ដោយៈ សុខុម

ញូវយ៉ក: ជាធម្មតានាវាកម្សាន្តខ្នាតយក្ស តែងតែផុសត្រដែតឡើងលើផ្ទៃសាគរ ហើយដោយសារវាមានទំហំធំ ទោះជានៅឆ្ងាយក៏អាចមើលឃើញដែរ។

ប៉ុន្តែសម្រាប់នាវាកម្សាន្តខ្នាតយក្សថ្មី ដែលអភិវឌ្ឍដោយក្រុមហ៊ុន Jozeph Forakis Design ត្រូវបានឌីហ្សាញឡើងយ៉ាងពិសេសដើម្បីឱ្យវាអាចបំបាំងកាយបានយ៉ាងអស្ចារ្យ។

ក្រុមហ៊ុនឌីហ្សាញអាមេរិកខាងលើបាននិយាយថា នាវាកម្សាន្តឈ្មោះឈ្មោះ Pegasus ដែលមានប្រវែង៨៨ម៉ែត្រនេះ នឹងក្លាយជានាវាកម្សាន្តព្រីន3D ខ្នាតយក្សដំបូងបង្អស់របស់ពិភពលោក។ នេះបើយោងតាមសារព័ត៌មាន CNN ចុះផ្សាយកាលពីថ្ងៃអង្គារ ទី២១ ខែមីនា។

ក្រុមហ៊ុនបានបន្ថែមទៀតថា ការស្រោបដោយកញ្ចក់លើស្លាប និងតួនាវាកម្សាន្តខ្នាតយក្សនេះ ទាំងមូលជួយឱ្យនាវានេះ បន្ស៊ីខ្លួនវាបានយ៉ាងល្អ ទៅនឹងបរិយាកាសជុំវិញ ដែលមើលទៅវាហាក់ដូចបំបាំងកាយបានយ៉ាងអស្ចារ្យ។

តួនាវាកម្សាន្តខ្នាតយក្សនេះ ត្រូវបានបំពាក់ដោយបន្ទះសូឡា ដែលផ្ដល់ថាមពលដល់ម៉ាស៊ីនញែកធាតុ ដោយអគ្គីសនីដែលទាញយកអ៊ីដ្រូហ្សែនពីទឹកសមុទ្រ។ បន្ទាប់មកអ៊ីដ្រូហ្សែននោះ នឹងត្រូវបំប្លែ​ងទៅជាថាមពលអគ្គិសនី សម្រាប់ប្រើប្រាស់នៅលើនាវា។

យោងតាមក្រុមការងារនៅក្រុមហ៊ុនឌីហ្សាញ Jozeph Forakis Design ឱ្យដឹងថា គម្រោងនេះត្រូវបានអភិវឌ្ឍឡើង ជាមួយនឹងទស្សនៈ “វិទ្យាសាស្ត្រពិត មិនមែនប្រឌិត” ហើយបច្ចេកវិទ្យាសំខាន់ៗ ដែលនឹងត្រូវបំពាក់លើនាវាកម្សាន្តនេះ នឹងត្រូវការការស្រាវជ្រាវបន្ថែមទៀត មុននឹងឈានដល់ការផលិតនាវានេះឡើង។

និយាយរួមទៅ វាគ្រាន់តែជាខន់សិបប៉ុណ្ណោះ ដូច្នេះដំណើរការផលិតនាវានេះ ឡើងមិនដឹងជាចាប់ផ្ដើមនៅពេលណា ឱ្យប្រាកដនោះឡើយ៕ CNN៕

 ដោយៈ ជេស៊ីកា

       ភ្នំពេញៈ ដើម្បីពង្រីកទីផ្សារ និងជម្រុញការនាំចេញក្រសួងពា​ណិជ្ជកម្មគ្រោងចុះបញ្ជីរ ម៉ាកទំនិញសំគាល់ភូមិសាស្រ្ត ចំនួន៤ទៀតនាពេលខាងមុខ។

បច្ចុប្បន្នក្រសួងពាណិជ្ជកម្ម បានចុះបញ្ជីការពារម៉ាកសម្គាល់ភូមិសាស្រ្តទំនិញចំនួន ៤រួមមាន ម្រេចកំពត, ស្ករត្នោតកំពង់ស្ពឺ, ក្រូចថ្លុងកោះទ្រង់ និងទឹកឃ្មុំព្រៃមណ្ឌលគិរី។

លោកអ៊ុក ប្រជារដ្ឋលេខាធិការក្រសួងពាណិជ្ជកម្ម បានមានប្រសាសន៍ឲ្យដឹងកាលពីថ្ងៃម្សិលម៉ិញនេះថា បច្ចុប្បន្នក្រសួងបាន និងកំពុងបន្តអនុវត្ត គម្រោងចុះបញ្ជីម៉ាកសម្គាល់ភូមិសាស្រ្តទំនិញ ៤បន្ថែមទៀតរួមមាន អំបិល និងផ្កាអំបិលកំពត ក្នុងខេត្តកំពត និងខេត្តកែប បង្កងតាកែវក្នុងខេត្តតាកែវ ទឹកត្រីកំពតក្នុងខេត្តកំពត និងខេត្តកែប ព្រមទាំងក្ដាមថ្មកោះកុង៕

ដោយ: គង់ លាងហួរ

ភ្នំពេញ: ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន នៅថ្ងៃអង្គារនេះ បានកោតសរសើរប្រទេសចិន ចំពោះការគាំទ្រដ៏រ៉ឹងមាំរបស់ខ្លួន សម្រាប់កិច្ចសហប្រតិបត្តិការឡា​នឆាង-មេគង្គ (LMC) ក្នុងរយៈពេល៧ឆ្នាំកន្លងមកនេះ។

មន្ត្រីការទូតកំពូលកម្ពុជារូបនេះ បានមានប្រសាសន៍ថា “ខណៈដែលពិភពលោក កំពុងងើបឡើងវិញពីជំងឺរាតត្បាតកូវីដ-១៩ និងបន្តប្រឈមមុខ នឹងភាពមិនច្បាស់លាស់ដែលកំពុងកើតមាន ប្រទេសជាសមាជិកLMC បានបង្កើនកិច្ចសហប្រតិបត្តិការរបស់ពួកគេ ឱ្យស៊ីជម្រៅ ដើម្បីប្រយុទ្ធប្រឆាំងនឹងបញ្ហាប្រឈមទាំងនេះ ដើម្បីធានាថាតំបន់នៅតែមានសុវត្ថិភាព និងបើកចំហ”។

លោកបានបន្តថា ក្នុងរយៈពេល៧ឆ្នាំកន្លងមកនេះ ដែលបានជំរុញដោយកិច្ចសហការយ៉ាងជិតស្និទ្ធរបស់យើង ក្នុងចំណោមបណ្តាប្រទេសសមាជិកLMC និងត្រូវបានគាំទ្រ ដោយសេចក្តីប្រាថ្នារួមរបស់យើងក្នុងការលើកកម្ពស់សន្តិភាព ស្ថិរភាព និងអនាគតរួមគ្នានៃវិបុលភាព “យន្តការរបស់យើងនៅតែរីកចម្រើន លើគ្រប់វិសាលគមនៃការអភិវឌ្ឍ ដែលត្រូវបានសម្គាល់ ដោយការយកចិត្តទុកដាក់យ៉ាងខ្លាំង លើការកសាងភាពធន់របស់យើង តាមរយៈកំណើនប្រកបដោ​យនិរន្តរភាព។

លោក ប្រាក់ សុខុន បានមានប្រសាសន៍ថា “ខ្ញុំយកឱកាសនេះដើម្បីបង្ហាញពីការអរគុណរបស់យើង ចំពោះសាធារណៈរដ្ឋប្រជាមានិតចិន ចំពោះការប្តេជ្ញាចិត្តដ៏មុតមាំរបស់ខ្លួន និងការចូលរួមយ៉ាងសកម្មក្នុងការជំរុញក្របខ័ណ្ឌ LMC ដើម្បីធានាបាននូវភាពជោគជ័យនៃគំនិតផ្តួចផ្តើមរហូតមកដល់បច្ចុប្បន្ននេះ”។

លោក ប្រាក់ សុខុន បានបញ្ជាក់ថា កម្ពុជាទន្ទឹងរង់ចាំមើលការវិវត្តនៃក្របខ័ណ្ឌ LMC ក្នុងការផ្លាស់ប្តូរយន្តការអនុតំបន់នេះ មិនត្រឹមតែបំពេញបន្ថែមគំនិតផ្តួចផ្តើមខ្សែក្រវាត់ និងផ្លូវ និងគំនិតផ្តួចផ្តើមអភិវឌ្ឍន៍សកលប៉ុណ្ណោះទេ ប៉ុន្តែថែមទាំងគាំទ្រដល់ការអនុវត្តភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ក៏ដូចជាធានាការសម្រេចបាននូវខ្សែក្រវាត់ អភិវឌ្ឍន៍សេដ្ឋកិច្ចឡានឆាង-មេគង្គ ដោយរួមផ្សំជាមួយច្រករបៀងពាណិជ្ជកម្មដី-សមុទ្រអន្តរជាតិថ្មីផងដែរ”។

លោកបានអះអាងថា “កម្ពុជានឹងបន្តលើកកម្ពស់LMC ជាវេទិកាអនុតំបន់ដ៏ពាក់ព័ន្ធបំផុតមួយ ដើម្បីគាំទ្រពហុភាគីនិយម ក្នុងការសម្រេ​ចបាន នូវចក្ខុវិស័យរបស់ថ្នាក់ដឹកនាំរបស់យើង សម្រាប់កសាងសហគមន៍នៃអនាគតរួមគ្នានៃសន្តិភាព និងវិបុលភាព” ។

ទន្ទឹមនឹងនេះ លោក ប្រាក់ សុខុន បានមានប្រសាសន៍ថា លទ្ធផលវិជ្ជមាន នៃគម្រោងដែលបានអនុវត្តន៍ ក្រោមមូលនិធិពិសេស LMC ក្នុងរយៈពេលប៉ុន្មានឆ្នាំកន្លងមកនេះ បានឆ្លើយតបទៅនឹងតម្រូវការអភិវឌ្ឍជាក់ស្តែងរបស់ប្រជាជននៅក្នុងតំបន់ LMC ។

លោក​បាន​ឱ្យដឹងទៀតថា​ “កម្ពុជា​បាន​ទទួល​អត្ថប្រយោជន៍​ពី​គម្រោង​មូលនិធិ​ពិសេស​ចំនួន៨០ ដែល​មាន​ទំហំ​ទឹកប្រាក់ចំនួន៣១លាន​ដុល្លារ​អាមេរិក​”។

លោកបានបន្ថែមថា សកម្មភាពកិច្ចសហប្រតិបត្តិការចម្រុះ គ្របដណ្តប់ចាប់ពីវិស័យអភិវឌ្ឍន៍ជនបទ ការកាត់បន្ថយភាពក្រីក្រ ធនធា​នទឹក កសិកម្ម ការតភ្ជាប់ផ្លូវអាកាស សុខាភិបាល អប់រំ ទេសចរណ៍ ការអភិរក្សបេតិកភណ្ឌវប្បធម៌ រហូតដល់ការពង្រឹងភាពអង់អាចដល់ស្ត្រី និងផ្សេងៗទៀត៕

  ដោយៈយិន លាងគង់អគ្គនាយកគេហទំព័រPropertyarea

       ភ្នំពេញៈ ជារឿយៗ មានប្រជាពលរដ្ឋដ៏ឆើតឆាយ បានបើករថយន្តលើផ្លូវល្បឿនលឿនបញ្រ្ចាសទិស ដោយពួកគេទទួលបានការអប់រំ និងផាកពិន័យតាមធម្មតា។

តើពួកគេ គួរទទួលបានការអនុគ្រោះបន្តទៀតឬទេ? ជាសំណួរមួយដែលប្រជាពលរដ្ឋគួរឆ្លើយ និងគួរតែពិចារណា ប៉ុន្តែបើផ្អែកលើទិដ្ឋភាពច្បាប់ ពួកគេគួរទទួលទោស ព្រោះពួកគេបំពានសិទ្ឋ បំពានជីវិតអ្នកដទៃ និងបំពានច្បាប់ចរាចរណ៍។

រឿងគួរឲ្យអៀនខ្មាស់បែបនេះ មិនគួរកើតមានក្នុងសង្គមខ្មែរនោះទេ ហើយពួកគេគួរត្រូវបង្ហាញមុខជាសាធារណៈ ស្លាកលេខរថយន្តរបស់ពួកគេគួរបង្ហាញជាសាធារណៈផងដែរ។

យើងនៅចាំបានថា អំឡុង​បើកសម្ភោធស្ពានជ្រោយចង្វារជាថ្មី បន្ទាប់ពីជួសជុលរួច មានជនបំពានគន្លងផ្លូវសាធារណៈខ្លះ បានរងគ្រោះថ្នាក់ចរាចរណ៍ ដោយសារពួកគេបើកទោចក្រយានយន្ត លើផ្លួវរថយន្ត បើទោះបីពួកគេបានដឹងពីគំនូសចរាចរណ៍រួចទៅហើយក្តី។

ជាក់ស្តែង អ្នកបើកបររថយន្តបញ្ច្រាសទិសចរាចរណ៍ លើផ្លូវល្បឿនលឿនភ្នំពេញ-ក្រុងព្រះសីហនុ ត្រូវបានឃាត់ ដើម្បីអប់រំ និងផាកពិន័យតាមនីតិវិធី។

ជនប្រព្រឹត្តទាំងពីរនាក់នេះ បានបើករថយន្តបញ្រ្ចាសទិសលើផ្លូវល្បឿនលឿន កាលពីថ្ងៃទី១៩ និង២០ ខែមីនា ឆ្នាំ២០២៣ ដែលតាមរយៈការបង្ហោះលើផេករបស់ក្រសួងសាធារណៈការ គឺពួកគេមិនមែនជាមនុស្សខ្វះសតិ និងគ្មានធនធាន ​មិនមែនជាមនុស្សមិនបានរៀនសូត្រនោះទេ គឺពួកគេមានរថយន្តទំនើបជិះ ប៉ុន្តែអ្វីដែលពួកគេខ្វះខាត គឺភ្លេចប្រើប្រាស់វិចារណៈញ្ញាណក្នុងភាពជាមនុស្ស ភ្លេចតម្លៃខាងសីលធ៌ម និងការទទួលខុសត្រូវលើជីវិតពួកគេ និងជីវិតអ្នកដទៃ។

តើពួកគេ ប្រដៅ ទូន្មានកូនរបស់ពួកគេយ៉ាងណាទៅ បើក្នុងនាមជាឪពុក​ម្នាក់ ពួកគេមិនបានបំពេញកាតព្វកិច្ច ក្នុងនាមជាពលរដ្ឋល្អផងនោះ?។

ការបើករថយន្ត ក្នុងលក្ខខ័ណ្ឌអាក្រក់បែបនេះ គឺពួកគេគ្រាន់តែត្រូវបានក្រុមការងារផ្លូវល្បឿនលឿន ដោយសហការជាមួយនគរបា​លចរាចរណ៍ផ្លូវគោក បានធ្វើការឃាត់រថយន្ត និងអ្នកបើកបរ ដើម្បីអប់រំ និងផាកពិន័យតាមនីតិវិធីជាធរមាន។

ការបើកបរបញ្ច្រាសទិសចរាចរណ៍ មិនថានៅលើផ្លូវល្បឿនលឿន ឬផ្លូវប្រភេទណានោះទេ វាជាការបំពានច្បាប់ចរាចរណ៍យ៉ាងធ្ងន់ធ្ងរ និងប្រមាថអាយុជីវិតខ្លួនឯង និងអ្នកដទៃ។

ក្រសួងសូមអំពាវនាវសារជាថ្មី ដល់បងប្អូនប្រជាពលរដ្ឋគ្រប់រូប ត្រូវចូលរួមគោរព ច្បាប់ចរាចរណ៍ឱ្យបានខ្ជាប់ខ្ជួន កុំបើកបរបញ្ច្រាសទិសចរាចរណ៍ ប្រើប្រាស់គន្លងចរាចរណ៍ឱ្យបានត្រឹមត្រូវ និងជៀសវាងការប្រព្រឹត្តល្មើសនានា ដើម្បីចូលរួមរក្សាសុខសុវត្ថិភាពពេលធ្វើដំណើររបស់យើងទាំងអស់គ្នា។

តម្លៃខាងសីលធ៌ម និងច្បា​ប់

       នៅពេលប្រទេសមួយបង្កើតច្បាប់ ប្រទេសនោះមានគោលដៅ ដើម្បីរក្សាសណ្តាប់ធ្នាប់សង្គម និងរបៀបរៀបរយក្នុងសង្គម។

មនុស្សមានសិទ្ឋមូលដ្ឋានត្រឹម៤ប៉ុណ្ណោះ គឺសិទ្ឋនៃការរស់រាន សិទ្ឋទទួលបានការអប់រំ សិទ្ឋទទួលបានការការពារ និងសិទ្ឋបញ្ចេញមតិ ប៉ុន្តែនៅពេលពួកគេបំពានសិទ្ឋជាមូលដ្ឋានទាំងនេះ ច្បាប់មានសិទ្ឋចាប់បង្ខំឲ្យគេគោរព ច្បាប់មានសិទ្ឋដាក់ទោសដល់ពួកគេ។

ហេតុនេះ ការបំពានច្បាប់ចរាចរណ៍ លើផ្លូវល្បឿនលឿនបែបនេះ ពួកគេមិនត្រឹមមិនស័ក្តិសមក្នុងនាមជាពលរដ្ឋ នៃប្រទេសស៊ីវិល័យមួយប៉ុណ្ណោះទេ ប៉ុន្តែពួកគេគួរត្រូវបានផ្តន្ទាទោស បើកមុខជាសាធារណៈ ដើម្បីឲ្យពួកគេរាងចាល និងព្រមានដល់អ្នកដទៃទៀត ព្រោះ​ប្រសិនជាការអត់ឱ​នឲ្យជនបែបនេះ វប្បធ៌ម និងទិដ្ឋភាពសង្គមរបស់ប្រជាជាតិនេះ នឹងរងភាពស្លោកស្រពោនមិនខាន៕

ដោយៈ គង់ ម៉ាលីនណា

       ភ្នំពេញៈ ក្រុមហ៊ុនអាមេរិក បានបង្ហាញចំណាប់អារម្មណ៍​ចង់វិនិយោគនៅកម្ពុជា ខណៈប្រទេសនេះកំពុងមានកាលានុវត្តន៍ភាពច្រើន ដែលផ្តល់ឲ្យអ្នកធុរកិច្ចនានា នូវបរិយាកាសវិនិយោគកាន់តែប្រសើរ។

រដ្ឋលេខាធិការក្រសួងពាណិជ្ជកម្ម លោកបួន សារៈមុនី បានជួបពិភាក្សាការងារជាមួយគណៈប្រតិភូ វិនិយោគិនសហរដ្ឋអាមេរិក ដើម្បីស្វែងយល់ពីកាលានុវត្តភាពវិនិយោគនៅកម្ពុជា កាលពីល្ងាចថ្ងៃទី២១ មិនាកន្លងមកនេះ។

ប្រតិភូវិនិយោគិនសហរដ្ឋអាមេរិក ដឹកនាំដោយលោកហួត គីមឆា អគ្គកុងស៊ុលកិត្តិយសកម្ពុជា ប្រចាំទីក្រុងឡុងប៊ិច រដ្ឋកាលីហ្វ័រញ៉ា សហរដ្ឋអាមេរិក។

លោកហួត គីមឆា ថ្លែងអំណរគុណយ៉ាងខ្លាំងចំពោះ លោករដ្ឋលេខាធិការ ដែលបានស្វាមគមន៍ និងទទួលជួបគណៈប្រតិភូរបស់លោកនាឱកាសនេះ ដើម្បីអោយគណៈប្រតិភូលោកបានស្វែងយល់បន្ថែមពីកាលានុវត្តភាពវិនិយោគនៅកម្ពុជា។

ជាមួយគ្នានេះ គណៈប្រតិភូសហរដ្ឋអាមេរិក ក៏បានសរសើរពីកិត្យានុភាពកម្ពុជា ពិសេសផលិតផលកសិកម្ម ដូចជា ផលិតផលអង្ករកម្ពុជា ដែលទទួលបានចំណាត់ថ្នាក់លេខ១ ក្នុងរយៈពេល៥ឆ្នាំជាប់គ្នា។

លោករដ្ឋលេខាធិការ ក៏បានថ្លែងអំណរគុណចំពោះគណៈប្រតិភូវិនិយោគិនសហរដ្ឋអាមេរិក និងបានសម្តែងនូវសុទិដ្ឋិនិយមចំពោះទំហំពាណិជ្ជកម្មរវាងកម្ពុជា និងសហរដ្ឋអាម៉េរិក ដែលមានការកើនឡើងគួរអោយកត់សម្គាល់ បើទោះជាមានវិបត្តិកូវីតយ៉ាងណាក៏ដោយ។

បន្ថែមពីនេះ លោករដ្ឋលេខាធិការ ក៏បានលើកទឹកចិត្តខ្ពស់ចំពោះ​ក្រុមហ៊ុនសហរដ្ឋអាមេរិក ដែលមានបំណងមកបណ្តាក់ទុនវិនិយោគនៅកម្ពុជា ក៏ដូចជា ការសហការវិនិយោគជាមួយដៃគូ ក្នុងស្រុកផងដែរ ដើម្បីអភិវឌ្ឍន៍សេដ្ឋកិច្ច​កម្ពុជា។

លោកសារៈមុនី ក៏បានជម្រាបជូនអំពីស្ថានភាព បរិយាកាសវិនិយោគដ៏ល្អរបស់កម្ពុជា ក៏ដូចជានីតិវិធីផ្សេងៗ ក្នុងការស្នើសុំបង្កើតក្រុមហ៊ុន រោងចក្រ ធនាគារ និងលើកទឹកចិត្តខ្ពស់ចំពោះការវិនិយោគលើវិស័យសុខាភិបាលនៅកម្ពុជា ដែលមានតម្រូវការខ្ពស់ និងទីផ្សារល្អ។

ទន្ទឹមនឹងនេះដែរ តំណាងក្រុមហ៊ុន Singpoli Group សហរដ្ឋអាម៉េរិកក៏បានធ្វើបទបង្ហាញជូន លោករដ្ឋលេខាធិការ អំពីប្រតិបត្តិការ, ផលិតផលរបស់ក្រុមហ៊ុន និងពានរង្វាន់ដែលក្រុមហ៊ុនទទួលបាន និងជាពិសេសនោះគឺ បានបង្ហាញពីការចាប់អារម្មណ៍ខ្ពស់ ក្នុងការចាប់យកឱកាសវិនិយោគនៅកម្ពុជាតែម្តង៕