិម្មិតមួយប្រភេទដែលអាចបង្កើតទិន្នន័យបានយ៉ាងសម្បូរបែបដូចជារូបភាព វីដេអូ សំឡេង អត្ថបទ និងគំរូ 3D ជាដើមដែលខុសគ្នាពីការងាររបស់មនុស្ស គឺជា “ការរីកចម្រើនដ៏ធំមួយ”។

រដ្ឋាភិបាលអង់គ្លេស មានបំណងជំរុញការវិនិយោគលើ AI ដែលនឹង “ជំរុញផលិតភាពក្នុងសេដ្ឋកិច្ចទាំងមូល” ហើយបានព្យាយាមធានាអះអាងចំពោះសាធារណជនអំពីផលប៉ះពាល់របស់វា។

របាយការណ៍នេះកត់សម្គាល់ថា ផលប៉ះពាល់របស់ AI នឹងមានខុសៗគ្នាទៅតាមវិស័យផ្សេងៗគ្នាដែលក្នុងនោះផលប៉ះពាល់៤៦%ក្នុងផ្នែករដ្ឋបាល និង៤៤%ក្នុងវិជ្ជាជីវៈច្បាប់ អាចដំណើរការដោយស្វ័យប្រវត្តិ ប៉ុន្តែមានតែ៦%ប៉ុណ្ណោះក្នុងវិស័យសាងសង់ និង៤%ក្នុងវិស័យថែទាំ។

សារព័ត៌មាន BBC News ធ្លាប់បានចុះផ្សាយរួចមកហើយនូវការព្រួយបារម្ភរបស់ក្រុម Artist ដែលលើកឡើងថា ម៉ាស៊ីនបង្កើតរូបភាពរបស់ AI អាចដណ្ដើមការងាររបស់ពួកគេ៕ BBC៕

ដោយ: គង់ លាងហួរ
ហុងកុង: តម្លៃផ្ទះឯកជននៅទីក្រុងហុងកុងបានកើនឡើង២,២ភាគរយនៅក្នុងខែកុម្ភៈ ដែលជាការកើនឡើងប្រចាំខែទី២ជាប់ៗគ្នា បន្ទាប់ពីព្រំដែនជាមួយប្រទេសចិនបានបើកឡើងវិញ អត្រាការប្រាក់កំពុងហក់ឡើងដល់កំពូល និងគម្លាតនៃការចាប់ផ្តើមគម្រោងថ្មី។

យោងតាមទិន្នន័យផ្លូវការបានបង្ហាញថា ការកើនឡើងតម្លៃផ្ទះក្នុងខែកុម្ភៈបានកើតឡើងក្រោយពីមានការកើនឡើង១ភាគរយនៅក្នុងខែមករា ហើយជាការកើនឡើងដ៏ធំបំផុតគិតចាប់តាំងពីខែឧសភា ឆ្នាំ២០២០មក។

ហុងកុងត្រូវបានចាត់ថ្នាក់ដោយក្រុមហ៊ុនស្ទង់មតិ Demographia ថាជាទីក្រុងដែលមានតម្លៃសមរម្យបំផុតនៅលើពិភពលោកក្នុងឆ្នាំ២០២២ ដោយផ្អែកលើតម្លៃអចលនទ្រព្យធៀបនឹងប្រាក់ចំណូលជាមធ្យម ដោយទីក្រុងស៊ីដនី និងទីក្រុង Vancouver ស្ថិតនៅពីក្រោយ។

ក្រុមហ៊ុន Demographia បានឱ្យដឹងនៅក្នុងរបាយការណ៍របស់ខ្លួនកាលពីសប្តាហ៍មុនថា “ទីក្រុងហុងកុងត្រូវបានផ្តល់ការទទួលខុសត្រូវច្បាស់លាស់មួយដោយរដ្ឋាភិបាលកណ្តាលក្នុងការធ្វើឱ្យប្រសើរឡើងនូវលទ្ធភាពទិញលំនៅដ្ឋាន និងបង្កើនទំហំផ្ទះ”។

នៅឆ្នាំ២០២៣នេះ អ្នកវិភាគមួយចំនួនបានបង្កើនការព្យាករណ៍របស់ពួកគេសម្រាប់តម្លៃផ្ទះនៅក្នុងទីក្រុងហុងកុងក្នុងរយៈពេលប៉ុន្មានសប្តាហ៍កន្លងមកនេះ ដោយរំពឹងថា នឹងមានការផ្លាស់ប្តូរឡើងវិញ បន្ទាប់ពីតម្លៃផ្ទះបានធ្លាក់ចុះប្រហែល១៥ភាគរយកាលពីឆ្នាំមុន។

លោក Cusson Leung អ្នកវិភាគរបស់ក្រុមហ៊ុន JP Morgan បានរំពឹងថា “តម្លៃផ្ទះនឹងកើនឡើងចន្លោះពី១០ទៅ១៥ភាគរយនៅឆ្នាំនេះ ដែលជំរុញដោយល្បឿនយឺតក្នុងការដំឡើងអត្រាការប្រាក់ សេដ្ឋកិច្ចកាន់តែរុឹងមាំ និងកំណើននៃការទិញដោយអ្នកមិនមែនក្នុងស្រុក”៕