ដោយៈ វឌ្ឍនៈ

ភ្នំពេញៈ ការវិនិយោគអចលនទ្រព្យ ក្នុងប្រទេសកម្ពុជាក្នុងអំឡុងវិបត្តិកូវីដ១៩ ឃើញថាចាប់ផ្ដើមមានបញ្ហាលើទីផ្សារ និងតម្រូការស្ទើរតែគ្រប់ផ្នែកមិនថាលំនៅឋាន ដីធ្លី ឬក៏អចលនទ្រព្យផ្សេងឡើយ។

ប៉ុន្តែសម្រាប់ឆ្នាំ ២០២៣នេះ អ្នកជំនាញ និងអ្នកអភិវឌ្ឍន៍អចលនទ្រព្យមើលឃើញថា អចលនទ្រព្យប្រភេទលំនៅឋានអាចនឹងមានតម្រូវការខ្ពស់ឡើងវិញ។

លោកឡុង បូរិន្ទ នាយកប្រតិបត្តិនៃក្រុមហ៊ុនអភិវឌ្ឍន៍បុរីមួយនៅក្នុងប្រទេសកម្ពុជាបានមានប្រសាសន៍ថា ក្នុងឆ្នាំ២០២៣នេះ អាចចាត់ទុកជាឆ្នាំ សម្រាប់អចលនទ្រព្យប្រទេសកម្ពុជា ហើយក៏ជាដែលត្រូវអភិវឌ្ឍន៍អចលនទ្រព្យឱ្យកើនឡើងវិញផងដែរ។ យ៉ាណាក្ដីសម្រាប់ផ្នែកផ្សេងៗនេះអចលនទ្រព្យ យើងរំពឹងថាប្រភេទលំនៅឋានជាប្រភេទអចលនទ្រព្យដែលរំពឹងថា នឹងមានតម្រូវការខ្ពស់នៅក្នុងឆ្នាំ ២០២៣នេះ។

លោកបន្តថា ប្រភេទអចលនទ្រព្យជារីសត ផ្ទះលំហែកាយក៏ចាត់ទុកជាប្រភេទអចលនទ្រព្យ ដែលមានតម្រូវការខ្ពស់ផងដែរ នៅក្នុងឆ្នាំ២០២៣នេះ ហើយប្រភេទផ្ទះអាជីវកម្ម និងផ្ទះសម្រាប់ស្នាក់នៅ ក៏នឹងមានតម្រូវការខ្ពស់ដូចគ្នាដែរ ដែលអ្នកអភិវឌ្ឍន៍ត្រូវផ្ដោតការយកចិត្តទុកដាក់ក្នុងការអភិវឌ្ឍដើម្បីបំពេញ តម្រូវការទីផ្សារ។

លោកបន្តថា “ក្នុងឆ្នាំ២០២០ ឆ្នាំ២០២១ និងឆ្នាំ២០២២ មនុស្សភាគច្រើន មិនសូវបានដើរកម្សាន្ត ឬអាចថាជាឆ្នាំដែលពួកគាត់ព្រួយបារម្ភពីកូវីដ១៩ ហើយឆ្នាំ២០២៣នេះ ស្ថានភាពកូវីដ១៩កាន់តែមានភាពប្រសើរទាំងក្នុងក្របខណ្ឌ ប្រទេសកម្ពុជានិងក្នុងក្របខណ្ឌពិភពលោក ដូច្នេះមនុស្សត្រូវការដើរកម្សាន្ត ហើយនៅពេលពួកគេដើរកម្សាន្តពិតណាស់ នឹងមានតម្រូវការទៅលើការស្នាក់នៅ ជាពិសេសក្នុងតំបន់រមណីយដ្ឋាន”។

លោកបន្ថែមថា បច្ចុប្បន្ននេះ ប្រជាជនកម្ពុជាជាពិសេសនៅរាជធានីភ្នំពេញ នៅមិនទាន់មានផ្ទះផ្ទាល់ខ្លួននៅឡើយ។ ដូច្នេះនៅពេលអនាគតរួមទាំងឆ្នាំនេះផងដែរ តម្រូវការផ្ទះគ្រប់ប្រភេទ នឹងកើនឡើងខ្ពស់ ។

ជាមួយគ្នានេះ លោកឧកញ៉ានួន រឺទ្ធីអគ្គនាយកក្រុមហ៊ុនKFA ក៏បានលើកឡើងថា ការអភិវឌ្ឍលំនៅឋាន នៅតែមានសកម្មភាពទោះបីជាស្ថិតនៅក្នុងស្ថានភាពបែបណាក៏ដោយ ហើយតម្រូវការលំនៅឋានក៏នៅតែមានដូចគ្នា គ្រាន់តែមានច្រើនឬតិច ប៉ុន្តែមនុស្សម្នាក់ ត្រូវតែទីជម្រកមួយសម្រាប់ស្នាក់នៅដូច្នេះ តម្រូវការអចលនទ្រព្យប្រភេទនេះ នៅតែជាអាទិភាព សម្រាប់អភិវឌ្ឍន៍របស់វិនិយោគិនក្នុងនិងក្រៅប្រទេស។

យ៉ាងណាក៏ដោយស្រប នឹងកំណើនភ្ញៀវទេសចរអន្តរជាតិរំពឹងកើនឡើងវិញផងដែរនោះ អ្នកជំនាញនៃទីផ្សារខុនដូលោកខន គង្គាក៏រំពឹងថាទីផ្សារខុនដូ ក្នុងប្រទេសកម្ពុជាក៏នឹងហក់ឡើងខ្ពស់ដូចគ្នា នៅក្នុងឆ្នាំ ២០២៣នេះ ហើយក៏រំពឹងថា នឹងមានការអភិវឌ្ឍគម្រោងខុនដូថ្មីៗ នៅក្នុងកម្ពុជាបន្ថែមទៀតដែរ៕

ដោយ: គង់ លាងហួរ

ភ្នំពេញ: ដំណើរការនៃការផ្ទេរប័ណ្ណកម្មសិទ្ធិ លើផ្ទៃដីទំហំ១៣០ហិកតា ដែលកំពង់ផែស្វយ័តក្រុងព្រះសីហនុ (PAS) ដែលបានលក់ទៅឱ្យអ្នកទិញក្នុងឆ្នាំ២០២១ ជាមួយកិច្ចព្រមព្រៀង ដែលពួកគេបានចុះហត្ថលេខាត្រូវបានបញ្ចប់នៅដើមឆ្នាំនេះ។

ការលក់នេះបានធ្វើឡើង បន្ទាប់ពីកំពង់ផែស្វយ័តក្រុងព្រះសីហនុ (PAS) បានខាតបង់ប្រាក់ប្រហែល៣,៥លានដុល្លារអាមេរិក នៅក្នុងត្រីមាសចុងក្រោយនៃឆ្នាំ២០២២។ នេះ​បើ​តាម​របាយការណ៍​ដែលបានចេញ​ផ្សាយ​នៅ​លើផ្សារហ៊ុន​កម្ពុជា។

របាយការណ៍បានចង្អុលបង្ហាញថា ដំណើរការនេះត្រូវបានបញ្ចប់នៅក្នុងខែមករា ឆ្នាំ២០២៣ ហើយតម្លៃកិច្ចសន្យា ដែលនៅសល់ត្រូវបានគេរំពឹងថា នឹងទទួលបាននៅចុងខែកុម្ភៈ ឆ្នាំនេះ បន្ទាប់ពីអ្នកទិញបានបង់ប្រាក់ចំនួន២លានដុល្លារជាប្រាក់កក់។

PAS ដែលជាសហគ្រាសសាធារណៈ ដែលបានចុះបញ្ជីនៅក្នុង ផ្សារមូលបត្រកម្ពុជា (CSX) កាលពីថ្ងៃទី៨ ខែមិថុនា ឆ្នាំ២០១៧ បានចុះកិច្ចសន្យាលក់ និងទិញដើម្បីលក់ដីទំហំ១៣០ហិកតា ស្ថិតនៅក្នុងឃុំបេតត្រាំង ខេត្តព្រះសីហនុ ក្នុងតម្លៃ២០ដុល្លារក្នុងមួយម៉ែត្រការ៉េ ដែលតម្រូវឱ្យអ្នកទិញបង់ប្រាក់ ចំនួន២៦លានដុល្លារដល់ PAS នៅពេលបញ្ចប់ការផ្ទេរកម្មសិទ្ធិប្លង់រឹង (LMAP)។

របាយការណ៍បានចង្អុលបង្ហាញថា “ទំហំដីនេះអាចនឹងត្រូវកាត់បន្ថយដោយសារ ការសាងសង់ផ្លូវសាធារណៈ កំពុងដំណើរការនៅលើដីនោះ និងការវាស់វែងឡើងវិញ ជាផ្នែកមួយនៃដំណើរការផ្ទេរកម្មសិទ្ធិដោយក្រសួងរៀបចំដែនដី នគរូបនីយកម្ម និងសំណង់”។

ក្នុងឋានៈជាស្ថាប័នស្វយ័តសាធារណៈ PAS បានទទួលសិទ្ធិអំណាច និងភារកិច្ចសំខាន់ៗពីរដ្ឋាភិបាល ដើម្បីអនុវត្តសកម្មភាពរបស់ខ្លួនក្នុងការផ្តល់សេវាកំពង់ផែសមុទ្រ និងសេវាកម្មពាក់ព័ន្ធ ដូចជាការនាំកប៉ាល់ចូល និងចេញ ការផ្តល់ការផ្គត់ផ្គង់ និងដំណើរការដឹកជញ្ជូនទំនិញ។

ផ្ទុយពីត្រីមាសទី៤ ឆ្នាំ២០២២ PAS ទទួលបានប្រាក់ចំណេញជាង៦លានដុល្លារ ក្នុងរយៈពេលដូចគ្នានៃឆ្នាំមុន ដោយប្រាក់ចំណេញប្រចាំឆ្នាំរបស់ក្រុមហ៊ុនកំពង់ផែសមុទ្រនេះ បានធ្លាក់ចុះជាង១០ភាគរយមកនៅប្រហែល២០,៨លានដុល្លារ កាលពីឆ្នាំ២០២២ ធៀបនឹង២៣,១លានដុល្លារក្នុងឆ្នាំ២០២១៕

  ដោយៈ គង់ សូរិយា

    ភ្នំពេញៈ រដ្ឋមន្រ្តីប្រតិភូអមនាយករដ្ឋមន្រ្តី និងទទួលបន្ទុកជារដ្ឋលេខាធិការ នៃរដ្ឋលេខាធិការដ្ឋានអាកាសចរណ៍ស៊ីវិល លោកបណ្ឌិត ម៉ៅ ហាវណ្ណាល់ បានអញ្ជើញបំពេញទស្សនកិច្ច រយៈពេល៣ថ្ងៃ ចាប់ពីថ្ងៃទី៥-៧ ខែមីនា ឆ្នាំ២០២៣ នៅប្រទេសទីម័រឡេស្តេ (ទីម័រខាងកើត) ដើម្បីពង្រឹងកិច្ចសហប្រតបត្តិការ វិស័យអាកាសចរស៊ីវិលរវាងប្រទេសទាំងពីរ។

លោកស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរស៊ីវិល បានប្រាប់បណ្តាញព័ត៌មានឲ្យដឹងថា ក្នុងដំណើរទស្សនកិច្ចនេះ លោករដ្ឋមន្ត្រីម៉ៅ ហាវណ្ណាល់ ក៏ត្រូវអញ្ជើញជួបពិភាក្សា និងចុះហត្ថលេខាលើអនុស្សារណៈយោគយល់គ្នា (MoU) ស្តីពីការហោះហើររវាងប្រទេសទាំង២ ជាមួយលោក Jose Agushinho Da Silva រដ្ឋមន្ត្រីក្រសួងដឹកជញ្ជូន និងទំនាក់ទំនង របស់ទីម័រឡេស្តេ។

ជាមួយគ្នានេះ លោករដ្ឋមន្ត្រី ម៉ៅ ហាវណ្ណាល់ នឹងត្រូវចូលជួបសំដែនការគួរសម ជាមួយថ្នាក់ដឹកនាំប្រទេសទីម័រឡេស្តេ ដូចជា លោក Jose Ramos Horta ប្រធានាធិបតីទីម័រឡេស្តេ លោក Taur Matan Ruak នាយករដ្ឋមន្ត្រីទីម័រឡេស្តេ លោក Xanana Gusmao អតីតប្រធានាធិបតី និងនាយករដ្ឋមន្ត្រីទីម័រឡេស្តេ និងលោក Juliao Da Sila អនុរដ្ឋមន្ត្រីក្រសួងការបរទេសទីម័រឡេស្តេផងដែរ៕

ដោយ: គង់ លាងហួរ

ភ្នំពេញ: ការដឹកជញ្ជូនទំនិញតាមទន្លេបាសាក់ ទៅកាន់កំពង់ផែសមុទ្រខេត្តកំពត នឹងជំរុញវិស័យដឹកជញ្ជូនតាមផ្លូវទឹករបស់កម្ពុជានៅលើឆាកអន្តរជាតិ និងនាំមកនូវអត្ថប្រយោជន៍កាន់តែច្រើនដល់សេដ្ឋកិច្ចជាតិ ខណៈការសិក្សាលទ្ធភាពលើគម្រោងនេះ នឹងបញ្ចប់ក្នុងពេលឆាប់ៗនេះ។

ក្រសួងសាធារណការ និងដឹកជញ្ជូន បានបើកកិច្ចប្រជុំជាមួយសាជីវកម្មផ្លូវ និងស្ពានចិន (CRBC) នៅថ្ងៃទី០៣ ខែមីនា ដើម្បីបង្ហាញអំពីវឌ្ឍនភាពនៃការសិក្សានេះ។

ក្រសួងបានបន្តថា ការបង្ហាញអំពីវឌ្ឍនភាពចុងក្រោយ នៃការសិក្សាលទ្ធភាពនៃគម្រោងផ្លូវទឹក និងភស្តុភារទន្លេបាសាក់ បានបង្ហាញថា មិនមានបញ្ហាបច្ចេកទេស បរិស្ថាន និងផ្លូវច្បាប់នោះទេ។

ក្រសួងសាធារណការ និងដឹកជញ្ជូនបានអះអាងថា ការសិក្សាលទ្ធភាពនៃគម្រោងនេះ គឺជិតរួចរាល់ហើយ ហើយបានអនុវត្តយ៉ាងពេញលេញ ជាមួយនឹងស្តង់ដារបច្ចេកទេស និងអនុសញ្ញាអន្តរជាតិទាក់ទងនឹងការដឹកជញ្ជូនតាមផ្លូវទឹក។

ក្រសួងបានបញ្ជាក់ថា ក្នុងអំឡុងការសិក្សា ភាគីពាក់ព័ន្ធទាំងអស់បានធ្វើការដោយផ្ទាល់ក្នុងវិស័យនេះ សហការ ពិភាក្សាការងារបច្ចេក ទេសសំខាន់ៗ ក៏ដូចជា ការពិនិត្យមើលលទ្ធផលនៃការវិភាគ និងការវាយតម្លៃផលប៉ះពាល់ នៃហេដ្ឋារចនាសម្ព័ន្ធរូបវន្តគ្រប់ប្រភេទ ដែលអាចរងផលប៉ះពាល់ពីការអភិវឌ្ឍន៍គម្រោងផងដែរ។

ក្រុមហ៊ុន និងក្រសួងគ្រោងនឹងរៀបចំរបាយការណ៍ស្តីពី សមិទ្ធិផល រួមទាំងផែនការមេ និងផែនការសកម្មភាពដែលត្រូវពិភាក្សា ក្នុងកិច្ចប្រជុំគណៈកម្មការអន្តរក្រសួង មុននឹងដាក់ជូនទីស្តីការគណៈរដ្ឋមន្ត្រីនាពេលឆាប់ៗនេះ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ថា គម្រោងនេះនឹងក្លាយជាកម្លាំងចលករក្នុងការផ្លាស់ប្តូរមុខមាត់ នៃវិស័យដឹកជញ្ជូនតាមផ្លូវទឹករបស់កម្ពុជានៅលើឆាកអន្តរជាតិ និងនាំមកនូវអត្ថប្រយោជន៍កាន់តែច្រើនដល់សេដ្ឋកិច្ចជាតិ”។

គម្រោងផ្លូវទឹក និងភស្តុភារនេះមានប្រវែង សរុបប្រមាណ១៨០គីឡូម៉ែត្រ ដោយតភ្ជាប់ពីទន្លេបាសាក់ ទៅកាន់កំពង់ផែសមុទ្រនៃខេត្តកំពត។

គម្រោងផ្លូវទឹកនេះ នឹងជួយកាត់បន្ថយសម្ពាធអតិបរមា នៃការដឹកជញ្ជូនតាមផ្លូវគោក ក៏ដូចជា ជួយសម្រួលដល់សមាហរណកម្មផ្ទៃក្នុង ពង្រឹង និងពង្រីកការតភ្ជាប់ក្នុងតំបន់ និងអន្តរជាតិ តាមរយៈការដឹកជញ្ជូនផងដែរ ហើយការដឹកជញ្ជូនតាមផ្លូវទឹក សមុទ្រ និងកំពង់ផែនឹងកាន់តែងាយស្រួល រលូន និងមានប្រសិទ្ធភាពជាងមុន៕

ដោយៈ សុខុម

ប៉េកាំង: មហាយក្សចិន ក្នុងរយៈពេល៥ឆ្នាំចុងក្រោយនេះបានឆ្លងកាត់ស្ថានការណ៍សាកល្បងយ៉ាងច្រើន និងសម្រេចបានសមិទ្ធផលយ៉ាងសម្បើមផ្នែកសេដ្ឋកិច្ច និងអភិវឌ្ឍន៍សង្គម។ នេះបើយោងតាមរបាយការណ៍បូកសរុប ការងាររបស់រដ្ឋាភិបាលក្រុងប៉េកាំង ដែលបានដាក់ជូនទៅកាន់សភាជាតិកាលពីថ្ងៃអាទិត្យ ទី០៥ ខែមីនា។

របាយការណ៍នេះបង្ហាញថា ផលទុនជាតិសរុប (GDP) របស់ប្រទេសចិន បានកើនឡើងរហូតដល់ ប្រមាណ១៧,៥ទ្រីលានដុល្លារអាមេរិក ជាមួយនឹងអត្រាកំណើនប្រចាំឆ្នាំក្នុងរង្វង់៥,២%។

របាយការណ៍ដដែលបញ្ជាក់ថា ជាលទ្ធផលនៃការខិតខំប្រឹងប្រែងរយៈពេលប្រាំ៨ឆ្នាំមកនេះ ពលរដ្ឋក្រីក្រដែលរស់នៅទីជនបទ រហូតដល់ទៅប្រមាណ១០០លាននាក់ និងតំបន់ក្រីក្រសរុបចំនួន៨៣២តំបន់ ត្រូវបានជួយឱ្យងើបផុតពីភាពក្រីក្រ រួមទាំងប្រជាជនតោកយ៉ាកលំបាកខ្លាំងជាង៩,៦លាននាក់ ដែលបានផ្លាស់ទីលំនៅដ្ឋានពីបណ្ដាតំបន់ដែលពិបាករស់នៅផងដែរ។

សមិទ្ធផលផ្លែផ្កាដ៏ធំសម្បើមទាំងនេះ សម្រេចបាន ក៏ដោយសារមានការរីកចម្រើនខ្លាំងផ្នែកវិទ្យាសាស្ត្រ និងបច្ចេកវិទ្យា ដោយការចំណាយលើការស្រាវជ្រាវ និងអភិវឌ្ឍន៍ (R&D) បានកើនឡើងពី២,១%ឈានដល់២,៥%នៃ GDP និងការបន្តរីកចម្រើនឥតឈប់ឈរផ្នែកវិទ្យាសាស្ត្រ និងបច្ចេកវិទ្យារហូតដល់កំណើនសេដ្ឋកិច្ចកើនលើស៦០%។

រចនាសម្ព័ន្ធសេដ្ឋកិច្ច ត្រូវបានកែលម្អបន្ថែមទៀត សេដ្ឋកិច្ចឌីជីថលបានបន្តកើនឡើងយ៉ាងខ្លាំង។ ទិន្នផលតម្លៃបន្ថែមនៃឧស្សាហកម្មថ្មីៗ និងទម្រង់ ព្រមទាំងគំរូអាជីវកម្មថ្មីៗ បានគ្របដណ្ដប់រហូតដល់ទៅជាង១៧%នៃ GDP។

ប្រទេសចិន បានកែលម្អហេដ្ឋារចនាសម្ព័ន្ធបន្ថែមទៀត ដោយផ្លូវរថភ្លើងល្បឿនលឿន ដែលកំពុងដាក់ដំណើរការបច្ចុប្បន្ន បានកើនឡើងពីប្រវែង២៥.០០០គីឡូម៉ែត្រ ឈានដល់៤២.០០០គីឡូម៉ែត្រ។

ក្នុងរយៈពេល៥ឆ្នាំកន្លងមកនេះ ប្រទេសចិនបានធ្វើកំណែទម្រង់ស៊ីជម្រៅ និងបានបើកចំហលើគ្រប់វិស័យ ដើម្បីបង្កើតគំរូនៃការអភិវឌ្ឍថ្មីៗ និងបានធ្វើឱ្យបរិយាកាសអាជីវកម្ម មានភាពប្រសើរឡើងគួរឱ្យកត់សម្គាល់។

ទន្ទឹមនេះ កម្រិតជីវភាពរបស់ប្រជាជន បានកើនឡើងជាលំដាប់ ដោយប្រាក់ចំណូលពលរដ្ឋម្នាក់ៗប្រចាំឆ្នាំ (GDP per capita) ជាទូទៅបានកើនឡើងស្របគ្នា នឹងកំណើនសេដ្ឋកិច្ច៕ Xinhua៕