ដោយ៖​ វឌ្ឍនៈ

ភ្នំពេញ ៖ រយៈពេលជិត៣ឆ្នាំហើយ ស្ថានភាពអចលនទ្រព្យនៅក្នុងប្រទេសកម្ពុជាក៏បានរងគ្រោះ ដោយសារបញ្ហាជំងឺកូវីដ១៩ និងសង្គ្រាមរវាងរុស្ស៊ី និងអ៊ុយក្រែន កាលពីដើមឆ្នាំនេះ។ យ៉ាងណាក្ដី នៅឆ្នាំ២០២៣ខាងមុខនេះ អ្នកជំនាញរំពឹងថា អចលនទ្រព្យខេត្តសៀមរាបនឹងរើបឡើងវិញបណ្ដើរៗ និងមានភាពល្អប្រសើរជាង៣ឆ្នាំកន្លងមក។

លោក សំ សីហា ប្រធានសាខានៃក្រុមហ៊ុនអចលនទ្រព្យ Century 21 Zillion Holding ប្រចាំខេត្តសៀមរាប បានមានប្រសាសន៍តាមទូរស័ព្ទនៅរសៀលថ្ងៃទី៦ ធ្នូ ២០២២នេះ ថា នៅក្នុងរយៈពេលចុងឆ្នាំ២០២២នេះ ស្ថានភាពអចលនទ្រព្យនៅក្នុងខេត្តសៀមរាបហាក់មានភាពប្រសើរ ជាងរយៈពេល៦ ឬ៧ខែមុន ដូច្នេះវាជាសញ្ញាវិជ្ជមាន សម្រាប់ទីផ្សារអចលនទ្រព្យនៅសៀមរាប ក្នុងឆ្នាំ២០២៣ខាងមុខ។

លោកបន្តថា កត្តាដែលលោកមើលឃើញថានឹងល្អប្រសើរនោះ ជំរុញដោយកំណើនភ្ញៀវទេសចរក្នុងស្រុកទៅលេងខេត្តសៀមរាបនៅក្នុងរយៈពេលចុងក្រោយនេះ  ដែលធ្វើឱ្យតម្រូវការនានាកើនឡើងវិញផងដែរ។ ម្យ៉ាងទៀត ភ្ញៀវទេសចរបរទេសមកកាន់ខេត្តសៀមរាបក៏ឃើញថា ចាប់ផ្ដើមមានកំណើនដែរ ហើយក្រៅពីនោះ មានផ្លូវស្អាតៗជាច្រើន ត្រូវបានសាងសង់រួចផងដែរ។

លោកបន្ថែមថា ក្រៅពីនេះ សៀមរាបក៏មានព្រលានយន្តហោះអន្តរជាតិថ្មី នៅប៉ែកខាងកើតទីរួមខេត្ត ដែលជាសក្ដានុពលមួយ សម្រាប់ទាក់ទាញវិនិយោគិនមកកាន់ទឹកដី នៃខេត្តសៀមរាប។ លោកថា”ឆ្នាំ២០២៣ ខ្ញុំគិតថាវានឹងល្អប្រសើរជាង៣ឆ្នាំមកនេះ តែបើឱ្យដូចស្ថានភាពមុនកូវីដ១៩ ប្រហែលជាត្រូវការពេលវេលា២ទៅ៣ឆ្នាំទៀត”។

រាជរដ្ឋាភិបាលកម្ពុជាក៏បាន និងកំពុងជំរុញកសាងទីក្រុងសៀមរាបឱ្យក្លាយជាទីក្រុងឆ្លាតវៃ នាពេលឆាប់ៗនេះផងដែរ ដែលទីក្រុងឆ្លាតវៃនេះ នឹងក្លាយជាធ្នាក់ដ៏សំខាន់ សម្រាប់ទាក់ទាញដល់បណ្ដាវិនិយោគិន ទេសចរបរទេសមកកាន់ទឹកដី នៃតំបន់វប្បធម៌របស់កម្ពុជា។

អ្នកជំនាញនៃវិស័យអចលនទ្រព្យ ជាច្រើននៅក្នុងប្រទេសកម្ពុជា ក៏បានបង្ហាញពីសុទិដ្ឋនិយមចំពោះស្ថានភាពអចលនទ្រព្យ នៅក្នុងឆ្នាំ២០២៣ខាងមុខនេះដែរ។

លោកស្រី អាន សុធីតា នាយិកាប្រតិបត្តិក្រុមហ៊ុន PropNex Cambodia បានលើកឡើងថា ឆ្នាំ២០២២នេះ កម្ពុជាបានធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ដែលកិច្ចប្រជុំទាំងនេះ បានអញ្ជើញភ្ញៀវអន្តរជាតិជាច្រើនចូលរួម ដែលជាការបង្ហាញពីកម្ពុជាទៅកាន់បណ្ដាភ្ញៀវអន្តរជាតិទាំងនោះ ហើយក៏ជាផ្សព្វផ្សាយពីកម្ពុជាទៅកាន់ឆាកអន្តរជាតិផងដែរ។ តាមរយៈសកម្មភាពនេះ យើងអាចរំពឹងថា នៅឆ្នាំ២០២៣ខាងមុខនេះ នឹងមានការហូរចូលឡើងវិញ នៃវិនិយោគិនបរទេស និងធ្វើឱ្យសកម្មភាព នៃការវិនិយោគក៏នឹងចាប់ផ្ដើមឡើងវិញផងដែរ៕

ដោយ: សហការី

ភ្នំពេញ៖ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានបើកកិច្ចប្រជុំពិភាក្សាការងារមួយ ជាមួយក្រុមហ៊ុនមួយចំនួនមកពីសហរដ្ឋអាមេរិក ក្រោមកិច្ចសម្របសម្រួលរបស់លោក ហួត គីមឆា អគ្គកុងស៊ុលកិត្តិយសនៃស្ថានទូតកម្ពុជា ប្រចាំទីក្រុងឡុងដ៍ប៊ិច (Long Beach) សហរដ្ឋអាម៉េរិក កាលពីព្រឹកថ្ងៃទី៥ ខែធ្នូ ឆ្នាំ២០២២កន្លងទៅ នៅទីស្តីការក្រសួង។

នៅក្រោយជំនួបនេះ ក្រសួងពាណិជ្ជកម្មបានឱ្យដឹងថា តាមរយៈកិច្ចប្រជុំពិភាក្សានេះ ក្រុមហ៊ុនអាមេរិកធំៗជាច្រើន បានសម្តែងឆន្ទៈក្នុងការវិនិយោគដោយផ្ទាល់នៅកម្ពុជា ក្នុងវិស័យកសិកម្ម ដើម្បីនាំចេញកសិផលទៅកាន់ទីផ្សារសហរដ្ឋអាមេរិក និងពិភពលោក។

តាមតំណាងប្រតិភូក្រុមហ៊ុនសហរដ្ឋអាមេរិក ដែលបានចូលរួមក្នុងកិច្ចប្រជុំនេះ បានជម្រាបជូនលោករដ្ឋមន្ត្រីក្រសួងពាណិជ្ជកម្មថា ដោយសារវិបត្តិនានា ដែលបាននិងកំពុងកើតឡើង នៅក្នុងតំបន់និងពិភពលោក សហរដ្ឋអាមេរិកក៏ជាប្រទេសមួយ ដែលបានទទួលរងផលប៉ះពាល់ តាមរយៈការហក់ឡើងខ្លាំង នៃថ្លៃទំនិញនៅក្នុងទីផ្សារ ពិសេសគឺផលិតផលចំណីអាហារ និងកសិផល។

កម្ពុជាគឺជាឃ្លាំងស្តុកផលិតផលកសិកម្មដ៏សំខាន់មួយ ដែលអាចចូលរួមចំណែកដ៏សំខាន់ក្នុងការធានាសន្តិសុខស្បៀងក្នុងតំបន់ និងពិភពលោក ពិសេសគឺសហរដ្ឋអាម៉េរិកតែម្តង ហើយទំនិញសំខាន់ៗដែលជាសក្តានុពលរបស់កម្ពុជា រួមមាន គ្រាប់ស្វាយចន្ទី ស្វាយ ដូង ម្រេច អំបិល ទឹកត្រី ទឹកស៊ីអ៊ីវ ស៊ុត ត្រី ក្រូចពោធិ៍សាត់ អាហារសម្រន់ ស្រូវ-អង្ករ និងផលិតផលក្តារបន្ទះ ជាដើម។

លោកបានបន្តថា រដ្ឋដែលជាទីផ្សារសក្តានុពលសំខាន់ៗ នៅសហរដ្ឋអាមេរិក សម្រាប់ការនាំចេញផលិតផលកសិកម្មពីកម្ពុជា រួមមាន ក្រុង Lowell នៃរដ្ឋ Massachusetts រដ្ឋ California រដ្ឋ Seattle និងរដ្ឋ Texas ហើយជាពិសេសគឺរដ្ឋដែលមាន Cambodian Town និងមានប្រជាជនខ្មែររស់នៅច្រើន។

លោករដ្ឋមន្ត្រី ប៉ាន សូរស័ក្តិ បានសម្តែងមតិស្វាគមន៍យ៉ាងកក់ក្តៅ ព្រមទាំងថ្លែងអំណរគុណយ៉ាងជ្រាលជ្រៅ ចំពោះគណៈប្រតិភូក្រុមហ៊ុនសហរដ្ឋអាមេរិក ដែលបានបង្ហាញឆន្ទះខ្ពស់ ក្នុងការវិនិយោគ និងនាំចេញផលិតផលកសិកម្មពីកម្ពុជាទៅកាន់ទីផ្សារសហរដ្ឋអាម៉េរិក និងពិភពលោក។

លោកបានលើកឡើងថា ដើម្បីបង្កភាពងាយស្រួលក្នុងការនាំចេញទៅកាន់ទីផ្សារបរទេស និងជៀសវាងការជួបប្រទះបញ្ហាភូតគាមអនាម័យនិងស្តង់ដារផលិតផល ក្រសួងពាណិជ្ជកម្មកម្ពុជា បានលើកទឹកចិត្តដល់វិនិយោគិន និងពាណិជ្ជករសហរដ្ឋអាមេរិក ឱ្យវិនិយោគលើការកែច្នៃ-វេចខ្ចប់កសិផល ដោយផ្ទាល់នៅកម្ពុជាជាមុនសិន រួចទើបនាំចេញ ជាជាងការនាំចេញកសិផលស្រស់ ដោយមិនមានការកែច្នៃជាមុន។

លោករដ្ឋមន្ត្រីបន្ថែមទៀតថា កសិផលកម្ពុជាមួយចំនួនបានទទួលការចុះបញ្ជីម៉ាកសម្គាល់ភូមិសាស្ត្រទំនិញ (GI) រួចរាល់ ហើយមួយចំនួនទៀត កំពុងស្ថិតក្នុងដំណាក់កាលនៃការស្នើសុំ ដែលនេះស្ដែងឲ្យឃើញថា កសិផលកម្ពុជា គឺជាផលិតផលមានគុណភាពខ្ពស់ និងមានការទទួលស្គាល់ជាអន្តរជាតិ។

នៅក្នុងអំឡុងកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅកម្ពុជា នាពេលកន្លងមក លោកប្រធានាធិបតីសហរដ្ឋអាម៉េរិក Joe Biden បានបញ្ជាក់ច្បាស់ៗអំពីជំហររបស់សហរដ្ឋអាម៉េរិក ក្នុងការចាត់ថ្នាក់តំបន់អាស៊ាន ជាដៃគូរយុទ្ធសាស្ត្រគ្រប់ជ្រុងជ្រោយ។

នេះគឺជាកាលានុវត្តភាពថ្មីដ៏សំខាន់មួយ ដែលវិនិយោគិននិងពាណិជ្ជករសហរដ្ឋអាម៉េរិក បានសម្លឹងឃើញកាន់តែច្បាស់ ថាកម្ពុជាក៏ជាដៃគូវិនិយោគ-ពាណិជ្ជកម្មដ៏សំខាន់មួយ ហើយនេះក៏ជាកាលានុវត្តភាពដ៏សំខាន់ សម្រាប់វិនិយោគិន និងពាណិជ្ជករកម្ពុជា ក្នុងការស្វែងរកដៃគូវិនិយោគ និងនាំចេញទៅកាន់ទីផ្សារសហរដ្ឋអាម៉េរិក ផងដែរ៕

ដោយ: លាងហួរ

ព្រះសីហនុ: កំពង់ផែស្វយ័តក្រុងព្រះសីហនុ (PAS) កំពុងស្ថិតក្នុងដំណើរការផ្ទេរកម្មសិទ្ធិទៅឱ្យអ្នកទិញ បន្ទាប់ពីពួកគេបានចុះកិច្ចសន្យាលក់ និងទិញលក់ដីទំហំ១៣០ហិកតា ស្ថិតក្នុងឃុំបិតត្រាំង ខេត្តព្រះសីហនុ។

នេះ​បើ​តាម​របាយ​ការណ៍​ចុង​ក្រោយ ​ដែល​ចេញ​ផ្សាយ​កាល​ពី​ម្សិល​មិញ ​នៅលើ​ផ្សារ​ហ៊ុន​កម្ពុជា​។

យោងតាមរបាយការណ៍ប្រចាំត្រីមាសទី៣ឆ្នាំ២០២២របស់ PAS ចេញផ្សាយនៅលើផ្សារមូលបត្រកម្ពុជា (CSX) បានបង្ហាញថា ក្រុមហ៊ុនកំពង់ផែចុះបញ្ជីបានទទួលប្រាក់កក់ចំនួន២លានដុល្លារ នៅថ្ងៃចុះហត្ថលេខាលើកិច្ចព្រមព្រៀងពីអ្នកទិញ ដែលសន្យាថា នឹងបង់ចំនួនដែលនៅសេសសល់នៅពេលបញ្ចប់សំបុត្រកម្មសិទ្ធិ (LMAP) ក្រោយពីភាគីទាំង២បានព្រមព្រៀងគ្នាកំណត់តម្លៃ២០ដុល្លារក្នុងមួយម៉ែត្រការ៉េ។

របាយការណ៍ដដែលក៏បានបញ្ជាក់ផងដែរថា កិច្ចសន្យាសរុបមានតម្លៃ២៦លានដុល្លារ ហើយដំណើរការនៃការផ្ទេរកម្មសិទ្ធិមិនទាន់ត្រូវបានបញ្ចប់នៅឡើយទេ រហូតមកដល់ពេលនេះ។ ទំហំ​ដី​នោះអាច​នឹង​ត្រូវ​បាន​កាត់​បន្ថយ ដោយសារ​ការ​សាងសង់​ផ្លូវ​សាធារណៈ​កំពុង​តែ​កើត​ឡើង​នៅ​ទីនោះ។

ចំណែកការគ្រប់គ្រងកំពុងស្ថិតក្នុងដំណើរការផ្ទេរកម្មសិទ្ធិប្លង់រឹង ហើយទំហំដីជាក់ស្តែងនឹងត្រូវបានបញ្ជាក់ឱ្យដឹងនៅពេលដែលក្រសួងរៀបចំដែនដី នគរូបនីយកម្ម និងសំណង់ (MLMUPC) ចេញប័ណ្ណកម្មសិទ្ធិ។

របាយ​ការណ៍​ដដែលបាន​បន្តបង្ហាញ​ផង​ដែរ​ថា អ្នក​ទិញ​នឹង​ទូទាត់​តាម​ទំហំ ​ដែល​បាន​បញ្ជាក់​ក្នុង​តម្លៃ២០ដុល្លារ​ក្នុង​មួយ​ម៉ែត្រការ៉េ។ PAS បានចុះហត្ថលេខាលើកិច្ចសន្យាលក់ និងទិញ ជាមួយអ្នកទិញដើម្បីលក់ក្បាលដីនៅទំនេរកាលថ្ងៃទី១០ ខែវិច្ឆិកាឆ្នាំ២០២១៕

ដោយ: លាងហួរ

អន្តរជាតិ: អ្នកគ្រប់គ្រងផ្នែកភស្តុភាររបស់សហរដ្ឋអាមេរិកកំពុងត្រៀមខ្លួននឹងការពន្យារពេលដឹកជញ្ជូនទំនិញពីប្រទេសចិន នៅដើមខែមករាខាងមុខ ដែលបណ្តាលមកពីការលុបចោលការដឹកជញ្ជូនតាមរយៈកប៉ាល់ផ្ទុកកុងតឺន័រ និងការពន្យារពេលនៃការនាំចេញ ដោយក្រុមហ៊ុនដឹកជញ្ជូនតាមផ្លូវសមុទ្រ។

ក្រុមហ៊ុនដឹកជញ្ជូនបាន និងកំពុងអនុវត្តលើយុទ្ធសាស្ត្រគ្រប់គ្រងសមត្ថភាពយ៉ាងសកម្ម ដោយប្រកាសអំពីការផ្អាកសេវាកម្ម ដើម្បីធ្វើឱ្យមានតុល្យភាព រវាងការផ្គត់ផ្គង់ និងតម្រូវការ។

លោក Joe Monaghan នាយកប្រតិបត្តិ នៃក្រុមហ៊ុនដឹកជញ្ជូនពិភពលោក បានមានប្រសាសន៍ថា ការធ្លាក់ចុះឥតឈប់ឈរ នៃអត្រាដឹកទំនិញកុងតឺន័រពីតំបន់អាស៊ី បណ្តាលមកពីការដួលរលំនៃតម្រូវការ។

យោងតាមទិន្នន័យចុងក្រោយបង្អស់របស់ CNBC Supply Chain Heat Map បានឱ្យដឹងថា ការបញ្ជាទិញផលិតផលរបស់សហរដ្ឋអាមេរិកពីប្រទេសចិនបានធ្លាក់ចុះ៤០ភាគរយ។ ជាលទ្ធផលនៃការថយចុះការបញ្ជាទិញនេះ ក្រុមហ៊ុន Worldwide Logistics បានបញ្ជាក់ឱ្យដឹងថា ក្រុមហ៊ុនប៉ាន់ស្មានថា រោងចក្រនានាក្នុងប្រទេសចិនអាចនឹងបិទទ្វារចំនួន២សប្តាហ៍មុនថ្ងៃបុណ្យចូលឆ្នាំចិន ដែលនឹងប្រព្រឹត្តទៅនៅថ្ងៃទី២១ ខែមករា ឆ្នាំ២០២៣។

លោក Monaghan បានមានប្រសាសន៍ថា ក្រុមហ៊ុនផលិតជាច្រើននឹងត្រូវបិទនៅដើមខែមករាសម្រាប់ថ្ងៃឈប់សម្រាក ដែលលឿនជាងឆ្នាំមុន។

ក្រុមហ៊ុនស្រាវជ្រាវខ្សែសង្វាក់ផ្គត់ផ្គង់ Project 44 បានបញ្ជាក់ឱ្យដឹងថា បន្ទាប់ពីពាណិជ្ជកម្មឈានដល់កម្រិតបំបែកកំណត់ត្រាក្នុងកំឡុងពេលបិទខ្ទប់ ចំនួននាវា ដែលដឹកទំនិញពីប្រទេសចិនទៅសហរដ្ឋអាមេរិក បានត្រឡប់មកវិញយ៉ាងច្រើន ចាប់តាំងពីចុងរដូវក្តៅឆ្នាំ២០២២ រួមទាំងការធ្លាក់ចុះ២១ភាគរយ នៅក្នុងបរិមាណកុងតឺន័រ សរុបរវាងខែសីហា និងវិច្ឆិកា៕

ដោយ៖ សុផារី

ភ្នំពេញ៖ ផ្សារទំនើបអ៊ីអនម៉លមានជ័យ (AEON MALL 3) ដែលស្ថិតនៅបណ្តោញផ្លូវ៦០ម៉ែត្រ នឹងបើកឱ្យដំណើរការសាកល្បងនៅថ្ងៃទី១៥ ខែធ្នូ ឆ្នាំ២០២២ ខាងមុខនេះ។ នេះបើតាមសេចក្តីជូនដំណឹងរបស់របស់ក្រុមហ៊ុន AEON MALL ដែលចេញផ្សាយនៅថ្ងៃទី០៥ ខែធ្នូ ឆ្នាំ២០២២។

ផ្សារទំនើបអ៊ីអនមានជ័យនេះមានទីតាំងស្ថិតនៅតាមបណ្តោយមហាវិថី ហ៊ុន សែន (ផ្លូវ៦០ម៉ែត្រ) ចម្ងាយ៨គីឡូម៉ែត្រខាងត្បូងកណ្តាលរាជធានីភ្នំពេញ ខណៈតំបន់នេះកំពុងអភិវឌ្ឍជាទីក្រុងរណប ដែលនឹងមានកំណើនប្រជាជន និងគម្រោងអភិវឌ្ឍជាច្រើននៅថ្ងៃអនាគត។

ការបើកដំណើរការគម្រោងផ្សារទំនើបដ៏ធំមួយនេះបានបន្ថែមការផ្គត់ផ្គង់ចូលទៅក្នុងទីផ្សារលក់រាយ ដែលមានស្រាប់នៅក្នុងតំបន់ភាគខាងត្បូង រាជធានីនៅភ្នំពេញ ហើយជំរុញឱ្យតំបន់នេះកាន់តែមានភាពអ៊ូអរ និងមានសក្តានុពលកាន់តែខ្លាំងមួយកម្រិតទៀត។

អ្នកនាង ជិន ច័ន្ទដាលុច្ស ប្រធានផ្នែកវាយតម្លៃ នៃក្រុមហ៊ុនអចលនទ្រព្យ CBRE Cambodia បានមានប្រសាសន៍កាលពីពេលថ្មីៗនេះថា គម្រោងផ្សារទំនើបអ៊ីអន៣ ដែលនឹងបើកដំណើរការនេះនឹងរួមចំណែកស្ទើរ៥៥ភាគរយ នៃការផ្គត់ផ្គង់ក្នុងទីផ្សារនេះ ដែលរំពឹងទុកថានឹងមានការផ្គត់ផ្គង់ថ្មីចំនួន២០៧.០០០ម៉ែត្រការ៉េ ពេញមួយឆ្នាំ២០២២។

អ្នកនាងបញ្ជាក់ថា ក្នុងចំណោមនោះ ៤៥ភាគរយត្រូវបានបើកដំណើរការរួចរាល់ត្រឹមត្រីមាសទី៣ឆ្នាំនេះ​ ខណៈ៥៥ភាគរយទៀតត្រូវបានរំពឹងថា នឹងបន្តផ្គត់ផ្គង់ទៅក្នុងកំឡុងត្រីមាសចុងក្រោយនៃឆ្នាំ២០២២ ហើយភាគច្រើនបានមកពីការបើកដំណើរការនៃផ្សារទំនើប Aeon Mall 3 នេះ។

យោងតាមទិន្នន័យស្រាវជ្រាវរបស់ក្រុមហ៊ុន CBRE Cambodia នៅក្នុងត្រីមាសទី៣ ឆ្នាំ២០២២កន្លងមក មានគម្រោងផ្សារទំនើបចំនួន៣ធំៗ ដែលបានបើកដំណើរការនៅក្នុងប៉ែកខាងត្បូងនៃក្រុងភ្នំពេញ រួមមាន K Mall ព្រែកត្នោត 60m Community mall និង Chip Mong 271 Mega Mall៕

សុខុម

ក្រុងឡុងដ៍: គម្រោងកែវយឺតវិទ្យុដ៏ធំបំផុតក្នុងលោក Square Kilometre Array (SKA) ដែលស្ថិតក្នុងចំណោមគម្រោងវិទ្យាសាស្ត្រដ៏ធំមហិមាប្រចាំសតវត្សរ៍ទី២១ បានចាប់ផ្ដើមដំណើរការសាងសង់ហើយកាលពីថ្ងៃច័ន្ទ ទី៥ ខែធ្នូ ហើយគ្រោងនឹងបញ្ចប់ជាស្ថាពរនៅឆ្នាំ២០២៨។

ដោយសាងសង់លយចូលក្នុងប្រទេសចំនួន២ គឺអាហ្វ្រិកខាងត្បូង និងអូស្ត្រាលី ហើយមានទីស្នាក់ការកណ្ដាលនៅប្រទេសអង់គ្លេស កែវយឹតនេះនឹងមានតួនាទីដោះស្រាយចម្ងល់ធំៗបំផុតជុំវិញតារាវិទ្យា។ នេះបើយោងតាមការចុះផ្សាយរបស់សារព័ត៌មាន BBC ក្នុងថ្ងៃដដែល។

កែវយឹតនេះនឹងធ្វើតេស្តយ៉ាងសុក្រឹតបំផុតទៅលើទ្រឹស្ដីរបស់លោក អាញស្ដាញ (Einstein) ដែលជាអ្នកវិទ្យាសាស្រ្ត និងជាទស្សនវិទូដ៏ល្បីល្បាញមួយរូបក្នុងពិភពលោក និងសូម្បីរុករកមនុស្សក្រៅភពទៀតផង។

គណៈប្រតិភូមកពី៨ប្រទេសដែលដឹកនាំគម្រោងនេះ បានចូលរួមក្នុងពិធីបញ្ចុះបឋមសិលាបើកការដ្ឋានសាងសង់កែវយឹតនេះនៅតំបន់ដាច់ស្រយាល Murchison ក្នុងទឹកដីអូស្ត្រាលី ភាគខាងលិច និងនៅ Karoo ក្នុងទឹកដីអាហ្វ្រិកខាងត្បូង។

ផ្អែកតាមផែនការចំណាយចុងក្រោយបង្ហាញថា ការសាងសង់គម្រោងកែវយឹតវិទ្យុធំបំផុតក្នុងពិភពលោកនេះនឹងចំណាយអស់ប្រមាណ២,១ពាន់លានដុល្លារអាមេរិក៕

ដោយ៖ សុខុម

ក្រុងគៀវ: ទំហំថវិកាដែលអ៊ុយក្រែន នឹងត្រូវការសម្រាប់កសាងប្រទេសឡើងវិញបានបន្តកើនឡើងឥតឈប់ឈរពីមួយថ្ងៃទៅមួយថ្ងៃ ខណៈកងទ័ពរុស្ស៊ី បន្តបង្កើនការវាយប្រហារទៅលើប្រទេសនេះទាំងយប់ទាំងថ្ងៃ ដោយតម្រង់គោលដៅបំផ្លិចបំផ្លាញហេដ្ឋារចនាសម្ព័ន្ធសំខាន់ៗដើម្បីឱ្យប្រទេសនេះទន់ដៃទន់ជើងឆាប់ចុះចាញ់សង្គ្រាម។

កាលពីខែកញ្ញា កន្លងទៅនេះ ធនាគារពិភពលោក ឬ World Bank បានប៉ាន់ប្រមាណថា អ៊ុយក្រែន នឹងត្រូវការទំហំថវិកាដល់ទៅប្រមាណ៣៥០ពាន់លានដុល្លារអាមេរិក សម្រាប់កសាងប្រទេសឡើងវិញ ក្រោយពីភ្លើងសង្គ្រាមរលត់។

ទោះជាយ៉ាងណា កាលពីមួយខែមុន រដ្ឋាភិបាលអ៊ុយក្រែន បានប៉ាន់ប្រមាណថា ខ្លួននឹងត្រូវការទំហំថវិការហូតដល់ទៅប្រមាណ៧៥០ពាន់លានដុល្លារអាមេរិក ហើយពេលនេះប្រធានាធិបតី វ៉ូឡូឌីមៀ ហ្សេឡិនស្គី បញ្ជាក់ថា អ៊ុយក្រែន នឹងត្រូវការថវិការហូតដល់ទៅ១ទ្រីលានដុល្លារអាមេរិក ឯណោះសម្រាប់កសាងប្រទេសឡើងវិញ។ នេះបើយោងតាមសារព័ត៌មាន Aljazeera ចុះផ្សាយកាលពីថ្ងៃអាទិត្យ ទី៤ ខែធ្នូ។

ទន្ទឹមនេះ យោងតាមសារព័ត៌មាន The Wall Street Journal ចុះផ្សាយកាលពីថ្ងៃទី២៦ ខែកញ្ញា កន្លងទៅបង្ហាញថា សង្គ្រាមរុស្ស៊ី នៅក្នុងប្រទេសអ៊ុយក្រែន នឹងធ្វើឱ្យសេដ្ឋកិច្ចពិភពលោកខាតបង់រហូតដល់ទៅ២,៨ទ្រីលានដុល្លារអាមេរិក។

ប្រាកដណាស់ ទំហំថវិកាសម្រាប់កសាងប្រទេសឡើងវិញនេះនឹងបន្តកើនឡើងទៀត ប្រសិនបើសង្គ្រាមរុស្ស៊ី-អ៊ុយក្រែន បន្តអូសបន្លាយកាន់តែយូរ។

រដ្ឋាភិបាលក្រុងមូស្គូ ក្រោមការដឹកនាំដោយបុរសខ្លាំង ពោលគឺប្រធានាធិបតី វ៉្លាឌីមៀ ពូទីន បានបញ្ឆេះភ្លើងសង្គ្រាមចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ ដើមឆ្នាំ២០២២ នេះដោយសារខ្លាចអ៊ុយក្រែន សុំចូលជាសមាជិកសហភាពអឺរ៉ុប និងជាពិសេសសមាជិកអង្គការបក្សសម្ព័ន្ធយោធាណាតូ បានសម្រេច ខណៈខ្លួនចង់ទុកប្រទេសនេះជាតំបន់ទ្រនាប់ដើម្បីការពារសន្តិសុខជាតិរបស់ខ្លួន។

ទន្ទឹមនឹងនេះ លោក Mykhailo Podolyak ទីប្រឹក្សាប្រធានាធិបតីអ៊ុយក្រែន បានទម្លាយឱ្យដឹងថា ទាហានអ៊ុយក្រែន សរុបចំនួន១៣,០០០នាក់ត្រូវបានពលីជីវិតក្នុងសមរភូមិ ចាប់តាំងពីរុស្ស៊ី បានឈ្លានពានប្រទេសនេះកាលពី៩ខែមុន។ នេះបើយោងតាមសារព័ត៌មាន Aljazeera ចុះផ្សាយកាលពីថ្ងៃសុក្រ ទី០២ ខែធ្នូ។

សារព័ត៌មានដដែលបញ្ជាក់ថា កាលពីខែមុន ឧត្តមសេនីយ៍កំពូលរបស់សហរដ្ឋអាមេរិក បានប៉ាន់ប្រមាណថា ទាហានរុស្ស៊ី រហូតដល់ទៅជាង១០០.០០០នាក់បានស្លាប់ ឬរបួសនៅអ៊ុយក្រែន៕

ដោយ៖ សុផារី

ភ្នំពេញ៖ ធនាគារអភិវឌ្ឍន៍អាស៊ី (ADB) នៅថ្ងៃទី៦ ខែធ្នូ ឆ្នាំ២០២២នេះបានអនុម័តប្រាក់កម្ចីផ្អែកលើគោលនយោបាយចំនួន៥0លានដុល្លារ សម្រាប់កម្មវិធីពាណិជ្ជកម្ម និងសមត្ថភាពប្រកួតប្រជែង ដើម្បីគាំទ្រដល់រាជរដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច និងជំរុញសមត្ថភាពប្រកួតប្រជែងជាសកលរបស់ប្រទេស។

នេះបើតាមសេចក្តីប្រកាសព័ត៌មានរបស់ ADB ដែលចេញផ្សាយនៅថ្ងៃទី៦ ខែធ្នូ ឆ្នាំ២០២២នេះ។

កម្មវិធីនេះនឹងគាំទ្រដល់ការស្តារសេដ្ឋកិច្ចក្រោយកូវីដ១៩ របស់កម្ពុជាតាមរយៈការជួយ ដល់កំណែទម្រង់របស់រាជរដ្ឋាភិបាល ដើម្បីបង្កើនការវិនិយោគ និងបរិយាកាសធុរកិច្ច ជំរុញកំណើនសហគ្រាសខ្នាតតូចនិងមធ្យម (MSMEs) និងកែលម្អគោលនយោបាយពាណិជ្ជកម្ម និងកិច្ចសម្រួលពាណិជ្ជកម្ម។

សេដ្ឋវិទូជាន់ខ្ពស់របស់ ADB លោក Sion L. Morton មានប្រសាសន៍ថា “ជំងឺរាតត្បាតកូវីដ១៩ បានជះឥទ្ធិពលយ៉ាងធ្ងន់ធ្ងរដល់វិស័យសំខាន់ៗនៃសេដ្ឋកិច្ចកម្ពុជា ដូចជាវិស័យកាត់ដេរ ផលិតស្បែកជើង និងវាយនភណ្ឌ ក៏ដូចជាវិស័យទេសចរណ៍ និងសំណង់។ កំណែទម្រង់ក្រោមកម្មវិធីនេះនឹងជួយដល់គោលដៅស្តារឡើងវិញក្រោយជំងឺរាតត្បាតរបស់កម្ពុជា ដោយត្រួសត្រាយផ្លូវសម្រាប់អាជីវកម្មរីកចម្រើន និងឈានទៅរកផ្នែកតម្លៃបន្ថែមកាន់តែខ្ពស់ និងសម្របខ្លួនទៅនឹងទិដ្ឋភាពពាណិជ្ជកម្មដែលកំពុងផ្លាស់ប្តូរ” ។

កម្មវិធីពាណិជ្ជកម្ម និងសមត្ថភាពប្រកួតប្រជែង នឹងជួយកែលម្អបរិយាកាសធុរកិច្ចទាំងមូលសម្រាប់ក្រុមហ៊ុនក្នុងស្រុក និងក្រុមហ៊ុនបរទេស។ ទាក់ទងនឹងអនុកម្មវិធីដំបូងនេះ រាជរដ្ឋាភិបាលបានអនុម័តច្បាប់វិនិយោគថ្មី ដើម្បីផ្តល់កិច្ចការពារផ្លូវច្បាប់សម្រាប់អ្នកវិនិយោគ រួមទាំងអ្នកវិនិយោគនៅក្នុងតំបន់សេដ្ឋកិច្ចពិសេស និងបានធ្វើឱ្យប្រសើរឡើងនូវផតថលអាជីវកម្មតាមអ៊ីនធឺណិត ដើម្បីអាចឱ្យការចេញអាជ្ញាប័ណ្ណអាជីវកម្មឌីជីថលឯកទេសបានទាន់ពេលវេលា។

កម្មវិធីនេះគាំទ្រដល់ការអភិវឌ្ឍន៍ និងការធ្វើពិពិធកម្ម MSMEs ធ្វើអោយប្រសើរឡើងនូវលទ្ធភាពទទួលបានហិរញ្ញវត្ថុ និងការបង្កើតទីផ្សារថ្មីសម្រាប់ពួកគេ។ វារួមបញ្ចូលទាំងការសម្រួលនិយមន័យផ្លូវច្បាប់នៃសហគ្រាសធុនតូច និងមធ្យម និងដាក់ចេញកញ្ចប់ជំនួយដែលផ្តល់មូលនិធិដោយរាជរដ្ឋាភិបាលដើម្បីផ្តល់ជំនួយ និងជំនួយបច្ចេកទេសដល់សហគ្រាសធុនតូច និងមធ្យមនៅក្នុងឧស្សាហកម្មអាទិភាពដែលមានការចូលរួមពីស្ត្រីច្រើន។

កម្មវិធីនេះក៏នឹងជួយកម្ពុជាធ្វើឱ្យប្រសើរឡើងនូវការអនុវត្តកិច្ចព្រមព្រៀងពាណិជ្ជកម្មក្នុងតំបន់ និងពង្រឹងការងារសម្របសម្រួលពាណិជ្ជកម្ម ដើម្បីផ្តល់ឱកាសកាន់តែច្រើនសម្រាប់ធុរកិច្ចកម្ពុជាក្នុងការនាំចេញទំនិញរបស់ពួកគាត់។ ទាក់ទងនឹងកំណែទម្រង់ ក្រោមអនុកម្មវិធីទី១នេះ រាជរដ្ឋាភិបាលបានបង្កើតគណៈកម្មាធិការជាតិកិច្ចសម្រួលពាណិជ្ជកម្ម និងអនុម័តផែនទីបង្ហាញផ្លូវថ្នាក់ជាតិស្តីពីការសម្រួលពាណិជ្ជកម្ម៕