ដោយៈ សុខុម

ហ្វាំងឡង់: វាពិតជាគួរឱ្យភ្ញាក់ផ្អើលមែនទែន ដែលហ្វាំងឡង់ បានជាប់ឈ្មោះជាប្រទេស ដែលពលរដ្ឋមានជីវិតរីករាយបំផុត ក្នុងពិភពលោកប្រចាំឆ្នាំ២០២៣។

នេះបើយោងតាមការដាក់ចំណាត់ថ្នាក់ ក្នុងរបាយការណ៍ World Happiness Report ដែលផ្អែកខ្លាំងលើការវាយតម្លៃអំពីជីវិតរស់នៅរបស់ពលរដ្ឋ។

យោងតាមសារព័ត៌មាន CNN ចុះផ្សាយកាលពីថ្ងៃច័ន្ទ ទី២០ ខែមីនា ឱ្យដឹងថា នេះមិនមែនជាឆ្នាំទី១ ទេដែលហ្វាំងឡង់ បានជាប់ឈ្មោះជាប្រទេស ដែលពលរដ្ឋមានជីវិតរីករាយបំផុត ពោលគឺបានរក្សាតំណែងនេះ រយៈពេល៦ឆ្នាំជាប់ៗគ្នា គិតទាំងឆ្នាំនេះស្ទើរមិនគួរឱ្យជឿ។

ប្រទេសនេះ និងបណ្ដាប្រទេសជិតខាងរបស់ខ្លួន រួមមានដាណឺម៉ាក អ៊ីស្លង់ ស៊ុយអែត និងន័រវែស សុទ្ធតែទទួលបានពិន្ទុយ៉ាងល្អនៅក្នុងរបាយការណ៍វាយតម្លៃខាងលើ។

ការវាយតម្លៃ សម្រាប់ការដាក់ចំណាត់ថ្នាក់នេះ ធ្វើឡើងដោយផ្អែកលើកត្តាសំខាន់ៗមួយចំនួន រួមមានដូចជា អាយុកាលជាមធ្យម GDP សម្រាប់មនុស្សម្នាក់ ការគាំទ្រផ្នែកសង្គម អំពើពុករលួយមានកម្រិតទាប ចិត្តសប្បុរសធម៌នៅក្នុងសហគមន៍ ដែលមនុស្សចេះជួយយកអាសាគ្នាទៅវិញទៅមក និងសេរីភាពក្នុងការសម្រេចចិត្តសំខាន់ៗក្នុងជីវិតជាដើម។

ជាសមាជិកមួយនៃសហភាពអឺរ៉ុប ដែលបច្ចុប្បន្នមាន២៧ប្រ​ទេសជាសមាជិក ប្រទេសហ្វាំងឡង់ មានផ្ទៃដីសរុប៣៣៨.៤៥៥គីឡូម៉ែត្រការ៉េ និងមានប្រជាជនសរុបប្រមាណ៥,៦លាននាក់គិតត្រឹមឆ្នាំ២០២២៕ CNN៕

ដោយ: គង់ លាងហួរ

ក្រុងឡុងដ៍: លោក Nuno Matos នាយកប្រតិបត្តិនៃក្រុមហ៊ុន Wealth and Personal Banking នៃធនាគារ HSBC Group បានឱ្យដឹងនៅក្នុងបទសម្ភាសន៍ ជាលាយលក្ខណ៍អក្សរកាលពីពេលថ្មីៗនេះជាមួយសារពត៌មានXinhuaថា សេដ្ឋកិច្ចរបស់ប្រទេសចិនបង្ហាញពីសក្ដានុពល នៃកំណើនរយៈពេលវែង និងឱកាសទាក់ទាញសម្រាប់ក្រុមហ៊ុន និងវិនិយោគិនបរទេស។

លោក Matos បានបន្តថា “បើក្រឡេកទៅមើលឆ្នាំ២០២២ ទីផ្សារចិន និងអាស៊ីបានបង្ហាញពីភាពធន់រឹងមាំ ដោយលោកបន្ថែមថា ការងើបឡើងវិញ នៃសេដ្ឋកិច្ចរបស់ប្រទេសចិន ពីផលប៉ះពាល់នៃជំងឺរាតត្បាតគឺកើតឡើង ក្នុងល្បឿនយ៉ាងលឿនជាងការរំពឹងទុក ដោយចាក់គ្រឹះដ៏រ៉ឹងមាំសម្រាប់ឆ្នាំ២០២៣នេះ”។

នាពេលថ្មីៗនេះ ធនាគារ HSBC Group បានបង្កើនការព្យាក​រណ៍របស់ខ្លួន សម្រាប់កំណើនសេដ្ឋកិច្ចរបស់ប្រទេសចិន រហូតដល់៥,៦ភាគរយក្នុងឆ្នាំ២០២៣ ពីកម្រិតដើម៥ភាគរយ ខណៈដែលមានការរំពឹងថា ការស្ទុះងើបឡើងវិញ នៃការប្រើប្រាស់ជាកត្តាជំរុញដ៏សំខា​ន់ នៃកំណើនសេដ្ឋកិច្ចនៅក្នុងប្រទេសចិន ជាពិសេសនៅក្នុងវិស័យសេវាកម្ម។

ធនាគារ HSBC Group ក៏បានរំពឹងថា ទ្រព្យសម្បត្តិគ្រួសាររបស់ប្រទេសចិន នឹងកើនឡើងប្រហែល៨,៥ភាគរយ ជារៀងរាល់ឆ្នាំក្នុងរយៈពេលប៉ុន្មានឆ្នាំខាងមុខនេះ ដោយទ្រព្យសកម្មគ្រួសារ ដែលអាចវិនិយោគ នឹងឈានដល់៣០០ពាន់ពាន់លានយ័ន(ប្រហែល៤៣,៥ពាន់ពាន់លានដុល្លារ) ក្នុងឆ្នាំ២០២៥ ដោយផ្តល់នូវមូលដ្ឋានទ្រព្យសម្បត្តិដ៏ល្អ សម្រាប់ការអភិវឌ្ឍសង្គមចិន។

ធនាគារិករូបនេះក៏បានអះអាងផងដែរថា ប្រទេសចិនបានប្តេជ្ញាចិត្ត ក្នុងការបើកវិស័យហិរញ្ញវត្ថុរបស់ខ្លួន និងអភិវឌ្ឍសេដ្ឋកិច្ចប្រកប​ដោយនិរន្តរភាព និងច្នៃប្រឌិតក្នុងរយៈពេលជាច្រើនឆ្នាំ។

លោក Matos បានមានប្រសាសន៍ថា “យើងស្វាគមន៍ចំពោះវិធានការនានា ដែលជំរុញការបើកទូលាយ នៃវិស័យសេវាកម្មហិរញ្ញវត្ថុ ហើយចំនួនវិនិយោគិនបរទេស និងបរិមាណនៃការវិនិយោគបរទេសនៅក្នុងប្រទេសចិន បានកើនឡើងជាលទ្ធផល”។

លោកជឿជាក់ថា “ការវិនិយោគបរទេស អាចដើរតួនាទីយ៉ាងសំខាន់ ក្នុងការអភិវឌ្ឍទីផ្សារហិរញ្ញវត្ថុបៃតង ហើយជម្រៅនៃទីផ្សារមូលធនរបស់ប្រទេសចិន បញ្ជាក់ពីមហិច្ឆតារបស់ប្រទេសនេះ ក្នុងការក្លាយជាអ្នកដឹកនាំពិភពលោកមួយនៅក្នុងវិស័យនេះ”។

លោក Matos បានកត់សម្គាល់បន្ថែមថា “ការពន្លឿនការពង្រីកទ្រព្យសម្បត្តិ ធនាគារឯកជន ធានារ៉ាប់រង និងអាជីវកម្មគ្រប់គ្រងទ្រព្យសកម្មនានា គឺជាអាទិភាពជាយុទ្ធសាស្រ្ត សម្រាប់ធនាគារ HSBC នៅក្នុងប្រទេសចិន”៕

  x

ដោយ: គង់ លាងហួរ

ហុងកុង: ក្រុមហ៊ុនអចលនទ្រព្យ លំដាប់យក្សរបស់ប្រទេសចិន China Evergrande Group គ្រោង​នឹង​បោះពុម្ពផ្សាយ​តារាង​កំណត់​រចនាសម្ព័ន្ធ​បំណុល ​នៅក្រៅប្រទេសនៅ​ថ្ងៃ​ពុធ​សប្តាហ៍នេះ ក្នុង​គោ​លបំណង​ចុះ​ហត្ថលេខា ​លើ​កិច្ចព្រមព្រៀង​ជាមួយ​ម្ចាស់​បំណុល​នៅចុង​ខែមីនានេះ។

អ្នកតំណាងមួយរូបនៃក្រុមម្ចាស់បំណុល នៅក្រៅប្រទេសដ៏សំខាន់មួយ បានអះអាងបន្ទាប់ពីសវនាការថា ខ្លួនបានយល់ព្រមលើលក្ខខណ្ឌ នៃការរៀបចំរចនាសម្ព័ន្ធឡើងវិញ ដែលបានស្នើឡើងរបស់ក្រុមហ៊ុនEvergrande ដែលជាការផ្លាស់ប្តូរដ៏សំខាន់មួយ ក្នុងការបើកផ្លូវសម្រាប់ក្រុមហ៊ុន ដើម្បីរៀបចំរចនាសម្ព័ន្ធឡើងវិញនូវបំណុលនៅក្រៅប្រទេសចំនួន២២,៧ពាន់លានដុល្លារ។

ជាមួយនឹងបំណុលច្រើនជាង៣០០ពាន់លានដុល្លារ រួមទាំងបំណុលនៅឯនាយសមុទ្រ ក្រុមហ៊ុនEvergrande បានចាប់ផ្តើមដំណើរការរៀបចំ រចនាសម្ព័ន្ធបំណុលដ៏ធំបំផុតមួយ របស់ប្រទេសចិនកាលពីដើមឆ្នាំ២០២២។

នៅក្នុងសវនាការតុលាការកាលពីថ្ងៃចន្ទ ក្រុមហ៊ុននេះបានអះអាងថា ខ្លួនរំពឹងថា កិច្ចព្រមព្រៀងមួយ នឹងត្រូវបានចុះហត្ថលេខាដោយម្ចាស់បំណុលទូទៅនៅចុងខែមីនា ហើយការរៀបចំ​រចនាសម្ព័ន្ធ​ឡើងវិញ ​នឹង​ចូល​ជាធរមាន​ចាប់ពី​ថ្ងៃទី​១ ខែតុលា​។

ខណៈដែល ក្រុមហ៊ុន Evergrande ស្វែងរកការព្រមព្រៀងពីម្ចាស់បំណុលទូទៅ សម្រាប់ការរៀបចំរចនាសម្ព័ន្ធឡើងវិញ តុលាការបានកំណត់ថ្ងៃទី៣១ ខែកក្កដា សម្រាប់សវនាការបន្ទាប់នៃញត្តិបន្ថែម។

ប្រភពជាច្រើនបានប្រាប់សារពត៌មាន Reuters ថា ក្រុមហ៊ុន Evergrande បាននិងកំពុងព្យាយាមឈានដល់ កិច្ចព្រមព្រៀងជាមួ​យអ្នកកាន់ប័ណ្ណភាគហ៊ុននៅឯនាយសមុទ្រធំៗ លើលក្ខខណ្ឌរួមទាំងការផ្លាស់ប្តូរផ្នែកនៃបំណុលរបស់ខ្លួន ទៅជាភាគហ៊ុននៅក្នុងបុត្រសម្ព័ន្ធ ដែលបានចុះបញ្ជីចំនួន២នៅក្នុងទីក្រុងហុងកុង៕

ដោយ: គង់ លាងហួរ

ញូវដេលី: នៅថ្ងៃចន្ទនេះ ប្រទេសឥណ្ឌា បានគូសបញ្ជាក់ពីផែន ការបោះទុនវិនិយោគរាប់ពាន់លានដុល្លារ ទៅលើអាកាសយានដ្ឋាន យន្តហោះ និងការជ្រើសរើសបុគ្គលិក។

ការប្រកាសនេះ ធ្វើឡើងខណៈដែលប្រទេសសេដ្ឋកិច្ចរីកលូតលាស់លឿនបំផុត របស់ពិភពលោកមួយនេះ កំពុងខិតខំដើម្បីបំពេញតម្រូវការធ្វើដំណើរតាមផ្លូវអាកាសដែលកំពុងកើនឡើង។

លោក Jyotiraditya Scindia រដ្ឋមន្ត្រីអាកាសចរណ៍ស៊ីវិល បានប្រាប់ទស្សនិកជនឧស្សាហកម្មម្នាក់ថា កំណើននេះនឹងរួមបញ្ចូលទាំងអាកាសយានដ្ឋានថ្មី និយតករ និងឧបករណ៍គ្រប់គ្រងចរាចរណ៍ផ្លូវអាកាស និងសាលាបង្រៀនបើកបរយន្តហោះថ្មីៗ។

លោក Scindia បានថ្លែងប្រាប់ក្នុងសន្និសីទ CAPA India Aviation Summit នៅទីក្រុងញូវដេលីថា “យើងត្រូវដាក់បញ្ចូលនូវហេដ្ឋារចនាសម្ព័ន្ធអាកាសចរណ៍ស៊ីវិល និងសមត្ថភាពដែលនៅឆ្នាំ២០២៧ នឹងអាចគាំទ្រដល់សេដ្ឋកិច្ច២០ពាន់ពាន់លានដុល្លារ នៅក្នុងប្រទេសឥណ្ឌា”។

រដ្ឋាភិបាលរបស់លោកនាយករដ្ឋមន្រ្តី Narendra Modi បានអះអាងថា ប្រទេសឥណ្ឌា នឹងចំណាយប្រាក់ប្រហែល១១,៨៨ពាន់លានដុល្លារនៅឆ្នាំ២០២៥ ដើម្បីបង្កើនការតភ្ជាប់ ក្នុងតំបន់ដោយការសាងសង់ព្រលានយន្តហោះ និងការធ្វើទំនើបកម្មព្រលានយន្តហោះដែលមានស្រាប់ផងដែរ។

លោក Scindia បានមានប្រសាសន៍ថា សមត្ថភាពផ្ទុកអ្នកដំណើរនៅអាកាសយានដ្ឋានធំៗ ចំនួន៦របស់ប្រទេសនេះ ត្រូវបានគេរំពឹងថា នឹងកើនឡើងដល់៤២០លាននាក់ ក្នុងរយៈពេល៤ឆ្នាំ ធៀបនឹង១៩២លាននាក់នាពេលបច្ចុប្បន្ននេះ ខណៈហ្វូងយន្តហោះរបស់ក្រុមហ៊ុនអាកាសចរណ៍ឥណ្ឌា នឹងកើនឡើងដល់២.០០០គ្រឿងក្នុង  រយៈពេល៥ឆ្នាំខាងមុខ ធៀបនឹង៧០០គ្រឿងនាពេលបច្ចុប្បន្ន។

ចរាចរណ៍ផ្លូវអាកាសកំពុងងើបឡើងវិញ យ៉ាងឆាប់រហ័សពីការរឹតបន្តឹងនៃជំងឺមេរោគឆ្លង ដែលបាននាំឱ្យយន្តហោះត្រូវបានផ្អាកហើរហោះនៅទូទាំងពិភពលោកក្នុងឆ្នាំ២០២០។ បច្ចុប្បន្ននេះ ក្រុមហ៊ុននានាកំពុងខិតខំផលិត ដើម្បីតាមទាន់ល្បឿននៃតម្រូវការយន្តហោះ និងកង្វះម៉ាស៊ីន ដែលធ្វើឱ្យយន្តហោះមួយចំនួនត្រូវបានផ្អាក៕

ដោយៈ វឌ្ឍនៈ

បន្ទាយមានជ័យៈ អគាររដ្ឋបាលច្រកទ្វារអន្តរជាតិស្ទឹងបត់ បានណងអៀន នៅក្រុងប៉ោយប៉ែតខេត្តបន្ទាយ ជាច្រកទ្វារថ្មីមួយសម្រាប់ការនាំចេញចូលរវាងកម្ពុជានិងថៃ ហើយមកដល់ខែមីនា ២០២៣នេះ គម្រោងសាងសង់បានសម្រេចប្រមាណ៨២ភាគរយ ។

នេះបើតាមប្រសាសន៍របស់លោកទេសរដ្ឋមន្រ្តីស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូន។

ថ្លែងនៅក្នុងកិច្ចសម្ភាសន៍ ជាមួយអ្នកសារព័ត៌មាននៅក្នុងពេលចុះពិនិត្យវឌ្ឍនភាព ការងារសាងសង់អគាររដ្ឋបាល ច្រកទ្វារអន្តរជាតិស្ទឹងបត់ ណងអៀន នៅរសៀលថ្ងៃទី២០ មីនា ២០២៣លោកស៊ុន ចាន់ថុលបានមានប្រសាសន៍ថា គិតមកដល់ខែមីនា២០២៣នេះ ក្រុមហ៊ុនសាងសង់ សម្រេចបានការងារ៨២ភាគរយ។ ហើយបើតាមការគ្រោងទុក ក្រុមហ៊ុនថានឹងបញ្ចប់នៅខែឧសភា ២០២៣ខាងមុខនេះ ។ យ៉ាងណាក្ដីតាមរយៈការពិនិត្យផ្ទាល់ភ្នែក ការងារសាងសង់ប្រហែលជាមិនអាចបញ្ចប់បានទេ ។

លោកបន្តថា “ថ្វីត្បិតតែការរងារសាងសង់ សម្រេចបាន៨២ភាគរយក៏ពិតមែន តែលុយដែលគេបង់ជូន ទៅក្រុមហ៊ុនគឺបានតែជាង៤០ភាគរយប៉ុណ្ណោះ”។ លោកបន្តថា “ដូច្នេះក្រុមហ៊ុនក៏ខ្វះខាតថវិកាសម្រាប់ទិញសម្ភារៈ ។ ប៉ុន្តែបើសិនជាពេលនេះ ក្រុមហ៊ុនមានលុយគ្រប់គ្រាន់សម្រាប់ទិញសម្ភារៈ ក៏យើងមិនជឿថា នៅខែឧសភាការងារសាងសង់រួចរាល់ដែរ”។

ដូច្នេះហើយត្រូវមានការជជែកគ្នា ដើម្បីពន្យារពេលសាងសង់បន្តទៀតហើយ ខណៈពីមុនបានពន្យារពេលពីរ លើកមកហើយ ដោយលើកទី១ បានពន្យារជាង១៦០ថ្ងៃ លើកទី២ពន្យារ១០០ថ្ងៃបន្ថែមទៀត ហើយពេលនេះលឺថា ក្រុមហ៊ុនសុំពន្យារបីបួនខែបន្ថែមទៀតហើយ។

លោកស៊ុន ចាន់ថុលបានបន្ថែមថា យើងនឹងផ្ដល់ពេលវេលាសម្រាប់ក្រុមហ៊ុនពន្យារពេលបន្ថែមទៀត ប៉ុន្តែយើងរង់ចាំមើលដល់ខែឧសភាសិន ថាតើនៅខែឧសភា ក្រុមហ៊ុនធ្វើបានប៉ុន្មានភាគរយ ដើម្បីឱ្យក្រសួងឯកភាព គួរតែផ្ដល់ពេលប៉ុន្មានទៀត ដើម្បីផ្ដល់ជូនគាត់ ។

លោកបញ្ជាក់ថា ការសាងសង់ស្ពាន និងច្រកទ្វារស្ទឹងបត់បានណងអៀន ដើម្បីបញ្ចៀសការកកស្ទះ នៅច្រកប៉ោយប៉ែត សម្រាប់ការដឹកជញ្ជូន ដើម្បីទុកឱ្យច្រកទ្វារប៉ោយប៉ែត សម្រាប់ភ្ញៀវទេសចរចេញនិងចូលវិញ ។ ពេលនេះ ច្រកទ្វារស្ទឹងបត់បានណងអៀន ចាប់ផ្ដើមមានឡានចេញចូលបណ្ដើរៗហើយ ក្រោយពីមានការឆេះអគារសណ្ឋាគារ និងកាស៊ីនៅប៉ោយប៉ែត៕