ដោយៈ វុទ្ឋី

ភ្នំពេញៈ លោកស្រី នួន សុន្ទរី ហៅ ស្រីអូន អគ្គនាយិកា ក្រុមហ៊ុន សម្រស់ធម្មជាតិ និងលោក​ឧកញ៉ាឈាង រ័ត្ន ប្រធានក្រុមប្រឹក្សាភិបាល ក្រុមហ៊ុន បុស្បា ប្រផឹធី បាននាំយកអំណោយរួមមាន គ្រឿងឧបភោគ បរិភោគ និងសម្ភារសិក្សា ចែកជូនបងប្អូន និងក្មេងៗ រស់នៅតំបន់គំនរសំរាមស្ទឹងមានជ័យ។

អំណោយដែលបានចែកជូនកាលពីចុងសប្តាហ៍មុន រួមមាន សរុបចំនួន ៣៩០កញ្ចប់ ដោយបែងចែក សម្រាប់១៧០គ្រួសារ និង២២០កញ្ចប់សម្រាប់ក្មេងៗ។

ការចែកគ្រឿងឧបភោគ បរិភោគ និងសម្ភារសិក្សា​ទាំងនេះ ធ្វើឡើង​ក្នុង​គោលបំណង ដើម្បីជួយ​សម្រួល​ដល់​​កម្រិតជីវភាពបងប្អូនប្រជាពលរដ្ឋរស់នៅតំបន់នោះ ដែលកំពុងខ្វះខាត ជាពិសេស ចូលរួមចែករំលែកក្តីស្រឡាញ់ និងស្នាមញញឹមនាឱកាសទិវានារីអន្តរជាតិខាងមុខនេះ។ ម្យ៉ាងវិញទៀត វាគឺជាការជា​រួមចំណែក​ដ៏មានសារៈសំខាន់ក្នុងការលើកទឹកចិត្ត និ​ងជួយជំរុញ​ដល់​ក្មេងៗទាំងនោះ ឲ្យមានសម្ភារសិក្សាគ្រប់គ្រាន់ និងផ្តល់ឱកាសឲ្យពួកគេទទួលបានការអប់រំគ្រប់ៗគ្នា។

គ្រួសារនីមួយៗទទួលបាន គ្រឿងឧបភោគ បរិភោគ មួយចំនួនដូចជា អង្ករ ត្រីខ ទឹកស៊ីអៀវ និងមី ចំណែកកុមាតូចក្នុងម្នាក់ៗ ទទួលបានសម្ភារសិក្សា ខ្មៅដៃ ប៊ិច ជ័រលុប និងទឹកដោះគោជាដើម។

អ្នកនាង ស្រីអូន និងស្វាមី តែងតែធ្វើសកម្មភាពសប្បុរសធម៌ជាច្រើនជួយដល់សង្គម និងប្រជាពលរដ្ឋដែលជួបប្រទះ ក្នុងជីវភាពខ្វះខាតមួយចំនួនតាមគ្រប់រូបភាព៕

   ដោយៈ គង់ សូរិយា

    ភ្នំពេញៈ អាជ្ញាធររាជធានីភ្នំពេញ បានកោះអញ្ជើញម្ចាស់ ឬអ្នកកាន់កាប់សណ្ឋាគារ អាផាតម៉ិន និងខុនដូរប្រមាណ៤០០នាក់ មកប្រជុំដើម្បីផ្សព្វផ្សាយលើការងារគ្រប់គ្រង ហត្ថពលកម្មបរទេស សំដៅយ៉ាងណាគ្រប់គ្រងជនបរទេស នៅក្នុងភូមិសាស្រ្តរាជធានីភ្នំពេញ ឲ្យបានល្អចៀសវាងពួកគាត់ ប្រព្រឹត្តបទល្មើសខុសច្បាប់ផ្សេងៗនៅតាមទីតាំងដែលពួកគាត់ស្នាក់នៅ។

កិច្ចប្រជុំផ្សព្វផ្សាយនេះ បានធ្វើឡើងនារសៀលថ្ងៃទី៧ ខែមីនា ឆ្នាំ២០២៣ ក្រោមវត្តមានលោកហួត ហៃ និងលោក ហ៊ុន សុរិទ្ធី អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ។

លោក ហួត ហៃ បានលើកឡើងថា ការកោះអញ្ជើញម្ចាស់ ឬអ្នកកាន់កាប់សណ្ឋាគារ អាផាតម៉ិន និងខុនដូ ក្នុងភូមិសាស្រ្តរាជធានីភ្នំពេញ មកប្រជុំនេះ អាជ្ញាធរមានគោលបំណងឲ្យម្ចាស់ ឬអ្នកកាន់កាប់សណ្ឋាគារ អាផាតម៉ិន និងខុនដូរទាំងអស់ គ្រប់គ្រងជនបរទេសឲ្យបានល្អ នៅក្នុងទីតាំងរបស់ខ្លួន ពិសេសរួមគ្នាប្រយុទ្ធប្រឆាំងការជួញដូរមនុស្សគ្រប់ទម្រង់ ទប់ស្កាត់ការលែងល្បែងស៊ីសងគ្រប់ប្រភេទ តាមអនឡាញ និងទប់ស្កាត់ការលាងសំអាត ប្រាក់ជាដើម។

លោកហួត ហៃ បានបញ្ជាក់ថា “ជាជំហានដំបូងនេះ យើងគ្រាន់តែធ្វើការផ្សព្វផ្សាយច្បាប់ប៉ុណ្ណោះ ដោយរដ្ឋបាលរាជធានីភ្នំពេញ ទុករយៈពេលឲ្យបងប្អូនជាម្ចាស់ ឬអ្នកកាន់កាប់សណ្ឋាគារ អាផាតម៉ិន និងខុនដូរចំនួន៣ខែ គឺខែមេសា ឧសភា និងមិថុនា”។

លោកបន្តថា “ក្រោយពេល៣ខែនេះ ក្រុមការងារដែលមានកងកម្លាំងសមត្ថកិច្ចទាំង២ប្រភេទ អាជ្ញាធរដែនដី ក្រសួងមហាផ្ទៃ និងក្រ​សួងការងារ នឹងចុះពិនិត្យដល់ទីតាំងអាជីវកម្មរបស់បងប្អូនតែម្តង”។

លោកបន្តថា ជនបរទេសមករកស៊ី ធ្វើការ និងស្នាក់នៅកម្ពុជា ត្រូវយល់ដឹងពីច្បាប់របស់កម្ពជា និងអនុវត្តឲ្យបានល្អ ចៀសវាងប្រព្រឹត្តបទល្មើសផ្សេងៗ ប្រាសចាកពីច្បាប់របស់កម្ពុជា”។

ជាមួយគ្នានេះ លោក ហ៊ុន សុរិទ្ធីបានលើកឡើងថា ចំពោះការងារលើនេះមាន ៣ដំណាក់កាលដែលបងប្អូនជាម្ចាស់ ឬអ្នកកាន់កាប់សណ្ឋាគារ អាផាតម៉ិន និងខុនដូ ត្រូវដឹង រួមមាន ទី១ អាជ្ញាធរត្រូវណែនាំ និងផ្សព្វផ្សាយដើម្បីឲ្យបងប្អូន បានដឹងពីច្បាប់យកទៅអនុវត្ត កុំឲ្យប្រព្រឹត្តខុសច្បាប់ រហូតមានទោសទណ្ឌ ទី២ អនុវត្តវិធានការរដ្ឋបាល ដោយចុះពិនិត្យដល់ទីតាំង និងទី៣ វិធានការច្បាប់។

ទោះបីជាយ៉ាងណាក្តី លោកអភិបាលរងរាជធានីភ្នំពេញទាំង២រូប សុំឲ្យបងប្អូនជាម្ចាស់អាជីវកម្មទាំងអស់ ចូលរួមសហការជាមួយអាជ្ញាធរមានសមត្ថកិច្ច ដើម្បីយើងរួមគ្នាលុបបំបាត់ និងបង្ការទប់ស្កាត់បទល្មើសគ្រប់ប្រភេទឲ្យបាន៕

 ដោយៈ ច្រាយ ចំណាន

    ភ្នំពេញៈ កសាងមូលដ្ឋានទេសចរណ៍មួយ លើទឹកដីពោរពេញដោយសក្តានុពល និងអច្ឆរិយៈសម្រាប់ខេត្តសៀមរាប អ្នកអភិវឌ្ឈន៍័គំរោងបំពេញរាជ បាននិងកំពុងសម្រេចតាមក្តីស្រម៉ៃ របស់ប្រជាពលរដ្ឋមូលដ្ឋាន និងភ្ញៀវទេសចរណ៍ជាតិ អន្តរជាតិបណ្តើរៗ។

ដោយមានទំហំដីជាង៣០០ហិកតា គំរោងនេះ បាននិងកំពុងរៀបចំឡើងតាមដំណាក់កាលរបស់ខ្លូន ដោយការលក់ដីលំហែរក្នុងតម្លៃសមរម្យ សាងសង់ទីកន្លែងលំហែរ ដែលមានបឹង មានបឹងងហ្កាឡូ មានសួនច្បារ មានដើមឈើធំៗរាប់រយដើម ដែលមានប្រភេទខុសៗគ្នា សម្រាប់ជាទីតាំងលំហែរកំសាន្តផង និងសម្រាប់សិក្សាស្វែងយល់ពីអ្នករក្ខវិទូវិទ្យាផងដែរ។

ជាមួយផែនការចំពោះមុខ ការអភិវឌ្ឈន៍គំរោង “បំពេញរាជ”បាននិងកំពុងដើរស្រប តាមគោលនយោបាយរបស់រដ្ឋាភិបាល និងគាំទ្រដល់គោលនយោបាយជាតិ លើការលើកកំពស់ជីវភាពប្រជាពលរដ្ឋនៅមូលដ្ឋាន ដែលពួកគេនឹងទទួលបានផលចំណូលពីវិស័យទេសចរណ៍។

ជាមួយនឹងនិស្ស័យស្រលាញ់បាល់ទាត់ អ្នកអភិវឌ្ឈន៍គំរោងបំពេ​ញរាជ លោកម៉េត មករា និងលោកទៀ សុខាបាននិងកំពុងកសាងថ្នាលយុវជន “សៀមរាបយូណាយធីត” ដើម្បីប្រែក្លាយយុវជនទាំងនេះអាចចូលប្រកួត ក្នុងព្រឹត្តិការណ៍អន្តរជាតិធំៗ និងចូលរូមប្រកួតជម្រុះWorld Cupនៅឆ្នាំ២០៣០ផងដែរ។

ការគោរពស្រលាញ់មេដឹកនាំ ពិសេសសម្តេចតេជោហ៊ុន សែននាយករដ្ឋមន្រ្តីនៃកម្ពុជា បានធ្វើឲ្យការដាក់ឈ្មោះគំរោងនេះ ជាការគាំទ្រដល់ការដឹកនាំរបស់ប្រមុខរាជរដ្ឋាភិបាលផង ជាការចូលរួមបំពេញរាជឲ្យសម្តេចតេជោ ចូលរួមបំពេញរាជឲ្យលោកបណ្ឌិតហ៊ុន ម៉ាណែតអគ្គមេបញ្ជាការកងទ័ពជើងគោក និងជាបេក្ខភាពនាយករដ្ឋមន្រ្តីកម្ពុជានាពេលអនាគត។

គំរោងបំពេញរាជ មានទីតាំងស្ថិតនៅទីរួមស្រុកបន្ទាយស្រី ដែលជាស្រុកមានប្រជាប្រិយភាព និងល្បីល្បាញដោយសារប្រាសាទបន្ទា​យស្រី ដែលមានរចនាបទ និងក្បូរក្បាច់រចនាដ៏រសរវើក។

គំរោងនេះក៏ទទួលបានការគាំទ្រ និងការចង្អុលបង្ហាញណែនាំផ្ទាល់ពីលោកទៀ សីហាអភិបាលនៃគណៈអភិបាល ខេត្តសៀមរាបផងដែរ៕

ដោយៈ គង់ សូរិយា

    ភ្នំពេញៈ ស្របពេលទីផ្សារខុនដូ និងចំនួនយូនីតខុនដូបានកើនឡើងដល់រាប់ម៉ឺនយូនីតនៅក្នុងទីផ្សារ បានធ្វើឲ្យផ្នែកនេះដណ្តើមចំណែ​កទីផ្សារអាផាតម៉ិនកាន់តែខ្លាំង។

ការកើនឡើងនូវយូនីតខុនដូ កំពុងធ្វើឲ្យអ្នកជួលមានជម្រើសកាន់​តែច្រើនជាងមុន ហើយពួកគេអាចជ្រើសរើសយូនីតខុនដូជំនួសវិញ ដោយសារខុនដូមានការឌីសាញ មានសេវាកម្មចម្រុះ និងមានការរស់នៅបែបសហគមន៍ច្រើនជាងអាផាតម៉ិន ដែលភាគច្រើនត្រូវបានគ្រប់គ្រងជាលក្ខណៈគ្រួសារ។

លោកញឹម រាសីអគ្គនាយកក្រុមហ៊ុនអចលនទ្រព្យWHបានមានប្រសាសន៍ថា ដោយសារការរស់នៅលើខុនដូ មានភាពងាយស្រួល និងយូនីតមានទំហំសមល្មម បានធ្វើឲ្យខុនដូដណ្តើមបានចំណែ​កទីផ្សារមួយចំនួនពីអាផាតម៉ិន ដែលខុនដូមានសេវាកម្មចម្រុះ និងជាយូនីតថ្មីៗ។

លោកបន្តថា “ជាមួយគ្នានេះ ការវិនិយោគខុនដូមានឱកាសទទួលបានផលចំណេញ ពីការវិនិយោគខ្ពស់ ធៀបនឹងការវិនិយោគលើផ្នែកអចលនទ្រព្យដទៃទៀត”។

ជាមួយគ្នានេះ លោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹងផងដែរថា ទីផ្សារអាផាតម៉ិន ពិតជាប្រឈមមុខនឹងការប្រកួតប្រជែងច្រើន ដែលទំហំទីផ្សារមិនសូវមានការកើនឡើង ប៉ុន្តែការវិនិយោគសាងសង់អាផាតម៉ិន បានកើនឡើងក្នុងទីផ្សារ។

លោកបណ្ឌិតបន្តថា “ពីមុនអ្នកមានអាផាតម៉ិនកំពស់ត្រឹម៨ទៅ១០ជាន់ អាចជាស្តេចមួយក្នុងទីផ្សារ ប៉ុន្តែពេលនេះអាគារអាផាតម៉ិនកាន់តែទំនើប និងមានកំពស់ខ្ពស់ៗ”។ លោកបន្តថា “ទីផ្សារនេះកាន់តែប្រកួតប្រជែង ដែលទាមទារឲ្យម្ចាស់ អាផាតម៉ិននិមួយៗគិតគូពីការរៀប​ចំសេវាកម្ម គុណភាព និងសោភ័ណភាពអាគាររបស់ខ្លួនឲ្យបានល្អប្រសើរ”៕

ដោយៈ ជេស៊ីកា

    ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានបញ្ជាក់ពីផែនការលំអិត ទាក់ទងនឹងបច្ចេកទេសនៃការជីកព្រែកពីទន្លេបាសាក់ ទៅកាន់ខេត្តកែបនាពេលខាងមុខ។

លោកបានមានប្រសាសន៍ឲ្យដឹងទៀតថា ការជីកព្រែកនេះនឹងសាងសង់ទ្វារទឹកចំ​នួន៤ ហើយមិនមានការបាត់ទឹកនោះទេ គឺមានទឹកពេញព្រែករហូត ដោយនៅចំណុចតភ្ជាប់រវាងព្រែក និងសមុទ្រគឺកប៉ាល់ទៅដល់ទ្វារនឹងបើក ហើយកប៉ាល់ចេញផុតទ្វារទឹកនឹងបិទវិញ។

លោកបន្តថា “យើងសិក្សាលំអិតណាស់ គឺមិនឲ្យទឹកប្រៃធ្លាយមកដល់ខេត្តតាកែវ និងស្រុកស្អាងក្នុងខេត្តកណ្តាលនោះទេ”។លោកបន្តថា “អញ្ចឹងយើងសិក្សាលំអិតណាស់ ដោយការងារនេះត្រូវបញ្ជូនទៅគណៈកម្មការទន្លេរមេគង្គ អញ្ចឹង​យើងមានអ្នកបច្ចេកទេស និងក្រុមហ៊ុនពិសេស ដែលមានឯកទេស ក្នុងការជីកព្រែកបែបនេះនៅប្រទេសចិន”។

លោកស៊ុន ចាន់ថុលបានបន្តថា នេះជាគំរោងធំមួយ ជាគំរោងប្រវត្តិសាស្រ្ត ដែលមិនធ្លាប់មាន ដែលកាត់បន្ថយការចំណាយ កាត់បន្ថយពេលវេលា និងមិនមានការលំបាកនៅតាមតំបន់ទល់ដែន ក្នុងការដឹកជញ្ជូនទំនិញនោះទេ៕

ដោយៈ វឌ្ឍនៈ

ភ្នំពេញៈ គម្រោងអភិវឌ្ឍ៍អគារស្នាក់នៅ របស់ក្រុមកីឡាករកីឡាករិនី ចូលរួមប្រកួតក្នុងព្រឹត្តិការណ៍កីឡាស៊ីហ្គេម ឬហៅថាបុរីកីឡា គ្រោងនឹងបញ្ចប់រួចរាល់ នៅចុងខែមីនាឆ្នាំ២០២៣នេះ ដើម្បីប្រគល់ជូនរដ្ឋាភិបាល ក្នុងការចាត់ចែងរៀបចំបន្ត ខណៈបច្ចុប្បន្ននេះក្រុមហ៊ុនសាងសង់បានសម្រុកការងារទាំងថ្ងៃទាំងយប់ ជាមួយនឹងកម្មករជាង៣០០០នាក់។

លោកឆេ វិសិដ្ឋ អ្នកគ្រប់គ្រងគម្រោង Worldbridge Sport Village ឬហៅថាបុរីកីឡាថ្មី បានមានប្រសាសន៍តាមទូរសព្ទនៅរសៀលថ្ងៃទី៧ មីនា ២០២៣ឱ្យដឹងថា អគារខ្លះនៃគម្រោងមួយនេះ បានសម្រេចស្ទើរតែទាំងស្រុងហើយ ហើយអគារខ្លះទៀតនៅសល់តិចតួច ប៉ុន្តែក្រុមការងារបានប្រើប្រាស់កម្មករ ប្រមាណ៣ពាន់នាក់ ដោយពេលខ្លះកម្មករ ត្រូវថែមម៉ោងធ្វើដល់ម៉ោង១២យប់ និងថ្ងៃខ្លះត្រូវធ្វើដល់ម៉ោង១០ និងអាចភ្លឺក៏មានដែរ ។

លោកបន្តថា “យើងសម្រុកការងារនេះ ដើម្បីឱ្យបានបញ្ចប់ទាំ​ងស្រុងនៅមុនដំណាច់ខែមីនាឆ្នាំ២០២៣នេះ ហើយការងារបន្តគឺយើងប្រគល់ជូនរដ្ឋាភិបាល ដើម្បីឱ្យលោករៀបចំតុបតែងផ្នែកខាងក្នុងសម្រាប់ត្រៀមទទួលភ្ញៀវ ដែលនឹងអញ្ជើញមកចូលរួមក្នុងព្រឹត្តិការណ៍ប្រកួតកីឡាស៊ីហ្គេម”។លោកបន្តថា “គម្រោងនេះគឺយើងសាងសង់ឡើង ផ្ដោតទៅលើព្រឹត្តិការណ៍កីឡាស៊ីហ្គេម ទើបយើងខំប្រឹងក្នុងសម្រុកឱ្យរួចក្នុងព្រឹត្តិការណ៍នោះ”។

លោកបន្ថែមថា ចាប់តាំងពីគម្រោង Worldbridge Sport Village ចាប់ផ្ដើមដំណើរការសាងសង់ ឃើញថានៅតំបន់ជុំវិញពហុកីឡដ្ឋានជាតិមរតកតេជោ មានគម្រោងអភិវឌ្ឍន៍ថ្មីៗជាបន្តបន្ទាប់ចាប់ផ្ដើមដំណើរការអភិវឌ្ឍដូចជាផ្សារទំនើបម៉ាក្រូ សកលវិទ្យាល័យជាតិមួយចំនួន និងគម្រោងអភិវឌ្ឍន៍ហេដ្ឋារចនាសម្ព័ន្ធ របស់រដ្ឋជាច្រើនផងដែរ ។

ចំណែកលោកសុត សុធារ៉ា អ្នកគ្រប់គ្រងគម្រោងនេះមួយរូបដែរនោះក៏បានលើកឡើងផងដែរថា តាមពិតការសាងសង់ ត្រូវបញ្ចប់យូរមកហើយ តែដោយសារតែបញ្ហាស្ថានភាពកូវីដ១៩ និងនៅពេលដែលយើងបុកគ្រឹះអាកាសធាតុ ភ្លៀងធ្លាក់ស្ទើរតែពេញមួយឆ្នាំ ធ្វើឱ្យការបុកគ្រឹះត្រូវប្រើពេលយូរ ពីព្រោះតែភ្លៀងមិនអាចបុកគ្រឹះបានល្អ ។

អ្នកស្រីហ្គ្រេស រចនី អគ្គនាយិកាក្រុមហ៊ុន Century 21 Cambodia បានមានប្រសាសន៍ថា នៅតំបន់ប៉ែកខាងជើង យើងមើលឃើញថា កាន់តែមានភាពទាក់ទាញ លើការវិនិយោគនិងអភិវឌ្ឍន៍អចលនទ្រព្យ ជាពិសេសនៅតាមបណ្ដោយផ្លូវជាតិលេខ៦ ទៅដល់ពហុកីឡដ្ឋានជាតិមរតកតេជោ មានគម្រោងអភិវឌ្ឍន៍លំនៅឋានជាច្រើន បានបោះទីតាំងគម្រោងរបស់ខ្លួនជាហូរហែរ។

អ្នកស្រីបន្តថា កត្តាផ្សេងទៀតដែលធ្វើឱ្យតំបន់នេះ កាន់តែមានភាពទាក់ទាញនោះ ក៏ព្រោះតែសំណង់ធំៗមួយចំនួន បានលេចរូបរាងនៅតំបន់នោះដូចជាវិមានឈ្នះឈ្នះ ពហុកីឡដ្ឋានជាតិមរតកតេជោ និងគម្រោងអភិវឌ្ឍន៍របស់ឯកជនជាច្រើនផងដែរ៕