ដោយ: គង់ លាងហួរ

អន្តរជាតិ: ប្រទេសឥណ្ឌាបានបើករោងចក្រ ផលិតឧទ្ធម្ភាគចក្រដ៏ធំបំផុតរបស់ខ្លួន ដែលអាចផលិតបានយន្តហោះ លើសពី១.០០០គ្រឿង ក្នុងមួយឆ្នាំ។

នេះជាផ្នែកមួយ នៃការជំរុញការពឹងផ្អែកលើខ្លួនឯង លើផ្នែកការពារជាតិ ដើម្បីប្រឆាំងនឹងឥទ្ធិពល ដែលកំពុងកើនឡើងរបស់ប្រទេសចិន។

ទីក្រុងញូវដែលី ក៏បានប្រកាសអំពីការកើនឡើងចំនួន២ខ្ទង់ នៅក្នុងថវិកាការពារជាតិប្រចាំឆ្នាំរបស់ខ្លួន កាលពីសប្តាហ៍មុន ជាមួយនឹងការសម្លឹងមើលគូប្រជែង ភូមិសាស្ត្រនយោបាយរបស់ខ្លួន ដែលជាប់ព្រំដែនភាគខាងជើង។

ឥណ្ឌាគឺជាប្រទេសនាំចូលអាវុធដ៏ធំបំផុតមួយ នៅក្នុងពិភពលោក ហើយទោះបី ជាមានការខិតខំនាពេលថ្មីៗនេះ ដើម្បីឆ្ពោះទៅរកការផលិតផ្នែកការពារក្នុងស្រុកក៏ដោយ ក៏ប្រទេសនេះនៅតែពឹងផ្អែកខ្លាំង លើផ្នែករឹងពីទីក្រុងមូស្គូ ដែលជាអ្នកផ្គត់ផ្គង់ផ្នែកយោធាដ៏ធំ និងចំណាស់ជាងគេរបស់ឥណ្ឌា។

នាយករដ្ឋមន្ត្រីឥណ្ឌា លោក Narendra Modi បានមានប្រសាសន៍ថា រោងចក្រឧទ្ធម្ភាគចក្រថ្មីនេះ បំពេញតាមការសន្យារបស់រដ្ឋាភិបាលរបស់យើង ដើម្បីកាត់បន្ថយការពឹងផ្អែករបស់ឥណ្ឌាជាបណ្តើរៗ លើបរទេសសម្រាប់តម្រូវការការពារជាតិ។

លោកបន្តថា “ខ្ញុំសប្បាយចិត្ត ដែលអាវុធ និងប្រព័ន្ធការពាររាប់រយប្រភេទ ចាប់ពីកាំភ្លើងវាយប្រហារទំនើបរហូតដល់រថក្រោះ នាវាផ្ទុកយន្តហោះ ឧទ្ធម្ភាគចក្រ និងយន្តហោះដឹកជញ្ជូន ឥឡូវនេះកំពុងត្រូវបានផលិតនៅក្នុងប្រទេសឥណ្ឌា”។

រោងចក្រ​ឧទ្ធម្ភាគចក្រ​ដ៏ធំ​បំផុត នៅ​តំបន់អាស៊ី​នេះ នឹង​ផលិត​ឧទ្ធម្ភាគចក្រប្រភេទ Light Utility Helicopters ជាលើកដំបូង ដែល​រចនា​ឡើង​ដោយ​ឥណ្ឌា និង​ត្រូវពង្រីក​ខ្លួន​បន្ថែម ដើម្បី​បង្កើត​ឧទ្ធម្ភាគចក្រ​ពហុមុខងារ​ផ្សេង​ៗទៀត។

រោងចក្រនេះ ស្ថិតនៅភាគខាងត្បូងរដ្ឋ Karnataka និងត្រូវបានសម្ពោធដាក់ឱ្យប្រើប្រាស់ តែប៉ុន្មានខែប៉ុណ្ណោះ បន្ទាប់ពីទីក្រុងញូវដេលី បានបង្ហាញឧទ្ធម្ភាគចក្រវាយប្រហារ ដែលរចនាឡើងសម្រាប់ប្រើប្រាស់នៅក្នុងតំបន់ ដែលមានកម្ពស់ខ្ពស់ ដូចជាភ្នំហិម៉ាឡៃ៕

 ដោយៈ វឌ្ឍនៈ

ភ្នំពេញៈ សមាគមជប៉ុន-កម្ពុជាហៅកាត់ថា (JCA) បានសន្យាថា នឹងទាក់ទាញអ្នកវិនិយោគទុនរបស់ខ្លួន ឱ្យបានច្រើនបន្ថែមទៀត សម្រាប់ចូលរួមជួយអភិវឌ្ឍន៍ វិស័យធនធានមនុស្សនៅកម្ពុជា ឱ្យកាន់តែមានសមត្ថភាព ទាំងចំណេះ ជំនាញ ដើម្បីដើរឱ្យទាន់តម្រូវការសង្គម-សេដ្ឋកិច្ច ដែលកំពុងមានការរីកចម្រើននាពេលបច្ចុប្បន្ន។

នេះបើតាមលោកតាកាហាហ្ស៊ិ ហ៊្វូមីអាគិ ប្រធានសមាគមថ្លែងក្នុងជំនួបជាមួយរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនៅព្រឹកថ្ងៃតី ០៧ កុម្ភៈ ២០២៣ ។

លោកបណ្ឌិតអ៉ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានចាត់ទុកលោកប្រធានសមាគម គឺជាមិត្តដ៏ល្អមួយរូបរបស់កម្ពុជា និងជាអ្នកការទូត ដ៏មានសមត្ថភាពរបស់ប្រទេសជប៉ុន ក្នុងការពង្រឹងពង្រីកកិច្ចសហប្រតិបត្តិការ រវាងប្រទេសទាំងពីរប្រកបដោយផ្លែផ្កា។

លោកបញ្ជាក់ថា “រដ្ឋាភិបាលប្រទេសទាំងពីរ បានបង្កើនកិច្ចសហប្រតិបត្តិការដល់កម្រិត ដៃគូរជាយុទ្ធសាស្ត្រគ្រប់ជ្រុងជ្រោយ”។ លោកបន្តថា “មួយវិញទៀតលំហូរ ពាណិជ្ជករជប៉ុន ចូលមកកម្ពុជាកាន់តែច្រើន វិនិយោគលើគ្រប់  វិស័យបានផ្តល់ឱកាសការងារជូនពលរដ្ឋកម្ពុជា បានយ៉ាងច្រើន នេះជាការបង្ហាញពីសក្តានុពល និងភាពទាក់ទងរបស់កម្ពុជា” ។

លោករដ្ឋមន្រ្តីបានបន្តថា ការវិនិយោគរបស់ជប៉ុន ពិតជានាំនូវបច្ចេកវិទ្យាទំនើបថ្មីៗ និងយន្តការគ្រប់គ្រងក្រុមហ៊ុន រោងចក្រឱ្យកាន់តែមានភាពងាយស្រួល។ លោកថា “សម្គាល់ឃើញថា ក្រុមហ៊ុនរបស់ជប៉ុនដែលមានវត្តមាននៅកម្ពុជា កម្រមានវិវាទការងារណាស់ ក្រុមហ៊ុនអនុវត្តទៅតាមច្បាប់បានល្អ រួមនឹងទំនាក់ទំនងរវាងនិយោជកជប៉ុន និងកម្មករនិយោជិតកម្ពុជាមានភាពសុខដុមរមនានឹងគ្នា”។

លោកបន្ថែមថា កម្ពុជាចង់ឃើញកម្មសិក្សាការីរបស់ខ្លួន បានទៅធ្វើការនៅប្រទេសជប៉ុនឱ្យបាន៥ម៉ឺននាក់ ខណៈបច្ចុប្បន្នកម្មសិក្សាការីកម្ពុជាទៅធ្វើការនៅជប៉ុន មានប្រមាណតែជាង២ម៉ឺននាក់ប៉ុណ្ណោះ។ លោកបានស្នើដល់ខាងភាគីជប៉ុន បណ្តុះបណ្តាលធនធានមនុស្សរបស់កម្ពុជា ដើម្បីឈានទៅសម្រេចឱ្យបាននូវចំនួន៥ម៉ឺន នាក់នាពេលដ៏ខ្លីខាងមុខនេះ។

នៅក្នុងជំនួបនោះដែរ លោក Fumiaki រួមនឹងសមាជិកសមាគម បានប្តេជ្ញានឹងខិតខំប្រឹងប្រែង ធ្វើយ៉ាងណាជួយមកកម្ពុជា លើជំនាញចំាបាច់និងអាទិភាព ដែលកំពុងមានតម្រូវការសម្រាប់ ទៅធ្វើការនៅប្រទេសជប៉ុន។

ជាមួយនឹងនេះ ដោយសង្កេតឃើញថា រថយន្តដែលផលិតនៅប្រទេសជប៉ុន បានចរាចរណ៍នៅកម្ពុជា មានចំនួនកាន់តែច្រើន ដែលជាឱកាសមួយ សម្រាប់ឱ្យខាងជប៉ុនផ្តល់ការបណ្តុះបណ្តាល លើជំនាញថែទាំ និងជួសជុលរថយន្តនេះ ទៅដល់យុវជនកម្ពុជា ឱ្យកាន់តែមានសមត្ថភាព រួមនឹងផ្តល់ការបណ្តុះបណ្តាលជំនាញកែសម្ផស្ស ដែលជាជំនាញមួយកំពុងតែពេញនិយម ដែលអាចផ្តល់ចំណូលបានប្រសើរ បើយុវជន យុវតីរបស់កម្ពុជា ចាប់យកអាជីពខាងកែសម្ជស្សនេះបានស្ទាត់ជំនាញ ។

ក្រលេកមកមើលការវិនិយោគរបស់ជប៉ុន នៅកម្ពុជានាពេលបច្ចុប្បន្ននេះ ទទួលបានការគាំទ្រយ៉ាងខ្លាំង ពីប្រជាពលរដ្ឋកម្ពុជា ដូចជា គម្រោងវិនិយោគលំនៅឋាន ជាពិសេសផ្សារទំនើបអ៊ីអនម៉ល ដោយមកដល់បច្ចុប្បន្ននេះ ផ្សារទើបជប៉ុនមួយនេះ បានពង្រីកទីតាំង៣កន្លែងហើយ និងកំពុងទទួលបានការគាំទ្រច្រើនពីពលរដ្ឋកម្ពុជាផងដែរ ៕

ដោយៈ វឌ្ឍនៈ

ភ្នំពេញៈ កម្ពុជានៅតែបន្តអនុម័ត គម្រោងវិនិយោគថ្មីៗជាបន្តបន្ទាប់ ហើយគម្រោងភាគច្រើន ដែលអនុម័តចុងក្រោយនេះ គឺជាគម្រោងវិនិយោគរោងចក្រឧស្សាហកម្ម ដោយបានផ្ដល់ឱកាសការងារ ដល់ប្រជាពលរដ្ឋកម្ពុជារាប់ម៉ឺនកន្លែង។

ជាក់ស្ដែងយោងតាមសេចក្ដីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជាចេញ ផ្សាយនៅ ព្រឹកថ្ងៃទី៧ កុម្ភៈ ២០២៣នេះ គម្រោងវិនិយោគថ្មី១១ គម្រោងមានទឹកប្រាក់ជិត៦០លានដុល្លារ ត្រូវបានចេញវិញ្ញាបនបត្រចុះបញ្ជីវិនិយោគជាផ្លូវការ។

យោងតាមសេចក្ដីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជាបានបង្ហាញ គម្រោងទាំង១១ដែលបានអនុម័ត និងចេញផ្សាយនៅថ្ងៃនេះ ក្នុងរួមមាន ទី១. គម្រោងបង្កើតរោងចក្រកាត់ដេរសម្លៀកបំពាក់ និងវាយនភណ្ឌក្នុងផ្ទះ ដែលមានទីតាំងវិនិយោគ ស្ថិតនៅក្បាលដីលេខ១ ផ្លូវជាតិលេខ៤១ ភូមិដូនកែវ ឃុំសែនដី ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ៦,៤លានដុល្លារអាមេរិក និងអាចបង្កើតការងារបានចំនួន ៥៣១កន្លែង។

ទី២ គម្រោងបង្កើតរោងចក្រផលិតស្បែកជើង ដែលមានទីតាំងវិនិយោគស្ថិតនៅភូមិរោងគោ ឃុំសំរោងទង ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ៦,៤លានដុល្លារអាម៉េរិក និងអាចបង្កើតការងារបានចំនួន ១.៤៧៨កន្លែង។

ទី៣. គម្រោងបង្កើតរោងចក្រផលិតកាបូប កាត់ដេរសម្លៀកបំពាក់ ខ្សែកាត ម៉ាស និងអៀម ដែលមានទីតាំងវិនិយោគស្ថិតនៅភូមិត្រាវ ឃុំទឹកល្អក់ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ៥,៨លានដុល្លារអាម៉េរិក និងអាចបង្កើតការងារបានចំនួន១.២៦៣កន្លែង។

ទី៤. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវលេខ២២៤ ភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគប្រមាណ ៥,៥លានដុល្លារអាមេរិក និងអាចបង្កើតការងារបានចំនួន ២.៦១០កន្លែង។

ទី៥. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ៤ ភូមិអង្គស្នួលទី១ ឃុំពើក ស្រុកអង្គស្នួល ខេត្តកណ្តាល ក្នុងទុនវិនិយោគប្រមាណ ៥,៥លានដុល្លារអាម៉េរិក និងអាចបង្កើតការងារបានចំនួន ២.០៤៧កន្លែង ។

ទី៦. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំ​ងវិនិយោគស្ថិតនៅភូមិស្លែង ឃុំមហាសាំង ស្រុកភ្នំស្រួច ខេត្តកំពង់ស្ពឺ ក្នុងទុនវិនិយោគ ប្រមាណ៥,៤លានដុល្លារអាម៉េរិក និងអាចបង្កើតការងារបានចំនួន ២.១៣៥កន្លែង។

ទី៧. គម្រោងបង្កើតរោងចក្រ ផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិទួលធ្នង់ ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ ៥,២លានដុល្លារអាម៉េរិក និងអាចបង្កើតការងារបានចំនួន ៧៩៨កន្លែង។

ទី៨. គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិអង្គតាកូវ សង្កាត់គោករកា ខណ្ឌព្រែកព្នៅ រាជធានីភ្នំពេញ ក្នុងទុនវិនិយោគប្រមាណ ៥,១លានដុល្លារអាម៉េរិក និងអាចបង្កើតការងារបានចំនួន ៧៩៨កន្លែង។

ទី៩ គម្រោងបង្កើតរោងចក្រផលិតគ្រឿងបង្គុំ នៃគ្រឿងសង្ហារិមធ្វើពីលោហៈធាតុ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ ក្នុងទុនវិនិយោគចំនួន ៩លានដុល្លារអាម៉េរិក និងអាចបង្កើតការងារបានចំនួនប្រមាណ៥០០កន្លែង។

ទី១០. គម្រោងបង្កើតរោងចក្រផលិត សម្ភារៈការិយាល័យ (ក្រូណូដាក់ឯកសារ) ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគចំនួន ៣លានដុល្លារអាម៉េរិក និងអាចបង្កើតការងារបានចំនួនប្រមាណ៣៥០កន្លែង។

ទី១១.  គម្រោងបង្កើតរោងចក្រ ផលិតសម្ភារៈកីឡាធ្វើពីស្បែក និងក្រណាត់ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ រាជធានីភ្នំពេញក្នុងទុនវិនិយោគប្រមាណ៦០០ពាន់ដុល្លារអាមេរិក និងអាចបង្កើតការងារបានចំនួនប្រមាណ២០០កន្លែង ៕

ដោយ: គង់ លាងហួរ

ប៉េកាំង: បណ្តាក្រុមហ៊ុនផលិតប្រេង ប្រហែលជាត្រូវពិចារណាឡើងវិញ នូវគោលនយោបាយទិន្នផលរបស់ពួកគេ បន្ទាប់ពីការងើបឡើងវិញនៃតម្រូវការនៅក្នុងប្រទេសចិន ដែលជាប្រទេសប្រើប្រាស់ប្រេងច្រើនជាងគេទី២លើពិភពលោក។

ប្រទេសចិន ដែលជាប្រទេសនាំចូលប្រេងឆៅ ដ៏ធំបំផុតរបស់ពិភពលោក និងជាអ្នកទិញឧស្ម័នធម្មជាតិរាវលេខ២ បានក្លាយជាកត្តាមិនប្រាក ដប្រជាដ៏ធំបំផុតនៅក្នុងទីផ្សារប្រេង និងឧស្ម័នពិភពលោកក្នុងឆ្នាំ២០២៣ បន្ទាប់ពីទីក្រុងប៉េកាំង បានលុបចោលនយោបាយសូន្យកូវីដ នៅក្នុងខែធ្នូ ឆ្នាំ២០២២។

នាយកប្រតិបត្តិនៃទីភ្នាក់ងារថាមពលអន្តរជាតិ លោក Fatih Birol បានមានប្រសាសន៍ថា “យើងរំពឹងថា ប្រទេសចិននឹងគ្របដណ្តប់ប្រហែលពាក់កណ្តាល នៃកំណើនតម្រូវការប្រេងពិភពលោកនៅឆ្នាំនេះ”។លោក​បាន​បន្ថែម​ថា “តម្រូវ​ការ​ប្រេង​ចាក់យន្ត​ហោះ​របស់​ប្រទេស​ចិន ​កំពុង​កើន​ឡើង​ដោយ​ដាក់​សម្ពាធ​លើ​តម្រូវ​ការ”។

លោកបានបញ្ជាក់ថា “ប្រសិនបើតម្រូវការកើនឡើងខ្លាំង ហើយបើសេដ្ឋកិច្ចចិនស្ទុះងើបឡើងវិញ នោះតាមទស្សនៈរបស់ខ្ញុំ បណ្តាប្រទេសអង្គការ OPEC+ នឹងត្រូវពិនិត្យមើលគោលនយោបាយទិន្នផល របស់ពួកគេឡើងវិញ”។

អង្គការផលិតប្រេង OPEC + បានខឹងសម្បារនឹងសហរដ្ឋអាមេរិក និងប្រទេសលោកខាងលិចផ្សេងទៀត នៅក្នុងខែតុលា នៅពេលដែលអង្គការនេះ សម្រេចចិត្តកាត់បន្ថយទិន្នផលប្រេង២លានបារ៉ែល ក្នុងមួយថ្ងៃចាប់ពីខែវិច្ឆិកា ដល់ឆ្នាំ២០២៣ ជំនួសឱ្យការបូមប្រេងបន្ថែមទៀត ដើម្បីកាត់បន្ថយតម្លៃប្រេងឥន្ធនៈ និងជួយដល់សេដ្ឋកិច្ចពិភពលោក ដូចដែលសហរដ្ឋអាមេរិកបានណែនាំ។

លោក Birol បញ្ជាក់ក្តីសង្ឃឹមថា “ស្ថានភាពបែបនេះ នឹងមិនកើតឡើងម្តងទៀតទេ ហើយអង្គការ OPEC + ដែលរួមមានសមាជិកនៃអង្គការប្រទេសនាំចេញប្រេង និងសម្ព័ន្ធមិត្តដូចជារុស្ស៊ី នឹងត្រលប់ទៅដើរតួនាទីស្ថាបនានៅក្នុងទីផ្សារ ខណៈតម្រូវការមានភាពប្រសើរឡើងវិញ”៕