ដោយៈ វឌ្ឍនៈ

ភ្នំពេញៈ តម្លៃដីធ្លីនៅក្នុងប្រទេសកម្ពុជា បានបន្តកើនឡើងជាបន្តបន្ទា​ប់ បើទោះបីជាស្ថិតនៅក្នុងវិបត្តិនៃជំងឺកូវីដ១៩ ក៏តម្លៃដីធ្លីមិនបានថមថយឬធ្លាក់ចុះនោះ ផ្ទុយទៅវិញមានតែបន្តកើនឡើង ហើយភ្នំពេញស្ថិតនៅជាតំប​ន់ដែលមានតម្លៃដីធ្លីខ្ពស់ជាងគេនៅកម្ពុជា។

ថ្ងៃនេះយើងបង្ហាញពីតំបន់មួយចំនួន នៅក្នុងរាជធានីភ្នំពេញ ដែលដីធ្លីមានតម្លៃ រហូតដល់លើ១ម៉ឺនដុល្លារអាមេរិកក្នុងមួយម៉ែត្រការ៉េ។

យោងតាមការសិក្សាស្រាវជ្រាវ របស់ក្រុមហ៊ុនអចលនទ្រព្យក្នុងស្រុកមួយបានបង្ហាញសង្កាត់ចំនួន៥ក្នុងខណ្ឌ ដូនពេញ ដីធ្លីមានតម្លៃរហូតដល់១២.២០០ទៅ១៣.៣០០ដុល្លារអាមេរិក ក្នុងមួយម៉ែត្រការ៉េ រួមមានសង្កា​ត់ផ្សារកណ្ដាលទី១ សង្កាត់ផ្សារកណ្ដាលទី២ សង្កាត់ផ្សារថ្មីទី១ សង្កាត់ផ្សារថ្មីទី២ និងសង្កាត់ផ្សារថ្មីទី៣ ។

ការសិក្សាបានបង្ហាញថា សង្កាត់ផ្សារកណ្ដាលទី១និងទី២ តម្លៃដីនៅតាមបណ្ដោយផ្លូវធំ ឬផ្លូវសំខាន់មានតម្លៃចន្លោះពី៥.៦០០ដុល្លារអាមេរិកក្នុងមួយម៉ែត្រការ៉េ ដល់ ១២.២០០ដុល្លារអាមេរិក ក្នុងមួយម៉ែត្រការ៉េ ខណៈនៅតាមបណ្ដោយផ្លូវតូចៗវិញ មានតម្លៃចន្លោះពី២.៩០០ដុល្លារអាមេរិកទៅ៤.៧០០ដុល្លារអាមេរិកក្នុងមួយម៉ែត្រការ៉េ ។

ចំណែកសង្កាត់៣ទៀត រួមមាន សង្កាត់ផ្សារថ្មីទី១ ទី២ និងទី៣តម្លៃដីនៅតាមបណ្ដោយផ្លូវធំៗ មានចន្លោះពី៥.៦០០ដុល្លារអាមេរិកទៅ១៣.៣០០ដុល្លារអាមេរិក ក្នុងមួយម៉ែត្រការ៉េ និងតាមបណ្ដោយផ្លូវតូចៗវិញ ក៏មានតម្លៃចន្លោះពី២.៩០០ដុល្លារអាមេរិក ទៅ៤.៧០០ដុល្លារអាមេរិកផងដែរក្នុងមួយម៉ែត្រការ៉េ ។

ចំណែកសង្កាត់ដែលមានតម្លៃដីធ្លី ទាបជាងគេក្នុងខណ្ឌដូនពេញ គឺសង្កាត់ស្រះចក ដែលតម្លៃមានចន្លោះពី៣.៧០០ដុល្លារអាមេរិក ក្នុងមួយម៉ែត្រការ៉េ ទៅ៥.៩០០ដុល្លារអាមេរិកក្នុងមួយម៉ែត្រការ៉េ សម្រាប់តំបន់នៅតាមបណ្ដោយផ្លូវធំ និងតម្លៃចន្លោះពី២.២០០ដុល្លារអាមេរិក ទៅ៤១០០ដុល្លារអាមេរិក ក្នុងមួយម៉ែត្រការ៉េ សម្រាប់តំបន់នៅតាមបណ្ដោយផ្លូវតូចៗឬហៅថា Sub-main Road ។

យ៉ាងណាក្ដីបើតាមការសិក្សារបស់ក្រុមហ៊ុន PropNex Cambodia កាលពីចុងឆ្នាំ២០២២ ក៏បានបង្ហាញផងដែរថា ជាមធ្យមតម្លៃដីធ្លីនៅក្នុងខណ្ឌដូនពេញ មានតម្លៃចន្លោះពី៣.០០០ដុល្លារអាមេរិក ទៅជាង៧០០០ដុល្លារអាមេរិកក្នុងមួយម៉ែត្រការ៉េ ខណៈតម្លៃដីធ្លីនៅតំបន់បឹងកេងកង ជាមធ្យមមានតម្លៃខ្ពស់ជាងគេ ។

ការទិញដីធ្លីនៅតំបន់ទាំងនេះ មិនអាចទិញជាការវិនិយោគសម្រាប់ទុកចំណេញបន្តទៀតនោះទេ អ្នកដែលទិញដីធ្លីនៅតំបន់ទាំងនេះ ភាគច្រើនគឺជាអ្នកអភិវឌ្ឍន៍ ដែលទិញហើយគឺអភិវឌ្ឍន៍ សំណង់អគារនានា ជាពិសេសសំណង់អគារខ្ពស់ៗតែម្ដង៕

ដោយៈ គង់ សូរិយា

ឥណ្ឌូនេស៊ីៈ កម្ពុជាទទួលជ័យលាភី និងពានរង្វាន់សរុបចំនួន១៧ ពីការអនុវត្តស្តង់ដា ទេសចរណ៍អាស៊ានឆ្នាំ២០២៣ ក្នុងនោះមានរង្វាន់ផ្ទះស្នាក់ស្តង់ដាអាស៊ានចំនួន៥ រង្វាន់សហគមន៍ទេសចរណ៍ស្តង់ដាអាស៊ាន ចំនួន៣ រង្វាន់បង្គន់អនាម័យសាធារណៈ ស្តង់ដាអាស៊ានចំនួន៥ និងរង្វាន់សេវាស្ប៉ាស្តង់ដាអាស៊ានចំនួន៤។

ក្នុងវេទិកាទេសចរណ៍អាស៊ាន២០២៣ ដែលប្រព្រឹត្តទៅនាថ្ងៃទី៥ ខែកុម្ភៈ ឆ្នាំ២០២៣ នៅទីក្រុងយុក្យាការតា ប្រទេសឥណ្ឌូណេស៊ី អាស៊ានបានផ្តល់ពានរង្វាន់ស្តង់ដាទេសចរណ៍អាស៊ាន២០២៣ ចំនួន១៥៨ លើការអនុវត្តស្ដង់ដារួមមាន ១. ផ្ទះស្នាក់ស្តង់ដាអាស៊ាន ចំនួន៤៣។ ២. សហគមន៍ទេសចរណ៍ស្តង់ដាអាស៊ាន ចំនួន២៩។ ៣. បង្គន់អនាម័យសាធារណៈស្តង់ដាអាស៊ានចំនួន៤៨។ ៤. សេវាស្ប៉ាស្តង់ដាអាស៊ាន ចំនួន៣៨។

លោកថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិ​បត្តិការអន្តរជាតិ នៃក្រសួងទេសចរណ៍ បានឱ្យដឹងថា នាឱកាសនោះដែរ អាស៊ាន ក៏បានប្រគល់ជូនម្ចាស់ទីតាំងទេសចរណ៍នៅកម្ពុជា នូវជ័យលាភីចំនួន១៧ ដែលមានទីតាំងនៅក្នុងរាជធានី-ខេត្តចំនួន៨។

លោកបានបន្តថា តំណាងជ័យលាភីកម្ពុជា ដែលបានឡើងទទួលពានរង្វាន់នោះ រួមមាន តំណាងម្ចាស់សហគមន៍ ម្ចាស់គម្រោង មន្ត្រីមន្ទីរទេសចរណ៍ មន្ត្រីរាជធានី-ខេត្ត ក្រោមការដឹកនាំដោយលោកអភិបាលរងមកពីរាជធានីភ្នំពេញ ខេត្តកោះកុង ខេត្តកំពត ខេត្តព្រះសីហនុ ខេត្តកំពង់ស្ពឺ និងខេត្តកំពង់ធំ។

ជ័យលាភីនិងពានរង្វាន់ ដែលម្ចាស់ទីតាំងនៅកម្ពុជាទទួលបាននោះ រួមមាន ទី១. រង្វាន់ផ្ទះស្នាក់ស្តង់ដាអាស៊ាន ចំនួន៥៖ ផ្ទះស្នាក់ Eagle ផ្ទះស្នាក់ Black Bear និងផ្ទះស្នាក់ Mien Mien ក្នុងខេត្តកោះកុង ផ្ទះស្នាក់ត្រពាំងសង្កែ ក្នុងខេត្តកំពត និងផ្ទះស្នាក់សំបូរព្រៃគុក ក្នុងខេត្តកំពង់ធំ។ ទី២. រង្វាន់សហគមន៍ទេសចរណ៍ស្តង់ដាអាស៊ាន ចំនួន៣ សហគមន៍អេកូទេសចរណ៍ត្រពាំងសង្កែ ក្នុងខេត្តកំពត សហគមន៍អេកូទេសចរណ៍កោះហាន ក្នុងខេត្តស្ទឹងត្រែង និងសហគមន៍អេកូទេសចរណ៍អន្លង់ធំ ក្នុងខេត្តសៀមរាប។

ទី៣. រង្វាន់បង្គន់អនាម័យសាធារណៈស្តង់ដាអាស៊ាន ចំនួន៥៖ បង្គន់អនាម័យសាធារណៈ Aeon Mall Phnom Penh ក្នុងរាជធានីភ្នំពេញ បង្គន់អនាម័យសាធារណៈលេខ៤ ក្នុងខេត្តព្រះសីហនុ បង្គន់អនាម័យសាធារណៈស្រះស្រង់ ក្នុងគ្រឹះស្ថានអង្គរ បង្គន់អនាម័យសាធារណៈ PTT ក្នុងខេត្តកោះកុង និងបង្គន់អនាម័យសាធារណៈស្តុបពេជ្រនិល ក្នុងខេត្តកំពង់ស្ពឺ។

ទី៤. រង្វាន់សេវាស្ប៉ាស្តង់ដាអាស៊ានចំនួន៤៖ សេវាស្ប៉ា SPA Temple ក្នុងសណ្ឋាគារកាំបូឌា រាជធានីភ្នំពេញ សេវាស្ប៉ា JIVAPITA SPA ក្នុងសណ្ឋាគារ Royal Residence ភ្នំពេញ សេវាស្ប៉ា SO SPA with LÓCCITANCE ក្នុងសណ្ឋាគារSofitel Angkor Phokeethra Golf & Spa Resort ខេត្តសៀមរាប និងសេវាស្ប៉ា SPA at Naga World ក្នុងសណ្ឋាគារ Naga World ភ្នំពេញ។

លោកអគ្គនាយកបានបន្តទៀតថា តាមរយៈការទទួលជ័យលាភីរង្វាន់ស្តង់ដាទេសចរណ៍អាស៊ាន២០២៣នេះ ក៏ដូចជា ការអភិវឌ្ឍហេដ្ឋារចសម្ព័​ន្ធជាច្រើន និងការរៀបចំព្រឹត្តិការណ៍ធំៗ ប្រកបដោយជោគជ័យខ្ពស់កន្លងមកនៅកម្ពុជា បានបញ្ជាក់ឱ្យឃើញកាន់តែច្បាស់ថា កម្ពុជាមានផលិតផល និងគោលដៅទេសចរណ៍ទាក់ទាញច្រើន សម្រាប់ទៅលេងកម្សាន្ត ប្រកប​ដោយភាពងាយស្រួល កក់ក្តៅ សុវត្ថិភាព ស្អាត និងបៃតង ស្របពេលជាមួយដែលកម្ពុជា កំពុងផ្សព្វផ្សាយពីឆ្នាំទស្សនាកម្ពុជា ឆ្នាំ២០២៣ Visit Cambodia 2023 និងកំពុងត្រៀមខ្លួនឆ្ពោះ ទៅការរៀបចំព្រឹត្តិការកីឡាស៉ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ ដែលជាព្រឹត្តិការណ៍កីឡាដ៏ធំនៅកម្ពុជា ខណៈចលនាទេសចរណ៍ ក្នុងស្រុកកំពុងបន្តងើបឡើង ដែលជាសញ្ញាណមួយផ្តល់នូវទំនុកចិត្ត និងការទាក់ទាញភ្ញៀវទេសចរអន្តរជាតិមកទស្សនាកម្សាន្តនៅកម្ពុជា បានកាន់តែច្រើនថែមទៀតនាពេលខាងមុខ។

ជ័យលាភីរង្វាន់ស្តង់ដាទេសចរណ៍អាស៊ាន ឆ្នាំ២០២៤ នឹងគ្រោងរៀប​ចំឡើងនៅទីក្រុងវៀងចន្ទន៍ ប្រទេសឡាវ ដែលជាប្រទេសម្ចាស់ផ្ទះបន្ទាប់ក្រោមប្រធានបទ “ទេសចរណ៍ប្រកបដោយគុណភាព និងការទទួលខុសត្រូវ – ចីរភាពអនាគតអាស៊ាន” (Quality and Responsible Tourism – Sustaining ASEAN Future)៕

+2

  ដោយៈ សុផារី

ក្រចេះ៖ គម្រោងសាងសង់ស្ពានឆ្លងកាត់ទន្លេមេគង្គក្រចេះ បាននិងកំពុងចាប់ផ្តើមដាំបង្គោលគ្រឹះសសរស្ពាន និងកំពុងដោះស្រាយនូវផលប៉ះពាល់ នៅក្នុងបរិវេណការដ្ឋានសាងសង់ជាមួយប្រជាជន។

ក្នុងកិច្ចប្រជុំពិនិត្យវឌ្ឍនភាព នៃដំណើរការសាងសង់ស្ពានឆ្លងកាត់ទន្លេមេគង្គក្រចេះ និងផ្លូវតភ្ជាប់មួយចំនួននៅថ្ងៃទី៦ ខែកុម្ភៈ ឆ្នាំ២០២៣ម្សិលមិញ  តំណាងក្រុមហ៊ុនសាងសង់សៀង ហៃ បានបង្ហាញអំពីដំណើរការនៃការសាងសង់ ដោយឈរលើកុងត្រារយៈពេល៤២ខែ ទើបរួចរាល់ ហើយមកទល់ពេលនេះ គឺសម្រេចបាន១% ហើយ។

ក្រសួងសាធារណការ និងដឹកជញ្ជូន គម្រោងស្ពាននេះគឺជាផ្នែកមួយនៃផ្លូវជាតិលេខ៦០B តភ្ជាប់ជាមួយផ្លូវជាតិលេខ៦ និងផ្លូវជាតិលេខ៧១A ផ្លូវជាតិលេខ៧ ផ្លូវជាតិលេខ៧៣។ ស្ពាននេះ ជាគម្រោងយុទ្ធសាស្ត្រមួយយ៉ាងសំខាន់ សម្រាប់តភ្ជាប់ទំនាក់ទំនង និងក្តីសង្ឃឹម រវាងប្រជាពលរដ្ឋដែលរស់នៅត្រើយខាងកើត និងប្រជាពលរដ្ឋរស់នៅត្រើយខាងលិច រួមទាំង​តភ្ជាប់តំបន់ដាច់ស្រយាល នៅភូមិភាគឦសាន មកកាន់ទីប្រជុំជនផងដែរ។

លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ចូន បានជំរុញដល់ក្រុមការងារ ឱ្យដោះស្រាយផលប៉ះពាល់ ដោយសហការជាមួយក្រុមហ៊ុន ដោះស្រាយសម្របសម្រួល ផ្សព្វផ្សាយណែនាំ និងចុះពិនិត្យទីតាំងប៉ះពាល់ ដល់កិច្ចដំណើរការសាងសង់ស្ពាន និងផ្លូវតភ្ជាប់ជាក់ស្តែង ជាមួយម្ចាស់កម្មសិទ្ធិទ្រព្យ ដើម្បីគណនានូវប្រាក់សំណងឲ្យបានត្រឹមត្រូវ  ហើយត្រូវគោរពអនុវត្តន៍នូវក្រមសីលធម៌មន្រ្តីមានសមត្ថកិច្ច។

ស្ពានឆ្លងកាត់ទន្លេមេគង្គក្នុងខេត្តក្រចេះ ដែលមានប្រវែង១.៧៦១ម៉ែត្រ ក្រោមឥណទានសម្បទានពីប្រទេសចិន និងត្រូវបានប្រកាសបើកការដ្ឋានសាងសង់នាថ្ងៃទី២ ខែមករា ឆ្នាំ ២០២៣។ គម្រោងនេះនឹងត្រូវសាងសង់ដោយក្រុមហ៊ុនសំណង់សៀងហៃ (SCG) និងត្រួតពិនិត្យបច្ចេ​កទេសដោយក្រុមហ៊ុន ទីប្រឹក្សាបច្ចេកទេសក្វាងចូវវ៉ានអាន ប្រើប្រាស់រយៈពេលសាងសង់៤២ខែ នឹងបញ្ចប់នៅឆ្នាំ២០២៦ ដែលគ្រោងចំណាយថវិកាប្រមាណ១១៤លានដុល្លារ៕

ដោយៈគង់ សូរិយា

       ភ្នំពេញៈ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃកម្ពុជា ប្រទានកម្មប័ណ្ណកម្មសិទ្ធិលើចំណែកឯកជន ចំនួន១.៣៩២បន្ទប់ នៃអគារបុរីកីឡាទាំង៨អគារ។

លោកឃួង ស្រេង អភិបាល នៃគណៈអភិបាលរាជធានីភ្នំពេញកាលពី​ចុងសប្តាហ៍មុន បានអញ្ជើញចុះសួរសុខទុក្ខ និងសំណេះសំណាលបងប្អូន ប្រជាពលរដ្ឋបុរីកីឡាទាំង៨អគារ ស្មើនឹង១.៣៩២បន្ទប់ ប្រមាណ១.២០០គ្រួសារ ដែលកំពុងរស់នៅក្នុងអគារបុរីកីឡា ដោយបាននាំយកដំណឹងដ៏សែនរីករាយ មកជម្រាបជូនបងប្អូនប្រជាពលរដ្ឋ ដែលរស់នៅក្នុងអគារបុរីកីឡា ដោយពិនិត្យឃើញអំពីស្ថានភាពរបស់បងប្អូន នឹងជួយសម្រួលឱ្យបងប្អូនទទួលបានកម្មសិទ្ធិស្របច្បាប់ លើចំណែកឯកជន នៃអគារសហកម្មសិទិ្ធបុរីកីឡា ក៏ដូចសម្រួលបន្ទុកក្នុងការបង់ពន្ធ-អាករ និងសេវាសុរិយាដីនានា ក្នុងដំណើរការបំពេញនីតិវិធី កសាងប័ណ្ណកម្មសិទ្ធិលើចំណែកឯកជន៕

   ដោយៈ វឌ្ឍនៈ

ភ្នំពេញៈ ឆ្នាំ២០២៣ជាឆ្នាំមួយ ដែលអ្នកជំនាញអចលនទ្រព្យអ្នកវិនិយោគ ក៏ដូចជាធុរជនលើវិស័យអចលនទ្រព្យ នៅតែបង្ហាញក្ដីសង្ឃឹមជាថ្មីថានឹងធ្វើឱ្យវិស័យនេះ នឹងមានភាពប្រសើរឡើងជាងឆ្នាំមុនៗ បន្ទាប់ពីជួបវិបត្តិកូវីដ១៩ បើទោះបីជាបច្ចុប្បន្ននេះវិបត្តិ នៃសង្គ្រាមរវាងរុស្ស៊ី និងអ៊ុយក្រែននៅតែមិនទាន់បានបញ្ចប់។

អគ្គនាយិកានៃក្រុមហ៊ុនអចលនទ្រព្យCentury 21 Cambodia លោកស្រីGrace Rachny Foនងបានមានប្រសាសន៍ឲ្យដឹងកាលពីចុង​សប្តាហ៍មុនថា ទោះបីជាឆ្នាំ២០២៣នេះ វិបត្តិនៃសង្គ្រាមរវាងរុស្ស៊ី និងអ៊ុយក្រែនមិនទាន់បានបញ្ចប់ក្ដី តែសម្រាប់វិស័យអចលនទ្រព្យនៅកម្ពុជា រំពឹងថានឹងមានភាពប្រសើរឡើងវិញ និងប្រសើរជាងឆ្នាំ២០២២និងឆ្នាំ ២០២១កន្លងទៅ ។

លោកស្រីបន្តថា “ឆ្នាំនេះយើងមានក្ដីសង្ឃឹមច្រើន ជាក់ស្ដែងយើងឃើ​ញប្រទេសចិន បានចាប់ផ្ដើមបើកប្រទេសរបស់ខ្លួនឡើងវិញហើយ”។លោក​ស្រីបន្ថែមថា “អ្នកដំណើរទាំងភ្ញៀវទេសចរ និងវិនិយោគិនរបស់ចិននឹងចាប់ផ្ដើមចាកចេញ និងស្វែងរកឱកាសវិនិយោគ នៅតាមបណ្ដាប្រទេសនានាឡើងវិញ ក្នុងនោះកម្ពុជាក៏ជាគោលដៅមួយរបស់ចិនផងដែរ “។

ដូច្នេះហើយ ទើបអ្នកវិនិយោគក្នុងស្រុកជាច្រើន បានផ្ដល់ក្ដីសង្ឃឹមថាស្ថានភាពវិនិយោគកក្នុងឆ្នាំ២០២៣នេះ នឹងប្រសើរជាងឆ្នាំ២០២១និងឆ្នាំ២០២២កន្លងទៅថ្មីៗនេះ ។

លោកស្រីGrace Rachny បានបន្តទៀថា កត្តាមួយចំនួនដែលយើងរំពឹងថាឆ្នាំនេះ ជាឆ្នាំប្រសើរសម្រាប់ការវិនិយោគ នៅក្នុងប្រទេសកម្ពុជា ដូចជារោងចក្រ ដំឡើងរថយន្តម៉ាកយីហោល្បីៗជាច្រើន បានដំណើរការនៅក្នុងប្រទេសកម្ពុជា ដែលជាការទាក់ទាញដល់បណ្ដា ក្រុមហ៊ុនធំៗជាច្រើនទៀតនៅលើពិភពលោក ចូលមកជាបន្តបន្ទាប់ ។ ក្រៅពីនេះម៉ាកយីហោនៃទំនិញល្បីៗជាច្រើនក៏បានចូលមកកម្ពុជាជាបន្តបន្ទាប់ផងដែរ ។

លោកស្រីបន្ថែមថា នាពេលបច្ចុប្នន្ននេះដែរ យើងក៏បានឃើញបណ្ដាធនាគារទាំងក្នុងស្រុក និងបរទេសបានចាប់ផ្ដើមពង្រឹងខ្លួន កាន់តែរឹងមាំបន្ថែមទៀត ដោយបានពង្រីកការិយាល័យ ក៏ដូចជា សាងសង់អគារការិយា​ល័យកណ្ដាលរបស់ខ្លួនកាន់តែធំ ហើយនៅពេលណាធនាគារមានភាពរឹងមាំហើយនោះ វិស័យអចលនទ្រព្យក៏នឹងរឹងមាំដែរ ពីព្រោះថាវិស័យនីមួយៗគឺត្រូវមានការផ្សារភ្ជាប់គ្នា។

លោកស្រីGrace Rachnyឱ្យដឹងថា បើតាមការវិភាគរបស់ក្រុមអ្នកវិភាគលើវិស័យអចលនទ្រព្យ និងសេដ្ឋកិច្ចកម្ពុជាបានឱ្យដឹងថា ចាប់ពីឆ្នាំ២០២០ រហូតដល់ឆ្នាំ ២០២២កន្លងទៅ ថ្វីត្បិតតែយើងជួបបញ្ហាមែន តែបើសិនជាប្រៀបធៀបនឹងវិបត្តិក្នុងអំឡុងឆ្នាំ២០០៨ គឺឆ្នាំ ២០២០នៅល្អជាងឆ្នាំ២០០៨ឆ្ងាយណាស់ ប៉ុន្តែក្រោយពីឆ្នាំ ២០០៨ហើយ យើងនៅតែអាចស្ដារឱ្យវាងើបឡើងវិញបានលឿនរហ័ស ។

ជាមួយគ្នានេះ លោកឌឹត ចណ្ណាអគ្គនាយកក្រុមហ៊ុន Lucky Realty បានឱ្យដឹងផងដែរថា ចាប់ពេលនេះ តទៅក្រុមហ៊ុនក្នុងស្រុកជាច្រើនគួរត្រៀមខ្លួន ក្នុងការទទួលយកនូវការវិនិយោគពីខាងក្រៅបណ្ដើរៗ។ ជាក់ស្ដែងក្រុមរបស់លោក ក៏បាននិងកំពុងត្រៀមខ្លួន និងគ្រោងនឹងបង្ហាញដល់អ្នកវិនិយោគក្នុងស្រុក ពីការទទួលផលចំណេញ ក្នុងវិស័យអចលនទ្រព្យជាពិសេសពីរបៀបរកស៊ី ជាមួយធុរជនមកពីប្រទេសចិន ស្របនឹងប្រទេសចិនបានបើកទូលាយ ដល់ការធ្វើដំណើររបស់ទេសចរ និងវិនិយោគិនរបស់ខ្លួនផងដែរ៕