ដោយៈ យិន លាងគង់សហស្ថាបនិកនិងអគ្គនាយកគេហទំព័រPropertyarea.asia
ភ្នំពេញៈ តើជោគវាសនារបស់កោះតៃវ៉ាន់ នឹងទៅជាយ៉ាងណា? ខណៈមេដឹកនាំក្បាលរ៉ឹងលោកស្រី ត្សៃ អ៉ឹងវិនកំពុងបង្ហាញសាច់ដុំ តាមរយៈការបង្ហាញភាពគឃ្លើនរបស់ខ្លួន ចំពោះមហាអំណាចចិន។
ការស្រេកឃ្លានឯករាជ្យរបស់ដែនកោះនេះ បានធ្វើឲ្យមន្រ្តីជាន់ខ្ពស់អាមេរិកជាច្រើនរូបទៅទស្សនកិច្ចនោះនេះ រួមទាំងប្រធានរដ្ឋសភាអាមេរិកលោកស្រីNancy Pelosi ដែលបាននិងកំពុងធ្វើឲ្យដែនកោះនេះ ជួបរឿងរំជើបរំជួល ហើយមេដឹកនាំដែនកោះ ដែលកំពុងមានសមានចិត្តជាមួយអាមេរិក បាននិងកំពុងត្រៀមខ្លួនទទួលមេដឹកនាំស្រ្តី ប្រធានរដ្ឋសភាអាមេរិករូបនេះ។
ការរំលោភលើគោលនយោបាយចិនតែមួយ
មេដឹកនាំអាមេរិកជាច្រើនជំនាន់មកហើយ តែងតែយកតៃវ៉ាន់ជាកូនអុករបស់ខ្លួន ដើម្បីចចារ និងយកប្រៀបលើប្រទេសចិន និងប្រើប្រាស់ដែនកោះ ដែលមានប្រជាជនជាង២៣លាននាក់នេះ សំរាប់អ្វីដែលពួកគេហៅថា “ការគាំទ្រដល់លទ្ឋិប្រជាធិបតេយ្យ” ប៉ុន្តែតាមការពិតមានអ្វីជាច្រើននៅពីក្រោយរឿងនេះ។
អ្វីៗដែលកើតមានទាំងអស់នោះ ស្ថិតនៅក្នុងសេនារីយោជាច្រើនរួមមាន ទី១ ការលេងល្បែងនយោបាយ ដើម្បីគេងចំណេញលើចិនទាំងសេដ្ឋកិច្ច នយោបាយ និងភូមិសាស្រ្តនយោបាយរបស់ខ្លួន ទី២ ការធ្វើដំណើរទស្សនកិច្ចជាបន្តបន្ទាប់របស់មេដឹកនាំ សមាជិកសភា និងមន្រ្តីជាន់ខ្ពស់អាមេរិកមួយចំនួន ជាការទះកំភ្លៀងចិន ទី៣ ប្រសិនជាមេដឹកនាំអាមេរិករូបណា សម្រេចចិត្តឲ្យតៃវ៉ាន់ទទួលបានឯករាជ ពួកគេនឹងទទួលបានផលចំណេញច្រើន លើផលប្រយោជន៍ភូមិសាស្រ្តនយោបាយ និងបង្ហាញថាខ្លួនជាមេដឹកនាំពិភពលោកដ៏ពិតប្រាកដ និងអាចធ្វើអ្វីក៏បាន តាមអ្វីដែលខ្លួនឯងចង់ធ្វើ។
ទោះជាយ៉ាងណា ជុំវិញដំណើរទស្សនកិច្ចរបស់លោកស្រីNancy Pelosi ទៅកាន់កោះតៃវ៉ាន់ ក៏មានការមិនស្រុះស្រួលគ្នា ជុំវិញរដ្ឋការរបស់លោកចូ បៃឌិនផងដែរ។
ជាក់ស្តែងនៅថ្ងៃនេះ ប្រមុខកាទូតលោកAnthony Blinken រដ្ឋមន្រ្តីការបរទេសអាមេរិក បាននិយាយថា ក្នុងនាមជាមន្រ្តីជាន់ខ្ពស់ទី៣ ក្នុងជួរ រដ្ឋាភិបាលសហរដ្ឋអាមេរិក លោកស្រី ណាន់ស៉ី ផេឡូស៉ី (Nancy Pelosi) មានសេរីភាពក្នុងការសម្រេចចិត្ត និងរៀបចំផែនការធ្វើដំណើរដោយខ្លួនឯង ខណៈដែលលោកបានព្រមានប្រទេសចិន កុំឲ្យបង្កើនភាពតានតឹង ប្រសិនបើលោកស្រីប្រធានសភាតំណាងរាស្រ្តអាមេរិក ពិតទៅជាទៅដល់កោះតៃវ៉ាន់ប្រាកដមែននោះ។
លោកបន្តថា លោកស្រីប្រធានសភាតំណាងរាស្រ្ត នឹងធ្វើការសម្រេចចិត្តផ្ទាល់ខ្លួន ថានឹងទៅកាន់កោះតៃវ៉ាន់ឬអត់”។ លោកបន្តថា “សភាគឺជាស្ថាប័នឯករាជ្យ ហើយមានអំណាចស្មើនឹងរដ្ឋាភិបាល និយាយរួមវាគឺជាការសម្រេចរបស់លោកស្រីទាំងស្រុង”។
ទោះជាយ៉ាងណា សហរដ្ឋអាមេរិកត្រូវបានគេមើលឃើញថា កំពុងដើរចេញកាន់តែឆ្ងាយពី គោលនយោបាយចិនតែមួយ តាមរយៈការបញ្ជូនមន្ត្រី និងអតីតមន្ត្រីរបស់ខ្លួនមកបំពេញទស្សនកិច្ចនៅតៃវ៉ាន់ជាបន្តបន្ទាប់។
តួយ៉ាងសូម្បីតែលោក បៃដិនផ្ទាល់ចាប់ឡើង កាន់តំណែងជាប្រធានាធិបតីមក ធ្លាប់បានលើកឡើង៣ដងថា សហរដ្ឋអាមេរិកនឹងធ្វើអន្តរាគមន៍យោធាការពារតៃវ៉ាន់ រីឯ អតីតរដ្ឋមន្ត្រីការបរទេសអាមេរិក លោក ម៉ៃក៍ ប៉ុមប៉េអូ បានជំរុញត្រង់ៗឱ្យអាមេរិកគាំទ្រឯករាជ្យភាពតៃវ៉ាន់។
តើអាមេរិកត្រៀមប្រកាសឯករាជ្យឲ្យកោះតៃវ៉ាន់?
ដំណើរទស្សនកិច្ចយ៉ាងគឃ្លើនរបស់មេ ដឹកនាំអាមេរិកជាច្រើនលើកច្រើនសារកន្លងមកនេះ ត្រូវបានគេមើលឃើញថា មហាអំណាចលេខ១របស់ពិភពលោកនេះ កំពុងដើរកកូរកកាយគេឯង មិនចប់មិនហើយ ដែលជាទង្វើមួយបង្ករឿង ស្របពេលមេដឹកនាំ និងប្រជាជនអាមេរិកភាគច្រើន សុទ្ឋតែមើលឃើញថា ប្រទេសចិន កំពុងគំរាមកំហែងសន្តិសុខជាតិរបស់ខ្លួន នៅពេលដែលមហាអំណាចសេដ្ឋកិច្ចទី២ របស់ពិភពលោកនេះ កំពុងបង្កើនឥទ្ឋិពលទាំងសេដ្ឋកិច្ច យោធា និងឥទ្ឋិពលរបស់ខ្លួននៅលើពិភពលោក។
មេដឹកនាំអាមេរិកក្នុងរដ្ឋការលោកដូណាល់ ត្រាំធ្លាប់បានធ្វើរឿងស្រដៀងគ្នានេះម្តងរួចមកហើយ ដោយប្រកាសឲ្យទីក្រុងយ៉េរ៉ូសាឡឹម ស្ថិតក្នុងទឹកដីរបស់ប្រទេសអ៉ីស្រ្តាឯល បើទោះបីជាមានការរិះគន់ជាអន្តរជាតិក្តី។
ដំណើរទស្សនកិច្ចរបស់ក្រុមមន្រ្តីជាន់ខ្ពស់ របស់សហរដ្ឋអាមេរិកនាពេលកន្លងមក កំពុងបង្ហាញចេតនាសំខាន់ៗមួយចំនួន ទី១ ជាការដាស់ស្មារតីចិន ដើម្បីបង្ហាញពីភាពមានប្រៀបរបស់ខ្លួន ក្នុងការកំណត់ជោគវាសនារបស់កោះតៃវ៉ាន់ ទី២ ជាការបង្ហាញសាច់ដុំកំញើញចិន និងជាកលយុទ្ឋដើម្បីចចារយកអ្វីមួយពីចិន ទី៣ ការប្រកាសឯករាជ្យរបស់កោះតៃវ៉ាន់ នឹងក្លាយជាពរជ័យមួយសម្រាប់អាមេរិក ប៉ុន្តែវាក៏ជាបណ្តាសាររបស់កោះនេះផងដែរ។
ហេតុនេះ ការសម្រេចចិត្តរបស់មេដឹកនាំកោះនេះ នឹងជាការសម្រេចចិត្តកំណត់អាយុជីវិតរបស់ប្រជាជននៅដែនកោះនេះ ក៏ដូចជា កំណត់វាសនារបស់់កោះនេះ ត្រូវរងបណ្តាសារឬអត់? ព្រោះប្រសិនបើមហាយក្សចិនសម្រេចចិត្តវាយយកកោះនេះ ប្រទេសមានសេដ្ឋកិច្ចធំលំដាប់ទី២នេះនឹងយកឲ្យបាន ទោះបង់ក្នុងតម្លៃណាក៏ដោយ។
តើចិនទុកឲ្យយប់យន់សុបិនយូរឬទេ?
មេដឹកនាំចិនរាប់ជំនាន់មកហើយ មិនដែលសម្រេចចិត្តវាយយកកោះនេះនោះទេ គឺមានតែសង្រ្គាមពាក្យសម្តី និងកំញើញប៉ុណ្ណោះ។
សំណួរនៅពេលនេះ តើចិននឹងនៅតែបន្តទុកឲ្យមាន “យប់យន់សុបិនយូរដែរឬទេ?” មុនឆ្លើយសំណួរនេះ យើងគួរសិក្សាទៅលើទិដ្ឋភាពមួយចំនួនដូចជា ទី១ តើមេដឹកនាំប្រទេសនេះ បានត្រៀមខ្លួនរួចរាល់សម្រាប់ធ្វើសង្រ្គាមហើយឬនៅ? ទី២ តើចិនបានរៀបចំរចនាសម្ព័ន្ឋសេដ្ឋកិច្ចហើយឬនៅ សម្រាប់ផលប៉ះពាល់ពីសង្រ្គាមនេះ? ទី៣ តើចិនមានមូលដ្ឋាននិងរចនាសម្ព័ន្ឋសេដ្ឋកិច្ចបានល្អបែបណា បើធៀបនឹងប្រទេសរុស្ស៊ី? ទី៤ តើចិននឹងមានអ្វីទប់ទល់ឬទេ? ប្រសិនជាអាមេរិកលូកដៃចូល ក្នុងសង្រ្គាមនេះ ស្របពេលដែលប្រទេសនេះ មានច្បាប់ការពារតៃវ៉ាន់រួចទៅហើយ។
ទី៥ តើចិនបានត្រៀមខ្លួនសម្រាប់សង្រ្គាមរយៈពេលខ្លី ឬរយ
ៈពេលវែង? ទី៦ តើចិននឹងឈ្នះសង្រ្គាមនេះដោយរបៀបណា ឬត្រូវរង់ចាំដោយភាពអត់ធ្មត់តទៅទៀត?។ ទី៧ តើការបន្តទុកឲ្យដែនកោះនេះ នៅតែជាឆ្អឹងស្លាក់ក្នុងបំពង់ “ក”របស់ខ្លួនដល់ពេលណា? ទី៨ ប្រសិនជាបណ្តោយឲ្យដែនកោះនេះ អាចអភិវឌ្ឍន៍សព្វាវុធរបស់ខ្លួនកាន់តែខ្លាំង តើពេលអនាគតចិននឹងបន្តឈឺចាប់មិនចប់មិនហើយឬ?។
ត្រូវមានការអត់ធ្មត់បន្តឬ
គ្រប់សំណួរខាងលើ មេដឹកនាំចិនប្រហែលជាបានឆ្លើយរួចហើយថា នឹងមានអ្វីកើតឡើង ប្រសិនជាមហាយក្សនេះ លើកទ័ពឈ្លានពានយកដែនកោះនេះ។
មេដឹកនាំចិនហ្សី ជីនពីងបាន និងកំពុងសាងសង់ផ្លូវហាយវេតភ្ជាប់ពីទឹកដីចិន ទៅកោះតៃវ៉ាន់បណ្តើរៗហើយ ប៉ុន្តែផែនការនេះត្រូវបានជំទាស់ដោយមេដឹកនាំតៃវ៉ាន់។
ជាមួយនឹងដំណើរទស្សនកិច្ច ដែលបានព្រាងទុករបស់លោកស្រីNancy Pelosi បាននិងកំពុងធ្វើឲ្យមហាយក្សចិន បានបាញ់ផ្លោងគ្រាប់ពិតជាច្រើន សំដៅទៅកាន់ច្រកសមុទ្រតៃវ៉ាន់ ជាការកំញើញមួយសម្រាប់មេដឹកនាំកោះនេះ ដែលត្រូវបានគេប្រសិទ្ឋនាមថា “ជាស្រ្តីចិត្តដែក” ប៉ុន្តែយ៉ាងណាក៏ដោយ ស្ថានការណ៍មកទល់ពេលនេះ អ្វីៗមិនទាន់ប្រាកដប្រជានៅឡើយ ខណៈដែលប្រជាជនតៃវ៉ាន់ជាច្រើន បានចេញមុខធ្វើបាតុកម្មទាមទារឲ្យមេដឹកនាំរដ្ឋសភាអាមេរិក លុបចោលដំណើរទស្សនកិច្ចរបស់ខ្លួន។
ហេតុនេះការសម្រេចចិត្តរបស់ចិន នៅពេលនេះមានសារៈសំខាន់ណាស់ ដោយឈរលើទិដ្ឋភាពមួយចំនួន ទី១ ការសម្រេចចិត្តយកកោះតៃវ៉ាន់មកវិញ ជាការរក្សានូវកិត្យានុភាពរបស់ខ្លួនផង ក្នុងការបង្ហាញពីអំណាចរបស់ខ្លួនផង ទី២ ជាការបង្ហាញទៅសម្ព័ន្ឋមិត្តរបស់ខ្លួនថា ចិនមានសមត្ថភាពគ្រប់គ្រាន់ ក្នុងការការពារះអធិបតេយ្យភាពរបស់ខ្លួន និងសម្ព័ន្ឋមិត្តរបស់ខ្លួន ទី៣ ជាការបង្ហាញថា ចិនមិនអាចអត់ធ្មត់ឲ្យគេ “ខោកក្បាលឬប្រមាទម្តងហើយម្តងទៀត? ឬចិនប្រើយុទ្ឋសាស្រ្តរបស់លោកសឺ ម៉ាអ៉ី? សុខចិត្តឲ្យគេប្រមាទ ប៉ុន្តឈ្នះនៅពេលក្រោយ?។
ការសម្រេចចិត្តរបស់មេដឹកនាំតៃវ៉ាន់នាពេលនេះ មិនខុសគ្នាប៉ុន្មាននឹងមេដឹកនាំអ៊ុយ ក្រែន ដែលប្រធានាធិបតីប្រទេសប្រស៊ីលថា “ប្រជាជនអ៊ុយក្រែនជាង៤០លាននាក់ ផ្ញើរវាសនាលើអ្នកកំប្លែងម្នាក់”នោះទេ។
ស្របពេលជាមួយគ្នានេះ តើមេដឹកនាំចិនសម្រេចចិត្តហើយឬនៅ? ឬអត់ធ្មត់បន្តទៀត ដោយរកវិធីសាស្រ្តចាំក្រសោបយកទឹកដីនេះ ត្រលប់មកវិញដោយគ្មានការបង្ហូរឈាម?៕
អ្នកនាំពាក្យក្រសួងការបរទេសចិនបានប្រកាសថា យោធារបស់ប្រទេសចិន “នឹងមិនអង្គុយនៅស្ងៀមឡើយ” ប្រសិនបើរដ្ឋាភិបាលក្រុងប៉េកាំង មានអារម្មណ៍ថា “អធិបតេយ្យភាព និងបូរណភាពទឹកដី” របស់ខ្លួនកំពុងត្រូវបានគំរាមកំហែង៕ CNN៕
