ដោយៈ សុផារី

ភ្នំពេញៈ ប្រទេសកម្ពុជា មានសក្តានុពលលើតំបន់ទេសចរណ៍ធម្មជាតិ វប្បធ៌ម ប្រវត្តិសាស្រ្តពាសពេញផ្ទៃប្រទេស ដែលទីផ្សារដ៏សម្បូរបែបនេះ ក៏ជំរុញឱ្យមានការអភិវឌ្ឍលើទីផ្សារអចលនទ្រព្យដូចគ្នា។

អ្នកជំនាញបានបង្ហើបទីតាំងសក្តានុពល សម្រាប់អ្នកមានដើមទុន និងមានបំណងចង់វិនិយោគដីធ្លី ដើម្បីទទួលបានផលចំណេញខ្ពស់នាពេលអនាគត។

លោក គង់ វិសា អ្នកជំនាញអចលនទ្រព្យមួយរូប បានមានប្រសាសន៍នៅព្រឹកថ្ងៃទី២៥ ខែវិច្ឆិកា ឆ្នាំ២០២២នេះថា តំបន់ដែលមានសក្តានុពលសម្រាប់ការវិនិយោគ លើប្រភេទអចលនទ្រព្យទេសចរណ៍ នៅក្នុងប្រទេសកម្ពុជាមានចំនួនច្រើន ហើយតំបន់នីមួយៗមានសក្តានុពល ក៏ខុសៗគ្នាផងដែរ។

អ្នកជំនាញរូបនេះបញ្ជាក់ថា “សម្រាប់អ្នកដែលមានគម្រោងទិញដីទុកចំណេញនៅក្នុងខេត្តមាត់សមុទ្រ គឺមិនសូវផ្តល់ផលចំណេញខ្ពស់ឡើង”។ លោកបន្តថា “ដីធ្លីនៅក្នុងបណ្ដាខេត្តជាប់មាត់សមុទ្រ គឺមានតម្លៃហើមខ្ពស់ខ្លាំង ដែលមិនអាចផ្តល់ផលចំណេញខ្ពស់ ដល់អ្នកវិនិយោគដីធ្លីនោះទេ ប៉ុន្តែសម្រាប់អ្នកដែលមានគម្រោងវិនិយោគ លើការអភិវឌ្ឍជាប្រភេទអចលនទ្រព្យទេសចរណ៍កែច្នៃនានា នឹងទទួលបានផលល្អប្រសើរ”។

លោកបញ្ជាក់ថា “អ្នកដែលទិញដីធ្លីជាប់មាត់សមុទ្រ ភាគច្រើនជាអ្នកមានគម្រោងអភិវឌ្ឍន៍ជាតំបន់ទេសចរណ៍ ជារីសត សណ្ឋាគារ ឬគម្រោងធំៗ។ តែបើទិញ រំពឹងទុកចំណេញគឺយឺតណាស់”។

យោងតាមអ្នកជំនាញរូបនេះ លោកសម្លឹងមើលសក្តានុពលនៃខេត្តភាគខាងជើង និងខាងកើត នៃប្រទេសកម្ពុជា ដើម្បីវិនិយោគលើវិស័យដីធ្លីអចលនទ្រព្យប្រភេទនេះ។ សម្រាប់អ្នកវិនិយោគដែលមានទុនច្រើន អ្នកជំនាញរូបនេះបានណែនាំថា ខេត្តមាត់សមុទ្រ ចំនួនបី រួមមាន ខេត្តកោះកុង ខេត្តកំពត និងខេត្តកែប គួរត្រូវបានសម្លឹងមើល និងពិចារណាសម្រាប់ការវិនិយោគបាន។

យ៉ាងណាក្តី សម្រាប់អ្នកមានដើមទុនមធ្យម អ្នកវិនិយោគអាច សម្លឹងមើលលើខេត្តសៀមរាប បាត់ដំបង មណ្ឌលគីរី រតនគីរី ដោយតំបន់ទាំងនេះជាតំបន់ ដែលមានដីធ្លីនៅធំទូលាយល្អ និងមានតម្លៃសមរម្យនៅឡើយ។ ជាពិសេសតំបន់ទាំងនេះមានសក្តានុពលទេសចរណ៍ធម្មជាតិជាជម្រើសច្រើនទៀតផង។

លោកបន្តថា “នៅក្នុងខេត្តភាគខាងជើង និងខាងកើតក៏ផ្តោតលើទេសចរណ៍ដូចគ្នា។ នៅថ្ងៃអនាគតប្រទេសកម្ពុជាយើង វិស័យទេសចរណ៍នឹងរីកចម្រើនខ្លាំង។ ដីធ្លីនៅក្នុងតំបន់ខាងលើ មានឱកាសច្រើនក្នុងការទិញយកចំណេញ”។

ជាមួយគ្នានេះ លោក មាឃ រិទ្ធីជ័យ ប្រធានសាខាក្រុមហ៊ុន Century 21 Zillion Holding ប្រចាំខេត្តមណ្ឌលគិរី បានមានប្រសាសន៍ប្រាប់ Property Area Asia ថា ដីធ្លីនៅក្នុងខេត្តភាគខាងកើតនៃប្រទេសជាឱកាសវិនិយោគថ្មីមួយ ហើយនឹងផ្តល់នូវផលចំណេញខ្ពស់ សម្រាប់គម្រោងអចលនទ្រព្យទេសចរណ៍។

លោនបន្តថា “ដីធ្លីនៅក្នុងខេត្តមណ្ឌលគិរី មានតម្លៃសមរម្យច្រើនណាស់ បើប្រៀបធៀបនឹងខេត្តផ្សេងទៀត ជាពិសេសមានទំហំធំៗ ស័ក្តិសមសម្រាប់ការអភិវឌ្ឍប្រភេទរីសត បាំងកាឡូ ផ្ទះសំណាក់ជាដើម ហើយខេត្តទាំងនោះមានសក្តានុពលពីធម្មជាតិស្រាប់ មានភ្នំ មានទឹក និងទេសភាពស្រស់ស្អាតណាស់”៕

ដោយៈ ជេស៊ីកា

       ភ្នំពេញៈ ការវិនិយោគលើដីធ្លី ជាការវិនិយោគដ៏ល្អមួយ ដែលមានផលចំណេញច្រើន ប៉ុន្តែអ្នកក៏អាចជាប់គាំងលក់មិនចេញផងដែរ ប្រសិនជាការ​ចំណាយលុយរបស់អ្នកធ្វើឡើងមិនច្បាស់លាស់ និងមិនទទួលបានព៌តមានគ្រប់ជ្រុងជ្រោយ។

សហស្ថាបនិក និងជាអគ្គនាយកគេហទំព័រPropertyarea.asia លោកយិន លាងគង់ ដែលបានវិនិយោគលើដីធ្លីមួយចំនួនទទួលបានទាំងជោគជ័យ និងបរាជ័យ ពិសេសបានតាមដានដំណើរវិវត្តន៍ និងផ្សព្វផ្សាយព៌តមានក្នុងវិស័យនេះ ជាប្រចាំបានលើកឡើងនូវមូលដ្ឋានគ្រឹះ មួយចំនួន សម្រាប់ជាចំណេះដឹង និងជាការពិចារណា។

ទិញដីនៅតំបន់មានមនុស្សរស់នៅច្រើន

       សកម្មភាពសេដ្ឋកិច្ច ពាណិជ្ជកម្មតែងតែធ្វើឡើងជាមួយសហគមន៍ ដែលមានមនុស្សរស់នៅច្រើន ព្រោះគ្មានដីនៅទីណាឡើងថ្លៃនៅតំបន់ ដែ​លគ្មានមនុស្សរស់នៅនោះទេ។ ចំណុចពិសេសមួយ គឺអ្នកជំនាញនានាតែងតែលើកឡើងថា ការទិញដីនៅជាយក្រុងភ្នំពេញ ជាការវិនិយោគល្អ ព្រោះទោះ​មានវិបត្តិសេដ្ឋកិច្ច ក៏ដីនៅជាយក្រុងមិនងាយជាប់គាំងនោះដែរ។

តាមធម្មតាដីនៅតំបន់មនុស្សរស់នៅច្រើន តែងតែមានតម្លៃខ្ពស់ ប៉ុន្តែអ្នកអាចជ្រើសរើសរកចំណុចយូនីកណាមួយ ដែលអ្នកអាចរើសបាន ដូចជាដីបឹងតូចៗ ដែលគេមិនសូវចាប់អារម្មណ៍ ដីសហគមន៍មូលដ្ឋាន ដែលគេមិនសូវចាប់ពអារម្មណ៍ អាចមានតម្លៃល្អ និងមានឱកាសចំណេញខ្ពស់ បន្ទាប់ពីអ្នកចាក់ដីបំពេញ ឬបំពេញនិតិវិធីច្បាប់ចប់សព្វគ្រប់។

ផែនការអភិវឌ្ឍន៍របស់រដ្ឋាភិបាលនិងចំណុចគួរពិចារណា

       រដ្ឋាភិបាល តែងតែដាក់ចេញគោលនយោបាយ និងផែនការអភិវឌ្ឈន៍ថ្មីៗរៀងរាល់៣ ទៅ៥ឆ្នាំ និង១០ឆ្នាំម្តង។

រដ្ឋាភិបាល បានដាក់ចេញគោលនយោបាយរបស់ខ្លួន ដើម្បីលើកពីផែន​ការអភិវឌ្ឍន៍របស់ខ្លួន។

នាពេលថ្មីៗនេះ នៅពេលគោលនយោបាយផ្លាស់ប្តូរ បានធ្វើឲ្យអ្នកវិនិយោគអចលនទ្រព្យជួបបញ្ហាប្រឈមជាច្រើន ដូចជា ក្រុងព្រះសីហនុ មានអាគារប្រមាណ១២០០បានជាប់គាំង ដែលធ្វើឲ្យអ្នកវិនិយោគជាច្រើនបានរងគ្រោះ ប៉ុន្តែក៏មានអ្នកវិនិយោគជាច្រើនបានទទួលផលច្រើនផងដែរ។

ជាមួយគ្នានេះ ការសាងសង់ព្រមានយន្តហោះ ខេត្តមណ្ឌលគិរីក៏បានជាប់គាំងផងដែរ ដែលធ្វើឲ្យចរន្តទិញ លក់ ដីធ្លីមានការធ្លាក់ចុះ និងតម្លៃស្ថិតក្នុងសភាពទ្រឹង ហេតុនេះការបោះទុនវិនិយោគ ក្នុងស្ថានភាពបែបនេះ នឹងធ្វើឲ្យលុយរបស់អ្នកគាំងមិនដំណើរការផងដែរ។

ដើម្បីវិភាគទៅលើចំណុចនេះ និងសិក្សាពីបញ្ហានេះ លោក អ្នកគួរសិក្សាលើកត្តាគោលមួយចំនួន ដូចជា ទី១ វិបត្តិសេដ្ឋកិច្ចពិភពលោកតែងតែកើតមានរៀងរាល់១០ឆ្នាំ ឬ១២ឆ្នាំម្តង ហេតុនេះអ្នកគួរសិក្សាពីវដ្តរបស់វា ដើម្បីត្រៀមបង្ការ និងបង្អង់ល្បឿនវិនិយោគរបស់អ្នក នៅពេលឆ្នាំជិតដល់វដ្តនៃវិបត្តិមកដល់ ទី២ នៅពេលស្ថានភាពអលនទ្រព្យ ពុះកញ្រ្ជោលខ្លាំងដូចនៅក្រុងព្រះសីហនុ អ្នកអាចចាប់យកឱកាសភ្លាមៗ ជាជាងធ្វើក្រោយគេ ព្រោះឱកាសបែបនេះ មានមិនយូរនោះឡើយ ប្រសិនបើអ្វីៗវាមានសភាពដូចពពុះសាប៊ូ ហើយករណីនេះបានកើតមាននៅប្រទេសចិន និងក្រុងព្រះសីហនុ ប្រទេសថៃ និងប្រទេសមួយចំនួនទៀតរួចហើយ។

តាមដានព៌តមានពីដំណើរវិវត្តន៍នៃសេដ្ឋកិច្ចប្រទេសធំៗ

       មិនថាប្រទេសកម្ពុជា ឬប្រទេសដទៃទៀតនោះទេ នៅពេលមានបញ្ហាសេដ្ឋកិច្ចកើតមាន នៅតាមបណ្តាប្រទេសធំៗ និងបញ្ហាសង្រ្គាមដូចជា     សង្រ្គា​មរុស្ស៊ី អ៊ុយក្រែន គឺបញ្ហាបានកើតមានពាសពេញពិភពលោក ដោយ​សារការឡើងថ្លៃទំនិញ ឬអតិផរណា។

ការកើតមានកលយុគនានា បញ្ហាសេដ្ឋកិច្ចប្រទេសមហាអំណាចដូចជា សហរដ្ឋអាមេរិក មហាយក្សចិន ប្រទេសជប៉ុន និងសហគមន៍អឺរ៉ុបជាដើម សុទ្ឋតែមានផលប៉ះទង្គិច ដល់ការវិនិយោគលើវិស័យនានា ពិសេសវិស័យអចលនទ្រព្យកម្ពុជា ដែលនៅមានភាពក្មេងខ្ចីនៅឡើយ។

អ្នកជោគជ័យ តែងតែតាមដានព៌តមានជាប្រចាំ ព្រោះមិនមែនអ្វីៗស្ថិតនៅក្នុងដៃរបស់អ្នកទាំងអស់ ដូចបុគ្គលមួយចំនួនលើកឡើង ដោយគ្មានមូលដ្ឋានពិចារណាឡើយ។

ផែនការអភិវឌ្ឍន៍ហេដ្ឋារចនាសម្ព័ន្ឋរបស់រដ្ឋាភិបាល

       នៅកម្ពុជា តម្លៃដីធ្លីតែងតែហក់ឡើង នៅពេលរដ្ឋាភិបាលបង្ហើបពីប្រ​កាសពីការសាងសង់ស្ពាន សាងសង់ផ្លូវ សាងសង់ព្រលានយន្តហោះជាដើម។

ការទទួលបានព៌តមានថ្មីៗ មានភាពជាក់លាក់ អាចទុកចិត្តបាន និងឈរលើ ក្រមសីលធ៌មវិជ្ជាជីវៈដូចជា គេហទំព័រPropertyarea.asia, Cambodiafinancialtimes.com សុទ្ឋតែអាចជាមូលដ្ឋានគ្រឹះ និងត្រី​វិស័យចង្អុលបង្ហាញផ្លូវ ដែលលោកអ្នកអាចជឿជាក់ និងទុកចិត្តបាន ព្រោះការបំប៉ោងព៌តមាន នឹងធ្វើឲ្យបាត់បង់គុណតម្លៃរបស់យើង និងជាការ​សម្លាប់ស្ថាប័នរបស់ខ្លួន។

ហេតុនេះព៌តមាន មានសារៈសំខាន់ណាស់ ទាំងក្នុងអាជីវកម្ម ការវិនិ​យោគ និងក្នុងដំណើរជីវិតប្រចាំថ្ងៃរបស់ខ្លួន។

សិក្សានៅតំបន់ប៉ូលអភិវឌ្ឍន៍របស់រដ្ឋាភិបាល

       រាជរដ្ឋាភិបាលបានចាត់ទុករាជធានី ខេត្តចំនួន៤ ជាប៉ូលសេដ្ឋកិច្ចរបស់ខ្លូន គឺរាជធានីភ្នំពេញ ក្រុងព្រះសីហនុ ខេត្តសៀមរាប និងតំបន់ស្ថិតនៅភូមិភាគឥសាន្ត គឺខេត្តមណ្ឌលគិរី ដែលផែនការអភិវឌ្ឍន៍រយៈពេលវែង សម្រាប់វិស័យទេសចរណ៍ តំបន់ឧស្សាហកម្ម និងហេដ្ឋារចនាសម្ព័ន្ឋត្រូវបានគិតគូរ និងរៀបចំជាបណ្តើរៗផងដែរ។

ប៉ុន្តែខេត្តដែលនឹងទទួលបានផលប្រយោជន៍ ពីគោលនយោបាយ នៃការអភិវឌ្ឍន៍សេដ្ឋកិច្ចរបស់រដ្ឋាភិបាល ក៏កំពុងលេចឡើងផងដែរ ដូចជា ក្រុងប៉ោយប៉ែត ខេត្តបន្ទាយមានជ័យ។ ខេត្តកំពត ខេត្តស្វាយរៀង គឺក្រុងបាវិត ដែលផ្លូវល្បឿនលឿននឹងសាងសង់ ដើម្បីតភ្ជាប់នឹងរាជធានី និងទីក្រុងធំមួយរបស់វៀតណាម។

ក្រុងបាវិត ខេត្តស្វាយរៀង ត្រូវបានដាក់បញ្ចូល ក្នុងគោលនយោបាយអភិវឌ្ឈន៍វិស័យឧស្សាហកម្មឆ្នាំ២០១៥ ឆ្នាំ២០២៥ ដើម្បីរៀបចំទីក្រុងនេះជាតំបន់ឧស្សាហកម្មកម្រិតខ្ពស់ ហើយទីក្រុងនេះស្ថិតនៅក្នុងគោលនយោ​បាយអភិវឌ្ឍន៍ត្បូង ត្បូងរបស់អាស៊ានផងដែរ។

លើសពីនេះ ខេត្តកណ្តាល កំពង់ស្ពឺ ក៏បាននិងកំពុងទទួលឥទ្ឋិពល​និងផលប្រយោជន៍ចេញពីរាជធានីភ្នំពេញ និងគំរោងហេដ្ឋារចនាសម្ព័ន្ឋធំៗ​របស់រាជរដ្ឋាភិបាលផងដែរ។

ទិញដីតម្លៃទាប ងាយស្រួលលក់ឬរកអតិថិជន

       តាមធម្មតាដីមានតម្លៃទាប មានទំហំទឹកប្រាក់តិច ជាការវិនិយោគល្អមួយ ព្រោះបើតាមការអង្កេត អ្នកវិនិយោគប្រមាណ៩០ភាគរយ វិនិយោគមិនលើសពី១០ ទៅ២០ម៉ឺនដុល្លារអាមេរិកនោះឡើយ ហេតុនេះបើសិនជាអ្នកទិញដីតម្លៃត្រឹម១០០ដុល្លារ ក្នុងមួយម៉ែត្រការ៉េចុះក្រោម អ្នកនឹងមានអតិថិជនក្នុងដៃច្រើន ប៉ុន្តែបើដីរបស់អ្នកមានតម្លៃលើសពីនេះ អតិថិជនរបស់អ្នកមិនមានច្រើននៅក្នុងទីផ្សារឡើយ។

វាប្រៀបដូចជាត្រីនៅក្នុងបឹង គឺភាគច្រើនជាត្រីតូចៗ ដែលអ្នកមានឱកាសចាប់បានច្រើនជាងត្រីធំៗ ប៉ុន្តែការនិយាយបែបនេះ មិនមែនមានន័យថា ដីតម្លៃខ្ពស់មិនមានទីផ្សារឡើយ ប៉ុន្តែទីផ្សាររបស់អ្នកស្ថិតនៅក្នុងដៃឬអតិថិជន ដែលមានលទ្ឋភាពទិញដីរបស់អ្នក មានចំនួនតិចជាងដី ដែលមានតម្លៃចន្លោះ១០ទៅ២០ ទៅ៣០ ទៅ៥០ដុល្លារ និងទៅ១០០ដុល្លារក្នុងមួយម៉ែត្រការ៉េ៕

 ដោយៈ គង់ សូរិយា

       ភ្នំពេញៈ លោកទេសរដ្ឋមន្រ្តីស៊ុន ចាន់ថុល ​រដ្ឋមន្រ្តី​ក្រសួង​សាធារណការ​ និង​ដឹក​ជញ្ជូនបានបង្ហើបឲ្យដឹងថា​ ផ្លូវ​វាងក្រុងមួយខ្សែ​នៅខាងជើង​​ក្រុងសៀមរាប ​នឹង​សាង់សង់​កាត់​តំបន់​អភិវឌ្ឍ​រុន​តាឯក និង​ពាក់ស្នែង។

ថ្លែង​នៅ​​ក្នុង​សន្និសីទ​វឌ្ឍនភាព​រយៈពេល៥ ឆ្នាំ​របស់​ក្រសួង​សាធា​រណការ​និង​ដឹក​ជញ្ជូន លោក ស៊ុន ចាន់ថុលកាលពីពេលថ្មីៗនេះបាន​បង្ហើបពី​គម្រោង​សាងសង់​ផ្លូវ​ក្រវាត់​ក្រុង​សៀមរាប នឹងស្ថាបនាឆ្លងកាត់តំបន់​អភិវឌ្ឍ​​រុន​តាឯក និង​ពាក់ស្នែង ដែល​រដ្ឋាភិបាល​ទើបរៀបចំ​ជា​តំបន់​អភិវឌ្ឍសម្រាប់​ពលរដ្ឋ ​ដែលបាន​ផ្លាស់ទីចេញ​ពី​តំបន់​រមណីយដ្ឋាន​អង្គរ។

លោកបាន​បញ្ជាក់ថា ផ្លូវ​វាង​ខាង​ជើង​ក្រុង​សៀមរាប ដែលនឹង​ស្ថាបនា​កាត់​តំបន់​រុន​តាឯក និង​ពាក់ស្នែង បាន​សិក្សា​ចប់​សព្វ​គ្រប់ ដោយ​ប្រើប្រាស់​ថវិកា​ពី​ធនាគារ​អភិវឌ្ឍ​អាស៊ី ADB។

​លោក ស៊ុន ចាន់ថុលបានឲ្យដឹងទៀតថា ក្រៅ​ពី​ផ្លូវ​វាង​ខាងជើង រដ្ឋាភិបាល ក៏​​បាន​គិតគូរ​​សាងសង់​ផ្លូវ​វាង​ក្រុង​សៀមរាប ​មួយ​ខ្សែ​ទៀត​នៅ​ខាង​ត្បូង​ត​ភ្ជាប់​ពី​ផ្លូវ​ជាតិ​លេខ៦៤ ទៅ​កាន់ស្រុកពួក ​ដោយ​ប្រើប្រាស់​ថវិកា​កម្ចី​មកពី​ ACDF របស់​កូរ៉េ។

លោក​រដ្ឋមន្រ្តី​បាន​បង្ហាញ​ពី​មោទនភាព ​ក្រោយ​គម្រោង​ហេដ្ឋារចនាសម្ព័ន្ធ​នានា​ជាពិសេស​ផ្លូវ​៣៨ ខ្សែ​បាន​បញ្ចប់​សម្ពោធ​ដាក់​ដំណើរការ​ដែល​បាន​ផ្លាស់ប្តូរ​មុខមាត់​ខេត្ត​សៀមរាប ​មានផ្លូវស្អាតសម្រាប់ទទួលភ្ញៀវទេស​ចរណ៍ជាតិ និងបរទេសឃើញពីភាពទាក់ទាញ និងប្លែកភ្នែកនៃទីក្រុង​ទេស​ចរណ៍​ដ៏​សំខាន់មួយនេះ៕

ដោយៈ សុផារី

ភ្នំពេញៈ ក្រវាត់ក្រុងទី៣ជាផ្លូវយុទ្ធសាស្រ្ដដ៏សំខាន់មួយ សម្រួលការដឹកទំនិញ និងតភ្ជាប់ទៅកាន់ផ្លូវជាតិសំខាន់ៗជាច្រើនខ្សែ ដែលជាផ្នែកមួយ​នៃការលើកកំពស់សេដ្ឋកិច្ច សង្គម។

បច្ចុប្បន្នកំណាត់ផ្លូវក្រវ៉ាត់ក្រុងទី៣ ដែលកំពុងសាងសង់កំពុងបន្តដំណើរការល្អប្រសើរ ខណៈមកទល់ពេលនេះរដ្ឋាភិបាលកម្ពុជា កំពុងដោះស្រាយផលប៉ះពាល់ផ្នែលខាងចុងផ្លូវ ដើម្បីធ្វើយ៉ាងណាឱ្យសាងសង់បានពេញមួយរង្វង់ជុំពេញលេញ។

លោកគង់ វិមាន អនុរដ្ឋលេខាធិការ និងជានាយកខុទ្ទកាល័យ នៃក្រសួងសាធារណការ និងដឹកជញ្ជូន បានមានប្រសាសន៍ប្រាប់ Property Area Asia តាមប្រព័ន្ធទូរស័ព្ទនៅថ្ងៃទី២៤ ខែវិច្ឆិកាថា រហូតមកទល់នឹងពេលនេះ ផ្លូវក្រវាត់ក្រុងទី៣ សម្រេចបានវឌ្ឍនភាពការសាងសង់បានចំនួនជាង៦០ភាគរយហើយ ហើយក្រុមការងារកំពុងដោះស្រាយផលប៉ះពាល់ ដែលកើតមាននៅផ្នែកខាងចុងផ្លូវ។

លោកបន្តថា ដោយសារនៅក្នុងរដូវវស្សា មានការលំបាកក្នុងការសាងសង់ផ្លូវ ជាហេតុឱ្យដំណើរការសាងសង់នាពេលកន្លងមក មានការផ្អាកមួយរយៈ ប៉ុន្តែចាប់តាំងពីខែវិច្ឆិកា ឆ្នាំ២០២២នេះ ក្រុមការងារកំពុងតែចាប់ផ្តើមដំណើរការបន្តទៀតហើយ។

លោកគង់ វិមានបានបញ្ជាក់ថា ការសាងសង់ផ្លូវក្រវាត់ក្រុងទី៣ធ្វើឡើងជាដំណាក់ៗ ដោយដំណាក់កាលនីមួយៗ ត្រូវបានអនុវត្តទៅតាមផែនការមេជាក់លាក់ របស់ក្រសួងសាធារណការ និងដឹកជញ្ជូន ដែលមានស្រាប់ និងត្រូវបានដាក់ចេញ។

លោកថា “ការអនុវត្តគម្រោងមានដំណាក់កាលមានជំហានៗ អាស្រ័​យ​លើថវិកាដែលមាន”។

លោកបញ្ជាក់ថា “ចាប់ពីខែ១១នេះតទៅ ក្រុមការងារចាប់ផ្តើមសាងសង់បន្តហើយ។ យើងនៅរង់ចាំយូរនៅត្រង់ចុងទីបន្តិច ព្រោះពាក់ព័ន្ធនឹងការដោះស្រាយផលប៉ះពាល់។ យើងដឹងហើយថា (ការដោះស្រាយផលប៉ះពាល់) នៅក្នុងក្រុង មិនមែនមានភាពងាយស្រួល ដូចនៅជនបទនោះទេ។ ប៉ុន្តែនេះមិនមែនជាបញ្ហានោះទេ ព្រោះគម្រោងដំណើរការទៅមុខហើយ”។

ផ្លូវក្រវាត់ក្រុងខ្សែទី៣ មានប្រវែងសរុប៥៣គីឡូម៉ែត្រ តភ្ជាប់ពីផ្លូវជាតិលេខ៦ លេខ៥ លេខ៤ លេខ៣ លេខ២ រហូតដល់ផ្លូវជាតិលេខ១ កាត់ភូមិសាស្រ្តរាជធានីភ្នំពេញ និងខេត្តកណ្តាល ដោយប្រើប្រាស់ថវិកាលើការសាងសង់ ក្នុងទំហំទឹកប្រាក់ប្រមាណ២៦៨លានដុល្លារអាមេរិក៕