ដោយៈ គង់ ម៉ាលីនណា
ភ្នំពេញៈ ទំហំពាណិជ្ជកម្មទ្វេរភាគីរវាងកម្ពុជា-ជប៉ុន ក្នុងឆមាសទី១ ឆ្នាំ២០២៥ បានបង្ហាញសញ្ញាវិជ្ជមានគួរឱ្យកត់សម្គាល់ ដោយសម្រេចបានក្នុងទឹកប្រាក់សរុបជាង ១,២ ពាន់លានដុល្លារ កើនឡើងជិត៣០% បើធៀបនឹងឆមាសទី១ឆ្នាំមុន។
ប្រទេសជប៉ុន គឺជាដៃគូពាណិជ្ជកម្មធំជាងគេទី៥ របស់កម្ពុជា បន្ទាប់ពីប្រទេសចិន អាមេរិក វៀតណាម និងថៃ។
ទិន្នន័យកត់ត្រាដោយអគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ចាប់ពីខែមករា ដល់ខែមិថុនា ឆ្នាំ២០២៥ ការនាំចេញនាំចូលទំនិញរវាងកម្ពុជា-ជប៉ុន មានទឹកប្រាក់សរុប១២២៣,២៧លានដុល្លារ កើនឡើង២៨,៧% បើធៀបនឹងរយៈពេលដូចគ្នា ក្នុងឆ្នាំ២០២៤ ដែលមាន៩៥០,២៨លានដុល្លារ។
ក្នុងចំនួននេះ គឺកម្ពុជានាំទំនិញទៅជប៉ុន៧៥៣,៥៥ លានដុល្លារ កើនឡើង១៩,៩%។ ចំណែកជប៉ុននាំចូល៤៦៩,៧២លានដុល្លារ កើន ៤៦,១%។
ផ្អែកតាមតួលេខខាងលើ គឺក្នុងឆមាសទី១ ឆ្នាំ២០២៥ ជញ្ជីងពាណិជ្ជកម្មកម្ពុជា មានឧត្តមភាពលើជប៉ុនប្រមាណ២៨៣,៨២លានដុល្លារ ខណៈកាលពីឆមាសទី១ ឆ្នាំ២០២៤ មានចំនួន ៣០៧,០៨ លានដុល្លារ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានលើកឡើងថា ការធ្វើពាណិជ្ជកម្មរវាងប្រទេសទាំង២ មានភាពវិជ្ជមានជាបន្តបន្ទាប់ ដោយភាគច្រើននៃទំនិញ ដែលជប៉ុននាំចូលមកកម្ពុជា គឺជាផលិតផលសម្រេច រួមមាន រថយន្ត គ្រឿងម៉ាស៊ីនទំនើបៗ ឧបករណ៍អេឡិចត្រូនិច និងផលិតផលប្រើប្រាស់បច្ចេកវិទ្យា ទំនើបៗជាច្រើនទៀត។
ចំណែកទំនិញដែលកម្ពុជា នាំទៅទីផ្សារជប៉ុនមានដូចជា ផលិតផលវាយនភណ្ឌ(សម្លៀកបំពាក់ កាបូប ស្បែកជើង) គ្រឿងបង្គុំអេឡិចត្រូនិក/អគ្គិសនី គ្រឿងសង្ហារឹម គ្រឿងសំអាង និងផលិតផលកសិកម្ម។
លោកបន្តថា ដោយសារកម្ពុជាជាប្រទេសកំពុងអភិវឌ្ឍន៍ និងមានរោងចក្រ កាន់តែច្រើនចូលមកបើកដំណើរការ ដូច្នេះទឹកប្រាក់នៃការនាំទំនិញពីកម្ពុជាទៅជប៉ុន នឹងបន្តកើនឡើងច្រើនបន្ថែមទៀត នាពេលខាងមុខ។
RCEP គឺជាកិច្ចព្រមព្រៀងដោះដូរពាណិជ្ជកម្មសេរី ដែលមានសមាជិកសរុបចំនួន១៥ប្រទេស រួមមាន សមាជិកអាស៊ានទាំង១០ប្រទេស និងប្រទេសជាដៃគូអាស៊ានទាំង៥ គឺចិន ជប៉ុន កូរ៉េខាងត្បូង អូស្រ្តាលី និងនូវែលសេឡង់។
របាយការណ៍ក្រសួងពាណិជ្ជកម្ម បានឱ្យដឹងថា ចន្លោះពីខែមករា ដល់ខែវិច្ឆិកា ឆ្នាំ២០២៤ មានក្រុមហ៊ុន/សហគ្រាសជប៉ុនចំនួន៨៨ បានចុះបញ្ជីពាណិជ្ជកម្មនៅកម្ពុជា ដោយចំនួននេះកើនឡើង ២០,៥៥%បើធៀបនឹងរយៈពេលដូចគ្នាឆ្នាំ ២០២៣។
ក្រសួងពាណិជ្ជកម្មបានឱ្យដឹងថា កិច្ចសហប្រតិបត្តិការពាណិជ្ជកម្មទ្វេភាគីកម្ពុជា-ជប៉ុន គឺមានភាពល្អប្រសើរ ដោយក្នុងឆ្នាំ២០២៤ កន្លងមកភាគីទាំង២ បានជួបពិភាក្សាគ្នាជាច្រើន ជាពិសេសក្រសួងពាណិជ្ជកម្ម បានចូលរួមប្រជុំពិភាក្សា លើការងារពាណិជ្ជកម្មកម្ពុជា-ជប៉ុន ក្រោមប្រធានបទ “ធុរកិច្ចឥណទានកាបូន និងបរិយាកាសវិនិយោគនៅកម្ពុជា”៕
