ដោយ: គង់ លាងហួរ
អន្តរជាតិ: អតីតអ្នកនាំពាក្យក្រសួងការបរទេសចិន លោក Wang Wenbin នឹងក្លាយជាឯកអគ្គរដ្ឋទូតចិនប្រចាំនៅកម្ពុជា ជំនួសលោក Wang Wentian ដែលចប់អាណត្តិ កាលពីចុងខែឧសភា ឆ្នាំ២០២៤នេះ។
មុខតំណែងថ្មីរបស់ លោក Wang ត្រូវបានបញ្ជាក់ដោយទីភ្នាក់ងារសហប្រតិបត្តិការអភិវឌ្ឍន៍អន្តរជាតិចិន នៅក្នុងកិច្ចប្រជុំ ជាមួ យប្រធានទីភ្នាក់ងារនេះ គឺលោក Luo Zhaohui ។ អតីតអ្នកនាំពាក្យក្រសួងការបរទេសចិនវ័យ៥៣ឆ្នាំរូបនេះ បានបម្រើការងារក្នុងបេស កកម្មការទូត អស់រយៈពេលជាង៣០ឆ្នាំមកហើយ ខណៈលោកក៏ធ្លាប់បម្រើការជាឯកអគ្គរដ្ឋទូតចិន ប្រចាំប្រទេសទុយនេស៊ីផងដែរ។
តើលោក Wang Wenbin មានជីវប្រវត្តិលម្អិត និងការងារបែបណា?
លោក Wang Wenbin កើតនៅខែមេសា ឆ្នាំ១៩៧១ នៅទីក្រុង Anhui ប្រទេសចិន។ លោកគឺជាអ្នកនយោបាយ និងជាអ្នកការទូតចិន។ លោក Wang បានចូលរៀននៅវិទ្យាល័យ Nanjing Jinling រហូតដល់ឆ្នាំ១៩៨៩ លោកបានបន្តការសិក្សា ដោយចូលរៀននៅសកលវិទ្យាល័យកិច្ចការបរទេសចិន និងជាឱកាស ដែលលោកបានសិក្សាជំនាញភាសាបារាំង។
-->
ក្រោយពីបញ្ចប់ការសិក្សា លោកត្រូវបានចាត់ឲ្យទៅបំពេញការងារនៅក្នុងក្រសួងការបរទេសចិន។ លោកបានបម្រើការក្នុងមុខតំណែងការទូតជាច្រើន រួមមាននាយករង និងជាប្រធានការិយាល័យស្រាវជ្រាវគោលនយោបាយ ទីប្រឹក្សានយោបាយនៃស្ថានទូតចិនប្រចាំសាធារណរដ្ឋម៉ូរីស និងប្រទេស Senegal។ ជាមួយគ្នានេះ លោកក៏ធ្លាប់ជាទីប្រឹក្សា នាយកដ្ឋានរៀបចំផែនការ គោលនយោបាយ។ ក្រោយមកទៀត លោកត្រូវបានដំឡើងតំណែង ជាអនុប្រធាននាយកដ្ឋានរៀបចំផែនការគោលនយោបាយ។
លោក Wang Wenbin ត្រូវបានគណៈកម្មាធិការអចិន្ត្រៃយ៍ទី១៣នៃសភាប្រជាជនជាតិ តែងតាំងជាឯកអគ្គរដ្ឋទូតចិន ប្រចាំប្រទេសទុយនេស៊ី នៅក្នុងខែឧសភា ឆ្នាំ២០១៨ ហើយនៅថ្ងៃទី១៧ ខែកក្កដា ឆ្នាំ២០២០ លោកត្រូវបានតែងតាំង ជាអ្នកនាំពាក្យក្រសួងការបរទេសចិនទី៣២ ចាប់តាំងពីតំណែងនេះ ត្រូវបានបង្កើតឡើងនៅក្នុងក្រសួងការបរទេសចិនកាលពីឆ្នាំ១៩៨៣។
លោក Wang បានរៀបការ និងមានកូនស្រីម្នាក់ ហើយដោយ សារបុគ្គលិកលក្ខណៈជាអ្នកការទូត លោកទទួលបានការតាមដានយ៉ាងច្រើននៅលើប្រព័ន្ធផ្សព្វផ្សាយសង្គមចិន និងវេទិកាជាច្រើនដែ លបានហៅលោកថា “ពូ វ៉ាង”ឬ “Uncle Wang”។
លោក Wang ត្រូវបានគេដាក់រហ័ស្សនាមថាជា “អ្នកការទូតចម្បាំងចចក” សម្រាប់ការការពារ និងការប្រឆាំងរបស់លោកចំពោះការរិះគន់មកលើរដ្ឋាភិបាលចិន។
ក្នុងនាមជាអ្នកនាំពាក្យក្រសួងការបរទេសចិន លោក Wang បានច្រានចោល ការអះអាងរបស់សហរដ្ឋអាមេរិក ដែលថា “ច្រកសមុទ្រតៃវ៉ាន់ ជាដែនទឹកអន្តរជាតិ”។ លោកត្រូវបានគេស្គាល់កាន់តែខ្លាំងឡើង ដោយសារការធ្វើសេចក្តីថ្លែងការណ៍ដ៏ចម្រូងចម្រាសរបស់លោក អំពីជម្លោះនៅសមុទ្រចិនខាងត្បូង។
នៅខែកុម្ភៈ ឆ្នាំ២០២១ លោក Wang បានហៅការប្រល័យពូជសាសន៍ Uyghur ថាជា “ការកុហកប្រចាំសតវត្សរ៍”។
នៅខែកញ្ញា ឆ្នាំ២០២២ លោកបានចាត់ទុករបាយការណ៍របស់អង្គការសហប្រជាជាតិ អំពីការប្រល័យពូជសាសន៍Uyghur ថា ជា “ការចោទប្រកាន់ខុសច្បាប់ទាំងស្រុង និងជាការបំភ្លៃព័ត៌មានមិនពិតដោយកងកម្លាំងសហរដ្ឋអាមេរិក និងលោកខាងលិច” ដើម្បីទប់ទល់នឹងប្រទេសចិន។
ជាមួយគ្នានេះ គេនៅចងចាំបានថា សមាជិកសភាចំនួន៤រូបត្រូវបានបណ្តេញចេញ បន្ទាប់ពីមានដំណោះស្រាយស្តីពី ការដកហូតអភ័យឯកសិទ្ធិពីសមាជិកសភា ដែលគាំទ្រឯករាជ្យភាពរបស់ហុងកុង ដែលត្រូវបានអនុម័តនៅខែវិច្ឆិកា ឆ្នាំ២០២០ ។ នៅពេលនោះ លោក Wang បានថ្លែងថា “ការដកហូតអភ័យឯកសិទ្ធិរបស់ពួកគេគឺជាការសមហេតុផល និងធ្វើឡើងស្របតាមច្បាប់ និងរដ្ឋធម្មនុញ្ញ”។
នៅក្នុងខែកុម្ភៈ ឆ្នាំ២០២៣ ជាការឆ្លើយតបទៅនឹងឧប្បត្តិហេតុបាឡុងចិន ដែលបានហោះចូលទៅក្នុងសហរដ្ឋអាមេរិក លោក Wang បានវាយបកថា “ចាប់តាំងពីឆ្នាំ២០២២មក បាឡុងរបស់អាមេរិកបានហោះហើរខុសច្បាប់ ពីលើដែនអាកាសរបស់ប្រទេសចិនជាង១០ដង ដោយគ្មានការយល់ព្រមពីអាជ្ញាធរចិន”។
នៅខែមីនា ឆ្នាំ២០២៤ លោក Wang Wenbin បានប្រាប់រដ្ឋាភិបាលទីក្រុងសេអ៊ូល កុំឱ្យជ្រៀតជ្រែកក្នុងជម្លោះសមុទ្រចិន ខាងត្បូង បន្ទាប់ពីប្រទេសកូរ៉េខាងត្បូង បានបង្ហាញការព្រួយបារម្ភចំពោះការប៉ះទង្គិចគ្នា រវាងនាវាឆ្មាំឆ្នេរសមុទ្រចិន និងហ្វីលីពីន។
នៅខែដដែលនោះ ហ្វីលីពីន បានបណ្ដេញអ្នកការទូតចិន ក្រោយពីមានការបែកធ្លាយសារ ឆ្លើយឆ្លងគ្នាតាមទូរស័ព្ទជាមួយឧត្តមនាវីហ្វីលីពីនម្នាក់ អំពីសមុទ្រចិនខាងត្បូង។ ជាការឆ្លើយតប លោក Wang បានធ្វើសេចក្តីថ្លែងការណ៍ផ្លូវការមួយ ដោយហៅសកម្មភាពទាំងនេះថា “ការបង្កហេតុ” លើជម្លោះ។
ចំណែក នៅថ្ងៃទី១ ខែមេសា ឆ្នាំ២០២៤ លោកបានលើកឡើងថា គោលនយោបាយរបស់ហ្វីលីពីនទៅលើសមុទ្រចិនខាងត្បូងនឹងមិនប៉ះពាល់ដល់សិទ្ធិដែនសមុទ្រ និងអធិបតេយ្យភាពរបស់ចិនឡើយ។ សេចក្តីថ្លែងការណ៍នេះត្រូវបានធ្វើឡើង បន្ទាប់ពីប្រធានាធិបតីហ្វីលីពីនលោក Ferdinand Marcos, Jr. បានបញ្ជាឱ្យមន្ត្រីរដ្ឋាភិបាលរបស់លោក ខិតខំពង្រឹងសន្តិសុខដែនសមុទ្ររបស់ប្រទេស។
លោក Wang ក៏ធ្លាប់បានអះអាងថា ប្រជាជនចិន និងអាមេរិកតែងតែមានមិត្តភាព ចំពោះគ្នាទៅវិញទៅមក។ ប៉ុន្តែរដ្ឋបាលអាមេរិកពីមុន និងកងកម្លាំងប្រឆាំងចិននៅសហរដ្ឋអាមេរិក ដែលជំរុញដោយភាពលំអៀងមនោគមវិជ្ជា និងផលប្រយោជន៍នយោបាយអាត្មានិយម បានលាបពណ៌ចិន និងបង្កការប្រឈមមុខដាក់គ្នា ការបែងចែក ព្រមទាំងការផ្សព្វផ្សាយមេរោគនយោបាយ និងបានបំពុលបរិយាកាសមតិសាធារណៈនៅក្នុងប្រទេសទាំងពីរ៕ប្រភព: Wikipedia ៕
