ដោយៈ ច្រាយ ចំណាន

ភ្នំពេញៈ គណៈប្រតិភូក្រសួងសាធារណៈការ ដឹកនាំដោយលោកទេស​រដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានចុះបំពេញបេសកកម្មចុះត្រួតពិនិត្យបច្ចេកទេស និងវឌ្ឍនភាពការងារគម្រោងលើកកម្រិតគុណភាពផ្លូវជាតិលេខ៤ ប្រវែង១៩៦ គីឡូម៉ែត្រ ដែលរំពឹងថានឹងរួចរាល់សព្វគ្រប់ក្នុងឆ្នាំ២០២៥ខាងមុខ។

ថ្លែងក្នុងកិច្ចសម្ភាសន៍ ជាមួយអ្នកសារព័ត៌មាននាឱកាសចុះពិនិត្យផ្លូវនេះកាលពីថ្ងៃទី២៣ កុម្ភៈកន្លងមកនេះ លោកទេសរដ្ឋមន្ត្រី បានលើកឡើងថា ពីដើមឡើយផ្លូវជាតិលេខ៤ មានទទឹងតួផ្លូវតែ៧ម៉ែត្រប៉ុណ្ណោះ ហើយបច្ចុប្បន្ន គម្រោងលើកកម្រិតគុណភាពផ្លូវមួយខ្សែនេះ នឹងត្រូវពង្រីកទទឹងតួផ្លូវរហូតដល់១០ម៉ែត្រ ដោយក្នុងនោះប្រវែង៤០គីឡូម៉េត្រ នឹងត្រូវពង្រីកពី២គន្លង ទៅជា៤គន្លង។

លោកទេសរដ្ឋមន្ត្រី បានបន្ថែមថា បើតាមផែនការដែលបានគ្រោងទុក ផ្លូវប្រវែង១៧០គីឡូម៉ែត្រ នឹងត្រូវបញ្ចប់នៅដំណាច់ឆ្នាំ២០២៣នេះ ហើយប្រវែង២៦គីឡូម៉ែត្រទៀត នឹងត្រូវបញ្ចប់ក្នុងឆ្នាំ ២០២៤ខាងមុខ។

ដោយឡែកស្ពានចាស់ចំនួន២៤កន្លែង នឹងត្រូវពង្រីកទំហំទទឹងរហូតដល់១០ម៉ែត្រ និងសាងសង់ស្ពានថ្មីចំនួន០៨កន្លែងទៀត ដោយក្នុងនោះមាន ០២កន្លែង ជាទីតាំងដែលតែងតែរងគ្រោះ ដោយទឹកជំនន់ជារៀងរាល់ឆ្នាំ។ ស្ពានសរុបទាំង៣២កន្លែងនេះ គ្រោងនឹងសាងសង់ឱ្យបានរួចរាល់ក្នុងឆ្នាំ២០២៥។

នៅក្នុងគម្រោងនេះ ក៏មានការជួសជុលស្ថានីយជញ្ជីងថ្លឹងយានយន្តចំនួន៤ទីតាំងផងដែរ ដើម្បីធានាបាននូវប្រសិទ្ធភាព ក្នុងការរឹតបន្តឹងការអនុវត្តច្បាប់ លើការដឹកជញ្ជូនលើសទម្ងន់កម្រិតកំណត់។

លោកទេសរដ្ឋមន្ត្រីស៊ុន ចាន់ថុល ក៏បានអំពាវនាវឱ្យក្រុមហ៊ុនដឹកជញ្ជូនទាំងអស់ សូមកុំដឹកជញ្ជូនលើសទម្ងន់ កម្រិតកំណត់ដោយច្បាប់ ដែលបណ្ដាលឱ្យផ្លូវថ្នល់ឆាប់មានការខូច។

លោកទេសរដ្ឋមន្ត្រីស៊ុន ចាន់ថុល ក៏បានផ្ដល់ជូននូវរូបមន្តមួយ ដែលទទួលបានពីធនាគារពិភពលោក សម្រាប់បង្ហាញជូនប្រជាពលរដ្ឋឱ្យបានដឹងថា ការដឹកជញ្ជូនលើសកម្រិតទម្ងន់កំណត់ គឺជាមូលហេតុចម្បងនាំឱ្យផ្លូវរបស់យើងទាំងអស់មានការសឹករេចរឹល។

ផ្លូវជាតិលេខ៤ គឺជាផ្លូវជាតិមួយតភ្ជាប់ពី រាជធានីភ្នំពេញ ទៅកាន់ទីក្រុងកំពង់ផែភាគនិរតី ដែលជាកំពង់ផែសមុទ្រអន្តរជាតិ តែមួយគត់របស់កម្ពុជា។ ខ្សែផ្លូវនេះនឹងត្រូវលើកកម្រិតគុណភាពជាពិសេស សម្រាប់ការដឹកជញ្ជូនទំនិញរវាង រាជធានី និងកំពង់ផែ ដោយរថយន្តដឹកទំនិញធុនធ្ងន់ និងកុងតឺន័រ ដើម្បីឱ្យស្របទៅតាមកំណើនសេដ្ឋកិច្ច ដ៏ឆាប់រហ័សរបស់ប្រទេសជាតិ៕

ដោយ: គង់ លាងហួរ
សេអ៊ូល: ក្រុមហ៊ុន Ssangyong E&C បានបញ្ចប់ការសាងសង់សណ្ឋាគារលំដាប់ខ្ពស់ថ្មីរបស់ទីក្រុងឌូបៃ ដែលមានឈ្មោះថា Atlantis The Royal ក្រោយពីបានចំណាយរយៈពេលសាងសង់អស់៨ឆ្នាំ។

សណ្ឋាគារលំដាប់ខ្ពស់នេះមាន៧៩៥បន្ទប់ ដែលមាន៤៤ជាន់ និងគ្រឿងបរិក្ខារប្រណីតៗ រួមទាំងអាងហែលទឹកចំនួន៩៤ផងដែរ។

សណ្ឋាគារ Atlantis The Royal ស្ថិតនៅលើកោះសិប្បនិម្មិតដែលគេស្គាល់ថា Palm Jumeirah ក្នុងទីក្រុងឌូបៃដោយថវិកាប្រហែល១,២ពាន់លានដុល្លារត្រូវបានចំណាយដើម្បីសាងសង់សណ្ឋាគារដ៏ប្រណីតនេះ ដោយគម្រោងដ៏ធំនេះត្រូវបានបញ្ជាទិញក្នុងឆ្នាំ២០១៥ ដោយសាជីវកម្មវិនិយោគនៃទីក្រុងឌូបៃ (ICD)។

វា​ជា​សណ្ឋាគារ​លំដាប់​កំពូល​ ដែល​មាន​ទិដ្ឋភាព​ដ៏​អស្ចារ្យ​មើល​ទៅ​ឈូង​សមុទ្រ។ យោងតាមក្រុមហ៊ុនបានឱ្យដឹងថា ភ្ញៀវសណ្ឋាគារទាំងអស់អាចរីករាយនឹងទិដ្ឋភាពដ៏អស្ចារ្យនេះ។

តាំងពីដំបូងមក គម្រោងនេះគឺជាកិច្ចការដ៏គួរឱ្យខ្លាចមួយ ដែលតម្រូវឱ្យមានជំនាញខ្ពស់ ដោយសារតែការរចនាដ៏ស្មុគស្មាញរបស់សណ្ឋាគារនេះ។

ទីប្រឹក្សាសរុបចំនួន៥៤នាក់មកពី១៤ប្រទេសបានធ្វើការរួមគ្នាដើម្បីសម្រេចបាននូវការរចនាដ៏ប្រណីតខ្ពស់ក្នុងការសាងសង់សណ្ឋាគារដ៏ល្អបំផុតនៅក្នុងពិភពលោកមួយនេះ។

ការបញ្ចប់នៃគម្រោង Atlantis The Royal ដែលជាសណ្ឋាគារប្រណីតលំដាប់កំពូលមួយរបស់ពិភពលោក នឹងជួយឱ្យក្រុមហ៊ុន Ssangyong E&C ពង្រឹងជំហររុឹងមាំនៅក្នុងទីផ្សារពិភពលោកក្នុងនាមជាក្រុមហ៊ុនសំណង់កម្រិតខ្ពស់៕

ដោយ: គង់ លាងហួរ
ភ្នំពេញ: ក្រុមអ្នកវិនិយោគ និងអ្នកជំនួញចិនមានបំណងចង់ត្រលប់មកកម្ពុជាវិញបន្ទាប់ពីប្រទេសចិនបានបើកព្រំដែនរបស់ខ្លួនឡើងវិញ។

ភាពស្និទ្ធស្នាលរវាងសហគមន៍ធុរកិច្ចនៃប្រទេសទាំងពីរបានកើតឡើងជាថ្មីម្តងទៀតនៅក្នុងវេទិកាមួយ ដែលរៀបចំដោយវេទិកាជំរុញពាណិជ្ជកម្ម និងវិនិយោគកម្ពុជា-ចិន (ហៃណាន) នៅទីក្រុងភ្នំពេញកាលពីថ្ងៃម្សិលមិញនេះ។

នៅក្នុងវេទិកានោះមានអ្នកចូលរួមជិត២០០នាក់ រួមទាំងមន្ត្រី ពាណិជ្ជករ និងអ្នកវិនិយោគតំណាងឱ្យប្រទេសកម្ពុជា និងចិនផងដែរ។

ថ្លែងនៅក្នុងសុន្ទរកថាបើកព្រឹត្តិការណ៍នេះ លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានមានប្រសាសន៍ថា កម្ពុជាកំពុងរំពឹងថា នឹងមានការកើនឡើងនៃពាណិជ្ជកម្ម និងការវិនិយោគអន្តរជាតិ បន្ទាប់ពីមានកិច្ចព្រមព្រៀងពាណិជ្ជកម្មសេរី (FTAs) ជាមួយប្រទេសចិន និងកូរ៉េខាងត្បូង បន្ថែមពីលើការក្លាយជា  ភាគីនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)។

លោកបានបន្តថា “កម្ពុជាបានធ្វើកំណែទម្រង់ និងដាក់ចេញនូវវិធានការមួយចំនួន ដើម្បីគាំទ្រដល់ការវិនិយោគ និងធុរកិច្ចក្នុងរយៈពេលប៉ុន្មានឆ្នាំកន្លងមកនេះ និងជំរុញឱ្យក្រុមពាណិជ្ជករមកពីប្រទេសចិនបង្កើនកម្រិតនៃការវិនិយោគនៅកម្ពុជា”។

លោកបានមានប្រសាសន៍ថា “ពាណិជ្ជករ និងអ្នកវិនិយោគចិនអាចប្រើប្រាស់ឱកាសដែលកំពុងកើនឡើងនៅក្នុងប្រទេសកម្ពុជា ហើយលោកក៏បានបញ្ចុះបញ្ចូលពួកគេឱ្យដំណើរការអាជីវកម្មនៅកម្ពុជាដូចកាលពីមុនវិបត្តិកូវីដ-១៩ផងដែរ”។

ព្រឹត្តិការណ៍នេះក៏បានបង្ហាញពីបរិយាកាសវិនិយោគនៅក្នុងប្រទេសកម្ពុជា និងគោលនយោបាយមិត្តភាពពាណិជ្ជកម្មរបស់រដ្ឋាភិបាល និងឱកាសដែលផ្តល់ដល់ធុរកិច្ច និងអ្នកវិនិយោគចិនផងដែរ។

លោក Shen Danyang អភិបាលរងខេត្ត Hainan បានរំលឹកពីកិច្ចសហប្រតិបត្តិការរវាងខេត្តនេះ និងកម្ពុជាក្នុងវិស័យកសិកម្ម ជាពិសេសគឺការដាំដុះ និងការធ្វើពាណិជ្ជកម្មផ្លែចេក។

លោកបន្តថា “ខេត្តហៃណាននឹងបន្តពង្រឹងកិច្ចសហប្រតិបត្តិការលើវិស័យកសិកម្ម និងពង្រីកទំនាក់ទំនងទេសចរណ៍ និងការវិនិយោគជាមួយកម្ពុជាផងដែរ”។

លោក Shen បានអះអាងថា “យើងគួរតែប្រើប្រាស់កិច្ចព្រមព្រៀង FTA កម្ពុជា-ចិន និងកិច្ចព្រមព្រៀង RCEP ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ ជាពិសេសជាមួយខេត្តហៃណាន”។

លោកក៏បានលើកទឹកចិត្តដល់បណ្តាសហគ្រាសនៅក្នុងខេត្តហៃណានឱ្យស្វែងរកការវិនិយោគដែលមានសក្តានុពលនៅក្នុងប្រទេសកម្ពុជា និងធ្វើជាដៃគូជាមួយបណ្តាក្រុមហ៊ុនក្នុងស្រុកនៅកម្ពុជាផងដែរ។

នៅក្នុងព្រឹត្តិការណ៍នេះក៏មានការចុះហត្ថលេខាលើអនុស្សរណៈយោគយល់គ្នាជាច្រើន និងកិច្ចព្រមព្រៀងស្តីពីកិច្ចសហប្រតិបត្តិការរវាងក្រុមហ៊ុនចិន និងក្រុមហ៊ុនក្នុងស្រុក។

សម្តេចតេជោនាយករដ្ឋមន្ត្រីបានមានប្រសាសន៍ថា “កិច្ចព្រមព្រៀងពាណិជ្ជកម្មសេរីទ្វេរភាគី និងកិច្ចព្រមព្រៀង RCEP បានបើកទីផ្សារកាន់តែទូលំទូលាយសម្រាប់ផលិតផលកម្ពុជា ជាពិសេសទំនិញកសិកម្ម”។

សម្តេចតេជោនាយករដ្ឋមន្ត្រីបានបញ្ជាក់ថា “ការចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយប្រទេសចិន គឺជាឱកាសដ៏ធំមួយសម្រាប់វិស័យកសិកម្មរបស់កម្ពុជា ដោយសារប្រទេសចិនជាទីផ្សារដ៏ធំ”៕

ដោយៈ វឌ្ឍនៈ

ភ្នំពេញៈ ក្រុមប្រឹក្សាអភិវឌ្ឍន៍កម្ពុជាបានប្រកាសឱ្យដឹងថា ក្រុមប្រឹក្សាបានអនុម័ត គម្រោងវិនិយោគចំនួន៣បន្ថែមទៀត ដែលមានទឹកប្រាក់ជាង១៧លានដុល្លារអាមេរិក។

គំរោងវិនិយោគនេះ ផ្តោតលើខេត្តចំនួន២ ក្នុងរួមមានខេត្តតាកែវ និងខេត្តកំពង់ស្ពឺ ។

យោងតាមសេចក្ដីប្រកាសព័ត៌មាន ​របស់ក្រុមប្រឹក្សា​អភិវឌ្ឍន៍កម្ពុជា  ​ឱ្យដឹងថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុននិងគម្រោង៣ក្នុងនោះ រួមមាន ទី១- គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន PENGJIAO (CAMBODIA) INDUSTRIAL CO., LTD មានទីតាំងវិនិយោគស្ថិតនៅភូមិសំរោង ឃុំសូភី ស្រុកបាទី ខេត្តតាកែវ ក្នុងទុនវិនិយោគប្រមាណ ៧លានដុល្លារអាម៉េរិក និងអាចបង្កើតការងារបានចំនួន ៣.២៥៨កន្លែង។

ទី២- គម្រោងបង្កើតរោងចក្រផលិតសម្ភារៈវេចខ្ចប់ របស់ក្រុមហ៊ុន ZHONG SHAN TENG FEI (CAMBODIA) PACKAGING MATERIAL CO., LTD ដែលមានទីតាំងវិនិយោគស្ថិតនៅភូមិទួលសំបូរ ឃុំដំណាក់រាំង ស្រុកឧដុង្គ ខេត្តកំពង់ស្ពឺ ក្នុងទុនវិនិយោគប្រមាណ ៥,៥លានដុល្លារអាម៉េរិក និងអាចបង្កើតការងារបានចំនួន ១.០៧៦កន្លែង។

ទី៣-គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន SSH CB SUSTAINABLE FASHION CO., LTD មានទីតាំងវិនិយោគស្ថិតនៅភូមិព្រៃសាលា ឃុំរលាំងគ្រើល ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ៥,១លានដុល្លារអាមេរិក និងអាចបង្កើតការងារបានចំនួន ២.១៤៨កន្លែង។

ជាការកត់សម្គាល់ទោះបីជាកម្ពុជា ស្ថិតនៅក្នុងវិបត្តិនៃជំងឺកូវីដ១៩យ៉ាងណាក្ដីក៏ឃើញថា ក្រុមប្រឹក្សាអភិវឌ្ឍន៍កម្ពុជា នៅតែបន្តទទួលបាននិងអនុម័តគម្រោងវិនិយោគថ្មីៗជាបន្តបន្ទាប់ ដែលអាចបញ្ជាក់ថាការវិនិយោគទាំងក្នុង និងក្រៅប្រទេសមកកាន់ទឹកដីកម្ពុជា នៅតែមានសក្ដានុពល៕

ដោយៈ សុខុម

វៀងចន្ទន៍: មេដឹកនាំកម្ពុជា-ឡាវ បានពិភាក្សាគ្នាអំពីការសិក្សាសមិទ្ធលទ្ធភាព លើការសហការបញ្ជូនអគ្គិសនីពីប្រទេសឡាវ ឆ្លងកាត់កម្ពុជា ឆ្ពោះទៅកាន់ប្រទេសសិង្ហបុរី។

កិច្ចបិភាក្សានេះធ្វើឡើង អំឡុងដំណើរបំពេញទស្សនកិច្ចរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទៅកាន់ប្រទេសនេះកាលពីសប្តាហ៍មុន។

សម្ដេចតេជោ ហ៊ុន សែន បានអញ្ជើញទៅបំពេញទស្សនកិច្ចផ្លូវរដ្ឋនៅប្រទេសឡាវ ចន្លោះពីថ្ងៃទី១៣ ដល់ថ្ងៃទី១៥ ខែកុម្ភៈ បន្ទាប់ពីទទួលបានការអញ្ជើញពីឯកឧត្ដម សនសៃ ស៊ីផាន់ដន (Sonexay SIPHANDONE) នាយករដ្ឋមន្ត្រីឡាវ។

មេដឹកនាំកំពូលទាំងពីរបានពិភាក្សាគ្នា អំពីបញ្ហាជាច្រើនរាប់ចាប់ពីបញ្ហាសន្តិសុខ នយោបាយ និងសេដ្ឋកិច្ចដែលពាក់ព័ន្ធប្រទេសទាំងពីរ។ នេះបើយោងតាមសារព័ត៌មាន Laotian Times ចុះផ្សាយកាលពីថ្ងៃពុធ ទី២២ ខែកុម្ភៈ។

ក្រោយជំនួបនេះ ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា កម្ពុជា នឹងទិញថាមពលអគ្គិសនីពីប្រទេសឡាវ បន្ថែមទៀតជាមួយនឹងក្ដីរំពឹងសម្រេចបានកំណើនសេដ្ឋកិច្ច ដែលនឹងត្រូវការការផ្គត់ផ្គង់ថាមពលអគ្គិសនីកាន់តែច្រើន។

ប្រទេសឡាវ និងកម្ពុជា នឹងបន្តបង្កើនកិច្ចសហប្រតិបត្តិការ លើវិស័យថាមពល ខណៈប្រទេសទាំងពីរ ក៏បានចុះកិច្ចព្រមព្រៀងទិញអគ្គិសនីដើរដោយថាមពលធ្យូងថ្ម និងអគ្គិសនីចេញពីរោងចក្រវារីអគ្គិសនី នៅប្រទេសឡាវផងដែរ។

នាយករដ្ឋមន្ត្រីនៃប្រទេសទាំងពីរ ក៏បានពិភាក្សាគ្នាអំពីលទ្ធភាព នៃការកសាងផ្លូវរថភ្លើងល្បឿនលឿន តភ្ជាប់ប្រទេសទាំងពីរ និងប្រទេសផ្សេងទៀតនៅក្នុងតំបន់ផងដែរ៕ Laotian Times៕