ដោយ: គង់ លាងហួរ

ភ្នំពេញ: សិង្ហបុរី ដែលជាប្រទេសមានសេដ្ឋកិច្ច ជឿនលឿនបំផុតនៅក្នុងតំបន់អាស៊ាន កំពុងតែដើរតួនាទីកាន់តែធំ ក្នុងការបំពេញចន្លោះប្រហោ ង លើផ្នែកហេដ្ឋារចនាសម្ព័ន្ធរបស់កម្ពុជា និងក្លាយជាដៃគូសម្រាប់បញ្ហានេះ។

លោក Lavan Thiru នាយកប្រតិបត្តិនៃក្រុមហ៊ុន Infrastructure Asia (InfraAsia) ដែលជាការិយាល័យ សម្របសម្រួលបង្កើតឡើងដោយ Enterprise Singapore ជាមួយនឹងការផ្តល់មូលនិធិពេញលេញ ដោយរដ្ឋាភិបាលសិង្ហបុរី ដើម្បីគាំទ្រដល់កំណើនសង្គម និងសេដ្ឋកិច្ចរបស់តំបន់អាស៊ី តាមរយៈការអភិវឌ្ឍន៍ហេដ្ឋារចនាសម្ព័ន្ធ បានមានប្រសាសន៍ថា “ប្រ ទេសកម្ពុជា គឺជាប្រទេសមួយក្នុងចំណោមប្រទេសទាំង៦ ដែលខ្លួនបានផ្តោតលើអស់រយៈពេលជាច្រើនឆ្នាំ”។

លោកបានបន្តថា “តំបន់អាស៊ានស្ថិតនៅលើចំណុចកំពូលនៃកំណើនដ៏ឆាប់រហ័ស ហើយកម្ពុជាជាប្រទេសមួយ ក្នុងចំណោមប្រទេសមានសេដ្ឋកិច្ចដ៏រស់រវើក ក្នុងតំបន់មានការរីកចម្រើនជាលំដាប់ ក្នុងរយៈពេលជាច្រើនឆ្នាំកន្លងមក ហើយការអភិវឌ្ឍន៍ហេដ្ឋារចនាសម្ព័ន្ធ នៅតែមានសារៈសំខាន់”។

ជាក់ស្តែង គម្រោងមួយចំនួន រួមទាំងមជ្ឈមណ្ឌលភស្តុភារកម្មភ្នំពេញ (PPLC) កំពុងត្រូវបានអភិវឌ្ឍ ដោយមានការគាំទ្រពីក្រុមហ៊ុន InfraAsia។

ដោយបើកដំណើរការពីសំណាក់ YCH Group ដែលជាក្រុមហ៊ុនផ្តល់សេវាដឹកជញ្ជូន និងខ្សែសង្វាក់ផ្គត់ផ្គង់ដ៏ធំបំផុតមួយ របស់តំបន់អាស៊ី PPLC ត្រូវបានគេរំពឹងថា នឹងអាចអនុវត្តភស្តុភារ ប្រកបដោយនិរន្តរភាពល្អបំផុតនៅក្នុងតំបន់អាស៊ាន។

លោក Lavan Thiru បានបញ្ជាក់ថា “មជ្ឈមណ្ឌលភស្តុភារកម្មភ្នំពេញ (PPLC) ត្រូវបានបង្កើតឡើងជាមជ្ឈមណ្ឌលមួយ ហើយវានឹងត្រូវតភ្ជាប់ទៅមជ្ឈមណ្ឌលដឹកជញ្ជូនផ្សេងទៀតនៅក្នុងតំបន់”៕

ដោយ: គង់ លាងហួរ

សេអ៊ូល: រដ្ឋាភិបាលកូរ៉េខាងត្បូង គ្រោងផ្តល់ហិរញ្ញប្បទានពាណិជ្ជកម្ម និងជំនួយសរុបប្រមាណ២៩៣ពាន់លានដុល្លារ) សម្រាប់ក្រុមហ៊ុននាំចេញក្នុងស្រុកទៅក្រៅប្រទេស ដើម្បីជំរុញការនាំចេញ ស្របពេលមានការធ្លាក់ចុះនៃសេដ្ឋកិច្ចពិភពលោកកាន់តែជ្រៅ។

ការធ្លាក់ចុះនៃការនាំចេញ និងការកើនឡើងនៃឱនភាពពាណិជ្ជកម្មត្រូវបានដឹកនាំជាចម្បង ដោយការធ្លាក់ចុះនៃតម្លៃឯកតា របស់បន្ទះ semiconductors និងការកើនឡើងនៃស្តុកផលិតផល។

តម្រូវការទីផ្សារសកលសម្រាប់បន្ទះឈីប ដែលផលិតដោយកូរ៉េខាងត្បូង នឹងមិនងាយងើបឡើងវិញលឿននោះទេ ខណៈការបន្ធូរបន្ថយវិធានការកូវីដ នៅក្នុងប្រទេសចិន ដែលជាអ្នកនាំចូលដ៏ធំបំផុតនៃបន្ទះឈីប semiconductors នឹងត្រូវការរយៈពេលពីរបីខែទៀត ដើម្បីបង្កើនការនាំចេញ សម្រាប់ទូទាត់ការនាំចូលថាមពលរបស់កូរ៉េខាងត្បូង។

នៅក្នុងនោះដែរ ការនាំចេញបន្ទះ Semiconductors គ្របដណ្តប់ប្រហែល១/៥នៃការនាំចេញសរុបរបស់ប្រទេសកូរ៉េខាងត្បូង។

ក្រសួងពាណិជ្ជកម្ម ឧស្សាហកម្ម និងថាមពលកូរ៉េខាងត្បូង បានអះ​អាងថា “ថវិកាចំនួន២/៣នៃថវិកាសរុបក្នុងឆ្នាំនេះ នឹងត្រូវចំណាយដើម្បីជំរុញការនាំចេញ”។

ការផ្តល់ហិរញ្ញប្បទានផ្នែកពាណិជ្ជកម្ម ចំនួន២៩៣ពាន់លានដុល្លារ ដែលជាចំនួនដ៏ធំបំផុតមិនធ្លាប់មានពីមុនមក នឹងជួយពង្រឹងក្រុមហ៊ុនផលិត​ក្នុងស្រុក ដែលជាតម្រូវការជាមុន ក្នុងការទទួលបានការទទួលស្គាល់ និងពង្រីកវត្តមានរបស់ពួកគេ នៅក្នុងទីផ្សារក្រៅប្រទេស៕

ដោយ: គង់ លាងហួរ

សិង្ហបុរីៈ ក្រុមហ៊ុនអាកាសចរណ៍ AirAsia របស់ប្រទេសម៉ាឡេស៊ី គ្រោងជួលយន្តហោះថ្មី បន្ថែមចំនួន១៥គ្រឿង ដើម្បីបំពេញតម្រូវការការធ្វើដំណើរពីប្រទេសចិន។

នាយកប្រតិបត្តិនៃក្រុមហ៊ុនCapital A លោកTony Fernandes បានបញ្ជាក់ប្រាប់សារពត៌មានReuter នៅក្រៅព្រឹត្តិការណ៍មួយថា “យើងកំពុងស្ថិតក្នុងការចរចា ដើម្បីចុះហត្ថលេខាលើការជួលយន្តហោះថ្មីចំនួន១៥គ្រឿង ហើយការដែលយើងកំពុងនិយាយ អំពីយន្តហោះថ្មីមានន័យថាអ្វីៗនឹងត្រលប់មកដូចដើមឡើងវិញ”។

លោកFernandes បានបន្តថា “ភាពមិនប្រាកដប្រជា នៃផ្លូវហោះហើរ បានកន្លងផុតទៅជាមួយ នឹងការបើកឡើងវិញរបស់ប្រទេសចិន ហើយយើងនឹងមានផ្លូវច្បាស់លាស់មួយ ឆ្ពោះទៅរកភាពប្រក្រតីឡើងវិញ ដូចមុនវិបត្តិកូវីដ-១៩”។

លោក Fernandes បានបញ្ជាក់ថា ក្រុមហ៊ុនកំពុងស្ថិតនៅលើផ្លូវ ដើម្បីឈានឆ្ពោះទៅបញ្ចប់ កិច្ចខិតខំប្រឹងប្រែង ក្នុងការរៀបចំរចនាសម្ព័ន្ធឡើងវិញ និងដោះស្រាយស្ថានភាព PN17 ឬ ‘Practice Note 17’ របស់ខ្លួនត្រឹមខែសីហា ឆ្នាំ២០២៣នេះ។

ផែនការរៀបចំរចនាសម្ព័ន្ធឡើងវិញនេះ នឹងច្របាច់បញ្ចូលគ្នានូវក្រុមហ៊ុនអាកាសចរណ៍លំដាប់ថវិកាAirAsia ជាមួយនឹងក្រុមហ៊ុនបុត្រសម្ព័ន្ធ AirAsia X។

លោក Fernandes បានអះអាងថា ផែនការនេះអាចនាំឱ្យ ក្រុមហ៊ុន Capital A បំបែកអាជីវកម្មផ្សេងទៀត ដូចជា ភស្តុភារ សេវាកម្មអាកាសចរណ៍ និងអាវុធឌីជីថល ទៅជាការចុះបញ្ជីដាច់ដោយឡែក៕

ដោយៈ គង់ សូរិយា

       ភ្នំពេញៈ ក្រុមហ៊ុន Doppelmayr Groupរបស់អូទ្រីសបង្ហាញពីបំណងវិនិយោគលើCable Carនៅរាជធានីភ្នំពេញ ស្របពេលថ្នាក់ដឹកនាំជាន់ខ្ពស់ក្រសួងសាធារណៈការ និងដឹកជញ្ជូន បានជម្រុញឲ្យក្រុមហ៊ុននេះសិក្សាលំអិត។

ក្រុមហ៊ុន Doppelmayr Group ជាក្រុមហ៊ុនមួយរបស់ប្រទេសអូទ្រីស មានជំនាញរៀបចំផែនការអភិវឌ្ឍន៍ រចនា ផលិត សាងសង់ និងគាំទ្រគម្រោងច្នៃប្រឌិតទាក់ទង នឹងការដឹកជញ្ជូនអ្នកដំណើរ ដោយកន្រ្តកខ្សែកាប (Cable Car) ប្រកបដោយសុវត្ថិភាព និងប្រសិទ្ធភាពខ្ពស់ នៅក្នុងតំបន់ ទីក្រុង ទីប្រជុំជន និងតំបន់ទេសចរណ៍នានា។

ក្រុមហ៊ុននេះ បានបង្ហាញចំណាប់អារម្មណ៍ក្នុងការ វិនិយោគលើវិស័យដឹកជញ្ជូនសាធារណៈនៅក្នុងប្រទេសកម្ពុជា ជាពិសេសនៅក្នុងភូមិសាស្ត្ររាជធានីភ្នំពេញ។

ព៌តមាននេះត្រូវបានលើកឡើងក្នុងជំនួបលើកទី២ រវាងលោកតូច    ចាន់កុសល រដ្ឋលេខាធិការក្រសួងសាធារណៈការ និងដឹកជញ្ជូនជាមួយលោកលោក Martin Ladner អ្នកគ្រប់គ្រងប្រចាំតំបន់នៃក្រុមហ៊ុន Doppelmayr Groupកាលពីថ្ងៃទី៧ កុម្ភៈកន្លងមកនេះ។

ក្នុងជំនួបនេះ លោករដ្ឋលេខាធិការប្រចាំការ បានផ្ដល់អនុសាសន៍ឱ្យក្រុមហ៊ុន រៀបចំឱ្យបានលម្អិតបន្ថែមទៀត ទាក់ទងនឹងសមត្ថភាព អត្ថប្រយោជន៍ និងលក្ខណៈពិសេសនៃគម្រោង“កន្រ្តកខ្សែកាប” (Cable Car) របស់ក្រុមហ៊ុនក្នុងលក្ខខណ្ឌប្រទេសកម្ពុជា បន្ទាប់ពីទទួលបានព័ត៌មានថ្មីៗដែលក្រសួង បានផ្ដល់ជូនរួចមក ដើម្បីគោរពស្នើសុំឯកឧត្តមទេសរដ្ឋមន្រ្តី ពិនិត្យសម្រេចលើគម្រោងការសិក្សា ដែលក្រុមហ៊ុនបានលើកឡើង។

ជំនួបពិភាក្សាការងារនេះ ធ្វើឡើងដើម្បីស្វែងយល់ព័ត៌មានសម្រាប់គម្រោងការសិក្សានានា ទាក់ទងនឹងសេវាដឹកជញ្ជូនសាធារណៈ សំដៅចូលរួមចំណែកក្នុងការអភិវឌ្ឍវិស័យនេះ ឱ្យកាន់តែមានការរីកចម្រើនថែមទៀត។

លោកតូច ចាន់កុសលបានបញ្ជាក់ថា ជំនួបនេះធ្វើឡើងក្នុងគោលបំណង ដើម្បីស្វែងយល់ព័ត៌មាន សម្រាប់គម្រោងការសិក្សានានា ទាក់ទងនឹងសេវាដឹកជញ្ជូនសាធារណៈ ក៏ដូចជាព័ត៌មានគម្រោងផ្សេងៗ ដែលកំពុងអនុវត្ត ជាពិសេសគម្រោងពាក់ព័ន្ធ វិស័យដឹកជញ្ជូនសាធារណៈ សំដៅអនុញ្ញាតឱ្យក្រុមហ៊ុន អាចសិក្សាតភ្ជាប់ប្រតិបត្តិការ របស់ក្រុមហ៊ុនជាមួយគម្រោងដែលមានស្រាប់ ឬគម្រោងកំពុងសិក្សាទាំងនោះ ដើម្បីចូលរួមចំណែកកាត់បន្ថយ ការកកស្ទះចរាចរណ៍នៅក្នុងរាជធានីភ្នំពេញ និងទីប្រជុំជននានាក្នុងប្រទេសកម្ពុជា។

លើសពីនេះ លោករដ្ឋលេខាធិការ បានបង្ហាញនូវគម្រោងសិក្សាមួយចំនួន ដែលកំពុងស្ថិតក្នុងការសិក្សានៅឡើយ ដែលមានដូចជា៖ គម្រោងសាងសង់ផ្លូវដែកល្បឿនលឿន (High-speed Train) គម្រោងប្រព័ន្ធប្រតិបត្តិការរថភ្លើងស្វ័យប្រវត្តិ (AGT) គម្រោងសិក្សាផ្លូវរថភ្លើងក្រោមដី (Subway) និងការសិក្សាផ្លូវរថភ្លើងលើអាកាស ដឹកអ្នកដំណើរធុនស្រាល (Monorail) ជាដើម៕

ដោយៈ គង់ ម៉ាលីនណា

       ភ្នំពេញៈ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម ទទួលជួបពិភាក្សាការងារជាមួយក្រុមហ៊ុនរ៉ូយ៉ាល់គ្រុប និងក្រុមហ៊ុន FUSIONEX របស់ប្រទេសម៉ាឡេស៊ី។

លោកជំទាវរដ្ឋលេខាធិការ បានសម្តែងនូវការស្វាគមន៍យ៉ាងកក់ក្តៅចំពោះក្រុមហ៊ុនរ៉ូយ៉ាល់គ្រុប និងក្រុមហ៊ុន FUSIONEX របស់ប្រទេសម៉ាឡេស៊ី ដែលអញ្ជើញមកពិភាក្សាការងារអំពី ប្រព័ន្ធសម្របសម្រួលពាណិជ្ជកម្ម ដែលគ្របដណ្តប់ទៅលើ ការសម្របសម្រួលច្រកចេញ-ចូលពាណិជ្ជកម្មតែមួយនៅកម្ពុជា។

ជាមួយគ្នានេះ លោកជំទាវប្រធានអង្គប្រជុំ បានជម្រាបជូនអំពីកិច្ចខិតខំប្រឹងប្រែងរបស់ក្រសួងពាណិជ្ជកម្ម ដែលកំពុងតែអនុវត្ត ក្នុងការគាំទ្រទៅលើការនាំចេញឱ្យកាន់តែប្រសើរឡើង រួមមាន ការធ្វើវិមជ្ឈការទៅកាន់ថ្នាក់ក្រោមជាតិ (មន្ទីរពាណិជ្ជកម្មរាជធានី-ខេត្ត) ក្នុងការសម្របសម្រួលជូនដល់អាជីវករចុះបញ្ជីពាណិជ្ជកម្ម និងបញ្ជាក់ប្រភពដើមទំនិញ(CO), ការអនុវត្តគម្រោងEIF ជាជំហានដំបូងផ្តោតលើ E-Commerce ចំពោះសហគ្រាសធុនតូច និងមធ្យម ដើម្បីបង្កើតទម្រង់ទីផ្សារបែប B2B & B2C ដល់សហគ្រិនកម្ពុជា ក្នុងការអនុវត្តសហគ្រិនភាពបែបឌីជីថល ដោយលទ្ធផលនៃការអនុវត្តនេះ នឹងធ្វើការបង្ហាញទៅកាន់ម្ចាស់ជំនួយគាំទ្រ គម្រោងវិញផងដែរ។

លោក Rami Sharaf អនុប្រធានជាន់ខ្ពស់នៃក្រុមហ៊ុនរ៉ូយ៉ាល់គ្រុប បានថ្លែងអំណរគុណចំពោះ លោកជំទាវប្រធានអង្គប្រជុំ ដែលបានឆ្លៀតពេលវេលាដ៏មមាញឹក ដើម្បីធ្វើការជួបពិភាក្សារការងារ ជាមួយក្រុមហ៊ុន FUSIONEX នៃប្រទេសម៉ាឡេស៊ី និងបានបញ្ជាក់ជូនពីគោលបំណងនៃកិច្ចប្រជុំនេះ។

ទន្ទឹមនឹងនេះ លោកក៏បានស្នើសុំឱ្យមានការ ចុះអនុស្សរណៈនៃការយោគយល់គ្នារវាងក្រសួងពាណិជ្ជកម្ម និងក្រុមហ៊ុនរ៉ូយ៉ាល់គ្រុប ជាមួយក្រុមហ៊ុនFUSIONEXស្តីពី កិច្ចសហប្រតិបត្តិការក្នុងការបង្កើតឱ្យមាន DIGITAL TRADE HUB FOR CAMBODIA ដើម្បីធ្វើការសិក្សាបឋម (Pilot Study) លើការនាំចេញស្រូវអង្ករកម្ពុជា ផងដែរ។

លោកបានបញ្ជាក់ផងដែរថា ក្រុមហ៊ុនRoyal Group កំពុងតែរៀបចំសេចក្តីព្រាងអនុស្សរណៈនៃការយោគយល់គ្នានេះ និងផ្ញើជូនក្រសួងពាណិ​ជ្ជកម្មធ្វើការពិនិត្យ និងសម្រេច មុនពេលឈានដល់ពិធីចុះអនុស្សរណៈនៃការយោគយល់គ្នាជាផ្លូវការ។

ជាមួយគ្នានេះដែរ លោក Raymond Lee នាយកកម្មវិធី នៃក្រុមហ៊ុន FUSIONEX បានធ្វើបទបង្ហាញអំពីប្រវត្តិ និងសកម្មភាពការងាររបស់ក្រុមហ៊ុន ដែលផ្តោតសំខាន់លើប្រព័ន្ធឌីជីថល ក្នុងការសម្រួលការងារជូនអតិថិជន ជាពិសេសការប្រតិបត្តិការគ្រប់គ្រង និងរក្សាទិន្នន័យទាក់ទងនឹងការនាំចេញ និងសម្រួលបែបបទពន្ធគយ ដើម្បីពន្លឿនការនាំចេញទំនិញទៅកាន់ទីផ្សារអន្តរជាតិ។

លោកបញ្ជាក់ថា ការប្រើប្រាស់សេវាកម្មរបស់ក្រុមហ៊ុន FUSIONEX នឹងផ្តល់ជូនដល់អ្នកប្រើប្រាស់ (រាជរដ្ឋាភិបាល ក្រុមហ៊ុន/ឧស្សាហកម្ម និងអតិថិជន) នូវអត្ថប្រយោជន៍ជាច្រើន រួមមាន៖ (១)កាត់បន្ថយពេលវេលានិងចំណាយ (២)គ្រប់គ្រង និងរក្សាទុកទិន្នន័យ (៣)បង្កើនការវិនិយោគ ទំហំពាណិជ្ជកម្មនាំចេញ និងការងារ (៤)បង្កើនប្រសិទ្ធភាព និងសុវត្ថិភាពនៃការនាំចេញ ដឹកជញ្ជូន និងសម្រួលបែបពន្ធគយ និង(៥)បង្ហាញពីដំណោះស្រាយជូនអតិថិជន៕