ដោយ វុត្ថា
ភ្នំពេញៈ អ្នកនាំពាក្យសាលារាជធានីភ្នំពេញបានគូសបញ្ជាក់ថា ស្ពានអាកាសថ្មើជើងចំនួនពីរទីតំាងរួមមានទីតាំងទី១ ស្ថិតនៅលើមហាវិថីម៉ៅសេទុង ខាងកើតសាលាបឋមសិក្សាសន្ធរម៉ុក និងទីតាំងទី២ ស្ថិតនៅលើមហាវិថីម៉ៅសេទុង ខាងលិចផ្សារដើមគ នឹងត្រូវចាប់ផ្តើមបើកការដ្ឋានសាងសង់នៅចុងឆ្នាំនេះហើយ បន្ទាប់ពីទទួលបានការគំទ្រពីពលរដ្ឋយ៉ាងច្រើនពីគម្រោងទាំង២នេះ។
អ្នកនាំពាក្យសាលារាជធានីភ្នំពេញ លោកម៉េត មាសភក្តីបានប្រាប់គេហទំព័រ Propertyarea.asia នៅថ្ងៃទី២៤ ខែកញ្ញាឆ្នាំ២០១៩នេះថា ក្រោយពីមានការផ្សព្វផ្សាយពីគម្រោងសាងសង់ស្ពានអាកាសថ្មើរជើងទាំងពីរនេះ កាលពីកន្លងមកនេះរដ្ឋបាលរាជភ្នំពេញបានទទួលការគំាទ្រ និងមតិយោបល់ឆ្លើយតបពីប្រជាពលរដ្ឋយ៉ាងច្រើន ឱ្យមានការសាងសង់ស្ពានអាកាសថ្មើរជើងនេះ។
-->
លោកបន្តថា “ប្រជាពលរដ្ឋបានលើកឡើងថា គម្រោងស្ពានអាកាសថ្មើរជើងទាំងពីរទីតាំងនេះ ជាគម្រោងស្អាត និងមានភណភាពល្អ ព្រមទាំងលើកកេរ្តិ៍ឈ្មោះរដ្ឋបាលរាជធានីភ្នំពេញផងដែរ”។ លោកបន្តថា “ក្រៅពីជួយសម្រួលដល់ការធ្វើដំណើររបស់ពលរដ្ឋ ស្ពានអាកាសថ្មើរជើងទាំងពីរទីតាំងនេះ ក៏នឹងឆ្លុះបញ្ចាំងពីភាពរីកលូតលាស់នៃទីក្រុងភ្នំពេញក្រោយពីបញ្ចប់ និងទទួលបានជោគជ័យលើការសាងសង់ គម្រោងស្ពានអាកាសថ្មើរជើងនៅរង្វង់មូលនាងគង្ហីង”។
លោកម៉េត មាសភ័ក្តីបានបន្តថា ក្រោយពីបញ្ចប់ដំណើរការសាងសង់ស្ពានអាកាសថ្មើរជើងទាំងពីរទីតាំងនេះ រដ្ឋបាលរាជធានីភ្នំពេញ នឹងមានគម្រោងសាងសង់ស្ពានអាកាសថ្មើរជើងនៅទីតាំងផ្សេងៗទៀត ដើម្បីឆ្លើយតបទៅនឹងសម្រួលចរាចរណ៍របស់ពលរដ្ឋ។
លោកបន្តថា “ចំពោះទំហំនៃការចំណាយ លើការសាងសង់ស្ពានអាកាសថ្មើរជើងទាំងពីរនេះ ខ្ញុំមិនទាន់បានដឹងនៅឡើយទេ ព្រោះខ្ញុំមិនមានឯកសារនៅក្នុងដៃ ហើយការសាងសង់ស្ពានទាំងពីរនេះ នឹងត្រូវចំណាយពេលមិនដល់មួយឆ្នាំនោះទេ ព្រោះមានចម្ងាយមិនឆ្ងាយ និងសាងសង់នៅលើគោក” ។
លោក ឃួង ស្រេង អភិបាលសាលារាជធានីភ្នំពេញ ធ្លាប់បានមានប្រសាសន៍ថា ប្រទេសជាតិមានការអភិវឌ្ឍន៍ កាន់តែរីកចម្រើន ទីក្រុងកាន់តែស៊ីវីល័យ! រដ្ឋបាលរាជធានីភ្នំពេញ មានគម្រោងស្ថាបនាស្ពានអាកាសថ្មើរជើងចំនួនពីរទីតាំង សម្រាប់បងប្អូនប្រជាពលរដ្ឋ ធ្វើដំណើរដោយថ្មើរជើងឆ្លងកាត់តំបន់នោះ ប្រកបដោយសុវត្ថិភាព៕
