ដោយ៖ គង់ សូរិយា
ភ្នំពេញ៖ ទុនវិនិយោគក្នុងវិស័យរ៉ែនកម្ពុជាមានទំហំទឹកប្រាក់រហូតដល់៧៣៣លានដុល្លារអាមេរិក ខណៈពេលរាជរដ្ឋាភិបាលបាននិងកំពុងរៀបចំគោលនយោបាយស្តីពីការគ្រប់គ្រងធនធានរ៉ែ ដើម្បីគ្រប់គ្រងនិងប្រើប្រាស់ធនធានផ្នែកនេះឲ្យមាននិរន្តរភាព។
រដ្ឋលេខាធិការក្រសួងរ៉ែ និងថាមពលលោក ឌិត ទីណា បានថ្លែងឲ្យដឹងកាលពីពេលថ្មីៗនេះថា បច្ចុប្បន្នក្រសួងរ៉ែ និងថាមពលបានផ្តល់អាជ្ញាប័ណ្ណរុករករ៉ែ ដល់ក្រុមអ្នកវិនិយោជាតិ អន្តរជាតិចំនួន១០២ក្រុមហ៊ុន ក្នុងនោះអាជ្ញាប័ណ្ណរ៉ុករករ៉ែចំនួន១៧ បានផ្តល់ដល់ អ្នកវិនិយោគ ធ្វើការរុករករ៉ែប្រភេទ រ៉ែដែក មាស ធ្យូងថ្ម ខ្សាច់ ស៊ីលីកាជាដើម។
ទាក់ទងនឹងគោលនយោបាយស្តីពីធនធានរ៉ែ លោកទីណាបានឲ្យដឹងថា គោលនយោបាយនេះ ផ្តោតលើគោលដៅសំខាន់ៗចំនួន៤ ដូចជា ទី១ ការគ្រប់គ្រងនិងអភិវឌ្ឍន៍ធនធានរ៉ែប្រកបដោយចីរភាព ទី២ ការផ្តល់ផលប្រយោជន៍ដល់ប្រជាពលរដ្ឋ និងសហគមន៍ ទី៣ ការផ្គត់ផ្គង់វត្ថុធាតុដើម ដល់ការអភិវឌ្ឍវិស័យហេដ្ឋារចនាសម្ព័ន្ឋ និងសំណង់ និងទី៤ ការបង្កើតប្រភពចំណូលដល់សេដ្ឋកិច្ចជាតិ។
លោកបន្តថា “គោលនយោបាយនេះជាជំហ៊ានមួយដ៏សំខាន់ ក្នុងការរៀបចំវិស័យធនធានរ៉ែ ឲ្យក្លាយទៅជាផ្នែកមួយដ៏សំខាន់នៃខឿនសេដ្ឋកិច្ចជាតិ និងរួមចំណែកអភិវឌ្ឍន៍សេដ្ឋកិច្ចកម្ពុជា។
ទីប្រឹក្សាផ្នែកសេដ្ឋកិច្ច និងអភិវឌ្ឍន៍ក្រុមហ៊ុន Emerging Market Consulting លោកង៉ែត ជូបានមានប្រសាសន៍ថា ការរៀបចំគោលនយោបាយនេះរបស់រដ្ឋាភិបាលជារឿងល្អ ព្រោះកន្លងមកយើងមិនទាន់ មានគោលនយោបាយបែបនេះទេ ហេតុនេះការលើកឡើងថា មិនល្អឬល្អក្តី ក៏ជាទស្សននៅឡើយ ព្រោះយើងមិនទាន់បានឃើញនូវគោលនយោបាយនោះនៅឡើយទេ។
លោកបន្តថា “ការគ្រប់គ្រងធនធានរ៉ែនៅកម្ពុជា មានតម្លាភាពតិចតួចនៅ ឡើយ ព្រោះរបាយការណ៍ និងការបង្ហាញពីតម្លាភាពគ្រប់គ្រងធនធានរ៉ែ នៅមានតិចតួចនៅឡើយ។លោកបន្តថា “ការគ្រប់គ្រងនិងប្រើប្រាស់ធនធានរ៉ែឲ្យមានប្រសិទ្ឋភាព និងតម្លាភាពមានសារៈសំខាន់ណាស់ ដើម្បីប្រើប្រាស់ធនធានទាំងនោះយកមកអភិវឌ្ឍន៍ជាតិ”៕
