ដោយ៖ វឌ្ឍនៈ

ភ្នំពេញ ៖ ក្នុងបរិបទបច្ចេកវិទ្យាកំពុងមានការរីកចម្រើនជាលំដាប់ ការប្រើប្រាស់បច្ចកវិទ្យាឌីជីថលនៅក្នុងអាជីវកម្មកាន់តែមានកំណើនឡើងគួរឱ្យកត់សម្គាល់។ ជាក់ស្ដែង នៅក្នុងវិស័យអចលនទ្រព្យ  ប្រតិបត្តិករជាច្រើនបាន និងកំពុងប្រើប្រាស់បច្ចកវិទ្យាឌីជីថល នៅក្នុងអាជីវកម្ម ដើម្បីបង្កើននូវទំហំ នៃការទិញលក់អចលនទ្រព្យកាន់តែមានសន្ទុះកំណើន។

លោក សុង ហេង នាយកប្រតិបត្តិក្រុមហ៊ុន Z1 Flexible Solution បានមានប្រសាសន៍ឱ្យដឹងថាការប្រើប្រាស់បច្ចេកវិទ្យាឌីជីថល នៅក្នុងវិស័យអចលនទ្រព្យនេះ នឹងជួយដល់ភ្នាក់ងារអចលនទ្រព្យឱ្យមានពេលវេលាគ្រប់គ្រាន់ ឬអាចមានពេលវេលា ក្នុងការធ្វើអ្វីបានផ្សេងទៀត ដូច្នេះវាជួយច្រើនណាស់ទៅដល់ភ្នាក់ងាររបស់យើង។

លោកបន្តថា តាមរយៈរបាយការណ៍ ដែលបង្ហាញដោយក្រសួងប្រៃសណីយ៍ និងទូរគមនាគមន៍កម្ពុជា បានឱ្យដឹងថា កំណើននៃអ្នកប្រើប្រាស់ទូរសព្ទដៃចល័ត និងអ្នកប្រើប្រាស់អ៊ីនធើណេត នៅក្នុងប្រទេសកម្ពុជា បានកើនឡើងជាបន្តបន្ទាប់។ ដូច្នេះ យើងរំពឹងថាការដាក់បញ្ចូលប្រព័ន្ធបច្ចេកវិទ្យាឌីជីថល ទៅក្នុងអាជីវកម្មវិស័យអចលនទ្រព្យ នឹងមានអ្នកប្រើប្រាស់កាន់តែច្រើន ហើយក្នុងនាមជាក្រុមហ៊ុនប្រតិបត្តិករក្នុងវិស័យអចលនទ្រព្យ យើងនឹងជំរុញឱ្យភ្នាក់ងារអចលនទ្រព្យក្នុងគ្រុប Century 21 យល់ដឹងនឹងប្រើប្រាស់បច្ចេកវិទ្យាឌីជីថលកាន់តែច្រើន។

អ្នកស្រី ហ្គ្រេស រចនី អគ្គនាយិកាក្រុមហ៊ុនអចលនទ្រព្យ Century 21 Cambodia ក៏បានលើកឡើងផងដែរថា បច្ចេកវិទ្យាឌីជីថលនឹងអាចជួយភ្នាក់ងារពន្លឿន នូវការបិទការទិញលក់អចលនទ្រព្យ ថែមទាំងជួយសម្រួលការទិញលក់អចលនទ្រព្យបានលឿនផងដែរ។

អ្នកស្រីបន្តថា “បណ្ដាប្រទេសជាច្រើននៅលើពិភពលោក បានប្រើប្រាស់ប្រព័ន្ធតិចណូឡូជីច្រើនណាស់ ហើយគេក៏បានផលច្រើន ពីការប្រើប្រាស់នៃប្រព័ន្ធតិចណូឡូជីនេះដែរ។ សម្រាប់កម្ពុជាក៏គួរតែជំរុញឱ្យប្រព័ន្ធបច្ចេកវិទ្យានេះ ក្នុងវិស័យអចលនទ្រព្យ កាន់តែទំនើប និងមានការប្រើប្រាសទូលំទូលាយផងដែរ ដែលនឹងអាចជំរុញឱ្យមានការធ្វើប្រតិបត្តិការទិញលក់បានច្រើនជាងមុន”៕

ដោយ៖ សុផារី

ភ្នំពេញ៖ ខុនដូថែល ជានិន្នាការថ្មីមួយ ដែលមិនសូវជាពេញនិយមច្រើនឡើយនៅក្នុងប្រទេសកម្ពុជា ប៉ុន្តែវាមិនមែនជាពាក្យថ្មីឡើយសម្រាប់ទីផ្សារអចលនទ្រព្យសកល។ អ្នកជំនាញលើកឡើងថា ការកែច្នៃខុនដូចេញជាអូតែល ជាជម្រើសវិនិយោគដ៏ឆ្លាតវៃមួយថ្មី ព្រោះវាបានផ្តល់នូវភាពងាយស្រួលនិងចំណាយទុនវិនិយោគតិចជាងមុន។

លោក ខន គង្គា អគ្គនាយកក្រុមហ៊ុនអចលនទ្រព្យ ERA បានប្រាប់គេហទំព័រ Propertyarea.asia កាលពីពេលថ្មីៗនេះថា ខុនដូតែលមិនមែនជារឿងថ្មីឡើយនៅក្នុងទីផ្សារ ប៉ុន្តែវាជារឿងថ្មីសម្រាប់បរិបទប្រទេសកម្ពុជា។ ខុនដូតែល គឺជាការប្រើប្រាស់អាគារខុនដូ ធ្វើជាអូតែល សម្រាប់ការស្នាក់នៅភ្ញៀវក្នុងរយៈពេលខ្លី ឬមធ្យម។

លោកមានប្រសាសន៍ថា ខុនដូតែលចាប់ផ្តើមក្លាយជាការពេញនិយម ដោយសារហេតុផលសំខាន់ៗមួយចំនួន។ ទី១ គឺអ្នកវិនិយោគមិនចាំបាច់ទិញដីដើម្បីធ្វើការសាងសង់នោះទេ ដោយអ្នកវិនិយោគគ្រាន់តែកាន់កាប់អាគារខុនដូ១ឬ២ជាន់មានចំនួន៥០យូនីតក៏អាចប្រែក្លាយជាអាគារសណ្ឋាគារសម្រាប់ស្នាក់នៅបាន។

លោកបន្តថា ហេតុផលទី២ គឺ អ្នកវិនិយោគមិនចាំបាច់ត្រូវចំណាយលើតម្លៃនៃសេវាកម្មមួយចំនួន (Operation cost) ដូចជាការធ្វើប្រតិបត្តិការសណ្ឋាគារបច្ចុប្បន្ននោះទេ។ លោកបានបញ្ជាក់ថា នៅក្នុងការបើកអូតែលធម្មតា ឬ Traditional Hotel មានថ្លៃចំណាយលើ Operation Cost ជាច្រើន ដូចជា បុគ្គលិកផ្នែកសំអាត ផ្នែកប្រតិបត្តិការ ផ្នែកអាហារ ផ្នែកទទួលភ្ញៀវ ។ល។ ខណៈការបើកដំណើរការខុនដូតែលមានManagement fee រួចរាល់ហើយ មានឧបករណ៍ផ្តល់ភាពងាយស្រួលមួយចំនួនស្រាប់ទៅហើយ ដូចជា អាងហែលទឹក ជាដើម។

លោកថា “ដូច្នេះអ្វីដែលអ្នកវិនិយោគត្រូវការកឺការគ្រប់គ្រងអតិថិជនតែប៉ុណ្ណោះ។ យើងចំណេញលើកម្លាំងពលកម្ម និងប្រតិបត្តិការបានច្រើន”។

ចំណុចទី៣ នោះគឺ ការផ្តល់នូវតម្លៃល្អមួយ។ លោកលើកឧទាហរណ៍ប្រៀបធៀបជាក់ស្តែងថា ប្រសិនបើវិនិយោគិនចំណាយ១០ម៉ឺនដុល្លារសម្រាប់ការសាងសង់អូតែលធម្មតា នោះ៥០យូនីត វិនិយោគិនត្រូវចំណាយ៥លានដុល្លារអាមេរិក បូកផ្សំនឹងតម្លៃដីធ្លី និងតម្លៃសេវាកម្មដែលត្រូវជួលកម្លាំងពលកម្មទៀតនោះ នឹងចំណាយមិនតិចជាង២០ទៅ៣០លានដុល្លារអាមេរិកនោះទេ។ ផ្ទុយទៅវិញ ប្រសិនបើយើងចំណាយទិញខុនដូ ហើយកែច្នែជាខុនដូថែល នោះអ្នកវិនិយោគមិនចាំបាច់ត្រូវបារម្ភ និងឈឺក្បាលឡើយ។

ទោះបីជានិន្នាការនេះមិនទាន់មានការពេញនិយមខ្លាំងនាពេលបច្ចុប្បន្នក្តី អ្នកជំនាញខុនដូរូបនេះ ជឿជាក់ថា ប្រសិនបើវិនិយោគិនដែលមានភាពវៃឆ្លាត ពេលនេះជាឱកាសល្អបំផុតសម្រាប់ការវិនិយោគលើនិន្នាការថ្មីមួយនេះ៕

ដោយ៖ វឌ្ឍនៈ

ភ្នំពេញ ៖ ទោះស្ថានភាពអចលនទ្រព្យក្នុងឆ្នាំ២០២២នេះមានភាពថមថយទាំងការវិនិយោគ និងការទិញលក់អចលនទ្រព្យ ប៉ុន្តែការដោះដូរទិញលក់ និងផ្ទេរកម្មសិទ្ធិអចលនទ្រព្យ ក្នុងមួយខែយ៉ោងហោចណាស់ក៏មានប្រមាណពី៨០០ករណី ទៅ១០០០ករណីដែរ។

នេះបើតាមការបញ្ជាក់របស់លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នៅថ្ងៃទី០៤ ខែវិច្ឆិកា ឆ្នាំ២០២២នេះ។

លោកបានបញ្ជាក់ថា តាមទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ ការដោះដូរអចលនទ្រព្យក្នុងមួយខែ មានចន្លោះពី៨០០ ទៅ១០០០ករណី។ ចំណែក ទំហំសាច់ប្រាក់នៃការដោះដូរអចលនទ្រព្យក៏មានការប្រែប្រួល ទៅតាមតម្លៃអចលនទ្រព្យ ដែលបានដោះដូរ ក្នុងមួយខែៗនេះដែរ។

លោកបន្តថា ការដោះដូរអចលនទ្រព្យ នៅក្នុងប្រទេសកម្ពុជា បានបែងចែកជាពីរ ទី១ គឺការដោះដូរដោយផ្ដល់នូវប្រាក់កម្ចី ជាផ្នែកមួយនៃការវិនិយោគអចលនទ្រព្យដែលមានស្រាប់ ដោយពេលខ្លះពួកគាត់មិនដោះដូរជាប្លង់ទេ តែគាត់គ្រាន់តែទទួលបាននូវប្រាក់កម្ចី សម្រាប់ការវិនិយោគបន្ថែម ឬគេឱ្យឈ្មោះថា Real Estate Investment។

លោកបានបន្តទៀតថា “ក្នុងឆ្នាំ២០២១ និង២០២២នេះ ចំនួននៃការដោះដូរអចលនទ្រព្យ គឺមានប្រហាក់ប្រហែលគ្នា។ ដោយឡែក យើងឃើញថា កាលពីឆ្នាំ២០២០ ជាការចាប់ផ្ដើមនៃវិបត្តិកូវីដ១៩ និងអាចសល់ចំហាយ នៃការរីកចម្រើនកាលពីឆ្នាំ២០១៩ កាលនោះការដោះដូរមានចំនួនច្រើន តែឆ្នាំ២០២១ និង២០២២នេះ ការដោះដូរក្នុងមួយខែៗមានទំហំប្រហាក់ប្រហែលគ្នាប៉ុណ្ណោះ”។

បើយោងតាមបណ្ដាភ្នាក់ងារអចលនវត្ថុ នៅតាមបណ្ដាខេត្តនានា បានបង្ហាញផងដែរថាសកម្មភាពនៃការទិញលក់អចលនទ្រព្យ នាពេលបច្ចុប្បន្ននេះ ឃើញថាមានការថមថយ ប៉ុន្តែមិនស្ងប់ស្ងាត់ខ្លាំងនោះទេ។ អ្នកស្វែងរកទិញដី និងទិញអចលនទ្រព្យនៅតែបន្តស្វែងរក ហើយពួកគាត់កំពុងសម្លឹងមើលអចលនទ្រព្យណា ដែលអាចឱ្យពួកគេចំណេញប្រាក់បានខ្ពស់ ឬមានសក្ដានុពលក្នុងការវិនិយោគនៅពេលអនាគត។

ការដោះដូរអចលនទ្រព្យនៅកម្ពុជា ក៏ត្រូវបានអ្នកជំនាញបង្ហាញឱ្យដឹងថា បើធៀបជាមួយនឹងបណ្ដាប្រទេសជិតខាង កម្ពុជានៅតែមានការដោះដូរច្រើនជាង ដោយសារតែតម្លៃអចលនទ្រព្យនៅកម្ពុជានៅមានកម្រិត ដែលអាចឱ្យវិនិយោគិនទិញ ហើយទុកចំនេញ ចំណេញខ្ពស់ និងបានជឿថា នៅពេលអនាគតស្ថានភាពវិនិយោគអចលនទ្រព្យនឹងល្អប្រសើរ៕

ដោយ៖ សុផារី

ភ្នំពេញ៖ ប្រទេសកម្ពុជា និងថៃបានចុះហត្ថលេខាលើកិច្ចព្រមព្រៀងឥណទានសម្បទាន សម្រាប់គម្រោងលើកកម្រិតផ្លូវជាតិលេខ៦៧ តភ្ជាប់ខេត្តសៀមរាប ទៅស្រុកអន្លង់វែង-ជាំសាង៉ាំ ដែលមានទឹកប្រាក់សរុប៩៨៣លានបាត (ស្មើ៣០លានដុល្លារអាមេរិក) នៅថ្ងៃសុក្រទី០៤ ខែវិច្ឆិកា ឆ្នាំ២០២២នេះ។

ភាគីខាងរាជរដ្ឋាភិបាលកម្ពុជា តំណាងដោយលោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការ នៃក្រសួងសេដ្ឋកិច្ចនិងហិរញវត្ថុ និងភាគីខាងរាជរដ្ឋាភិបាលថៃ តំណាងដោយលោក Perames Vudthitornetiraks ប្រធានទីភ្នាក់ងារ សហប្រតិបត្តិការអភិវឌ្ឍន៍ សេដ្ឋកិច្ច នៃបណ្តាប្រទេសជិតខាង (NEDA)។

លោក Perames Vudthitornetiraks បានមានប្រសាសន៍ថា បច្ចុប្បន្ន NEDA កំពុងដើរតួនាទីជា ដៃគូអភិវឌ្ឍន៍ដ៏សកម្មមួយរបស់កម្ពុជា ដោយផ្តោតសំខាន់ទៅលើគម្រោងអភិវឌ្ឍន៍ហេដ្ឋារចនាសម្ព័ន្ធក្នុងគោលដៅពន្លឿនការតភ្ជាប់រវាងប្រទេសទាំង២ឱ្យកាន់តែប្រសើរឡើង ហើយផ្លូវជាតិលេខ៦៧នេះ គឺជាច្រកមួយដ៏សំខាន់ក្នុងការបម្រើឱ្យគោលដៅនេះ។

លោកប្រធាន NEDA ក៏បានបន្តទៀតផងដែរថា ក្រៅអំពីកិច្ចសហប្រតិបត្តិការវិនិយោគ លើវិស័យហេដ្ឋារចនាសម្ព័ន្ធ NEDA ក៏មានបំណងបង្កើតកិច្ចសហប្រតិបត្តិការជាមួយកម្ពុជា លើវិស័យផ្សេងៗទៀតផងដែរនាពេលអនាគត រួមមាន កិច្ចសហប្រតិបត្តិការលើវិស័យរចនាសម្ព័ន្ធរូបវ័ន្តសាធារណ: ថាមពល សុខាភិបាល និងការអភិវឌ្ឍទីក្រុងជាដើម។

លោក វង្សី វិស្សុត បានសម្តែងនូវក្តីសោមន្សរីករាយ ដែលរាជរដ្ឋាភិបាលថៃ បានអនុម័តឥណទាន សម្រាប់គម្រោងលើក កម្រិតផ្លូវជាតិលេខ៦៧ (សៀមរាប-អន្លង់វែង-ជាំ/សាង៉ាំ) ប្រវែងប្រមាណ១៣៥គីឡូម៉ែត្រ ព្រោះថាផ្លូវជាតិលេខ៦៧នេះ គឺជាច្រកដ៏សំខាន់មួយ ក្នុងការតភ្ជាប់ប្រទេសកម្ពុជា និងប្រទេសថៃ ដោយតភ្ជាប់ខេត្តសៀមរាប និងភាគខាងជើងនៃប្រទេសកម្ពុជាទៅនឹងខេត្តស៊ីសាកេត និងភាគឦសាននៃប្រទេសថៃ។

ការធ្វើឱ្យប្រសើរឡើងវិញនូវផ្លូវដ៏សំខាន់នេះ នឹងជួយធ្វើឱ្យការធ្វើចរាចរណ៍ និងការដឹកជញ្ជូនឱ្យកាន់តែប្រសើរឡើង ហើយកាន់តែមានសុវត្ថិភាព ប្រសិទ្ធភាពសេដ្ឋកិច្ច និងចំណាយតិចជាងមុន ដែលនឹងជួយសម្រួលដល់ការធ្វើពាណិជ្ជកម្មឆ្លងព្រំដែន និងជំរុញទេសចរណ៍រវាងប្រទេសទាំងពីរ ព្រមទាំងអាចផ្តល់ជាឱកាសវិនិយោគ និងធុរកិច្ចនិងចូលរួមចំណែកលើកកម្ពស់ជីវភាព របស់ប្រជាពលរដ្ឋទាំងពីរប្រទេសផងដែរ។

ជាងនេះទៅទៀត ផ្លូវនេះនឹងមិនត្រឹមតែធ្វើឱ្យប្រសើរឡើង នូវការតភ្ជាប់ផ្ទៃក្នុងរបស់កម្ពុជា និងជាមួយប្រទេសថៃប៉ុណ្ណោះទេ ប៉ុន្តែថែមទាំងជំរុញការតភ្ជាប់ ក្នុងតំបន់នៅក្នុងតំបន់ GMS និងអាស៊ានផងដែរ។ លោកបានបន្តថា ផ្លូវជាតិលេខ៦៧ធ្លាប់ត្រូវបានស្តារ និងសាងសង់ឡើងវិញក្រោមហិរញ្ញប្បទាន សម្បទានរបស់រាជរដ្ឋាភិបាលថៃនៅឆ្នាំ២០០៦ និងត្រូវបានសម្ពោធដាក់ឱ្យប្រើប្រាស់នៅខែកក្កដា ឆ្នាំ២០០៩។ បន្ទាប់ពីបានដាក់ប្រើប្រាស់ជាងមួយទសវត្សរ៍ ផ្លូវនេះពិតជាត្រូវការជួសជុល និងកែលម្អឡើងវិញ ដើម្បីឆ្លើយតបទៅនឹងតម្រូវការនៃការអភិវឌ្ឍកម្ពុជានាពេលបច្ចុប្បន្ន។

លោក វង្សី វិស្សុត ក៏បានលើកឡើងផងដែរថា កិច្ចព្រមព្រៀងឥណទានសម្បទាន ដែលត្រូវបានចុះហត្ថលេខានៅថ្ងៃនេះមិនត្រឹមតែបានឆ្លុះបញ្ចាំងពីភាពជាអ្នកជិតដ៏ល្អរវាងកម្ពុជា-ថៃ ដែលមានព្រពៃណី ទំនាមទំម្លាប់ស្រដៀងគ្នាប៉ុណ្ណោះទេ តែក៏ជាដៃគូដ៏ល្អផងដែរ៕