ភ្នំពេញ ៖ បើនិយាយពីឈ្មោះ លី ហួរ គេដឹងថាមានប្រជាជនភាគច្រើនប្រាកដជាស្គាល់ច្បាស់ណាស់តាមរយៈ លីហួរ ដូរលុយប្តូរប្រាក់និងលក់មាសនៅផ្សារអូរឫស្សី ក្នុងទីក្រុងភ្នំពេញ។ ប៉ុន្តែ គេប្រហែលជាមិនសូវបានស្គាល់ដឹងច្បាស់ពីបុគ្គល លី ហួរ ជានរណា? មនុស្សប្រភេទណា? មកពីណា? ហេតុអ្វីបានជាលោកមានកេរ្តិ៍ឈ្មោះល្បីល្បាញ និងទទួល បានភាពជោគជ័យយ៉ាងត្រចះត្រចង់បែបនេះ ។
លោកឧកញ៉ា លី ហួរ គឺជាកូនកសិករក្រីក្រម្នាក់ ដែលមានដើមកំណើតរស់នៅក្នុងឃុំទ្រាន ស្រុកកំពង់សៀម ខេត្តកំពង់ចាម។ លោកជាក្មេងកំព្រាឪពុកតាំងតែពីអាយុ ៩ឆ្នាំ មកម្ល៉េះ ខណៈដែលស្ថានភាពគ្រួសារគ្រាន់តែជាអ្នកលក់ទៀនធូបតែប៉ុណ្ណោះ។
ដោយសារភាពក្រីក្រធ្វើឲ្យគាត់បានបោះបង់ចោលការសិក្សា មិនបានរៀនជ្រៅជ្រះនោះទេ។ ឆ្លងកាត់នៅក្នុងភ្នក់ភ្លើងសង្គ្រាមក្នុងរបបប៉ុលពតអស់ជាច្រើនឆ្នាំ គាត់បានជួបបញ្ហារងទុក្ខវេទនាដូចគ្នាទៅនឹងពលរដ្ឋខ្មែររាប់លាននាក់ផ្សេងទៀតដែរ។ ដោយសារជំនាន់នោះ គាត់អាយុ ១៨ឆ្នាំ ជាយុវជនដែលមានកាតព្វកិច្ចសំខាន់ណាស់ក្នុងការការពារជាតិ បម្រើជាតិ ជាកម្លាំងពិសេសជួរមុខនៅសមរភូមិប្រយុទ្ធ លោកមិនដែលបានរស់នៅជួបជុំគ្រួសារសាច់ញាតិនោះឡើយ។
ក្រោយសម័យ ប៉ុល ពត ឆ្នាំ១៩៧៩ ដល់ឆ្នាំ១៩៨០ លី ហួរ មានមុខរបរជាកសិករនៅឡើយទេ ដោយបានចិញ្ចឹមជ្រូកមួយក្បាល។ លុះឈានចូលដល់ឆ្នាំ១៩៨២ លី ហួរ បានចាប់ផ្តើមផ្លាស់ប្តូរជីវិតពីកសិករទៅជាអ្នកក.វែក ក.ឆ្នាំង ជួញដូរទំនិញកំប៉ិកកំប៉ុកវិញម្តង បន្ទាប់ពីរូបលោកសល់ដើមទុនប្រមាណ ២ជីមាស បានមកពីការលក់ជ្រូកមួយក្បាលកាលពីគាត់នៅជាកសិករ។ ក្នុងឆ្នាំដដែលនោះ រូបគាត់មានកង់មួយគ្រឿង ធាក់ដឹកស្ករពីស្គន់ ផ្អាវ ទៅលក់នៅក្រុងសួង និងមេមត់។
ចំណែកឯភរិយារបស់លោកជាអ្នកលក់ដូរត្រីនៅក្នុងផ្សារខេត្តកំពង់ចាម។ ជាបន្តបន្ទាប់មក ជីវិត និងមុខរបរ លី ហួរ ប្រែប្រួលរីកចម្រើនជារៀងរាល់ឆ្នាំ ជាមួយនិងដើមទុនកាន់តែរីកធំធាត់ឡើងៗ លោកក៏បានសម្រេចចិត្តចាប់ផ្តើមមុខជំនួញឆ្លងកាត់ព្រំដែនវិញម្តង។ លើកនេះ ប្រហែលជាត្រូវលះបង់ជីវិត ពេលវេលា កាន់តែខ្ពស់ ដើម្បីសម្រេចគោលដៅ។ គាត់ក៏បានទៅជួញដូរក្រណាត់ (ហៅថាក្រណាត់កាណាដា) សារុង ប៊ីចេង ពីប្រទេសថៃ មកលក់នៅក្នុងប្រទេសកម្ពុជា។ ចូលដល់ឆ្នាំ១៩៨៥ ដើមទុនទ្រព្យសម្បតិ្តកាន់តែក្រាស់ក្រែលសល់ពីការជួញដូរក្រណាត់ សារុង ប៊ីចេង លី ហួរ និងភរិយាមិនរង់ចាំយូរនោះទេ ដោយសារមើលឃើញពីឱកាសទីផ្សារទិញលក់មាស លោក និងភរិយា ក៏បានចាប់ផ្តើមជំនួញដូរទិញលក់មាសវិញម្តង ជាបន្តបន្ទាប់រហូតបើកកន្លែងប្ដូរប្រាក់ដ៏ធំមួយនៅក្នុងរាជធានីភ្នំពេញ ដែលពោរពេញទៅដោយអតិថិជនទទួលស្គាល់ស្នាដៃ និងកេរ្តិ៍ឈ្មោះរបស់លោករហូតមកដល់បច្ចុប្បន្ន។
ក្នុងរយៈពេលជាង៣០ឆ្នាំ កន្លងមកនេះ ឧកញ៉ា លី ហួរ ត្រូវបានមហាជនទូទៅរាប់ចាត់ទុកថា ជាពាណិជ្ជករខ្មែរដ៏ល្បីល្បាញមួយរូប ដែលទទួលបានភាពជោគជ័យយ៉ាងខ្លាំងនៅក្នុងមុខជំនួញ។ ជាបុគ្គលគំរូម្នាក់សម្រាប់សហគ្រិនក្មេងៗ ជំនាន់ក្រោយ គួររៀនសូត្រ និងអនុវត្តតាម។ ហើយជាបុគ្គលដែលមានការតាំងចិត្តខ្ពស់ក្នុងការសម្រេចគោលដៅជោគជ័យនៅក្នុងមុខជំនួញ។
បច្ចុប្បន្ន ឧកញ៉ា លី ហួរ ជាម្ចាស់ក្រុមហ៊ុនចំនួន ៧ ដែលកំពុងតែប្រតិបត្តិការអាជីវកម្មយ៉ាងសកម្មនៅក្នុងព្រះរាជាណាចក្រកម្ពុជា។ ក្រុមហ៊ុនទាំង ៧ នោះ មានដូចជា ក្រុមហ៊ុនលីហួរ ប្តូរប្រាក់ និងលក់គ្រឿងអលង្ការ ក្រុមហ៊ុន លីហួរ ហាងបញ្ចាំ ក្រុមហ៊ុនអភិវឌ្ឍន៍លំនៅឋានបុរីវិមានភ្នំពេញ គ្រឹះស្ថានមីក្រូហិរញ្ញវត្ថុ លីហួរ ក្រុមហ៊ុនទេពី (Tepi) វិនិយោគ កសិ-ឧស្សាហកម្មដំណាំកៅស៊ូ ក្រុមហ៊ុន លីហួរ លីស៊ីង (ជួលរថយន្ត) និងក្រុមហ៊ុន ផេប្រូ (លី ហួរ វេរលុយ)។ មិនគិតតែពីចំណេញក្នុងមុខជំនួញមួយមុខនោះទេ ក្នុងកិច្ចការងារសង្គម លោកឧកញ៉ា លីហួរ បានចូលរួមចំណែកដ៏សំខាន់សម្រាប់ការអភិវឌ្ឍន៍ប្រទេសជាតិដែរ៕
