ដោយ៖ សុផារី

ភ្នំពេញ៖ ក្នុងរយៈពេល៨ខែឆ្នាំ២០២២នេះ កម្ពុជាទទួលបានភ្ញៀវទេសចរអន្តរជាតិចូលមកទស្សនាមានប្រមាណ១លាននាក់ កើនឡើង៥៨០% ប្រៀបធៀបនឹងឆ្នាំ២០២១ ខណៈភ្ញៀវទេសចរជាតិអន្តរជាតិមានស្រាប់នៅក្នុងស្រុកចេញដើរកម្សាន្ត៨លាន៥សែននាក់ កើនឡើង២៤៥% ធៀបនឹងឆ្នាំ២០២១ដូចគ្នា។

នៅក្នុងពិធីប្រគល់វិញ្ញាបនបត្របញ្ជាក់ការសិក្សាដល់សិក្ខាកាមបញ្ចប់ការសិក្សាជំនាញឆុងកាហ្វេ និងភេសជ្ជៈនៅក្រសួងទេសចរណ៍ លោក ថោង ខុន រដ្ឋមន្ត្រីក្រសួងទេសចរណ៍បានថ្លែងថា តាមរយៈការទទួលបានតួលេខភ្ញៀវអន្តរជាតិមកទស្សនាកម្ពុជាប្រមាណ១លាននាក់នេះ បើប្រៀបធៀបនឹងរយៈពេល០៨ខែ ក្នុងឆ្នាំ២០១៩វិញ គឺថយចុះ៨៥%។

បើយោងតាមការព្យាករណ៍ចុងក្រោយរបស់ក្រសួងទេសចរណ៍ បានបង្ហាញថា កម្ពុជាយើងអាចទទួលបានទេសចរអន្តរជាតិប្រមាណ១លាន៥សែននាក់ទៅ២លាននាក់ នៅក្នុងឆ្នាំ២០២២នេះ។

លោក ថោង ខុន បន្តថា យ៉ាងណាក៏ដោយ នៅក្នុងដំណាក់កាលនេះ សំគាល់ឃើញថា បណ្តាអាជីវកម្មនានា ក្នុងវិស័យទេសចរណ៍នៅតែបន្តមានតម្រូវការខ្ពស់នៃការចេញដើរ​កម្សាន្តរបស់​ភ្ញៀវទេសចរជាតិអន្តរជាតិ ដែលមានស្រាប់នៅក្នុងស្រុក ហើយដើម្បីជម្រុញចលនាទេសចរ​ក្នុងស្រុកចេញដើរបាន អាជីវកម្មទេសចរណ៍គឺ ត្រូវសហការរៀបចំផ្តល់សេវាប្រកបដោយគុណភាព តម្លៃសមរម្យ ខណៈរាជរដ្ឋាភិបាលក៏បានបើកឱកាសឲ្យទេសចរអន្តរជាតិ​ដែលស្នាក់នៅកម្ពុជាបាន២ឆ្នាំ គឺអាចចូលទស្សនាអង្គរវត្តដោយមិនបាច់ទិញសំបុត្រ។

លោករដ្ឋមន្ត្រីបានបន្តថា ក្នុងបរិការណ៍ងើបឡើងវិញនៃវិស័យទេសចរណ៍នេះ ក្រសួង​ទេសចរណ៍ បានគិតគូរ និងយកចិត្តទុកដាក់ខ្ពស់លើ (១)ការពង្រឹងភាពជឿជាក់និងទំនុកចិត្ត (២)ការពង្រឹងគុណភាពសេវាកម្មប្រកបដោយគុណភាព និងសុវត្ថិភាពជូនភ្ញៀវទេសចរតាមគន្លងថ្មី (៣)ការបន្តជំរុញផ្សព្វផ្សាយទាក់ទាញទេសចរទាំងទេសចរអន្តរជាតិ និង​ទេសចរក្នុងស្រុក និង(៤)ការកំណត់តម្លៃសេវាកម្មសមរម្យដែល​ជាទិសដៅយុទ្ធសាស្រ្តក្នុងដំណាក់កាលទី២ នៃផែនការស្តារ និងលើកស្ទួយវិស័យទេសចរណ៍កម្ពុជា ក្នុងនិងក្រោយដំណាក់កាលជំងឺកូវីដ-១៩ ឆ្នាំ២០២០-២០២៥៕

ដោយ: លាងហួរ

ហាណូយ: ប្រទេសវៀតណាមគ្រោងអភិវឌ្ឍផែនការសាងសង់ផ្លូវក្រវាត់ក្រុងថ្មី និងព្រលានយន្តហោះអន្តរជាតិថ្មីមួយទៀត ក្នុងទីក្រុងហាណូយ ដែលជាផ្នែកមួយនៃទិសដៅក្នុងការកសាងប្រព័ន្ធដឹកជញ្ជូន និងភស្តុភារទំនើប សក្តិសមនឹងតម្រូវការអភិវឌ្ឍន៍របស់ទីក្រុងហាណូយ និងតំបន់ភាគខាងជើង។

ក្នុងនោះ ហេដ្ឋារចនាសម្ព័ន្ធនៃអាកាសយានដ្ឋាន Nội Bài ក៏ត្រូវបានរំពឹងថា នឹងត្រូវបានកែលម្អ និងពង្រីកផងដែរ។ ផ្លូវក្រវាត់ក្រុងលេខ៤ គ្រោងសាងសង់នៅខែមិថុនាឆ្នាំក្រោយ ហើយនឹងបញ្ចប់នៅឆ្នាំ២០២៧ ខណៈដែលផែនការសម្រាប់ផ្លូវក្រវាត់ក្រុងលេខ៥ នឹងបញ្ចប់នៅឆ្នាំ២០៣០។

នាពេលថ្មីៗនេះ លេខាបក្សទីក្រុងហាណូយ លោក Đinh Tiến Dũng បានអនុម័តផែនការសកម្មភាពថ្មីសម្រាប់រដ្ឋធានី ដែលកំណត់ទិសដៅអភិវឌ្ឍន៍ និងបេសកកម្មនៅឆ្នាំ២០៣០ ជាមួយនឹងចក្ខុវិស័យដល់ឆ្នាំ២០៤៥។

ផែនការសកម្មភាពនេះបានកំណត់គោលដៅ តម្រូវការ និងលក្ខណៈវិនិច្ឆ័យសំខាន់ៗចំនួន៤ព្រមទាំងបេសកកម្ម និងដំណោះស្រាយសំខាន់ៗចំនួន៨ ដែលមានបំណងបង្កើតការឯកភាពខ្ពស់ក្នុងរបៀបគិតគូរ និងសកម្មភាពរបស់បក្សប្រព័ន្ធនយោបាយ និងប្រជាជនទីក្រុងហាណូយ។  .

គណៈកម្មាធិការបក្សទីក្រុងហាណូយនឹងបន្តលើកកម្ពស់ការយល់ដឹងអំពីតួនាទី និងសារៈសំខាន់របស់រដ្ឋធានី។ ផែនការនេះក៏បានដាក់ចេញនូវភារកិច្ច និងដំណោះស្រាយចំនួន៦សម្រាប់ការអភិវឌ្ឍន៍សេដ្ឋកិច្ចយ៉ាងឆាប់រហ័ស និងនិរន្តរភាពនៅក្នុងទីក្រុង ដែលនឹងផ្អែកលើការរៀបចំរចនាសម្ព័ន្ធសេដ្ឋកិច្ចឡើងវិញ ការបង្កើតគំរូកំណើន និងការប្រមូលគ្រប់ធនធាន។

យោងតាមបេសកកម្មទាំងនេះ វិទ្យាសាស្ត្រ-បច្ចេកវិទ្យា និងនវានុវត្តន៍ជឿនលឿននឹងក្លាយជាកម្លាំងចលករនៅពីក្រោយការអភិវឌ្ឍន៍សេដ្ឋកិច្ច-សង្គម៕

ដោយ៖ សុធីតា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានវាយតម្លៃខ្ពស់លើកិច្ចប្រឹងប្រែងរវាងកម្ពុជា និងថៃ ក្នុងកំលុងពេលវិបត្តិជំងឺកូវីដ១៩ ដោយបន្តរក្សាបាននូវកំណើនពាណិជ្ជកម្ម ក៏ដូចជាកិច្ចសហប្រតិបត្តិការលើវិស័យដទៃទៀត។

ក្នុងជំនួបជម្រាបលារបស់លោក ប៉ានយ៉ារ៉ាក់ ពុលថាប់ ឯកអគ្គរាជទូតថៃប្រចាំកម្ពុជា ក្រោយបញ្ចប់បេសកកម្មការទូតនៅព្រឹកថ្ងៃចន្ទ ទី០៥ ខែកញ្ញា ឆ្នាំ២០២២នេះ សម្តេចតេជោ ហ៊ុន សែន បានគូសរំលេចថា ទោះបីស្ថិតនៅក្នុងកាលៈទេសៈនៃជំងឺកូវីដ១៩ ក៏ដោយកម្ពុជា និងថៃ បានខិតខំធ្វើការរួមគ្នាជំរុញទំនាក់ទំនងប្រទេសទាំងពីរ និងកិច្ចសហប្រតិបត្តិការលើវិស័យពាណិជ្ជកម្ម អប់រំ និងវិស័យដទៃទៀត បានយ៉ាងល្អជាទីមោទនភាព។

សម្រាប់សម្តេចតេជោ ហ៊ុន សែន ការរក្សានូវកំណើនពាណិជ្ជកម្ម ក៏ដូចជាកិច្ចសហប្រតិបត្តិការលើវិស័យនានាក្នុងកំលុងពេលវិបត្តិជំងឺកូវីដ១៩នេះ ក៏ដោយសារកិច្ចប្រឹងប្រែងរបស់មន្ត្រីនៃរាជរដ្ឋាភិបាលប្រទេសទាំងពីរ។ ក្នុងន័យនេះ សម្តេចតេជោ ហ៊ុន សែន បានថ្លែងអំណរគុណចំពោះលោក ប៉ានយ៉ារ៉ាក់ ពុលថាប់ ដែលបានខិតខំបំពេញបេសកកម្មការទូតធ្វើឱ្យប្រទេសទាំងពីរ មានទំនាក់ទំនង និងកិច្ចសហប្រតិបត្តិការកាន់តែល្អប្រសើរ។

លោក ប៉ានយ៉ារ៉ាក់ ពុលថាប់ ក៏បានលើកបង្ហាញពីកិច្ចប្រឹងប្រែងក្នុងការជំរុញទំនាក់ទំនង និងកិច្ចសហប្រតិបត្តិការនានា ក្នុងកំលុងពេលបំពេញបេសកកម្មការទូតនៅកម្ពុជាផងដែរ។ លោក បានជម្រាបសម្តេចតេជោថា ពេលលោកមកបំពេញបេសកកម្មការទូតនៅកម្ពុជា កាលពីឆ្នាំ២០១៨ លោកបានប្តេជ្ញាថា នឹងពង្រីកពង្រឹងកិច្ចសហប្រតិបត្តិការ និងទំនាក់ទំនងរវាងប្រទេសទាំងពីរឱ្យកាន់តែខ្លាំងឡើង ដោយឈរលើមូលដ្ឋានដែលមានស្រាប់។

លោកបន្តថា នៅពេលនេះ ការសន្យារបស់លោកបានលេចចេញជាផ្លែផ្កា ក្នុងនោះកិច្ចសហប្រតិបត្តិការ និងទំនាក់ទំនងរវាងកម្ពុជា-ថៃ ត្រូវបានពង្រីក និងពង្រឹង ពាណិជ្ជកម្មរវាងប្រទេសទាំងពីរ បានកើនឡើង១០ភាគរយ ទោះបីស្ថិតនៅក្នុងដំណាក់កាលនៃវិបត្តិជំងឺកូវីដ១៩ក៏ដោយ។ បន្ថែមពីលើនោះ វិស័យអប់រំ ការអភិវឌ្ឍធនធានមនុស្ស និងវិស័យដទៃទៀត ក៏មានការរីកចម្រើនផងដែរ។

របាយការណ៍ បានបង្ហាញថា ការដោះដូរពាណិជ្ជកម្មរវាងកម្ពុជា-ថៃ ឆ្នាំ២០២១ សម្រេចបានទឹកជិត៨ពាន់លានដុល្លារ កើនប្រមាណ១០ភាគរយ។ ក្នុងនោះការនាំចេញពីកម្ពុជាទៅថៃ មានទំហំទឹកប្រាក់៨៩៤លានដុល្លារអាមេរិក។ ចំណែកការនាំចូលពីថៃ មានទឹកប្រាក់៦,១ពាន់លានដុល្លារ។

លោក ប៉ានយ៉ារ៉ាក់ ពុលថាប់ បានគោរពថ្លែងអំណរគុណយ៉ាងជ្រាលជ្រៅជាទីបំផុត ជូនចំពោះសម្តេចតេជោ ហ៊ុន សែន និងរាជរដ្ឋាភិបាលកម្ពុជា ដែលតែងតែផ្តល់កិច្ចសហការល្អឱ្យបេសកកម្មការទូតរបស់លោកទទួលបានជោគជ័យត្រជះត្រចង់។

លោក ពុលថាប់ ក៏បានគោរពថ្លែងអំណរគុណសម្តេចតេជោ ដែលបានផ្តល់វ៉ាក់សាំងចាក់ជូនរូបលោក និងមន្ត្រីស្ថានទូតថៃប្រចាំនៅកម្ពុជា។ លោកក៏បានសម្តែងនូវការអបអរសាទរជូនចំពោះសម្តេចតេជោ និងរាជរដ្ឋាភិបាលកម្ពុជា ដែលបានទប់ស្កាត់ការរីករាលដាលជំងឺកូវីដ១៩ បានដោយជោគជ័យ ហើយក្នុងនាមប្រធានអាស៊ាន បានបើកប្រទេសឡើងវិញ ដឹកនាំកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធបានដោយជោគជ័យ ដែលជាការឆ្លុះបង្ហាញឱ្យឃើញពីតួនាទីដ៏រឹងមាំរបស់កម្ពុជាក្នុងឆាកអន្តរជាតិ៕

ដោយៈ សុផារី

ភ្នំពេញៈ អនុប្រធានសភាពាណិជ្ជកម្មកម្ពុជា បានជំរុញឱ្យមានការផលិតក្នុងស្រុកឱ្យបានច្រើន និងកាត់បន្ថយការនាំផលិតផលបរទេស ទើបអាចទប់ស្កាត់នូវផលប៉ះពាល់ ដែលបណ្តាលមកពីវិបត្តិកូវីដ-១៩ និងសង្គ្រា​មនៅអ៊ុយក្រែន ព្រមទាំងបញ្ហាផ្សេងៗ ដែលយើងមិនអាចមើលដឹងនាពេលខាងមុខ។

ថ្លែងក្នុងពិធីបើកវេទិកាម្ចាស់អាជីវកម្មកម្ពុជាស្តីពី ការប្រឈម និងឱកាសក្រោយកូវីដ-១៩ និងរលកសេដ្ឋកិច្ច សកលថ្មី នាព្រឹកថ្ងៃទី៣ ខែកញ្ញា ឆ្នាំ ២០២២ លោកបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា  បានមានប្រសាសន៍ថា ម្ចាស់ក្រុមហ៊ុនសហគ្រាស និងម្ចាស់អាជីវកម្មលើគ្រប់វិស័យ ត្រូវតែងាកមកពង្រឹង ការផលិតដោយខ្លួនឯងវិញ ដូចជា ម្ហូបអាហារវេចខ្ចប់រួចជាដើម ខណៈបច្ចុប្បន្ននេះ កម្ពុជាយើងនាំចូលស្ទើរតែ៨០ទៅ៩០ភាគរយទៅហើយ។

លោកបណ្ឌិតបន្តថា “ការពង្រឹងការផលិតខ្លួនឯងនេះ មានអត្ថប្រយោ​ជន៍ចំនួន៣ ទី១ រាជរដ្ឋាភិបាលបន្ធូរបន្ថយ ឬមិនយកពន្ធ ទី២ មានការផ្ដល់ហិរញ្ញប្បទានដែលមានការប្រាក់ថោក និងទី៣ មានការលើកទឹកចិត្ត និងមានការជួយរកទីផ្សារ”។

ជាមួយគ្នានេះ លោកបណ្ឌិតបានបញ្ជាក់ថា ដើម្បីពង្រឹងលើការងារផលិតក្នុងស្រុកឱ្យបានច្រើន និងមានតម្លៃថោក គឺទាមទារឱ្យម្ចាស់ក្រុមហ៊ុនសហគ្រាស និងអ្នកពាក់ព័ន្ធត្រូវចេះ សហការចងក្រងជាប្រព័ន្ធអេកូស៊ីស្ទឹម ចេះផ្គុំធនធានមនុស្ស និងផ្នែកហិរញ្ញប្បទាន ពោលគឺយើងត្រូវចងក្រងជាបណ្តាញតាមវិស័យ ព្រោះថាអាជីវកម្ម ឬចង្វាក់ផលិតកម្មមួយ មិនអាចរ៉ាប់រងខ្លួនឯងស្ទើរតែគ្រប់មុខនោះទេ ត្រូវចេះចែកគ្នាវិនិយោគ ទៅតាមផ្នែកនីមួយ​ៗ។

លោកមានប្រសាសន៍ថា “ដើម្បីរុញអេកូស៊ីស្ទឹមបានគឺសហគមន៍ ស្រុកគេមានច្រើន ដូចជាសហគមន៍ចេក ម្នាស់ សមាគមគោជាដើម ហើយខ្លាំងទៀត ដូច្នេះយើងត្រូវរៀនពីអេកូស៊ីស្ទឹមនេះ ហើយរួមបញ្ចូលជាមួយ គោលនយោបាយរបស់រាជរដ្ឋាភិបាល ដើម្បីជំរុញសេដ្ឋកិច្ចរួមគ្នានេះ បានដើរទៅមុខលឿន។ បើមិនដូច្នេះទេ គឺមុខរបរដូចគ្នានេះឯងនឹងមកតែប្រកូតតែគ្នាឯងហើយ ចុងក្រោយគឺដួលទាំងពីរនាក់” ៕

ដោយៈ គង់ សូរិយា

       កោះកុងៈ អភិបាលរងខេត្តកោះកុង លោក សុខ សុទ្ធីបានដឹកនាំក្រុមការងារចុះអនុវត្តវិធានរុះរើខ្ទម សង់គ្មានច្បាប់អនុញ្ញាត នៅឃុំកោះស្តេច ស្រុកគិរីសាគរ។

លោកសុខ សុទ្ធី អភិបាលរងខេត្តកោះកុង ដោយមានការណែនាំ និងអនុញ្ញាតពីលោកជំទាវ មិថុនា ភូថងអភិបាល នៃគណៈអភិបាលខេត្តកោះកុង បានអញ្ជើញដឹកនាំក្រុមការងារ ចុះអនុវត្តវិធាន រុះរើខ្ទម សង់គ្មានច្បាប់អនុញ្ញាត ស្ថិតនៅក្នុងទីតាំងដី ដែលរាជរដ្ឋាភិបាល បានជួលរយៈពេលវែងឱ្យក្រុមហ៊ុនយូញៀនវិនិយោគអភិវឌ្ឍ ស្ថិតនៅតំបន់អាងទឹក ភូមិពាមកាយ ឃុំកោះស្តេច ស្រុកគិរីសាគរ ខេត្តកោះកុង។

មុននឹងឈានមកដល់ការអនុវត្តវិធានរដ្ឋបាល រុះរើខ្ទមនៅថ្ងៃទី៣ ខែកញ្ញា ឆ្នាំ២០២២កន្លងមកនេះ រដ្ឋបាលឃុំ ស្រុក បានចុះណែនាំផ្ទាល់ និងចេញលិខិតជូនដំណឹងដល់ប្រជាពលរដ្ឋ ឱ្យរុះរើខ្ទមដោយខ្លួនឯងផងដែរ ប៉ុន្តែមានប្រជាពលរដ្ឋមួយចំនួនមិនចូលរួមសហការ។

តាមរបាយការណ៍របស់អាជ្ញាធរខេត្តបានឲ្យដឹងថា ខ្ទមសរុបដែលសាងសង់ និងរុះរើ មានចំនួន៧០ខ្ទម បង្គោលរបងលួសបន្លា។ បន្ទាប់ពីការអនុវត្តវិធាននេះរួច លោក សុខ សុទ្ធី បានណែនាំឱ្យក្រុមហ៊ុនយូញៀនរៀបចំការពារកុំឱ្យមានជនខិលខូច ចូលទន្ទ្រានកាន់កាប់ដីក្នុងទីតាំងវិនិយោគជាថ្មីទៀត និងសំណូមពរបងប្អូនប្រជាពលរដ្ឋ ឈប់ចិញ្ចឹមចិត្តលបលួចចូលទន្ទ្រានកាប់កាប់ដីរដ្ឋទៀត៕