ដោយៈ រ៉ាណេត
ភ្នំពេញ៖ គម្រោងសាងសង់អគារពាណិជ្ជកម្មចំរុះបែបទំនើប ដែលមានកម្ពស់រហូតដល់៥៩ជាន់ ដែលមានទីតាំងស្ថិតនៅតាមបណ្តោយផ្លូវសុធារស់ ជិតផ្សារទំនើប AEON 1 នៅលើផ្ទៃដីទំហំ១,៥០ហិកតាបានផ្អាកការសាងសង់ជាផ្លូវការហើយ។
គំរោងនេះបានសិក្សាតាំងពីអំឡុងពាក់កណ្តាលឆ្នាំ២០១៧នោះ រហូតមកដល់ពេលនេះនៅតែមិនទាន់មានសកម្មនៅឡើយ ខណៈដែលធ្លាយដំណឹងមកថាគំរោងនេះបានប្រកាសផ្អាកសម្រេចផ្អាកមួយរយៈសិន។
គម្រោងសាងសង់សំណង់អគារពាណិជ្ជកម្មចំរុះបែបទំនើប ដែលមានកម្ពស់រហូតដល់៥៩ជាន់ KOWLOON BAY Twin Towers គ្រោងសហការវិនិយោគរវាងក្រុមហ៊ុន Star City Cambodia និងក្រុមហ៊ុនអភិវឌ្ឍវិស័យអចលនទ្រព្យដ៏ធំប្រចាំនៅកម្ពុជា WorldBridge Land ។
លោកឧកញ៉ា សៀ រិទ្ធីប្រធានក្រុមប្រឹក្សាភិបាលនៃក្រុមហ៊ុន World Bridge Land Group បានមានប្រសាសន៍ឲ្យដឹងតាមទូរស័ព្ទកាលពីចុងសប្តាហ៍មុនថា គម្រោងការនៃការសាងសង់អគារមួយនេះ ត្រូវបានផ្អាកទុកមួយរយៈសិន ដោយស្ថិតក្នុងការរង់ចាំមើលស្ថានភាពទីផ្សារបន្តិចទៀតសិន។
លោកឧកញ៉ាបានបន្តថា “គម្រោងសាងសង់អគារមួយនេះត្រូវបានផ្អាកហើយ”។ លោកពន្យល់ថា “ធម្មតាអ្នកជំនួញត្រូវការប្រាក់ចំណេញ បើមើលឃើញច្បាស់ថា មានដៃគូប្រកួតប្រជែងកាន់តែច្រើន ហើយឱកាសទទួលបានចំណេញមានតិចពេក គេមិនធ្វើនោះទេ”។
តាមគម្រោងលើកដំបូងអគារពាណិជ្ជកម្មភ្លោះបែបទំនើប KOWLOON BAY Twin Towers នឹងត្រូវបញ្ចប់ការសាងសង់ត្រឹមបំណាច់ឆ្នាំ២០២០ ដែលនៅក្នុងអគារទាំងមូល មានផ្គត់ផ្គង់ផ្នែកស្នាកនៅ ផ្សារទំនើប អគារការិយាល័យ រួមជាមួយភោជនីយដ្ឋានផងដែរ។
យ៉ាងណាមិញ ក្រោយពេលទទួលបានដំណឹងថា គម្រោងសាងសង់ត្រូវបានផ្អាកទុក គេក៏មិនទាន់ដឹងច្បាស់ទេថា គម្រោងសាងសង់មជ្ឈមណ្ឌលពាណិជ្ជកម្មនេះ អាចចាប់ដំណើរការពិតប្រាកដនៅពេលណាជាក់លាក់នោះទេ៕
