(ភ្នំពេញ)៖ លិខិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះឯកឧត្តម António Guterres អគ្គលេខាធិការអង្គការសហប្រជាជាតិ៕
តើសមិទ្ឋផលធំៗនៅតំបន់ឆ្នេរប៉ុន្មានបានបញ្ចប់ការសាងសង់ក្នុងអាណត្តិរដ្ឋាភិបាលថ្មីរយៈពេលជាង២ឆ្នាំ?
ដោយៈ និស្ស័យ
ភ្នំពេញៈ ក្នុងរយៈពេលជាងពីរឆ្នាំនៃនីតិកាលទី៧ របស់រដ្ឋាភិបាលក្រោមការដឹកនាំរបស់សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានសម្រេចបានសមិទ្ឋផលធំៗជាច្រើន បំរើឲ្យការរីកចម្រើនសេដ្ឋកិច្ច និងសង្គម។
១ ការដាក់ឲ្យប្រើប្រាស់គ្រឿងចក្រ លើកដាក់ចល័តនៅគែមផែនៅកំពង់ផែស្វយ័តក្រុងព្រះសីហនុ
គ្រឿងចក្រលើកដាក់កុងតឺន័រនៅគែមផែប្រភេទ QC ចំនួន ២ គ្រឿង និងគ្រឿងចក្រលើកដាក់កុងតឺន័រនៅទីលានប្រភេទ RTG ចំនួន ៦ គ្រឿង ត្រូវបានដឹកជញ្ជូនពីរោងចក្រOita ប្រទេសជប៉ុន មកដល់ចំណតផែកុងតឺន័រថ្មីប្រវែង២៥៣ម៉ែត្រ របស់កំពង់ផែស្វយ័តក្រុងព្រះសីហនុ។
ការបំពាក់គ្រឿងចក្រថ្មីៗទាំងនេះ បានបង្កើនសមត្ថភាពឆ្លើយតបទៅនឹងកំណើននៃតម្រូវការ ក្នុងការលើកដាក់ផ្ទេរ-ផ្ទុកកុងតឺន័ររបស់កំពង់ផែស្វយ័តក្រុងព្រះសីហនុ។
២ កំពង់ផែពហុបំណងកំពត
ខេត្តកំពតបានស្វាគមន៍ កំពង់ផែពហុបំណងកំពត ដែលមានតម្លៃប្រមាណ១៤០លានដុល្លារអាមេរិក បានសម្ពោធដាក់ឲ្យដំណើរការកាលពីថ្ងៃទី០៦ ខែមិថុនា ឆ្នាំ២០២៤ ដែលបានក្លាយជាកំពង់ផែទឹកជ្រៅ និងទំនើបមួយទៀតនៅកម្ពុជា និងមានសារៈសំខាន់ដែលជួយបំពេញបន្ថែមលើមុខងារ របស់កំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ។
៣ ចំណតផែកុងតឺន័រនៅផែស្វយ័តក្រុងព្រះសីហនុប្រវែង២៥៣ម៉ែត្រ
ចំណតផែកុងតឺណ័រថ្មី របស់កំពង់ផែស្វ័យតក្រុងព្រះសីហនុ បានបើកការដ្ឋានសាងសង់កាលពីថ្ងៃ០១ ខែ ឧសភា ឆ្នាំ ២០២៣ ដោយបានប្រើប្រាស់រយៈពេលសាងសង់ចំនួន១៨ ខែ។
តាមរយៈចំណតផែកុងតឺន័រនៅផែស្វយ័ត ក្រុងព្រះសីហនុនេះ បានជួយបំពេញបន្ថែមនូវមុខងាររបស់កំពង់ផែស្វយ័តក្រុងព្រះសីហនុ ដែលធ្វើឱ្យសមត្ថភាពផែសរុបកើនឡើងពី ៥៥ ម៉ឺន TEUs/ឆ្នាំទៅ១លានTEUs/ឆ្នាំ និងអាចអនុញ្ញាតឱ្យនាវាកុងតឺន័រ មានជម្រៅទឹក១០,៤ ម៉ែត្រ ចូលចតបាន។
៤ កំពង់ផែទេសចរណ៍អន្តរជាតិខេត្តកំពត
ខេត្តកំពត កំពុងប្រណាំងប្រជែងសក្តានុពល ជាមួយខេត្តព្រះសីហនុ ដោយខេត្តនេះបានស្វាគមន៍ កំពង់ផែទេសចរណ៍អន្តរជាតិខេត្តកំពត បានសម្ពោធដាក់ឲ្យប្រើប្រាស់នៅខែមេសាឆ្នាំ ២០២៥ មានទីតាំងស្ថិតនៅក្នុងភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត ដែលត្រូវបានសាងសង់ឡើងនៅលើផ្ទៃដីទំហំ៤,២៥ហិកតា។
តាមរយៈកំពង់ផែនេះ បានរួមចំណែកលើកកម្ពស់ការតភ្ជាប់ការដឹកជញ្ជូនតាមផ្លូវសមុទ្រ ទៅកាន់គោលដៅទេសចរណ៍ផ្សេងៗ ដូចជា ខេត្តកែប ខេត្តព្រះសីហនុ ខេត្តកោះកុង និងបណ្តាកោះនានាក្នុងព្រះរាជាណាចក្រកម្ពុជា ក៏ដូចជាការតភ្ជាប់ផ្លូវទស្សនាចរសមុទ្ររបស់ប្រទេសកម្ពុជា ជាមួយបណ្ដាកំពង់ផែទេសចរណ៍ នៅកោះត្រល់របស់ប្រទេសវៀតណាម និងបណ្ដាកំពង់ផែទេសចរណ៍ នៅប្រទេសថៃជាដើម ដែលអាចឱ្យនាវាដឹកភ្ញៀវទេសចរចូលចតយ៉ាងងាយស្រួល។
ជាមួយគ្នានេះ ក្រៅពីសមិទ្ធផលខាងលើ ក្រសួងសាធារណការនិងដឹកជញ្ជូន ក៏បានបញ្ចប់ដាក់ឲ្យប្រើប្រាស់ គម្រោងហេដ្ឋារចនាសម្ព័ន្ធផ្លូវទឹក និងកំពង់ផែចំនួន៣ គម្រោងផ្សេងទៀតរួមមាន៖
-ឃ្លាំងសន្និធិគយបណ្ដោះអាសន្ននៃចំណតផែកុងតឺន័រLM17។
-ចំណតផែរណបពហុបំណង TS11 UM2 និង LM26។
-ឃ្លាំងលើកដាក់ និងស្ដុកទំនិញត្រជាក់របស់ក្រុមហ៊ុនខ្មែរ ខូល ឆេន (Khmer Cold Chain) ក្នុងបរិវេណចំណតផែកុងតឺន័រ LM17 នៃកំពង់ផែស្វយ័តភ្នំពេញ៕
តើតម្លៃហាងឆេងមាសលើទីផ្សារអន្តរជាតិមានការប្រែប្រួលដូចម្តេចនៅថ្ងៃព្រហស្បតិ៍នេះ បន្ទាប់ពីធនាគារ Fed បញ្ចុះអត្រាការប្រាក់ចំនួន០,២៥ភាគរយ?
ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនៅព្រឹកថ្ងៃព្រហស្បតិ៍នេះ បន្ទាប់ពីធនាគារកណ្តាលអាមេរិក (Fed) បានកាត់បន្ថយអត្រាការប្រាក់ចំនួន០,២៥ភាគរយដូចការរំពឹងទុក និងអាចបន្ធូរបន្ថយគោលនយោបាយរូបិយវត្ថុបន្ថែមទៀតនៅខែតុលាខាងមុខ។
តួយ៉ាង តម្លៃមាស Spot Gold បានងើបឡើង០,០៧ភាគរយដល់៣៦៦២,៣៨ដុល្លារក្នុងមួយអោន បន្ទាប់ពីបានបិទការជួញដូរត្រឹមទំហំទឹកប្រាក់ប្រមាណ៣៦៥៩,៦៧ដុល្លារក្នុងមួយអោនកាលពីថ្ងៃពុធម្សិលមិញ។
ទោះជាយ៉ាងណា តម្លៃហាងឆេងមាសរបស់សហរដ្ឋអាមេរិក U.S. gold futures បានធ្លាក់ចុះ០,៥៤ភាគរយមកនៅត្រឹម៣៦៩៧,៨០ដុល្លារក្នុងមួយអោនគិតត្រឹមម៉ោង៩:៤២នាទីព្រឹកដូចគ្នា។
យោងតាមគេហទំព័រ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៨៧,៧ភាគរយ ដែលធនាគារកណ្តាលអាមេរិក (Fed) នឹងកាត់បន្ថយអត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី២៩ ខែតុលាខាងមុខ។
ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់៩៧,០១ពិន្ទុនៅព្រឹកថ្ងៃព្រហស្បតិ៍នេះ ក្រោយពេលបានបិទការជួញដូរត្រឹម៩៦,៨៧ពិន្ទុកាលពីថ្ងៃពុធម្សិលមិញ៕
អ្នកជំនាញបង្ហាញសុទិដ្ឋនិយមថា វិស័យអចលនទ្រព្យហុងកុងនឹងស្ទុះងើបឡើងវិញ នៅពេលសេដ្ខកិច្ចចិនរីកចម្រើន
ដោយ: គង់ លាងហួរ
អន្តរជាតិ: ស្ថានភាពអាក្រក់បំផុតសម្រាប់វិស័យអចលនទ្រព្យរបស់ទីក្រុងហុងកុង នៃប្រទេសចិនកំពុងឈានដល់ទីបញ្ចប់ ខណៈក្រុមអ្នកវិនិយោគជាច្រើនអាចនឹងសម្រុកទិញអចលនទ្រព្យក្នុងរយៈពេលប៉ុន្មានខែខាងមុខ ហើយការលក់ផ្ទះនឹងបន្តមានភាពប្រសើរឡើង។
លោក Karl Chan ប្រធានផ្នែកស្រាវជ្រាវលើទីផ្សារអចលនទ្រព្យហុងកុងនៅធនាគារ JPMorgan បានអះអាងថា កន្លងទៅ វិស័យអចលនទ្រព្យហុងកុងបានរងផលប៉ះពាល់យ៉ាងខ្លាំង ខណៈបណ្តាអ្នកអភិវឌ្ឍន៍អចលនទ្រព្យជាច្រើនកំពុងចរចាឡើងវិញនូវលក្ខខណ្ឌនៃការទូទាត់សងបំណុល។
លោកបានបន្តថា ទោះជាយ៉ាងណា ទីផ្សារអចលនទ្រព្យហុងកុងនឹងស្ទុះងើបឡើងវិញ ហើយតម្លៃផ្ទះ និងតម្លៃជួលការិយាល័យ និងហាងលក់រាយនឹងស្ទុះងើបឡើងថ្លៃវិញជាប្រវត្តិសាស្ត្រ។
លោកបានលើកឡើងថា “ប្រសិនបើសេដ្ឋកិច្ចរបស់ប្រទេសចិនទទួលបានភាពរីកចម្រើនខ្លាំងឡើងវិញ នោះខ្ញុំនឹងមិនមានការភ្ញាក់ផ្អើលទេ ប្រសិនបើទីផ្សារអចលនទ្រព្យហុងកុងស្ទុះងើបឡើងថ្លៃដល់កម្រិតកំពូលវិញ”។
ធនាគារកណ្តាលអាមេរិកត្រូវបានគេរំពឹងថា នឹងចាប់ផ្តើមអនុវត្តន៍គោលនយោបាយបន្ធូរបន្ថយអត្រាការប្រាក់ឡើងវិញ តាមរយៈការកាត់បន្ថយអត្រាការប្រាក់ចំនួន០,២៥ភាគរយនៅក្នុងខែកញ្ញានេះ។
ជាមួយគ្នានេះ អាជ្ញាធររូបិយវត្ថុរបស់ទីក្រុងហុងកុងត្រូវបានគេរំពឹងថា នឹងដើរតាមគន្លងរបស់ធនាគារកណ្តាលអាមេរិក(Fed) ដោយអាចជួយបន្ធូរបន្ថយសម្ពាធលើម្ចាស់អចលនទ្រព្យពាណិជ្ជកម្ម និងជំរុញលើកទឹកចិត្តដល់អ្នកទិញផ្ទះ៕ប្រភព: SCMP៕
ដំណឹងល្អៈក្រុមហ៊ុនអាកាសចរណ៍ធំមួយទៀតនឹងភ្ជាប់ជើងហោះហើរត្រង់មកកាន់រាជធានីភ្នំពេញនៅចុងឆ្នាំនេះ
ដោយៈ គង់ សូរិយា
ភ្នំពេញៈ ក្រុមហ៊ុនអាកាសចរណ៍អន្តរជាតិTurkish Airlines នឹងចាប់ផ្តើមហោះហើរត្រង់ និងផ្ទាល់ពីទីក្រុង Istanbul នៃសាធារណរដ្ឋតួកគីយ៉េមកកាន់រាជធានីភ្នំពេញចាប់ពីថ្ងៃទី១០ ខែធ្នូ ឆ្នាំ២០២៥។
ព័ត៌មានដ៏ល្អនេះត្រូវបានលើកឡើង ក្នុងពេលលោក ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោកជំទាវ ÜLKÜ KOCAEFE ឯកអគ្គរដ្ឋទូតនៃសាធារណរដ្ឋតួកគីយ៉េ ដឹកនាំប្រតិភូពីក្រុមហ៊ុនអាកាសចរណ៍តួកគីយ៉េ Turkish Airlines ដែលមានលោក UMIT Develi ជាអនុប្រធាន និងជាតំណាង ព្រមទាំងសហការី ចូលជួបពិភាក្សាការងារ ព្រមទាំងរាយការណ៍ជូនផ្ទាល់ ពីការហោះហើរត្រង់និងផ្ទាល់ជាលើកដំបូងរវាងទីក្រុង Istanbul នៃសាធារណរដ្ឋតួកគីយ៉េមកកាន់អាកាសយានដ្ឋានអន្តរជាតិតេជោ នៃព្រះរាជាណាចក្រកម្ពុជា នៅទីស្តីការក្រសួងទេសចរណ៍។
ក្នុងជំនួបដ៏មានសារៈសំខាន់ និងជាការអនុវត្តកិច្ចសហប្រតិបត្តិការជាក់ស្តែង និងប្រកបដោយផ្លែផ្កា លើការតភា្ជប់ប្រទេសកម្ពុជាទៅកាន់ពិភពលោក លោករដ្ឋមន្រ្តី បានថ្លែងអំណរគុណ កោតសរសើរ និងវាយតម្លៃខ្ពស់ ដល់កិច្ចសហការគាំទ្រដ៏ល្អ និងឥតឈប់ឈររបស់ស្ថានទូតមិត្តតួកគីយ៉េ និងក្រុមហ៊ុន Turkish Airlines ដែលបានមើលឃើញពីសក្តានុពលទេសចរណ៍ដ៏ខ្លាំងក្លា ដែលជាទីផ្សារទើបនឹងរះភ្លឺចែងចាំងក្រោមម្លប់សុខសន្តិភាព និងការជឿជាក់លើការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយ របស់រាជរដ្ឋាភិបាលកម្ពុជា ពិសេស គឺវត្តមានអាកាសយានដ្ឋានអន្តរជាតិតេជោ ដ៏ទំនើប និងទាន់សម័យ ដែលជាសមិទ្ធិផលដ៏ធំធេង របស់រាជរដ្ឋាភិបាលកម្ពុជា។
ក្រុមហ៊ុនអាកាសចរណ៍នេះ បានហោះហើរដល់គោលដៅជាង៣៥០កន្លែង ដល់ប្រទេសចំនួន១៣០ប្រទេស នៅជុំវិញពិភពលោក ៕
ក្រសួងដែនដីរៀបចំផែនការយុទ្ធសាស្ត្រគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា
ដោយៈ គង់ សូរិយា
ភ្នំពេញៈ រដ្ឋលេខាធិការ និងជាប្រធានក្រុមការងារគោលនយោបាយនិងយុទ្ធសាស្ត្រ នៃក្រសួងរៀបចំដែនដី នគរូបនីយកម្ម និងសំណង់ លោករស់ សាលីន បានដឹកនាំកិច្ចប្រជុំពិភាក្សាលើការរៀបចំ “ផែនការយុទ្ធសាស្ត្រគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា(គ.អ.ឆ.ក.)”។
ក្រសួងគ្រោងនឹងរៀបចំសិក្ខាសាលា ពិគ្រោះយោបល់ទូលំទូលាយ ដើម្បីឱ្យឯកសារសេចក្តីព្រាងបានគ្រប់ជ្រុងជ្រោយ និងមានសង្គតិភាព ទៅនឹងអាទិភាពរបស់រាជរដ្ឋាភិបាល ក្នុងការពង្រីកសក្តានុពលតំបន់ឆ្នេរដែលនឹងក្លាយជា ឆ្នេរសមុទ្រនៃកាលានុវត្តភាព ក្នុងការអភិវឌ្ឍឧស្សាហកម្មបៃតង កសិកម្មមានតម្លៃបន្ថែមខ្ពស់ តំបន់ឧស្សាហកម្មហិរញ្ញវត្ថុទំនើប និងបរិវត្តកម្មឌីជីថល ដោយភា្ជប់ទៅនឹងសក្តានុពលទេសចរណ៍នៃឆ្នេរសមុទ្រកម្ពុជា ដែលបានទទួលចំណាត់ថ្នាក់ក្នុងចំណោមឆ្នេរសមុទ្រស្អាតជាងគេនៅលើពិភពលោក៕
វិនិយោគិនពិភាក្សាជាមួយក្រុមមន្រ្តីលើការនាំចេញគ្រឿងបង្គុំ ទៅកាន់អាមេរិក
ដោយៈ ម៉ាណា
ភ្នំពេញៈ ក្រុមមន្រ្តី និងអ្នកវិនិយោគ បានបើកកិច្ចប្រជុំពិភាក្សាការងារពាក់ព័ន្ធ នឹងសកម្មភាពវិនិយោគក្នុងការផ្គុំ និងដំឡើងសម្ភារៈបរិក្ខារផ្សេងៗសម្រាប់នាំចេញ ជាពិសេស ការនាំចេញទៅទីផ្សារសហរដ្ឋអាម៉េរិក។
គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំពិភាក្សាស្តីពី ការវិវត្តថ្មីៗនៃការវិនិយោគក្នុងសកម្មភាពផ្គុំដំឡើងនៃគម្រោងវិនិយោគ មានលក្ខណៈសម្បត្តិគ្រប់គ្រាន់ ក្រោមអធិបតីភាពលោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដោយមានការអញ្ជើញចូលរួម ពីសំណាក់តំណាងក្រសួង-ស្ថាប័នពាក់ព័ន្ធ។
កិច្ចប្រជុំពិភាក្សានេះ មានគោលបំណងប្រមូលធាតុចូល សម្រាប់ជាមូលដ្ឋាន ក្នុងការគិតគូរស្វែងរកដំណោះស្រាយ ចំពោះបញ្ហាប្រឈមមួយចំនួន ដែលវិនិយោគិនក្នុងវិស័យផ្គុំ និងដំឡើងសម្ភារៈបរិក្ខារផ្សេងៗសម្រាប់នាំចេញ ជាពិសេស ការនាំចេញទៅទីផ្សារសហរដ្ឋអាមេរិក កំពុងជួបប្រទះ សំដៅលើកកម្ពស់បរិស្ថានវិនិយោគនៅកម្ពុជា និងដើម្បីធានាភាពប្រកួតប្រជែង ក្នុងការទាក់ទាញវិនិយោគថ្មី និងថែទាំវិនិយោគដែលស្រាប់៕
ក្រសួងសាធារណៈការផ្តោតលើការអភិវឌ្ឍហេដ្ឋារចនាសម្ព័ន្ឋនៅតាមផ្លូវជាតិលេខ៤ និងផ្លូវរថភ្លើង
ដោយៈ ម៉ាណា
ភ្នំពេញៈ ក្រុមការងារបច្ចេកទេសចុះពិនិត្យវឌ្ឍនភាពការងារ នៃគម្រោងវិនិយោគបន្ទាន់លើហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិច នៅភូមិសាស្ត្ររាជធានីភ្នំពេញ តាមបណ្តោយផ្លូវជាតិលេខ៤ និងផ្លូវរថភ្លើង។
ការចុះពិនិត្យនេះដឹកនាំដោយលោក ចៅ សុភៈភិបាល អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ និងជាប្រធានគ្រប់គ្រងគម្រោង និងលោកហ៊ាង វុត្ថា អគ្គនាយក នៃអគ្គនាយកដ្ឋានបច្ចេកទេស និងជាប្រធានក្រុមការងារបច្ចេកទេសគម្រោង បានដឹកនាំក្រុមការងារបច្ចេកទេស ចុះពិនិត្យវឌ្ឍនភាពការងារ នៃគម្រោងវិនិយោគបន្ទាន់លើហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់បញ្ចៀសការជន់លិចនៅភូមិសាស្ត្ររាជធានីភ្នំពេញ (លូតាមបណ្តោយផ្លូវជាតិលេខ៤ និងផ្លូវរថភ្លើង) ដែលអនុវត្តដោយក្រុមហ៊ុនសាងសង់ PHNOM PENH PRECAST PLANTS CO., LTD និង T.C.M. ENGINEERING COMPANY LTD និងមានការចូលរួមពីមន្រ្តីពាក់ព័ន្ឋ។
ការចុះត្រួតពិនិត្យនេះ មានគោលបំណងពិនិត្យពីស្ថានភាពជារួមនៃដំណើរការរបស់ប្រព័ន្ធបង្ហូរទឹក នៅក្រោយពេលដែលមានភ្លៀងខ្លាំងក្នុងរយៈពេលប៉ុន្មានថ្ងៃចុងក្រោយ និងពិនិត្យលើលក្ខណៈបច្ចេកទេស ក៏ដូចជាស្វែងរកចំណុចខ្លាំង និងចំណុចខ្សោយនៃប្រព័ន្ធ ក្នុងការកែសម្រួលបន្ថែម សម្រាប់ប្រសិទ្ធភាពនៃគម្រោង បើទោះបីជាគម្រោងពុំទាន់បានបញ្ចប់១០០% ក៏ដោយ។
ជាមួយគ្នានេះ លោកសហប្រធាន បានប្រគល់ជានិមិត្តរូបនូវសោរសម្រាប់បិទ បើកទ្វារទឹកជាបណ្ដោះអាសន្ន ដល់លោកអភិបាលនៃគណៈអភិបាលខណ្ឌពោធិ៍សែនជ័យ ដើម្បីប្រើប្រាស់គ្រប់គ្រងប្រព័ន្ធបង្ហូរទឹក សម្រាប់បញ្ជៀសរំហូរទឹក ហូរចូលរាជធានីភ្នំពេញជាពិសេសតំបន់ចោមចៅ៕
អនុប្រធានាធិបតីចិនៈចិននៅតែជាមិត្តដែកថែបរបស់កម្ពុជាហើយទំនាក់ទំនងប្រទេសទាំងពីរបន្តរីកចម្រើន
ដោយៈ ចំណាន
ប្រទេសចិនៈ អនុប្រធានាធិបតីចិន លោកHan Zheng អនុប្រធានាធិបតីចិនបានបញ្ជាក់ថា ចិននិងកម្ពុជា ជាមិត្តដែកថែប ហើយចិននឹងបន្តរួមចំណែកដល់ការអភិវឌ្ឍកម្ពុជា។
អនុប្រធានាធិបតីចិនបានថ្លែងបែបនេះ ក្នុងពេល លោកវង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានជួបពិភាក្សាការងារជាមួយលោកនៅតំបន់ក្វាងស៊ី។
ក្នុងជំនួបនោះ អនុប្រធានាធិបតី Han Zheng បានបង្ហាញនូវក្តីរីករាយ និងបានវាយតម្លៃខ្ពស់ជូនចំពោះ ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត ដែលបានដើរតួយ៉ាងសំខាន់ ក្នុងការពង្រឹងចំណងមិត្តភាពចិន-កម្ពុជា ពិសេសតាមរយៈតួនាទីជាអគ្គលេខាធិការនៃគណៈកម្មាធិការ សម្របសម្រួលអន្តររដ្ឋាភិបាលកម្ពុជា-ចិន នាពេលកន្លងមក។
លោកអនុប្រធានាធិបតី ក៏បានលើកឡើងថា ថ្មីៗនេះថ្នាក់ដឹកនាំកំពូលនៃប្រទេសទាំងពីរ បានផ្លាស់ប្តូរដំណើរទស្សនកិច្ចទៅវិញទៅមក និងបានគូសបញ្ជាក់ផងដែរថា ចិន និងកម្ពុជា គឺជាមិត្តដែកថែប ហើយចិនប្តេជ្ញាគាំទ្រ ដល់ការអភិវឌ្ឍប្រទេសកម្ពុជា ព្រមទាំងបន្តពង្រឹងកិច្ចសហប្រតិបត្តិការ លើគ្រប់វិស័យឱ្យកាន់តែស៊ីជម្រៅបន្ថែមទៀត។
ក្នុងការឆ្លើយតប លោកឧបនាយករដ្ឋមន្ត្រីប្រចាំការ វង្សី វិស្សុត បានពាំនាំនូវការផ្តាំផ្ញើ សាកសួរសុខទុក្ខពីសំណាក់ ថ្នាក់ដឹកនាំកម្ពុជា រាជរដ្ឋាភិបាល និងប្រជាជនកម្ពុជា ជូនដល់រដ្ឋាភិបាល និងប្រជាជនចិន ដែលតែងតែគាំទ្រដល់ការពង្រឹងសន្តិភាព និងការអភិវឌ្ឍប្រទេសកម្ពុជា។ ឯកឧត្តមឧបនាយករដ្ឋមន្រ្តី ប្រចាំការបានសម្ដែងនូវការអបអរសាទរក្នុងឱកាស “ខួបលើកទី៨០ នៃជ័យជម្នះក្នុងសង្គ្រាមប្រជាជនចិនប្រឆាំងនឹងការឈ្លានពានរបស់ជប៉ុន និងសង្គ្រាមប្រឆាំងហ្វាស៊ីសពិភពលោក” ដែលបានបង្ហាញអំពីភាពខ្លាំងក្លារបស់ប្រទេសចិន ទាំងផ្នែកសេដ្ឋកិច្ច យោធា និងនយោបាយ។
លោកក៏បានសម្ដែងនូវការអបអរសាទរ ផងដែរចំពោះរដ្ឋាភិបាលចិនដែលបានរៀបចំពិព័រណ៍ចិន-អាស៊ាន ប្រកបដោយជោគជ័យកន្លងមក ហើយ ឯកឧត្តម បានចាត់ទុកពិព័រណ៍ចិន-អាស៊ាន ជាវេទិកាសំខាន់សម្រាប់កិច្ចសហប្រតិបត្តិការកម្ពុជា-ចិន ការធ្វើសមាហរណកម្មសេដ្ឋកិច្ច និងពាណិជ្ជកម្មអាស៊ាន-ចិន ព្រមទាំងកិច្ចសហប្រតិបត្តិការផ្នែកឌីជីថល។
ឧបនាយករដ្ឋមន្រ្តីប្រចាំការ ក៏បានថ្លែងអំណរគុណចំពោះការចូលរួមយ៉ាងសកម្មរបស់មិត្តចិន ក្នុងការសម្របសម្រួលឱ្យមានបទឈប់បាញ់រវាងកម្ពុជា-ថៃ និងការអនុវត្តបទឈប់បាញ់ ព្រមទាំងការផ្តល់នូវជំនួយមនុស្សធម៌ដល់ជនភៀសសឹក។
ក្នុងឱកាសនោះដែរ លោកវង្សី វិស្សុត បានកត់សម្គាល់ផងដែរថា ដំណើរទស្សនកិច្ចផ្លូវរដ្ឋ ប្រកបដោយភាពជោគជ័យ របស់លោក ប្រធានាធិបតី ស៊ី ជីនពីង ទៅកាន់កម្ពុជាកាលពីខែមេសា និងការអញ្ជើញចូលរួមកិច្ចប្រជុំកំពូល Shanghai Cooperation Organization (SCO) Plus Summit របស់សម្ដេចធិបតី ហ៊ុន ម៉ាណែត កាលពីខែសីហាកន្លងទៅនេះ គឺពិតជាបានឆ្លុះបញ្ចាំងនូវការយកចិត្តទុកដាក់ របស់ថ្នាក់ដឹកនាំនៃប្រទេសទាំងពីរ ក្នុងការបន្តពង្រឹងកិច្ចសហប្រតិបត្តិការ និងពង្រឹងបន្ថែមទៀតនូវមិត្តភាពដែកថែបកម្ពុជា-ចិន និងក្របខ័ណ្ឌកិច្ចសហប្រតិបត្តិការត្បូងពេជ្រ។
ទន្ទឹមនេះ ប្រវត្តិសាស្ត្រក៏បានគូសបញ្ជាក់ដែរថា ចិននិងកម្ពុជាមាននិស្ស័យជាមួយគ្នា (Friends by destiny) និងបានចាក់ឫសជ្រៅរាប់សតវត្ស ហើយចំណងមិត្តភាពដ៏មានតម្លៃនេះ ត្រូវបានទទួលស្គាល់ដោយថ្នាក់ដឹកនាំ នៃប្រទេសទាំងពីរជាច្រើនជំនាន់ ចាប់ផ្តើមពី ព្រះករុណាព្រះបាទ សម្ដេចព្រះ នរោត្តម សីហនុ ព្រះបរមរតនកោដ្ឋ និង លោកប្រធាន ម៉ៅ សេទុង និង លោក ជូ អេនឡាយ និងត្រូវបានបន្តពូនជ្រំ ថ្នាក់ថ្នមដោយថ្នាក់ដឹកនាំជំនាន់ក្រោយ រួមមាន៖ សម្តេចតេជោ ហ៊ុន សែន និង សម្តេចធិបតី ហ៊ុន ម៉ាណែត និងឯកឧត្តមប្រធានាធិបតី ស៊ី ជីនពីង។
លោកបញ្ជាក់ថា “ចិនក៏តែងតែបង្ហាញថា ចិនជាមិត្តដែលពឹងពាក់បាន និងទុកចិត្តបាន ហើយនៅក្នុងបរិបទបច្ចុប្បន្ននេះ ក្នុងខណៈដែលពិភពលោក កំពុងរងនូវការបែកខ្ញែកនៃសណ្តាប់ធ្នាប់ កម្ពុជាគឺកាន់តែត្រូវការមិត្តចិន”៕
ក្រុមហ៊ុនRMA Groupរបស់អាមេរិកប្រកាសពីផែនការពង្រីកគំរោងវិនិយោគនៅកម្ពុជា
ដោយៈ ម៉ាណា
ភ្នំពេញៈ ក្រុមហ៊ុនធំមួយរបស់អាមេរិកRMA Groupបានប្រកាសពីផែនការពង្រីកការវិនិយោគនៅកម្ពុជា ស្របពេលសកម្មភាពអាជីវកម្មនៅទីនេះមានភាពរីកចម្រើន។
ព័ត៌មានដ៏ល្អនេះត្រូវបានលើកឡើងនៅព្រឹកថ្ងៃទី១៧ ខែកញ្ញា ឆ្នាំ២០២៥ នៅពេលលោកជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា និងសហការី បានទទួលជួបពិភាក្សាការងារជាមួយលោក Kevin Whitcraft នាយកប្រតិបត្តិក្រុមហ៊ុន RMA Group ដោយមានការចូលរួមពីលោក ងន សាំង អគ្គនាយកក្រុមហ៊ុន RMA (Cambodia) PLC.និងសហការី។
ក្នុងជំនួបនេះ លោក Kevin Whitcraft បានជម្រាបជូនថាគោលបំណងនៃការចូលជួបនាព្រឹកនេះ គឺដើម្បីជម្រាបជូនពីវឌ្ឍនភាពនៃប្រតិបត្តិការអាជីវកម្ម របស់ក្រុមហ៊ុននៅកម្ពុជា និងជម្រាបជូនអំពីគម្រោងពង្រីកការវិនិយោគនៅកម្ពុជា។
ជាការឆ្លើយតប លោកអគ្គលេខាធិការបានវាយតម្លៃខ្ពស់ចំពោះសកម្មភាពអាជីវកម្មរបស់ក្រុមហ៊ុន RMA (Cambodia) PLC. និងបានសម្តែងនូវការស្វាគមន៍ ដោយក្តីរីករាយបំផុត ចំពោះគម្រោងពង្រីកការវិនិយោគនៅកម្ពុជា។
លោកបញ្ជាក់ថា “គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា នឹងរង់ចាំដោយក្តីរីករាយក្រៃលែងបំផុត ក្នុងការផ្តល់កិច្ចសម្រួលដល់ក្រុមហ៊ុន ក្នុងដំណើរការពង្រីកការវិនិយោគរបស់ក្រុមហ៊ុន”៕
