ក្រោយ ដោយ៖ វឌ្ឍនៈ

ភ្នំពេញ ៖ ទីផ្សារអចលនទ្រព្យនៅតាមបណ្ដាខេត្តមួយចំនួននៅតែមិនមានភាពល្អប្រសើរ ដូចស្ថានភាពមុនកូវីដ១៩នោះទេ តែមកដល់ចុងឆ្នាំ២០២២នេះ ស្ថានភាពអចលនទ្រព្យនៅខេត្តស្វាយរៀងហាក់មានភាពប្រសើរជាង២ឆ្នាំមុនបន្តិច ដោយអ្នកជំនាញមើលឃើញថានេះជាសញ្ញាវិជ្ជមានសម្រាប់ឆ្នាំក្រោយ។

លោក ថា ថេង ប្រធានសាខានៃក្រុមហ៊ុនអចលនទ្រព្យ Century 21 Zillion Holding បានឱ្យដឹងថា មកដល់ចុងឆ្នាំ២០២២នេះ លោកមើលឃើញស្ថានភាពអចលនទ្រព្យនៅខេត្តស្វាយរៀងហាក់មានសញ្ញាវិជ្ជមានបន្តិច ដោយមានវិនិយោគិនអចលនទ្រព្យមួយចំនួនបានសម្លឹងមើលពីការវិនិយោគនៅក្នុងខេត្តស្វាយរៀង និងកំពុងរកមើលលឱកាសវិនិយោគនៅក្នុងខេត្តនេះ។

លោកបន្តថា បើទោះបីជាការទិញលក់មិនមានច្រើនដូចមុនៗក្ដី តែនេះគឺជាសញ្ញាល្អសម្រាប់ស្ថានភាព ជាពិសេសក្រោយពេលផ្លូវល្បឿនលឿនភ្នំពេញ-បាវិតបានលេចចេញជាព័ត៌មានច្បាស់ការ ប៉ុន្តែនៅមានវិនិយោគិនមួយចំនួនកំពុងរង់ចាំមើលពីផ្លូវល្បឿនលឿននេះនឹងរត់កាត់តាមណា ដែលជាឱកាសរបស់ពួកគេក្នុងការរកទីតាំងវិនិយោគ។

លោកបន្ថែមថា តាមរយៈសកម្មភាពនៅចុងឆ្នាំ២០២២នេះ នឹងធ្វើឱ្យទីផ្សារអចលនទ្រព្យក៏ដូចជាហាងឆេងអចលនទ្រព្យនៅខេត្តស្វាយរៀងនឹងអាចប្រសើរជាងរយៈពេល៣ឆ្នាំកន្លងមក ពោលគឺឆ្នាំ២០២០ ឆ្នាំ២០២១ និងឆ្នាំ ២០២២ ហើយនឹងរកទៅរកស្ថានភាពមុនកូវីដ១៩បណ្ដើរៗ។

លោក ខន គង្គា អគ្គនាយកក្រុមហ៊ុន ERA Cambodia បានបង្ហាញជំនឿជាក់ថា តាមរយៈស្ងានភាពល្អប្រសើរនៃទីផ្សារអចលនទ្រព្យនៅចុងឆ្នាំ២០២២នេះ នោះនៅឆ្នាំក្រោយនេះស្ថានភាពអចលនទ្រព្យនឹងអាចល្អជាងឆ្នាំ២០២២ និង២ឆ្នាំមុន ហើយវានឹងវិលទៅរកស្ថានភាពប្រក្រតីភាពជាបណ្ដើរឡើងវិញ៕

ដោយ: លាងហួរ

ហ្សាការតា: ប្រទេសឥណ្ឌូណេស៊ីគ្រោងរៀបចំបង្ហាញព័ត៌មានលម្អិតបន្ថែម អំពីគម្រោងទិដ្ឋាការស្នាក់នៅរយៈពេលវែងរបស់ខ្លួន ដើម្បីទាក់ទាញវិនិយោគិនបរទេស និងវិនិយោគិនអចលនទ្រព្យ រួមទាំងមកពីប្រទេសចិន និងទីក្រុងហុងកុង។

នេះបើយោងតាមការចេញផ្សាយដោយសារព័ត៌មាន South China Morning Post កាលពីថ្ងៃចន្ទ ទី០៥ ខែធ្នូ ឆ្នាំ២០២២។

ពេលនេះ ក្រុមមន្ត្រីនៅទីក្រុងហ្សាការតាបានបង្ហាញផែនការតម្រូវឱ្យវិនិយោគិនបរទេសដាក់ប្រាក់តម្កល់នៅធនាគារយ៉ាងតិចបំផុតចំនួន១៣០.០០០ដុល្លារអាមេរិក និងមានការផ្អាកយកពន្ធជាបណ្តោះអាសន្នលើប្រាក់ចំណូលពីបរទេស ដើម្បីប្រកួតប្រជែងនឹងគម្រោងស្រដៀងគ្នា របស់ប្រទេសជិតខាងក្នុងតំបន់ដូចជាប្រទេសម៉ាឡេស៊ី និងថៃ។ ផែនការនេះអាចជំរុញឱ្យតម្លៃអចលនទ្រព្យក្នុងស្រុកហក់ឡើង ព្រមទាំងជួយស្តារវិស័យទេសចរណ៍របស់ប្រទេសឥណ្ឌូណេស៊ី ឱ្យងើបឡើងវិញផងដែរ។

តាមរយៈការស្ទង់មតិ របស់ធនាគារកណ្តាលឥណ្ឌូណេស៊ី កាលពីខែសីហាកន្លងទៅ  បានបង្ហាញថាទីផ្សារលំនៅដ្ឋានបឋម របស់ប្រទេសឥណ្ឌូណេស៊ីបានងើបឡើងវិញ នៅពាក់កណ្តាលឆ្នាំ។ ចំណែកសេដ្ឋកិច្ចរបស់ប្រទេសឥណ្ឌូណេស៊ី ដែលមានទំហំ១,២ពាន់ពាន់លានដុល្លារ បានកើនឡើងក្នុងអត្រាប្រចាំឆ្នាំចំនួន៥,៧ កាលពីត្រីមាសមុន។

លោក Kashif Ansari សហស្ថាបនិក និងជានាយកប្រតិបត្តិក្រុមនៃក្រុមហ៊ុន Juwai IQI បានមានប្រសាសន៍ថា គម្រោងទិដ្ឋាការនេះអាចទទួលបានជោគជ័យយ៉ាងខ្លាំង ជាមួយនឹងអ្នកដែលធ្វើដំណើរមកពីតំបន់ចិនដីគោក និងទីក្រុងហុងកុង ដែលប្រាថ្នាចង់បានរបៀបរស់នៅដ៏គួរឱ្យទាក់ទាញ និងតម្លៃនៃការរស់នៅទាប។

យោងតាមទិន្នន័យចងក្រងដោយ Juwai IQI បានឱ្យដឹងថា កម្មវិធីរបស់ប្រទេសម៉ាឡេស៊ី តម្រូវឱ្យវិនិយោគិនបរទេសមានទ្រព្យ ដែលអាចបញ្ចាំនៅធនាគារបាន យ៉ាងតិចបំផុតចំនួន៣៣៤.០០០ដុល្លារអាមេរិក និងមានប្រាក់ចំណូលនៅក្រៅប្រទេសប្រចាំខែ យ៉ាងហោចណាស់ចំនួនជាង៩១៥៥ដុល្លារអាមេរិក។ កម្មវិធី “ផ្ទះទីពីរ” របស់ម៉ាឡេស៊ីបានទាក់ទាញជនបរទេសជាង៤២.០០០នាក់ ដោយមួយភាគបី នៃជនបរទេសទាំងនោះ មានប្រភពមកពីតំបន់ចិនដីគោក និងហុងកុង។

ដោយឡែក ប្រទេសថៃវិញបានចាប់ផ្តើមទទួលយកពាក្យស្នើសុំ សម្រាប់គម្រោងទិដ្ឋាការស្នាក់នៅរយៈពេលវែងរហូតទៅដល់១០ឆ្នាំ។ គម្រោងទិដ្ឋាការស្នាក់នៅរយៈពេលវែង (LTR) របស់ប្រទេសថៃនេះគ្រោងទាក់ទាញដល់ជនបរទេស ដែលមានទ្រព្យសម្បត្តិស្តុកស្តម្ភ ឬជនបរទេសមានជំនាញចំនួន១លាននាក់ មកកាន់ប្រទេសថៃ ក្នុងរយៈពេល៥ឆ្នាំខាងមុខ ដើម្បីទទួលបានទុនវិនិយោគសរុបចំនួន២៧ពាន់លានដុល្លារអាមេរិក៕

ដោយ៖ វឌ្ឍនៈ

ភ្នំពេញ ៖ រដ្ឋាភិបាលជប៉ុនជាដៃគូវិនិយោគ និងអភិវឌ្ឍន៍ដ៏សំខាន់មួយរបស់កម្ពុជាហើយជប៉ុនតែងតែជួយកម្ពុជាក្នុងការកសាងហេដ្ឋារចនាសម្ព័ន្ធទាំងធំៗនិងតូចៗ។ បើគិតចាប់តាំងពីឆ្នាំ១៩៩១ មកដល់ពេលបច្ចុប្បន្ននេះ ជប៉ុនបានផ្ដល់ថវិកាប្រមាណ៦៥លានដុល្លារអាមេរិក សម្រាប់អភិវឌ្ឍន៍ហេដ្ឋារចនាសម្ព័ន្ធ ថ្នល់ ស្ពាននៅតាមមូលដ្ឋានជនបទប្រមាណ៦៦០គម្រោង។

ជប៉ុនក៏បានចុះហត្ថលេខា នៅរសៀលថ្ងៃទី៥ ធ្នូ ២០២២នេះ ជាមួយមន្ទីរសាធារណការនិងដឹកជញ្ជូនខេត្តកំពង់ស្ពឺ និងប្រធានមន្ទីរធនធានទឹក និងឧតុនិយមខេត្តកំពង់លើកិច្ចសន្យាផ្ដល់ជំនួយឥតសំណងដល់ កម្ពុជាចំនួនជិត២០ម៉ឺនដុល្លារអាមេរិកដល់កម្ពុជា សម្រាប់សង់ស្ពាន និងការស្ដារប្រព័ន្ធធារាសាស្ត្រនៅខេត្តកំពង់ស្ពឺ និងកំពង់ចាម។

លោក តានិណៃ អ៊ីឈិតុម៉ុ ថ្លែងថា គម្រោងសាងសង់ស្ពានបេតុងថ្មី ជំនួសស្ពានឈើដែលពុកផុយ ក្នុងឃុំអមលាំង ស្រុកថ្ពង ខេត្តកំពង់ស្ពឺ មានទឹកប្រាក់ចំនួន៩៩.២១២ដុល្លារ។ គម្រោងនេះនឹងផ្តល់អត្ថប្រយោជន៍ដល់ប្រជាជនក្នុងស្រុកចំនួន៣.៣០០នាក់ ដោយសម្រួលដល់ការដឹកជញ្ជូនផលិតផលកសិកម្ម ក៏ដូចជាការធ្វើដំណើរប្រចាំថ្ងៃរបស់សិស្ស និងប្រជាជន ទៅកាន់សាលារៀន ផ្សារ និងមណ្ឌលសុខភាព។

ចំណែក ថវិកាចំនួន៨៧.៦៤៤ដុល្លារអាមេរិក នឹងយកទៅប្រើប្រាស់ សម្រាប់គម្រោងស្តារទំនប់ និងលូមូលចំនួន៣ ដែលរងការខូចខាត នៅក្នុងស្រុកព្រៃឈរ ខណៈបរិក្ខារធារាសាស្ត្រដែលរងការខូតខាតបច្ចុប្បន្ន មិនអាចស្ដុកទឹកភ្លៀងបានគ្រប់គ្រាន់ ក្នុងរដូវវស្សាសម្រាប់ធ្វើស្រែចម្ការ។ គម្រោងនេះនឹងផ្ដល់អត្ថប្រយោជន៍ ដល់ប្រជាជនជាង៤.៥០០នាក់ ដែលនឹងរួមចំណែកដល់ការបង្កើនប្រាក់ចំណូលរបស់ប្រជាកសិករ តាមរយៈការធានាការផ្គត់ផ្គង់ទឹកសម្រាប់កសិកម្មប្រកបដោយស្ថិរភាព។

ជំនួយឥតសំណងក្រោមគ្រោងការណ៍នៃគម្រោងទ្រង់ទ្រាយតូចសន្តិសុខមនុស្សជាតិរបស់ជប៉ុន បានចាប់ផ្តើមនៅប្រទេសកម្ពុជានៅឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជា ក្នុងការអភិវឌ្ឍ និងស្ថាបនាប្រទេសឡើងវិញ នៅតាមកម្រិតមូលដ្ឋាន។ ជំនួយឥតសំណងនេះ មានទិសដៅការពារជនងាយរងគ្រោះពីកត្តាមួយចំនួនដូចជា ភាពក្រីក្រ ឬ ភាពអកុសលនានា ដែលអាចគំរាមកំហែងដោយផ្ទាល់ដល់អាយុជីវិត ជីវភាពរស់នៅ និងសេចក្ដីថ្លៃថ្នូររបស់ពួកគេ ក៏ដូចជាជួយជំរុញនូវភាពម្ចាស់ការលើខ្លួនឯងរបស់ប្រជាសហគមន៍៕

ដោយ៖ សហការី
ភ្នំពេញ៖ ពេលវេលាចុងឆ្នាំ គឺជាពេលវេលាដ៏ល្អបំផុត សម្រាប់ការទិញរបស់ទ្រព្យធំៗ ដូចជា ផ្ទះ រថយន្ត និងទ្រព្យផ្សេងៗ ព្រោះរយៈពេលនេះមានប្រូម៉ូសិនល្អៗ និងសម្បូរបែបពីបណ្ដាក្រុមហ៊ុនផ្សេងៗ។
ដោយឡែក ក្រុមហ៊ុនអចលនវត្ថុធំៗ ដូចជា បុរី ប៉េង ហួត ជាដើមក៏មានការផ្ដល់ជូនឱកាសចំណេញច្រើនសន្ធឹកសន្ធាប់ផងដែរ។
ខាងក្រោមនេះ គឺជាមូលហេតុ ដែលអ្នកគួរទិញផ្ទះចុងឆ្នាំនេះនៅបុរី ប៉េង ហួត៖

1-ឱកាសឈ្នះដំណើរកម្សាន្តសម្រាប់មនុស្សពីរនាក់ ចំនួន០១រង្វាន់ ទៅកាន់ប្រទេសស្វីស+បារាំង ឬប្រទេសជប៉ុន។
2-ការបញ្ចុះតម្លៃពិសេសសម្រាប់គ្រប់ប្រភេទផ្ទះ។
3-គោលការណ៍បង់ប្រាក់កាន់តែងាយស្រួលជាមួយបុរីផ្ទាល់ ឬជាមួយធនាគារដៃគូ ដោយអត្រាការប្រាក់ចាប់ពី៤,៣៩% និងទំហំកម្ចីរហូតដល់១០០%។
4-ផ្ទះសាងសង់ជិតរួចរាល់ ចូលរស់នៅបានឆាប់ៗ។
5-ផ្ទះស្ថិតក្នុងគម្រោងដ៏មានសក្ដានុពល ទីតាំងល្អ ប្រមូលផ្ដុំដោយហេដ្ឋារចនាសម្ព័ន្ធគ្រប់ប្រភេទ។

ប្រញាប់ឡើង! ការផ្ដល់ជូនដ៏ពិសេសនេះ មានរយៈពេលត្រឹមតែដំណាច់ឆ្នាំ២០២២ នេះតែប៉ុណ្ណោះ! បានទាំងផ្ទះក្នុងក្ដីស្រមៃហើយ បានទាំងដំណើរកម្សាន្តក្រៅប្រទេសជាមួយមនុស្សជាទីស្រលាញ់ថែមទៀត! រកឯណាបាន!
ដើម្បីជ្រាបកាន់តែច្បាស់អំពីប្រូម៉ូសិន ទិញផ្ទះ ឈ្នះដំណើរកម្សាន្ត VIP ក៏ដូចជាគោលការណ៍ចំណេញផ្សេងទៀត សូមអញ្ជើញមកសាកសួរព័ត៌មាននៅគ្រប់ការិយាល័យលក់របស់បុរី ប៉េង ហួត ឬទាក់ទងតាមលេខទូរសព្ទ 𝟎𝟗𝟖 / 𝟎𝟏𝟔 / 𝟎𝟏𝟕 𝟓𝟗𝟔 𝟕𝟖𝟗 ឬចូលរួមតាម Telegram : https://t.me/boreypenghuoth ។

ដោយ៖ សុផារី

ភ្នំពេញ៖ គិតត្រឹមថ្ងៃទី៥ ខែធ្នូ ឆ្នាំ២០២២ ការដ្ឋានសាងសង់ស្ពានខ្សែកាបឫស្សីកែវឆ្លងកាត់ទន្លេសាប សម្រេចលទ្ឋផលបានជិត៩០ភាគរយ នៃគម្រោងទាំងមូលហើយ ដោយតាមផែនការ គម្រោងនេះនឹងបញ្ចប់ការសាងសង់ទាំងស្រុង នៅក្នុងខែមេសាឆ្នាំ២០២៣ខាងមុខ។

យោងតាមសេចក្តីជូនដំណឹងរបស់មន្ទីរសាធារណការ និងដឹកជញ្ជូនរាជធានីភ្នំពេញ នៅរសៀលថ្ងៃទី០៥ ខែធ្នូនេះ បានឱ្យដឹងថា គិតត្រឹមថ្ងៃទី២៥ ខែមករា ឆ្នាំ២០២២នេះ ការដ្ឋានសាងសង់ស្ពានបេតុងអារមេខ្សែ កាបឫស្សីកែវឆ្លងកាត់ទន្លេសាប សម្រេចវឌ្ឍនភាពបានចំនួន៨៩ភាគរយហើយ ដោយគ្រោងនឹងបញ្ចប់ការសាងសង់តាមការគម្រោង នៅក្នុងកំឡុងចូលឆ្នាំប្រពៃណីខ្មែរ ឆ្នាំ២០២៣ខាងមុខនេះ។

ស្ពានបេតុងអារមេខ្សែកាប ឫស្សីកែវ ឆ្លងកាត់ទន្លេសាប មានប្រវែង៩២២ម៉ែត្រ និងទទឹង២០,៥ម៉ែត្រ គ្រោងចំណាយថវិកាប្រមាណ៣៥លានដុល្លារ។

ស្ពាននេះ មានតួនាទីសំខាន់ ក្នុងការរួមមចំណែក រំដោះចរាចរលើផ្លូវជាតិលេខ៦ និងផ្លូវជាតិលេខ៥ ក៏ដូចជាច្រកចេញចូលរាជធានីភ្នំពេញ និងជាសមិទ្ធផលថ្មីមួយទៀត ដែលជាចំណងដៃថ្មី សម្រាប់រាជធានភ្នំពេញពីរដ្ឋាភិបាល៕

ដោយ: លាងហួរ

ភ្នំពេញ: ក្រុមហ៊ុន Royal Group គ្រោងបោះផ្សាយមូលបត្របំណុល ដែលមានតម្លៃ១៣០លានដុល្លារសម្រាប់អាជីវកម្មព័ត៌មាន ទំនាក់ទំនង និងបច្ចេកវិទ្យាចំនួន២របស់ខ្លួនគឺ Cellcard និង EZECOM។

ក្រុមហ៊ុន Royal Group គ្រោងបោះផ្សាយមូលបត្របំណុលចំនួន៧០លានដុល្លារសម្រាប់ក្រុមហ៊ុន Cellcard និង៦០លានដុល្លារសម្រាប់ EZECOM នៅឆ្នាំក្រោយ ព្រមទាំងលក់មូលបត្របំណុលទាំងនេះទៅឱ្យវិនិយោគិនក្នុងស្រុក និងក្រៅស្រុក បន្ទាប់ពីប្រមូលប្រាក់បានប្រហែល១០លានដុល្លារសម្រាប់ក្រុមហ៊ុនផ្លូវដែកផ្តាច់មុខរបស់ខ្លួន។

លោក Hanna Mark នាយកប្រតិបត្តិនៃក្រុមហ៊ុន Royal Group បានមានប្រសាសន៍ថា យើងនឹងចាប់ផ្តើមដំណើរការបោះផ្សាយមូលបត្របំណុលនៅឆ្នាំក្រោយ ហើយយើងនឹងយកមូលនិធិដែលបានរៃអង្គាសពីការលក់មូលបត្របំណុលទាំងនេះ ដើម្បីទិញគេហទំព័រ ប៉ម អង់តែន ឧបករណ៍ និងរបស់ផ្សេងៗទៀត ដើម្បីពង្រីកការគ្របដណ្តប់របស់យើងនៅទូទាំងប្រទេស។

លោកបានបន្តថា យើង​គ្រោងរៃអង្គាស​ប្រាក់​ឱ្យបាន​ច្រើន​ជាង​ផ្លូវ​រថភ្លើង ព្រោះ​ទូរគមនាគមន៍​មាន​តម្លៃ​ថ្លៃ​ជាង​ផ្លូវដែក ជាពិសេស​ឧបករណ៍​ទំនាក់ទំនង​មានតម្លៃថ្លៃ​ណាស់៕