ដោយៈ ជេស៊ីកា

       ប៉េកាំងៈ ក្រុមហ៊ុនចិនធំមួយបានជម្រាបសម្តេចតេជោហ៊ុន សែននាយករដ្ឋមន្រ្តីនៃកម្ពុជា ពីគំរោងវិនិយោគរថភ្លើងធុនស្រាលថ្មីមួយខ្សែ តភ្ជាប់ពីព្រលានយន្តហោះក្នុងស្រុកសូទ្រនិគម ទៅកាន់ក្រុងសៀមរាប។

ព៌តមានដ៏មានសារៈសំខាន់នេះ ត្រូវបានបង្ហោះក្នុងបណ្តាញទំនាក់ទំនងសង្គមរបស់សម្តេចតេជោ ក្នុងពេលសម្តេចអញ្ជើញបំពេញទស្សនកិច្ចនៅប្រទេសចិនចាប់ពីថ្ងៃទី៩ ដល់១១ កុម្ភៈ និងបានអនុញ្ញាត្តឲ្យក្រុមហ៊ុនចិនធំៗចំនួនបីចូលជួបសម្តែងការគួរសម និងពិភាក្សាការងារ។

ជាមួយនឹងទិសដៅនៃការវិនិយោគ ក្រុមហ៊ុនវិនិយោគចិនទាំងនោះ បានជំរាបជូនសម្តេចតេជោនាយករដ្ឋមន្រ្តី ពីការវិនិយោគលើការដឹកជញ្ជូនផ្លូវទឹកសាប ការវិនិយោគលើការចំរ៉ាញ់ ទឹកកខ្វក់នៅខេត្តព្រះសីហនុ និងការសិក្សាពីផ្លូវរថភ្លឿងល្បឿនលឿនភ្នំពេញ ប៉ោយប៉ែត។ ក្រុមហ៊ុនក៏បានជំរាបជូនសម្តេចតេជោ ពីគម្រោងនៃការវិនិយោគផ្លូវរថភ្លើង ល្បឿនលឿនធន់ស្រាល ពីខេត្តសៀមរាប ទៅកាន់អាកាសយានអន្តរជាតិថ្មី នៅជីក្រែង ក្នុងខេត្តសៀមរាប។

សម្តេចតេជោនាយករដ្ឋមន្រ្តី បានសំដែងនូវការវាយតម្លៃខ្ពស់ ចំពោះក្រុមហ៊ុនវិនិយោគទាំងបី ដែលបានប្តេជ្ញារួមគ្នា ក្នុងការវិនិយោគហេដ្ឋារចនាសម្ព័ន្ធផ្លូវប្រកបដោយគុណភាព នៅកម្ពុជាសម្រាប់ពេលខាងមុខ។ ទាក់ទិនទៅនឹងការវិនិយោគ ផ្លូវរថភ្លើងល្បឿនលឿនធុនស្រាល សម្តេចតេជោនាយករដ្ឋមន្រ្តី បានស្នើឲ្យក្រុមហ៊ុន China Metro Group Limited សិក្សាពីគ្រោងវិនយោគ ផ្លូវល្បឿនលឿនធុនស្រាល ពីរាជធានីភ្នំពេញទៅកាន់អាកាសយានដ្ឋានអន្តរជាតិភ្នំពេញថ្មី និងផ្លូវរថភ្លើងល្បឿនលឿនធុនស្រាលក្នុងរាជធានីភ្នំពេញ ដែលកំពុងមានចរាចរណ៍យ៉ាងមមាញឹក។

ក្រុមហ៊ុនវិនិយោគទាំងបីរបស់ប្រទេសចិន ក៏បានជំរាបជូនសម្តេចតេជោនាយករដ្ឋមន្រ្តី ពីគម្រោងសិក្សាលើលទ្ធភាពវិនិយោគថ្មីៗ ក្នុងប្រទេ​សកម្ពុជាសម្រាប់ពេលខាងមុខ ពិសេសក្រោយលទ្ធផលនៃដំណើរទស្សនកិច្ចផ្លូវការរបស់ សម្តេចតេជោនាយករដ្ឋមន្រ្តី ទៅកាន់រដ្ឋធានីប៉េកាំង សាធារណរដ្ឋប្រជាមានិតចិននាពេលនេះ។

នៅក្នុងកិច្ចពិភាក្សាគ្នានោះដែរ ក្រុមហ៊ុនចិន បានជំរាបជូនសម្តេចតេជោ ពីការបញ្ចប់ការសិក្សាសមិទ្ធិលទ្ធភាព គម្រោងសាងសង់ផ្លូវរថភ្លើងក្រោមដី នៅរាជធានីភ្នំពេញ និងបានដាក់បញ្ចូននូវរបាយការណ៍សិក្សាជូនក្រសួងសាធារណការ និងដឹកជញ្ជូន ដើម្បីពិនិត្យ និងពិភាក្សាបន្ត៕

 ដោយៈ គង់ សូរិយា

       ប្រទេសចិនៈ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា បានអនុញ្ញាតឲ្យក្រុមហ៊ុនធំៗចំនួន៣ របស់ប្រទេសចិនជួបសម្ដែងការគួរសម និងពិនិត្យលទ្ធភាពវិនិយោបន្ថែមនៅក្នុងប្រទេសកម្ពុជា។

ថ្នាក់ដឹកនាំក្រុមហ៊ុនវិនិយោគធំៗចំនួន៣ នៃប្រទេសចិន រួមមានក្រុមហ៊ុនសាងសង់គមនាគមន៍ចិន, ក្រុមហ៊ុនសាជីវកម្មស្ពានថ្នល់ចិន និងក្រុមហ៊ុន China Metro Group Limited បានជួបសម្តេចតេជោកាលពីថ្ងៃទី៩ កុម្ភៈកន្លងមកនេះ។

ក្រុមហ៊ុនទាំងអស់បានសំដែង នូវការចាប់អារម្មណ៍ក្នុងការបន្តវិនិយោគលើការសាងសង់ ហេដ្ឋារចនាសម្ព័ន្ធគមនាគមន៍ នៅក្នុងប្រទេសកម្ពុជា បន្ទាប់ពីក្រុមហ៊ុនទាំងនោះ បានវិនិយោគលើការសាងសង់ផ្លូវស្ពានប្រមាណ២ពាន់គីឡូម៉ែត្រ ក្នុងប្រទេសកម្ពុជា នារយៈពេលកន្លងមក។ ក្រុមហ៊ុនសាងសង់គមនាគមន៍ចិន និងក្រុមហ៊ុនសាជីវកម្មស្ពានថ្នល់ចិន គឺជាក្រុមហ៊ុនវិស្វកម្មចិននាំមុខ លើវិស័យហេដ្ឋារចនាសម្ព័ន្ធដឹកជញ្ជូនរួមមាន ការសិក្សាប្លង់ ការសាងសង់ហេដ្ឋារចនាសម្ព័ន្ធដឹកជញ្ជូន ការស្តាផ្លូវទឹក ការផលិតគ្រឿងចក្រធន់ធ្ងន់ និងសេវាកម្មអាហរណ៍ នីហរ័ណ។

នៅក្នុងកិច្ចពិភាក្សាគ្នានោះ ក្រុមហ៊ុនចិនទាំង៣ បានជំរាបជូនសម្តេចតេជោនាយករដ្ឋមន្រ្តី ពីការសាងសង់ និងដាក់ឲ្យប្រតិបត្តិផ្លូវល្បឿនលឿន ភ្នំពេញ ក្រុងបាវិត ដែលត្រូវបានរៀបចំឡើង ក្រោមកិច្ចសន្យាភាពជាដៃគូ រវាងរដ្ឋ និងឯកជន(PPP) ដើម្បីឈានទៅអនុវត្តគម្រោងសាងសង់ផ្លូវល្បឿនលឿនភ្នំពេញ ក្រុងបាវិត នៅពាក់កណ្តាលឆ្នាំ២០២៣ និងគ្រោងបញ្ចប់នៅឆ្នាំ២០២៧ ស្របគ្នានឹងការសាងសង់ផ្លូវល្បឿនលឿន ហូជីមិញ ម៉ុកបៃ ដែលគ្រោងនឹងបញ្ចប់ការសាងសង់នៅឆ្នាំ២០២៧។

ជាមួយគ្នានេះ ក្រុមហ៊ុនក៏បានជំរាបជូនសម្តេចតេជោ ពីគម្រោងដឹកជញ្ជូនផ្លូវទឹក និងកំពង់ផែ ដែលក្នុងនោះក្រុមហ៊ុន បានបញ្ចប់ការសិក្សាបឋមគម្រោងស្តារផ្លូវទឹកទន្លេសាប ភ្នំពេញ សៀមរាប ដែលនិងប្រគល់ជូនក្រសួងសាធារណការ និងដឹកជញ្ជូនរួចរាល់។ ជាមួយគ្នានេះ ក្រុមហ៊ុនក៏បានជំរាបជូនសម្តេចតេជោ ពីគម្រោងអភិវឌ្ឍន៍ប្រព័ន្ធទឹកកខ្វក់ ក្នុងនោះបាននិងកំពុងសិក្សាផែនការមេ និងសមិទ្ធិលទ្ធភាពដំបូង សម្រាប់អភិវឌ្ឍន៍ហេដ្ឋារចនាសម្ព័ន្ធបណ្តាញលូ សំណង់ស្ថានីយ៍ប្រព្រឹត្តកម្មទឹកកខ្វក់ នៅក្រុងខេមរភូមិន្ទ ខេត្តកោះកុង ក្រុងបាត់ដំបង ខេត្តបាត់ដំបង និងក្រុងកំពង់ចាម ខេត្តកំពង់ចាម។

ថ្នាក់ដឹកនាំក្រុមហ៊ុនទាំងបី ក៏បានជំរាបជូនសម្តេចតេជោ ពីការជួយសាងសង់អគារវិទ្យាស្ថានសម្តេចតេជោសែន សាធារណការ និងដឹកជញ្ជូន១ខ្នង កំពស់៤ជាន់ ដែលរួមមានបន្ទប់សិក្សា ការិយាល័យរដ្ឋបាល មន្ទីរពិសោធន៍ និងការបំពាក់សម្ភារសិក្សា និងឧបករណ៍បច្ចេកទេសពិសោធន៍ទំនើបៗ ដែលបានចំណាយថវិកាសរុបប្រមាណ ២,៥លានដុល្លាអាមេរិក។ ក្រុមហ៊ុនសាជីវកម្មស្ពាន និងថ្នល់ចិន ក៏បានផ្តល់ថវិកាប្រមាណ២លានដុល្លាអាមេរិក ដើម្បីជួយសាងសង់អគារពន្ទីរពេទ្យតេជោសែន កោះធំ ស្រុកកោះធំ ខេត្តកណ្តាល។

ក្រុមហ៊ុនចិនទាំងបី ក៏បានសុំការគាំទ្រពីសម្តេចតេជោ ចំពោះការវិនិ​យោគលើហេដ្ឋារចនាសម្ព័ន្ធ ដែលក្រុមហ៊ុនបានសិក្សារួច ដើម្បីឲ្យគម្រោងទាំងនោះប្រព្រឹត្តទៅដោយជោគជ័យបំផុត៕

ដោយៈ សុខុម

ស៊ីនជាំង: រថភ្លើងមួយខ្សែដែលផ្ទុកទំនិញពេញ បានចាកចេញពីផែស្ងួតអន្តរជាតិនៃក្រុងអ៊ូយូមឈី (Urumqi) ប្រទេសចិន ឆ្ពោះទៅកាន់ប្រទេសកាហ្សាក់ស្ថាន កាលពីថ្ងៃច័ន្ទ ដើមសប្ដាហ៍នេះ។

នេះគឺជាការចេញដំណើររបស់រថភ្លើង ដឹកទំនិញចិន-អឺរ៉ុប ទី៦.៥០០ដែលបានចាកចេញពីផែស្ងួតនេះ។

បណ្ដាផែស្ងួតក្នុងតំបន់ភ្នំស្វយ័តស៊ីនជាំង (Xinjiang) នាភាគពាយ​ព្យនៃប្រទេសចិន ដែលមានជនជាតិភាគតិចវីហ្គួ (Uygur) រស់នៅនោះ ពេលនេះកំពុងតែមមាញឹកយ៉ាងខ្លាំង បន្ទាប់ពីប្រទេសនេះ បានដកចេញនូវវិធានការសូន្យ-កូវីដដ៏តឹងរ៉ឹងរបស់ខ្លួន និងបានកែសម្រួលគោលនយោ​បាយចេញ និងចូលប្រទេស។

ក្រុមមន្ត្រីគយបាននិងកំពុងមមាញឹកខ្លាំង ក្នុងការត្រួតពិនិត្យឯកសាររបស់អ្នកដំណើរអន្តរជាតិនៅឯផែស្ងួត Horgos ជាប់ព្រំដែនកាហ្សាក់ស្ថាន ចាប់តាំងពីខែមករា។

លោក Belik Zhanuzakov ដែលជាអ្នកជំនួញម្នាក់មកពីប្រទេសកាហ្សាក់ស្ថាន បានលើកឡើងថា គាត់ត្រូវបង្ខំចិត្តធ្វើអាជីវកម្ម តាមអនឡាញដោយសារវិបត្តិកូវីដ-១៩ អំឡុងពេលពីរបីឆ្នាំមកនេះ ហើយគាត់ពិតជារំភើបចិត្តយ៉ាងខ្លាំង ចំពោះការបើកដំណើរការផែស្ងួតនេះឡើងវិញ។

គាត់និយាយទៀតថា “ឥឡូវខ្ញុំអាចនិយាយជាមួយដៃគូអាជីវកម្មរបស់ខ្ញុំទល់មុខគ្នា ខ្ញុំសង្ឃឹមថា កិច្ចសហការរបស់យើងនឹងកាន់តែរឹងមាំ។ ចាប់តាំងពីទំនាក់ទំនងទ្វេភាគី រវាងប្រទេសទាំង២បានពង្រឹងមក ខ្ញុំរំពឹងថា អាជីវកម្មរបស់ខ្ញុំនឹងប្រសើរឡើង”។

ផែស្ងួត Alataw ដែលស្ថិតក្នុងចំណោមផែសំខាន់ៗ សម្រាប់រថភ្លើងដឹកទំនិញចិន-អឺរ៉ុប ក៏បានកើនឡើងចំនួនទំនិញផងដែរ ចាប់តាំងពីដើមឆ្នាំនេះ ដោយទំនិញជាង១,១១លានតោន ត្រូវបានដឹកជញ្ជូនក្នុងខែមករា ដោយកើនឡើង១២,៨%នៅឆ្នាំនេះ។

ទិន្នន័យផ្លូវការបង្ហាញថា រថយន្តដឹកទំនិញចេញចូលនៅផែស្ងួត Bakti បានកើនលើស៣.៨០០គ្រឿងក្នុងខែមករា ដោយកើនឡើងជាង១៥៦%។ ការនាំចេញ និងការនាំចូលនៅទីនោះបានកើនឡើង១២៥%ផងដែរឈានដល់ជាង៣៤.១០៦តោន៕ Xinhua៕

ដោយ: គង់ លាងហួរ

វ៉ាស៊ីនតោន: ប្រធានាធិបតីសហរដ្ឋអាមេរិក លោក ចូ បៃដិន បានមានប្រសាសន៍ថា លោកបើកចំហរក្នុងការធ្វើការ ជាមួយប្រទេសចិន ដោយស្វែងរក “ការប្រកួតប្រជែង មិនមែនជាជម្លោះ” ប៉ុន្តែលោកថា ទីក្រុងវ៉ាស៊ីនតោននឹងចាត់វិធានការណ៍ ប្រសិនបើទីក្រុងប៉េកាំងគំរាមកំហែង ដល់សន្តិសុខជាតិរបស់ខ្លួន។

លោក ចូ បៃដិន បានព្យាយាមទាក់ទាញការយកចិត្ត ទុកដាក់ចំពោះសមិទ្ធិផលសេដ្ឋកិច្ចរបស់លោក ហើយលោកមិនបានលាក់បាំង ការប្រជែងរបស់អាមេរិកជាមួយប្រទេសចិននោះទេ។

លោកសង្កត់ធ្ងន់ថា “ក្នុងអាណត្តិជាប្រធានាធិបតីបច្ចុប្បន្ន របស់លោ​ក ការខិតខំប្រឹងប្រែងបន្ថែមទៀត ត្រូវបានយកចិត្តទុកដាក់ ដើម្បីការពារប ច្ចេកវិទ្យាទំនើប និងទំនើបកម្មយោធារបស់សហរដ្ឋអាមេរិក”។លោកបានបន្តថា​ “ខ្ញុំ​ប្តេជ្ញា​ធ្វើការ​ជាមួយ​ប្រទេស​ចិន ដែល​វា​អាច​ជំរុញ​ផលប្រយោជន៍​អាមេរិក និង​ផ្តល់​ផលប្រយោជន៍​ដល់​ពិភពលោក ប៉ុន្តែប្រសិនបើ​ចិន​គំរាមកំហែង​អធិបតេយ្យភាព​របស់​អាមេរិក យើង​នឹង​ធ្វើ​សកម្មភាព​ដើម្បី​ការពារ​ប្រទេស​របស់​យើង​ផងដែរ”។

ការថ្លែងសុន្ទរកថាប្រចាំឆ្នាំ ទៅកាន់សម័យប្រជុំរួម នៃសភាបានធ្វើឡើង ខណៈលោក ចូ បៃដិន កំពុងរៀបចំសម្រាប់ការបោះឆ្នោត ឆ្នាំ២០២៤ និងស្របពេលមានភាពតានតឹងជាថ្មី ជាមួយប្រទេសចិន ក្រោយពីយោធាអាមេរិក បានបាញ់ទម្លាក់បាឡុងចារកម្មចិន ដែលបានហោះពីលើទីតាំងដ៏សំខាន់ នៅក្នុងសហរដ្ឋអាមេរិក។

ដោយហេតុថាគណបក្សប្រជាធិបតេយ្យ និងគណបក្សសាធារណរដ្ឋនៅក្នុងសភាបានជំរុញឱ្យលោក បៃដិន មានភាពតឹងតែងចំពោះប្រទេសចិន លោកបានឆ្លើយតបថា “ការឈ្នះការប្រកួតប្រជែងជាមួយប្រទេសចិន គួរតែយើងរួបរួមទាំងអស់គ្នា ហើយយើងបានប្រឈមមុខ នឹងបញ្ហាដ៏ធ្ងន់ធ្ងរនៅទូទាំងពិភពលោក”៕