ដោយៈ គង់ សូរិយា

       កោះកុងៈ អភិ​បាលនៃគណៈអភិបាលខេត្តកោះកុង លោកជំទាវមិថុនា ភូថងបានលើកឡើងនូវភាពជោគជ័យជាច្រើន ចំណុចរបស់​រដ្ឋាភិបាល កាលពីឆ្នាំ២០២២ ក្រោមការដឹកនាំរបស់សម្តេចតេជោ។

លោកជំទាវបានថ្លែងក្នុងពិធីបើកសន្និបាតការងារ ឆ្នាំ២០២២ និងលើកទិសដៅសម្រាប់ឆ្នាំ២០២៣កាលពីថ្ងៃទី២២ មិនាថា ចំ​ណុចសំខាន់ៗ ដែលរាជរដ្ឋាភិបាលក្រោមការដឹកនាំ របស់សម្តេចតេជោ សម្រេចបានរួមមាន  ទី -ការរក្សាបានសុខសន្តិភាព និងស្ថេរភាពនយោ​បាយ ទី-ការរៀបចំការបោះឆ្នោត ជ្រើសរើសក្រុមប្រឹក្សាឃុំ សង្កាត់ បានល្អប្រកបដោយសេរី យុត្តិធម៌និងគ្មានអំពើហិង្សា។

ទី៣-ការគ្រប់គ្រងជំងឺកូវីដ-១៩បានយ៉ាងល្អ តាមរយៈវិធានសុខាភិបាល និងការចាក់ ស្រោចវ៉ាក់សាំង តាមរយៈយុទ្ធសាស្ត្រផ្ការីក និងប្រភពផ្គត់ផ្គង់វ៉ាក់សាំង។ ទី៤ -ការគ្រប់គ្រងសេដ្ឋកិច្ចបានល្អប្រសើរ ជម្នះនឹងវិបត្តិកូវីដ-១៩ និងវិបត្តិសង្គ្រាមនៅ អ៊ុយក្រែន។

ទី៥-ការអនុវត្តនយោបាយការបរទេស ឈរលើភាពឯករាជ្យ ដោយផ្អែកលើច្បាប់អន្តរជាតិ និង ការដឹកនាំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធក្នុងឆ្នាំ២០២២ ប្រកបដោយភាពជោគជ័យ គួរជាទីមោទកៈបំផុត។

លោកជំទាវមិថុនា ភូថងបានបន្តថា ដោយឡែកសម្រាប់ឆ្នាំ២០២៣នេះ ប្រទេសកម្ពុជានឹងមានព្រឹត្តិការណ៍ សំខាន់ៗចំនួន២
ទី១៖ ការត្រៀមខ្លួនធ្វើជាម្ចាស់ផ្ទះ សម្រាប់ការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ដែលសម្តេចតេជោ មានបំណងរៀបចំទទួលស្វាគមន៍ភ្ញៀវជាតិ និងអន្តរជាតិ ប្រកបដោយភាពកក់ក្តៅ បដិសណ្ឋារកិច្ចល្អ និងសេវាល្អសម្រាប់គ្រប់ប្រតិភូកីឡា និងភ្ញៀវ ជាតិ-អន្តរជាតិ ដើម្បីទទួលបានបទពិសោធន៍ល្អបំផុត ក្នុងការចូលរួមការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ។

គិតត្រឹមថ្ងៃទី២២ ខែមីនា ឆ្នាំ២០២៣នេះ គឺនៅសល់ តែ៤៤ថ្ងៃទៀតប៉ុណ្ណោះ នឹងឈានដល់ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេម លើកទី១២ ដែលនឹងប្រារព្ធពិធីបើកការប្រកួតនាថ្ងៃទី៥ ខែឧសភា ឆ្នាំ២០២៣ ដែលកម្ពុជា ធ្វើជាម្ចាស់ផ្ទះ។

ទី២ ការត្រៀមលក្ខណៈសម្រាប់ការរៀបចំ ការបោះឆ្នោតដ៏សំខា​ន់មួយទៀតនោះគឺ ការបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលនឹងប្រព្រឹត្តទៅនៅ ថ្ងៃអាទិត្យ ទី២៣ ខែកក្កដា ឆ្នាំ២០២៣ខាងមុខ។ ពាក់ព័ន្ធទៅនឹងកិច្ចការងារ ដ៏មានសារសំខាន់សម្រាប់បងប្អូនប្រជាពលរដ្ឋ ចូលរួមបោះឆ្នោតនាពេលខាងមុខដ៏ខ្លីនេះ៕

ភ្នំពេញ ៖ សម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងនៅក្នុងពិធីប្រគល់សញ្ញាបត្រជូននិស្សិតនៃវិទ្យាស្ថានវ៉ាន់ដានៅព្រឹកថ្ងៃទី២២ មីនា ២០២៣បានឱ្យដឹងថា ហ៊ុនម៉ាណែត គឹមានលក្ខណៈសម្បត្តិគ្រប់គ្រាន់ក្នុងការធ្វើជានាយករដ្ឋមន្ត្រីនៃព្រះរាជាណាចក្រកម្ពុជានៅពេលអនាគត ។
សម្ដេចតេជោបន្តថា ហ៊ុន ម៉ាណែតជាពលរដ្ឋកម្ពុជាដែលមានសិទ្ធិគ្រប់គ្រាន់ក្នុងការឈរឈ្មោះធ្វើជានាយករដ្ឋមន្ត្រី ហើយរដ្ឋធម្មនុញ្ញហាមតែអ្នកដែលជាប់គុក ឬអ្នកដែលតុលាការហាមឱ្យធ្វើនយោបាយ និងមួយទៀតគឺអ្នកមិនមែនជាសមាជិករដ្ឋសភា ពីព្រោះក្នុងរដ្ឋធម្មនុញ្ញបានចែងច្បាស់ថា នាយករដ្ឋមន្ត្រីត្រូវតែជាសមាជិករដ្ឋសភា ។

សម្ដេចតេជោហ៊ុនសែនបន្តទៀតថា បើសិនជាហ៊ុន ម៉ាណែតចេញឃោសនារកសម្លេងឆ្នោត គឺត្រូវឈប់ពីកងទ័ពជើងគោកឬក៏ត្រូវមានអ្នកមកជំនួសជាស្តីទី ។ នៅពេលដែលម៉ាណែតត្រូវកាន់តួនាទីជានាយករដ្ឋមន្ត្រីម៉ាណែតត្រូវលាចេញពីកងទ័ពហើយមកធ្វើជាសមាជិករដ្ឋសភា តែបើសិនជាមិនទាន់ក្លាយជានាយករដ្ឋមន្ត្រី ម៉ាណែតអាចលាចេញពីសមាជិកសភា ទៅកាន់ការងារជាមេបញ្ជាការកងទ័ពជើងគោកវិញ ។
សម្ដេចតេជោបន្ថែមថា លក្ខខណ្ឌទាំងនេះបានធ្វើឱ្យលោកហ៊ុនម៉ាណែតមានលក្ខណៈសម្បត្តិគ្រប់គ្រាន់ហើយក្នុងការក្លាយជានាយករដ្ឋមន្ត្រី ហើយបើសិនជាម៉ាណែតមិនមានលក្ខណៈសម្បត្តិគ្រប់គ្រាន់តើមានអ្នកណាទៀតដែលអាចស័ក្ដិសមឬក៏មានតែក្រុមប្រឆាំងទេដែលស័ក្ដិសម ?

ដោយ: គង់ លាងហួរ
ភ្នំពេញ: សាកលវិទ្យាល័យ Lanmei ដែលមានមូលដ្ឋាននៅទីក្រុងភ្នំពេញកាលពីម្សិលមិញនេះបានបើកដំណើរការមជ្ឈមណ្ឌលហោះហើរហាត់ត្រាប់ប្រភេទ Airbus A320 ក្នុងប្រទេសកម្ពុជា ដើម្បីផ្តល់ជំនាញបណ្តុះបណ្តាល និងមធ្យោបាយផ្សេងៗទៀត។

ការសម្ពោធជាផ្លូវការនេះត្រូវបានធ្វើឡើងក្រោមវត្តមានរបស់លោក Li Kun ប្រធានក្រុមហ៊ុនអាកាសចរណ៍ Lanmei Aviation Group ដែលមានមូលដ្ឋាននៅប្រទេសចិន លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ឯកអគ្គរដ្ឋទូតចិនប្រចាំកម្ពុជា លោក Wang Wentian និងមន្ត្រីរាជការឯទៀតផងដែរ។

លោក Li បានមានប្រសាសន៍ថា មជ្ឈមណ្ឌលហោះហើរអាកាសយានហាត់ត្រាប់អន្តរជាតិ ដែលមានទីតាំងនៅជិតអាកាសយានដ្ឋានអន្តរជាតិភ្នំពេញនឹងរួមចំណែកដល់ការកសាងសមត្ថភាពធនធានមនុស្សក្នុងឧស្សាហកម្មអាកាសចរណ៍ស៊ីវិលនៅកម្ពុជា។

លោក Li បានអះអាងថា ក្រុមហ៊ុនមេ Lanmei Aviation Group បានទទួលការគាំទ្រផ្នែកហិរញ្ញវត្ថុពីក្របខណ្ឌកិច្ចសហប្រតិបត្តិការឡានឆាង-មេគង្គ(MLC)។

លោក Li បានមានប្រសាសន៍ថា “មជ្ឈមណ្ឌលហោះហើរអន្តរជាតិនេះនឹងចូលរួមចំណែកក្នុងការកសាងធនធានមនុស្សនៅកម្ពុជា និងថែមទាំងជួយលើកកម្ពស់ដល់ការតភ្ជាប់ផ្លូវអាកាសនៅក្នុងតំបន់ផងដែរ”។

លោក ម៉ៅ ហាវណ្ណាល់ បានចាត់ទុក “ការបើកមជ្ឈមណ្ឌលនេះថាជាព្រឹត្តិការណ៍ដ៏សំខាន់មួយក្នុងការអភិវឌ្ឍន៍វិស័យអាកាសចរណ៍ និងធនធានមនុស្សនៅកម្ពុជា”។

លោកបានបន្ថែមថា “ក្នុងនាមជាអ្នកផ្តល់ការបណ្តុះបណ្តាលមួយសម្រាប់ក្រុមហ៊ុនមេ–Lanmei Aviation Group សាកលវិទ្យាល័យ Lanmei នៃកម្ពុជានឹងដើរតួនាទីយ៉ាងសំខាន់ក្នុងការអប់រំ ការកសាងសមត្ថភាពធនធានមនុស្ស និងគាំទ្រតម្រូវការសម្រាប់អាកាសចរណ៍ ដោយសារការយល់ដឹងអំពីសកម្មភាពអាកាសចរណ៍ និងលំហអាកាសកើនឡើងក្នុងចំណោមយុវជនកម្ពុជា”៕

ដោយ: គង់ លាងហួរ
ភ្នំពេញ: ទោះបីជាមានសម្ពាធផ្នែកនយោបាយក្តី ប៉ុន្តែទំនាក់ទំនងសេដ្ឋកិច្ចរវាងកម្ពុជា និងសហរដ្ឋអាមេរិកនៅតែរុឹងមាំក្នុងរយៈពេលប៉ុន្មានឆ្នាំចុងក្រោយនេះ ដោយប្រទេសនេះមានចំណែកធំបំផុតនៃការនាំចេញរបស់កម្ពុជាប្រហែល៤០ភាគរយ។

សភាពាណិជ្ជកម្មអាមេរិកនៅកម្ពុជា (AmCham) បានដើរតួនាទីយ៉ាងសំខាន់ក្នុងការពង្រឹងទំនាក់ទំនងទាំងនេះ ដែលប្រធានថ្មីរបស់សភានេះគឺលោក Devin Barta បានហៅថាជា “អ្វីមួយដែលមានសារៈសំខាន់សម្រាប់ប្រទេសកម្ពុជា”។

លោក Devin បាន​ថ្លែង​ថា ទំនាក់ទំនង​នេះ​បាន​ជួយ​ដល់ប្រទេស​កម្ពុជា​ឲ្យ​មាន​កំណើន​សេដ្ឋកិច្ច។ លោកបានមានប្រសាសន៍ថា “៤០ភាគរយនេះ (ចំណែកនៃការនាំចេញ) បានជួយបង្កើតការងារជាច្រើនសម្រាប់ប្រជាជនកម្ពុជា ហើយវាក៏បង្ហាញថាសហរដ្ឋអាមេរិកនៅតែជាទីផ្សារបើកចំហសម្រាប់ទំនិញ និងសេវាកម្មរបស់កម្ពុជាផងដែរ”។

លោក Devin ដែលជានាយកគ្រប់គ្រងផលិតផល AHF ផងដែរនោះ ក៏ចង់ឃើញក្រុមហ៊ុនអាមេរិកកាន់តែច្រើនចូលមក និងពង្រីកអាជីវកម្មនៅក្នុងប្រទេសកម្ពុជាជាមួយនឹងការវិនិយោគរបស់ពួកគេ។

លោក​ Devin Barta បាន​បន្ត​ថា​ “យើង​សង្ឃឹម​ថា​នឹង​ធ្វើ​ការ​ជាមួយ​រដ្ឋាភិបាល​កម្ពុជា​សម្រាប់​បរិយាកាស​ប្រតិបត្តិការ​ដែល​ងាយស្រួល​សម្រាប់​អាជីវកម្ម​”។

លោក Devin បានយល់ស្របថា “ប្រព័ន្ធ GSP គឺជាការលើកទឹកចិត្តដ៏សំខាន់មួយសម្រាប់ក្រុមហ៊ុនដែលនាំចេញពីកម្ពុជាទៅកាន់សហរដ្ឋអាមេរិក”។ លោក​សង្ឃឹម​ថា​ “វានឹងត្រូវបានបន្តផ្តល់ឡើង​វិញ ហើយយើង​កំពុង​ស្ថិត​នៅ​ក្នុង​ជំហររង់ចាំ​មើល​នៅ​ពេល​នេះទាក់​ទង​នឹង​ការ​បន្តផ្តល់ប្រព័ន្ធ GSP”។

ទាក់ទិន​នឹង​បរិយាកាស​វិនិយោគ​នៅ​កម្ពុជា លោក Devin បានថ្លែង​ថា “ច្បាប់វិនិយោគថ្មីរបស់កម្ពុជាមានធាតុផ្សំដ៏គួរឱ្យទាក់ទាញជាច្រើន ហើយខ្ញុំអាចតស៊ូមតិសម្រាប់ប្រទេសកម្ពុជាដល់ក្រុមហ៊ុនជាច្រើនដែលចាប់អារម្មណ៍ក្នុងការវិនិយោគនៅទីនេះដោយផ្អែកលើរចនាសម្ព័ន្ធនៃច្បាប់នោះក្នុងអំឡុងពេលព្រឹត្តិការណ៍ពាណិជ្ជកម្មថ្មីៗនេះនៅទីក្រុងបាងកក”៕

ដោយៈ សុខុម

ប៉េកាំង: ការជីកទន្លេសិប្បនិមិត្ត ដែលវែងជាងគេបំផុតលើពិភពលោកទាមទារពេលវេលា ការខិតខំប្រឹងប្រែងដោយភាពអំណត់ខ្ពស់ និងការបោះទុនវិយោគយ៉ាងច្រើនសម្បើម ហើយទាំងអស់នេះជាអ្វីដែលមហាយក្សចិន អាចធ្វើបានយ៉ាងអស្ចារ្យ។

លាតសន្ធឹងប្រវែង រហូតដល់ទៅ១.៧៨២គីឡូម៉ែត្រ ដែលវែងជាងប្រមាណ៩ដង ធៀបនឹងព្រែកជីកSuez Canal ក្នុងប្រទេសអេហ្ស៊ីប ទន្លេសិប្បនិមិត្តនៅប្រទេសចិន Grand Canal បានក្លាយជាទន្លេសិប្បនិមិត្ត ដែលវែងបំផុតលើពិភពលោក។

ដោយត្រូវបានអង្គការ UNESCO ចុះបញ្ជីទទួលស្គាល់ជាទីតាំងសម្បត្តិបេតិកភណ្ឌពិភពលោក ក្នុងឆ្នាំ២០១៤ ទន្លេសិប្បនិមិត្ត Grand Canal ឬ ដែលគេស្គាល់ថា Jing-Hang Canal រត់ពីទីក្រុងប៉េកាំង ភាគខាងជើងឆ្ពោះទៅកាន់ទីក្រុងហាងចូវ (Hangzhou) ភាគខាងត្បូង ហើយតភ្ជាប់ទៅកាន់ផ្លូវទឹកជាច្រើន រួមទាំងទន្លេលឿង (Yellow River) និងទន្លេយ៉ាងចឺ (Yangtze River) ផងដែរ។

យោងតាមឯកសារបង្ហាញថា ទន្លេសិប្បនិមិត្តនេះ ត្រូវបានជីកជាផ្នែកៗ ដាច់ដោយឡែកតាំងពីជាង២.៥០០ឆ្នាំមុនមកម៉្លេះ ហើយវាត្រូវបានទម្លាយបញ្ចូលគ្នា ជាបន្តបន្ទាប់នៅប៉ុន្មានសតវត្សរ៍ចុងក្រោយនេះ។

នៅសតវត្សរ៍ចុងក្រោយនេះ ផ្នែកខ្លះនៃទន្លេសិប្បនិមិត្តនេះបានរីងស្ងួតអស់ ឬត្រូវបានបំពុលដោយភាពកខ្វក់។ ទោះជាយ៉ាងណា នៅឆ្នាំ២០២២ គំនិតផ្តួចផ្តើមមួយរបស់រដ្ឋាភិបាលចិន បានធ្វើឱ្យទន្លេសិប្បនិមិត្ត Grand Canal ទាំងមូលត្រូវបានសម្អាត និងតភ្ជាប់ឡើងវិញដោយជោគជ័យ។

យោងតាម Wikipedia បង្ហាញថា ជាទូទៅទន្លេសិប្បនិមិត្តនេះមានទទឹងអប្បបរមា១០០ម៉ែត្រ៕ CNN៕