ដោយ: គង់ លាងហួរ
អន្តរជាតិ: ការកែសម្រួលថ្មីចំពោះពន្ធប្រថាប់ត្រាលើការលក់ផ្ទះ (SSD) របស់រដ្ឋាភិបាលសិង្ហបុរីនឹងជួយទប់ស្កាត់ការទិញទុកលក់ចំណេញក្នុងរយៈពេលខ្លីរបស់ក្រុមអ្នកវិនិយោគមួយចំនួន។ ប៉ុន្តែ ប្រសិទ្ធភាពជាទូទៅលើទីផ្សារត្រូវបានគេរំពឹងថា នឹងមានកម្រិតតិចតួច ដោយសារអតិថិជនភាគច្រើនជាអ្នកទិញក្នុងគោលបំណងរស់នៅ។

យោងតាមសេចក្តីថ្លែងការណ៍រួមរបស់ក្រសួងអភិវឌ្ឍន៍ជាតិ ក្រសួងហិរញ្ញវត្ថុ និងអាជ្ញាធររូបិយវត្ថុសិង្ហបុរី បានឱ្យដឹងថា ប្រជាជន ដែលកាន់កាប់លំនៅដ្ឋានមិនបានរយៈពេលយ៉ាងតិច៤ឆ្នាំ បន្ទាប់ពីទិញរួច ត្រូវបង់ពន្ធប្រថាប់ត្រាចាប់ពី៤ភាគរយទៅ១៦ភាគរយ នៅពេលសម្រេចចិត្តលក់ចេញវិញ។

ក្រុមអ្នក​វិភាគ​បាន​វាយតម្លៃ​ថា​ នេះ​ជា​ការបោះជំហាន​តូច​មួយដើម្បីទប់ស្កាត់ការទិញទុកលក់ចំណេញ។ កាលពីមុន វិធានការពន្ធប្រថាប់ត្រាលើការលក់ផ្ទះ (SSD) បានជួយកាត់បន្ថយការលក់ Pre-sale ដែលបានកើនឡើងចាប់ពីឆ្នាំ២០២០ ដល់ឆ្នាំ២០២៤។

លោក Marcus Chu នាយកប្រតិបត្តិនៃទីភ្នាក់ងារអចលនទ្រព្យ ERA Singapore បានអះអាងថា “យើងសង្កេតឃើញមានការកើនឡើងនៃចំនួនអ្នកលក់ ដែលប្រកាសលក់លំនៅដ្ឋានរបស់ពួកគេ បន្ទាប់ពីទិញរួចរយៈពេល៣ឆ្នាំទៅ៤ឆ្នាំ ដែលការណ៍នេះជំរុញឱ្យអាជ្ញាធរចាត់វិធានការ”។

កាលពីឆ្នាំ២០២៤ ប្រជាជនចំនួន២.១០៤នាក់បានដាក់លក់ខុនដូ ឬអាផាតមុិនរបស់ខ្លួន បន្ទាប់ពីបានកាន់កាប់អស់រយៈពេល៣ឆ្នាំទៅ៤ឆ្នាំ កើនឡើងពីចំនួន៣៥៨នាក់ក្នុងឆ្នាំ២០២០។នេះបើយោងតាមការដកស្រង់ទិន្នន័យពីអាជ្ញាធរអភិវឌ្ឍន៍ទីក្រុងសិង្ហបុរី (URA) ។

នៅក្នុងឆមាសទីមួយ ឆ្នាំ២០២៥ ការដាក់លក់ បន្ទាប់ពីបានកាន់កាប់អស់រយៈពេល៣ឆ្នាំទៅ៤ឆ្នាំបានគ្របដណ្តប់ចំណែកចំនួន១៤,៧ភាគរយនៃការលក់ខុនដូ ឬអាផាតមុិនសរុបនៅប្រទេសសិង្ហបុរី៕ប្រភព: The Strait Times៕

ដោយ: គង់ លាងហួរ
អន្តរជាតិ: ការលក់អាផាតមុិននៅទីក្រុងសេអ៊ូលបានដាំក្បាលចុះជាង៦៤ភាគរយ ក្នុងរយៈពេលត្រឹមតែមួយសប្តាហ៍ប៉ុណ្ណោះ ក្រោយរដ្ឋាភិបាលថ្មីរបស់ប្រទេសកូរ៉េខាងត្បូងបានដាក់ចេញបទប្បញ្ញត្តិយ៉ាងតឹងរុឹងលើការផ្តល់ប្រាក់កម្ចីទិញផ្ទះកាលពីថ្ងៃទី២៧ ខែមិថុនា។

ចាប់ពីថ្ងៃទី២៧ ខែមិថុនាដល់ថ្ងៃទី៣ ខែកក្កដា ការលក់អាផាតមុិនរបស់ទីក្រុងសេអ៊ូលសម្រេចបានចំនួន៥៧៧យូនីតប៉ុណ្ណោះ ដាំក្បាលចុះ៦៤,៦ភាគរយ បើធៀបជាមួយនឹងការលក់អាផាតមុិនចំនួន១.៦២៩យូនីតកាលពីមួយសប្តាហ៍មុន ដោយរាប់ថយក្រោយពីថ្ងៃទី២៧ ខែមិថុនា។

ការលក់អាផាតមុិននៅតាមសង្កាត់ធំៗចំនួន៣ ដែលធ្លាប់មានសន្ទុះខ្លាំងជាងគេនៅទីក្រុងសេអ៊ូល ដូចជាសង្កាត់ Songpa សង្កាត់ Seocho និងសង្កាត់ Gangnam ក៏បានដាំក្បាលចុះផងដែរ។

ជាក់ស្តែង ការលក់អាផាតមុិននៅក្នុងសង្កាត់ Songpa បានធ្លាក់ចុះពីចំនួន២៤យូនីតមកនៅត្រឹម១យូនីត ខណៈការលក់អាផាតមុិននៅក្នុងសង្កាត់ Seocho ក៏បានធ្លាក់ចុះពីចំនួន១៥យូនីតមកនៅត្រឹម១យូនីត ហើយការលក់នៅសង្កាត់ Gangnam បានធ្លាក់ចុះពីចំនួន៧៦យូនីតមកនៅត្រឹម២៤យូនីត។

យោងតាមក្រសួងដែនដីកូរ៉េបានឱ្យដឹងថា កិច្ចសន្យាទិញ-លក់អាផាតមុិនចំនួន៣០១យូនីត នៅទីក្រុងសេអ៊ូលត្រូវបានលុបចោលនៅចន្លោះថ្ងៃទី២៧ ខែមិថុនារហូតដល់ថ្ងៃទី៥ ខែកក្កដា ទោះបីជារដ្ឋាភិបាលកូរ៉េបានបញ្ជាក់ថា ច្បាប់ផ្តល់ប្រាក់កម្ចីថ្មីនេះនឹងមិនអនុវត្តន៍ចំពោះកិច្ចសន្យាដែលបានចុះហត្ថលេខារួចរាល់ មុនពេលច្បាប់ថ្មីចូលជាធរមានយ៉ាងណាក្តី។

នៅឆ្នាំ២០២៦ អាផាតមុិនថ្មីចំនួន២៨.៣៥៥យូនីត ត្រូវបានគេរំពឹងថានឹងបញ្ចប់ការសាងសង់នៅក្នុងទីក្រុងសេអ៊ូល ដាំក្បាលចុះ៣៩,៣ភាគរយបើធៀបនឹងការព្យាករណ៍ចំពោះការផ្គត់ផ្គង់អាផាតមុិនថ្មីសរុបចំនួន៤៦.៧៣៨យូនីតក្នុងឆ្នាំ២០២៥។

ច្បាប់ថ្មីស្តីពីការផ្តល់ប្រាក់កម្ចីទិញផ្ទះ រួមមាន ការកំណត់ទំហំនៃការផ្តល់ប្រាក់កម្ចីក្នុងកម្រិតអតិបរមាត្រឹម៦០០លានវ៉ុន និងការហាមឃាត់មិនឱ្យផ្តល់ប្រាក់កម្ចីថ្មីបន្ថែមទៀតដល់ប្រជាជន ដែលមានផ្ទះច្រើនយូនីត៕ប្រភព: Chosun៕

ដោយ: គង់ លាងហួរ
អន្តរជាតិ: ការលក់ផ្ទះលំដាប់ខ្ពស់នៅក្នុងទីក្រុងសៀងហៃរបស់ប្រទេសចិនកំពុងកើនឡើង ខណៈក្រុមអ្នកមានបានសម្រុកទិញផ្ទះតម្លៃកប់ពពកដើម្បីរក្សាទុកទ្រព្យសម្បត្តិឱ្យមានសុវត្ថិភាព ស្របពេលមានការរំពឹងទុកថា តម្លៃផ្ទះទាំងនោះនឹងបន្តកើនឡើងបន្ថែមទៀតនាពេលខាងមុខ។

នៅឆមាសទី១ ឆ្នាំនេះ ទីក្រុងសៀងហៃបានលក់ផ្ទះថ្មីចំនួន៤៨២យូនីត ដែលមានតម្លៃជាង៥០លានយ័ន(ប្រមាណ៧លានដុល្លារអាមេរិកក្នុងមួយយូនីត។ និន្នាការ​នេះ​ត្រូវបានគេរំពឹងថា នឹង​បន្ត​កើតមាន ដោយ​សារ​ការ​ផ្គត់ផ្គង់នៅ​មាន​កម្រិត និង​ការ​កើន​ឡើង​នៃតម្លៃ​ដី។

ទីក្រុងសៀងហៃក៏បានលក់ផ្ទះថ្មីដែលមានតម្លៃលើសពី៣០លានយ័នចំនួន១.០៩៦យូនីត ឬស្មើនឹងចំណែក៦០ភាគរយនៃការលក់ផ្ទះថ្មីសរុបក្នុងកម្រិតតម្លៃប្រហាក់ប្រហែលគ្នានេះនៅទូទាំងទីក្រុងធំៗចំនួន៣០របស់ប្រទេសចិន។នេះ​បើ​តាម​ទិន្នន័យ​ចងក្រង​ដោយ​សាជីវកម្ម​ព័ត៌មាន​អចលនទ្រព្យ​ចិន (CRIC)។

នៅទូទាំងប្រទេសចិន ការលក់ផ្ទះថ្មីដែលមានតម្លៃលើសពី៥០លានយ័នក្នុងមួយយូនីតបានហក់ឡើងជិត៥០ភាគរយធៀបនឹងឆ្នាំមុន ដល់ចំនួន៥៩១យូនីតក្នុងរយៈពេល៦ខែដំបូងដើមឆ្នាំ២០២៥។

លោក Lu Wenxi អ្នកវិភាគនៅក្រុមហ៊ុន Centaline Property ក្នុងទីក្រុងសៀងហៃ បានលើកឡើងថា បើគិតពីផ្នែកតម្រូវការ ការទិញផ្ទះលំដាប់ខ្ពស់នៅទីក្រុងសៀងហៃកំពុងក្លាយជាការវិនិយោគទ្រព្យសកម្មដ៏មានសុវត្ថិភាព និងផ្តល់នូវស្ថិរភាព ស្របពេលទីក្រុងផ្សេងទៀតមានហានិភ័យខ្ពស់។

ចំពោះផ្នែកផ្គត់ផ្គង់ ការសម្រេចចិត្តលើគោលនយោបាយកាលពីខែមិថុនាឆ្នាំមុន ដើម្បីលុបបំបាត់ការកំណត់តម្លៃដីដោយរដ្ឋនៅទីក្រុងសៀងហៃ បានជួយរក្សាតម្លៃអចលនទ្រព្យឱ្យបន្តកើនឡើង ខណៈបណ្តាអ្នកអភិវឌ្ឍន៍អចលនទ្រព្យឈានមុខគេបានបន្តទិញដីនៅក្នុងទីតាំងសំខាន់ៗក្នុងតម្លៃខ្ពស់ជាងទីផ្សារ៕ប្រភព: SCMP៕

ដោយ: គង់ លាងហួរ
អន្តរជាតិ: យោងតាមទិន្នន័យថ្មីចុងក្រោយបានបង្ហាញថា លំហូរវិនិយោគផ្ទាល់ពីបរទេស(FDI) ចូលវិស័យអចលនទ្រព្យរបស់ប្រទេសវៀតណាមបានកើនឡើងចំនួន២,៤ដងដល់ទំហំទឹកប្រាក់៤,៨ពាន់លានដុល្លារអាមេរិកនៅក្នុងឆមាសទីមួយឆ្នាំនេះ។

តួលេខខាងលើនេះរួមមានដើមទុនវិនិយោគ ដែលត្រូវបានចុះបញ្ជីថ្មីចំនួន២៤ភាគរយ នៃលំហូរ FDI សរុប។នេះបើយោងតាមរបាយការណ៍ពីក្រសួងផែនការ និងវិនិយោគវៀតណាម ដែលបានដកស្រង់ចុះផ្សាយដោយកាសែត Vnexpress។

ក្រុមអ្នកវិភាគបានលើកឡើងថា ទោះជាមានបញ្ហាប្រឈមផ្នែកសេដ្ឋកិច្ច និងភូមិសាស្ត្រនយោបាយសកលយ៉ាងណាក្តី ក៏ប្រទេសវៀតណាមនៅតែជាគោលដៅលេចធ្លោក្នុងតំបន់ ដោយសារកត្តាស្ថិរភាពម៉ាក្រូសេដ្ឋកិច្ច គោលនយោបាយបើកចំហជាបន្តបន្ទាប់ និងសក្តានុពលកំណើនសេដ្ឋកិច្ចរយៈពេលវែង។

លោកស្រី Nguyen Hoai An នាយិកាជាន់ខ្ពស់នៅក្រុមហ៊ុនប្រឹក្សាអចលនទ្រព្យ CBRE Hanoi បានសង្កត់ធ្ងន់ថា ការកែទម្រង់ច្បាប់សំខាន់ៗចំនួន៣ រួមមានច្បាប់ដីធ្លី ច្បាប់អាជីវកម្មអចលនវត្ថុ និងច្បាប់លំនៅដ្ឋាន ដែលបានចូលជាធរមានចាប់តាំងពីថ្ងៃទី១ ខែសីហា ឆ្នាំ២០២៤ បានចូលរួមចំណែកបង្កើតក្របខ័ណ្ឌច្បាប់ប្រកបដោយតម្លាភាព និងសុវត្ថិភាពសម្រាប់បណ្តាអ្នកវិនិយោគ។

ការអភិវឌ្ឍន៍ហេដ្ឋារចនាសម្ព័ន្ធក៏ជាកត្តាជំរុញដ៏សំខាន់នៃលំហូរវិនិយោគផ្ទាល់ពីបរទេសចូលទៅក្នុងវិស័យអចលនទ្រព្យវៀតណាមផងដែរ។

គម្រោងហេដ្ឋារចនាសម្ព័ន្ធធំៗ រួមមានផ្លូវដែកល្បឿនលឿនតភ្ជាប់រវាងរដ្ឋធានីហាណូយ និងទីក្រុងហូជីមិញអាកាសយានដ្ឋានអន្តរជាតិ Long Thanh និងការសាងសង់ផ្លូវក្រវ៉ាត់ក្រុងនៅក្នុងទីក្រុងហាណូយ និងទីក្រុងហូជីមិញ បាននិងកំពុងជួយជំរុញកំណើននៃការវិនិយោគអចលនទ្រព្យ។

លោកស្រី Nguyen បានបន្ថែមថា បណ្តាអ្នកវិនិយោគបរទេសកំពុងពង្រីកវត្តមានកាន់តែច្រើនឡើងទៅក្នុងតំបន់ទីក្រុងរណប ដោយសារតំបន់ទាំងនោះមានដីធ្លីធំទូលាយ និងហេដ្ឋារចនាសម្ព័ន្ធដឹកជញ្ជូនយ៉ាងរឹងមាំ៕ប្រភព: Vnexpress៕